UKPEPN̄KPỌ 13
Ufọkabasi Abian̄a Ẹbiat Enyịn̄ Abasi
Abasi enen̄ede ama mme owo. Edi nso inam nsio nsio ufọkabasi emi ẹdọhọde ke ikpono Abasi ẹsinam se mîfọnke? Mmọ ẹdi ufọkabasi abian̄a; mmọ ẹbiat enyịn̄ Abasi. Didie ke mmọ ẹbiat enyịn̄ Abasi? Abasi ada mmọ didie? Nso ke enye edinam mmọ?
1. Didie ke mme n̄kpọ oro ufọkabasi abian̄a ẹkpepde abiat enyịn̄ Abasi?
Mme ufọkabasi abian̄a “ẹkpụhọde akpanikọ Abasi ẹbọ nsu.” (Rome 1:25) Ke uwụtn̄kpọ, mmọ imaha ndikpep ikọt mmọ ata enyịn̄ Abasi kpa ye oro Bible ọdọhọde kpukpru owo ẹkot enyịn̄ oro. (Rome 10:13, 14) Ke ini idiọkn̄kpọ etịbede, ndusụk ikpọ owo ufọkabasi ẹsidọhọ ke edi uduak Abasi. Ata ata nsu edi oro. Abasi isiduakke idiọkn̄kpọ, enye isinamke idiọkn̄kpọ etịbe ọnọ owo. (Kot James 1:13.) Nsu emi ẹkpepde mme owo ke nsio nsio ufọkabasi iyakke mme owo ẹnen̄ede ẹma Abasi.
2. Didie ke mme n̄kpọ oro ufọkabasi abian̄a ẹnamde abiat enyịn̄ Abasi?
Se mme ufọkabasi abian̄a ẹnamde mme owo inemke Jehovah. Bible ọdọhọ ke mme idiọkn̄kpọ mmọ “ẹboho ọtọkiet ẹkon̄ ẹsịm enyọn̄.” (Ediyarade 18:5) Ndusụk ikpọ owo ufọkabasi ẹdu uwem nte mme imọ owo, ẹsinyụn̄ ẹnam mbon ufọkabasi mmọ ẹnọ okụk man mmọ ẹda ẹdu utọ uwem oro. Ikụreke ke oro-o, toto ke eset, nsio nsio ufọkabasi ẹsitiene ẹsịn idem ke pọlitik, ẹsịn idem ke ẹkọn̄, ẹnam ẹwot mme owo, m̀mê ẹdi ntak n̄kpa ediwak owo. Kpukpru emi owụt ke mmọ idiọn̄ọke Abasi, inyụn̄ idotke ndidi ikọt esie.—Kot 1 John 4:8.
3. Abasi ada ufọkabasi abian̄a didie?
Ndi se mme ufọkabasi abian̄a ẹnamde esiyat fi? Edieke esiyatde fi, ndi ukereke ke esiyat Jehovah Abasi akan oro? Enye enen̄ede ama mme owo. Oro anam enye enen̄ede ayat esịt ye mme ufọkabasi abian̄a ye mme ikpọ owo mmọ, sia mmọ ẹsinam n̄kpọ ye ikọt mmọ nte mmọ ẹmade-ma. Jehovah ọn̄wọn̄ọ ke iyosobo kpukpru ufọkabasi abian̄a, ke ‘owo idinyụn̄ ikwe mmọ aba.’ (Ediyarade 18:21) Ibịghike enye oyosobo kpukpru nsunsu ufọkabasi, kpukpru ufọkabasi abian̄a, efep.—Ediyarade 18:8.
SỊN IDEM KPEP
Se n̄kpọ en̄wen oro owụtde nte Abasi adade mme ufọkabasi abian̄a. Oyokụt n̄ko se mmọ ẹsinamde, ye ntak emi mûkpayakke oro akpan fi ndikpep n̄kpọ mban̄a Jehovah Abasi.
4. Abasi imaha kpukpru ufọkabasi
Ediwak owo ẹdọhọ ke ufọkabasi ẹtie nte nsio nsio usụn̄ emi adade owo aka ebiet kiet, ke inamke n̄kpọ m̀mê owo aka ewe ufọkabasi, ke Abasi kiet ke ẹkpono. Ndi ikọ oro edi akpanikọ? Kot Matthew 7:13, 14, ekem ẹbọrọ mbụme emi ẹnyụn̄ ẹneme ẹban̄a enye:
Nso ke Bible etịn̄ aban̄a usụn̄ emi adade aka uwem?
Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Se Bible etịn̄de owụt nso, ndi owụt ke Abasi ama ufọkabasi ekededi oro owo akade?
5. Ufọkabasi abian̄a iyakke ẹkụt ke Abasi ama mme owo
Mme ufọkabasi abian̄a ẹbiat enyịn̄ Abasi etieti. Ata idiọkn̄kpọ kiet emi mmọ ẹnamde ẹbiat enyịn̄ Abasi edi ndisịn idem ke ekọn̄. Ke uwụtn̄kpọ, se VIDIO emi. Ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
Nso ke ediwak ufọkabasi ẹkenam ke ini Ọyọhọ Ekọn̄ Ererimbot Iba?
Afo ese didie se mmọ ẹkenamde oro?
Kot John 13:34, 35 ye 17:16. Ekem ẹbọrọ mbụme emi ẹnyụn̄ ẹneme ẹban̄a mmọ:
Ekere ke esitie Jehovah didie ufọkabasi ẹma ẹtiene ẹsịn idem ke ekọn̄?
Ediwak ndiọi n̄kpọ oro akade iso ke ererimbot emi, ufọkabasi ẹdi ntak. Nso n̄kpọ ke ufọkabasi ẹnam, emi owụtde fi ke mmọ imaha mme owo nte Abasi ọdọhọde?
Mme ufọkabasi abian̄a iyakke mme owo ẹkụt ke Abasi enen̄ede ama mmimọ
6. Abasi oyom mme owo ẹkpọn̄ kpukpru ufọkabasi abian̄a
Kot Ediyarade 18:4,a ekem ẹbọrọ mbụme emi ẹnyụn̄ ẹneme ẹban̄a enye:
Etie fi didie ke idem ndidiọn̄ọ ke Abasi enen̄ede oyom ndin̄wam mbon oro nsunsu ufọkabasi ẹbian̄ade?
7. Kûtre ndikpep n̄kpọ mban̄a ata Abasi
Ndi ọfọn ayat esịt ye Abasi ke ntak n̄kpọ emi mme ufọkabasi abian̄a ẹnamde? Edieke eyen emi mîmaha ndikop nti item ete esie ọwọrọde ọkpọn̄ ufọk okodu etịme etịme uwem, emi ete esie asuade, ntak emi mîkpọfọnke ọkọtọhọ ye ete esie?
Ntak emi mîfọnke owo ayat esịt ye Abasi ke ntak n̄kpọ emi nsunsu ufọkabasi ẹnamde?
NDUSỤK OWO ẸSIDỌHỌ ẸTE: “Kpọn̄ mi ye n̄kpọ Abasi, ke ufọkabasi ẹsịn ntịme ẹkaha.”
Ndi se ufọkabasi ẹnamde esinam etie fi ntre?
Ntak emi nnyịn mîkpayakke se ufọkabasi abian̄a ẹnamde anam nnyịn iyat esịt ye Jehovah Abasi?
SE IKPEPDE
Se mme ufọkabasi abian̄a ẹsikpepde ẹnyụn̄ ẹnamde abiat enyịn̄ Abasi. Abasi oyosobo kpukpru ufọkabasi abian̄a.
Se M̀mê Emeti
Esitie fi didie ke idem ama eti se mme ufọkabasi abian̄a ẹkpepde ẹnyụn̄ ẹnamde?
Jehovah ada ufọkabasi abian̄a didie?
Nso ke Abasi edinam kpukpru ufọkabasi abian̄a?
KPEP N̄KPỌ EN̄WEN
Se n̄kpọ iba emi anamde Abasi okûma ata ediwak ufọkabasi.
“Ndi Kpukpru Ufọkabasi Ẹdi Kiet? Ndi Kpukpru Mmọ Ẹkpono Ata Abasi?” (Odu ke jw.org)
Ntak emi Jehovah oyomde idiana ye ata ikọt esie inam n̄kpọ esie?
“Ndi Ana Owo Enyene Ufọkabasi Emi Enye Esikade?” (Odu ke jw.org)
Se nte oku emi ufọkabasi ẹkenamde se ifịnade enye mîkayakke n̄kpọ akpan enye ndiyom ata Abasi.
Toto ke eset, se ediwak ufọkabasi ẹkpepde anam etie nte Abasi ọsọsọn̄ esịt inyụn̄ imaha mme owo. Se uwụtn̄kpọ ita mi ye se idide akpanikọ
“Nsu Oro Mîyakke Ndusụk Owo Ẹma Abasi” (Enyọn̄-Ukpeme, November 1, 2013)
a Okpoyom ndidiọn̄ọ ntak emi Bible okotde nsunsu ufọkabasi Akwa Babylon, onyụn̄ emende mmọ odomo ye n̄wan, se Se Ẹwetde Ẹdian 1.