“Ikọ Abasi Enyene Uwem, Onyụn̄ Ananam N̄kpọ”
1, 2. (a) Nso inam ukpụhọde ẹdu ke uwem mbon oro ẹkabarede ẹdi Christian? (b) Adan̄a didie ke Bible ekeme ndinyene odudu ke idemowo?
KE UFỌT ufọt akpa isua ikie C.E., apostle Paul ama ewet n̄wed ọnọ ẹsọk esop Christian ke Rome. Ke n̄wed emi enye ama osio mme ukpụhọde oro ẹyomde mme ata Christian ẹnam owụt. Enye ọkọdọhọ ete: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Nso idi n̄kpọ oro okpụhọrede mme anditiene Jesus, enen̄erede usụn̄ ukere n̄kpọ mmọ? Ke editịm ntịn̄, enye edi odudu oro Ikọ Abasi, kpa Bible, enyenede.
2 Paul ama owụt nte Bible ekemede ndinen̄ede nnyene odudu ke idem nnyịn ke ini enye ekewetde ete: “Ikọ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, okịm abahade ukpọn̄ ye spirit, ye ikek ye ndia; onyụn̄ enyene ukeme ndidụn̄ọde ekikere ye uduakesịt owo.” (Mme Hebrew 4:12) Ke akpanikọ, utịbe utịbe odudu oro Bible enyenede ke ndinam mme utọ ukpụhọde oro ke idem mme owo edi uyarade anamde ẹnyịme nte ke enye akan ikpîkpu ikọ owo.
3, 4. Ke nso udomo ke edu uwem mme Christian ẹkpụhọde?
3 Ikọ Greek oro ẹkabarede “ẹkpụhọde,” ke N̄wed Mbon Rome 12:2 ọwọrọ oto me·ta·mor·phoʹo. Enye ada ọnọ ọyọhọ ukpụhọde, nte emi itụt esikpụhọrede akabade ọfọn̄ekpo. Enye edi ata ọyọhọ ọyọhọ tutu eyedi se Bible etịn̄de aban̄a enye nte edikpụhọde edu uwem. Ke ufan̄ikọ Bible efen, nnyịn ikot ite: “Ẹsio akani edu uwem ye mme edinam esie ẹduọk, ẹnyụn̄ ẹmen obufa edu uwem ẹsịne ke idem mbufo, emi ẹnamde edi obufa oto ke nnennen ifiọk nte ekemde ye mbiet Andibot enye.”—Colossae 3:9, 10, NW.
4 Ke ewetde n̄wed ọnọ ẹsọk esop ke Corinth, Paul ama owụt udomo ukpụhọde edu uwem emi akadade itie ke akpa isua ikie. Enye ọkọdọhọ ete: “Mbon use, ye mme okpono ndem, ye mme esịn efịbe, ye mmọ eke ẹbietde iban, ye mmọ eke ẹsabarede idem, ye mme inọ, ye mme esịn esịt ke n̄kpọ owo, ye mme oyụhọ mmịn, ye mbon idiọkinua, ye mme akan owo ubọk ididaha Obio Ubọn̄ Abasi inyene. Ndien ndusụk mbufo eketie ntem; edi ẹma ẹyet mbufo.” (1 Corinth 6:9-11) Ih, mme owo ẹmi ẹkedude oburobụt uwem ẹnyụn̄ ẹtiede utọk utọk, mme inọ ye mme akpa mmịn, ẹma ẹkpụhọde ẹdi mme Christian oro ẹnịmde eti uwụtn̄kpọ.
Mme Edikpụhọde Edu Uwem Mfịn
5, 6. Didie ke odudu oro Bible enyenede okokpụhọde edu uwem akparawa kiet ofụri ofụri?
5 Ẹkụt ukem ukpụhọde ẹmi ke edu uwem mfịn. Ke uwụtn̄kpọ, akparawa kiet ke N̄kan̄ Edem Usụk America ama anana ete ye eka ke edide isua usụkkiet ke emana. Enye ama ọkọri ọwọrọ owo ye unana ndausụn̄ eke ete ye eka onyụn̄ enyene n̄kpọsọn̄ mfịna edu uwem. Enye obụk ete: “Ami ntisịm isua 18, mma nnen̄ede nnyene mbumehe uda n̄kpọsọn̄ ibọk nnyụn̄ mbabiat ini ke ufọk-n̄kpọkọbi ke ntak n̄keyịpde n̄kpọ man n̄kaiso ke edu emi.” Eyeneka eka esie an̄wan, nte ededi, ekedi owo Ntiense Jehovah, ndien ke akpatre n̄wan emi ama ekeme ndin̄wam enye.
6 Akparawa emi anam an̄wan̄a ete: “Eyeneka eka mi an̄wan ama ọtọn̄ọ ndikpep Bible ye ami, ndien ke ọfiọn̄ itiaba ẹma ẹkebe ami mma n̄keme ndikpọn̄ edu uda n̄kpọsọn̄ ibọk ke idiọk usụn̄.” Enye n̄ko ama adian̄ade ọkpọn̄ mme nsan̄a oro enye ekenyenede ke mbemiso onyụn̄ enyene mbufa ufan ke otu Mme Ntiense Jehovah. Enye akaiso ete: “Mbufa nsan̄a ẹmi, ọkọrọ ye ami ndikpep Bible kpukpru ini, ama an̄wam mi ndinam n̄kọri ndien ke akpatre ndiyak uwem mi nnọ ndinam n̄kpọ Abasi.” Ih, akani enyene mbumehe uda n̄kpọsọn̄ ibọk ye inọ emi idahaemi edi ọsọn̄idem Christian emi odude edisana uwem. Didie ke ekekeme ndinam utọ akwa ukpụhọde ntre ke edu uwem? Ebe ke odudu oro Bible enyenede.
7, 8. Nam an̄wan̄a nte ẹkekọkde mfịna ọkpọsọn̄ edu uwem ye un̄wam otode Bible.
7 Uwụtn̄kpọ efen oto n̄kan̄ edem usụk Europe. Do, akparawa kiet ama ọkọri ọwọrọ owo ye mfịna ọkpọsọn̄ edu uwem: kpa ibụmede ibụmede iyatesịt. Enye ama esin̄wana en̄wan kpukpru ini. Ke ini ubon mmọ ekenenide eneni ini kiet, enye ama amia ete esie, odịbede enye ọtọ ke isọn̄! Nte ededi, ke akpatre enye ama ekpep Bible ye Mme Ntiense Jehovah onyụn̄ edifiọk ewụhọ Abasi oro odude ke n̄wed Rome: “Ẹkûda idiọk ẹsio owo usiene idiọk. . . . Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo. Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi.”—Rome 12:17-19.
8 Ikọ ẹmi ẹma ẹn̄wam enye ndifiọk adan̄a nte mmemme esie ọkọdiọkde. Ifiọk Bible oro ọkọride-kọri ama okpụhọde ubieresịt esie, emi akan̄wamde enye ndikan edisop iyatesịt esie. Ini kiet, ke enye ama akanam ndusụk n̄kọri ke ukpepn̄kpọ esie, esenowo kiet ama osụn̄i enye. Akparawa emi ama okop orụk iyatesịt oro enye ekesikopde ke akpa. Ekem enye ama okop ntụk efen: kpa bụt; ndien emi ama akpan enye ndiyak idem nnọ iyatesịt esie. Enye ama ọkọri mfara ke idem, kpa akpan mbun̄wụm spirit kiet. (Galatia 5:22, 23) Edu uwem esie ama okpụhọde kemi, ekọm enyene odudu oro Ikọ Abasi enyenede.
9. Nte ekemde ye Paul, nso inam edu uwem nnyịn okpụhọde?
9 Nte ededi, didie ke Bible osion̄o utọ okopodudu utịp ntre edi? Paul, ke Colossae 3:10, ọkọdọhọ ke edu uwem nnyịn okpụhọde oto nnennen ifiọk, kpa ifiọk emi ẹkụtde ke Bible. Edi didie ke ifiọk okpụhọrede mme owo?
Udeme oro Nnennen Ifiọk Enyenede
10, 11. (a) Ke ini nnyịn ikpepde Bible, nso ke nnyịn idiọn̄ọ iban̄a nti ye ndiọi edu uwem? (b) Nso ke ẹyom ẹdian ye ifiọk man inam ukpụhọde ke edu uwem nnyịn?
10 Akpa, Bible anam ẹdiọn̄ọ ndiọi edu uwem ẹmi ẹnyenede ndisio nduọk. Mmọemi ẹsịne mme utọ edu nte “n̄kọkidem, edeme nsu, ye ubọk eke ẹduọkde iyịp owo eke mîduehe, esịt eke aduakde uduak ibak, ukot eke ọsọpde ebịne idiọk, owo eke oyokde nyok nte ntiense nsu, ye owo eke edemerede utọk ke otu nditọete kiet.” (Mme N̄ke 6:16-19) Ọyọhọ iba, Bible etịn̄ aban̄a nti edu ẹmi anade nnyịn ikọri, esịnede “ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.
11 Utọ nnennen ifiọk oro aman̄wam owo oro enyenede esịt akpanikọ ndidụn̄ọde idemesie nse m̀mê ewe edu ke oyom imọ ikọri n̄ko m̀mê ewe ke ana imọ isio iduọk. (James 1:25) Nte ededi, oro edi ntọn̄ọ kpọt. Ke adianade ye ifiọk, oyom uduakesịt, kpa n̄kpọ ndinụk enye man enye oyom ndikpụhọde. Mi n̄ko, enye oyom nnennen ifiọk otode Bible.
Uduakesịt Ndidi Edinen
12. Didie ke ifiọk aban̄ade edu Abasi an̄wam nnyịn ndikpụhọde?
12 Paul ọkọdọhọ ke ẹbot obufa edu uwem emi ẹyomde mi “nte ekemde ye mbiet Andibot enye.” (Colossae 3:10, NW) Ntre ana edu uwem Christian ebiet edu Abasi. (Ephesus 5:1) Ebede ke Bible, ẹmeyarade edu Abasi ẹnọ nnyịn. Nnyịn imokụt nte enye anamde n̄kpọ ye ubonowo inyụn̄ ikụt nti edu esie, utọ nte ima, mfọnido, eti ido, mbọm, ye edinen ido esie. Utọ ifiọk ntre esinụk owo oro enyenede esịt akpanikọ ndima Abasi nnyụn̄ nyom ndidi orụk owo oro Abasi onyịmede. (Matthew 22:37) Nte ndima nditọ, nnyịn iyom ndinam esịt Ete nnyịn eke heaven enem, ke ntre nnyịn imesidomo ndikpebe enye adan̄a nte nnyịn ikekeme ke mmemmem, anana mfọnmma idaha nnyịn.—Ephesus 5:1.
13. Ewe ifiọk ekpep nnyịn ‘ndima se inende, nnyụn̄ nsua se ikwan̄ade’?
13 Ifiọk oro Bible ọnọde aban̄a se eti edu uwem ye ndiọi edu ẹdade ẹkosịm ẹsisọn̄ọ uduakesịt nnyịn idem. (Psalm 14:1-5; 15:1-5; 18:20, 24) Nnyịn imọfiọk ke ẹma ẹdiọn̄ David ke ntak emi enye eketen̄ede Abasi onyụn̄ amade se inende, edi nte ke enye ama ọbọ ufen ke ini enye ọkọduọkde mfara ke idem. Nnyịn imokụt mfụhọ mfụhọ utịp okodude ke ini ẹkebiatde nti edu Solomon ke isua usọn̄ esie. Mme edidiọn̄ ẹketode nti edinam Josiah ye Hezekiah ẹmekpụhọde ye mme afanikọn̄ oro idiọkido Ahab ye nsọn̄ibuot mfiakedem Manasseh ẹkedade ẹdi. (Galatia 6:7) Ntem ke nnyịn ikpep ‘ndima se inende, nnyụn̄ nsua se ikwan̄ade.’—Mme Hebrew 1:9; Psalm 45:7; 97:10.
14. Nso idi mme uduak Jehovah kaban̄a ererimbot ye mme owo oro ẹdude ke enye?
14 Nnennen ifiọk aban̄ade mme uduak Abasi ekeme n̄ko ndinam uduakesịt ọsọn̄idem akan. Utọ ifiọk ntre an̄wam ndikpụhọde ‘edu eke odude ke esịt nnyịn,’ kpa edu oro akarade ekikere ye mme edinam nnyịn. (Ephesus 4:23, 24) Ke ini nnyịn ikpepde Bible, nnyịn imọdiọn̄ọ ite ke Jehovah idiyoho idiọkido ke nsinsi. Ibịghike, enye eyesobo idiọk ererimbot emi efep onyụn̄ ada ‘obufa enyọn̄ ye obufa isọn̄ emi edinen ido edidụn̄de’ edi. (2 Peter 3:8-10, 13) Mmanie ẹdidụn̄ ke obufa ererimbot emi? “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ebịghi ke esịt. Edi ẹyesobo mme idiọkowo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:21, 22.
15. Edieke nnyịn inen̄erede inịm se Bible etịn̄de aban̄a mme uduak Jehovah ke akpanikọ, didie ke emi editụk nnyịn nte mme owo?
15 Edieke nnyịn inen̄erede inịm un̄wọn̄ọ emi ke akpanikọ, emi eyetụk ofụri usụn̄ ukere n̄kpọ nnyịn. Apostle Peter, ke ama eketịn̄ aban̄a edisobo mme idiọkowo mfep, ọdọhọ ete: “Sia kpukpru n̄kpọ ẹmi ẹdibiarade ntem, nso orụk owo ke mbufo ẹkpedi ke edisana ido ye ke uten̄e Abasi? Mbufo ẹmi ẹtiede ẹbet ẹnyụn̄ ẹsọn̄ọde ẹyom edidi Usen Abasi.” (2 Peter 3:11, 12) Ọkpọsọn̄ ubiere nnyịn ndidi kiet ke otu ndinen owo oro edisụhọde ke ini ẹsobode ndiọi owo ẹfep ẹkpenyene ndibot edu uwem nnyịn.
16. Orụk edu uwem ewe mîdinyeneke itie ndomokiet ke obufa ererimbot, ndien didie ke ifiọk aban̄ade emi okpotụk nnyịn?
16 N̄wed Ediyarade ọn̄wọn̄ọ ọnọ nti owo ete ke utịt ererimbot emi ebede, “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Edi ekem enye odụri owo utọn̄ ete ke ẹyesịn “mbon esịtndịk, ye mmọemi mînịmke ke akpanikọ, ye mmọemi ẹmade mbubiam ido, ye mme owot-owo, ye mbon use, ye mbia-idiọn̄, ye mme okpono ndem, ye kpukpru mme osu nsu.” (Ediyarade 21:4, 8) Owụt ifiọk didie ntem nditre ndiọi edu oro Abasi mîdiyakke odu ke obufa ererimbot!
Un̄wam Otode Ebiet Efen
17. Nso orụk un̄wam ke Bible ọnọ nnyịn item ete iyom?
17 Nte ededi, mme owo ẹdi mmemme, ndien nte ido edide mmọ ẹyom n̄kpọ en̄wen ndidian ye ntọt ye uduakesịt edieke anade mmọ ẹnam mme ukpụhọde. Mmọ ẹyom ọkpọ ọkpọ un̄wam, ndien Bible owụt nnyịn ebiet emi nnyịn ikemede ndikụt un̄wam emi. Ke uwụtn̄kpọ, enye ọdọhọ ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme eyediọn̄ ọdiọk.” (Mme N̄ke 13:20) Ukem ntre, edieke nnyịn isan̄ade ye mbon oro ẹnyenede mme edu oro nnyịn iyomde ndikọri, ẹyen̄wam nnyịn akamba akamba ndikabade ntie nte mmọ.—Genesis 6:9; Mme N̄ke 2:20; 1 Corinth 15:33.
18, 19. Nso ke nnyịn inyene ndinam man iyak ekikere ye esịt nnyịn inọ spirit Abasi?
18 Adianade do, Jehovah ke idemesie ọmọnọ un̄wam ke usụn̄ eke edisana spirit—kpa ukem spirit oro enye akadade anam mme utịben̄kpọ ke mme ini eset. Ke akpanikọ, ẹkot n̄kokon̄ nti edu “ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem” “mbun̄wụm spirit.” (Galatia 5:22, 23) Didie ke nnyịn ibọ un̄wam ito edisana spirit? Sia ẹkewetde Bible ke ndausụn̄ edisana spirit, ke ini nnyịn ikotde enye m̀mê itịn̄de inọ mbon en̄wen iban̄a enye, nnyịn iyak esịt ye ekikere nnyịn inọ mbukpek mbukpek odudu eke spirit oro. (2 Timothy 3:16) Ke akpanikọ, Jesus ọkọn̄wọn̄ọ ete ke ini nnyịn isiande mbon en̄wen idotenyịn nnyịn, ke nnyịn imekeme ndikụt nnennen edinam eke spirit oro.—Matthew 10:18-20.
19 Ke adianade do, Bible ọnọ uyo ete: “Ẹkọbọ ke edibọn̄ akam.” (Rome 12:12) Ke akam nnyịn itịn̄ ikọ inọ Jehovah, itoro enye, ikọm enye, inyụn̄ iben̄e un̄wam esie. Edieke nnyịn iben̄ede iyom un̄wam ndikan ndioi edu uwem, utọ nte ọkpọsọn̄ iyatesịt, nsọn̄ibuot, unana ime, m̀mê ntan̄idem, spirit Abasi eyebere ye ukeme ekededi oro nnyịn isịnde ke n̄kemuyo ye akam oro.—John 14:13, 14; James 1:5; 1 John 5:14.
20. Ntak emi mme Christian ẹnyenede ndikaiso nnam n̄kpọ ke ndimen obufa owo nsịne-e?
20 Ke ini Paul ekewetde ete: “Ẹkpụhọde, oto ke edinam emi ẹnamde esịt mbufo ẹdi obufa,” enye ekewet ọnọ esop oro mme Christian ẹnade baptism oro ẹyetde aran, ẹnamde. (Rome 1:7; 12:2) Ndien ke akpasarada usem Greek, enye akada uduot ikọ edinam oro adade ọnọ n̄kaiso edinam. Emi ọnọ ekikere aban̄a n̄kaiso ukpụhọde emi nnennen ifiọk oro otode Bible anamde ke idem nnyịn. Mfịn—ukem nte mme Christian ke eyo Paul—ererimbot oro ọyọhọde ye mbiara odudu akanade nnyịn okụk. Ndien nnyịn—nte mmọ—idi mme anana mfọnmma owo, ikọbọde ke ndinam idiọk. (Genesis 8:21) Ntem, nnyịn inyene ndikaiso nnam n̄kpọ ke ndikan akani, ibụk ibụk edu uwem inyụn̄ imen obufa edu isịne, ukem nte mmọ ẹkenamde. Mme akpa Christian ẹma ẹkụt unen tutu okosịm utọ udomo oro mmọ ẹkewọrọde ẹda ata san̄asan̄a ẹkpọn̄ ererimbot oro akakande mmọ okụk. Mme Christian mfịn ẹnam ukem oro.
Mme Owo Oro ‘Jehovah Etemede’
21. Ndusụk prọfesi ewe ẹsu ikọt Abasi ke idem ke akpatre usen emi?
21 Ke akpanikọ, spirit Abasi mfịn inamke utom ke idem mme owo ikpọn̄îkpọn̄ edi n̄ko ke ofụri esop mme Christian, oro ẹwakde ẹkosịm ediwak million. Ke esop emi ke ntịn̄nịmikọ Isaiah ẹmi ẹsu: “Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemọ, nnyịn iyenyụn̄ isan̄a ke usụn̄ esie.” (Isaiah 2:3) Prọfesi Isaiah efen efen n̄ko omosu ọnọ mmọ: “Jehovah eyenyụn̄ eteme kpukpru nditọ fo; ndien emem nditọ fo okpon.” (Isaiah 54:13) Mmanie ẹdi mbon ẹmi ẹnyenede emem koro Jehvah etemede?
22. (a) Mmanie mfịn ke Jehovah eteme? (b) Nọ mme uwụtn̄kpọ ndiwụt ke mbonan̄wa ẹdiọn̄ọ ẹte ke Mme Ntiense Jehovah ẹnyene ukpụhọde.
22 Ọfọn, tịmfiọk se ẹkotde ẹto leta emi ẹkewetde ẹnọ ẹsọk New Haven Register, kpa n̄wedmbụk n̄kpọntịbe N̄kan̄ Edem Edere America ete: “Ke edide afo ama esikop ifụtesịt [okop iyatesịt], nte ami n̄kesikopde, abana utom unam owo ẹkabade ẹbuana ke ido ukpono mmọ, afo enyene ndima uyakidem mmọ, eti ido mmọ, n̄wọrọnda uwụtn̄kpọ eti edu-uwem ye usanaidem mmọ.” Mmanie ke ewetn̄wed emi eketịn̄ aban̄a? Kpa ukem otu oro Herald eke Buenos Aires, Argentina, ekenemede aban̄a, ke ini enye ọkọdọhọde ete: “Ẹma ẹkụt ke Mme Ntiense Jehovah ke ofụri isua ẹmi ẹkebede ẹdi mbon obio oro ẹnamde utom ọkpọsọn̄, ẹsịnde ifịk, ẹnọde ntịn̄enyịn ke n̄kpọ ẹnyụn̄ ẹbakde Abasi.” Ke ukem usụn̄ oro, La Stampa, kpa n̄wedmbụk n̄kpọntịbe Italy ọkọdọhọ ete: “Mmọ isidịbeke mbak idikpe tax m̀mê ndiyom ndifehe mbọhọ mme ibet oro mîfereke owo ke idem ke ntak ufọn idemmọ. Mme ekikere nti ido uwem oro ẹban̄ade ediwụt mbọhọidụn̄ ima, edisịn itie ukara, unana edidu uwem afai ye ọkpọ ọkpọ edinam akpanikọ . . . ẹmenyene itie ke uwem ‘ofụri usen’ mmọ.”
23. Ntak emi Mme Ntiense Jehovah nte esop ẹwọrọde ẹda isio isio?
23 Ntak emi Mme Ntiense Jehovah nte otu—ukem nte mme akpa Christian—ẹwọrọde ẹda isio isio-o? Ke ediwak usụn̄, mmọ ẹdi ukem nte kpukpru owo en̄wen. Mmọ ẹkemana ye mme ukem unana mfọnmma eke owo, ndien mmọ ẹnyene ukem mfịna ke n̄kan̄ ndutịm uforo ye mme akpan n̄kpọ oro uwem oyomde. Nte ededi, nte esop eke ofụri ererimbot, mmọ ẹmeyak Ikọ Abasi enyene odudu ke uwem mmọ. Otu ata nditọete Christian eke ofụri ererimbot oro osụn̄ọde oto emi edi okopodudu uyarade nte ke Bible edi Ikọ Abasi eke odudu spirit.—Psalm 133:1.
Bible Edi Ikọ eke Odudu Spirit
24. Nso idi akam nnyịn ke ibuot ediwak owo efen efen?
24 Ke ibuotikọ iba ẹmi, nnyịn imeneme iban̄a kpa usụn̄ uyarade iba ndiwụt ke Bible edi Ikọ Abasi, idịghe eke owo. Edide mmọ ẹneme ẹban̄a anana-mbiet eti ibuot oro odude ke Bible m̀mê odudu esie ndikpụhọde mme owo—m̀mê ediwak n̄kpọ en̄wen oro onịmde enye idiọn̄ọ nte edide n̄wọrọnda—mme owo oro ẹnyenede esịt akpanikọ isitreke ndidiọn̄ọ ke anaedi Abasi ọkọnọ ndausụn̄. Nte mme Christian, nnyịn ibọn̄ akam ite ediwak owo efen efen ẹkpekam ẹdidiọn̄ọ akpanikọ emi. Adan̄aoro mmọ n̄ko ẹyetịn̄ mme idara idara ikọ andiwet Psalm ẹmi ẹte: “Sese, nte mmada item fo, O Jehovah: nịm mi uwem nte ekemde ye ima fo. Ofụri ikọ fo ẹdi akpanikọ: kpukpru ndinen ikpe fo ẹnyụn̄ ẹdu ke nsinsi.”—Psalm 119:159, 160.
Nte Afo Emeti?
◻ Nso odudu ke Bible enyene ke idem mme Christian akpanikọ?
◻ Didie ke nnennen ifiọk an̄wam ke ndikpụhọde nnyịn?
◻ Didie ke Bible an̄wam ke ndidemede nnyịn ndikọri nti edu nnyụn̄ n̄kan ndiọi edu?
◻ Nso un̄wam idu ke ndikọri mme edu Abasi?
◻ Nso uyarade oro owụtde ke Bible oto ndausụn̄ eke odudu spirit ke ẹkụt ke otu ikọt Jehovah?
[Ndise ke page 18]
Mfụhọ mfụhọ utịp aban̄ade unana edinam akpanikọ Solomon ke isua usọn̄ esie ekpenyene ndinụk nnyịn ndima se inende nnyụn̄ nsua se ikwan̄ade
[Ndise ke page 20]
Edieke nnyịn iben̄ede Jehovah iyom un̄wam. spirit esie eyen̄wam ukeme ekededi oro nnyịn isịnde ndikan ndiọi edu