⁷ Christian ekeme ndidue n̄kere ke esịt ikemeke ndibian̄a imọ tutu amama, nte ediwak mbon eyo Jeremiah ẹkekerede. Ke uwụtn̄kpọ, owo ekeme ndikere ete, ‘Ana n̄ka iso nnam utom man n̄kpekeme ndise mban̄a ubon mi,’ ndien inyeneke se idiọkde do. Edi nso edieke oro akpanamde enye ekere ete, ‘Oyom mfiak n̄ka n̄wed man nnyene m̀mê n̄ka iso nnam eti utom’? Oro n̄ko ekeme nditie nte owụt eti ibuot onyụn̄ anam enye ebiere ete, ‘Ererimbot itiehe aba nte ekesitiede, oyom owo aka ufọkn̄wed ntaifiọk man aka iso anam eti utom.’ Emi edi ata mmemmem usụn̄ owo nditọn̄ọ ndifụmi nti item oro otu ofụn emi anamde akpanikọ onyụn̄ enyenede ọniọn̄ ọnọde aban̄a edika ufọkn̄wed ntaifiọk, onyụn̄ ekeme ndinam owo ọtọn̄ọ ndifiak mbono esop. Ediwak owo ẹtọn̄ọ nsịtnsịt ndikere nnyụn̄ nse n̄kpọ emi nte ererimbot esede. (Eph. 2:2, 3) Bible eteme nte odotde ete: “Ẹkûyak ererimbot oro akande mbufo okụk enyịk mbufo esịn ke usụn̄ esie.”—Rome 12:2, Phillips.a