Wụt Edu Ukere N̄kpọ Christ
“Abasi oro ọnọde ime ye ndọn̄esịt akpakam anam mbufo ẹnyene ke otu idem mbufo ukem edu ukere n̄kpọ oro Christ Jesus ekenyenede.”—ROME 15:5, NW.
1. Didie ke edu owo ekeme nditụk uwem owo?
EDU enyene n̄kpọ ndinam akamba akamba ke uwem. Ndebe ndebe m̀mê ufiop ufiop edu, in̄wan̄în̄wan̄ m̀mê etikwo etikwo edu, utọk utọk m̀mê edu edidiana kiet, edu n̄kụni m̀mê edu ediwụt esịtekọm ẹkeme ndinen̄ede ntụk nte owo anamde n̄kpọ aban̄a mme idaha ye nte mbon en̄wen ẹsede enye. Ye eti edu, owo ekeme ndikop inemesịt idem ke ata n̄kpọsọn̄ idaha. Ye owo oro enyenede idiọk edu, itiehe nte n̄kpọ ndomokiet enen, idem ke ini—ke ekikere kpukpru owo—uwem ọfọnde.
2. Didie ke owo esikpep mme edu?
2 Ẹkeme ndikpep mme edu—eti m̀mê idiọk. Ke akpanikọ, ẹnyene ndikpekpep mmọ. Ke etịn̄de aban̄a obufa nsekeyen, Collier’s Encyclopedia ọdọhọ ete: “Ana enye ekpekpep edu ekededi oro enye edinyenede, ukem nte anade enye ekpep usem m̀mê usọ en̄wen ekededi.” Didie ke nnyịn isikpep mme edu? Ke adan̄aemi ediwak n̄kpọ ẹtịpde ẹsịn, n̄kann̄kụk ye nsan̄a ẹnen̄ede ẹnyene odudu. N̄wed ofụri orụk ifiọk oro ẹkesiakde ke mbemiso ọdọhọ ete: “Nnyịn imesikpebe m̀mê imụm mme edu mbon oro nnyịn inen̄erede ikpere mmọ idem.” Ediwak tọsịn isua emi ẹkebede, Bible ama etịn̄ ukem ikọ oro ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.”—Mme N̄ke 13:20; 1 Corinth 15:33.
Uwụtn̄kpọ Nnennen Edu
3. Anie ekenịm eti uwụtn̄kpọ ke edu esie, ndien didie ke nnyịn ikeme ndikpebe enye?
3 Kpa nte edide ke kpukpru n̄kpọ eken, ntre n̄ko ke edi ye n̄kpọ aban̄ade edu, Jesus Christ enịm mfọnn̄kan uwụtn̄kpọ. Enye ọkọdọhọ ete: “Mmọnọ mbufo uwụt-n̄kpọ nte, mbufo nde ẹnam kpa nte Ami n̄kanamde mbufo.” (John 13:15) Man ibiet Jesus, nnyịn inyene ndibem iso n̄kpep mban̄a enye.a Nnyịn ikpep uwem Jesus ye uduak ndinam se apostle Peter eketemede ete inam: “Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.” (1 Peter 2:21) Utịtmbuba nnyịn edi ndibiet Jesus nte ikekeme. Oro esịne ndikọri edu ukere n̄kpọ esie.
4, 5. Ewe ikpehe edu ukere n̄kpọ Jesus ke ẹsio ẹwụt ke Rome 15:1-3, ndien didie ke mme Christian ẹkeme ndikpebe enye?
4 Ndinyene edu ukere n̄kpọ Christ Jesus abuana nso? Ọyọhọ ibuot 15 ke leta oro Paul ekewetde ọnọ ẹsọk mbon Rome 15 an̄wam nnyịn ndibọrọ mbụme oro. Ke akpa ufan̄ikọ ifan̄ ke ibuot n̄wed emi, Paul etịn̄ aban̄a n̄wọrọnda edu Jesus kiet ke ini enye ọdọhọde ete: “Edi nnyịn emi ikopde idem ikpobiom mmem-idem mbon mmem-idem, itre ndinem idem nnyịn esịt. Ẹyak nnyịn owo kiet kiet inem mbọhọidụn̄ nnyịn esịt ke ediyom ufọn esie, man enye ọkọri ke mbuọtidem. Koro Christ n̄ko ikenemke idem esịt; edi, kpa nte ẹwetde, Esuene mmọ eke ẹsuenede fi ọduọ mi ke idem.”—Rome 15:1-3.
5 Ke ndikpebe edu Jesus, ẹsịn udọn̄ ẹnọ mme Christian ndidu ke mben̄eidem ndinam n̄kpọ nnọ mbon en̄wen ke nsụhọdeidem utu ke ndiyom ndinem idemmọ ikpọn̄ esịt. Ke akpanikọ, utọ edinyịme ndinam n̄kpọ ke nsụhọdeidem oro nnọ mbon en̄wen edi edu mbon oro ‘ẹkopde idem.’ Jesus, emi okokopde idem ke n̄kan̄ eke spirit akan owo ekededi oro akanam odude uwem, eketịn̄ aban̄a idemesie ete: ‘Eyen Owo ikedịghe man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.’ (Matthew 20:28) Nte mme Christian, nnyịn iyom ndinyanade mbịne edinam n̄kpọ nnọ mbon en̄wen kpasụk ntre, esịnede “mbon mmem-idem.”
6. Ke nso usụn̄ ke nnyịn ikeme ndikpebe usụn̄ nte Jesus ọkọyọde ukọbọ ye isụn̄i?
6 Eti edu efen oro Jesus ekenyenede ekedi usụn̄ ukere n̄kpọ ye usụn̄ edinam oro ekedide in̄wan̄în̄wan̄ kpukpru ini. Akananam enye ikayakke etikwo etikwo edu mbon en̄wen akara eti edu unam n̄kpọ Abasi esie; nnyịn ikponyụn̄ iyakke. Ke ini ẹkesụn̄ide ẹnyụn̄ ẹkọbọde enye ke ntak emi enye akatuakde ibuot ọnọ Abasi ke edinam akpanikọ, Jesus ama ọyọ ke ime ye unana n̄kụni. Enye ama ọfiọk ete ke mbon oro ẹdomode ndinem mbọhọidụn̄ mmọ esịt ke ‘ndiyom ufọn esie, man enye ọkọri ke mbuọt-idem,’ ẹkpenyene ndidori enyịn ndisobo ubiọn̄ọ otode ererimbot oro mînịmke ke akpanikọ mînyụn̄ inyeneke ifiọk.
7. Didie ke Jesus ekeme ime, ndien ntak emi nnyịn ikpanamde ukem oro?
7 Jesus ama owụt nnennen edu ke mme usụn̄ en̄wen. Akananam enye ikakpaha mba ndibet Jehovah edi ama enyene ime ebet edisu mme uduak Esie. (Psalm 110:1; Matthew 24:36; Utom 2:32-36; Mme Hebrew 10:12, 13) Akan oro, Jesus ikananake ime ye mme anditiene enye. Enye ama ọdọhọ mmọ ete: “Ẹkpebe Mi”; sia enye ekenyenede “ifụre-ifụre ido,” item esie ekedi se ibọpde-bọp inyụn̄ inọde nduọkodudu. Ndien koro enye ‘okosụhọrede idem ke esịt,’ akananam enye ikedịghe owo n̄kohodeidem m̀mê owo iseri. (Matthew 11:29) Paul esịn udọn̄ ọnọ nnyịn ete ikpebe mme ikpehe edu Jesus emi ke ini ọdọhọde ete: “Yak mbufo ẹnyene orụk esịt [“edu ukere n̄kpọ,” NW] emi okodude ke Christ Jesus. Okposụk edi nte Enye ekedide mbiet Abasi, Enye ikabatke ndida n̄ka-n̄ka ye Abasi ke n̄kpọ eke okpomụmde akama: edi Enye akan̄wan̄a Idem Esie, ada mbiet ofụn, owụt idem nte owo.”—Philippi 2:5-7.
8, 9. (a) Ntak emi nnyịn ikpan̄wanade ndikọri edu unana ibụk? (b) Ntak emi nnyịn mîkpayakke idem emem nnyịn edieke nnyịn mîkemeke nditiene uwụtn̄kpọ oro Jesus ekenịmde ketket, ndien didie ke Paul ekenịm eti uwụtn̄kpọ ke afan̄ emi?
8 Edi mmemmem n̄kpọ ndidọhọ ke nnyịn iyom ndinam n̄kpọ nnọ mbon en̄wen nnyụn̄ nnam mme udọn̄ mmọ ẹbem eke nnyịn iso. Edi nnyịn ndidụn̄ọde edu ukere n̄kpọ nnyịn ke ofụri esịt ekeme ndiyarade nte ke emi inen̄ekede idi uduakesịt nnyịn. Ntak mîdịghe? Akpa, koro nnyịn ima ida edu ibụk imana ito Adam ye Eve; ọyọhọ iba, koro nnyịn idu uwem ke ererimbot emi esịnde udọn̄ ọnọ ibụk. (Ephesus 4:17, 18) Ndikọri edu unana ibụk esiwak ndiwọrọ ndikọri usụn̄ ukere n̄kpọ oro edide isio ye ndammana idaha unana mfọnmma nnyịn. Oro esiyom ubiere ye ukeme.
9 In̄wan̄în̄wan̄ unana mfọnmma nnyịn, emi edide ata isio ye mfọnmma uwụtn̄kpọ oro Jesus ekenịmde ọnọ nnyịn, ekeme ndinam nnyịn ikop mmemidem ndusụk ini. Nnyịn imekeme ndiyịk nte ke owo ikam ikemeke-keme ndinyene ukem edu ukere n̄kpọ oro Jesus ekenyenede. Edi tịm fiọk mme ikọ nsịnudọn̄ Paul emi: “Mmọfiọk nte baba eti n̄kpọ kiet idụn̄ke mi ke idem, oro edi, ke obụkidem mi: koro ndinyịme ndinam eti n̄kpọ odu ye ami, edi ndinanam idụhe. Koro nnamke eti n̄kpọ eke ọdọn̄de mi ndinam, edi idiọk-n̄kpọ eke mîdọn̄ke mi ndinam, oro ke nnanam. Koro ndara ibet Abasi ke ọwọn̄esịt mi: edi n̄kụt ibet efen ke mbak idem mi, nte an̄wanade ye ibet eke esịt mi amade, onyụn̄ adade mi nte ibuot-ekọn̄ esịn ke idak ibet idiọk-n̄kpọ emi odude ke mbak idem mi.” (Rome 7:18, 19, 22, 23) Edi akpanikọ, unana mfọnmma ama ọbiọn̄ọ Paul ediwak ini ndinam uduak Abasi oro enye okoyomde ndinam, edi edu esie—usụn̄ nte enye ekekerede aban̄a Jehovah ye ibet Esie—ekedi eti uwụtn̄kpọ. Eke nnyịn ekeme ndidi n̄ko.
Ndinen̄ede Mme Ukwan̄ Edu
10. Nso edu ukere n̄kpọ ke Paul ekesịn udọn̄ ọnọ mbon Philippi ndinyene?
10 Ndi ekeme ndidi nte ke oyom ndusụk owo ẹnen̄ede ukwan̄ edu? Ih. Emi ekenen̄ede edi ntre ye ndusụk Christian ke akpa isua ikie. Ke leta oro enye ekewetde ọnọ ẹsọk mbon Philippi, Paul ama etịn̄ aban̄a edinyene nnennen edu. Enye ekewet ete: “Ndọhọke nte mmesesịm [uwem eke heaven ebe ke akpa ediset ke n̄kpa] mma, m̀mê nte mmọfọfọn mma; edi mmesịn ifịk mbịne, m̀mê oyoto do n̄kpomụm se Jesus Christ okomụmde mi ete nnyene n̄kama. Nditọ-ete, mbatke nte mmomụm n̄kpọ oro kan̄a n̄kama; edi n̄kpọ kiet emi ke nnanam; mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄ka iso mbịne utịt mbuba, man n̄kpọbọ utịp akwa ikot eke Abasi okokotde mi ke Christ Jesus. Ẹyak kpukpru nnyịn, eke ima ikọkọri iwọrọ idi owo, inyene orụk esịt [“edu ukere n̄kpọ,” “NW”] emi.” (Sịghisịghi ubọkn̄wed edi eke nnyịn.)—Philippi 3:12-15.
11, 12. Ke mme usụn̄ ewe ke Jehovah esiyarade se idide nnennen edu ukere n̄kpọ ọnọ nnyịn?
11 Mme ikọ Paul ẹwụt ẹte ke owo ekededi, emi akabarede edi Christian, emi mîkwe ufọn edinam n̄kọri enyene ukwan̄ edu. Owo oro okpu ndikpebe edu ukere n̄kpọ Christ. (Mme Hebrew 4:11; 2 Peter 1:10; 3:14) Ndi utọ owo oro odu ke idaha unana idotenyịn? N̄wan̄ansa-o. Abasi ekeme ndin̄wam nnyịn ikpụhọde edu nnyịn edieke nnyịn inen̄erede iyom ndinam ntre. Paul aka iso ọdọhọ ete: “Edieke mbufo ẹnyenede ekikere eke okpụhọrede ke se ntetịn̄, Abasi ayayarade emi ọnọ mbufo.”—Philippi 3:15.
12 Nte ededi, edieke nnyịn iyomde Jehovah ayarade se idide nnennen edu ọnọ nnyịn, ana nnyịn inam udeme nnyịn. Edikpep Ikọ Abasi ye un̄wam mme n̄wed Christian emi “asan̄autom emi anamde akpanikọ, onyụn̄ enyenede ọniọn̄” ọnọde ọkọrọ ye akam ayan̄wam mbon oro ẹnyenede “ekikere eke okpụhọrede” ndikọri nnennen edu. (Matthew 24:45) Mbiowo Christian, emi ẹmekde ke edisana spirit “ẹte ẹbọk mbon ufọk Abasi,” ẹyedara ndinọ un̄wam. (Utom 20:28) Nnyịn iwụt esịtekọm didie ntem nte ke Jehovah ekere aban̄a unana mfọnmma nnyịn onyụn̄ ọnọ nnyịn ima ima un̄wam! Ẹyak nnyịn inyịme un̄wam oro.
Ndikpep N̄kpọ Nto Mbon Efen
13. Nso ke nnyịn ikpep iban̄a nnennen edu ke mbụk Bible aban̄ade Job?
13 Ke Rome ibuot 15, Paul owụt ete ke nditie n̄kere mme uwụtn̄kpọ eset ekeme ndin̄wam nnyịn inen̄ede edu nnyịn. Enye ewet ete: “Se ededi eke ẹkewetde ke ini oko, ke ẹkewet ndida n̄kpep nnyịn n̄kpọ, man nnyịn inyene idotenyịn oto ke ime ye ndọn̄-esịt eke N̄wed Abasi ọnọde.” (Rome 15:4) Ama oyom ndusụk anam-akpanikọ asan̄autom Jehovah ke eset ẹnen̄ede ndusụk ikpehe edu mmọ. Ke uwụtn̄kpọ, Job ke ofụri ofụri ama enyene eti edu. Akananam enye ikọdọhọke ke Jehovah edi ntak idiọk, ndien enye ikedehede iyak ndutụhọ anam mbuọtidem esie ke Abasi emem. (Job 1:8, 21, 22) Edi, enye ama enyene ntụhọ edida idem ke edinen. Jehovah ama eteme Elihu ete akan̄wam Job ndinen̄ede ekikere emi. Utu ke ndikere ke ẹnọ imọ usọn̄enyịn, Job ama osụk idem enyịme ete ke oyom inen̄ede edu imọ onyụn̄ ọtọn̄ọ ndinam oro ye unana ubiatini.—Job 42:1-6.
14. Didie ke nnyịn ikeme ndibiet Job edieke ẹnọde nnyịn item ẹban̄a edu nnyịn?
14 Nte nnyịn ikpanam n̄kpọ nte Job akanamde edieke ekemmọ Christian ke mfọnido asiande nnyịn ete ke nnyịn imenyene ukwan̄ edu? Ukem nte Job, akpakam nnyịn idehede ‘idori Abasi se mînenke.’ (Job 1:22) Edieke nnyịn ikụtde ndutụhọ nte mîdotke, akpakam nnyịn idehede ikụni m̀mê ndiduọhọ Jehovah ke ntak mfịna nnyịn. Nnyịn ikpakam ifep ndidomo ndida idem ke edinen, itide ite ke inamke n̄kpọ m̀mê nso ifetutom ke nnyịn inyene ke utom Jehovah, nnyịn isụk idi “ifịn eke mînamke utom ibe adan̄a.”—Luke 17:10.
15. (a) Nso ukwan̄ edu ke ndusụk mbet Jesus ẹkenyene? (b) Didie ke Peter okowụt eti edu?
15 Ke akpa isua ikie, ndusụk mbon oro ẹkekopde ikọ Jesus ẹma ẹnyene edu oro mîkodotke. Ke idaha kiet, Jesus ama etịn̄ n̄kpọ oro ọkọsọn̄de mmọ ndifiọk. Ke ndinam n̄kpọ mban̄a, “ke adan̄aemi ediwak mbet Esie ẹkopde emi, mmọ ẹdọhọ ẹte, Ikọ emi ọsọn̄ ebe: anie ekeme ndikop utọ n̄kpọ oro?” Nte an̄wan̄ade mbon oro ẹketịn̄de ikọ ke utọ usụn̄ emi ẹkenyene ukwan̄ edu. Ndien ukwan̄ edu mmọ ama anam mmọ ẹtre ndikpan̄ utọn̄ nnọ Jesus. Mbụk oro ọdọhọ ete: “Ke ntak emi ediwak mbet Esie ẹfiak edem, inyụn̄ isan̄ake aba ye Enye.” Ndi kpukpru owo ẹkenyene ukwan̄ edu? Baba. Mbụk oro aka iso ete: “Mmọdo Jesus obụp mbet Esie duopeba ete, Nte ke ọdọn̄ mbufo n̄ko ndidian̄ade nnyọn̄? Simon Peter ọbọrọ Enye ete, Ọbọn̄, nnyịn iditiene anie?” Ke nditịm ntịn̄, Peter ndien ama ọbọrọ mbụme esie ete: “Afo enyene ikọ uwem nsinsi.” (John 6:60, 66-68) Nso eti edu ke emi edi ntem! Ke ini ẹtatde m̀mê ẹnen̄erede ifiọk N̄wed Abasi oro ekemede ndisọn̄ nnyịn ndinyịme ke akpa, nte ikpọfọnke ndinyene ukem edu oro Peter ekenyenede? Ekpedi ndisịme didie ntem nditre ndinam n̄kpọ Jehovah m̀mê nditịn̄ ikọ ke usụn̄ oro atuahade ye “edu nti ikọ” n̄kukụre koro ndusụk n̄kpọ ẹsọn̄de ndifiọk ke akpa!—2 Timothy 1:13, NW.
16. Nso edu oro akpade owo idem ke mme adaiso ido ukpono mme Jew eke eyo Jesus ẹkenyene?
16 Mme adaiso ido ukpono mme Jew eke akpa isua ikie ẹma ẹkpu ndinyene edu ukere n̄kpọ oro Jesus ekenyenede. Mmọ ẹma ẹwụt ọkpọsọn̄ ubiere mmọ nditre ndikpan̄ utọn̄ nnọ Jesus ke ini enye akanamde Lazarus eset ke n̄kpa. Ye owo ekededi emi enyenede nnennen edu, utịben̄kpọ oro ekpekedi ọkpọsọn̄ uyarade nte ke Abasi ọkọdọn̄ Jesus. Nte ededi, nnyịn ikot ite: “Ntre ke ikpọ oku ye mme Pharisee ẹkot akwa esop ẹbono, ẹnyụn̄ ẹdọhọ ẹte, Inam didie? koro owo emi ke ananam ediwak idiọn̄ọ. Edieke iyakde Enye osụk aka iso ntem, kpukpru owo ẹyebuọt idem ye Enye: ndien mbon Rome ẹyedi ẹdibọ nnyịn itie nnyịn ye ubọn̄ nnyịn.” Nso ididi usọbọ inọ mmọ? “Toto usen oro mmọ ẹsop ibuot, ẹte iwot Enye.” Ke ẹsiode edidụk ediomi ndiwot Jesus ẹfep, mmọ ẹma ẹtọn̄ọ ndibiat in̄wan̄în̄wan̄ uyarade oro okowụtde enye nte anam utịben̄kpọ. “Ikpọ oku ẹdụk odu, ẹte iwot Lazarus n̄ko.” (John 11:47, 48, 53; 12:9-11) Ekpedi n̄kpọ itekesịt didie ntem edieke nnyịn ikpenyenede ukem edu oro inyụn̄ iyatde esịt ke mme n̄kpọ oro nnyịn ikpenen̄erede idat esịt iban̄a! Ih, ndien oro ekpedi n̄kpọndịk didie ntem!
Ndikpebe In̄wan̄în̄wan̄ Edu Christ
17. (a) Ke mme idaha ewe ke Daniel okowụt edu unana ndịk? (b) Didie ke Jesus okowụt idemesie nte owo uko?
17 Mme asan̄autom Jehovah ẹsimụm in̄wan̄în̄wan̄ edu ẹkama. Ke ini mme asua Daniel ẹkedụkde odu ndiwụk ewụhọ oro akakpande ediben̄e abasi m̀mê owo ekededi eben̄e ke mîbọhọke edidem ke usen 30, Daniel ama ọfiọk ete ke emi ama otụk itie ebuana imọ ye Jehovah Abasi. Ndi enye eyetre ndibọn̄ akam nnọ Abasi ke usen 30? Baba, enye ye unana ndịk ama aka iso ndibọn̄ akam nnọ Jehovah utịm ikata ke usen, nte ido esie ekedide. (Daniel 6:6-17) Kpasụk ntre Jesus ikayakke mme asua esie ẹsịn enye ndịk ke idem. Ke usen Sabbath kiet, enye ama osobo eren kiet emi ubọk akakpade. Jesus ama ọfiọk ete ke ediwak mme Jew oro ẹkedude do idikopke inemesịt edieke imọ ikọkde owo udọn̄ọ ke Sabbath. Enye ama obụp mmọ in̄wan̄în̄wan̄ ete ẹtịn̄ se ikedide ekikere mmọ ke n̄kpọ oro. Ke ini mmọ ẹkesịnde nditịn̄, Jesus ama anam eren oro okop nsọn̄idem. (Mark 3:1-6) Jesus iketreke ndinam utom esie ke usụn̄ oro enye ekekerede ke odot ndinam.
18. Ntak emi ndusụk owo ẹsibiọn̄ọde nnyịn, edi didie ke nnyịn ikpanam n̄kpọ iban̄a etikwo etikwo edu mmọ?
18 Mme Ntiense Jehovah mfịn ẹfiọk ẹte ke mmimọ n̄ko ikpedehede iyak mme etikwo etikwo edinam mme andibiọn̄ọ ẹsịn mmimọ ndịk ke idem. Edieke ẹyakde, mmọ idinyeneke edu ukere n̄kpọ Jesus. Ediwak owo ẹsibiọn̄ọ Mme Ntiense Jehovah, ndusụk owo ẹbiọn̄ọ koro mmọ mînyeneke nnennen ifiọk ndien mbon en̄wen ẹbiọn̄ọ koro mmọ ẹsuade Mme Ntiense m̀mê etop mmọ. Edi ẹyak nnyịn ikûdede iyak edu usua mmọ abiat in̄wan̄în̄wan̄ edu nnyịn. Nnyịn ikpedehede iyak mbon efen ẹbiere usụn̄ nte nnyịn ikpatuakde ibuot.
19. Didie ke nnyịn ikeme ndinyene ukem edu ukere n̄kpọ Jesus Christ?
19 Jesus ama esinyene in̄wan̄în̄wan̄ edu ukere n̄kpọ kpukpru ini aban̄a mme anditiene enye ye mme ndutịm Abasi, inamke n̄kpọ m̀mê ekedi ọkpọsọn̄ n̄kpọ adan̄a didie ndinam ntre. (Matthew 23:2, 3) Nnyịn ikpenyene ndikpebe uwụtn̄kpọ esie. Edi akpanikọ, nditọete nnyịn ifọnke ima, edi nnyịn n̄ko ifọnke ima. Ndien m̀mọ̀n̄ ke nnyịn ikeme ndikụt nti nsan̄a ye mme ata ufan akpanikọ ke ẹsiode itie nditọete nnyịn ofụri ererimbot ẹfep? Jehovah inọhọ nnyịn ọyọhọ ifiọk Ikọ esie oro ẹwetde-wet kan̄a, edi ewe ido ukpono ẹfiọk ẹkan nnyịn? Ẹyak nnyịn kpukpru ini inyene nnennen edu ukere n̄kpọ, kpa edu ukere n̄kpọ oro Jesus Christ ekenyenede. Ke adianade ye mme n̄kpọ efen, emi esịne ndifiọk nte ikpebetde Jehovah, nte nnyịn idinemede ke ibuotikọ oro etienede.
[Mme Ikọ idakisọn̄]
a N̄wed oro Akakan Owo Oro Akanam Odude Uwem, oro Watchtower Bible and Tract Society of New York, Inc., osiode, eneme aban̄a uwem ye utom Jesus.
Nte Afo Emekeme Ndinam An̄wan̄a?
• Didie ke edu nnyịn otụk uwem nnyịn?
• Bụk edu ukere n̄kpọ Jesus Christ.
• Nso ke nnyịn ikeme ndikpep nto edu Job?
• Nso idi nnennen edu ndinyene ke ini isobode ubiọn̄ọ?
[Ndise ke page 7]
Christian oro enyenede nnennen edu esinyanade ebịne ndinam n̄kpọ nnọ mbon en̄wen
[Ndise ke page 9]
Edikpep Ikọ Abasi ke akam an̄wam nnyịn ndinyene edu ukere n̄kpọ Christ