Ata Inemesịt ke Ndinam N̄kpọ Jehovah
“Ọfọfọn ọnọ owo eke Abasi Jacob edide andin̄wam enye, eke odoride enyịn ye Jehovah Abasi esie.”—PSALM 146:5.
1, 2. Nso ke ẹtịn̄ ẹban̄a ukabade inemesịt, ndien nso ke inemesịt ọwọrọ ọnọ ediwak owo mfịn?
NSO idi inemesịt? Mme ewet n̄wed ukabadeikọ, mbon akwaifiọk, ye mme ekpep ukpepn̄kpọ ido ukpono ẹma ẹdomo ndikabade enye ke ediwak isua ikie. Edi mmọ inọhọ ukabade oro kpukpru owo ẹnyịmede. Encyclopædia Britannica onyịme ete: “‘Inemesịt’ edi kiet ke otu ikọ oro ẹyan̄ade owo ifiọk.” Inemesịt nte an̄wan̄ade ọwọrọ nsio nsio n̄kpọ ọnọ nsio nsio owo, ọkọn̄ọde ke idaha mmọ ke uwem.
2 Ye ediwak owo inemesịt ọkọn̄ọ ke eti nsọn̄idem, inyene obụkidem, ye inem inem itie ebuana. Edi, odu mme owo oro ẹnyenede kpukpru ẹmi edi ikopke inemesịt. Kaban̄a iren ye iban ẹmi ẹyakde idem ẹnọ Jehovah Abasi, Bible ọnọ ekikere aban̄ade inemesịt oro enen̄erede edi isio ye ekikere ofụri owo.
Isio Isio Ekikere Aban̄ade Inemesịt
3, 4. (a) Mmanie ke Jesus ọkọdọhọ ke inemesịt odu ọnọ mmọ? (b) Nso ke ẹkeme nditịn̄ mban̄a mme ntak inemesịt oro Jesus akasiakde?
3 Ke Ukwọrọikọ esie oro ke Obot, Jesus Christ ikọdọhọke ke inemesịt ọkọn̄ọ ke eti nsọn̄idem, inyene obụkidem, ye mme n̄kpọ ntre. Enye ke akpanikọ ọkọdọhọ ke inemesịt odu ọnọ mbon oro “ẹbuenede ke [“ẹnyenede udọn̄ n̄kpọ eke,” NW] spirit” ye mbon oro “ẹkopde biọn̄ ye nsatitọn̄ edinen ido.” Se inyenede ebuana ye n̄kpọ iba ẹmi ẹyomde mi kaban̄a ata inemesịt edi ikọ Jesus oro etiede nte se mîdịghe ndammana n̄kpọ: “Ọfọfọn [“inemesịt odu,” NW] ọnọ mmọ eke ẹtuan̄ade: koro ẹyedọn̄ mmọ esịt.” (Matthew 5:3-6) Nte an̄wan̄ade, Jesus ikọdọhọke ite ke mme owo ẹyekop inemesịt inikiet inikiet ke ini owo ima mmọ akpade. Utu ke oro, enye eketịn̄ aban̄a mbon oro ẹtuan̄ade ẹban̄a idaha idiọkn̄kpọ oro mmọ ẹdude ye mme utịp esie.
4 Apostle Paul ama etịn̄ aban̄a edibotn̄kpọ edide owo emi ẹmụmde mmụm ke idak idiọkn̄kpọ ke ntak idotenyịn oro nte ke “ẹyenyan̄a . . . ẹsio ke itie ufụn mbiara.” (Rome 8:21, 22) Mbon oro ẹnyịmede ndutịm usio-isop oro Jehovah anamde ebe ke uwa ufak Christ ẹmi ẹnyụn̄ ẹnamde uduak Abasi ẹbọ ndọn̄esịt ke akpanikọ ẹnyụn̄ ẹdi se ẹnamde ẹkop inemesịt. (Rome 4:6-8) Ke Ukwọrọikọ oro ke Obot, Jesus ama ọdọhọ ke inemesịt odu n̄ko ọnọ “mmọ eke ẹnyenede ifụre ifụre ido,” “mmọ eke ẹtuade owo mbọm,” “mmọ eke esịt mmọ asanade,” ye “mme anam emem.” Enye ama ọnọ nsọn̄ọ ete ke idem okposụkedi ẹkọbọde, ke utọ mbon nsụhọdeidem oro iditabake inemesịt mmọ. (Matthew 5:5-11) Edi inem n̄kpọ ndifiọk nte ke mme n̄kokon̄ ntak inemesịt ẹmi ẹnịm enyene n̄kpọ owo ye ubuene ke ukem idaha.
Isọn̄ Kaban̄a Ata Inemesịt
5. Nso idi isọn̄ inọ inemesịt mme asan̄autom Abasi oro ẹyakde idem ẹnọ?
5 Owo ikwe ebiet ata inemesịt otode ke mme inyene obụkidem. Enyene-ọniọn̄ Edidem Solomon ọkọdọhọ ete: “Edi ufọn Jehovah ofori owo, enye inyụn̄ idianke afanikọn̄ ke esịt.” (Mme N̄ke 10:22) Ye mme edibotn̄kpọ oro ẹdiọn̄ọde itie edikara ofụri ekondo Jehovah, inemesịt enen̄ede akpaha adiana ye edidiọn̄ Abasi. Owo oro ayakde idem ọnọ oro enyenede onyụn̄ okụtde edidiọn̄ Jehovah ke idemesie okop ata inemesịt. Ke ekikere eke Bible, inemesịt abuana ndidara, ndikop uyụhọ, ye ndinam n̄kpọ mma ke utom Jehovah.
6. Nso ke ẹyom ẹto ikọt Jehovah man mmọ ẹkop ata inemesịt?
6 Ata inemesịt ọkọn̄ọ ke nnennen itie ebuana ye Jehovah. Enye ọkọn̄ọ ke ima oro ẹnyenede ẹnọ Abasi ye edinam akpanikọ nnọ enye. Mme asan̄autom Jehovah oro ẹyakde idem ẹnọ ẹnyịme ikọ Paul ẹmi ke ofụri esịt: “Baba owo nnyịn kiet idụhe uwem inọ idemesie . . . idu inọ Ọbọn̄ [“Jehovah,” NW] . . . nnyịn inyene Ọbọn̄ [“Jehovah,” NW].” (Rome 14:7, 8) Ke ntre, owo ikemeke ndinyene ata inemesịt ke ẹsiode edikop uyo Jehovah ye idara idara edisụk ibuot nnọ uduak esie ẹfep. Jesus ọkọdọhọ ete: “Inemesịt odu ọnọ mmọ oro ẹkopde ikọ Abasi ẹnyụn̄ ẹnamde enye!”—Luke 11:28, NW.
Mme Ukpụhọde N̄kpọ Ẹnamde Owo Ẹkop Inemesịt
7, 8. (a) Didie ke ẹkpebahade mme ntak oro ẹnamde owo okop inemesịt? (b) Nso ke ẹkeme nditịn̄ mban̄a ndọ ye edinyene nditọ?
7 Ẹkeme ndikot mme n̄kpọ ẹnamde owo okop inemesịt mi “isọn̄ ntak” m̀mê “se inyenede iwụk,” koro mmọ ẹdi akpan n̄kpọ ẹnọ mme asan̄autom Jehovah. Adianade do, odu se ẹkpekotde mme ukpụhọde, kpa mme n̄kpọ oro ẹkemede ndisụn̄ọ ke inemesịt ke ini kiet edi akama esisịt mîdịghe ikamake-kama baba inemesịt ekededi ke ini efen. Ke ini mme ete ekpụk ye ini ekebemde eyo mme Christian iso, ẹkeda ndọ ye edinyene nditọ nte akpan n̄kpọ ke ndinyene inemesịt. Ẹkụt emi ke mfụhọ mfụhọ eben̄e oro Rachel ekeben̄ede Jacob ete: “Nọ mi nditọ, mîdịghe nyekpa.” (Genesis 30:1) Edu emi kaban̄a edinyene nditọ ama odot ye uduak Jehovah ke ini oro.—Genesis 13:14-16; 22:17.
8 Ẹkeda ndọ ye edinyene nditọ nte mme edidiọn̄ ẹmi Abasi ọnọde ke otu ikọt Jehovah eke eset. Nte ededi, ẹma ẹbuan mfụhọ ye mmọemi ye mme idaha efen ke mme ini afanikọn̄ ke mbụk idụt mmọ. (Men Psalm 127, 128 domo ye Jeremiah 6:12; 11:22; Eseme 2:19; 4:4, 5.) Emi, ke ntre, edi uyarade nte ke ndọ ye edinyene nditọ idịghe mme ntak inemesịt eke ẹbịghide.
Inemesịt ye Unana Ndọ ke Ini Edem
9. Ntak emi adiaha Jephthah ọkọbọde itoro kpukpru isua-a?
9 Ediwak asan̄autom Abasi ẹma ẹnyene ata inemesịt ye unana edidọ ndọ. Otode ke ntak ukpono oro enye ekenyenede ọnọ akan̄a ete esie, adiaha Jephthah ama odu ke itie unana ndọ. Ini kiet enye ye mme ufan esie iban ẹma ẹtuan̄a ẹban̄a itie unana ndọ esie. Edi nso idara ke enye ekenyene ntem ke ndinam utom uyọhọ-ini ke ufọk Jehovah, iso-ọfọn ke otu “iban ẹmi ẹsan̄ade utom ke enyịnusụn̄ efe esop”! (Exodus 38:8) Ke ntak emi, enye ama esibọ itoro ke isua ke isua.—Judges 11:37-40.
10. Nso ke Jehovah okoyom oto Jeremiah, ndien nte etie nte ke enye ama odu uwem unana inemesịt ke ntak oro?
10 Ke ntak akpan ini emi prọfet Jeremiah okodude uwem, Abasi ama oyom ete enye okûdọ ndọ okûnyụn̄ enyene nditọ. (Jeremiah 16:1-4) Edi Jeremiah ama okụt nte ikọ Abasi ẹmi ẹkedide akpanikọ: “Osụk ọfọfọn ọnọ owo eke ọbuọtde idem ye Jehovah, eke Jehovah onyụn̄ edide ibetedem esie.” (Jeremiah 17:7) Ke se iwakde ikan ofụri isua 40 eke utom utịn̄ prọfesi, Jeremiah ama anam n̄kpọ Abasi ke edinam akpanikọ nte erenowo oro odude ke itie unana ndọ. Adan̄a nte nnyịn idiọn̄ọde, enye akananam idọhọ ndọ inyụn̄ ibonke nditọ. Edi, anie ekeme ndidọhọ ke Jeremiah ikokopke inemesịt, nte mme anam-akpanikọ nsụhọ Jew ẹmi ‘ẹkeyamade ke mfọnido Jehovah’?—Jeremiah 31:12, NW.
11. Nso ẹdi ndusụk uwụtn̄kpọ N̄wed Abasi aban̄ade mme anam-akpanikọ asan̄autom Jehovah ẹmi ẹkekopde inemesịt okposụkedi mmọ mîkenyeneke nsan̄andọ?
11 Ediwak mbon en̄wen ẹma ẹnam n̄kpọ Jehovah ke idatesịt ye unana nsan̄andọ. Mmọ ndusụk ẹkedu ke itie unana ndọ, mme ebeakpa, m̀mê mbon oro iban ẹkpade ẹkpọn̄. Ke otu mmọemi ẹkedi prọfet an̄wan oro, Anna; iso-ọfọn Dorcas, m̀mê Tabitha; apostle Paul; ye akakan uwụtn̄kpọ ke otu mmọ kpukpru—Jesus Christ.
Idọhọ Ndọ Edi Ẹkop Inemesịt Mfịn
12. Nso ke ndusụk mme okop-inemesịt, asan̄autom Jehovah ẹmi ẹyakde idem ẹnọ ẹnam ufan̄ ẹnọ mfịn, ndien ntak-a?
12 Mfịn, ediwak tọsịn Mme Ntiense Jehovah ke ẹnam n̄kpọ Abasi ke edinam akpanikọ ye unana nsan̄andọ. Ndusụk mmọ ẹma ẹkeme ndinyịme ikot Jesus oro: “Owo eke ekemede ndibọ [enọ itie unana ndọ], yak ọbọ.” Mmọ ẹma ẹnam emi “kaban̄a Obio Ubọn̄ Heaven.” (Matthew 19:11, 12) Oro edi, mmọ ẹma ẹda ubọhọ-ufụn oro Abasi ọnọde mmọ ẹnam n̄kpọ ke eti usụn̄ ebe ke ndiyak ini ye odudu oro okponde akan nsịn ke ndimenede mme ufọn n̄kpọ Obio Ubọn̄ ke enyọn̄. Ediwak mmọ ke ẹnam utom nte mme asiakusụn̄, mme isụn̄utom, m̀mê mbonufọk Bethel ke ibuot itieutom ofụri ererimbot Watch Tower Society m̀mê ke kiet ke otu n̄kọk itieutom esie.
13. Mme uwụtn̄kpọ ewe ẹwụt ẹte ke Christian ekeme ndidu ke itie unana ndọ edi okop inemesịt?
13 Edima eyenete an̄wan kiet oro ama ọkọsọn̄ ama etịn̄ mbụkuwem esie ke ibuotikọ emi “Ndikop Inemesịt nte Asiakusụn̄ kpa ye Unana Ndọ.” (Enyọn̄-Ukpeme, November 1, 1985, page 23-26) Eyenete an̄wan efen oro odude ke itie unana ndọ emi anamde utom ke Bethel ke se iwakde ibe isua 50 ọkọdọhọ ete: “Ami mmokop uyụhọ ọyọhọ ọyọhọ ke uwem mi ye utom mi. Ami mmesịn idem idahaemi n̄kan nte akanam edide ke utom oro ami nnen̄erede mma. Ami ntuaha n̄kpọfiọk. Ami n̄kpọtọn̄ọ ntak nnam ukem ubiere oro.”—Enyọn̄-Ukpeme (Ikọmbakara), June 15, 1982, page 15.
14, 15. (a) Nte apostle Paul ọdọhọde, nso ke ẹyom man ẹsọn̄ọ ẹdu ke itie unana ndọ? (b) Ntak emi Paul ọdọhọde ete ke owo oro mîdọhọ ndọ anam “se ifọnde ikan” onyụn̄ ‘okop inemesịt akan’?
14 Tịmfiọk ikọ oro “ubiere.” Paul ekewet ete: “Edi edieke owo ekededi ọsọn̄ọde enyene iwụk ke esịt esie, n̄kpọ mînyụn̄ idụhe ndinyịk enye, edi enyenede odudu ndikara uduak esiemmọ onyụn̄ anamde ubiere emi ke esịt esiemmọ, ndikaiso mmụm itie unana ndọ esie n̄kama, enye eyenam nte ọfọnde. Mmọdo owo ke ọkpọn̄de itie unana ndọ esie ọkọdọ ndọ anam nte ọfọnde, edi owo eke mîkpọn̄ke ikọdọ ndọ eyenam se ifọnde ikan.” (1 Corinth 7:37, 38, NW) Ntak ‘ọfọnde akan-a’? Paul anam an̄wan̄a ete: “Ọdọn̄ mi nte mbufo ẹkûnyene ntịmede-esịt. Owo eke mîdọhọ ndọ esịn esịt ke mbubehe Ọbọn̄, ete idisan̄a didie inem Ọbọn̄ esịt . . . N̄wan eke mînyeneke ebe ye n̄kparawa ẹsịn esịt ke mbubehe Ọbon̄, . . . Mmọdọhọ emi nyom ufọn mbufo . . . man mbufo ẹtịn̄ enyịn ẹse mbubehe Ọbọn̄, n̄kpọ okûfịna mbufo.”—1 Corinth 7:32-35.
15 Nte ‘editịn̄ enyịn nse mbubehe Ọbọn̄ ye unana mfịna’ ye ekikere ‘ndinyene unyịme Ọbọn̄’ enyene ebuana ye inemesịt? Nte an̄wan̄ade Paul ekekere ntre. Ke etịn̄de aban̄a ebeakpa edide Christian, enye ọkọdọhọ ete: “Enye atara, onyụn̄ enyene unen ndidọ owo eke amade; edi yak enye ọdọ owo Abasi ikpọn̄îkpọn̄. Edi ọfọn ye enye akan [“enye eyekop inemesịt akan,” NW] nditie ke itie esie nte ami nsede; ndien nse nte ami mmonyụn̄ nnyene spirit Abasi.”—1 Corinth 7:39, 40.
Mme Ufọn Itie Unana Ndọ
16. Nso ẹdi ndusụk ufọn oro Mme Ntiense Jehovah ẹmi mîdọhọ ndọ ẹnyenede?
16 Edide Christian etre ndidọ ndọ ke ntak ọkpọkpọ ubiere m̀mê oto se owo mîkemeke ndinyan̄a, itie unana ndọ esida ediwak ọkpọkpọ ufọn edi. Mbon oro mîdọhọ ndọ nte ido edide ẹsinyene ekese ini ndikpep Ikọ Abasi nnyụn̄ ntie n̄kere enye. Edieke mmọ ẹdade ifet emi ẹnam n̄kpọ nte ọfọnde, idaha n̄kpọ spirit mmọ eyetụn̄ọ. Sia mînyeneke nsan̄andọ ndibuana mme mfịna mmọ, ediwak mmọ ẹkpep ndinen̄ede mberi edem ke Jehovah nnyụn̄ nyom ndausụn̄ esie ke kpukpru n̄kpọ. (Psalm 37:5) Emi esin̄wam ndida n̄kpet n̄kpet itie ebuana ye Jehovah ndi.
17, 18. (a) Mme ifet ewe ndidụk ikpehe utom oro atarade ẹdu ẹnọ mme asan̄autom Jehovah ẹmi mîdọhọ ndọ? (b) Didie ke ndusụk asan̄autom Jehovah ẹmi mîdọhọ ndọ ẹtịn̄ ẹban̄a inemesịt mmọ?
17 Mme Christian oro mîdọhọ ndọ ẹnyene mme ifet ndidụk ikpehe utom oro atarade oro adade itoro ọsọk Jehovah. Akpan ukpep oro ẹnọde idahaemi ke Ufọkn̄wed Unọ Mme Asan̄autom Ukpep enyene nditọete iren oro mîdọhọ ndọ m̀mê irenowo ẹmi iban ẹkpade ẹkpọn̄. Nditọete iban oro mîdọhọ ndọ n̄ko ẹnyene ifụre ẹkan ndinyanade mbịne mme ifetutom ke utom Abasi. Eyenete an̄wan oro ọsọn̄de ke isua emana oro ẹkesiakde ke mbemiso ama ọnọ idem unyịme unyịme ndinam utom ke idụt Africa kiet ke ini, ke ndikot nto enye, enye ekedide “n̄wan oro etiede mmemidem mmemidem emi ebede isua 50 ke emana.” Ndien enye ama odu do, idem ke ini ẹkedoride ukpan, ke ini ẹkebịnde kpukpru mme isụn̄utom ẹfep. Enye ke osụk anam utom do nte asiakusụn̄, okposụkedi enye idahaemi ama ekebe isua 80 ke emana. Nte enye okop inemesịt? Ke mbụkuwem esie enye ekewet ete: “Ami mma n̄keme ndida udiana ifụre oro n̄kenyenede ye ifet oro itie unana ndọ ọnọde ke ndisịn idem ke utom ukwọrọikọ, ndien emi amada akwa idatesịt ọsọk mi. . . . Ke ofụri isua oro ẹbede itie ebuana mi ye Jehovah omotụn̄ọ. Nte n̄wan oro mîdọhọ ndọ ke idụt Africa, mmokụt enye nte Andikpeme.”
18 Se itịmde idot ẹfiọk, n̄ko, edi mme ikọ eyenete eren emi akanamde utom ke ibuot itieutom Watch Tower Society ke ediwak isua. Enye ama okop inemesịt, okposụkedi enye mîkọdọhọ ndọ akananam ye okposụkedi enye ekenyenede idotenyịn uwem eke heaven ye unana idotenyịn edidọ ndọ. Ke edide isua 79 ke emana, enye ama ewet ete: “Kpukpru usen ami mmesiben̄e edima Ete nnyịn eke heaven un̄wam ye eti ibuot ke akam man anam mi ndu ke nsọn̄idem ke n̄kan̄ eke spirit ọkọrọ ye ke ikpọkidem ye odudu man n̄keme ndikaiso nnam edisana uduak esie. Ke isua aba-ye-usụkkiet ẹmi nnamde utom Jehovah ami ke akpanikọ mmenyene inemesịt, utịp ye usụn̄uwem oro ẹdiọn̄de. Ndien ke mfọnido Jehovah oro owo mîdotke ami ke nsak iso nse n̄kaiso utom oro adade ukpono ye itoro ọsọk enye onyụn̄ adade edidiọn̄ ọsọk ikọt esie. . . . Idatesịt Jehovah aman̄wam mi ndikaiso n̄wana eti en̄wan mbuọtidem, nsakde iso nse ini emi mme asua Jehovah mîdidụhe aba ndien ofụri isọn̄ ọyọhọde ye ubọn̄ esie.”—Numbers 14:21; Nehemiah 8:10; Enyọn̄-Ukpeme (Ikọmbakara), November 15, 1968, page 699-702.
Ata Inemesịt Ọkọn̄ọ ke Nso?
19. Inemesịt nnyịn edikọn̄ọ kpukpru ini ke nso?
19 Ọsọn̄urua itie ebuana nnyịn ye Jehovah, unyịme esie, ye edidiọn̄ esie—mmọemi ẹdi mme n̄kpọ oro ẹdidade ata inemesịt ẹsọk nnyịn ke nsinsi. Ye nnennen ekikere emi ke se idade ata inemesịt idi, idem mme asan̄autom Jehovah oro ẹdọde ndọ ẹfiọk ẹte ke ndọ mmimọ idịghe ata akpan n̄kpọ ke uwem mmimọ. Mmọ ẹnam item apostle Paul emi: “Edi ndọhọ mbufo, nditọete, nte, ẹsịbe ini omụhọ; ntre ọtọn̄ọde ke ini emi, yak mmọemi ẹnyenede n̄wan ẹdu uwem nte mmọemi mînyeneke.” (1 Corinth 7:29) Emi iwọrọke ndifụmi iban mmọ. Mme ebe Christian oro ẹkọride ẹsịm ọyọhọ idaha ẹnịm utom Jehovah akpa, kpasụk ntre ye mme abak-Abasi, ndima, ye mme ọnọ-ibetedem iban mmọ, ndusụk mmọ ẹkam ẹnamde utom uyọhọ-ini nte nsan̄a mme ebe mmọ.—Mme N̄ke 31:10-12, 28; Matthew 6:33.
20. Nso nnennen edu ke ediwak Christian ẹnyene ẹban̄a mbiomo ndọ mmọ?
20 Nditọete iren oro ẹdọde ndọ ẹmi ẹdide mme esenyịn oro ẹsan̄ade-san̄a, mme anamutom unyịmesịt ke Bethel, mbiowo esop—ke akpanikọ, kpukpru mme Christian oro ẹdọde ndọ ẹmi ẹnịmde mme ufọn n̄kpọ Obio Ubọn̄ akpa—‘idaha ererimbot inam n̄kpọ ọyọhọ ọyọhọ’; mmọ ẹnam n̄kpọ ndinam mbiomo ndọ mmọ ekekem ye uwem utom uyakidem mmọ nnọ Jehovah. (1 Corinth 7:31) Edi, mmọ ẹkop inemesịt. Ntak-a? Koro akakan ntak inemesịt mmọ idịghe ndọ mmọ edi edi utom oro mmọ ẹnamde ẹnọ Jehovah. Ndien ediwak mme anam-akpanikọ ebendọ ye ibanndọ—ih, ye nditọ mmọ n̄ko—ẹkop inemesịt ndikụt n̄kpọ ẹbonode ntre.
21, 22. (a) Ọkọn̄ọde ke Jeremiah 9:23, 24, nso ikpanam nnyịn iyọhọ ye inemesịt? (b) Mme ntak inemesịt ewe ke ẹsiak ke N̄wed Mme N̄ke 3:13-18?
21 Prophet Jeremiah ekewet ete: “Ntem ke Jehovah ọdọhọ, ete, Owo eti ibuot okûbụre mbụre ke eti ibuot esie, owo uko okûnyụn̄ obụre mbụre ke uko esie, owo inyene okûnyụn̄ obụre mbụre ke inyene esie: edi yak owo eke obụrede, obụre ke n̄kpọ emi, ke editịm mfiọk mi, koro ami Jehovah nnamde mfọnido, ye ikpe, ye edinen ido ke ererimbot: koro n̄kpọ emi enemde mi esịt: uyo Jehovah edi emi.”—Jeremiah 9:23, 24.
22 Edide nnyịn idọhọ ndọ m̀mê imọdọ, n̄kponn̄kan ebiet inemesịt nnyịn ekpedi ifiọk oro inyenede iban̄a Jehovah ye edinịm oro inịmde ke akpanikọ ite ke imenyene edidiọn̄ esie koro nnyịn inamde uduak esie. Nnyịn imokop inemesịt n̄ko ke ndinyene ikike ke se inamde ata idaha eti ido uwem, kpa n̄kpọ emi Jehovah amade. Edidem Solomon emi ọkọdọde ediwak iban ikadaha ndọ nte n̄kukụre ukpọhọde inemesịt. Enye ọkọdọhọ ete: “Ọfọfọn [“inemesịt odu,” NW] ọnọ owo eke osịmede eti ibuot, ye owo eke okụtde asian. Koro udori esie ọfọnde akan udori silver, mbun̄wụm esie onyụn̄ ọfọn akan eti gold. Enye ọsọn̄ urua akan pearl; kpukpru n̄kpọuto fo inyụn̄ ikemke ukem ye enye. Anyan usen odu enye ke ubọk nnasia; inyene ye ubọn̄ ẹdu enye ke ufien. Usụn̄ esie ẹdi usụn̄ inemesịt, kpukpru ọkpọusụn̄ esie ẹnyụn̄ ẹdi ifụre. Enye edi eto uwem mmọ eke ẹmụmde enye ẹkama: onyụn̄ ọfọn ye mmọ eke ẹfatde enye.”—Mme N̄ke 3:13-18.
23, 24. Ntak emi nnyịn ikponịmde ke akpanikọ ite ke mme asan̄autom Jehovah ẹyekop inemesịt ke obufa editịm n̄kpọ?
23 Nnyịn oro idọde ndọ ikpakam inyene nsinsi idatesịt ke ndinam uduak Abasi. Ndien ndima nditọete nnyịn iren ye iban oro mîdọhọ ndọ ẹdide sia mîyomke m̀mê otode ke mme idaha oro owo mîkemeke ndinyan̄a ẹkpakam ẹyọ kpukpru idomo mmọ ẹnyụn̄ ẹnyene inemesịt ye uyụhọ ke ndinam n̄kpọ Jehovah idahaemi ye ke nsinsi. (Luke 18:29, 30; 2 Peter 3:11-13) Ke editịm n̄kpọ Abasi oro edide, ẹyekụbọde “mme n̄wed.” (Ediyarade 20:12) Mmọemi ẹyesịne mme aduai-owo-idem mbufa ibet ye mme ewụhọ ẹmi ẹtịpde n̄kpọ ẹsịn ke inemesịt okopitem ubonowo.
24 Ke akpanikọ, nnyịn imekeme ndinyene mbuọtidem nte ke “Abasi inemesịt” nnyịn enyene utịbe utịbe nti n̄kpọ ọnọ nnyịn oro ẹdisụn̄ọde ke ọyọhọ inemesịt nnyịn. (1 Timothy 1:11) Abasi eyekaiso ‘nditat ubọk esie nnyụn̄ nnọ kpukpru mme andidu uwem se mmọ ẹmade ẹyụhọ.’ (Psalm 145:16) Eyịghe idụhe inemesịt odude edinyụn̄ osụk odude kpukpru ini ke ndinam n̄kpọ Jehovah.
Didie ke Afo Ọkpọbọrọ?
◻ Nso idi isọn̄ inọ inemesịt mme asan̄autom Jehovah oro ẹyakde idem ẹnọ?
◻ Ke mme ini ẹkewetde Bible, mmanie ẹkedi ndusụk mme asan̄autom Jehovah oro mîkọdọhọ ndọ ẹdi ẹkopde inemesịt?
◻ Ntak emi Paul okotorode itie unana ndọ, ndien didie ke ndusụk Christian ẹkụt emi nte edide uwem inemesịt?
◻ Inemesịt nnyịn edikọn̄ọ kpukpru ini ke nso?
◻ Ntak emi nnyịn ikpenyenede mbuọtidem nte ke kpukpru mbon oro ẹnamde akpanikọ ke obufa editịm n̄kpọ ẹyekop inemesịt?
[Ndise ke page 16]
Ediwak nditọete iban ẹmi mîdọhọ ndọ ẹkop inemesịt ndinam n̄kpọ Jehovah ke edinam akpanikọ nte mme asan̄autom uyọhọ-ini
[Ndise ke page 18]
Ndinam n̄kpọ Jehovah edi akpan n̄kpọ oro ọnọde inemesịt