Ndịben̄kpọ Oro Mîkpanaha Mme Christian Ẹdịp!
“N̄ketịn̄ mme n̄kpọ nnọ ererimbot an̄wan̄wa; . . . ntịn̄ke baba n̄kpọ kiet ke ndịbe.”—JOHN 18:20.
1, 2. Nso ke ikọ Greek oro my·steʹri·on ọwọrọ nte ẹdade enye ẹtịn̄ ikọ ke N̄wed Abasi?
ẸKABADE ikọ Greek oro my·steʹri·on ke New World Translation of the Holy Scriptures utịm ike-25 nte “edisana ndịben̄kpọ” ye utịm ike-3 nte “ndịben̄kpọ.” Anaedi ndịben̄kpọ ẹmi ẹkotde edisana enen̄ede edi ata akpan n̄kpọ! Owo ekededi emi enyenede ifet ndidiọn̄ọ utọ ndịben̄kpọ oro ekpenyene ndikere ke imenyene akamba ukpono, sia ẹbatde enye nte odotde ndibuana ndịben̄kpọ ye Akakan Abasi ofụri ekondo.
2 Expository Dictionary of Old and New Testament Words eke Vine ọsọn̄ọ ete ke ata ediwak idaha “edisana ndịben̄kpọ” edi nnennen usụn̄ ndikabade utu ke “ndịben̄kpọ.” Enye etịn̄ aban̄a my·steʹri·on ete: “Ke [N̄wed Abasi Christian Usem Greek] enye iwụtke n̄kpọ oro owo mîdiọn̄ọke (nte edide ke usem Ikọmbakara), edi oro, ke ayan̄ade ndammana ifiọk owo, ẹkemede ndidiọn̄ọ n̄kukụre ebe ke uyarade Abasi, ndien ẹnam ẹdiọn̄ọ enye ke ido ye ini oro Abasi emekde, ẹnọ n̄kukụre mbon oro Edisana Spirit anamde enyịn an̄wan̄a. Ke ataata usụn̄ifiọk ndịben̄kpọ ọnọ ekikere aban̄ade ifiọk oro ẹmụmde ẹkama; se enye ọwọrọde ke N̄wed Abasi edi akpanikọ oro ẹyararede. Ntem mme ikọ oro ẹnyenede akpan ebuana ye ibuot nneme emi ẹdi ‘ẹnam ẹfiọk,’ ‘ẹwụt,’ ‘ẹyarade,’ ‘ẹkwọrọ,’ ‘ẹfiọk,’ ‘edisuan.’”
3. Didie ke esop Christian eke akpa isua ikie okokpụhọde ye ndusụk ndedịbe otu ido ukpono?
3 Se ẹnamde an̄wan̄a emi owụt akpan ukpụhọde oro odude ke ufọt mme ndedịbe otu ido ukpono oro ẹketarade ẹsuana ke akpa isua ikie ye esop Christian oro ọkọtọn̄ọde obufa obufa. Ke adan̄aemi ẹkesiwakde ndida un̄wọn̄ọ ndopuyo n̄wụk mbon oro ẹkedade ẹsịn ke ndedịbe n̄ka man ekpeme mme ukpepn̄kpọ ido ukpono, akananam owo idorike mme Christian utọ ukpan oro. Edi akpanikọ nte ke apostle Paul ama etịn̄ aban̄a “ifiọk Abasi ke [edisana] ndịben̄kpọ,” okotde enye “ifiọk eke ekedịbede,” oro edi, edịbe “mme andikara eyo emi.” Enye idịbeke mme Christian ẹmi ẹma ẹkeyarade enye ẹnọ ebe ke spirit Abasi man otodo mmọ ẹkwọrọ enye an̄wan̄wa.—1 Corinth 2:7-12; men Mme N̄ke 1:20 domo.
Ẹdiọn̄ọ “Edisana Ndịben̄kpọ”
4. “Edisana ndịben̄kpọ” ọkọn̄ọ ke anie, ndien didie?
4 “Edisana ndịben̄kpọ” Jehovah ọkọn̄ọ ke Jesus Christ. Paul ekewet ete: “[Jehovah] anam nnyịn ifiọk [edisana ndịben̄kpọ, NW] ke esịt Esie, kpa nte enemde Enye esịt ndiduak ke Christ; ete Imọ ikpatan̄ kpukpru n̄kpọ idọn̄ ke Christ, n̄kpọ eke ẹdude ke enyọn̄, ye n̄kpọ eke ẹdude ke isọn̄.” (Ephesus 1:9, 10) Paul ama akam etịn̄ n̄kpọ ata nnennen aban̄a uduot “edisana ndịben̄kpọ” oro ke ini enye akanyande ubọk owụt ufọn edinyene “nnennen ifiọk edisana ndịben̄kpọ Abasi, oro edi, Christ.”—Colossae 2:2.
5. “Edisana ndịben̄kpọ” abuana nso?
5 Nte ededi, ekese n̄kpọ abuana, koro “edisana ndịben̄kpọ” edi ndịben̄kpọ oro enyenede ekese ikpehe. Enye idịghe sụk edidiọn̄ọ Jesus nte edide Mfri m̀mê Messiah oro ẹken̄wọn̄ọde; enye esịne utom oro ẹnọde enye ndinam ke uduak Abasi. Enye abuana ukara eke heaven, kpa Obio Ubọn̄ Abasi eke Messiah, nte Jesus akanamde etịm an̄wan̄a ke ini enye akasiande mme mbet esie ete: ‘Ẹyak ẹnọ mbufo ndifiọk edisana ndịben̄kpọ Obio Ubọn̄ Heaven, edi iyakke inọ mmọ.’—Matthew 13:11.
6. (a) Ntak enende ndidọhọ ke “edisana ndịben̄kpọ” ‘ekedịbe ke nsinsi eyo’? (b) Didie ke ẹkeyarade enye ke adiana ke adiana?
6 Akana anyan ikpehe ini ebe ọtọn̄ọde ke akpa ini oro ẹketịn̄de ẹban̄a uduak Abasi ndisịn itiat idakisọn̄ kaban̄a Obio Ubọn̄ Messiah ye edida “edisana ndịben̄kpọ . . . nsịm utịt.” (Ediyarade 10:7, NW; Genesis 3:15) Edida enye nsịm utịt editịbe ye ediwụk Obio Ubọn̄, nte ẹwụtde ke ẹmende Ediyarade 10:7 ẹdomo ye 11:5. Ke akpanikọ, n̄kpọ nte isua 4,000 ẹma ẹbe tọn̄ọ nte ẹkenam akpa un̄wọn̄ọ Obio Ubọn̄ ke Eden tutu esịm ini emi Edidem oro emekde ọkọwọrọde owụt idem ke 29 E.N. Isua 1,885 efen ẹma ẹbe mbemiso ẹkewụkde Obio Ubọn̄ oro ke heaven ke 1914. Ntem ẹma ẹyarade “edisana ndịben̄kpọ” ke adiana ke adiana ke se ibede n̄kpọ nte isua 6,000. (Se page 16.) Paul ke akpanikọ ama enen ke nditịn̄ mban̄a ‘ediyarade edisana ndịben̄kpọ emi ekedịbede ke nsinsi eyo, edi kemi ẹkeyararede ẹnyụn̄ ẹnamde ẹfiọk.’—Rome 16:25-27; Ephesus 3:4-11.
7. Ntak emi nnyịn ikemede ndinyene ọyọhọ mbuọtidem ke asan̄autom emi anamde akpanikọ onyụn̄ enyenede ọniọn̄?
7 Ke edide isio ye mme owo, ẹmi ẹnyenede esisịt ini uwem, akananam ini idịghe mfịna inọ Jehovah oro akpanamde enye ayarade ndịben̄kpọ esie ke adan̄aemi ini mîkemke. Akpanikọ emi ekpenyene ndinam nnyịn inyene ime ke ini owo mîkemeke ndinam ndusụk mbụme Bible ẹtịm ẹn̄wan̄a. Nsụhọdeidem ke n̄kan̄ asan̄autom emi anamde akpanikọ onyụn̄ enyenede ọniọn̄, ẹmi ẹnọde utom edinọ mbonufọk Christian udia ke edikem ini, akpan enye ndikohode idem nnam n̄kpọ mbe adan̄a nnyụn̄ nnọ ekikere ntịme ntịme mban̄a mme n̄kpọ oro mîn̄wan̄ake kan̄a. Otu asan̄autom emi odomo ndifep ndinam n̄kpọ ke ufịk. Enye osụhọde idem ekem ndinyịme ke imọ ikemeke ndibọrọ kpukpru mbụme idahaemi, enyenede Mme N̄ke 4:18 in̄wan̄în̄wan̄ ke ekikere. Edi n̄kpọ nduaidem didie ntem ndifiọk nte ke Jehovah, ke edikem ini esie ye ke usụn̄ esie, ayaka iso ndiyarade ndịben̄kpọ esie ẹban̄ade uduak esie! Ẹyak nnyịn ikûdedei inana ime iban̄a ndutịm Jehovah, idomode ye unana ọniọn̄ ndifehe mbe Andiyarade ndịben̄kpọ iso. Edi n̄kpọ nduaidem didie ntem ndifiọk nte ke usụn̄ oro Jehovah adade anam n̄kpọ mfịn inamke ntre! Enye anam akpanikọ onyụn̄ enyene ọniọn̄.—Matthew 24:45; 1 Corinth 4:6.
Ana Ẹtịn̄ Ndịben̄kpọ Oro Ẹyararede!
8. Nnyịn isan̄a didie ifiọk ite ke ẹnyene ndinam ẹdiọn̄ọ “edisana ndịben̄kpọ”?
8 Jehovah iyarakede “edisana ndịben̄kpọ” esie inọ mme Christian man mmọ ẹmen enye ẹdịp. Ana ẹnam ẹdiọn̄ọ enye, ke n̄kemuyo ye edumbet oro Jesus ekenịmde ọnọ kpukpru mme anditiene enye—inọhọ sụk ibat ibat mme ọkwọrọ ederi kpọt: “Mbufo ẹdi un̄wana ererimbot. Obio eke ẹbọpde ke enyọn̄ obot ikemeke ndidịbe. Owo inyụn̄ idomoke utuenikan̄ ida aban̄ ifụk, edi owụk ke uwụk utuenikan̄; ntem ke un̄wana ayama ọnọ kpukpru owo eke ẹdude ke ufọk. Kpa ntre yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.”—Matthew 5:14-16; 28:19, 20.
9. Nso iwụt ke Jesus ikedịghe anam ukpụhọde, nte ndusụk owo ẹdọhọde?
9 Jesus ikenyeneke uduak edinam ukpụhọde ke ndisiak ndedịbe esop eke mme anditiene enye man ẹbịne ndedịbe uduak. Ke n̄wed oro Early Christianity and Society, Robert M. Grant ama ewet aban̄a n̄kan̄idem emi andida nnọ eke ọyọhọ isua ikie iba oro Justin Martyr akanamde aban̄a mme Christian ete: “Edieke mme Christian ẹkpekedide mme anam ukpụhọde mmọ ẹkpekedu ke ndịbe man ẹnam uduak mmọ.” Edi didie ke mme Christian ‘ẹkpekedu ke ndịbe’ ndien ke ukem ini oro ẹtie nte “obio eke ẹbọpde ke enyọn̄ obot”? Mmọ ikedehedei ida aban̄ ifụk un̄wana mmọ! Ukara, ke ntre, ikenyeneke n̄kpọ ndomokiet ndikop ndịk mban̄a utom mmọ. Ewetn̄wed emi ama aka iso nditịn̄ mban̄a mmọ nte “mfọnn̄kan ufan andikara ke n̄kpọ aban̄ade emem ye eti ndutịm.”
10. Ntak emi mme Christian mîkpedịpke se mmọ ẹdide?
10 Jesus ikoyomke mme mbet esie ẹdedịp se mmọ ẹdide nte mme andibuana ke inua-okot n̄ka ido ukpono. (Utom 24:14; 28:22) Nditre ndinam un̄wana nnyịn ayama mfịn ikpedịghe n̄kpọ inemesịt inọ Christ ye Ete esie, kpa Andiyarade ndịben̄kpọ, ndien emi ikpọnọhọ nnyịn inemesịt.
11, 12. (a) Ntak emi Jehovah oyomde ẹnam ẹdiọn̄ọ Ido Ukpono Christ? (b) Didie ke Jesus ekenịm nnennen uwụtn̄kpọ?
11 Jehovah “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9; Ezekiel 18:23; 33:11; Utom 17:30) Isọn̄ ndifen idiọkn̄kpọ mbon oro ẹkabarede esịt edi mbuọtidem ke uwa ufak Jesus Christ, emi ọkọnọde idemesie nte ufak kpukpru owo—idịghe kaban̄a ibat ibat owo kpọt—man “owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Edi akpan n̄kpọ ete ẹn̄wam mme owo ndinam mme usio-ukot oro ẹyomde ẹmi ẹdinamde mmọ ẹdot ndidi se ẹbierede ikpe ẹnọ nte mme erọn̄, idịghe mme ebot, ke ini ukpe ikpe emi edide.—Matthew 25:31-46.
12 Ata Ido Ukpono Christ idịghe n̄kpọ ẹdịpde-dịp; ẹnyene ndinam ẹdiọn̄ọ enye ke kpukpru usụn̄ oro odotde nte ẹkekeme. Jesus ke idemesie ama enịm nnennen uwụtn̄kpọ. Ke ini akwa oku okobụpde aban̄a mme mbet esie ye ukpepn̄kpọ esie, enye ọkọdọhọ ete: “Ami n̄ketetịn̄ n̄kpọ nnọ ererimbot an̄wan̄wa; n̄kọnọ ukpepn̄kpọ kpukpru ini ke synagogue ye ke temple, emi kpukpru mme Jew ẹkam ẹdide ẹdisobo do; n̄konyụn̄ ntịn̄ke baba n̄kpọ kiet ke ndịbe.” (John 18:19, 20) Ke ikerede iban̄a uwụtn̄kpọ emi, anie owo emi abakde Abasi ekpededei oyom ndidịp n̄kpọ emi Abasi ọdọhọde ke ana ẹtịn̄ an̄wan̄wa? Anie ekpededei edịp “ukpọhọde ifiọk” oro adade esịm nsinsi uwem? Ndinam ntre akpanam enye etie nte mbubịk mbon ido ukpono eke akpa isua ikie.—Luke 11:52; John 17:3.
13. Ntak emi nnyịn ikpọkwọrọde ikọ ke kpukpru ifet?
13 Akpakam owo ndomokiet idehede idọhọ ite ke nnyịn nte Mme Ntiense Jehovah imedịp etop Obio Ubọn̄ Abasi! Edide ẹnyịme m̀mê owo inyịmeke etop emi, ana mme owo ẹfiọk ẹte ke ẹma ẹkwọrọ enye. (Men Ezekiel 2:5; 33:33 domo.) Ẹyak nnyịn ke ntre ida kpukpru ifet oro ẹbererede inam n̄kpọ nditịn̄ etop akpanikọ nnọ kpukpru owo, ke ebiet ekededi oro nnyịn isobode mmọ.
Ndisịn Satan Uwam ke Mban̄
14. Ntak emi nnyịn mîkpemen̄eke ndinam n̄kpọ in̄wan̄în̄wan̄ ke utuakibuot nnyịn?
14 Ke ediwak ebiet mme ufọkutom usuanetop ẹdọdiọn̄ ẹtịn̄ enyịn ẹse Mme Ntiense Jehovah. Ukem nte se iketịbede inọ mme akpa Christian, ẹsiwak nditịn̄ idiọk mban̄a mmọ ẹnyụn̄ ẹbat mmọ ẹsịn ke mme ndedịbe n̄ka ido ukpono oro ẹnyenede eyịghe ẹban̄a. (Utom 28:22) Nte in̄wan̄în̄wan̄ edu nnyịn ke ndikwọrọ ikọ anam nnyịn idọdiọn̄ idi se ẹsuade? Ke akpanikọ ikpowụtke ifiọk, ikponyụn̄ ikemke ye item Jesus, ndisịn idem ke eneni oro mîdotke. (Mme N̄ke 26:17; Matthew 10:16) Nte ededi, eti utom ukwọrọikọ Obio Ubọn̄ ye edin̄wam mme owo ndifori uwem mmọ idịghe edịbe. Enye ọnọ Jehovah ubọn̄, emenede enye ke enyọn̄, ọwọn̄ọde ntịn̄enyịn ebịne enye ye Obio Ubọn̄ esie oro ẹma ẹkewụk. Nte ẹnamde n̄kpọ inem inem ẹban̄a akpanikọ Bible ke N̄kan̄ Edem Usiahautịn Europe ye mme ikpehe Africa ke ndondo emi ke ubak ubak oto ntak n̄kọri oro odude ke nte ẹkemede ndikwọrọ akpanikọ in̄wan̄în̄wan̄ do.
15, 16. (a) In̄wan̄în̄wan̄ edu ye uforo eke spirit nnyịn ẹyọhọ nso uduak, edi nte emi edi n̄kpọ oro ekpetịmerede nnyịn ekikere? (b) Ntak emi Jehovah esịnde Satan uwam ke mban̄?
15 Edi akpanikọ nte ke in̄wan̄în̄wan̄ usụn̄ emi Mme Ntiense Jehovah ẹdade ẹkwọrọ ikọ, paradise eke spirit emi mmọ ẹdarade, ye uforo mmọ—ke ibat owo ye ke inyene obụkidem—idịbeke. Ke adan̄aemi mmọ ẹdụride mbon esịt akpanikọ, mme n̄kpọ ẹmi ẹkeme ndidi n̄kpọ itekesịt nnọ mme andibiọn̄ọ. (2 Corinth 2:14-17) Ke akpanikọ, emi ke akpatre ekeme ndinam n̄kpọ nditap udịmekọn̄ Satan ndidi en̄wan ye ikọt Abasi.
16 Nte nnyịn ikpenyene nditịmede esịt mban̄a emi? Nnyịn ikpetịmekede esịt ke ikerede iban̄a prọfesi Jehovah ke Ezekiel ibuot 38. Enye ama ebemiso etịn̄ nte ke Gog eke Magog, enyịn̄ oro ẹnọde Satan kpa Devil tọn̄ọ nte ẹkesụhọde enye itie ẹnịm ke n̄kan̄ isọn̄ ke ẹma ẹkewụk Obio Ubọn̄ ke 1914, ayada en̄wan etiene ikọt Abasi. (Ediyarade 12:7-9) Jehovah ọdọhọ Gog ete: “Afo ọyọdọhọ, ete, Nyọdọk ke isọn̄ obio in̄wan̄; nyesịm mmọ eke ẹtiede ke ifụre, ẹmi ẹdụn̄de ke ndueidem, kpukpru mmọ ẹdụn̄ ẹnana ibibene, eto usụn̄ ye itịm inyụn̄ idụhe, ete ibụme mbụme, inyụn̄ iwo n̄wo, inyụn̄ ikabade ubọk imọ idori mme n̄wụre ẹmi ẹdụn̄de, inyụn̄ isịm mbio ẹmi ẹketan̄de ke mme idụt ẹbon, ẹmi ẹkọde ufene ye inyene, ẹmi ẹdụn̄de ke ufọt ererimbot.” (Ezekiel 38:11, 12) Ufan̄ikọ 4 owụt ete ke inaha ikọt Abasi ẹkop ndịk ẹban̄a en̄wan emi, nte ededi, koro edi Jehovah anam. Edi ntak emi Abasi ediyakde ẹda en̄wan ẹtiene—ih, idem esịnde ẹsiak en̄wan ye—ikọt Abasi? Ke ufan̄ikọ 23 nnyịn ikot ibọrọ oro Jehovah ọnọde ntem: “Ami nyonyụn̄ nnịm idemmi ke akwa ye ke edisana, nnyụn̄ nnam mmọ ẹfiọk mi ke enyịn ediwak mme idụt. Ndien mmọ ẹyefiọk ẹte ke ami ndi Jehovah.”
17. Didie ke nnyịn ikpese en̄wan Gog oro etịmde ekpere?
17 Ntem, utu ke ndidu uwem ke ndịk kaban̄a en̄wan Gog, ikọt Jehovah ye udọn̄ ẹsak iso ẹse n̄kaiso edisu eke prọfesi Bible. Edi n̄kpọ nduaidem didie ntem ndifiọk nte ke ebede ke edifori ye edidiọn̄ esop esie oro ẹkụtde ke enyịn, Jehovah esịn Satan uwam ke mban̄ onyụn̄ odụri enye ye udịmekọn̄ esie anam ẹkan mmọ!—Ezekiel 38:4.
Idahaemi Akan Nte Akanam Edide!
18. (a) Nso ke ediwak owo ẹdi ẹdifiọk idahaemi, ndien ntak-a? (b) Didie ke nte ẹnamde n̄kpọ ẹban̄a ukwọrọikọ Obio Ubọn̄ edi okopodudu n̄kpọ nsịnudọn̄?
18 Ke eyomfịn Mme Ntiense Jehovah ẹnen̄ede ẹnam n̄kpọ an̄wan̄wa ke nditịn̄ mme ekikere mmọ oro ẹkọn̄ọde ke Bible, idem okposụkedi ediwak owo mîmaha emi. Ke ediwak isua mmọ ẹmedụri owo utọn̄ ẹban̄a n̄kpọndịk oro odude ke ndin̄wọn̄ sika ye edida ibọk ke idiọk usụn̄, unana ifiọk oro odude ke nditek ubọk ke nditụnọ eyenọwọn̄, ndiọi utịp oro ẹdude ke unọ idem inemesịt oro ọyọhọde ye oburobụt ido idan̄ ye afai, ye n̄kpọndịk oro odude ke edikịm iyịp nsịn ke idem. Mmọ n̄ko ẹnyan ubọk ẹwụt ndutịme oro odude ke ukpepn̄kpọ edito ke unam mforo owo. Ediwak owo efen efen ke ẹdọhọ idahaemi, “Idem n̄kpọ Mme Ntiense Jehovah ikwan̄ake.” Edieke nnyịn mîkpetiehe ata in̄wan̄în̄wan̄ ke ndinam mme owo ẹdiọn̄ọ ẹban̄a ekikere nnyịn, mmọ ikpanamke n̄kpọ ke usụn̄ emi. Ndien kûfụmi akpanikọ oro nte ke ebede ke nditịn̄ n̄kpọ ntem, mmọ ke ẹnam usio-ukot ẹbịne edidọhọ, “Satan, afo edi osu nsu; Jehovah akam edi andinen.” Nso okopodudu n̄kpọ nsịnudọn̄ ke nnyịn inyene ntem ndika iso ntiene uwụtn̄kpọ Jesus, itịn̄de ikọ akpanikọ Abasi an̄wan̄wa!—Mme N̄ke 27:11.
19, 20. (a) Nso ubiere ke ikọt Jehovah ẹkenam ke 1922, ndien ndi mme ikọ ẹmi ke ẹsụk ẹnyene n̄kpọ ndinam? (b) Didie ke nnyịn ikpese “edisana ndịben̄kpọ” Jehovah?
19 Ikọt Jehovah ẹdiọn̄ọ se idide mbiomo mmọ ke afan̄ emi ke anyanini. Ke enịm-mbụk mbono kiet ke 1922, J. F. Rutherford, etieibuot Watch Tower Society ini oro, ama anam otuowo esie ẹkop nduaidem ke ndidọhọ ete: “Ẹnen̄ede ẹfara ke idem, ẹdu ke ọkpọsọn̄ ukpeme, ẹsịn ifịk, ẹnyene uko. Ẹdi mme ntiense oro ẹnamde ẹnyụn̄ ẹtịn̄de akpanikọ ẹnọ Ọbọn̄. Ẹka iso ke en̄wan tutu kpukpru efak Babylon ẹna ndon. Ẹtan̄a etop oro ke kpukpru itụn̄ ye inụk. Ana ererimbot ẹfiọk ẹte ke Jehovah edi Abasi ye nte ke Jesus Christ edi Edidem ndidem ye Ọbọn̄ mbọn̄. Emi edi akakan usen. Sese, Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a, Edidem ye obio ubọn̄ esie.”
20 Kpa nte mme ikọ ẹmi ẹkedide akpan n̄kpọ ke 1922, mmọ ẹtetịm ẹdi ẹkan ke isua 75 ẹma ẹkebe, ke ini ediyarade Christ nte Ebiereikpe ye Osio-Usiene etịmde-tịm ekpere akan! Etop aban̄ade Obio Ubọn̄ Jehovah oro ẹma ẹkewụk ye paradise eke spirit oro ikọt Abasi ẹdarade edi “edisana ndịben̄kpọ” emi ẹkponde ẹkan se ẹdịpde. Nte Jesus ke idemesie eketịn̄de in̄wan̄în̄wan̄, ana mme anditiene enye, ye un̄wam edisana spirit, ẹdi mme ntiense “tutu esịm utịt ererimbot” ẹban̄a akpan itie oro enye enyenede ke nsinsi uduak Jehovah. (Utom 1:8; Ephesus 3:8-12) Ke akpanikọ, nte mme asan̄autom Jehovah, kpa Abasi emi ayararede ndịben̄kpọ, inaha nnyịn idede idịp n̄kpọ emi inọ idem nnyịn!
Didie ke Afo Ọkpọbọrọ?
◻ Nso idi “edisana ndịben̄kpọ”?
◻ Nnyịn isan̄a didie ifiọk ite ke ẹkenyene nditan̄a enye an̄wan̄wa?
◻ Nso idi ntak oro Gog adade en̄wan etiene ikọt Jehovah, ndien didie ke nnyịn ikpese emi?
◻ Nnyịn owo kiet kiet ikpebiere ndinam nso?
[Ekebe ke page 16]
ẸYARADE “EDISANA NDỊBEN̄KPỌ” KE ADIANA KE ADIANA
◻ Ke 4026 M.E.N. Ama Ekebe: Abasi ọn̄wọn̄ọ ndinam Mfri oro edisobode Satan adaha ada.—Genesis 3:15
◻ 1943 M.E.N.: Ẹsọn̄ọ ediomi Abraham, ẹn̄wọn̄ọ nte ke Mfri oro edito Abraham.—Genesis 12:1-7
◻ 1918 M.E.N.: Isaac amana nte adiakpa ediomi oro.—Genesis 17:19; 21:1-5
◻ N̄kpọ nte 1761 M.E.N.: Jehovah ọsọn̄ọ nte ke Mfri oro edito Jacob eyen Isaac.—Genesis 28:10-15
◻ 1711 M.E.N.: Jacob etịn̄ nte ke Mfri oro edito eyen imọ Judah.—Genesis 49:10
◻ 1070-1038 M.E.N.: Edidem David ọfiọk ete ke Mfri oro edito ubon esie ndien ke ayakara nte Edidem ke nsinsi.—2 Samuel 7:13-16; Psalm 89:35, 36
◻ 29-33 E.N.: Ẹdiọn̄ọ Jesus nte Mfri, Messiah, ebiereikpe ini iso, ye Edidem Oro Ẹmekde.—John 1:17; 4:25, 26; Utom 10:42, 43; 2 Corinth 1:20; 1 Timothy 3:16
◻ Jesus ayarade nte ke imọ iyenyene ekemmọ mme andikara ye mme ebiereikpe, nte ke Obio Ubọn̄ eke heaven eyenyene mme andidu ke idak esie ke isọn̄, ye nte ke kpukpru mme anditiene enye ẹnyene ndidi mme ọkwọrọ Obio Ubọn̄.—Matthew 5:3-5; 6:10; 28:19, 20; Luke 10:1-9; 12:32; 22:29, 30; John 10:16; 14:2, 3
◻ Jesus ayarade nte ke ediwụk Obio Ubọn̄ oro ke akpan ini, nte mme n̄kpọntịbe ererimbot ẹsọn̄ọde.—Matthew 24:3-22; Luke 21:24
◻ 36 E.N.: Peter ọfiọk ete ke mbon oro mîdịghe mme Jew ẹyetiene ẹdi nsan̄a mme ada udeme Obio Ubọn̄ nnyene.—Utom 10:30-48
◻ 55 E.N.: Paul anam an̄wan̄a ete ke nsan̄a mme ada udeme Obio Ubọn̄ nnyene ẹyeset ẹdụk uwem oro mîdikpaha mîdinyụn̄ ibiarake ke ini edidu Christ.—1 Corinth 15:51-54
◻ 96 E.N.: Jesus, emi ama ọkọtọtọn̄ọ ndikara mme anditiene enye oro ẹyetde aran, ayarade nte ke akpatre ibat mmọ edidi 144,000.—Ephesus 5:32; Colossae 1:13-20; Ediyarade 1:1; 14:1-3
◻ 1879 E.N.: Zion’s Watch Tower anyan ubọk owụt 1914 nte akpan n̄wọrọnda isua ke ndisu “edisana ndịben̄kpọ” Abasi
◻ 1925 E.N.: Enyọn̄-Ukpeme anam an̄wan̄a nte ke Obio Ubọn̄ akamana ke 1914; ana ẹtan̄a “edisana ndịben̄kpọ” aban̄ade Obio Ubọn̄ an̄wan̄wa.—Ediyarade 12:1-5, 10, 17
[Mme ndise ke page 15]
Kpa nte Jesus, Adausụn̄ mmọ, Mme Ntiense Jehovah ẹtan̄a Obio Ubọn̄ Jehovah an̄wan̄wa