Mme Mbụme Ẹtode Mme Andikot
Ntak emi 1 Corinth 10:8 ọdọhọde ke ẹkewot nditọ Israel 23,000 emi ẹkenamde use, ke ini Numbers 25:9 ọdọhọde ke ẹkewot owo 24,000?
Ediwak ntak ẹdu emi ẹkemede ndinam ukpụhọde emi odu ke ufan̄ikọ iba emi. Mmemmem ntak ekeme ndidi nte ke ibat oro odu ke ufọt 23,000 ye 24,000, ke ntre anamde ẹkeme ndida kiet ekededi ke otu iba emi.
Kere ban̄a ntak efen. Apostle Paul ama asiak uwụtn̄kpọ nditọ Israel ke Shittim nte ntọt uwụtn̄kpọ ọnọ mme Christian ke Corinth eset, kpa obio oro ẹketịmde ẹdiọn̄ọ ke ntak oburobụt ido uwem esie. Enye ekewet ete: “Nnyịn ikûnyụn̄ inam use, nte ndusụk mmọ ẹkenamde, ẹnyụn̄ ẹkpan̄ade, thousand owo edịp ye ita ke usen kiet.” Paul akasiak sụk ibat mbon oro Jehovah okowotde ke ntak use nte ẹdide owo 23,000.—1 Corinth 10:8.
Nte ededi, Numbers ibuot 25 asian nnyịn ete ke ‘Israel ẹma ẹdian idem ye Baal-peor: ndien Jehovah ama ayat esịt ye Israel.’ Ekem, Jehovah ọdọhọ Moses owot “kpukpru mme etubom mbio emi.” Ndien Moses ama ọnọ mme ebiereikpe uyo ndinam ewụhọ Jehovah emi. Ke akpatre, ‘ẹma ẹtre idiọk udọn̄ọ oro’ ke ini Phinehas akanamde n̄kpọ usọp usọp ndiwot eyen Israel emi akadade n̄wan Midian odụk itienna nditọ Israel. Mbụk oro etre ye ikọ emi: “Mme mmọ emi ẹkpan̄ade ke idiọk udọn̄ọ oro ẹsịm tọsịn owo edịp ye inan̄.”—Numbers 25:1-9.
Nte an̄wan̄ade, ibat oro ẹsiakde ke Numbers ama ẹsịne “mme etubom mbio emi” mme ebiereikpe ẹkewotde ye mbon oro Jehovah okowotde ke idemesie. Ekeme ndidi mme etubom emi mme ebiereikpe ẹkewotde ẹkedi owo tọsịn kiet, anamde ibat oro esịm 24,000. Edide mme etubom m̀mê mme adausụn̄ emi ẹma ẹnam use, ẹbuana ke usọrọ oro, m̀mê ẹnyịme ye mbon oro ẹkenamde, mmọ ẹma ẹnyene ubiomikpe ke ntak ‘edidian idem ye Baal-peor.’
Kaban̄a ikọ oro “ẹdian idem,” n̄wed ndụn̄ọde Bible kiet anam an̄wan̄a ke enye ekeme ndiwọrọ “ndidian idemfo ye owo efen.” Nditọ Israel ẹdi mbon oro ẹkeyakde idem ẹnọ Jehovah, edi ke ini mmọ ‘ẹkediande idem ye Baal-peor,’ mmọ ẹma ẹbiat itie ebuana mmọ oro ẹkeyakde idem ẹnọ Abasi. Ke n̄kpọ nte isua 700 ke ukperedem, ebede ke prọfet Hosea, Jehovah ama etịn̄ aban̄a nditọ Israel ete: “Mmọ ẹka ke ọtọ Baal-peor, ẹnyụn̄ ẹdianade idem-mmọ ẹnọ n̄kpọ bụt oro: ẹnyụn̄ ẹkabade ẹdi mbubiam n̄kpọ nte se mmọ ẹmade.” (Hosea 9:10) Kpukpru mbon oro ẹkenamde emi ẹma ẹdot ubiomikpe Abasi. Ntem, Moses ama eti nditọ Israel ete: “Enyịn mbufo ẹmekụt se Jehovah akanamde ke ikọ Baal-peor; koro ama edi kpukpru owo emi ẹketienede Baal-peor, Jehovah Abasi mbufo ama osobo mmọ ke otu mbufo efep.”—Deuteronomy 4:3.