Nte Afo Ke Ọbiọn̄ọ Spirit Ererimbot?
“Nnyịn ikọbọhọ spirit ererimbot emi, edi ikọbọ spirit emi otode Abasi.”—1 CORINTH 2:12.
1, 2. Nso n̄kpọ mmọn̄eyet abuanade ofụm oro akamade n̄kpa okotịbe ke Bhopal, India, edi “ofụm” ewe oro akamade n̄kpa akan ke ẹn̄wek ke ofụri ererimbot mfịn?
KE MBỊTMBỊT okoneyo December kiet ke 1984, n̄kpọ n̄kpaidem ama otịbe ke Bhopal, India. Ke obio oro, usiakifia unam mmọn̄ibọk kiet odu, ndien ke okoneyo December oro, ufakinua kiet ama abiara ke kiet ke otu aban̄ udọn̄ gas. Inikiet inikiet, ediwak tọn methyl isocyanate ama ọtọn̄ọ ndiwọrọ ndụk ofụm. Ke ofụm emende, gas emi akamade n̄kpa mi ama asuana ọyọhọ mme ufọk ye mme ubon oro ẹkedede idap. Mme owo oro ẹkekpan̄ade ẹma ẹsịm ediwak tọsịn ke ibat, ndien ediwak owo efen efen ẹma ẹbiomo ndo. Emi ekedi ndiọkn̄kan unọmọ usiakifia oro akanam odude tutu osịm ini oro.
2 Mme owo ẹma ẹfụhọ ke ini ẹkekopde ẹban̄a Bhopal. Edi kpa ye enye ekedide n̄kpọ n̄kpa ntre, gas oro ọkọwọrọde do ikowotke owo awak nte se “gas” oro mme owo ke ofụri ererimbot ẹn̄wekde kpukpru usen owotde ke n̄kan̄ eke spirit. Bible okot enye “spirit ererimbot.” Edi akama-n̄kpa idaha oro ke apostle Paul ekemen odomo ye spirit oro otode Abasi ke ini enye ọkọdọhọde ete: “Edi nnyịn ikọbọhọ spirit ererimbot emi, edi ikọbọ spirit emi otode Abasi, man otodo nnyịn ikpọfiọk mme n̄kpọ eke Abasi ọnọde nnyịn ke mfọn.”—1 Corinth 2:12.
3. Nso idi “spirit ererimbot”?
3 Nso inen̄ede idi “spirit ererimbot”? Nte ekemde ye The New Thayer’s Greek English Lexicon of the New Testament, se ikọ oro “spirit” (Greek, pneuʹma) ọwọrọde ke ofụri ofụri edi “edu m̀mê odudu emi ọyọhọde onyụn̄ akarade ukpọn̄ owo ekededi.” Owo ekeme ndinyene eti m̀mê idiọk spirit, m̀mê edu. (Psalm 51:10; 2 Timothy 4:22) Otu mme owo n̄ko ekeme ndinyene spirit, m̀mê n̄wọrọnda edu. Apostle Paul ekewet ọnọ ẹsọk ufan esie Philemon ete: “Mfọn Ọbọn̄ nnyịn Jesus Christ akpakam odu ye spirit mbufo.” (Philemon 25) Ukem ntre—edi ke udomo oro okponde akan—ererimbot ke ofụri ofụri enyene ata n̄wọrọnda edu, ndien emi edi “spirit ererimbot” oro Paul eketịn̄de aban̄a. Nte ekemde ye Word Studies in the New Testament eke Vincent, “ubak udịmikọ oro ọwọrọ edumbet idiọkn̄kpọ oro onụkde ererimbot oro mîkemeke ndikpụhọde.” Enye edi ntụhọ unamidiọk oro akarade ekikere ererimbot emi onyụn̄ akarade usụn̄ oro mme owo ẹnamde n̄kpọ akamba akamba.
4. Anie edi ebiet emi spirit ererimbot otode, ndien nso utịp ke spirit emi enyene ke idem mme owo?
4 Spirit emi edi ibọkn̄kpa. Ntak-a? Koro enye oto “ọbọn̄ ererimbot emi,” Satan. Ke akpanikọ, ẹkot enye “ọbọn̄ emi akarade edem ikpaenyọn̄ [“ofụm,” NW], kpa spirit emi anamde utom kemi ke esịt nditọ ntụtutọn̄.” (John 12:31; Ephesus 2:2) Edi ọkpọsọn̄ n̄kpọ ndifep “ofụm” emi, m̀mê “spirit emi anamde utom kemi ke esịt nditọ ntụtutọn̄.” Enye odu ke kpukpru ebiet ke n̄kaowo. Edieke nnyịn in̄wekde, nnyịn iyetọn̄ọ ndikpebe mme edu esie, mme uduak esie. Spirit ererimbot esịn udọn̄ ọnọ ‘edidu uwem nte obụkidem etemede,’ oro edi, nte ekemde ye idiọkn̄kpọ unana mfọnmma nnyịn. Enye akama n̄kpa, “koro edieke mbufo ẹdude uwem nte obụkidem etemede, mbufo ẹnyene ndikpa.”—Rome 8:13.
Ndifep Spirit Ererimbot Emi
5. Didie ke Ntiense kiet akanam n̄kpọ ye eti ibuot ke ini afanikọn̄ oro ke Bhopal?
5 Ke ini afanikọn̄ oro ke Bhopal, ifiom ye idiọk utebe gas oro akamade n̄kpa do ẹma ẹdemede Ntiense Jehovah kiet ke idap. Ye unana ubiatini enye ama edemede ubon esie onyụn̄ emen mmọ efehe ọwọrọ ke efak. Ke ebetde ata esisịt man ọdiọn̄ọ ebiet emi ofụm oro otode edi, enye ama efet ufan̄ ke otuowo oro mîkọfiọkke se ẹkpenamde ebe onyụn̄ ada ubon esie ọdọk enyọn̄ obot emi ọwọrọde ọkpọn̄ obio. Do obufre mmọ ama ekeme ndinyene eti ofụm oro n̄kpọ mîsabakede emi okotode n̄kpọdiọhọ mmọn̄ oro okodude ekpere.
6. M̀mọ̀n̄ ke nnyịn ikeme ndika man ibọhọ spirit ererimbot?
6 Nte odu edikon̄ ebiet oro nnyịn ikemede ndika man ibọhọ akama-n̄kpa “ofụm” ererimbot emi? Bible ọdọhọ ke odu. Ke ebemde iso ada okụt eyo nnyịn, prọfet Isaiah ekewet ete: “Ama ekem ke utịt eyo, obot ufọk Jehovah eyewụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt. Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyenyụn̄ isan̄a ke usụn̄ esie: koro mme ewụhọ ẹyeto ke Zion, uyo Jehovah eyenyụn̄ oto ke Jerusalem.” (Isaiah 2:2, 3) Itie edisana utuakibuot oro emenerede ke enyọn̄, kpa edikon̄ “obot ufọk Jehovah,” edi n̄kukụre ebiet ke isọn̄ emi oro ọbọhọde spirit ererimbot emi ababade owo ibifịk onyụn̄ akamade n̄kpa mi. Edi do ke mme anam-akpanikọ Christian ẹnyene spirit Jehovah ifụre ifụre.
7. Didie ke ẹnyan̄a ediwak owo ẹsio ke spirit ererimbot?
7 Ediwak owo oro ke mbemiso eken̄wekde spirit ererimbot emi ẹmenyene ukem ubọhọ oro ebietde enyeoro Ntiense oro ke Bhopal ekenyenede. Ke ama eketịn̄ aban̄a “nditọ ntụtutọn̄” ẹmi ẹn̄wekde ofụm, m̀mê spirit ererimbot emi, apostle Paul ọdọhọ ete: “Kpukpru nnyịn n̄ko ikonyụn̄ isan̄a ye mmọ ke ini oko, idu uwem ke idiọkitọn̄ obụkidem nnyịn, inam se idọn̄de obụkidem ye ekikere nnyịn, ikonyụn̄ idi nditọ iyatesịt ke uduot nnyịn, kpa nte mmọ eken. Edi Abasi, emi enyenede uwak mbọm, oto ke akwa ima eke Enye akamade nnyịn, akanam nnyịn emi ikakpan̄ade ke mme ukwan̄n̄kpọ nnyịn idu uwem ke Christ.” (Ephesus 2:3-5) Mmọ oro mîn̄wekke n̄kpọ efen ikan idiọk ofụm n̄kpa eke editịm n̄kpọ emi ẹkpan̄a ke usụn̄ifiọk eke spirit. Nte ededi, ke ntak Jehovah, ediwak miliọn owo mfịn ke ẹfehe ẹka edikon̄ ebiet eke spirit ẹnyụn̄ ẹbọhọ akama-n̄kpa idaha oro.
Mme Uyarade “Spirit Ererimbot”
8, 9. (a) Nso iwụt ite ke nnyịn inyene ndidu ke ukpeme kpukpru ini mbiọn̄ọ spirit ererimbot? (b) Didie ke spirit Satan ekeme ndisabade nnyịn?
8 Akama-n̄kpa ofụm Satan osụk asasuana akanade nnyịn okụk. Ana nnyịn idu ke ukpeme idehede isụhọde, ifiak idụk ererimbot, ndusụk idide se ibifịk ababade ke n̄kan̄ eke spirit. Emi oyom ẹdu ke ukpeme kpukpru ini. (Luke 21:36; 1 Corinth 16:13) Da akpanikọ emi ke uwụtn̄kpọ. Kpukpru Christian ẹmehe ye mme idaha ido uwem Jehovah idinyụn̄ idehede inyịme ite ke mme utọ oburobụt edinam nte efịbe, use, ye idan̄ ukemuduot ẹdi se ẹnyịmede. Edi, isua kiet kiet ẹsisio n̄kpọ nte owo 40,000 ẹfep ke esop Jehovah. Ntak-a? Ke ediwak idaha ke ntak ukem oburobụt edinam ẹmi. Didie ke oro ekeme nditịbe?
9 Koro kpukpru nnyịn idi mme anana mfọnmma. Ikpọkidem ememem, ndien nnyịn kpukpru ini inyene ndin̄wana mbiọn̄ọ ndiọi ntụhọ oro ẹdụkde nnyịn esịt. (Ecclesiastes 7:20; Jeremiah 17:9) Nte ededi, edi spirit ererimbot emi esisịn udọn̄ ọnọ ndiọi ntụhọ oro. Ediwak owo ke ererimbot emi ikwe se ikwan̄ade ye oburobụt ido, ndien ekikere nnam-se-mmade edi ubak ekikere editịm n̄kpọ Satan. Kamse, edieke nnyịn isiode idem inyan inọ utọ ekikere oro, enen̄ede etie nte ke nnyịn iyetọn̄ọ ndikere n̄kpọ nte ererimbot ekerede. Ke mîbịghike, mme utọ oburobụt ekikere oro ẹkeme ndision̄o ndiọi udọn̄ ẹmi ẹdisụn̄ọde ke akwa idiọkn̄kpọ. (James 1:14, 15) Eyedi nnyịn ima iyo ikpọn̄ obot edisana utuakibuot Jehovah inyụn̄ isụhọde ke itịghede isọn̄ ererimbot Satan oro ẹsabarede. Idụhe owo emi okoide-koi odu do emi edinyenede nsinsi uwem.—Ephesus 5:3-5, 7.
10. Nso idi uyarade ofụm Satan kiet, ndien ntak emi mme Christian ẹkpefepde emi-e?
10 Ẹnen̄ede ẹkụt spirit ererimbot oro akande nnyịn okụk. Ke uwụtn̄kpọ, ediwak owo ẹda edu unana ukpono, editịn̄ ikọ uyat uyat ẹdu uwem. Ke mbiara m̀mê mme akara ukaraidem oro mînyeneke usọ ye oburobụt, mme ọdiọkitọn̄ adaiso ido ukpono ẹkpude, mmọ ẹtịn̄ ikọ ye unana ukpono ẹban̄a mme n̄kpọ oro ẹkam ẹdide akpan n̄kpọ. Mme Christian ẹbọbiọn̄ọ ntụhọ emi. Ke adan̄aemi nnyịn ikemede ndinyene eti edu mbubru, nnyịn ifefep edida edu unana ukpono editịn̄ ikọ uyat uyat ndụk ndi esịt esop. Ikọ Christian owụt uten̄e Jehovah ye esịt oro asanade. (James 3:10, 11; men Mme N̄ke 6:14 domo.) Edide nnyịn idi nditọwọn̄ m̀mê ikpọ owo, ikọ nnyịn ekpenyene ‘ndinyene inem ke esịt kpukpru ini, nte ẹsịnde inụn̄ ke esịt, kpan̄ nnyịn idiọn̄ọ nte nnyịn ikpemende ikọ inọ kpukpru owo ibọrọ.’—Colossae 4:6.
11. (a) Nso idi udiana ikpehe spirit ererimbot? (b) Ntak emi mme Christian ẹdide isio ye mbon oro ẹwụtde ikpehe enyeemi-e?
11 Ọsọ ntụhọ efen oro owụtde spirit ererimbot emi edi usua. Usua ye en̄wan oro ọkọn̄ọde ke mme utọk eke orụk, ekpụk, idụt, ye idem eke owo ye owo abaharede ererimbot. N̄kpọ ẹtịm ẹfọn didie ntem ke ebiet emi spirit Abasi enyenede odudu! Apostle Paul ekewet ete: “Ẹkûda idiọk ẹsio owo usiene idiọk. Ẹsịn idem ẹkere ndinam ido eke enyenede ukpono ke enyịn kpukpru owo. Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo. Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi: koro ẹwet ẹte, Jehovah ete, Usiene enyene Mi, Ami nyesio usiene. Edi edieke usua fo okopde biọn̄, nọ enye udia adia; edieke enye okopde nsatitọn̄, nọ enye mmọn̄ ọn̄wọn̄, koro ke edinam ntem, eyewobi mbubek ikan̄ obok enye ke ibuot. Ẹkûyak idiọk akan mbufo, edi ẹda nti edinam ẹkan idiọk ubọk.”—Rome 12:17-21.
12. Ntak emi mme Christian ẹfepde uma inyene?
12 Spirit ererimbot emi n̄ko edemede uma inyene. Ke ererimbot unyamurua esịnde udọn̄ ọnọ, ediwak owo ẹkere ẹban̄a obufa n̄kpọutom, obufa n̄kon̄ine ọfọn̄, obufa uduot moto. Mmọ ẹdụk ufụn ẹnọ “mbumek enyịn.” (1 John 2:16) Ediwak owo ẹdomo unen oro mmọ ẹkụtde ke uwem ebe ke nte ufọk mmọ okponde m̀mê ke ibatokụk oro mmọ ẹnyenede ke ban̄k. Mme Christian, ẹmi ẹn̄wekde eti ofụm eke spirit emi otode obot edisana utuakibuot Jehovah emi emenerede ke enyọn̄, ẹbiọn̄ọ ntụhọ emi. Mmọ ẹfiọk ẹte ke edibiere ndibịne mme n̄kpọ obụkidem ekeme ndikama nsobo. (1 Timothy 6:9, 10) Jesus ama eti mme mbet esie ete: “Owo enyene se enyenyene, uwem esie isịneke enye ke ubọk.”—Luke 12:15.
13. Nso idi ndusụk uyarade spirit ererimbot emi efen efen?
13 Mme uyarade efen eke ndedehe “ofụm” ererimbot emi ẹdu. Kiet edi edu nsọn̄ibuot. (2 Timothy 3:1-3) Nte afo omokụt ete ke ediwak owo isụkke aba ibuot inọ odudu edikara? Nte afo omokụt ntatara edinam unana edinam utom ke itieutom idịbi udia ibọhọke owo enen̄ede ada ese? Owo ifan̄ ke afo ọdiọn̄ọ ẹmi ẹbiatde mme ibet—ndusụk ẹdiade inọ ke tax mmọ m̀mê ẹyịpde n̄kpọ ke itieutom? Edieke edide afo ke akaka ufọkn̄wed, nte akanam afo omokop mmemidem ndinam ukeme fo koro nditọ ubet ukpepn̄kpọ mbufo ẹsede mbon oro ẹkụtde unen ke n̄kan̄ n̄wed ke usụhọde? Kpukpru ẹmi ẹdi uyarade spirit ererimbot oro anade mme Christian ẹbiọn̄ọ.
Nte Ẹkpebiọn̄ọde Spirit Ererimbot Emi
14. Ke mme usụn̄ ewe ke mme Christian ẹkpụhọrede ẹkpọn̄ mbon oro mîdịghe mme Christian?
14 Didie, ndien, ke nnyịn ikeme ndibiọn̄ọ spirit ererimbot ke ini edide nnyịn inen̄ede idu uwem ke ererimbot? Ana nnyịn iti ite ke inamke n̄kpọ m̀mê m̀mọ̀n̄ ke nnyịn idu, ke n̄kan̄ eke spirit nnyịn idịghe eke ererimbot. (John 17:15, 16) Mme utịtmbuba nnyịn idịghe mme utịtmbuba ererimbot emi. Nte nnyịn isede mme n̄kpọ ẹkpụhọde. Nnyịn idi mme owo eke spirit, itịn̄ke inyụn̄ ikereke n̄kpọ “eke eti ibuot owo ekpepde . . . , edi usem eke spirit ekpepde; nnyịn ida usem spirit isiak n̄kpọ spirit.”—1 Corinth 2:13.
15. Didie ke nnyịn ikeme ndibiọn̄ọ spirit ererimbot?
15 Nso ke owo akpanam edieke enye okụtde idemesie ke ikpehe oro idiọk ofụm n̄kpa asabarede? Enye ekeme ndimen n̄kpọ ofụm emi esịnede eti ofụm mfụk ke iso, mîdịghe enye ekeme ndiwọrọ n̄kpọn̄ ikpehe oro. Usụn̄ ndifep ofụm Satan esịne mme usụn̄ ẹmi. Adan̄a nte ikekeme, nnyịn idomo ndisio idem nnyịn mfep ke n̄kpọ ekededi oro edinamde spirit ererimbot emi otụk ekikere nnyịn. Ntem, nnyịn ifep idiọk nsan̄a, nnyịn inyụn̄ isioho idem inyan inọ orụk unọ idem inemesịt ekededi oro esịnde udọn̄ ọnọ afai, oburobụt ido, ubụpekpo, nsọn̄ibuot, m̀mê orụk utom obụkidem efen ekededi. (Galatia 5:19-21) Nte ededi, sia nnyịn idude uwem ke ererimbot, nnyịn ikemeke ndifep edisio idem nnyan nnọ mme n̄kpọ ẹmi ofụri ofụri. Ntre nnyịn inam n̄kpọ ke eti ibuot edieke nnyịn isọn̄ọde iyịre ye n̄kpọ unọ eti ofụm eke spirit. Nnyịn iyọhọ obufre eke spirit nnyịn, yak idọhọ ntre, ke ndidụk mbonoesop kpukpru ini, ukpepn̄kpọ idemowo, edinam ye ebuana Christian, ye akam. Ke usụn̄ emi, edieke ofụm Satan ekededi odụtde odụk obufre eke spirit nnyịn, spirit Abasi eyesọn̄ọ nnyịn idem ndisịn enye.—Psalm 17:1-3; Mme N̄ke 9:9; 13:20; 19:20; 22:17.
16. Didie ke nnyịn inọ uyarade ke imenyene spirit Abasi?
16 Spirit Abasi anam Christian akabade edi owo oro edide ata isio ye mbon oro ẹdide eke ererimbot emi. (Rome 12:1, 2) Paul ọkọdọhọ ete: “Mbun̄wụm Spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem; baba ibet kiet ibiọn̄ọke orụk edu emi.” (Galatia 5:22, 23) Spirit Abasi n̄ko ọnọ Christian ntotụn̄ọ ifiọk aban̄a mme n̄kpọ. Paul ọkọdọhọ ete: “Baba owo kiet ifiọkke ekikere Abasi ke mîbọhọke Spirit Abasi.” (1 Corinth 2:11) Ke ofụri ofụri, “ekikere Abasi” esịne mme utọ akpanikọ nte uwa ufak, Obio Ubọn̄ Abasi ke idak Jesus Christ, idotenyịn nsinsi uwem, ye edikpere oro edisio idiọk ererimbot emi mfep ekperede. Ye un̄wam spirit Abasi, mme Christian ẹfiọk ẹnyụn̄ ẹnyịme mme n̄kpọ ẹmi nte akpanikọ, ndien emi anam nte mmọ ẹsede uwem okpụhọde ọkpọn̄ eke mbon ererimbot. Mmọ ẹkop uyụhọ ke ndikop idatesịt ke ndinam n̄kpọ Jehovah idahaemi, ye idotenyịn edinam n̄kpọ esie ke nsinsi ini oro edide.
17. Anie okonịm akakan uwụtn̄kpọ ke ndibiọn̄ọ spirit ererimbot, ndien didie?
17 Jesus ekedi akakan uwụtn̄kpọ ọnọ mmọ oro ẹbiọn̄ọde edu ererimbot emi. Ke ndondo oro Jesus akanade baptism, Satan ama odomo ndiwọn̄ọde enye n̄kpọn̄ edinam n̄kpọ Jehovah ebe ke ndida idomo ita ntiene enye. (Matthew 4:1-11) Akpatre idomo akabuana ifet nte ke Jesus ekeme ndinyene itie edikara ofụri ererimbot ke ndituak ibuot sụk inikiet kpọt nnọ Satan. Jesus ekpekekeme ndikere: ‘Ọfọn, nyetuak ibuot, ndien ekem nda itie edikara ererimbot nnyene, nyetua n̄kpọfiọk nnyụn̄ mfiak n̄katuak ibuot nnọ Jehovah. Nte andikara ererimbot, nyedu ke eti idaha ndinọ ubonowo ufọn n̄kan nte ami ndude idahaemi nte anamusọ eto otode Nazareth.’ Jesus ikekereke ntre. Enye ama onyịme ndibet tutu Jehovah ọnọ enye itie edikara ererimbot. (Psalm 2:8) Ke ini oro, ye ke mme ini efen ke uwem esie, enye ama ọbiọn̄ọ odudu ofụm Satan oro akamade n̄kpa. Ntem, enye ama akan ererimbot emi ẹsabarede ke n̄kan̄ eke spirit mi.—John 16:33.
18. Didie ke nnyịn ndibiọn̄ọ spirit ererimbot ada itoro ọsọk Abasi?
18 Apostle Peter ọkọdọhọ ke nnyịn ikpenyene nditiene nde ikpat Jesus ketket. (1 Peter 2:21) Ewe mfọnn̄kan uwụtn̄kpọ ke nnyịn ikpenyene? Ke ukperedem usen ẹmi, emi spirit ererimbot akarade, mme owo ke ẹsụhọrede ẹdụk mbiara ido uwem ntotụn̄ọ ntotụn̄ọ. Nso utịben̄kpọ ke edi ntem nte ke ufọt utọ ererimbot oro, itie utuakibuot Jehovah oro emenerede ke enyọn̄ ke ada edisana edisana onyụn̄ eden̄i! (Micah 4:1, 2) Ke akpanikọ, ẹkụt odudu spirit Abasi koro ediwak miliọn owo ke ẹbụn̄ọ ẹdọk itie utuakibuot Abasi, ẹbiọn̄ọde spirit ererimbot emi asuanade ke kpukpru ebiet ẹnyụn̄ ẹdade ukpono ye itoro ẹsọk Jehovah! (1 Peter 2:11, 12) Kpukpru nnyịn ikpakam ibiere ndisọn̄ọ ndu ke edikon̄ ebiet oro tutu Edidem Jehovah oro ẹyetde aran emen idiọk ererimbot emi efep onyụn̄ esịn Satan kpa Devil ye mme demon esie ke editụn̄ọ ukpe. (Ediyarade 19:19–20:3) Adan̄aoro, spirit ererimbot emi ididụhe aba. Nso eti ini ke oro edidi ntem!
Nte Emekeme Ndinam An̄wan̄a?
◻ Nso idi spirit ererimbot?
◻ Nso utịp ke spirit ererimbot emi enyene ke idem mme owo?
◻ Nso idi ndusụk uyarade spirit ererimbot, ndien didie ke nnyịn ikeme ndifep enye?
◻ Didie ke nnyịn iwụt ite ke imenyene spirit Abasi?
◻ Mme edidiọn̄ ewe ke mbon oro ẹbiọn̄ọde spirit ererimbot ẹnyene?
[Ndise ke page 16, 17]
Spirit ererimbot oto Satan
Man efep spirit ererimbot, fehe ka itie utuakibuot Jehovah oro emenerede ke enyọn̄