“Mbak Mbufo Ẹdidụk ke Idomo”

“Ẹkpeme, ẹnyụn̄ ẹbọn̄ akam, mbak mbufo ẹdidụk ke idomo.”—MATTHEW 26:41.

MFỊGHE oro ama enen̄ede ọsọn̄ ubọk—ikebietke ekededi oro akanam enye okosobode. Jesus Christ, kpa Eyen Abasi, ama ekpere utịt uwem esie eke isọn̄. Jesus ama ọfiọk ke mîbịghike ẹyemụm imọ, ẹbiere ikpe n̄kpa ẹnọ imọ, ẹnyụn̄ ẹkọn̄ imọ ke eto ndutụhọ. Enye ama ọfiọk ke kpukpru ubiere ye edinam imọ ẹyetụk enyịn̄ Ete imọ. Jesus ama ọfiọk n̄ko ete ke se idibierede idotenyịn ini iso ubonowo edi emi. Ke osobode kpukpru mfịghe emi, nso ke enye akanam?

² Jesus ama asan̄a ye mme mbet esie aka in̄wan̄ Gethsemane. Do ke Jesus ekesima ndidu. Mi, enye ama esịk esisịt adaha ọkpọn̄ mme mbet esie. Ke odude ikpọn̄, enye ama ọbọn̄ akam eben̄e Ete esie eke heaven odudu, etịn̄de ekikere esie ọnọ enye ke akam ofụri esịt—idịghe ini kiet kpọt edi utịm ikata. Okposụkedi ekedide mfọnmma, Jesus ikekereke ke imọ imekeme ndiyọ mfịghe oro ikpọn̄.—Matthew 26:36-44.

³ Nnyịn n̄ko imosobo mfịghe mfịn. Ke ntọn̄ọ ntọn̄ọ ediye uduot ekpri n̄wed emi, nnyịn ima ineme iban̄a mme uyarade oro ẹwụtde ke nnyịn idu uwem ke mme akpatre usen eke idiọk editịm n̄kpọ emi. Mme idomo ye mfịghe eke ererimbot Satan emi ke ẹnen̄ede ẹsọn̄ ubọk. Mme ubiere ye edinam oro owo nnyịn ekededi, emi ọdọhọde ke inam n̄kpọ ata Abasi anamde, otụk enyịn̄ Abasi onyụn̄ enen̄ede otụk idotenyịn nnyịn owo kiet kiet kaban̄a uwem ke obufa ererimbot. Nnyịn imama Jehovah. Nnyịn iyom ‘ndime ime tutu esịm akpatre’—edide utịt uwem nnyịn m̀mê utịt editịm n̄kpọ emi, eke edibebem iso edi. (Matthew 24:13) Edi didie ke nnyịn ikeme ndika iso nnyene nte ini edide usọp usọp ke ekikere nnyụn̄ ndu ke ukpeme?

⁴ Ke ọfiọkde ke mme mbet esie—eke ini oro ye eke eyomfịn—ẹyesobo mfịghe n̄ko, Jesus ama ọnọ nsịnudọn̄ emi: “Ẹkpeme, ẹnyụn̄ ẹbọn̄ akam, mbak mbufo ẹdidụk ke idomo.” (Matthew 26:41) Nso ke ikọ oro ọwọrọ ọnọ nnyịn mfịn? Mme idomo ewe ke afo osobo? Ndien didie ke afo ekeme ‘ndidu ke ukpeme’?

Idomo Ndinam Nso?

⁵ Ke usen ke usen kpukpru nnyịn imesisobo idomo ndiduọ ndụk “afia eke Satan.” (2 Timothy 2:26) Bible asian nnyịn ke Satan enen̄ede an̄wana ye mme andituak ibuot nnọ Jehovah. (1 Peter 5:8; Ediyarade 12:12, 17) Ntak-a? Inen̄ekede idi man owot nnyịn. Satan inyeneke edikan ndomokiet edieke nnyịn ikpade ke edinam akpanikọ nnọ Abasi. Satan ọfiọk ete ke edikem ini, Jehovah ayada ediset ke n̄kpa akan n̄kpa.—Luke 20:37, 38.

⁶ Satan oyom ndibiat n̄kpọ emi edide akpan n̄kpọ akan uwem emi nnyịn idude idahaemi—edinam akpanikọ oro inamde inọ Abasi. Satan ke mbrenyịn oyom ndiwụt ke imọ imekeme ndin̄wọn̄ọde nnyịn n̄kpọn̄ Jehovah. Ntem, edieke enye ekemede ndinam nnyịn itre ndinam akpanikọ—itre ndikwọrọ eti mbụk m̀mê ikpọn̄ mme edumbet Christian—oro akpanam Satan enyene edikan! (Ephesus 6:11-13) Ntre “andidomo” ke odomo nnyịn.—Matthew 4:3.

⁷ “N̄kari Satan” awawak orụk. (Ephesus 6:11) Enye ekeme ndida uma-inyene, ndịk, eyịghe, m̀mê uyom inemesịt ndomo nnyịn. Mmemidem edi kiet ke otu usụn̄ unam n̄kpọ esie emi okụtde unen akan. Nte akari n̄kari emi adade ifet ekededi emi ebererede anam n̄kpọ, enye ọfiọk ke ọkpọsọn̄ mfụhọ ekeme ndinam idem emem nnyịn, anamde isọsọp iduọ idụk idomo. (Mme N̄ke 24:10) Ntre, akpan akpan ke ini ‘esịt obụn̄ọde’ nnyịn, enye esidomo nnyịn man ikpa mba.—Psalm 38:8.

⁸ Nte mme akpatre usen emi ẹnen̄erede ẹsan̄a ekpere utịt, etie nte mme n̄kpọ oro ẹnamde owo okop mmemidem ke ẹtọt, ndien mmọ ẹtụk nnyịn n̄ko. (Se ekebe oro “Ndusụk N̄kpọ Ẹsinamde Ẹkop Mmemidem.”) Se ededi emi edide ntak esie, mmemidem ekeme ndinam odudu nnyịn osụhọde. ‘Ndidep ifet’ mbiom mme mbiomo eke spirit—esịnede edikpep Bible, edidụk mme mbono esop Christian, ye edibuana ke an̄wautom—ekeme ndidi ata ọkpọsọn̄ n̄kpọ edieke afo akpade mba ke n̄kan̄ eke obụk, eke ekikere, ye eke ntụk. (Ephesus 5:15, 16) Ti ke Andidomo oyom fi etre ndinam n̄kpọ Abasi. Edi idịghe ini edi emi nditek ubọk m̀mê ndifre enyịn mban̄a nte ini nnyịn emi edide usọp usọp! (Luke 21:34-36) Didie ke afo ekeme ndikan idomo nnyụn̄ ndu ke ukpeme? Kere ban̄a ekikere inan̄ emi ẹkemede ndin̄wam mi.

“Ẹbọn̄ Akam”

⁹ Beri edem ke Jehovah ebe ke akam. Ti uwụtn̄kpọ Jesus ke in̄wan̄ Gethsemane. Ke ini okodude ke ọkpọsọn̄ mfịghe eke ntụk, nso ke enye akanam? Enye ama eben̄e Jehovah un̄wam, ọdiọn̄de-diọn̄ ọsọn̄ọ ọbọn̄ akam tutu “ibibiak Esie etie nte mme ntọi iyịp eke ẹtọide ke isọn̄.” (Luke 22:44) Kere ban̄a oro. Jesus ama etịm ọfiọk Satan. Jesus ama etie ke heaven okụt kpukpru idomo oro Satan esidade ọkọk afia ọnọ mme asan̄autom Abasi. Edi, Jesus ikekereke ke imọ imekeme ndikan se ededi emi Andidomo enịmde imọ ke iso. Edieke mfọnmma Eyen Abasi ọkọfiọkde ke oyom imọ ibọn̄ akam iyom un̄wam ye odudu ito Abasi, n̄wan̄wadiso nnyịn!—1 Peter 2:21.

¹⁰ N̄ko, ti ete ke enye ama ekesịn udọn̄ ọnọ mme mbet esie ‘ndibọn̄ akam,’ Jesus ama ọdọhọ ete: “Ukpọn̄ ọsọp ke akpanikọ, edi obụkidem edi mmem-mmem.” (Matthew 26:41) Obụkidem mmanie ke Jesus eketịn̄ aban̄a? Ke akpanikọ ikedịghe eke esie; enye ikenyeneke mmeme ndomokiet ke mfọnmma obụkidem esie eke owo. (1 Peter 2:22) Edi ikedịghe ntem ye mme mbet esie. Ke ntak ndammana unana mfọnmma ye mme ntụhọ unam idiọkn̄kpọ, mmọ ẹyeyom un̄wam akpan akpan man ẹkan idomo. (Rome 7:21-24) Oro akanam enye esịn udọn̄ ọnọ mmọ—ye kpukpru ata mme Christian oro ẹditienede mmọ ke edem—ndibọn̄ akam mben̄e un̄wam man ẹkan idomo. (Matthew 6:13) Jehovah esibọrọ utọ akam oro. (Psalm 65:2) Didie? Ke nsụhọde n̄kaha ke usụn̄ iba.

¹¹ Akpa, Abasi esin̄wam nnyịn ndifiọk idomo. Mme idomo Satan ẹtie nte afia emi ẹkọkde ẹyọhọ n̄kịm n̄kịm afan̄usụn̄. Edieke afo mîkwe mmọ, afo emekeme ndiduọ ndụk mmọ. Jehovah ada Bible ye mme n̄wed ẹkọn̄ọde ke Bible ayarade mme afia Satan, ke ntre an̄wamde nnyịn nditre ndiduọ ndụk idomo. Ke ediwak isua emi ẹbede, mme n̄wed oro ẹmịn̄de-mịn̄ ye ndutịm ikpọ ye n̄kpri mbono ẹka iso ndinam nnyịn idu ke edidemede iban̄a mme utọ n̄kpọndịk nte uten̄e owo, oburobụt ido idan̄, uma-inyene, ye mme idomo Satan eken. (Mme N̄ke 29:25; 1 Corinth 10:8-11; 1 Timothy 6:9, 10) Nte afo uwụtke esịtekọm ke Jehovah ndinam nnyịn ifiọk mme n̄kari ye n̄kukan Satan? (2 Corinth 2:11) Kpukpru mme utọ ntọt emi ẹdi ibọrọ akam emi afo esibọn̄de oyom un̄wam man akan idomo.

¹² Ọyọhọ iba, Jehovah esibọrọ mme akam nnyịn ebe ke ndinam nnyịn ikeme ndiyọ idomo. Ikọ esie ọdọhọ ete: “Abasi . . . idinyụn̄ iyakke ẹdomo mbufo ẹbe se ukeme mbufo edide; edi Enye ayasiak usụn̄ ubọhọ.” (1 Corinth 10:13) Tutu amama Abasi idiyakke idomo enen̄ede ọsọn̄ tutu nnyịn inana ukeme eke spirit ndiyọ enye—edieke nnyịn ikade iso ibuọt idem ye Abasi. Didie ke enye ‘asiak usụn̄ ubọhọ’ ọnọ nnyịn? Enye ‘esiyak Edisana spirit ọnọ mmọ eke ẹben̄ede Enye.’ (Luke 11:13) Spirit oro ekeme ndinam nnyịn iti mme edumbet Bible emi ẹkemede ndisọn̄ọ nnyịn idem ndinam se inende nnyụn̄ n̄n̄wam nnyịn ndinam nti ubiere. (John 14:26; James 1:5, 6) Enye ekeme ndin̄wam nnyịn ndinyene mme edu emi oyomde inyene man ikan ndiọi udọn̄. (Galatia 5:22, 23) Spirit Abasi ekeme ndikam nnam ekemmọ mme andinịm ke akpanikọ ‘ẹkabade ẹdi mme andin̄wam emi ẹsọn̄ọde nnyịn idem.’ (Colossae 4:11, NW) Nte afo uwụtke esịtekọm ke Jehovah ndinam n̄kpọ ke utọ ima ima usụn̄ oro mban̄a akam emi afo ọbọn̄de oyom un̄wam?

Ẹwụt Eti Ibuot ke Mme N̄kpọ Oro Ẹyomde

¹³ Man idu ke ukpeme, ana nnyịn iwụt eti ibuot ke mme n̄kpọ oro iyomde. Mme mfịghe uwem ẹsinam kpukpru nnyịn ikpa mba ndusụk ini. Edi ana nnyịn iti ite ke akananam Abasi idọhọke ke nnyịn idinyeneke mfịna ke uwem ke akani editịm n̄kpọ emi. Idem ke mme ini Bible, mme asan̄autom Abasi ẹma ẹsisobo afanikọn̄, esịnede ukọbọ, unana, iduọesịt, ye udọn̄ọ.—Utom 8:1; 2 Corinth 8:1, 2; 1 Thessalonica 5:14; 1 Timothy 5:23.

¹⁴ Nnyịn n̄ko imosobo mme mfịna mfịn. Nnyịn imekeme ndisobo ukọbọ, inana okụk, in̄wana ndikan iduọesịt, idọn̄ọ, inyụn̄ ikụt ndutụhọ ke mme usụn̄ efen. Edieke Jehovah ekpekpemede nnyịn ke utịbe utịbe usụn̄ osio ke kpukpru afanikọn̄, nte oro ikpọnọhọ Satan ntak ndisụn̄i enye? (Mme N̄ke 27:11) Jehovah esikam ayak ẹdomo mme asan̄autom esie, idem ke ndusụk idaha, ayakde mme asua ẹwot mmọ ke ini emi mmọ mîkpakpaha.—John 16:2.

¹⁵ Nso ndien ke Jehovah ọn̄wọn̄ọ? Nte nnyịn ima ikokokụt, enye ọn̄wọn̄ọ ke imọ iyanam nnyịn ikeme ndikan idomo ekededi oro nnyịn isobode, edieke nnyịn ikam ibuọtde idem ye imọ ọyọhọ ọyọhọ. (Mme N̄ke 3:5, 6) Enye ada Ikọ esie, spirit esie, ye esop esie ekpeme nnyịn ke n̄kan̄ eke spirit, an̄wamde nnyịn ndikpeme itie ebuana nnyịn ye enye. Ke n̄kpọ mîbiatke itie ebuana oro, idem ọkpọkọm ikpakpa, nnyịn imakan. Baba n̄kpọ kiet—idem ọkpọkọm n̄kpa—ikemeke ndikpan Abasi ndinọ mme anam-akpanikọ asan̄autom esie utịp. (Mme Hebrew 11:6) Ndien ke obufa ererimbot emi ekperede mi, Jehovah iditreke ndisu mme utịbe utịbe un̄wọn̄ọ esie ndidiọn̄ mbon oro ẹmade enye.—Psalm 145:16.

Ẹti Mme Eneni Oro

¹⁶ Man ime ime isịm akpatre, ana nnyịn iti mme akpan ntak emi anamde Abasi ayak idiọk ido aka iso. Ndusụk ini, edieke etiede nte ke mme mfịna nnyịn ẹkponi ẹkaha ndien ke nnyịn imọn̄ ikpa mba, ana nnyịn iti ke Satan ama edemede eneni aban̄a unen itie edikara Jehovah. Andibian̄a emi ama eneni n̄ko aban̄a ima ye nsọn̄ọnda mme andituak ibuot nnọ Abasi. (Job 1:8-11; 2:3, 4) Mme eneni oro ye usụn̄ emi Jehovah emekde ndibiere mmọ ẹdi akpan n̄kpọ ẹkan uwem owo ekededi ke otu nnyịn. Didie?

¹⁷ Abasi ndiyak n̄kpọsọn̄ idaha ẹka iso ke ibio ini ọmọnọ mbon efen ifet ndibọ akpanikọ. Kere ban̄a emi: Jesus okokụt ndutụhọ man nnyịn ikpenyene uwem. (John 3:16) Nte nnyịn ikopke inemesịt iban̄a oro? Edi nte nnyịn imeben̄e idem ndiyọ n̄kpọsọn̄ idaha ebịghi esisịt man mbon efen ẹkpekeme ndinyene uwem? Man ime ime isịm akpatre, ana nnyịn ifiọk ke ọniọn̄ Jehovah okpon akan eke nnyịn. (Isaiah 55:9) Enye eyetre ndiọi n̄kpọ ke ini emi etịmde ọfọn ndibiere eneni oro ye kaban̄a nsinsi ufọn nnyịn. Ke akpanikọ, ewe usụn̄ efen ọkpọfọn akan ndinam emi? Ukwan̄ikpe ndomokiet idụhe ye Abasi!—Rome 9:14-24.

“Ẹsan̄a Ẹkpere Abasi”

¹⁸ Man ika iso inyene nte ini edide usọp usọp ke ekikere, ana nnyịn isan̄a ikpere Jehovah. Kûdedei ufre ke Satan ke anam kpukpru se enye ekekeme ndibiat eti itie ebuana oro inyenede ye Jehovah. Satan oyom nnyịn inịm ke akpanikọ nte ke tutu amama utịt ididịghe ye nte ke ufọn idụhe ndikwọrọ gospel m̀mê ndidu uwem ekekem ye mme edumbet Bible. Edi enye “edi osu-nsu, ye ete nsu.” (John 8:44) Ana nnyịn ibiere ‘ndin̄wana ye Satan.’ Nnyịn ikpedehedei ida itie ebuana oro inyenede ye Jehovah didie didie. Bible ọnọ nnyịn ima ima nsịnudọn̄ ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:7, 8) Edi didie ke afo ekeme nditịm nsan̄a n̄kpere Jehovah?

¹⁹ Editie n̄kere nnyụn̄ mbọn̄ akam edi akpan n̄kpọ. Ke ini etiede nte mfịghe uwem enen̄ede ọsọn̄ ubọk, n̄wan̄a esịt fo nọ Jehovah. Adan̄a nte etịn̄de se inen̄erede ifịna fi, ntre ke edimem afo ndikụt nte enye ọnọde fi se afo eben̄ede. Ibọrọ oro enye ọnọde fi ekeme nditre ndidi nnennen nte afo ekekerede, edi edieke uduak fo edide nditoro enye nnyụn̄ mmụm nsọn̄ọnda n̄kama, enye ọyọnọ fi un̄wam emi afo oyomde man ekeme ndiyọ. (1 John 5:14) Nte afo okụtde ndausụn̄ esie ke uwem fo, afo eyetịm asan̄a ekpere enye. Ndikot nnyụn̄ ntie n̄kere mme edu ye usụn̄ Jehovah, nte ẹwụtde ke Bible, edi akpan n̄kpọ n̄ko. Utọ editie n̄kere oro ayan̄wam fi nditịm mfiọk enye; enye eyedemede esịt fo onyụn̄ anam fi enen̄ede ama enye. (Psalm 19:14) Ndien ke akande kpukpru n̄kpọ, ima oro ayan̄wam fi ndikan idomo nnyụn̄ ndu ke ukpeme.—1 John 5:3.

²⁰ Man isan̄a ikpere Jehovah, edi akpan n̄kpọ n̄ko nnyịn ndidu n̄kpere ekemmọ mme andinịm ke akpanikọ. Ẹyeneme emi ke akpatre ikpehe ediye uduot ekpri n̄wed emi.

MME MBỤME UKPEPN̄KPỌ

• Ke ini okodude ke ata ọkpọsọn̄ mfịghe ke ekperede utịt uwem esie, nso ke Jesus akanam, ndien nso ke enye ekesịn udọn̄ ọnọ mme mbet esie ndinam? (Ikp. eki. 1-4)

• Ntak emi Satan an̄wanade ye mme andituak ibuot nnọ Jehovah, ndien ke mme usụn̄ ewe ke enye odomo nnyịn? (Ikp. eki. 5-8)

• Man ikan idomo, ntak anade ibọn̄ akam (Ikp. eki. 9-12), iwụt eti ibuot ke se iyomde (Ikp. eki. 13-15), iti mme eneni oro (Ikp. eki. 16-17), inyụn̄ ‘isan̄a ikpere Abasi’ (Ikp. eki. 18-20)?

[Ekebe ke page 25]

Ndusụk N̄kpọ Emi Ẹsinamde Ẹkop Mmemidem

Idaha nsọn̄idem m̀mê usọn̄. Edieke nnyịn idọn̄ọde uyịre uyịre udọn̄ọ mîdịghe edieke usọn̄ mîyakke inam se anade inam, nnyịn imekeme ndikop mmemidem sia nnyịn mîkemeke ndinam ekese ke utom Abasi.—Mme Hebrew 6:10.

Edikpu. Idem ekeme ndimem nnyịn edieke mme owo mînamke n̄kpọ iban̄a Ikọ Abasi oro nnyịn ikwọrọde.—Mme N̄ke 13:12.

Ekikere unana edinyene ufọn. Ke ntak mfiomo eke ediwak isua, owo ekeme ndinịm ke akpanikọ ke mbon efen, idem ye Jehovah, imaha imọ.—1 John 3:19, 20.

Iyatesịt. Edieke ekemmọ andinịm ke akpanikọ anamde se inen̄erede iyat owo esịt, ibuot ekeme ndiyon̄ owo oro tutu enye oyom nditre ndidụk mme mbonoesop Christian m̀mê ndibuana ke an̄wautom.—Luke 17:1.

Ukọbọ. Mbon eken emi mîbuanake mbuọtidem fo ẹkeme ndibiọn̄ọ, ẹkọbọ, mîdịghe ẹsak fi nsahi.—2 Timothy 3:12; 2 Peter 3:3, 4.

[Ndise ke page 26]

Jesus ama esịn udọn̄ ọnọ nnyịn ‘ndibọn̄ akam’ nyom un̄wam man ikeme ndikan idomo