Mme Uyen—Ẹbiọn̄ọ Spirit Ererimbot
“Edi nnyịn ikọbọhọ spirit ererimbot emi, edi ikọbọ spirit emi otode Abasi.”—1 CORINTH 2:12.
1, 2. (a) Nso ukpụhọde ke ẹkeme ndikụt ke ufọt mme uyen ke ererimbot ye mme uyen ke esop Mme Ntiense Jehovah? (b) Nso ufiop ufiop itoro ke ẹkeme ndinọ ata ediwak uyen Ntiense?
“OBUFA emana nnyịn okop iduọesịt, anana ntịn̄enyịn onyụn̄ ọsọn̄ ibuot.” Ntre ke The Sun-Herald, n̄wedmbụk n̄kpọntịbe Australia, eketịn̄. Enye ama adian ete: “N̄wetnnịm n̄kpọ esopikpe owụt n̄kọri edide mbahade 22 eke ikie [awakde akan eke isua oro ekebede] ke ibat uyen ẹmi ẹkotde ikpe ke ntak ọkpọsọn̄ ibụmede en̄wan . . . Nditọwọn̄ ke ẹwot idemmọ ke udomo oro ọdọkde utịm ikata ọtọn̄ọde ke ufọt ufọt iduọk isua 1960 . . . Ndien ubahade ke ntak isua emana amakabade ata editụn̄ọ ukpe emi n̄kparawa owo oro ibat akade-ka iso ndikọri ẹsịnde idem ke uda n̄kpọsọn̄ ibọk, n̄kpọsọn̄ mmịn ye uwotidem emi anamde ẹfre mmọ.” Nte ededi, idaha emi idịghe ke idụt kiet kpọt. Ke ofụri ererimbot, mme ete ye eka, mme andikpep, ye nta usọbọ udọn̄ọ ibuot ẹseme ẹban̄a idaha n̄kpri owo.
2 Nso n̄wọrọnda ukpụhọde odu ntem ke ufọt ata ediwak ke otu mme uyen mfịn ye nti n̄kpri owo oro ẹkụtde ke esop Mme Ntiense Jehovah! Idịghe nte ke mmọ ẹdi mfọnmma. Mmọ n̄ko ẹnyene ndin̄wana ye “mme idiọk itọn̄ ini uyen.” (2 Timothy 2:22) Edi nte otu, n̄kpri owo ẹmi ẹsọn̄ọ ẹda uko uko kaban̄a se inende ẹnyụn̄ ẹsịn ndiyak idem nnọ mme mfịghe ererimbot. Nnyịn imenen̄ede itoro kpukpru mbufo n̄kpri owo ẹmi ẹkande ke en̄wan ndibiọn̄ọ “n̄kari” Satan! (Ephesus 6:11) Ukem nte apostle John, onụk nnyịn ndidọhọ: “Mma n̄wewet nnọ mbufo, n̄kparawa [iren ye iban], koro mbufo ẹkopde idem, ikọ Abasi onyụn̄ odụn̄de mbufo ke esịt, mbufo ẹma ẹnyụn̄ ẹkan andidiọk.”—1 John 2:14.
3. Nso ke ikọ oro “spirit” ekeme ndiwọrọ?
3 Kpa ye oro, man mbufo ẹka iso ndikan ke en̄wan mbufo ndibiọn̄ọ andidiọk, ana mbufo ẹsịn ifịk ẹbiọn̄ọ se Bible okotde “spirit ererimbot emi.” (1 Corinth 2:12) Nte ekemde ye n̄wed usem Greek kiet, “spirit” ekeme ndiwọrọ “idaha ekikere m̀mê odudu emi ọyọhọde onyụn̄ akarade ukpọn̄ owo ekededi.” Ke uwụtn̄kpọ, edieke afo okụtde owo enen̄erede okop idiọkesịt, afo emekeme ndidọhọ ke enye enyene idiọk edu, m̀mê “spirit.” “Spirit,” idaha ekikere, m̀mê edu ukere n̄kpọ fo akara mme n̄kpọ oro afo emekde; enye akara mme edinam ye utịn̄ikọ fo. Nte enemde, mme owo ye mme otu ẹkeme ndinyene edu, m̀mê “spirit.” Apostle Paul ekewet ọnọ otu Christian ete: “Mfọn Ọbọn̄ nnyịn Jesus Christ akpakam odu ye spirit mbufo.” (Philemon 25) Do, nso utọ spirit ke ererimbot emi owụt? Sia edide “ofụri ererimbot onyụn̄ esịne ke ubọk andidiọk,” Satan kpa Devil, nte spirit ererimbot emi ekeme ndidi eti?—1 John 5:19.
Ndidiọn̄ọ Spirit Ererimbot
4, 5. (a) Nso spirit ikakara mbon esop Ephesus mbemiso mmọ ẹkekabarede ẹdi mme Christian? (b) Anie edi “ọbọn̄ emi akarade ofụm,” ndien nso idi “ofụm” emi?
4 Paul ekewet ete: “Mbufo nde ẹkenyụn̄ ẹkpan̄a ke ndudue ye mme idiọk-n̄kpọ mbufo, emi mbufo ẹsan̄ade ke esịt ke ini oko, nte ido eyo eke ererimbot edide, ẹkenyụn̄ ẹsụk ibuot ẹnọ ọbọn̄ emi akarade [ofụm, NW], kpa spirit emi anamde utom kemi ke esịt nditọ ntụt-utọn̄. Kpukpru nnyịn n̄ko ikonyụn̄ isan̄a ye mmọ ke ini oko, idu uwem ke idiọk itọn̄ obụkidem nnyịn, inam se idọn̄de obụkidem ye ekikere nnyịn, ikonyụn̄ idi nditọ iyatesịt ke uduot nnyịn, kpa nte mmọ eken.”—Ephesus 2:1-3.
5 Mbemiso ẹkekpepde usụn̄ Christian, mme Christian ke Ephesus ke unana edifiọk ẹkedi mme anditiene “ọbọn̄ emi akarade ofụm,” Satan kpa Devil. “Ofụm” oro idịghe ata ata ebiet emi Satan ye mme demon esie ẹdụn̄de. Ke ini Paul ekewetde mme ikọ ẹmi, Satan kpa Devil ye mme demon esie ke ẹkesụk ẹkeme ndibe ndụk heaven. (Men Job 6:1; Ediyarade 12:7-12 domo.) Ikọ oro “ofụm” ọwọrọ spirit, m̀mê edu ekikere, oro akarade ererimbot Satan. (Men Ediyarade 16:17-21 domo.) Ukem nte ofụm emi akande nnyịn okụk, spirit emi odu ke kpukpru ebiet.
6. Nso idi ‘ofụm emi akarade,’ ndien didie ke enye akara ediwak n̄kpri owo?
6 Edi nso idi ‘ofụm emi akarade’? Nte an̄wan̄ade, emi etịn̄ aban̄a akamba odudu oro “ofụm” emi enyenede ke idem mme owo. Paul ọkọdọhọ ete ke spirit emi ‘anam utom ke esịt nditọ ntụt-utọn̄.’ Ntre spirit ererimbot esịn udọn̄ ọnọ spirit ntụtutọn̄ ye nsọn̄ibuot, ndien mfịghe ubọkn̄ka edi usụn̄ kiet emi ẹdade odudu emi ẹnam n̄kpọ. “Ke ini afo odude ke ufọkn̄wed,” ntem ke ekpri eyenan̄wan kiet edide Ntiense etịn̄, “kpukpru owo ẹsisịn udọn̄ kpukpru ini ẹnọ fi ndisọn̄ ibuot esisịt. Mme uyen ẹnen̄ede ẹkpono fi ke ini afo anamde n̄kpọ oro etiede nte nsọn̄ibuot.”
Mme Usụn̄ Emi Spirit Ererimbot Owụtde Idem
7-9. (a) Siak ndusụk usụn̄ emi spirit ererimbot owụtde idem ke otu n̄kparawa owo mfịn. (b) Nte afo omokụt ndomokiet ke otu mme n̄kpọ ẹmi ke n̄kann̄kụk fo?
7 Nso idi ndusụk usụn̄ emi spirit ererimbot owụtde idem ke otu n̄kparawa owo mfịn? Unana edinam akpanikọ ye nsọn̄ibuot. Magazine kiet okobụk ete ke se iwakde ibe mbahade 70 eke ikie ke otu nditọ akpa ye udiana ikpehe akamba ufọkn̄wed ẹkedọhọ ẹte ke mmimọ ima iyịp udomo ke ini ikodude ke ufọkn̄wed sekọndri. Anana-ukpono, uyat uyat, ndek ndek ikọ ẹyọyọhọ n̄ko. Edi akpanikọ, Job ye apostle Paul ke idaha kiet ẹma ẹda se ndusụk owo ẹkemede ndida nte uyat uyat ikọ ẹtịn̄ ikọ ndiwụt edinen iyatesịt. (Job 12:2; 2 Corinth 12:13) Nte ededi, uyat uyat ikọ oro ẹsikopde ke inua n̄kparawa owo mfịn esiwak ndidi editọk itọk.
8 Ebeubọk unọ idem nduọkodudu edi n̄ko usụn̄ emi spirit ererimbot owụtde idem. Usọrọ okoneyo, uyom uyom usọrọ,a ye mme orụk idat idat usọrọ eken ẹdi ọsọ n̄kpọ ke otu n̄kparawa owo. Ebeubọk usịnen̄kpọ ye ukamaidem ẹdi ọsọ n̄kpọ kpasụk ntre. Ọtọn̄ọde ke ekpat ekpat n̄kon̄ine ọfọn̄ tutu esịm akpa-owo-idem n̄kon̄ine, utọ nte editịbi ndudu ke idem, ediwak uyen mfịn ẹnyịme spirit nsọn̄ibuot ererimbot. (Men Rome 6:16 domo.) Edikere n̄kaha mban̄a inyene obụkidem edi usụn̄ efen emi enye owụtde idem. Nte ẹtịn̄de ke n̄wedmbụk ukpepn̄kpọ kiet, “mme anyamurua ke ẹda akpakịp n̄kpọurua ye mme usụn̄ ukpepn̄wed ye udịm udịm n̄kpọ ẹsion̄ode ẹdi ẹfịna mme uyen kpukpru ini.” Etisịm ini emi mme uyen ke United States ẹkụrede ufọkn̄wed sekọndri, eyedi ẹma ẹkụt etop n̄kpọurua 360,000 ke TV. Mme uke fo ẹkeme n̄ko ndinyịk fi ẹte edep. Eyenan̄wan kiet edide isua 14 ọdọhọ ete: “Kpukpru owo ẹsibụp kpukpru ini ẹte, ‘Mmanie ẹnam ọfọn̄-tuep, jaket, m̀mê jeans fo?’”
9 Toto ke mme ini Bible, ndek ndek ikwọ edi n̄kpọ utom emi Satan adade esịn udọn̄ ọnọ ndek ndek ido. (Men Exodus 32:17-19; Psalm 69:12; Isaiah 23:16 domo.) Do, idịghe n̄kpọ n̄kpaidem nte ikwọ emi mme ikọ ikwọ ẹdemerede udọn̄ idan̄—ke mîkam itịn̄ke iban̄a idan̄ in̄wan̄în̄wan̄—oro ẹsabarede, ẹtiede idat idat, uyom uyom, ọwọrọde etop. Ndien usụn̄ efen emi ndedehe spirit ererimbot emi owụtde idem edi oburobụt ido idan̄. (1 Corinth 6:9-11) The New York Times ọtọt ete: “Idan̄ emekpere ndikabade ndi se ẹyomde ẹto ediwak uyen man ẹdi se uke mmọ ẹnyịmede . . . Se iwakde ibe mbahade iba ke itie ita ke otu ikpọ nditọ ufọkn̄wed sekọndri ẹma ẹnyene ebuana idan̄.” Ibuotikọ kiet ke The Wall Street Journal ama ọnọ uyarade nte ke nditọwọn̄ ẹdude ke ufọt isua 8 ye 12 ke “ẹkabade ẹfiop ke idan̄ etieti.” Ọnọitem ufọkn̄wed oro ọkpọn̄de utom ke ndondo emi ọdọhọ ete: “Nnyịn imọtọn̄ọ ndikụt ndusụk nditọ ẹmi ẹdude ke ọyọhọ isua itiokiet ke ufọkn̄wed praimari ẹyomode idịbi.”b
Ndisịn Spirit Ererimbot
10. Didie ke ndusụk uyen ke mme ubon Christian ẹyak idem ẹnọ spirit ererimbot?
10 Ke mfụhọ, ndusụk uyen Christian ẹyak idem ẹnọ spirit ererimbot. “Mma nsinyene eti edu uwem ke iso ete ye eka mi ye mme ekemmọ Christian,” ntem ke eyenan̄wan kiet ke Japan etịn̄. “Edi mma ndu orụk uwem efen n̄ko.” Uyen kiet otode Kenya ọdọhọ ete: “Ke ndusụk ini mma ndu uwem esịt iba, emi ekesịnede edika mme usọrọ, edibre ikwọ rọk, ye edinyene ndiọi ufan. Mma mfiọk ke emi ikenenke, edi mma ndomo ndifụmi enye, ndoride enyịn nte ke oro eyetre nte ini akade. Edi iketreke. N̄kpọ ẹkekam ẹtetịm ẹdiọk.” Uyen efen, otode Germany, ọdọhọ ete: “Enye ọkọtọn̄ọ ye edinyene ndiọi ufan. Ekem ntọn̄ọ ndin̄wọn̄ sika. N̄koyom ndinam abiak ete ye eka mi, edi ami n̄kukụre n̄kọnọ idem mi unan.”
11. Didie ke Caleb ekekeme nditre nditiene mmọ eken ke ini mbon uyep duop ẹkedade idiọk etop ẹdi?
11 Kpa ye oro, ẹkeme ndibiọn̄ọ, ih ndisịn, spirit ererimbot. Kere ban̄a uwụtn̄kpọ Caleb eset. Ke ini mbon uyep duop oro ẹkenyenede esịt ndịk ẹkedade idiọk etop aban̄ade Isọn̄ Un̄wọn̄ọ ẹdi, enye ye Joshua ẹma ẹtre ndiyak ẹsịn mmọ ndịk ke idem nnyụn̄ ntiene mmọ eken. Mmọ ẹma ẹtịn̄ uko uko ẹte: “Isọn̄ oro nnyịn ikasan̄ade ke esịt ibe ika enye ndiyep, edi ata eti isọn̄. Edieke nnyịn inemde Jehovah esịt, enye ayada nnyịn odụk ke isọn̄ oro, onyụn̄ ada enye ọnọ nnyịn; isọn̄ emi ọfiọrọde mmọn̄-eba ye aran-ọkwọk.” (Numbers 14:7, 8) Nso ikan̄wam Caleb ndibiọn̄ọ ofụri mfịghe oro? Jehovah eketịn̄ aban̄a Caleb ete: “Spirit efen [okodu] enye ke esịt.”—Numbers 14:24.
Ndiwụt “Spirit Efen”
12. Ntak edide akpan n̄kpọ owo ndiwụt “spirit efen” ke utịn̄ikọ esie?
12 Mfịn, oyom uko ye ukeme man ẹwụt “spirit efen,” m̀mê ekikere—kiet oro edide isio ye eke ererimbot. Usụn̄ kiet emi afo ekemede ndinam ntre edi ndifep uyat uyat, anana-ukpono ikọ. Nte enemde, ẹda Ikọmbakara oro ẹkabarede “uyat uyat ikọ” ẹto ikọedinam Greek oro ke ata ata usụn̄ ọwọrọde “ndidom obụkidem n̄wak nte mme ebua.” (Men Galatia 5:15 domo.) Kpa nte edet ebua ẹkemede ndidom obụkidem ndian̄ade ke ọkpọ, “mbubru” oro etiede uyat uyat ekeme ndibọ mbon en̄wen uku mmọ. Edi Colossae 3:8 ọnọ fi item ete ‘ọduọn̄ọ kpukpru ido ẹmi; osio iyatesịt, ye ifụtesịt, ye udu, ye idiọk iban̄a, ye mbubiam ikọ ke inua fo efep.’ Ndien Mme N̄ke 10:19 ọdọhọ ete: “Awak ikọ inua itreke ndidue: edi owo eke omụmde n̄kpọk-inua esie akama edi ọniọn̄.” Edieke owo osụn̄ide fi, fara ke idem ‘ndikabade mfụk eken nnọ enye,’ eyedi ebe ke nditịn̄ ikọ sụn̄sụn̄ ye ifụre ifụre ke ndịbe ye osụn̄i-isụn̄i oro.—Matthew 5:39; Mme N̄ke 15:1.
13. Didie ke mme uyen ẹkeme ndiwụt ekikere adade ukem ukem mban̄a mme n̄kpọ obụkidem?
13 Usụn̄ en̄wen ndiwụt “spirit efen” edi ndinyene ekikere adade ukem ukem mban̄a n̄kpọ obụkidem. Edi akpanikọ, akam edi ndammana n̄kpọ ndiyom ndinyene nti n̄kpọ. Jesus Christ ke idemesie nte an̄wan̄ade ama enyene ke nsụhọde n̄kaha eti ọfọn̄idem kiet. (John 19:23, 24) Nte ededi, ke ini ekerede akaha aban̄a edinyene mme n̄kpọ onyụn̄ eben̄ede ete ye eka fo kpukpru ini ndidep mme n̄kpọ oro mmọ mîkemeke ndidep, m̀mê ke ini afo oyomde n̄kukụre ndikpebe mme uyen eken, do ekeme ndidi spirit ererimbot ke akara fi akan nte afo ekerede. Bible ọdọhọ ete: “Ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot.” Ih, kûyak idem unọ odudu uma inyene obụkidem ererimbot emi! Kpep ndiyụhọ ke se afo enyenede.—1 John 2:16; 1 Timothy 6:8-10.
14. (a) Didie ke ikọt Abasi ke eyo Isaiah ẹketre ndiwụt ekikere adade ukem ukem kaban̄a unọ idem nduọkodudu? (b) Mme n̄kpọndịk ewe ke ndusụk uyen Christian ẹkesobo ke mme ufọk usọrọ okoneyo ye mme idat idat usọrọ?
14 Ndinịm unọ idem nduọkodudu ke itie esie edi akpan n̄kpọ n̄ko. Prọfet Isaiah ọkọdọhọ ete: “Ifọnke fọn inọ mmọ eke ẹbakde ẹdaha ke usenubọk ẹbịne mmịn: ẹbịghi ke okoneyo, wine obụbede mmọ ibuot! Harp, ye viol, ye ekọmọ, ye ifiom, ye wine, ẹnyụn̄ ẹdu ke ikpọ udia mmọ: edi mmọ itịn̄ke enyịn ke utom Jehovah, inyụn̄ isehe se ubọk esie ẹnamde.” (Isaiah 5:11, 12) Edi n̄kpọ mfụhọ nditịn̄, ndusụk uyen Christian ẹsitiene ẹbuana ke mme utọ idat idat usọrọ oro. Ke ini ẹkedọhọde otu uyen Christian ẹte ẹtịn̄ se isidade itie ke usọrọ okoneyo eke mme uyen, ekpri eyenete an̄wan kiet ọkọdọhọ ete: “Ẹsin̄wana en̄wan kpukpru ini. Mma nsịne ke otu mmọ.” Ekpri eyenete eren kiet ama adian ete: “Mbun̄wọn̄i, edin̄wọn̄ sika, ye mme n̄kpọ ntre.” Ekpri eyenete eren efen ama enyịme ete: “Mme owo ẹsikpa mmịn. Ẹsinam n̄kpọ nte nditen̄! Ndien n̄kpọsọn̄ ibọk ẹsidu. Ediwak ndiọi n̄kpọ ẹsitịbe. Edieke afo akade do onyụn̄ ekerede ete ke idifịnake fi, afo ababian̄a.” Do, eti ntak odu emi anamde Bible esịn mme uyom uyom usọrọ, m̀mê “idat idat usọrọ,” nte kiet ke otu mme “ubọkutom obụk-idem.”—Galatia 5:19-21; Byington; Rome 13:13.
15. Nso ekikere oro adade ukem ukem kaban̄a unọ idem nduọkodudu ke Bible ọnọ?
15 Ndifep unọ idem nduọkodudu oro ekemede ndinọ unan idinamke fi odu uwem unana inemesịt. Nnyịn ituak ibuot inọ “Abasi inemesịt,” emi oyomde fi adara uyen fo! (1 Timothy 1:11, NW; Ecclesiastes 11:9) Edi Bible odụri owo utọn̄ ete: “Owo eke amade mbre [“unọ idem inemesịt,” Lamsa] eyedi owo unana.” (Mme N̄ke 21:17) Ih, edieke afo adade unọ idem nduọkodudu nte ata akpan n̄kpọ ke uwem fo, afo oyodu ke unana ke n̄kan̄ eke spirit. Ntre tiene mme edumbet Bible ke unọ idem nduọkodudu oro afo emekde. Ediwak usụn̄ ẹdu ndikop inemesịt oro edinamde fi ọkọri utu ke ndinọ fi unan.c—Ecclesiastes 11:10.
16. Didie ke mme uyen Christian ẹkeme ndiwụt ke mmimọ idi isio?
16 Ndiwụt iso o-bụt ke usịnen̄kpọ ye ukamaidem fo, esịnede mme n̄kon̄ine ererimbot, ayanam afo edi isio n̄ko. (Rome 12:2; 1 Timothy 2:9) Ntre ke edidi ke afo ndimemek ikwọ. (Philippi 4:8, 9) “Mmenyene ikwọ oro mfiọkde ke akpana ntop nduọk,” ntem ke ekpri Christian kiet akayarade, “edi enye enem etieti!” Akparawa eren efen ama enyịme n̄ko ete: “Ama edi ami, ikwọ edi mmeme mi koro mmade enye. Edieke n̄kụtde n̄kpọ oro mîfọnke ke enye, mîdịghe edieke ete ye eka mi ẹdụride ntịn̄enyịn mi ẹwụt enye, nsinyene ndinen̄ede nnyịk ekikere mi man n̄kara esịt mi koro ke esịt mi ami mmama ikwọ oro.” Mme uyen, ‘ẹkûnana ifiọk ẹban̄a n̄kari ye n̄kukan Satan’! (2 Corinth 2:11) Enye ada ikwọ anam n̄kpọ ke ukeme oro enye esịnde ndiwọn̄ọde mme uyen Christian n̄kpọn̄ Jehovah! Mme ibuotikọ ẹdu ke mme n̄wed Watch Tower ẹmi ẹnemede ẹban̄a rap, ọkpọsọn̄ n̄kukwak, ye ukpụhọ ikwọ rọk.d Nte ededi, mme n̄wed Watch Tower ikemeke nditịn̄ n̄kpọ mban̄a kpukpru mbufa uduot ye orụk ikwọ oro ẹkemede ndiwọrọ ndi. Ke ntre, ana mbufo ẹda “ekikere” ye “mbufiọk” ẹnam n̄kpọ ke ini ẹmekde ikwọ.—Mme N̄ke 2:11.
17. (a) Nso idi por·neiʹa, ndien nso edinam ke enye esịne? (b) Nso idi uduak Abasi ke n̄kpọ aban̄ade eti ido uwem?
17 Ke akpatre, ana mbufo ẹnịm idem mbufo asana ke n̄kan̄ ido uwem. Bible eteme ete: “Mbufo ẹfehe ẹbọhọ use.” (1 Corinth 6:18) Akpasarade ikọ Greek oro adade ọnọ use, por·neiʹa, etịn̄ aban̄a oburobụt edinam idan̄ abuanade edida mme ndido idan̄ nnam n̄kpọ ke ọwọrọde ọkpọn̄ mbọbọ ndọ. Oro eyesịne idan̄ inua ye edikokoi mfiọn̄ọ mme ndido idan̄. Ediwak uyen Christian ẹsịn idem ke utọ edu uwem oro, ẹkerede ẹte ke mmimọ ikenen̄ekede inam use. Nte ededi, Ikọ Abasi etịn̄ in̄wan̄în̄wan̄ ete: “Emi edi uduak Abasi, ete mbufo ẹkpekabade ẹsana, ete mbufo ẹnyụn̄ ẹbet use; kpukpru owo ke otu mbufo ẹnyụn̄ ẹfiọk ndikama [idem, NW] esie ke edisana ido ye ido ukpono.”—1 Thessalonica 4:3, 4.
18. (a) Didie ke uyen ekeme nditre ndidi se spirit ererimbot asabarede? (b) Nso ke ẹdineme ke ibuotikọ oro etienede?
18 Ih, ye un̄wam Jehovah, mbufo ẹmekeme nditre ndidi se spirit ererimbot asabarede! (1 Peter 5:10) Edi, Satan esiwak ndidịp afia n̄kpa esie, ndien ndusụk ini ekeme ndiyom ata mbufiọk man ẹkụt n̄kpọndịk. Ẹtịm ibuotikọ nnyịn oro etienede ndin̄wam mme uyen ẹkọri ukeme ikike mmọ.
[Mme Ikọ idakisọn̄]
a Usọrọ unek esiwak ndibịghi ke ofụri okoneyo. Ke oyomde ntọt efen efen, se “Young People Ask . . . Are Raves Harmless Fun?” (N̄kparawa Owo Ẹbụp . . . Nte Uyom Uyom Usọrọ Edi Mbubru Oro Mînọhọ Unan?) ke nsiondi Awake! eke December 22, 1997.
b Nditọwọn̄ ẹdide n̄kpọ nte isua 11.
c Ke oyomde mme ekikere, se page 296-303 ke n̄wed oro Questions Young People Ask—Answers That Work.
d Se nsiondi Enyọn̄-Ukpeme eke April 15, 1993.
Mme Mbụme Ndida Nnam Ndụn̄ọde
◻ Nso idi “spirit ererimbot,” ndien didie ke enye ‘akara’ mme owo?
◻ Nso idi ndusụk uyarade spirit ererimbot ke otu mme uyen mfịn?
◻ Didie ke mme uyen Christian ẹkeme ndiwụt “spirit efen” ke utịn̄ikọ ye unọ idem nduọkodudu?
◻ Didie ke mme uyen Christian ẹkeme ndiwụt “spirit efen” ke eti ido uwem ye ikwọ?
[Ndise ke page 9]
Ediwak uyen ẹwụt ebe ke edu uwem mmọ nte ke spirit ererimbot ‘akara’ mmimọ
[Ndise ke page 10]
Sasat mme ikwọ oro afo emekde
[Ndise ke page 11]
Oyom uko man ẹbiọn̄ọ spirit ererimbot