9. Mme ntọt uwụtn̄kpọ ewe ke Bible ọnọ aban̄a mme owo ẹmi ẹkeyomde mme udọn̄ idemmọ?

⁹ Ima “iyomke ufọn esiemmọ.” (1 Corinth 13:5) Owo emi enyenede ima ibian̄ake mbon en̄wen man enyene se enye oyomde. Bible ọdọn̄ọ mme ntọt uwụtn̄kpọ ke n̄kpọ emi. Ke ndinam an̄wan̄a: Nnyịn imokot iban̄a Delilah, Jezebel, ye Athaliah—iban ẹmi ẹkebian̄ade mme owo ke mme ntak ibụk mmọ. (Judges 16:16; 1 Ndidem 21:25; 2 Chronicles 22:10-12) Absalom eyen Edidem David ama odu n̄ko. Enye ama esika ebịne mbon oro ẹkedide Jerusalem kaban̄a ikpe onyụn̄ ọdọhọ ke abian̄a ete ke okụre edidem ikenyeneke ata udọn̄ ke mme mfịna mmọ. Ekem enye eyetịn̄ in̄wan̄în̄wan̄ ete ke se okụre oro okoyomde ekedi owo emi ọfọnde ido nte imọ! (2 Samuel 15:2-4) Ke akpanikọ, Absalom ikenyeneke udọn̄ ke mbon oro ẹkefịkde, edi ekenyene sụk ke idemesie. Ke anamde n̄kpọ nte edidem oro emekde idemesie, enye ama anam esịt ediwak owo otụn usụn̄. Edi nte ini akakade, ẹma ẹkan Absalom ata idiọk idiọk. Ke n̄kpa esie, owo ikakam ikwe ke odot ẹbụk enye ukpono ukpono.—2 Samuel 18:6-17.

10. Didie ke nnyịn ikeme ndiwụt ke nnyịn imekere iban̄a udọn̄ mbon en̄wen?

¹⁰ Emi edi ntọt ọnọ mme Christian mfịn. Edide idi eren m̀mê n̄wan, nnyịn imekeme ndinyene mme ndammana ukeme oro ekpekde-kpek mme owo. Ekeme ndidi mmemmem n̄kpọ ọnọ nnyịn ndinyene se iyomde, yak idọhọ ntre, ebe ke ndikara nneme mîdịghe ebe ke ndinam idem emem mbon oro ẹnyenede isio isio ekikere. Nte ededi, edieke nnyịn inen̄erede inyene ima, nnyịn iyekere iban̄a udọn̄ mbon en̄wen. (Philippi 2:2-4) Nnyịn ididaha mbon en̄wen didie didie m̀mê ndimenede mme ekikere oro ẹnyenede eyịghe ẹban̄a ke ntak ifiọkutom nnyịn m̀mê idaha nnyịn ke esop Abasi, nte n̄kpọ eke ẹdọhọde ke mme ekikere nnyịn kpọt ke ẹkeme ndikere mban̄a. Utu ke oro, nnyịn iyeti n̄ke Bible oro: “Iseri ebem nsobo iso: n̄kpon-esịt onyụn̄ ebem iduọ iso.”—Mme N̄ke 16:18.

11. (a) Ke mme usụn̄ ewe ke nnyịn ikeme ndiwụt ima oro ọfọnde ido onyụn̄ anamde se idotde? (b) Didie ke nnyịn ikeme ndiwụt ke nnyịn idarake se ikwan̄ade?

¹¹ Paul ama ewet n̄ko ete ke ima “ọfọn ido” ye nte ke enye “inamke ido eke mîdotke.” (1 Corinth 13:4, 5) Ih, ima idiyakke nnyịn inam n̄kpọ ke nsọn̄ido, itịn̄ oburobụt ikọ, m̀mê inana ukpono. Utu ke oro, nnyịn iyekere iban̄a ntụk mbon en̄wen. Ke uwụtn̄kpọ, owo oro enyenede ima eyefep ndinam mme n̄kpọ oro ẹdifịnade ubieresịt mbon en̄wen. (Men 1 Corinth 8:13 domo.) Ima “idarake se ikwan̄ade, edi adadara se idide akpanikọ.” (1 Corinth 13:6) Edieke nnyịn imade ibet Jehovah, nnyịn idibọpke enyịn ibaha oburobụt ido m̀mê ndikop inemesịt ke mme n̄kpọ oro Abasi asuade. (Psalm 119:97) Ima ayan̄wam nnyịn ndinyene idatesịt ke mme n̄kpọ oro ẹnamde owo ọkọri utu ke mbon oro ẹnamde idem emem owo.—Rome 15:2; 1 Corinth 10:23, 24; 14:26.

12, 13. (a) Didie ke nnyịn ikpanam n̄kpọ ke ini owo eduede nnyịn? (b) Siak ndusụk uwụtn̄kpọ Bible ndiwụt ke idem edinen iyatesịt ekeme ndinam nnyịn inam n̄kpọ nte mîwụtke eti ibuot.

¹² Paul ewet ete ke ima “isọpke iyatesịt” (“n̄kpọ isọpke itụk,” Phillips). (1 Corinth 13:5) Edi akpanikọ, edi ndammana n̄kpọ ọnọ nnyịn mme anana-mfọnmma owo ndidi se n̄kpọ etịmerede m̀mê ndiyat esịt ke ndusụk udomo ke ini owo eduede nnyịn. Nte ededi, ikpenenke nditọhọ ke anyan ini m̀mê ndika iso nyat esịt. (Psalm 4:4; Ephesus 4:26) Edieke owo mîkarake, idem edinen iyatesịt ekeme ndinam nnyịn inam n̄kpọ nte mîwụtke eti ibuot, ndien Jehovah ekeme ndida nnyịn nte ntak kaban̄a emi.—Genesis 34:1-31; 49:5-7; Numbers 12:3; 20:10-12; Psalm 106:32, 33.

¹³ Ndusụk owo ẹma ẹyak mme unana mfọnmma mbon en̄wen ẹtụk ubiere mmọ ndidụk mme mbono esop Christian m̀mê ndibuana ke utom ukwọrọikọ. Ke mbemiso, ediwak ke otu mmọ ẹmi ẹma ẹn̄wana eti en̄wan mbuọtidem, eyedi ẹyọde ubiọn̄ọ otode ubon, nsahi otode mme nsan̄autom, ye mme n̄kpọ ntre. Mmọ ẹkeyọ mme utọ n̄kpọ ubiọn̄ọ oro koro mmọ ẹkesede mmọ nte mme udomo nsọn̄ọnda, ndien ntre ke edi. Edi nso isitịbe ke ini ekemmọ Christian etịn̄de m̀mê anamde n̄kpọ oro mîwụtke ima? Ndi emi n̄ko idịghe udomo nsọn̄ọnda? Ke akpanikọ edi, koro edieke nnyịn ikade iso ndiyat esịt, nnyịn imekeme ‘ndinọ Satan ufan̄.’—Ephesus 4:27.

14, 15. (a) Nso ke ‘ndikama udu’ ọwọrọ? (b) Didie ke nnyịn ikeme ndikpebe Jehovah ke ndifen nnọ owo?

¹⁴ Ye eti ntak, Paul adian ete ke ima “ikamake udu.” (1 Corinth 13:5) Mi enye ada ikọ ubatokụk, nte an̄wan̄ade ndinọ ekikere mban̄a ediwet ndudue ke n̄wed isọn mbak ẹdifre. Ndi owụt ima ndimụm ikọ m̀mê edinam iyatesịt nsịn ke ibuot ke nsinsi, nte n̄kpọ eke ediyomde nnyịn itịn̄ iban̄a enye ke ini iso? Nnyịn ikeme ndidat esịt didie ntem nte ke Jehovah idụn̄ọkede nnyịn ke utọ usụn̄ unana mbọm oro! (Psalm 130:3) Ih, ke ini nnyịn ikabarede esịt, enye esisọhi mme idiọkn̄kpọ nnyịn efep.—Utom 3:19.

¹⁵ Nnyịn imekeme ndikpebe Jehovah ke afan̄ emi. Nnyịn ikpayakke n̄kpọ ọsọp otụk nnyịn akaha ke ini etiede nte owo esuene nnyịn. Edieke nnyịn isọpde ndiyat esịt, nnyịn imekeme ndinen̄ede nnọ idem nnyịn unan n̄kan nte owo oro eduede nnyịn akpakam ekemede ndinọ. (Ecclesiastes 7:9, 22) Utu ke oro, oyom nnyịn iti ite ke ima “enenịm se ifọnde ke akpanikọ kpukpru ini.” (1 Corinth 13:7) Edi akpanikọ, idụhe owo nnyịn oro oyomde ẹwo imọ, edi nnyịn ikponyụn̄ iyịkke mme uduak nditọete nnyịn nte mîdotke. Ke ebiet ekededi ikemede, ẹyak nnyịn ida ke nditọete nnyịn inyeneke idiọk uduak.—Colossae 3:13.