Mme Mbụme Ẹtode Mme Andikot
Ndi ikọ oro nte ke owo ‘enyene spirit’ emi ẹkụtde ke 1 Corinth 14:37, ọwọrọ nte ke owo ọmọbọ spirit ke usụn̄ifiọk eke edidi enyeoro ẹyetde aran, mîdịghe ndi ọwọrọ nte ke enye enyene utịbe utịbe enọ otode spirit?
Ke New World Translation of the Holy Scriptures, ufan̄ikọ emi okot ete: “Edieke owo ekerede ete ke imọ idi prọfet m̀mê ke imenyene spirit, yak enye ọfiọk mme n̄kpọ ẹmi n̄wetde nnọ ẹsọk mbufo, koro mmọ ẹdi ewụhọ Ọbọn̄.”—1 Corinth 14:37.
Andikot ekeme ndida ubak udịmikọ oro “imenyene spirit” nte se iban̄ade akpanikọ oro nte ke ẹkebon mme Christian akpa isua ikie ke spirit ẹnyụn̄ ẹkabade ẹdi nditọ Abasi eke spirit. Mîdịghe ubak udịmikọ oro ekeme ndin̄wan̄a owo nte ke aban̄a owo oro ọkọbọde san̄asan̄a ẹnọ edisana spirit. Etie nte akpatre ukabade emi ke edi, nte mme n̄kpọ oro ẹkande ẹkụk ẹn̄wamde ndiwụt.
Mi apostle Paul akada ikọ Greek oro pneu·ma·ti·kosʹ, emi akpan akpan enyenede ekikere “n̄kpọ oro aban̄ade spirit, eke spirit.” Mme orụk esie ke ẹda nditịn̄ mban̄a ‘idem eke spirit,’ “mfọn eke spirit,” “eti ibuot ye ikike ke n̄kpọ spirit,” ye “ufọk eke spirit.”—1 Corinth 15:44; Ephesus 1:3; Colossae 1:9; 1 Peter 2:5.
Ke mme idaha oro, Bible asiak mme akpan n̄kpọ (idem, mfọn, eti ibuot ye ikike, ufọk) oro “eke spirit” anamde an̄wan̄a. Edi ke mme idaha en̄wen, udọn̄ikọ enyene ndibiere usụn̄ifiọk ye nnennen nte ẹsịnde “eke spirit.” Ke uwụtn̄kpọ, 1 Corinth 2:14, 15 owụt ukpụhọde oro odude ke ufọt edu owo oro ekerede n̄kpọ obụkidem ye owo oro ekerede n̄kpọ ho pneu·ma·ti·kosʹ, emi nte owụtde ifiọk ọwọrọde “owo eke spirit” (NW).
Akpa N̄wed Corinth ibuot 12 osịm 14 owụk ntịn̄enyịn ke mme utịbe utịbe enọ eke edisana spirit. Abasi ọkọnọ ndusụk akpa Christian mmọemi man owụt ete ke imọ ikadaha aba Israel eke obụk inam n̄kpọ edi ke ikọdiọn̄ Christian “Israel Abasi” kemi. (Galatia 6:16) Kaban̄a mme enọ ẹmi, Paul ekewet ete: “Edi mme enọ ẹdi nsio nsio, edi spirit edi kiet.” (1 Corinth 12:4) San̄asan̄a ọniọn̄, ifiọk, ye mbuọtidem ẹkesịne ke otu enọ eke spirit, ukem nte edisiak uduak Abasi, ukeme edisem nsio nsio orụk usem, ukeme edikabade usem.—1 Corinth 12:8-11.
Mme Christian oro Paul ekewetde n̄wed ọnọ ẹsọk ke Corinth ẹkedi mbon oro ẹyetde aran ke edisana spirit Abasi. Paul ọkọdọhọ ete: “Edi ẹma ẹyet mbufo, ẹma ẹnam mbufo ẹsana, ẹma ẹtebe mbufo ikpe ke enyịn̄ Ọbọn̄ Jesus Christ, ye ke spirit Abasi nnyịn.” (1 Corinth 6:11; 12:13) Ih, kpukpru mmọ ẹma ẹbọ “spirit nte akpa ubak udeme.” (2 Corinth 5:5) Nte ededi, idịghe kpukpru mmọ ẹkebọ san̄asan̄a enọ ebe ke edisana spirit. Ndien etie nte ke ediwak mmọ ẹma ẹkop nduaidem ẹban̄a edisem nsio nsio usem, ẹdade enọ emi ke akpan n̄kpọ ẹkan nte ekpedide. Paul ama ewet n̄kpọ ndinen̄ede ekikere mmọ onyụn̄ osio owụt nte ke nsio nsio usem idinọhọ ediwak owo ufọn nte edisiak uduak Abasi. Ke utịt ibuot 12, Paul ama ọnọ mbon Corinth item ete: “Ẹyom enọ eke ẹkponde ẹkan ke ofụri esịt.”—1 Corinth 12:28-31.
Ekem, ke ntọn̄ọ ibuot 14, enye ama akpak ete: “Ẹbịne ima; ẹnyụn̄ ẹyom enọ [ta pneu·ma·ti·kaʹ] ye ofụri esịt mbufo, edi ẹyom ẹkan ndisiak uduak Abasi.” Ẹyom nso? Mme Christian oro ikenyeneke ndiyom uyet aran eke spirit, koro mmọ ẹma ẹnyenyene oro. Nte owụtde ifiọk Paul eketịn̄ aban̄a “mme enọ” eke spirit, emi enye, ke utịt ibuot 12, akakpakde mmọ ete ẹyom. Ntre, New World Translation of the Holy Scriptures esịn 1 Corinth 14:1 ntem: “Ẹyom mme enọ eke spirit ifịk ifịk.” Mme edikabade Bible eken mi ẹsịn ta pneu·ma·ti·kaʹ “mme enọ eke spirit” m̀mê “mme enọ Spirit.”
Ye idaha oro odude mi, nnyịn ikụt ite ke ekperede utịt ibuot 14, Paul abuan edisiak uduak Abasi ye pneu·ma·ti·kosʹ. Nte edide ke ufan̄ikọ 1, udọn̄ikọ ọnọ ekikere ete ke ikọ esie ọkọwọrọ ndinyene enọ eke spirit. The New Testament in Modern Speech, eke R. F. Weymouth, esịn enye ke usụn̄ emi: “Edieke owo abatde idemesie ke prọfet m̀mê ke owo oro enyenede enọ eke spirit, yak enye ada se ami n̄wetde idahaemi nte ewụhọ Ọbọn̄.”
Ih, kpukpru Christian, edide mmọ ẹnyene enọ edisiak uduak Abasi m̀mê enọ eke spirit ekededi, ẹkenyene ndinyịme nnyụn̄ ntiene item oro Paul ekewetde kaban̄a nte mme n̄kpọ ẹkpenyenede ndida itie ke esop.