Didie ke Nnyịn Ikeme Ndidian Eti Ido ke Mbuọtidem Nnyịn?
“Mbufo ke n̄kan̄ mbufo ẹsịn ifịk ke ofụri ukeme ẹdian eti ido ke mbuọtidem mbufo.”—2 PETER 1:5.
1, 2. Ntak emi nnyịn ikpodoride enyịn ikọt Jehovah ndinam se idide eti?
JEHOVAH esinam n̄kpọ kpukpru ini ke eti usụn̄. Enye esinam se idide edinen ye eti. Ke ntre, apostle Peter ama ekeme nditịn̄ mban̄a Abasi nte enyeemi “akadade ubọn̄ ye nti ido Esie” okot mme Christian oro ẹyetde aran. Nnennen ifiọk aban̄ade eti Ete mmọ eke heaven ama owụt mmọ se ẹkeyomde man ẹbịne uwem ata uten̄e Abasi.—2 Peter 1:2, 3.
2 Apostle Paul ama akpak mme Christian ete “ẹdi mme andikpebe Abasi, nte ndima nditọ.” (Ephesus 5:1) Ke ntre, ukem nte Ete mmọ eke heaven, mme andituak ibuot nnọ Jehovah ẹkpenyene ndinam se idide eti ke idaha ekededi. Edi nso idi eti ido?
Se Eti Ido Edide
3. Didie ke ẹkabade “eti ido”?
3 Mme n̄wed ukabadeikọ eyomfịn ẹkabade “eti ido” nte “ata eti eduuwem; eti ido.” Enye edi “nnennen edinam ye ekikere; eti edu.” Owo eti ido edi edinen owo. Ẹsikabade eti ido n̄ko nte “edinam n̄kpọ nte ekemde ye edinen idaha.” Nte ededi, ye mme Christian, edi Abasi ebiere “edinen idaha” onyụn̄ anam an̄wan̄a ke Edisana Ikọ esie, kpa Bible.
4. Nso mme edu ẹsiakde ke 2 Peter 1:5-7 ke ana mme Christian ẹnam utom ọkpọsọn̄ ndikọri?
4 Mme ata Christian ẹnam n̄kpọ nte ekemde ye ndinen idaha Jehovah Abasi, ndien mmọ ẹnam n̄kpọ ẹban̄a mme ọsọn̄urua un̄wọn̄ọ esie ebe ke ndinyene mbuọtidem. Mmọ n̄ko ẹnam item Peter: “Mbufo ke n̄kan̄ mbufo ẹsịn ifịk ke ofụri ukeme ẹdian eti ido ke mbuọtidem mbufo, ẹnyụn̄ ẹdian ifiọk ke eti ido, ẹnyụn̄ ẹdian edifara ke idem ke ifiọk, ye ime ke edifara ke idem, ye uten̄e Abasi ke ime, ye [ima nditọete, NW] ke uten̄e Abasi, ye ima ke [ima nditọete, NW].” (2 Peter 1:5-7) Ana Christian anam utom ọkpọsọn̄ ndikọri mme edu ẹmi. Owo inamke emi ke usen m̀mê isua ifan̄ edi oyom n̄kaiso ukeme ofụri eyouwem. Kamse, ndidian eti ido ke mbuọtidem nnyịn oyom ekese ukeme ke idemesie!
5. Nso idi eti ido ke n̄kan̄ N̄wed Abasi?
5 M. R. Vincent ewet n̄wed ukabadeikọ, etịn̄ nte ke akpasarade ifiọk oro okodude ke ikọ Greek emi ẹkabarede “eti ido” okowụt “uduot n̄kpọ ekededi oro ọfọnde akan.” Peter akada uduot owụtde ediwak n̄kpọ ke ini enye ọkọdọhọde ete ke mme Christian ẹkenyene nditan̄a “mme utịbe edinam,” m̀mê nti ido, Abasi. (1 Peter 2:9) Ke ekikere N̄wed Abasi, owo inamke eti ido an̄wan̄a nte se inanade odudu edi nte “odudu eti eduuwem, nsọn̄idem eti eduuwem, odudu ukpọn̄.” Ke etịn̄de aban̄a eti ido, Peter ekenyene ke ekikere eti eduuwem emi asan̄ade ye uko oro ẹdoride enyịn mme asan̄autom Abasi ndinyene nnyụn̄ mmụm n̄kama. Nte ededi, sia nnyịn idide mme anana mfọnmma, nte nnyịn imekeme ndinen̄ede nnam se idide eti ke enyịn Abasi?
Mme Anana Mfọnmma edi Ẹdi Edinen
6. Okposụkedi nnyịn idide unana mfọnmma, ntak ẹkemede ndidọhọ nte ke nnyịn imekeme ndinam se idide eti ke enyịn Abasi?
6 Nnyịn ima ida unana mfọnmma ye idiọkn̄kpọ imana, ntre nnyịn imekeme ndikere m̀mê didie ke nnyịn ikeme ndinen̄ede nnam se idide eti ke enyịn Abasi. (Rome 5:12) Nnyịn ke akpanikọ imoyom un̄wam Jehovah edieke anade nnyịn inyene edisana esịt, emi nti ekikere, ikọ, ye mme edinam ẹkemede ndiwọrọ nto. (Men Luke 6:45 domo.) Ke ama akanam idiọkn̄kpọ ye Bath-sheba ama, David andiwet psalm oro akatuade n̄kpọfiọk ama eben̄e ete: “Bot edisana esịt nọ mi, O Abasi; nyụn̄ nam obufa spirit eke ọsọn̄ọde ada, sịn mi ke idem.” (Psalm 51:10) David ama ọbọ edifen nnọ oro otode Abasi ye un̄wam oro okoyomde man ebịne usụn̄ eti ido. Ntre, edieke nnyịn ima ikanam akwa idiọkn̄kpọ edi ituade n̄kpọfiọk inyịme un̄wam Abasi ye eke mbiowo esop, nnyịn imekeme ndifiak nnyọn̄ ndi usụn̄ eti ido nnyụn̄ nsọn̄ọ ndu ke enye.—Psalm 103:1-3, 10-14; James 5:13-15.
7, 8. (a) Edieke anade nnyịn isụk idi eti, nso ke ẹyom? (b) Nso un̄wam ke mme Christian ẹnyene ke ndinyene eti ido?
7 Ke ntak ndammana idiọkn̄kpọ, ana nnyịn ikakaiso ke en̄wan eke esịtidem ndinam se usụn̄uwem eti ido ediyomde oto nnyịn. Edieke anade nnyịn isụk inyene eti ido, nnyịn ikemeke ndidede nyak idem nnyịn akabade edi ofụn idiọkn̄kpọ. Utu ke oro, ana nnyịn idi ‘ifịn edinen ido,’ ikerede n̄kpọ, itịn̄de ikọ, inyụn̄ inamde n̄kpọ kpukpru ini ke eti usụn̄. (Rome 6:16-23) Nte ededi, mme udọn̄ obụkidem ye mme ntụhọ nnyịn ndinam idiọk ẹsọn̄, ndien nnyịn imenyene en̄wan ke ufọt mmọemi ye nti n̄kpọ oro Abasi oyomde oto nnyịn. Ntre, nso ke ẹnyene ndinam?
8 N̄kpọ kiet edi, oyom nnyịn itiene ndausụn̄ edisana spirit, m̀mê anamutom odudu Jehovah. Nnyịn ke ntre ikpenyene ndinam item Paul: “Ẹsan̄a ke spirit, ndien mbufo idinamke se idọn̄de obụkidem. Koro obụkidem ada ubọn̄ esie an̄wana ye spirit, spirit onyụn̄ ada ubọn̄ esie an̄wana ye obụkidem; mmọ mbiba ẹbiọn̄ọ kiet eken; man mbufo ẹkûnam se mbufo ẹyomde ndinam.” (Galatia 5:16, 17) Ih, nnyịn imenyene spirit Abasi nte odudu ndinam se inende, inyụn̄ inyene Ikọ esie nte ndausụn̄ ndinyene edinen eduuwem. Nnyịn n̄ko imenyene ima ima un̄wam otode esop Jehovah ye item “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Ntem, nnyịn imekeme ndin̄wana en̄wan oro okụtde unen ye mme udọn̄ idiọkn̄kpọ. (Rome 7:15-25) Nte ededi, edieke idiọk ekikere okpodụkde nnyịn esịt, ana nnyịn ibịn enye ifep ye unana ubiatini inyụn̄ ibọn̄ akam iyom un̄wam Abasi ndibiọn̄ọ idomo ekededi ndinam n̄kpọ ke usụn̄ ekededi emi ananade eti ido.—Matthew 6:13.
Eti Ido ye Mme Ekikere Nnyịn
9. Eti eduuwem oyom nso utọ ekikere?
9 Eti ido ọtọn̄ọ ke usụn̄ nte owo ekerede n̄kpọ. Man idara mfọn Abasi, ana nnyịn ikere n̄kpọ eke enende, ẹfọnde, ẹdide eti. Paul ọkọdọhọ ete: “Nditọete, n̄kpọ ekededi eke edide akpanikọ, ye n̄kpọ ekededi eke enyenede ukpono, ye n̄kpọ ekededi eke enende, ye n̄kpọ ekededi eke edide edisana, ye n̄kpọ ekededi eke odotde ete ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.” (Philippi 4:8) Oyom nnyịn iwụk ekikere nnyịn ke mme n̄kpọ oro ẹnende, ẹsanade, ndien n̄kpọ ekededi oro ananade eti ido ikpenyeneke ndidụri udọn̄ nnyịn. Paul ama ekeme ndidọhọ ete: “Se mbufo ẹkekpepde ẹkenyụn̄ ẹbọde mi ke ubọk, ẹnyụn̄ ẹkopde ẹnyụn̄ ẹkụtde ete nnanam, mbufo ẹtiene ẹnam.” Edieke nnyịn itiede nte Paul—inyenede eti ido ke ekikere, utịn̄ikọ, ye edinam—nnyịn iyedi nti nsan̄a, ye nti uwụtn̄kpọ ke eduuwem Christian, ndien ‘Abasi emem eyedu ye nnyịn.’—Philippi 4:9.
10. Didie ke ọkpọkpọ edida 1 Corinth 14:20 esịn ke edinam edin̄wam nnyịn ndikaiso ndi nti owo?
10 Edieke edide uduak nnyịn ndikaiso nnyene eti ekikere ndien ke ntre inemde Ete nnyịn eke heaven esịt, oyom ete nnyịn ida item Paul isịn ke edinam: “Ekûdi nditọwọn̄ ke ekikere, edi ke edinam ibak ẹtie nte nsek nditọ; edi ke ekikere ẹtie nte ikpọ owo.” (1 Corinth 14:20) Emi ọwọrọ nte ke nte mme Christian nnyịn iyomke ifiọk m̀mê usọ ke ndinam idiọkn̄kpọ. Utu ke ndiyak ekikere nnyịn edi se ẹbiatde ke usụn̄ emi, nnyịn ke eti ibuot iyemek ndisụk ndi ọkọi nnyụn̄ nnana ndudue nte n̄kpri nditọ ke afan̄ emi. Ke ukem ini oro, nnyịn imọfiọk ọyọhọ ọyọhọ nte ke oburobụt ido ye ukwan̄ido ẹdi idiọkn̄kpọ ke enyịn Jehovah. Ntotụn̄ọ ubiere ofụri esịt ndinem enye esịt ebe ke ndinyene eti ido eyenọ nnyịn ufọn, koro enye eyenụk nnyịn ndifep mme uduot unọ idem inemesịt oro mîsanake ye mme odudu eken ke ererimbot emi esịnede Satan ke ubọk mi oro ẹbiatde-biat ekikere.—1 John 5:19.
Eti Ido ye Utịn̄ikọ Nnyịn
11. Ndinyene eti ido oyom nso orụk utịn̄ikọ, ndien ke afan̄ emi, nso mme uwụtn̄kpọ ke nnyịn inyene ke Jehovah Abasi ye Jesus Christ?
11 Edieke mme ekikere nnyịn ẹdide nti, emi ekpenyene ndinyene akamba n̄kpọ ndinam ke se nnyịn itịn̄de. Ndinyene eti ido oyom utịn̄ikọ oro edide edisana, eti, akpanikọ, ọbọpde-bọp. (2 Corinth 6:3, 4, 7) Jehovah edi “Abasi akpanikọ.” (Psalm 31:5) Enye anam akpanikọ ke kpukpru edinam esie, ndien mme un̄wọn̄ọ esie ẹdi akpanikọ koro enye mîkemeke ndisu nsu. (Numbers 23:19; 1 Samuel 15:29; Titus 1:2) Eyen Abasi, Jesus Christ, “ọyọhọ ye mfọn ye akpanikọ.” Ke adan̄aemi okodude ke isọn̄, enye kpukpru ini ekesitịn̄ akpanikọ kpa nte enye ọkọbọde oto Ete esie. (John 1:14; 8:40) Akande oro, Jesus “ikanamke idiọkn̄kpọ, akanam inyụn̄ ikwe Enye abian̄a ke inua.” (1 Peter 2:22) Edieke nnyịn ke akpanikọ idide mme asan̄autom Abasi ye Christ, nnyịn iyetịn̄ akpanikọ ke utịn̄ikọ inyụn̄ inen ke eduuwem, nte n̄kpọ eke ‘ibọbọde akpanikọ ke isịn.’—Ephesus 5:9; 6:14.
12. Edieke anade nnyịn inyene eti ido, nso mme orụk utịn̄ikọ ke ana nnyịn ifep?
12 Edieke nnyịn inyenede eti ido, odu mme urụk utịn̄ikọ oro nnyịn idifepde. Item Paul emi eyekpeme nnyịn: “Ẹsion̄o kpukpru ndotndot ekikere, ye ifụtesịt, ye iyatesịt, ye utọk, ye isụn̄i ẹfep ke otu mbufo, ye kpukpru orụk udu.” “Edi amaedi use, ye kpukpru mbubiam ido, m̀mê edisịn esịt ke n̄kpọ owo, ẹkûyak ẹtịn̄ ẹban̄a n̄kpọ oro ke otu mbufo, nte odotde ikọt Abasi. Ẹkûnyụn̄ ẹyak ẹtịn̄ ndek ndek ikọ, m̀mê ndisịme ikọ, m̀mê ikọ idiọk mbubru, emi mîdotke mbufo: edi ẹkam ẹnọ Abasi ekọm.” (Ephesus 4:31; 5:3, 4) Mmọ efen ẹyekụt nte edide inem inem n̄kpọ ndidu ke otu nnyịn koro eti esịt nnyịn onụkde nnyịn ndifep utịn̄ikọ oro mîwụtke edu Christian.
13. Ntak anade mme Christian ẹkpeme edeme?
13 Udọn̄ ndinem Abasi esịt nnyụn̄ ntịn̄ nti n̄kpọ eyen̄wam nnyịn ndikpeme edeme. Ke ntak mme ntụhọ idiọkn̄kpọ, kpukpru nnyịn idedue ke ikọinua ndusụk ini. Edi, mbet James ọdọhọ ete ‘edieke nnyịn isịnde ukpaha ke inua enan̄-mbakara,’ mmọ ke nsụkibuot ẹyeka ebiet eke nnyịn iyomde mmọ ẹka. Ke ntre, nnyịn ikpenyene ndinam utom ọkpọsọn̄ ndisịn ukpaha ke edeme inyụn̄ idomo ndida enye nnam n̄kpọ ke nti usụn̄ kpọt. Edeme oro owo mîkpemeke edi “uyọhọ ukwan̄ido . . . ke ofụri ererimbot.” (James 3:1-7) Kpukpru orụk idiọk edinam eke ererimbot unana uten̄e Abasi emi enyene ebuana ye edeme oro owo mîkpemeke. Enye enyene n̄kpọ ndinam ye mme n̄kpọ oro ẹbiatde-biat utọ nte nsunsu ikọ ntiense, isụn̄i, ye ikọedem. (Isaiah 5:20; Matthew 15:18-20) Ndien ke ini edeme oro owo mîkpemeke etịn̄de ikọ isụn̄i, edidọk, m̀mê ikọedem, enye ọyọhọ ye idiọk ibọk n̄kpa.—Psalm 140:3; Rome 3:13; James 3:8.
14. Nso idaha iba ke utịn̄ikọ ke ana mme Christian ẹfep?
14 Nte James owụtde, ididotke ‘nditoro Jehovah’ ke nditịn̄ eti n̄kpọ mban̄a Abasi edi ekem ida edeme emi inam n̄kpọ ke idiọk usụn̄ ke ‘ndisụn̄i owo’ ebe ke nditịn̄ idiọk ikọ ndori mmọ. Nso ọrụk idiọk n̄kpọ ke edi ntem ndikwọ itoro nnọ Abasi ke mme mbonoesop ndien ekem iwọrọ ika inyụn̄ iketịn̄ idiọk iban̄a ekemmọ mme andinịm ke akpanikọ! Edinem ye ndotndot mmọn̄ ikemeke ndiwọrọ ke ukem idịm. Edieke nnyịn inamde n̄kpọ Jehovah, mmọ efen ẹnyene unen ndidori enyịn nnyịn nditịn̄ nti n̄kpọ utu ke nditịn̄ mme oburobụt ikọ. Ẹyak nnyịn ke ntre ifep utịn̄ikọ oro ekemede ndinọ unan inyụn̄ iyom nditịn̄ mme n̄kpọ oro ẹdinyenede ufọn inọ nsan̄a nnyịn ẹdinyụn̄ ọbọpde-bọp mmọ ke n̄kan̄ eke spirit.—James 3:9-12.
Eti Ido ye Mme Edinam Nnyịn
15. Ntak edide ata akpan n̄kpọ ndifep ndiwọn̄ọde mbịne mme usụn̄ abian̄a?
15 Sia anade ekikere ye utịn̄ikọ Christian edi eti, nso kaban̄a mme edinam nnyịn? Ndinyene eti eduuwem edi n̄kukụre usụn̄ ndinyene unyịme Abasi. Asan̄autom Jehovah ndomokiet ikemeke ndifụmi eti ido, n̄kabade ntie n̄kari n̄kari ye abian̄a abian̄a, ndien nte enende ekere nte ke mme utọ n̄kpọ oro ẹyenyene unyịme Abasi. Mme N̄ke 3:32 ọdọhọ ete: “Mme ọsọn̄ ibuot [ẹdi] se Jehovah asuade: edi enye odụk odu ye mbon edinen ido.” Edieke nnyịn idarade itie ebuana nnyịn ye Jehovah Abasi, mme edemede owo ekikere ikọ oro ẹkpenyene ndikpan nnyịn ndiduak ndinam ibak m̀mê ndinam n̄kpọ ekededi oro etiede n̄kari n̄kari. Kamse, ke otu mme n̄kpọ itiaba oro ukpọn̄ Jehovah esede ke mbubiam edi “esịt eke aduakde uduak ibak”! (Mme N̄ke 6:16-19) Mmọdo, ẹyak nnyịn ifep mme utọ edinam oro inyụn̄ inam se idide eti, ke ufọn ekemmọ owo nnyịn ye ubọn̄ Ete nnyịn eke heaven.
16. Ntak mînaha mme Christian ẹbuana ke mbubịk mbubịk edinam ekededi?
16 Ndinam eti ido oyom ete nnyịn inam akpanikọ. (Mme Hebrew 13:18) Owo mbubịk, emi mme edinam esie mîkemke ye mme ikọ esie, inyeneke eti ido. Ikọ Greek oro ẹkabarede “mbubịk” (hy·po·kri·tesʹ) ọwọrọ “enyeoro ọbọrọde” ndien n̄ko ada ọnọ osio ndyọ ke itie edinam. Sia mme osion̄o ndyọ mbon Greek ye Rome ẹkesifụhọde n̄kpọ ke iso, ẹma edida ikọ emi ke ndiwụt nte n̄kpọ ebietde n̄kpọ ẹnọ owo oro ekesitiede n̄kari n̄kari. Mbon mbubịk edi “mmọemi mînamke akpanikọ.” (Men Luke 12:46 domo ye Matthew 24:50, 51.) Mbubịk (hy·poʹkri·sis) ekeme n̄ko ndida nnọ idiọk ido ye n̄kari. (Matthew 22:18; Mark 12:15; Luke 20:23) Edi n̄kpọ mfụhọ didie ntem ke ini ẹbian̄ade owo oro enyenede mbuọtidem ke idem owo ebe ke inua imam, abian̄a abian̄a itoro, ye mme edinam oro n̄kukụre ẹdide n̄kari! Ke n̄kan̄ eken edi n̄kpọ oro edemerede owo esịt ke ini nnyịn ifiọkde ite ke nnyịn inam n̄kpọ ye mme Christian oro ẹkemede ndiberi edem. Ndien Abasi ọdiọn̄ nnyịn ke ndinyene eti ido nnyụn̄ nnana mbubịk. Mmọ oro ẹwụtde “ima nditọete oro mîsan̄ake ke mbubịk” ẹnyụn̄ ẹnyenede “ata mbuọtidem” ẹnyene unyịme esie.—1 Peter 1:22, NW; 1 Timothy 1:5.
Eti Ido Edi Okopodudu Mfọnido
17, 18. Nte nnyịn iwụtde eti ido kpa mbun̄wụm spirit, didie ke nnyịn idinam n̄kpọ ye mmọ efen?
17 Edieke nnyịn idiande eti ido ke mbuọtidem nnyịn, nnyịn iyedomo ndifep idem ke ndikere, nditịn̄, ye ndinam mme n̄kpọ oro Abasi mînyịmeke. Nte ededi, ndiwụt eti ido Christian oyom n̄ko ete nnyịn iwụt okopodudu mfọnido. Ke akpanikọ ẹkabade eti ido nte mfọnido. Ndien eti ido edi mbun̄wụm edisana spirit Jehovah, idịghe se itode ikpîkpu ukeme owo. (Galatia 5:22, 23) Nte nnyịn iwụtde eti ido kpa mbun̄wụm spirit, enye eyenụk nnyịn ndikere se ifọnde mban̄a mmọ efen nnyụn̄ ntoro mmọ kaban̄a nti edu mmọ kpa ye unana mfọnmma mmọ. Nte mmọ ẹma ẹnam n̄kpọ Jehovah ke edinam akpanikọ ke ediwak isua? Do nnyịn ikpenyene ndiwụt ukpono nnọ mmọ nnyụn̄ ntịn̄ eti n̄kpọ mban̄a mmọ ye utom oro mmọ ẹnamde ẹnọ Abasi. Ete nnyịn eke heaven okụt ima oro mmọ ẹwụtde ẹnọ enyịn̄ esie ye nti utom mbuọtidem mmọ, ndien nnyịn ikpenyene ndinam ntre.—Nehemiah 13:31b; Mme Hebrew 6:10.
18 Eti ido anam nnyịn ime ime, ifiọk n̄kpọ, inyene mbọm. Edieke ekemmọ andituak ibuot nnọ Jehovah okopde ubiak m̀mê mfụhọ, nnyịn iyesọn̄ọ owo iduọesịt idem inyụn̄ iyom ndinọ enye ndusụk ndọn̄esịt, kpa nte ima ima Ete nnyịn eke heaven ọdọn̄de nnyịn esịt. (2 Corinth 1:3, 4; 1 Thessalonica 5:14) Nnyịn imesiseme ye mmọ oro ẹfụhọde, ndusụk ke ntak oro ẹtabade owo ima ke n̄kpa. Edieke nnyịn ikemede ndinam n̄kpọ ekededi ndisụhọde ubiak, nnyịn iyenam emi, koro edu eti ido esịn udọn̄ ọnọ ima ima, edinam ntatubọk.
19. Didie ke ekeme ndidi mmọ efen ẹyenam n̄kpọ ye nnyịn edieke nnyịn inyenede eti ido ke ekikere, ikọ, ye edinam?
19 Ukem nte nnyịn itorode Jehovah ebe ke nditịn̄ eti n̄kpọ mban̄a enye, mmọ efen ukem ntre ẹyetoro nnyịn edieke nnyịn inyene eti ido ke ekikere, ikọ, ye edinam. (Psalm 145:10) N̄ke ọniọn̄ kiet ọdọhọ ete: “Ufọn odoro eti owo ke ibuot: edi inua mme idiọkowo odịp afai.” (Mme N̄ke 10:6) Idiọkowo ye owo afai anana eti ido oro edinamde mmọ efen ẹma enye. Enye ọdọk se enye ọtọde, koro mme owo ke akpanikọ ikemeke ndinọ enye itoro mmọ ke nditịn̄ nti ikọ mban̄a enye. (Galatia 6:7) Ọfọn didie akan ntem ye mmọ oro ẹkerede n̄kpọ, ẹtịn̄de ikọ, ẹnyụn̄ ẹnamde n̄kpọ ke eti usụn̄ nte mme asan̄autom Jehovah! Mmọ ẹmenyene ima, mbuọtidem, ye ukpono mmọ efen, oro onụkde nditoro mmọ nnyụn̄ ntịn̄ nti ikọ mban̄a mmọ. Akande oro, eti ido Abasi mmọ osụn̄ọ ke ọsọn̄urua edidiọn̄ Jehovah.—Mme N̄ke 10:22.
20. Nti ekikere, utịn̄ikọ, ye edinam ẹkeme ndinyene nso ufọn ke esop ikọt Jehovah?
20 Nti ekikere, utịn̄ikọ, ye edinam ke akpanikọ ẹyenyene ufọn ọnọ esop ikọt Jehovah. Ke ini ekemmọ mme andinịm ke akpanikọ ẹnyenede ima ima, ekikere oro ẹwụtde ukpono ẹnọ kiet eken, ima nditọete esiyọhọ ke otu mmọ. (John 13:34, 35) Eti utịn̄ikọ, esịnede itoro ye nsịnudọn̄ esịt akpanikọ, eyenam ufiop ufiop edu eke edinọ ibetedem ye edidianakiet odu. (Psalm 133:1-3) Ndien edemede owo esịt, nti edinam edemede mmọ efen udọn̄ ndinam n̄kpọ ke ukem usụn̄ emi. Akande kpukpru, edinam eti ido Christian osụn̄ọ ke unyịme ye edidiọn̄ eti Ete nnyịn eke heaven, kpa Jehovah. Ke ntre nnyịn ikpakam inam edi uduak nnyịn ndinam n̄kpọ mban̄a mme ọsọn̄urua un̄wọn̄ọ Abasi ebe ke ndinyene mbuọtidem. Ndien ke kpukpru usụn̄ ẹyak nnyịn isịn ofụri ukeme ndidian eti ido ke mbuọtidem nnyịn.
Nso Ẹdi Mme Ibọrọ Fo?
◻ Didie ke afo akpakabade “eti ido,” ndien ntak emi mme anana mfọnmma owo ẹkemede ndinyene eti ido?
◻ Nso orụk ekikere ke eti ido oyom?
◻ Didie ke eti ido ekpenyene nditụk utịn̄ikọ nnyịn?
◻ Nso utịp ke eti ido ekpenyene ndinyene ke mme edinam nnyịn?
◻ Nso idi ndusụk ufọn eke edidi eti?
[Ndise ke page 21]
Sia edinem ye ndotndot mmọn̄ mîkemeke ndiwọrọ nto ukem ebiet, mmọ efen nte enende ẹdori enyịn mme asan̄autom Jehovah nditịn̄ eti n̄kpọ kpọt