Ndidu Uwem Nnọ Mfịn M̀mê Nsinsi Ini Iso?
“Ẹma ẹnyan̄a nnyịn ke idotenyịn emi.”—ROME 8:24.
1. Nso ke mbon Epicurus ẹkekpep, ndien didie ke utọ ukpepn̄kpọ akwaifiọk oro okotụk ndusụk Christian?
APOSTLE Paul ekewet ọnọ ẹsọk mme Christian ẹdụn̄de ke Corinth ete: “Ndusụk owo ke otu mbufo ẹnam didie ẹdọhọ ẹte ediset mme akpan̄kpa idụhe?” (1 Corinth 15:12) Nte an̄wan̄ade, idiọk ukpepn̄kpọ akwaifiọk eke ọfiọkn̄kpọ owo Greece oro Epicurus ama ọnyọni odụk otu mme Christian eke akpa isua ikie. Ntem Paul ama odụri ntịn̄enyịn owụt ukpepn̄kpọ mbon Epicurus oro: “Yak idia inyụn̄ in̄wọn̄, koro iyakpa n̄kpa n̄kpọn̄.” (1 Corinth 15:32) Ke ẹfụmide idotenyịn ekededi ndidu uwem ke n̄kpa ebede, mme anditiene owo akwaifiọk oro ẹkenịm ke akpanikọ nte ke inemesịt obụkidem edi n̄kukụre n̄kpọ m̀mê akpan n̄kpọ oro ọfọnde ke uwem. (Utom 17:18, 32) Ukpepn̄kpọ akwaifiọk mbon Epicurus ekedi ibụk ibụk, eyịghe eyịghe, ye ata esuene esuene.
2. (a) Ntak emi ekedide ata n̄kpọndịk ndikan̄ ediset ke n̄kpa? (b) Didie ke Paul ọkọsọn̄ọ mbuọtidem mme Christian ke Corinth?
2 Edifụmi ediset ke n̄kpa emi ama akwan̄a ntotụn̄ọ ntotụn̄ọ. Paul ama ọnọ ekikere ete: “Edi edieke ediset mme akpan̄kpa mîdụhe, ikonyụn̄ inamke Christ eset nan̄a ke n̄kpa: ndien edieke mîkanamke Christ eset ke n̄kpa, se nnyịn ikwọrọde ọwọrọ ikpîkpu, mbuọtidem mbufo edinyụn̄ okpu. . . . Edieke nnyịn mînyeneke se ibede idotenyịn ke Christ ke uwem emi, nnyịn idi mmọemi ẹnyenede mbọm ikan kpukpru owo en̄wen.” (1 Corinth 15:13-19) Ih, ke ẹsiode idotenyịn aban̄ade nsinsi ini iso ẹfep, Ido Ukpono Christ “ọwọrọ ikpîkpu.” Enye ikpenyeneke uduak. Eyịghe idụhe, ndien, ke idak odudu eke ekikere mme okpono ndem emi, esop Corinth ama akabade edi itie emi mfịna ọkọride. (1 Corinth 1:11; 5:1; 6:1; 11:20-22) Ke ntre, uduak Paul ekedi ndisọn̄ọ mbuọtidem mmọ ke ediset ke n̄kpa. Ke adade okopodudu usụn̄ n̄kọkibuot, edikot nto N̄wed Abasi, ye mme uwụtn̄kpọ anam n̄kpọ, enye ama owụt ke usụn̄ oro eyịghe ndomokiet mîdụhe nte ke idotenyịn ediset ke n̄kpa idịghe abian̄a edi edi ata idem n̄kpọ oro edisude. Ọkọn̄ọde ke emi, enye ama ekeme ndikpak mme ekemmọ andinịm ke akpanikọ ete: “Ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄; sia ẹmefiọk ẹte utom eke mmimọ inamde idiwọrọke idi ikpîkpu ke Ọbọn̄.”—1 Corinth 15:20-58.
“Ekpeme”
3, 4. (a) Nte Peter eketịn̄de, ewe edu edide n̄kpọndịk edikara ndusụk owo ke ukperedem ini? (b) Nso ke oyom nnyịn ika iso nditi idem nnyịn?
3 Mfịn, ediwak owo ẹnyene eyịghe eyịghe, yak-idu-uwem-inọ-mfịn edu. (Ephesus 2:2) Emi edi nte apostle Peter ekebemde iso etịn̄. Enye ama etịn̄ aban̄a ‘mbon nsahi ndida nsahi mmọ ndi, ẹdọhọde ẹte, Edidi eke enye ọkọn̄wọn̄ọde ete iyedi enye? Koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.’ (2 Peter 3:3, 4) Edieke mme ata andituak ibuot ẹyakde idem ẹnọ utọ ekikere oro, mmọ ẹkeme ndikabade ‘ntie ifu mîdịghe ẹnana mfri.’ (2 Peter 1:8) Ke inemesịt, oro idịghe ntre ye n̄wakn̄kan ke otu ikọt Abasi mfịn.
4 Ikwan̄ake ndinyene udọn̄ mban̄a utịt idiọk editịm n̄kpọ emi edide mi. Ti udọn̄ oro mme apostle Jesus ẹkewụtde: “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?” Jesus ama ọbọrọ ete: “Inaha inọ mbufo ndifiọk ini m̀mê eyo, eke Ete ekenịmde akama ke ubọk Esiemmọ.” (Utom 1:6, 7) Mme ikọ oro ẹsịne akpan etop oro enye ọkọnọde ke Obot Olive ete: “Mbufo ifiọkke usen eke Ọbọn̄ mbufo edide. . . . Ke ini eke mbufo mîdorike enyịn, Eyen Owo eyedi.” (Matthew 24:42, 44) Oyom nnyịn ika iso iti idem nnyịn iban̄a item oro! Ndusụk owo ẹkeme ndinyene ntụhọ edinyene edu nte, ‘Ekeme ndidi akpana nsụhọde ubọk esisịt nnyụn̄ nnam n̄kpọ nte n̄kemede.’ Nso ndudue ke oro ekpedi ntem! Kere mban̄a James ye John, “Nditọ Obuma.”—Mark 3:17.
5, 6. Nso ukpepn̄kpọ ke nnyịn ikeme ndikpep nto mme uwụtn̄kpọ James ye John?
5 Nnyịn imọfiọk ite ke James ekedi apostle oro ekenyenede ifịk ebe nde. (Luke 9:51-55) Ndondo oro ẹketọn̄ọde esop Christian, anaedi enye ama enyene akpan udeme. Edi ke ini James okosụk edide kan̄a ekpri akparawa, Herod Agrippa I ama anam ẹwot enye. (Utom 12:1-3) Ndi emekere ke James, ke okụtde nte uwem esie ebede ntre efep ke mbuari, ama ofụhọ nte ke imọ ima isịn ifịk ikaha, ima isịn̄ede idem imọ ke utom ukwọrọikọ? Ikemeke ndidi ntre! Ke akpanikọ enye ama enem esịt nte ke imọ ima ibiat mme mfọnn̄kan isua eke ibio ini uwem imọ ke utom Jehovah. Idahaemi, baba nnyịn kiet ikemeke ndifiọk m̀mê uwem nnyịn ẹkeme ndibe mfep ke mbuari. (Ecclesiastes 9:11; men Luke 12:20, 21 domo.) Ntre ana in̄wan̄în̄wan̄ nte ke owụt eti ibuot ndinyene ọkpọsọn̄ ifịk nnyụn̄ nnam utom ọkpọsọn̄ ke utom Jehovah. Ke usụn̄ oro nnyịn iyomụm eti enyịn̄ nnyịn ye enye ikama inyụn̄ ika iso idu uwem ye nsinsi ini iso ke ekikere.—Ecclesiastes 7:1.
6 Mbiet ukpepn̄kpọ oro odu abuanade apostle John, emi okodude ke ini Jesus ọkọsọn̄ọde akpak ete, “Ẹkpeme.” (Matthew 25:13; Mark 13:37; Luke 21:34-36) John ama omụm ikọ oro akama, anamde utom ye ifiopesịt ke ata ediwak isua. Ke akpanikọ, etie nte enye ọkọbọhọ osụhọ ke otu kpukpru mme apostle. Ke ini John ke ama ọkọsọn̄, akafiakde ese ata ediwak isua oro ekesịnde ke utom mbuọtidem, ndi enye ama ekere ke ekedi ndudue, uwem ẹbiatde ke idiọk usụn̄ m̀mê uwem oro mîdaha ukem ukem? Baba-o! Enye ke okosụk ese ini iso ye ọkpọsọn̄ udọn̄. Ke ini Jesus oro ẹkenamde eset ọkọdọhọde, “Ke akpanikọ m̀mọ̀n̄ ndedi iwiwa,” John ama ọsọsọp ọbọrọ ete, “Amen. Di, Ọbọn̄ Jesus.” (Ediyarade 22:20) Ke akpanikọ John ikodụhe uwem inọ idahaoro, oyomde ‘ọsọ uwem’ oro edide sụn̄sụn̄ ye ifụre ifụre. Enye ama ọsọn̄ọ ebiere ndika iso nnam utom ke ofụri uwem ye ukeme esie, tutu esịm ini ekededi oro Ọbọn̄ edidide. Nso kaban̄a nnyịn?
Itiat Idakisọn̄ Ndinịm Nsinsi Uwem ke Akpanikọ
7. (a) Didie ke ‘ẹkebem nsinsi ini iso ẹn̄wọn̄ọ’ idotenyịn nsinsi uwem? (b) Didie ke Jesus ekesịn un̄wana ke idotenyịn nsinsi uwem?
7 Fiọk ete ke idotenyịn nsinsi uwem idịghe ndap m̀mê mfụmmfụm ekikere owo. Nte Titus 1:2 ọdọhọde, uten̄e Abasi nnyịn ọkọn̄ọ ke “idotenyịn nsinsi uwem; eke Abasi, emi mîkemeke ndisu nsu, ekebemde nsinsi ini iso ọn̄wọn̄ọ.” Ata akpa uduak Abasi ekedi kpukpru owo oro ẹkopde item ndidu uwem ke nsinsi. (Genesis 1:28) Baba n̄kpọ kiet, idem nsọn̄ibuot Adam ye Eve, ikemeke ndibiọn̄ọ uduak emi. Nte ẹwetde ke Genesis 3:15 (NW), ke ndondo oro Abasi ama ọn̄wọn̄ọ “mfri” oro edikọkde kpukpru unan oro ẹnọde ubonowo. Ke ini “mfri” oro m̀mê Messiah, Jesus, ekedide edisịm, enye ama anam idotenyịn nsinsi uwem edi kiet ke otu akpan ukpepn̄kpọ esie. (John 3:16; 6:47, 51; 10:28; 17:3) Ke ndinọ mfọnmma uwem esie nte ufak, Christ ama ọbọ unen oro ekemde ye ibet ndinọ ubonowo nsinsi uwem. (Matthew 20:28) Ndusụk ke otu mbet esie, akpaimọ edide 144,000, ẹyedu ke nsinsi ke heaven. (Ediyarade 14:1-4) Ntem ndusụk owo oro ẹkenyenede ikpọkidem n̄kpa ini kiet ko ‘ẹyesịne se mîdikpaha’!—1 Corinth 15:53.
8. (a) Nso idi “se mîdikpaha,” ndien ntak emi Jehovah adade enye ọnọ owo 144,000? (b) Nso idotenyịn ke Jesus ọkọnọ “mme erọn̄ en̄wen”?
8 “Se mîdikpaha” akan ikpîkpu editre ndikpa tutu amama. Enye abuana “odudu uwem eke mîdikemeke ndibiara.” (Mme Hebrew 7:16; men Ediyarade 20:6 domo.) Nte ededi, nso ke Abasi ọyọhọ ke ndinọ utọ n̄wọrọnda enọ oro? Ti ata Satan oro nte ke owo ikemeke ndinịm ndomokiet ke otu edibotn̄kpọ Abasi ke akpanikọ. (Job 1:9-11; 2:4, 5) Ke ndinọ owo 144,000 idem oro mîkemeke ndikpa, Abasi owụt ọyọhọ mbuọtidem oro enye enyenede ke otu emi oro ọbọrọde ata Satan oro ke ata n̄wọrọnda usụn̄. Edi nso kaban̄a ubonowo eken? Jesus ama asian akpa mme andibuana ke “ekpri otuerọn̄” eke mme adiakpa Obio Ubọn̄ emi nte ke mmọ “[ẹyetie] ke ebekpo ẹkpe ikpe ẹnọ mme esien Israel duopeba.” (Luke 12:32; 22:30) Emi owụt ete ke ndusụk owo ẹyebọ nsinsi uwem ke isọn̄ nte mme andidu ke idak Obio Ubọn̄ esie. Ke adan̄aemi owo mînọhọ “mme erọn̄ en̄wen” ẹmi se mîdikpaha, mmọ ẹyebọ “nsinsi uwem.” (John 10:16; Matthew 25:46) Ntem nsinsi uwem edi idotenyịn kpukpru Christian. Enye idịghe mfụmmfụm ekikere edi edi n̄kpọ emi enyenede iwụk oro “Abasi, emi mîkemeke ndisu nsu” ọkọn̄wọn̄ọde, onyụn̄ adade ọsọn̄urua iyịp Jesus ekpe ekọmurua.—Titus 1:2.
Ke Ata Ini Iso?
9, 10. Mme in̄wan̄în̄wan̄ idiọn̄ọ ewe ẹdu nte ke nnyịn imekpere utịt?
9 Apostle Paul ama ebemiso etịn̄ ete ke “ndiọkeyo” oyowụt ke usụn̄ oro owo mîkemeke ndifan̄a nte ke nnyịn imesịm “ukperedem ini.” Nte n̄kaowo emi akande nnyịn okụk ọduọde odụk idaha unana ima, ibụk, ediyụhọ udọn̄ idemowo, ye unana uten̄e Abasi, nte nnyịn ikwe nte ke usen oro Jehovah edibierede ikpe esie ọnọ idiọk editịm n̄kpọ ererimbot emi ke asan̄a ekpere usọp usọp? Nte afai ye usua ẹtarade, nte nnyịn ikwe ke ofụri n̄kann̄kụk nnyịn nte mme ikọ Paul ẹmi ẹsude: “Ndiọi owo ye mbon abian̄a ẹyedọdiọn̄ ẹdiọk ẹka iso”? (2 Timothy 3:1-5, 13) Ndusụk owo ye ọyọhọ idotenyịn ẹkeme ndifiori “emem ye ifụre,” edi ofụri idotenyịn kaban̄a emem oyosop, koro, “nsobo [ayabuat] mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” Owo ikpọn̄ke nnyịn ke ekịm kaban̄a se ini nnyịn ọwọrọde. Ntre, “ẹyak nnyịn itaba idap ikpeme, imụm idem ikama.”—1 Thessalonica 5:1-6.
10 Ke adianade do, Bible owụt ete ke ukperedem ini edi ‘ibio ini.’ (Ediyarade 12:12; men 17:10 domo.) Nte an̄wan̄ade ata ekese ke otu ‘ibio ini’ oro emebe. Prọfesi Daniel, ke uwụtn̄kpọ, etịn̄ nnennen aban̄a en̄wan ke ufọt “edidem edem edere” ye “edidem edem usụk” emi akade iso tutu esịm isua ikie emi. (Daniel 11:5, 6) Ofụri se isụhọde ndisu edi akpatre en̄wan eke “edidem edem edere,” oro ẹtịn̄de ẹban̄a ke Daniel 11:44, 45.—Se Enyọn̄-Ukpeme eke July 1, 1987, ye November 1, 1993, kaban̄a nneme ke prọfesi emi.
11. (a) Ke nso udomo ke Matthew 24:14 osu? (b) Nso ke mme ikọ Jesus oro ẹwetde ke Matthew 10:23 ẹwụt?
11 Ntịn̄nnịm ikọ Jesus odu n̄ko nte ke “ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Mfịn, Mme Ntiense Jehovah ẹnam utom mmọ ke mme isọn̄, otu isuo, ye mme efakutom 233. Edi akpanikọ, mme efakutom oro owo mînamke utom ẹsụk ẹdodu, ndien iso-ọfọn ke ekemini Jehovah, usụn̄ eyeberede. (1 Corinth 16:9) Kpa ye oro, mme ikọ Jesus oro ẹwetde ke Matthew 10:23 ẹdi se idemerede owo ekikere: “Ke mbufo mîka-isan̄ake ke kpukpru mme obio Israel ibe kan̄a, Eyen Owo eyedi.” Ke akpanikọ, ke adan̄aemi ẹditan̄ade eti mbụk ke ofụri ererimbot, nnyịn ke idem nnyịn ididaha etop Obio Ubọn̄ ika kpukpru ikpehe ererimbot mbemiso Jesus ‘edide’ nte Andisobo.
12. (a) Nso ‘edifịk idiọn̄ọ’ ke ẹtịn̄ ẹban̄a ke Ediyarade 7:3? (b) Nso ke ibat mbon oro ẹyetde aran ndisụhọde ke isọn̄ owụt?
12 Kere ban̄a itien̄wed oro ke Ediyarade 7:1, 3, emi ọdọhọde ete ke ẹmụm “ofụm [nsobo] isọn̄ mbinan̄” ẹkama “tutu [ẹdifịk] ikọt Abasi nnyịn idiọn̄ọ ke ọkpọ iso mmọ.” Emi itịn̄ke iban̄a akpa edifịk idiọn̄ọ, emi adade itie ke ini mme owo 144,000 ẹbọde ikot eke heaven mmọ. (Ephesus 1:13) Enye ada aban̄a akpatre edifịk idiọn̄ọ, ke ini ẹdiọn̄ọde mmọ ke usụn̄ oro owo mîkemeke ndikpụhọde nte “ikọt Abasi” oro ẹma ẹkedomo ẹse ẹnyụn̄ ẹkụt nte ẹnamde akpanikọ. Ibat ata ikọt Abasi oro ẹyetde aran ẹmi ẹsụhọde ke isọn̄ osụhọde akamba akamba. N̄ko-n̄ko, Bible etịn̄ in̄wan̄în̄wan̄ ete “kaban̄a ndimek ikọt Abasi ẹyesịbe” ntọn̄ọ ntọn̄ọ akwa ukụt oro “omụhọ.” (Matthew 24:21, 22) Ata ekese ke otu mbon oro ẹdọhọde nte idude ke otu mbon oro ẹyetde aran ẹnen̄ede ẹsọn̄ ke isua emana. N̄ko, nte emi ikpowụtke ite ke utịt enen̄ede ekpere?
Owo Ukpeme Oro Anamde Akpanikọ
13, 14. Nso idi utom otu owo ukpeme?
13 Kan̄a kemi, nnyịn iyanam ọfọn nditiene ndausụn̄ oro “asan̄autom emi anamde akpanikọ” ọnọde. (Matthew 24:45) Ke se ibede isua ikie, “asan̄autom” eke eyomfịn emi amanam utom nte “owo ukpeme” ke edinam akpanikọ. (Ezekiel 3:17-21, NW) Enyọn̄-Ukpeme eke January 1, 1984, ama anam an̄wan̄a ete: “Owo ukpeme emi omokụt nte mme n̄kpọntịbe ẹdahade ẹda ke isọn̄ ke edisu ntịn̄nnịm ikọ Bible, mmọ ẹnọ ntọt ẹban̄a ‘akwa ukụt oro orụk esie akanam mîdụhe toto ke editọn̄ọ ererimbot’ emi ekperede ndisu ẹnyụn̄ ẹkwọrọ ‘eti mbụk nti n̄kpọ.’”—Matthew 24:21; Isaiah 52:7.
14 Ti: Edi utom owo ukpeme nditịn̄ “se okụtde.” (Isaiah 21:6-8) Ke mme ini Bible owo ukpeme ama esinọ ntọt idem ke ini se itiede nte n̄kpọndịk okodude ke ata anyan usụn̄ oro owo mîkemeke ndikụt in̄wan̄în̄wan̄. (2 Ndidem 9:17, 18) Abian̄a abian̄a ntọt ama esikam odu ini oro. Edi eti owo ukpeme iketreke ndifiori ke ntak ndịk edinam ndutịme odu. Edieke ikan̄ akpatade ufọk fo, ekpetie fi didie ke idem edieke mme enịme ikan̄ ẹkpetrede ndidi sia ẹkerede ke ekeme ndidi ekedi abian̄a abian̄a ntọt? Baba, nnyịn ikpodori enyịn mme utọ owo oro ndinam n̄kpọ usọp usọp mban̄a idiọn̄ọ n̄kpọndịk ekededi! Ke ukem usụn̄ oro, otu owo ukpeme osio n̄kpo ke ini etiede nte mme idaha oyom ẹnam ntre.
15, 16. (a) Ntak emi ẹnamde mme edinen̄ede ke nte prọfesi an̄wan̄ade nnyịn-e? (b) Nso ke nnyịn ikeme ndikpep nto mme anam-akpanikọ asan̄autom Abasi oro mîkenyeneke nnennen ifiọk iban̄a mme prọfesi?
15 Nte ededi, nte mme n̄kpọntịbe ẹkọride, ifiọk nnyịn kaban̄a prọfesi enen̄ede an̄wan̄a. Mbụk owụt ete ke isiwakke, edieke akanam odude, ini oro mme prọfesi ẹtode Abasi ẹsin̄wan̄ade mme owo ọyọhọ ọyọhọ mbemiso mmọ ẹsude. Abasi ama etịn̄ ọnọ Abram nnennen uniọn̄ ini oro mfri esie edidide “isen ke isọn̄ kiet eke mîdịghe ekemmọ,” oro edi, ke isua 400. (Genesis 15:13) Nte ededi, Moses ama ọnọ idemesie nte andinyan̄a ke adan̄aemi ini mîkekemke.—Utom 7:23-30.
16 Kere n̄ko ban̄a mme prọfesi ẹban̄ade Messiah. Ke ẹsede ẹfiak edem etie nte ana ata in̄wan̄în̄wan̄ nte ke ẹma ẹbem iso ẹtịn̄ ẹban̄a n̄kpa ye ediset ke n̄kpa Messiah. (Isaiah 53:8-10) Kpa ye oro, n̄kpọ emi ikan̄wan̄ake mme mbet Jesus. (Matthew 16:21-23) Mmọ ikọfiọkke ite ke Daniel 7:13, 14 edisu ke pa·rou·siʹa, m̀mê “edidu,” Christ ke ini iso. (Matthew 24:3, NW) Ntre okosụk ososụhọ n̄kpọ nte isua 2,000 ke ubatini mmọ ke ini mmọ ẹkebụpde Jesus ẹte: “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel kemi?” (Utom 1:6) Idem ke esop Christian ama ọkọtọn̄ọ ọyọhọ ọyọhọ, mme ukwan̄ ekikere ye mme nsunsu idotenyịn ẹkesụk ẹkaka iso ndidemede. (2 Thessalonica 2:1, 2) Okposụkedi ndusụk owo ẹkesụk ẹnyenede mme ukwan̄ ekikere ke ini ke ini, Jehovah nte eyịghe mîdụhe ama ọdiọn̄ utom mme andinịm ke akpanikọ eke akpa isua ikie oro!
17. Nso ikpedi ekikere nnyịn kaban̄a mme edinen̄ede oro ẹnamde ke nte N̄wed Abasi an̄wan̄ade nnyịn?
17 Kpasụk ntre otu owo ukpeme eke eyomfịn esinyene ndinen̄ede mme ekikere esie ke ini ke ini. Nte ededi, nte owo ekededi ekeme ndiyịk nte ke Jehovah ọdiọn̄ utom “asan̄autom emi anamde akpanikọ”? Akande oro, ke ẹsede ofụri ofụri, nte ata ekese ke otu mme edinen̄ede oro ẹnamde idịghe esisịt ke ẹmende ẹdomo? Akpan ifiọk nnyịn kaban̄a Bible ikpụhọkede. Edinịm oro nnyịn inịmde ke akpanikọ nte ke nnyịn idu uwem ke ukperedem ini akam ọsọsọn̄ akan nte akanam edide!
Ndidu Uwem nnọ Nsinsi Ini Iso
18. Ntak emi nnyịn ikpefepde ndidu uwem nnọ mfịn ikpọn̄-ọ?
18 Ererimbot ekeme ndidọhọ, ‘Ẹyak nnyịn idia inyụn̄ in̄wọn̄, koro n̄kpọn̄ nnyịn iyakpa,’ edi inaha emi edi edu nnyịn. Ntak emi an̄wanade ke ikpîkpu aban̄a inemesịt oro ekemede ndinyene idahaemi ke uwem ke edide emekeme ndinam utom ndinyene nsinsi ini iso? Idotenyịn oro, edide eke uwem unana n̄kpa m̀mê eke nsinsi uwem ke isọn̄, idịghe ndap, idịghe mfụmmfụm ekikere. Enye edi ata idem n̄kpọ oro Abasi “emi mîkemeke ndisu nsu” ọn̄wọn̄ọde. (Titus 1:2) Akpakịp uyarade odu nte ke edisu idotenyịn nnyịn enen̄ede ekpere! “Ẹsịbe ini omụhọ.”—1 Corinth 7:29.
19, 20. (a) Didie ke Jehovah ese mme n̄waidem oro nnyịn inamde ke ntak Obio Ubọn̄? (b) Ntak anade nnyịn idu uwem ye nsinsi ini ke ekikere?
19 Edi akpanikọ, editịm n̄kpọ emi ebebịghi akan nte ekese owo ẹkekerede ẹte enye eyebịghi. Ibat ibat owo ẹkeme ndikere idahaemi ẹte ke ekpedide mmimọ ima ibem iso ifiọk emi, ekeme ndidi mmimọ ikpakanamke ndusụk n̄waidem oro ikanamde. Edi owo ikpenyeneke nditua n̄kpọfiọk sia akanamde oro. Idem n̄kpọ, edinam n̄waidem edi akpan ubak ikpehe edidi Christian. Mme Christian ẹnyene ‘nditụk idemmọ.’ (Matthew 16:24) Nnyịn ikpedehede ikere ke mme ukeme oro nnyịn isịnde ndinem Abasi esịt edi ke ikpîkpu. Jesus ama ọn̄wọn̄ọ ete: “Baba owo kiet idụhe, eke ọkọkpọn̄de ufọk, m̀mê nditọeka iren, m̀mê nditọeka iban, m̀mê eka, m̀mê ete, m̀mê nditọ, m̀mê isọn̄, ke ntak Mi ye ntak gospel, emi mîdibọhọ n̄kpọ utịm ikikie kemi . . . ye nsinsi uwem ke eyo emi edidide.” (Mark 10:29, 30) Ke tọsịn isua kiet ọtọn̄ọde kemi, utom, ufọk, m̀mê okụk fo ke ban̄k edinyene uforo adan̄a didie? Edi, mme n̄waidem oro afo anamde ọnọ Jehovah ẹyenyene ufọn ke isua miliọn kiet ọtọn̄ọde kemi—isua biliọn kiet ọtọn̄ọde kemi! “Koro Abasi ikwan̄ake nte efrede utom mbufo.”—Mme Hebrew 6:10.
20 Ẹyak nnyịn, ke ntre, idu uwem ye nsinsi ini ke ekikere, ikûdọn̄ enyịn “ke se owo okụtde ke enyịn, edi idọn̄ enyịn ke se owo mîkwe ke enyịn; koro se owo okụtde ke enyịn edibede efep, edi se owo mîkwe ke enyịn eyebịghi ke nsinsi nsinsi.” (2 Corinth 4:18) Prọfet Habakkuk ekewet ete: “N̄kukụt [ana] kan̄a ọnọ ini emi ẹnịmde; ndien enye oyosioro uyo ke utịt, idinyụn̄ isụhọ nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” (Habakkuk 2:3) Didie ke ‘edibet’ utịt ini otụk usụn̄ oro nnyịn isede iban̄a mme ọkpọkpọ mbiomo nnyịn ye eke ubon nnyịn? Ibuotikọ nnyịn efen eyeneme mme n̄kpọ ẹmi.
Mme Akpan N̄kpọ Ndụn̄ọde
◻ Didie ke utịt editịm n̄kpọ emi nditie nte ebịghi akaha otụk ibat ibat owo?
◻ Nso idi isọn̄ kaban̄a idotenyịn nsinsi uwem nnyịn?
◻ Didie ke nnyịn ikpese mme n̄waidem oro inyenede ndinam ke ntak ufọn n̄kpọ Obio Ubọn̄?
[Ndise ke page 15]
Ana ẹkụre utom edikwọrọ ikọ ke ofụri ererimbot mbemiso utịt edide