Nti Owo Ẹyeset ke N̄kpa

“Mmonyụn̄ ndori enyịn ke Abasi . . . nte, nti owo ye mme idiọkowo ẹyeset ke n̄kpa.”—UTOM 24:15.

1. Nso idaha ke kpukpru owo ẹsobo toto ke iduọ Adam ye Eve?

“DA ODUDU fo nam kpukpru se ubọk fo okụtde ndinam: koro baba edinam, baba uduak, baba ifiọk, baba mbufiọk mîdụhe ke obio ekpo emi afo akade do.” (Ecclesiastes 9:10) Ye nti ikọ ifan̄ ẹmi ẹtịmde ẹmek mi, enyene-ọniọn̄ Edidem Solomon obụk idaha oro asakde iso ese ofụri emana ubonowo toto ke iduọ akpa ete ye eka nnyịn, Adam ye Eve. Ye unana edisio owo ekededi mfep, n̄kpa ke akpatre ememen kpukpru owo emen—imọ ye ubuene, edidem ye usụhọde owo, owo mbuọtidem ye owo oro mînyeneke mbuọtidem. Ke akpanikọ, n̄kpa ‘amada ubọn̄.’—Rome 5:17.

2. Ntak ekemede ndidi ndusụk mme anam-akpanikọ ẹkụt edikpu ke utịt ini emi?

² Kpa ye n̄kọri ke ifiọk ibọkusọbọ eke ndondo emi, n̄kpa osụk adada ubọn̄ idem mfịn emi. Ke adan̄aemi emi mîdịghe n̄kpọ n̄kpaidem, ekeme ndidi ndusụk owo ke usụn̄ ekededi ẹma ẹkụt edikpu ke ini mmọ ke akpatre ẹkesobode asua anyanini emi. Ntak-a? Ọfọn, ko ke edem ke iduọk isua 1920, Watch Tower Society ama atan̄a etop emi “Ediwak miliọn owo ẹmi ẹdude uwem idahaemi idikpaha tutu amama.” Mmanie ke ediwak miliọn ẹmi ẹdidi? “Erọn̄” oro ẹtịn̄de ẹban̄a ke utịn̄ikọ Jesus aban̄ade erọn̄ ye ebot. (Matthew 25:31-46) Ẹma ẹtịn̄ ke prọfesi nte ke mbon mbieterọn̄ ẹmi ẹdidu ke utịt ini, ye nte ke idotenyịn mmọ edidi nsinsi uwem ke paradise isọn̄. Nte ini ekebede, ikọt Abasi ẹma ẹdinyene ifiọk emi ọfọnde akan ẹban̄a itie oro mme “erọn̄” ẹmi ẹnyenede ke mme uduak Jehovah. Ẹma ẹdifiọk ẹte ke ẹkenyene ndibahade mme okopitem owo ẹmi n̄kpọn̄ mme ọsọn̄ibuot “ebot,” ndien ke ẹma ẹkesobo mbon ukperedem ẹmi, mme erọn̄ ẹyeda ikpehe Obio Ubọn̄ eke isọn̄ oro ẹketịmde ẹnọ mmọ ẹnyene.

Nditan̄ Mbon Mbieterọn̄ Mbok

3. Ikọt Abasi ẹwụk ntịn̄enyịn ke nso utom ọtọn̄ọde ke 1935?

³ Ọtọn̄ọde ke 1935, “asan̄autom emi anamde akpanikọ” owụk ntịn̄enyịn ke ndiyom mme utọ mbon mbieterọn̄ oro nnyụn̄ nda mmọ ndisịn ke esop Jehovah. (Matthew 24:45; John 10:16) Mme Christian emi ẹdide se ẹkemede ndinọ ukpep mi ẹmedi ẹdifiọk ẹte ke Jesus ke akara idahaemi ke Obio Ubọn̄ Jehovah eke heaven ye nte ke ini ke ekpere usọp usọp ọnọ idiọk editịm n̄kpọ emi ndisịm utịt ye edida obufa ererimbot emi edinen ido edidụn̄de ndi. (2 Peter 3:13; Ediyarade 12:10) Ke obufa ererimbot oro, mme inem inem ikọ Isaiah ẹmi ẹyesu: “Enye eyemen n̄kpa ke nsinsi.”—Isaiah 25:8.

4. Okposụkedi ẹkenen̄ede ẹdori enyịn ndikụt ẹwụtde unen itie edikara Jehovah ke Armageddon, nso itịbe inọ ediwak ke otu mme erọn̄ en̄wen?

⁴ Sia utịt ererimbot Satan otịmde ekpere, mme Christian mbieterọn̄ ẹkpema ndidu n̄kụt ẹwụtde unen itie edikara Jehovah ke ukụt oro ẹdidade ẹtiene Akwa Babylon ye ererimbot Satan eken. (Ediyarade 19:1-3, 19-21) Ye ata ediwak owo, enye idịghe ntre. Ediwak owo oro ẹkedoride enyịn ndidu ke otu “ediwak miliọn” owo oro mîdikpaha tutu amama ke akpanikọ ẹma ẹkpa. Ẹma ẹwot ndusụk ke ntak akpanikọ ke mme ufọk-n̄kpọkọbi ye mme itienna ekikere m̀mê ke ubọk mbon ukwan̄ ifiopesịt ido ukpono. Mbon eken ẹma ẹkpan̄a ke unọmọ mîdịghe ke mme inua-okot ndammana ntak—udọn̄ọ ye usọn̄. (Psalm 90:9, 10; Ecclesiastes 9:11) Nte an̄wan̄ade, mme owo efen efen ẹyekpa mbemiso utịt edide. Didie ke utọ mbon oro ẹdikụt un̄wọn̄ọ obufa ererimbot emi edinen ido edidụn̄de osude?

Idotenyịn Ediset ke N̄kpa

5, 6. Nso ini iso idu inọ mmọ oro ẹnyenede idotenyịn eke isọn̄ oro ẹkpan̄ade mbemiso Armageddon?

⁵ Apostle Paul ama ọnọ ibọrọ ke ini enye eketịn̄de ikọ ke iso Felix andikara Rome. Nte ẹwetde ke Utom Mme Apostle 24:15, Paul ama atan̄a uko uko ete: “Mmonyụn̄ ndori enyịn ke Abasi . . . nte, nti owo ye mme idiọkowo ẹyeset ke n̄kpa.” Idotenyịn ediset ke n̄kpa ọnọ nnyịn uko ke ini isobode mme ndiọkn̄kan afanikọn̄. Ke ntak idotenyịn oro, ndima ufan nnyịn oro ẹdọn̄ọde ẹnyụn̄ ẹfiọkde ke mmimọ imọn̄ ikpa ikopke iduọesịt. Se ededi oro otịbede, mmọ ẹfiọk ẹte ke mmimọ iyọdọk utịp edinam akpanikọ. Ke ntak idotenyịn ediset ke n̄kpa, uko uko nditọete nnyịn iren ye iban ẹmi ẹsobode n̄kpa ke ubọk mme andikọbọ ẹfiọk ẹte ke idụhe usụn̄ ndomokiet oro mme andikọbọ mmọ ẹdinyenede edikan. (Matthew 10:28) Ke ini owo ke esop akpade, nnyịn imesikop mfụhọ nditaba owo oro. Ke ukem ini oro, edieke enye edide kiet ke otu mme erọn̄ en̄wen, nnyịn imesikop idatesịt ite ke ekemmọ andinịm ke akpanikọ nnyịn ama anam akpanikọ tutu osịm utịt ndien ke ọduọk odudu idahaemi, enyenede idotenyịn ini iso ke obufa ererimbot Abasi.—1 Thessalonica 4:13.

⁶ Ih, idotenyịn ediset ke n̄kpa edi akpan ikpehe mbuọtidem nnyịn. Nte ededi, ntak emi edinịm oro nnyịn inịmde ediset ke n̄kpa ke akpanikọ otịmde ọsọn̄ ntre, ndien mmanie ẹnyene idotenyịn oro?

7. Nso idi ediset ke n̄kpa, ndien nso idi ndusụk itien̄wed oro ẹtịn̄de n̄kpọ ẹban̄a nsọn̄ọ oro odude?

⁷ Ikọ Greek oro adade ọnọ “ediset ke n̄kpa” edi a·naʹsta·sis, emi ke ataata usụn̄ ọwọrọde “ndidaha nda.” Enye etịn̄ akpan akpan aban̄a edidaha nda ke n̄kpa. Nte enemde, ikọ oro “ediset ke n̄kpa” idụhe ke N̄wed Abasi Usem Hebrew, edi ẹwụt idotenyịn ediset ke n̄kpa do in̄wan̄în̄wan̄. Ke uwụtn̄kpọ, nnyịn imokụt emi ke mme ikọ oro Job eketịn̄de ke ini ndutụhọ esie ete: “Afo akpakam odịp mi ke obio ekpo, . . . onyụn̄ odori mi ini, ndien eti mi!” (Job 14:13) Ukem ntre, ke Hosea 13:14, nnyịn ikot ite: “Nyefak mmọ nsio ke ubọk udi; nyenyan̄a mmọ nsio ke n̄kpa: nyedi idiọk udọn̄ọ fo, O n̄kpa; nyedi nsobo fo, O udi.” Ke 1 Corinth 15:55, apostle Paul ama okot oto mme ikọ ẹmi onyụn̄ owụt ete ke edikan oro ẹkande n̄kpa oro ẹketịn̄de ẹban̄a ke prọfesi oro okụt unen ebe ke ediset ke n̄kpa. (Nte ededi, ke itien̄wed oro, Paul eketịn̄ aban̄a ediset ke n̄kpa n̄ka heaven.)

“Ẹnam Ikpe Etebe” Mme Andinịm ke Akpanikọ

8, 9. (a) Didie ke mme anana mfọnmma owo ẹkeme ndinyene udeme ke ediset ke n̄kpa nti owo? (b) Nso idi isọn̄ kaban̄a idotenyịn nnyịn ke uwem oro n̄kpa mîdidaha utịt idi?

⁸ Ke ikọ oro enye eketịn̄de ọnọ Felix, oro ẹkotde ẹsịn ke ikpehe ekikere 5, Paul ọkọdọhọ ete ke nti owo ye mme idiọkowo ẹyeset ke n̄kpa. Mmanie ẹdi nti owo oro ẹdinamde ẹset? Nte ededi, baba owo kiet imanake nte eti owo. Kpukpru nnyịn idi mme anamidiọk toto ke emana, inyụn̄ inanam idiọkn̄kpọ ke ofụri eyouwem nnyịn—emi anamde nnyịn idot n̄kpa ke ntak iba. (Rome 5:12; 6:23) Nte ededi, nnyịn imokụt ikọ emi “ẹnam ikpe etebe” ke Bible. (Rome 3:28) Emi etịn̄ aban̄a mme owo ẹmi, okposụkedi ẹdide mme anana mfọnmma, Jehovah efende mme idiọkn̄kpọ mmọ.

⁹ Ẹda ikọ emi etịn̄ ikọ akpan akpan ẹban̄a mme Christian oro ẹyetde aran, ẹmi ẹnyenede idotenyịn eke heaven. Ke N̄wed Mbon Rome 5:1, apostle Paul ọdọhọ ete: “Mmọdo sia ẹma ẹkeda mbuọtidem ẹnam ikpe etebe nnyịn, nnyịn imenyene emem ye Abasi oto ke Ọbọn̄ nnyịn Jesus Christ.” Ẹnam ikpe etebe kpukpru Christian oro ẹyetde aran ke ntak mbuọtidem. Mbuọtidem ke nso? Nte Paul anamde an̄wan̄a ke ndusụk udomo ke N̄wed Mbon Rome, edi mbuọtidem ke Jesus Christ. (Rome 10:4, 9, 10) Jesus akakpa nte mfọnmma owo ndien ke oro ebede ẹma ẹnam enye eset ke n̄kpa onyụn̄ ọdọk ke heaven man ọkọnọ ufọn uwem esie eke owo ke ibuot nnyịn. (Mme Hebrew 7:26, 27; 9:11, 12) Ke ini Jehovah ọkọbọde uwa oro, Jesus, ke nditịm ntịn̄, ama edep ekpụk ubonowo osio ke ufụn idiọkn̄kpọ ye n̄kpa. Mbon oro ẹbuọtde idem ke ndutịm emi ẹbọ ufọn akamba akamba eto enye. (1 Corinth 15:45) Ọkọn̄ọde ke emi mme anam-akpanikọ iren ye iban ẹnyene idotenyịn edinyene uwem oro idiọk asua oro, n̄kpa, mîdidaha utịt idi.—John 3:16.

10, 11. (a) Nso ediset ke n̄kpa ina ibet mme anam-akpanikọ Christian oro ẹyetde aran? (b) Nso orụk ediset ke n̄kpa ke mme andituak ibuot oro ẹkedude mbemiso eyo Christian ẹkedori enyịn ẹban̄a?

¹⁰ Ke ntak uwa ufak Jesus, mme anam-akpanikọ mbon oro ẹyetde aran, ke ẹtebede ikpe, ẹnyene idotenyịn oro enyenede nsọn̄ọ ndidi se ẹnamde ẹset nte mme edibotn̄kpọ eke spirit oro mîkemeke ndikpa, ukem nte Jesus. (Ediyarade 2:10) Ẹtịn̄ ẹban̄a ediset ke n̄kpa mmọ ke Ediyarade 20:6, emi ọdọhọde ete: “Ọfọfọn ọnọ owo emi enyenede udeme ke akpa ediset: enye edi edisana; udiana akpa n̄kpa inyeneke odudu ke idem mmọemi: edi mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye ke tọsịn isua.” Emi edi ediset ke n̄kpa n̄ka heaven. Nte ededi, tịmfiọk ete ke Bible okot enye “akpa ediset,” emi ọwọrọde ete ke mme owo efen efen ẹyeset.

¹¹ Ke Mme Hebrew ibuot 11, Paul ama etịn̄ aban̄a anyan udịm mme asan̄autom Abasi ẹmi ẹkedude mbemiso eyo Christian ẹmi ẹkenyenede ọkpọsọn̄ mbuọtidem ke Jehovah Abasi. Mmọemi n̄ko ẹma ẹnyene mbuọtidem ke ediset ke n̄kpa. Ke Heb 11 ufan̄ikọ 35 eke ibuotn̄wed oro, Paul etịn̄ aban̄a mme utịbe utịbe ediset ke n̄kpa ẹmi ẹkedade itie ke mbụk Israel, ọdọhọde ete: “Iban ẹbọ mme akpan̄kpa ke ediset ke n̄kpa; mmọ eken ẹkụt ndutụhọ, inyụn̄ inyịmeke ndibọhọ, man mmọ ẹkpenyene ediset ke n̄kpa eke ọfọnde akan.” Mme anam-akpanikọ ntiense ini edem oro ẹma ẹkeme ndisak iso nse ediset ke n̄kpa oro ọfọnde akan mmọ oro ẹkebuanade, ke uwụtn̄kpọ, Elijah ye Elisha. (1 Ndidem 17:17-22; 2 Ndidem 4:32-37; 13:20, 21) Idotenyịn mmọ ekedi ediset ke n̄kpa ndụk ererimbot oro owo mîditụhọkede mme asan̄autom Abasi ke ntak mbuọtidem mmọ, ererimbot oro iban mîditabake mbonima mmọ ke n̄kpa. Ih, mmọ ẹkesak iso ẹse ediset ke n̄kpa ndụk ukem obufa ererimbot oro nnyịn idoride enyịn. (Isaiah 65:17-25) Jehovah ikayarakede ekese n̄kpọ inọ mmọ iban̄a obufa ererimbot emi nte enye ayararede ọnọ nnyịn. Edi, mmọ ẹma ẹfiọk ẹte ke enye ke edi, mmọ ẹma ẹnyụn̄ ẹyom ndidu ke enye.

Ediset ke N̄kpa eke Isọn̄

12. Nte ẹma ẹtebe mme anam-akpanikọ oro ẹkedude mbemiso eyo Christian ikpe? Nam an̄wan̄a.

¹² Nte nnyịn ikpenyene ndikere mban̄a edidemede mme anam-akpanikọ iren ye iban ẹmi ẹkedude mbemiso eyo Christian ke obufa ererimbot oro nte ubak ediset ke n̄kpa nti owo? Nte an̄wan̄ade ih, koro Bible etịn̄ aban̄a mmọ nte nti owo. Ke uwụtn̄kpọ, mbet oro James etịn̄ aban̄a eren ye n̄wan eset ẹmi ẹketebede ikpe. Eren oro ekedi Abraham, kpa eteete orụk Hebrew. Nnyịn ikot iban̄a enye ite: “Abraham onịm Abasi ke akpanikọ, ndien ẹbat oro ẹnọ enye ke edinen ido; ẹnyụn̄ ẹkot enye, ẹte, Ufan Abasi.” N̄wan oro ekedi Rahab, kpa owo emi mîkedịghe eyen Israel emi okowụtde akwa mbuọtidem ke Jehovah. ‘Ẹma ẹtebe enye ikpe’ ndien ama akabade edi ubak idụt Hebrew. (James 2:23-25) Ntem, Jehovah ama etebe iren ye iban eset ikpe, ẹmi ẹkewụtde ọkpọsọn̄ mbuọtidem ke Jehovah ye mme un̄wọn̄ọ esie ẹkenyụn̄ ẹsọn̄ọde ẹda ẹnam akpanikọ tutu osịm n̄kpa ke isọn̄ mbuọtidem mmọ, ndien mmọ nte eyịghe mîdụhe ẹyebuana ke ‘ediset ke n̄kpa nti owo.’

13, 14. (a) Nnyịn isan̄a didie ifiọk ke ẹkeme nditebe mme Christian oro ẹnyenede idotenyịn eke isọn̄ ikpe? (b) Nso ke emi ọwọrọ ọnọ mmọ?

¹³ Nte ededi, nso kaban̄a mme owo mbieterọn̄ mfịn, mmọ oro ẹnyenede idotenyịn eke isọn̄ ẹmi ẹyakde idemmọ ẹnọ Jehovah ẹmi ẹnyụn̄ ẹkpade ke edinam akpanikọ ke utịt ini emi? Ndi mmọ ẹyebuana ke ediset ke n̄kpa nti owo? Ẹyebuana nte an̄wan̄ade. Apostle John ama okụt akwa otuowo eke mme utọ anam-akpanikọ oro ke n̄kukụt. Tịmfiọk nte enye etịn̄de aban̄a mmọ: “N̄kụt, ndien sese, akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem ẹda ke iso ebekpo ye ke iso Eyenerọn̄, ẹsịne mfia ọfọn̄idem, ẹnyụn̄ ẹkama ndakeyop ke ubọk; mmọ ẹnyụn̄ ẹfiori ke ọkpọsọn̄ uyo, ẹte, Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.”—Ediyarade 7:9, 10.

¹⁴ Tịmfiọk ete ke mbon nsụkidem ẹmi ẹsọn̄ọ ẹnịm edinyan̄a mmọ ke akpanikọ, ndien mmọ ẹdọhọ ke edi Jehovah ye Jesus, “Eyenerọn̄,” ẹdi ntak emi. Akan oro, mmọ ẹda ke iso Jehovah ye ke iso Eyenerọn̄, kpukpru ẹsịne mfia ọfọn̄idem. Ntak ẹsịnede mfia ọfọn̄idem? Edibotn̄kpọ eke heaven asian John ete: ‘Mmọ ẹkenyụn̄ ẹyet ọfọn̄idem mmọ ẹnam afia ke iyịp Eyenerọn̄.’ (Ediyarade 7:14) Ke Bible, afia edi idiọn̄ọ edisana, edinen ido. (Psalm 51:7; Daniel 12:10; Ediyarade 19:8) Akpanikọ oro nte ke ẹkụt akwa otuowo ẹsịnede mfia ọfọn̄idem owụt ete ke Jehovah ada mmọ nte ndinen. Didie ke oro ekeme ndidi ntre? Koro mmọ, yak idọhọ, ẹyet ọfọn̄idem mmọ ke iyịp Eyenerọn̄. Mmọ ẹwụt mbuọtidem ke iyịp Jesus Christ oro ẹkeduọkde ndien ke ntre ẹtebe mmọ ikpe nte mme ufan Abasi ye idotenyịn edibọhọ akwa ukụt. Ntem, anam-akpanikọ Christian ekededi emi ama akayak idem ọnọ oro edide eke “akwa otuowo” idahaemi oro akpade mbemiso akwa ukụt ekeme ndinyene nsọn̄ọ edinyene udeme ke ediset ke n̄kpa nti owo ndu ke isọn̄.

15. Sia nti owo ye mme idiọkowo ẹdisetde ke n̄kpa, nso ufọn ke ediset ke n̄kpa nti owo enyene?

¹⁵ Ẹtịn̄ ẹban̄a ediset ke n̄kpa oro ke Ediyarade ibuot 20, ufan̄ikọ 13, ke mme ikọ ẹmi: “Inyan̄ibom asana mme akpan̄kpa ẹmi ẹdude ke esịt ayak; n̄kpa ye obio ekpo ẹnyụn̄ ẹsana mme akpan̄kpa mmọ ẹyak: ndien ẹkpe ikpe kpukpru owo nte ekemde ye se mmọ ẹkenamde.” Ntem, ke akwa Usen Ikpe Jehovah eke tọsịn isua, ẹyenam kpukpru mbon oro ẹdude ke ibuot uti n̄kpọ Abasi ẹset—nti owo ye mme idiọkowo. (Utom 17:31) Nte ededi, editịm ọfọn didie ntem akan ye nti owo! Mmọ ẹdodu uwem mbuọtidem. Mmọ ẹnyenyene n̄kpet n̄kpet itie ebuana ye Jehovah ye mbuọtidem ke mme uduak esie ẹyesu. Ndinen ntiense oro ẹkedude mbemiso Eyo Christian ẹyedemede ke n̄kpa ye ọkpọsọn̄ udọn̄ ndikpep nte mme un̄wọn̄ọ Jehovah kaban̄a Mfri ẹkesude. (1 Peter 1:10-12) Mbon oro ẹdide eke mme erọn̄ en̄wen ẹmi Jehovah esede nte ndinen ke eyo nnyịn ẹyeto udi ẹwọn̄ọ ẹdi ye ọkpọsọn̄ udọn̄ ndikụt Paradise isọn̄ oro mmọ ẹkesinemede ẹban̄a ke ini mmọ ẹketan̄ade eti mbụk ke editịm n̄kpọ emi. Nso idara idara ini ke oro edidi ntem!

16. Nso ke nnyịn ikeme nditịn̄ mban̄a ediset ke n̄kpa Usen Ikpe eke mmọemi ẹkpan̄ade ke eyo nnyịn?

¹⁶ Ke Usen Ikpe eke tọsịn isua oro, ini ewe nnennen ke ẹdinam mbon oro ẹkekpade ke edinam akpanikọ ke mme akpatre isua editịm n̄kpọ Satan emi ẹset? Bible itịn̄ke. Nte ededi, nte iwụtke ifiọk ndikere nte ke ekeme ndidi ẹyenam mbon oro ẹbatde ke edinen ẹmi ẹkpade ke eyo nnyịn ẹbemiso ẹset ndien ke ntem ẹdibuana ye akwa otuowo oro ẹbọhọde Armageddon ke utom edidara mme emana oro ẹkebemde iso ẹdu oro ẹwọn̄ọde ke n̄kpa ẹdi? Ih, ke akpanikọ owụt!

Idotenyịn Oro Ọnọde Ndọn̄esịt

17, 18. (a) Nso ndọn̄esịt ke idotenyịn ediset ke n̄kpa ọnọ? (b) Onụk nnyịn nditan̄a nso mban̄a Jehovah?

¹⁷ Idotenyịn ediset ke n̄kpa ọnọ kpukpru Christian mfịn odudu ye ndọn̄esịt. Edieke nnyịn ikade iso inam akpanikọ, idụhe ini ye unọmọ inyụn̄ idụhe asua ekededi oro ekemede ndinam nnyịn itaba utịp nnyịn! Ke uwụtn̄kpọ, ndise mme enyene-uko Christian ke Ethiopia ẹmi ẹkekpan̄ade utu ke ndikan̄ mbuọtidem mmọ ẹdu ke 1992 Yearbook of Jehovah’s Witnesses, ke page 177. Ikọ oro ẹwetde ke idak ọdọhọ ete: “Mme iso oro nnyịn idoride enyịn ndikụt ke ediset ke n̄kpa.” Nso ifet ke edidi ntem ndifiọk mmọemi ye anana-ibat mmọ eken ẹmi ẹkewụtde ukem edinam akpanikọ oro ke ẹsobode n̄kpa!

¹⁸ Nso kaban̄a mbonima ye mme ufan nnyịn oro ke ntak usọn̄ m̀mê udọn̄ọ mîkemeke ndidu uwem mbe akwa ukụt? Nte ekemde ye idotenyịn ediset ke n̄kpa, mmọ ẹnyene utịbe utịbe ini iso edieke mmọ ẹkade iso ẹnam akpanikọ. Ndien edieke nnyịn n̄ko ye uko ikade iso ndiwụt mbuọtidem ke uwa ufak Jesus, nnyịn imenyene utịbe utịbe ini iso. Ntak-a? Koro, ukem nte Paul, nnyịn idot enyịn ke “nti owo ye mme idiọkowo ẹyeset ke n̄kpa.” Ke ofụri esịt nnyịn, nnyịn imọkọm Jehovah kaban̄a idotenyịn emi. Ke akpanikọ, onụk nnyịn nditiene ntịn̄ mme ikọ andiwet psalm ẹmi: “Ẹtịn̄ ubọn̄ [Abasi] ke otu mme idụt, ye mme utịben̄kpọ esie ke ofụri ererimbot. Koro Jehovah omokpon, onyụn̄ odotde nte ẹkpetorode enye etieti.”—Psalm 96:3, 4.

Nte Afo Emekeme Ndinam An̄wan̄a?

◻ Mme itien̄wed ewe ẹn̄wam ndisọn̄ọ mbuọtidem nnyịn ke ediset ke n̄kpa eke isọn̄?

◻ Ọkọn̄ọde ke nso ke ẹtebe mme Christian ikpe idahaemi?

◻ Didie ke idotenyịn ediset ke n̄kpa ọnọ nnyịn uko ye iwụk?

[Ndise ke page 9]

Ukem nte Paul, mme Christian oro ẹyetde aran ẹnyene idotenyịn ediset ke n̄kpa n̄ka heaven