Paul—“Anam-Utom” ye “Akama-Ukpọhọde”

4. Mme n̄wọrọnda ifetutom ewe ke Paul ekenyene?

⁴ Paul ekedi ọwọrọiso owo ke otu mme akpa Christian, ndien an̄wan̄a ntak ekedide ntre. Ke ini utom ukwọrọikọ esie, enye ama anam isan̄ ediwak kilomita ke mme itie tọsịn ke inyan̄ ye ke obot, enye ama onyụn̄ ọtọn̄ọ ata ediwak esop. Ke adianade do, Jehovah ama esinọ Paul mme n̄kukụt ye enọ editịn̄ ikọ ke usem. (1 Corinth 14:18; 2 Corinth 12:1-5) Enye ama ọnọ Paul odudu spirit n̄ko ndiwet leta 14 oro idahaemi ẹdide ubak N̄wed Abasi Christian Usem Greek. Nte an̄wan̄ade, ẹkeme ndidọhọ ke Paul ama anam utom akan kpukpru apostle eken.—1 Corinth 15:10.

5. Didie ke Paul okowụt ke imọ ikenyene ekikere oro adade ukem ukem iban̄a idem imọ?

⁵ Sia Paul akadade iso ke utom Christian, ndusụk owo ẹkeme ndidori enyịn ndikụt enye owụtde idem aban̄a uwọrọiso esie, idem atan̄de idem aban̄a odudu esie. Nte ededi, ikedịghe ntre koro Paul ama osụhọde idem. Enye okokot idemesie ‘andikpri n̄kan ke otu mme apostle,’ adiande ete: ‘Ndotke ndikere apostle, koro n̄kesịnde ufọk Abasi enyịn.’ (1 Corinth 15:9) Nte akani andikọbọ mme Christian, akananam Paul ikefreke ite ke okoto ke ntak mfọnido oro owo mîdotke kpọt ke imo ikekeme ndikam nnyenyene itie ebuana ye Abasi, itịn̄ke-tịn̄ iban̄a edinyene mme san̄asan̄a ifetutom. (John 6:44; Ephesus 2:8) Ntem, Paul ikekereke ite ke mme n̄wọrọnda edinam imọ ke utom ukwọrọikọ ẹma ẹnam imọ ifọn ikan mbon efen.—1 Corinth 9:16.

6. Didie ke Paul okowụt nsụkidem ke mme edinam esie ye mbon Corinth?

⁶ Ẹma ẹkụt nsụkidem Paul akpan akpan ke mme edinam esie ye mbon Corinth. Nte an̄wan̄ade, ndusụk mmọ ẹma ẹnen̄ede ẹma mbon oro mmọ ẹkebatde nte mme ọwọrọiso esenyịn, esịnede Apollos, Cephas, ye Paul ke idemesie. (1 Corinth 1:11-15) Edi Paul ikenyịkke-nyịk mbon Corinth ite ẹtoro imọ m̀mê enye ndikada uma mmọ nnam n̄kpọ ke idiọk usụn̄. Ke ini akakade ekese mmọ, enye ikasan̄ake “ye akan ikọ m̀mê ifiọk.” Utu ke oro, Paul eketịn̄ aban̄a idemesie ye mme nsan̄a esie ete: “Yak owo abat nnyịn ntem, ete nnyịn idi mme anam-utom Christ ye mme akama-ukpọhọde ndịbe-n̄kpọ Abasi.”a—1 Corinth 2:1-5; 4:1.

7. Didie ke Paul okowụt nsụkidem idem ke ini ọkọnọde item?

⁷ Paul ama akam owụt nsụkidem ke ini enye ọkọnọde ọkpọsọn̄ item ye ndausụn̄. Enye ekekpe mme ekemmọ Christian ubọk ke “mbọm Abasi” ye “ke ntak ima” utu ke ndida odudu apostle esie. (Rome 12:1, 2; Philemon 8, 9) Ntak emi Paul akanamde emi? Koro enye ekenen̄ede abat idemesie nte “andin̄wam” nditọete esie, idịghe nte ‘andikara mmọ ke n̄kpọ mbuọtidem.’ (2 Corinth 1:24) Eyịghe idụhe nte ke nsụkidem Paul akanam mme esop Christian akpa isua ikie ẹnen̄ede ẹma enye ntre.—Utom 20:36-38.