Nso Inụk Fi Ndinam N̄kpọ Abasi?

“Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.”—MARK 12:30.

1, 2. Nso mme aduai-owo-idem n̄kpọ ke ẹnam ke ebuana ye utom ukwọrọikọ?

IDỊGHE nte moto etiede ke enyọn̄ enyọn̄ kpọt ebiere ata ufọn oro enye enyenede. Benti oro ẹyetde ekeme ndinam enye eye ke enyọn̄ enyọn̄, ndien nsem nsem idem esie ekeme ndidụri udọn̄ owo oro oyomde ndidep enye; edi se idide ata akpan n̄kpọ ikan edi mme n̄kpọ oro owo mîsọpke ida ikụt—engine oro anamde moto oro asan̄a, ọkọrọ ye kpukpru n̄kpọ eken oro ẹnọde enye odudu.

² Ukem oro ke edi ye utom oro Christian anamde ọnọ Abasi. Mme Ntiense Jehovah ẹyọhọ ye utom Abasi. Ke isua kiet kiet, ẹsibiat se iwakde ikan biliọn hour kiet ke ndikwọrọ eti mbụk Obio Ubọn̄ Abasi. N̄ko-n̄ko, ẹnịm ediwak miliọn ukpepn̄kpọ Bible, ndien mbon oro ẹnade baptism ẹwak ẹsịm ediwak tọsịn ke mme itie ikie. Edieke afo edide anditan̄a eti mbụk, afo ama enyene udeme—idem ekpededi etie nte edi ekpri—ke aduai-owo-idem ibat emi. Ndien afo emekeme nditịm nnịm nte ke “Abasi ikwan̄ake nte efrede utom [fo] ye ima enyịn̄ Esie eke [afo] owụtde.”—Mme Hebrew 6:10.

3. Ke ẹsiode utom ẹfep nso ikpebehe mme Christian akpan akpan, ndien ntak-a?

³ Nte ededi, ata ufọn oro utom nnyịn enyenede—nte otu m̀mê nte owo kiet kiet—idịghe se ẹdomode ke ibat kpọt. Nte ẹkedọhọde Samuel, “owo [ese] enyịn, edi Jehovah ese esịt.” (1 Samuel 16:7) Ih, se nnyịn idide ke esịtidem edi akpan n̄kpọ ọnọ Abasi. Edi akpanikọ, mme utom ẹdi akpan n̄kpọ. Mme utom uten̄e Abasi ẹnam ukpepn̄kpọ Jehovah enyene uku onyụn̄ odụri mbon oro ẹdidide mme mbet ada. (Matthew 5:14-16; Titus 2:10; 2 Peter 3:11) Edi, mme utom nnyịn iyarakede ofụri se idude. Jesus oro ẹkenamde eset ke n̄kpa ama enyene ntak ndikere mban̄a esop ke Ephesus—kpa ye mbụk nti utom mmọ. Enye ọkọdọhọ mmọ ete: “Mmọfiọk mme utom fo . . . Edi mmenyene se ndade mbiom fi, emi ọkọkpọn̄de akpa ima fo.”—Ediyarade 2:1-4.

4. (a) Ke nso usụn̄ ke utom oro inamde inọ Abasi ekeme ndikabade ndi se ẹnamde sia onyụn̄ anade ẹnam? (b) Ntak oyomde owo odụn̄ọde idemesie?

⁴ N̄kpọndịk odu. Ke ndusụk ikpehe ini ama ekebe, utom oro nnyịn inamde inọ Abasi ekeme ndikabade ndi se ẹnamde sia onyụn̄ anade ẹnam. Christian an̄wan kiet eketịn̄ aban̄a enye ke usụn̄ emi ete: “Mma nsiwọrọ an̄wautom, n̄ka mme mbonoesop, n̄kpep n̄kpọ, mbọn̄ akam—edi n̄kanam kpukpru oro sia anade ẹnam, nnyeneke baba ntụk kiet.” Nte ededi, odot ẹtoro ikọt Abasi ke ini mmọ ẹsịn̄erede idem kpa ye oro etiede mmọ ke idem nte ‘ẹyịbi mmọ ẹduọk ke isọn̄’ m̀mê “ẹsụhọrede itie.” (2 Corinth 4:9; 7:6, NW) Edi, ke ini edinam ofụri ini nnyịn nte Christian akabarede edi edinam oro inamde sia onyụn̄ anade ẹnam, yak idọhọ ke oyom nnyịn idụn̄ọde engine nnyịn. Esiyom ẹdiọn̄ moto oro akam ọfọnde akan ke ini ke ini; ukem ntre, oyom kpukpru Christian ẹsidụn̄ọde idemmọ ofụri ini. (2 Corinth 13:5) Mbon en̄wen ẹkeme ndikụt mme utom nnyịn, edi mmọ ikemeke ndifiọk se inụkde nnyịn ndinam mme n̄kpọ. Ke ntre, nnyịn owo kiet kiet ikpenyene ndikere mban̄a mbụme emi: ‘Nso inụk mi ndinam n̄kpọ Abasi?’

Mme N̄kpọ Ẹsibiọn̄ọde Nnennen Uduak

5. Ewe ibet ke Jesus ọkọdọhọ nte edide ebeiso?

⁵ Ke ini ẹkebụpde enye m̀mê ewe ke otu mme ibet oro ẹkenọde Israel edi ebeiso, Jesus ama okot oto ewụhọ oro mîkọkọn̄ọke ke nte owo etiede ke enyọn̄ enyọn̄ idem, edi emi ọkọkọn̄ọde ke uduak esịt: “Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:28-30) Jesus ke ntem ama owụt se ikpedide odudu oro onụkde nnyịn ndinam n̄kpọ Abasi—ima.

6, 7. (a) Ke nso usụn̄ ke Satan ke n̄kari an̄wana ye ekpụk ubon, ndien ntak-a? (2 Corinth 2:11) (b) Didie ke ukpep ẹnọde owo ke ini uyen ekeme nditụk edu owo kaban̄a odudu ukara Abasi?

⁶ Satan oyom ndibiọn̄ọ ukeme nnyịn ndikọri akpan edu edide ima. Man anam emi, usụn̄ kiet oro enye akamade edi ndin̄wana ye ekpụk ubon. Ntak-a? Koro edi mi ke akpa ye mbịghi-n̄kan edu oro nnyịn inyenede kaban̄a ediwụt ima ọtọn̄ọ. Satan otịm ọfiọk edumbet Bible oro nte ke se ẹkpepde ke ini uyen ekeme ndinyene ufọn ke owo ama okokpon. (Mme N̄ke 22:6) Enye ke n̄kari esidomo ndibiat ekikere nnyịn kaban̄a ima ke ntọn̄ọ ntọn̄ọ isua emana. Nte “abasi eyo emi,” Satan esikụt ke ẹtịm ẹnam uduak imọ ke ini ediwak owo ẹkọride ke mme ufọk oro mîdịghe ebiet ẹwụtde ima edi ẹdide mme an̄waekọn̄ emi ndotndot ekikere, iyatesịt, ye ikọ isụn̄i ẹdude.—2 Corinth 4:4; Ephesus 4:31, 32; 6:4, ikọ idakisọn̄ NW; Colossae 3:21.

⁷ N̄wed oro Ndinam Uwem Ufọk Fo Enem ọdọhọ ete ke usụn̄ oro ete esede aban̄a utom esie nte ete “ekeme ndinyene ata akpan n̄kpọ ndinam ke nte nditọ esie ẹdisede odudu ukara ke ini iso, edide eke owo ye onyụn̄ edide eke Abasi.”a Eren Christian kiet oro ọsọn̄ido ete akakamade ke ọkpọsọn̄ ubọk onyịme ete: “Ye ami, ndikop uyo nnọ Jehovah edi mmemmem n̄kpọ; ndima enye edi ata ọkpọsọn̄ n̄kpọ.” Nte ededi, n̄kopuyo edi akpan n̄kpọ, koro ke enyịn Abasi “n̄kopuyo ọfọn akan uwa.” (1 Samuel 15:22) Edi nso ikeme ndin̄wam nnyịn inam n̄kpọ ibe sụk edikop uyo inyụn̄ ikọri ima inọ Jehovah nte odudu oro onụkde nnyịn ndituak ibuot?

“Ima Christ Efefịk Nnyịn”

8, 9. Didie ke uwa ufak Jesus ekpedemede ima oro nnyịn inyenede inọ Jehovah?

⁸ N̄kponn̄kan n̄kpọ ndinụk owo ọkọri ima ofụri esịt ọnọ Jehovah edi ediwụt esịtekọm ke uwa ufak Jesus Christ. “Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye.” (1 John 4:9) Ndondo oro nnyịn ifiọkde iban̄a inyụn̄ iwụtde esịtekọm inọ enye, edinam ima emi edemede ediwụt ima. “Nnyịn ima ima, koro [Jehovah] ekebemde iso ama nnyịn.”—1 John 4:19.

⁹ Jesus ke unyịmesịt ama ọbọ utom esie ndinam n̄kpọ nte Andinyan̄a owo. “Nnyịn ida emi ifiọk ima, koro Enye akayakde uwem Esie ọnọ kaban̄a nnyịn.” (1 John 3:16; John 15:13) Ima n̄waidem Jesus ekpenyene ndinụk nnyịn ndinam n̄kpọ ye esịtekọm. Ke ndinam an̄wan̄a: Yak idọhọ ke ẹkenyan̄a fi ẹsio ke n̄kpa mmọn̄. Nte afo akpadaha ntre ọnyọn̄ ufọk, ọkọkwọhọrede idem, onyụn̄ efre aban̄a oro? Ke akpanikọ ukpanamke! Afo ekpekere ke imakama owo oro akanyan̄ade imọ isọn. Idem n̄kpọ, afo amakama owo oro isọn uwem fo. Nte nnyịn imakama Jehovah Abasi ye Jesus Christ se ikpride ikan oro? Ke ufak mîkpodụhe, yak idọhọ ke mmọn̄ akpada nnyịn owo kiet kiet, ke idiọkn̄kpọ ye n̄kpa. Utu ke oro, ke ntak akwa edinam ima emi, nnyịn imenyene idotenyịn edidu uwem ke nsinsi ke paradise isọn̄.—Rome 5:12, 18; 1 Peter 2:24.

10. (a) Didie ke nnyịn ikeme ndinam ufak edi n̄kpọ oro ebehede nnyịn san̄asan̄a? (b) Didie ke ima Christ efịk nnyịn?

¹⁰ Tie kere ban̄a ufak emi. Da enye nte se ibehede fi san̄asan̄a, nte Paul akanamde: “Uwem eke ndude ke obụkidem kemi, ke ndu ke mbuọtidem, kpa mbuọtidem eke nnyenede ye Eyen Abasi, emi akamade mi, okonyụn̄ ayakde Idemesie ọnọ aban̄a mi.” (Galatia 2:20) Utọ editie n̄kere oro eyedemede uduak ofụri esịt nnyịn, koro Paul ekewet ọnọ mbon Corinth ete: “Ima Christ efefịk nnyịn; koro . . . Enye okonyụn̄ akpa aban̄a kpukpru owo, man mme oduuwem ẹkûdu uwem aba ẹnọ idemmọ, edi ẹdu uwem ẹnọ Enyeemi akakpade aban̄a mmọ, onyụn̄ esetde.” (2 Corinth 5:14, 15) The Jerusalem Bible ọdọhọ ete ke ima Christ “ofofụk nnyịn.” Ke ini nnyịn ikerede iban̄a ima Christ, enye enyịk, enen̄ede onụk, onyụn̄ ofụk nnyịn. Enye otụk nnyịn esịt onyụn̄ onụk nnyịn ndinam n̄kpọ. Nte edikabade eke J. B. Phillips etịn̄de enye ke ibio ibio usụn̄, “ata ebiet oro edinam nnyịn otode edi ima Christ.” Nte ẹwụtde ke uwụtn̄kpọ aban̄ade mme Pharisee, n̄kpọ efen ekededi oro onụkde owo anam n̄kpọ ikemeke ndision̄o mbun̄wụm oro ebịghide ke nsinsi.

“Ẹtịn̄ Enyịn Ẹkpeme Idem Mbak Leaven Mme Pharisee”

11. Tịn̄ edu mme Pharisee kaban̄a mme utom ido ukpono.

¹¹ Mme Pharisee ẹma ẹbiat kpukpru n̄kpọ oro ẹkpekenamde utuakibuot Abasi enyene inem ẹfep. Utu ke ndidori nsọn̄uyo ke ima ẹnyenede ẹnọ Abasi, mmọ ẹkesọn̄ọ ẹtịn̄ ẹban̄a utom nte se ẹdade ẹbiere idaha eke spirit owo. Mmọ ndikesịn idem n̄kaha ke mme n̄kpatan̄a n̄kpọ ibet ama anam mmọ ẹtie nte ndinen owo ke enyọn̄ enyọn̄, edi ke esịt esịt mmọ “[ẹkeyọhọ] ye mme okpo mme akpan̄kpa ye kpukpru ndek.”—Matthew 23:27.

12. Ke Jesus ama ọkọkọk eren kiet, didie ke mme Pharisee ẹkewụt ke idi mbon nsọn̄esịt?

¹² Ini kiet Jesus ke mbọm ama ọkọk eren kiet oro ubọk akakpade. Anaedi owo emi okokop idatesịt didie ntem ndidi se ẹnamde udọn̄ọ oro, nte eyịghe mîdụhe, akanamde enye okop ọkpọsọn̄ ndutụhọ ke ikpọkidem ye ke ntụk okụre ke idaha kiet! Edi, mme Pharisee ikadarake ye enye. Utu ke oro, mmọ ẹma ẹkụt ndudue ẹnọ ke mme n̄kpatan̄a n̄kpọ eke ibet—nte ke Jesus akan̄wam owo ke Sabbath. Sia ẹkesịnde idem ẹkaha ke ndidụn̄ọde mme n̄kpatan̄a n̄kpọ Ibet, mme Pharisee ẹma ẹfụmi se ikedide uduak Ibet ofụri ofụri. Eyịghe idụhe Jesus ‘okofụhọde aban̄a nsọn̄esịt mmọ’! (Mark 3:1-5) N̄ko-n̄ko, enye ama odụri mme mbet esie utọn̄ ete: “Ẹtịn̄ enyịn ẹkpeme idem mbak leaven mme Pharisee ye mme Sadducee.” (Matthew 16:6) Ẹyarade mme edinam ye edu mmọ ke Bible kaban̄a ufọn nnyịn.

13. Nso ke nnyịn ikpep ito uwụtn̄kpọ mme Pharisee?

¹³ Uwụtn̄kpọ mme Pharisee ekpep nnyịn ete ke akpana nnyịn inyene ekikere adade ukem ukem kaban̄a utom. Ke akpanikọ, utom ẹdi akpan n̄kpọ, koro “mbuọtidem eke mîsan̄ake ye utom amakpa.” (James 2:26, NW) Nte ededi, mme anana mfọnmma owo ẹnyene ntụhọ edibiere ikpe nnọ mbon en̄wen ke se mmọ ẹnamde utu ke se mmọ ẹdide. Ndusụk ini, nnyịn imakam ikeme ndibiere ikpe nnọ idem nnyịn ke usụn̄ emi. Nnyịn imekeme ndikam nnọ ntịn̄enyịn n̄kaha ke utom, nte n̄kpọ eke ẹdọhọde ke emi edi n̄kukụre se ẹyomde kaban̄a nsọn̄idem eke spirit nnyịn. Nnyịn imekeme ndifre nte edide akpan n̄kpọ ndidụn̄ọde uduakesịt nnyịn. (Men 2 Corinth 5:12 domo.) Nnyịn imekeme ndikabade ndi mbon oro ẹsọn̄ọde ẹyịre ke ibet ẹkaha ẹmi “ẹdụhọrede nsụn̄ ẹsio, ẹnyụn̄ ẹmen camel,” inịmde mme ikọ ibet ke adan̄aemi ibiatde uduak esie.—Matthew 23:24.

14. Didie ke mme Pharisee ẹketie nte ndedehe cup m̀mê usan?

¹⁴ Se mîkan̄wan̄ake mme Pharisee edi nte ke edieke owo enen̄erede ama Jehovah, mme edinam uten̄e Abasi ẹdidi ndammana n̄kpọ. Idaha eke spirit esito esịtidem ọkọri ọwọrọ edi. Jesus ama ọsọn̄ọ asua ọnọ mme Pharisee ke ukwan̄ ekikere mmọ ke afan̄ emi, ọdọhọde ete: “Eyedọdiọk ọnọ mbufo, mme scribe ye mme Pharisee, mbon mbubịk! koro mbufo ẹyetde edem cup ye usan asana, edi esịt mmọ ẹyọhọ ye un̄wo ye unana ufat ke idem. Afo nnan Pharisee, bemiso yet esịt cup ye usan asana, man edem esie onyụn̄ akabade asana n̄ko.”—Matthew 23:25, 26.

15. Nọ mme uwụtn̄kpọ ndiwụt ke Jesus esise ebe nte owo etiede ke enyọn̄ enyọn̄?

¹⁵ Nte cup, usan, m̀mê idem ufọk etiede ke enyọn̄ enyọn̄ iyarakede kpukpru n̄kpọ ẹban̄ade enye. Uten̄e ama omụm mbet Jesus aban̄a uyai temple Jerusalem, emi Jesus okokotde “itie mbon n̄wo” ke ntak se ikakade iso ke esịt esie. (Mark 11:17; 13:1) Se ikotịbede inọ temple otịbe ọnọ ediwak miliọn owo oro ẹdọhọde ke idi Christian, nte mbụk Christendom owụtde. Jesus ama etịn̄ ete ke imọ iyekpe ikpe inọ ndusụk owo oro ẹkenamde “ediwak n̄kpọ odudu” ke enyịn̄ imọ nte “mme anam ukwan̄n̄kpọ.” (Matthew 7:22, 23) Ke edide ata isio ye oro, enye ama etịn̄ aban̄a ebeakpa oro eketịpde ata ekpri usụhọde ibat okụk esịn ke temple ete: “Ubuene ebeakpa emi ama esịn akan kpukpru mmọemi ẹkesịnde okụk ke usịn-etịbe . . . Enye ama osio kpukpru se enye enyenede ke unana esie ọnọ, kpa ofụri se enye akpadade odu uwem.” (Mark 12:41-44) Nte emi edi ukwan̄ ubiereikpe? Baba-o. Ke idaha mbiba ẹmi, Jesus okowụt ekikere Jehovah. (John 8:16) Enye ama okụt se ikedide uduak kaban̄a mme utom oro ẹkenamde onyụn̄ ọnọ ubiereikpe nte ekemde.

“Owo Kiet Kiet Nte Ukeme Esie Edide”

16. Ntak emi mîyomke nnyịn kpukpru ini idomo se nnyịn inamde ye eke Christian efen-e?

¹⁶ Edieke uduakesịt nnyịn ẹdide nti, ufọn idụhe ndinam ndomoidem kpukpru ini. Ke uwụtn̄kpọ, eti utịp iwakke ndidu ke ini ẹdade ndomoidem ẹn̄wana ndibiat ukem ini oro Christian efen abiatde ke utom ukwọrọikọ m̀mê ndidomo ndinam ukem se enye anamde ke ukwọrọikọ. Jesus ọkọdọhọ ete ama Jehovah ke ofụri esịt, ekikere, ukpọn̄, ye odudu fo—idịghe ke eke owo efen. Mme ukeme, odudu unam n̄kpọ, ye mme idaha owo kiet kiet ẹkpụhọde. Edieke idaha fo ayakde, ima eyenụk fi ndibiat ekese ini ke utom ukwọrọikọ—idem ndusụk nte asan̄autom asiakusụn̄ uyọhọ ini. Nte ededi, edieke afo an̄wanade ndiyọ udọn̄ọ, ini oro afo abiatde ke utom ukwọrọikọ ekeme ndikpri n̄kan se afo akpamade ndibiat. Kûyak idem emem fi. Owo idaha ibat hour ibiere edinam akpanikọ nnọ Abasi. Ke enyenede edisana uduakesịt, afo eyenyene ntak ndidat esịt. Paul ekewet ete: “Yak owo kiet kiet odomo utom esie ọfiọk, ekem enye eyenyene se enye obụrede aban̄a ke idemesie ikpọn̄, idibụreke ke idem owo en̄wen.”—Galatia 6:4.

17. Ke ikọ idemfo, bụk n̄ke aban̄ade talent ibio ibio.

¹⁷ Kere ban̄a n̄ke Jesus aban̄ade talent, oro ẹwetde ke Matthew 25:14-30. Owo oro okoyomde ndika isan̄ ke idụt efen ama okot ifịn esie ẹdi onyụn̄ ayak inyene esie ọnọ mmọ. “Enye ọnọ owo kiet talent ition, ọnọ owo efen iba, ọnọ owo efen kiet; ọnọ owo kiet kiet nte ukeme esie edide.” Ke ini eteufọk ọkọnyọn̄de edi ndinam ibat ye ifịn esie, nso ke enye okokụt? Ofụn oro ẹkenọde talent ition ama odori talent ition efen. Kpasụk ntre, ofụn oro ẹkenọde talent iba ama odori talent iba efen. Ofụn oro ẹkenọde talent kiet ama obụk enye ke isọn̄ inyụn̄ inamke n̄kpọ ndomokiet ndinam inyene eteufọk esie ọtọt. Didie ke eteufọk ekese idaha oro?

18, 19. (a) Ntak emi eteufọk mîkemenke ofụn oro ẹkenọde talent iba idomo ye ofụn oro ẹkenọde talent ition? (b) Nso ke n̄ke aban̄ade talent ekpep nnyịn aban̄a itoro ye edimen owo ndomo ye owo? (c) Ntak emi ẹkebiomde ọyọhọ ofụn ita oro ikpe?

¹⁸ Akpa, ẹyak nnyịn ikere iban̄a ifịn oro ẹkenọde talent ition ye iba ke adiana ke adiana. Eteufọk ọkọdọhọ kiet kiet ke otu ifịn oro ete: “Omotịm anam, afo eti asan̄autom ye owo akpanikọ.” Nte enye ekpeketịn̄ ntem ye ofụn oro ẹkenọde talent ition edieke ekpedide enye okodori talent iba kpọt? Etie nte ikpeketịn̄ke! Ke n̄kan̄ eken, enye ikọdọhọke ofụn oro okodoride talent iba ite: ‘Ntak emi afo mûkodorike talent ition? Kamse, omokụt ekemmọ ofụn nte afo ye udori emi enye anamde ọnọ mi!’ Baba, ima ima eteufọk, oro adade aban̄a Jesus, ikemenke owo kiet idomo ye eken. Enye ọkọnọ talent “owo kiet kiet nte ukeme esie edide,” enye ikonyụn̄ iyomke se ikande se owo kiet kiet ekemede ndinọ. Ẹkenọ ifịn iba oro ukem itoro, koro mmọ mbiba ẹma ẹnam utom ke ofụri ukpọn̄ ẹnọ eteufọk mmọ. Kpukpru nnyịn imekeme ndikpep n̄kpọ nto emi.

¹⁹ Nte ededi, owo ikotoroke ọyọhọ ofụn ita. Ke akpanikọ, ẹma ẹtop enye ẹduọk ke ekịm ke an̄wa. Sia ọkọbọde talent kiet kpọt, owo ikpodorike enyịn enye ndinam udori awakde nte ofụn oro ẹkenọde talent ition. Nte ededi, enye ikakam idomoke-domo ukeme! Ubiomikpe esie ekenen̄ede oto ntak edu ‘idiọk ifu’ esie, emi okowụtde unana edinyene ima nnọ eteufọk esie.

20. Didie ke Jehovah ese mme mmeme nnyịn?

²⁰ Jehovah odori enyịn nnyịn owo kiet kiet ndima enye ke ofụri odudu nnyịn, edi edi n̄kpọ nsịnudọn̄ didie ntem nte ke “enye [ọfiọk] nte iborode, emeti ete ke nnyịn idi ntan”! (Psalm 103:14) Mme N̄ke 21:2 ọdọhọ ete ke “Jehovah odomo esịt”—idomoke ibat. Enye ọfiọk mme mmeme ekededi oro nnyịn mîkemeke ndikara, edide mmọ ẹdi eke okụk, eke ikpọkidem, eke ntụk, m̀mê ekededi. (Isaiah 63:9) Ke ukem ini oro, enye odori enyịn nnyịn ndida kpukpru n̄kpọ oro nnyịn inyenede nnam n̄kpọ nte ikekeme. Jehovah edi mfọnmma, edi ke ini enye anamde n̄kpọ ye mme andituak ibuot nnọ enye oro ẹdide mme anana mfọnmma, enye idịghe oyom mfọnmma. Enye inamke n̄kpọ ye unana eti ibuot ke mme edinam esie m̀mê ndiyom se ikponde ikan ukeme owo.

21. Edieke ima onụkde nnyịn ndinam utom Abasi, nso nti utịp ẹdisụn̄ọ?

²¹ Ndima Jehovah ke ofụri esịt, ukpọn̄, ekikere, ye odudu nnyịn “omotịm okpon akan kpukpru edifọp enọ ye uwa.” (Mark 12:33) Edieke ima onụkde nnyịn, do nnyịn iyenam kpukpru se ikekeme ke utom Abasi. Peter ekewet ete ke edieke mme edu Abasi, esịnede ima, “ẹdude ke esịt mbufo ọyọhọ ọyọhọ, mmọ ẹyenam mbufo ẹkûtie ifu, ẹkûnyụn̄ ẹnana mfri ke edifiọk Ọbọn̄ nnyịn Jesus Christ.”—2 Peter 1:8.

[Mme Ikọ idakisọn̄]

Ke Ndinam Ndụn̄ọde

◻ Nso ikpedi odudu oro onụkde nnyịn ndinam utom Abasi?

◻ Didie ke ima Christ efịk nnyịn ndinam n̄kpọ Jehovah?

◻ Nso n̄kpọ oro mme Pharisee ẹkesịnde idem ẹkaha ke ana nnyịn ifep?

◻ Ntak mîwụtke ifiọk ndikaiso ndomo utom nnyịn ye eke Christian efen-e?

[Mme ndise ke page 16]

Ukeme, odudu unam utom, ye mme idaha owo kiet kiet ẹkpụhọde