Ntọt M’ọkwọrọ Obio Ubọn̄
Enye Ama Okụt ‘Pearl Emi Okponde Ekọmurua’
“OBIO ubọn̄ Heaven ebiet owourua eke oyomde ndiye pearl; ndien ke enye ama okụt pearl kiet emi okponde ekọmurua, aka akanyam kpukpru se enye enyenede, edep pearl kiet oro.” Ye mme ikọ ẹmi, Jesus ama owụt akakan ekọmurua oro Obio Ubọn̄ Abasi enyenede. (Matthew 13:45, 46) Mbon oro ẹfiọkde nte Obio Ubọn̄ ọsọn̄de urua ẹsiwak ndinam ikpọ n̄waidem ke idemmọ man otodo ẹnyene enye. Ifiọkutom etienede mi otode Pingtung County, Taiwan, owụt emi.
Ke 1991, Ete ye Mma Lin ẹma ẹtọn̄ọ ndikpep Bible ye Mme Ntiense Jehovah. Ke ini ọkwọrọ ederi n̄kann̄kụk okokụtde emi, enye ama odomo ndinam mmọ ẹdụk ufọkabasi esie. Sia mme Lin ẹkenamde mbubehe unyam iyịp edi ye eke unen mbakara ke urua n̄kann̄kụk, mmọ ẹma ẹbiere ndibụp ọkwọrọ ederi oro se idide ekikere esie ke n̄kpọ emi. “Kpukpru n̄kpọ oro Abasi okobotde ẹkeme ndidi udia nnọ owo,” ntre ke enye ọkọbọrọ. Ke n̄kan̄ eken, Mme Ntiense ẹma ẹsịn udọn̄ ẹnọ mmọ ndikere mban̄a se Ikọ Abasi etịn̄de. Mmọ ẹma ẹkpep nte ke Jehovah Abasi ese iyịp ke edisana, koro “uwem edibotn̄kpọ edi iyịp esie.” (Leviticus 17:10, 11, The New English Bible) Ke ntre ana mme ata Christian “ẹbet . . . iyịp.” (Utom 15:20, NW) Nte utịp edidụn̄ọde N̄wed Abasi ke n̄kpọ emi, mme Lin ẹma ẹbiere nditre ndinyam iyịp, idem okposụkedi enye ekedide akpan ebiet oro okụk mmọ okotode. Ke esisịt ini, nte ededi, mmọ ẹma ẹsobo udomo efen oro okokponde akan.
Mbemiso ẹkekpepde akpanikọ, mme Lin ẹma ẹtọ etak isịp betel 1,300 ke in̄wan̄ mmọ. Okposụkedi ekenyenede ndida isua ition mbemiso mme eto ẹmi ẹsion̄ode udori, ndondo oro mmọ ẹn̄wụmde ọyọhọ mbun̄wụm, mme Lin ẹkpedori enyịn ndinyene $77,000 ke isua kiet kiet. Nte ini akpa idọk akasan̄ade ekpere, mme Lin ẹkenyene ndinam akpan ubiere. Mmọ ẹma ẹkpep ẹto ukpepn̄kpọ Bible mmọ nte ke ana mme Christian ẹnịm idemmọ ẹsana ẹbọhọ “kpukpru se isabarede obụkidem ye spirit” ebe ke ndifep ndida, mme ndisịn udọn̄ nnọ, mme utọ ndedehe eduuwem nte edida un̄wọn̄, edida n̄kpọsọn̄ ibọk ke idiọk usụn̄, ye edita isịp betel. (2 Corinth 7:1) Nso ke mmọ ẹdinam?
Ke ntak mfịghe otode ubieresịt, Ete Lin ama ebiere nditre ukpepn̄kpọ esie. Kan̄a kemi, Mma Lin ama anyam isịp betel ẹtode ata n̄kani etak isịp mmọ onyụn̄ adia udori ebede $3,000. Emi ekedi sụk ntabinse ke se ididide ke mîbịghike edieke mmọ ẹyakde mme eto mmọ ẹda. Nte ededi, ubieresịt Ete Lin ama aka iso ndimia enye ufen.
Enye ama an̄wana ye ekikere emi tutu usen kiet enye ama ọdọhọ Mme Ntiense n̄kann̄kụk ẹkek mme isịp betel imọ ẹduọn̄ọ ẹnọ imọ. Mme Ntiense oro ẹma ẹnam an̄wan̄a ẹte ke edi ubiere emi enye enyenede ndinam; ke ntre, enye enyene “ndibiom mbiomo idemesie” nnyụn̄ n̄kek mme eto oro ke idemesie. (Galatia 6:4, 5) Mmọ ẹma ẹsịn udọn̄ ẹnọ enye nditi un̄wọn̄ọ oro ke 1 Corinth 10:13, emi ọdọhọde ete: “Idomo ikesịmke mbufo ibọhọke se inade owo ndibiom; edi Abasi edi akpanikọ, idinyụn̄ iyakke ẹdomo mbufo ẹbe se ukeme mbufo edide; edi Enye ayasiak usụn̄ ubọhọ ọnọ mbufo ke ufọt idomo, man mbufo ẹkeme ndibiom enye.” Mme Ntiense oro n̄ko ẹma ẹkọk ibuot ye enye, ẹdọhọde: “Edieke nnyịn ikekde mme eto ẹmi iduọn̄ọ inọ fi, afo emekeme nditua n̄kpọfiọk onyụn̄ ọduọhọ nnyịn kaban̄a se itakde.” Esisịt ini ke ukperedem, uyom masịn ukeketo ama edemede Mma Lin ke usenubọk usen kiet. Ebe ye nditọ esie ke ẹkekek isịp betel!
Ete Lin ama okụt ete ke Jehovah esinam un̄wọn̄ọ Esie. Enye ama enyene utom oro ọkọnọde enye eti ubieresịt, anamde enye ekeme ndikabade ndi anditoro Jehovah. Enye ama ana baptism ke mbono circuit Mme Ntiense Jehovah ke April 1996.
Ih, Ete Lin ke nditịm ntịn̄ ‘ama anyam kpukpru se enye ekenyenede’ onyụn̄ edep ‘pearl emi okponde ekọmurua.’ Idahaemi enye enyene ata ọsọn̄urua ifet ndinyene ọkpọkpọ itie ebuana ye Jehovah Abasi ye edinam utom kaban̄a ufọn n̄kpọ Obio Ubọn̄ Esie.