N̄wed oro Paul ekewetde ọnọ ẹsọk mbon Corinth owụt ete ke enye ke akpa ama ewet mmọ ete “ẹkûdụk ndụk ye mbon use.” Enye ekenyene ndidọhọ mmọ ẹsio anam use oro mîkakabakede esịt ẹfep ke otu mmọ. Ih, Paul ama ewet mmọ ọkpọsọn̄ leta, anamde ntre “ye ediwak mmọn̄-eyet.” (1 Corinth 5:9-13; 2 Corinth 2:4) Kan̄a ke emi, ẹma ẹnọ Titus aka Corinth akan̄wam ke etịbe oro ẹketịpde do ke ufọn mme Christian ẹtode Judea oro ẹkedude ke unana. Eyedi, ẹkenọ enye n̄ko aka ekese nte mbon Corinth ẹkenamde n̄kpọ ẹban̄a leta Paul.—2 Corinth 8:1-6.

Nso kaban̄a ikpehe utom Titus enye eken ke Corinth—editịm etịbe ke ufọn ikọt Abasi ke Judea? Titus ama anam n̄kpọ aban̄a oro n̄ko, nte ẹkemede ndikụt ke ntọt emi ẹkụtde ke 2 Corinth. Eyedi ẹkewet leta oro ke Macedonia ke ini idọk eke 55 E.N., ke mîbịghike nte Titus ye Paul ẹkesobo. Paul ekewet ete ke ẹma ẹnọ Titus, oro ọkọtọn̄ọde etịbe oro, ke emi ye mme andin̄wam iba oro owo mîsiakke enyịn̄ ẹfiak ẹka man ẹkekụre utom oro. Sia ekenyenede udọn̄ esịt akpanikọ ke idem mbon Corinth, Titus ama enen̄ede enyịme ndifiak n̄ka. Nte Titus akafiakde aka Corinth, ekeme ndidi enye ekemen udiana leta oro Paul akadade odudu spirit ewet ọsọk mbon Corinth.—2 Corinth 8:6, 17, 18, 22.