Wụri Kpukpru Ekikere Emi Ẹbiọn̄ọde Ifiọk Abasi!

1. Nso ke apostle Paul okodụri mme Christian emi ẹma ẹkeyet aran utọn̄ aban̄a?

ENYENE se apostle Paul okodụride mme owo utọn̄ ete ẹtre. Nso ke ekedi? Enye ọkọdọhọ mmọ “ẹtre ndibiet editịm n̄kpọ emi.” (Rome 12:2) Paul eketịn̄ ikọ oro ọnọ mme Christian eyo esie. Nditọete oro ẹma ẹyak idem ẹnọ Abasi, ẹma ẹnyụn̄ ẹda edisana spirit ẹyet mmọ aran. Nso ikanam Paul ọnọ mmọ utọ ọkpọsọn̄ item oro?—Rome 1:7.

2-3. Didie ke Satan odomo ndinam ikpọn̄ Jehovah, edi nso ikeme ndin̄wam nnyịn ision̄o ndiọi n̄kpọ emi ‘ẹdọn̄de n̄kam’ ke ekikere nnyịn?

² Se ikanamde Paul odụri nditọete oro utọn̄ ekedi ke se ndusụk mmọ ẹkekerede ikọfọnke, mmọ ẹkenyụn̄ ẹtiene ekikere mbon ererimbot Satan. (Eph. 4:17-19) Utọ n̄kpọ emi ekeme ndiwọrọ owo nnyịn ekededi. Satan emi edide andikara ererimbot emi ke etịme ke mbrenyịn ndinam nnyịn ikpọn̄ Jehovah, enye ke ada nsio nsio usụn̄ odomo ndinam emi. Edieke ọdọn̄de nnyịn ndidi n̄kpọ m̀mê ndiwọrọ etop, Satan esidomo ndida oro nnam ikpọn̄ Jehovah. Enye akam ekeme ndida ndusụk n̄kpọ emi ikekpepde ke ufọk, ke ufọkn̄wed, ye se ẹsinamde ke edem nnyịn nnam ikere n̄kpọ nte enye amade.

³ Ndi imekeme ndisio mme n̄kpọ emi ‘ẹma ẹkesọn̄ọ ẹdọn̄ n̄kam’ ke ekikere nnyịn? (2 Cor. 10:4) Apostle Paul ọbọrọ ete: “Nnyịn iwụri mme ekikere ye kpukpru n̄kpọ eke ẹkon̄de ẹnyụn̄ ẹmenerede idem ke enyọn̄ ẹbiọn̄ọ ifiọk Abasi; ndien nnyịn imụm kpukpru ekikere nte mbuotekọn̄ inam ẹsụk ibuot ẹnọ Christ.” (2 Cor. 10:5) Jehovah ekeme ndin̄wam nnyịn itre ndiọi n̄kpọ ekededi. Ukem nte edide owo ọkpọn̄wọn̄ ibọkn̄kpa ẹda nsụkibọk ẹbiat ide ibọk oro, ntre ke ikeme ndida Ikọ Abasi mbiat ndiọi n̄kpọ emi ererimbot Satan akanamde ẹmehe nnyịn tutu ọsọn̄ nnyịn nditre.

‘ẸNAM EKIKERE MBUFO EDI OBUFA’

4. Nso ke akana ediwak nnyịn inam akpa ini emi ikọdiọn̄ọde akpanikọ emi Bible ekpepde?

⁴ Ti nsio nsio n̄kpọ emi akanade okpụhọde akpa ini emi afo ọkọdiọn̄ọde akpanikọ emi Bible ekpepde onyụn̄ ebierede ndinam n̄kpọ Jehovah. Enyene ndusụk ndiọi n̄kpọ emi akanade ediwak nnyịn itre. (1 Cor. 6:9-11) Imenen̄ede ikọm Jehovah nte enye akan̄wamde nnyịn itre utọ ndiọi n̄kpọ oro!

5. Ewe n̄kpọ iba ke Rome 12:2 ọdọhọ inam?

⁵ Edi inaha ikere ke imokụre uwa; ke inyeneke se anade ikpụhọde aba. Kpa ye emi edide ima itre ikpọ idiọkn̄kpọ mbemiso inade baptism, ana isụk ika iso isịn idem inam n̄kpọ mbak nnyịn idiyak n̄kpọ ndomokiet anam ifiak ikọdọn̄ ubọk ke se ima iketre. Didie ke ikpanam oro? Paul ọbọrọ ete: “Ẹtre ndibiet editịm n̄kpọ emi, edi ẹkpụhọde oto ke edinam ekikere mbufo edi obufa.” (Rome 12:2) Ikọ esie owụt ke ana inam n̄kpọ iba. Akpa, ana ‘itre ndibiet editịm n̄kpọ emi,’ oro edi, itre ndiyak mbon ererimbot emi ẹnam nnyịn inam n̄kpọ nte mmọ. Ọyọhọ iba, ana ‘ikpụhọde’ ke ndinam ekikere nnyịn edi obufa, oro ọwọrọ ndikpụhọde nte isikerede n̄kpọ.

6. Nso ke ikọ Jesus ke Matthew 12:43-45 ekpep nnyịn?

⁶ Ukpụhọde oro Paul eketịn̄de aban̄a ikụreke ke sụk se mme owo ẹkụtde ke enyịn. Ana ikpụhọde ke kpukpru usụn̄. (Se ekebe emi “Ndi Omokpụhọde M̀mê Ededịp N̄kem?”) Ana ikpụhọde nte isinamde n̄kpọ, nte isikerede n̄kpọ, ye nte isidade n̄kpọ. Ntre edi se kpukpru nnyịn ibụpde idem nnyịn ite, ‘Ndi se n̄kpụhọrede ke uwem mi man n̄kpebe Christ edi n̄kpọ enyịn owo kpọt m̀mê enen̄ede oto mi esịt?’ Ata akpan mbụme edi emi. Jesus ama etịn̄ se ikpanamde ke Matthew 12:43-45. (Kot.) Itie Bible emi ekpep nnyịn akpan n̄kpọ emi: Ikụreke ke ndision̄o ndiọi ekikere ke esịt nnyịn; ana idọn̄ nti ekikere iyọhọ ufan̄ oro.

“ẸKABADE ẸDI OBUFA KE ODUDU ORO ANAMDE UTOM KE EKIKERE MBUFO”

7. Didie ke ikeme ndikpụhọde utọ owo emi inen̄erede idi?

⁷ Ndi imekeme ndikpụhọde nte isikerede n̄kpọ m̀mê utọ owo emi inen̄erede idi? Ikọ Abasi owụt ke imekeme. Bible ọdọhọ ete: “Yak mbufo ẹkabade ẹdi obufa ke odudu oro anamde utom ke ekikere mbufo, ẹnyụn̄ ẹmen obufa owo ẹsịne emi ẹkebotde ekekem ye uduak Abasi ke ata edinen ido ye akpanikọ.” (Eph. 4:23, 24) Ntre imekeme ndikpụhọde utọ owo emi inen̄erede idi, edi isimemke. Ikụreke ke nnyịn ndidi ndiọi n̄kpọ ẹma ẹdọn̄ nnyịn, nnyịn imụm idem ikama inyụn̄ itre ndinam ndiọi n̄kpọ oro. Ana ikpụhọde “odudu oro anamde utom ke ekikere” nnyịn. Emi esịne ndikpụhọde se isinamde nnyịn inam n̄kpọ, ikpụhọde edu nnyịn, inyụn̄ ikpụhọde nte isidade n̄kpọ. Idịghe n̄kpọ usen kiet edi emi.

8-9. Didie ke mbụk brọda kiet owụt ntak emi anade ikpụhọde se nnyịn inen̄erede idi?

⁸ Kop mbụk brọda kiet emi ekesinamde n̄kpọ afai afai akpa. Enye ama odot ndina baptism ke ama eketre ndikpa mmịn nnyụn̄ n̄n̄wana en̄wan, oro ama ọnọ Jehovah ubọn̄ ke ekpri obio emi enye okodụn̄de. Edi esisịt ini ke enye ama akana baptism, idomo ama esịm enye mbubreyo usen kiet. Ete kiet emi ama akakpa mmịn ama edi en̄wan ye enye ke ufọk esie. Brọda oro ikamaha ndin̄wana ke nsonso oro. Edi ke ete oro ama eketịn̄ idiọk ikọ adian enyịn̄ Jehovah, enye ikekemeke ndimụm idem n̄kama aba. Enye ama ọwọrọ eketịm ete oro. Nso ikanam enye anam ntre? Kpa ye emi se enye ekekpepde ke Bible akan̄wamde enye esimụm idem akama ẹma ẹyom enye ikọ, enye ikokpụhọke kan̄a utọ owo emi enye enen̄erede edi.

⁹ Edi brọda oro ikakpaha mba. (N̄ke 24:16) Mbiowo ẹma ẹn̄wam enye aka iso okpụhọde. Nte ini akakade, enye ama odot ndidi ebiowo. Ekem ke mbubreyo usen kiet, mbiet n̄kpọ emi eketịbede ediwak isua ke edem ama etịbe, isan̄ enye emi ke ata iso Ufọkmbono Obio Ubọn̄. N̄wọn̄kpa kiet ama oyom nditịm ebiowo kiet. Nso ke brọda oro ekesinamde n̄kpọ afai afai akpa do akanam? Enye ama osụhọde idem etịn̄ ikọ emem emem ye n̄wọn̄kpa oro tutu esịt osụhọde enye, onyụn̄ an̄wam enye asan̄a ekesịm ufọk. Nso ikan̄wam enye anam n̄kpọ ntre isan̄ enye emi? Enye ama okpụhọde utọ owo emi enye enen̄erede edi. Enye ekedidi ata owo emem onyụn̄ osụhọde idem. Emi ama ọnọ Jehovah ubọn̄!

10. Nso ke ana inam man ikeme ndikpụhọde se inen̄erede idi?

¹⁰ Utọ ukpụhọde emi itetịn̄ mi isidịghe n̄kpọ usen kiet, nnyịn idinyụn̄ iwan̄ke-wan̄ ubọk itie yak etịbe. Ekeme ndiyom isịn “ofụri ukeme” nnyịn ke ediwak isua mbemiso ikemede ndinam emi. (2 Pet. 1:5) Owo ndidu ke esop mbịghi kpọt inamke owo okpụhọde nte itịn̄de mi. Ana idomo nte ikekeme ndikpụhọde utọ owo emi inen̄erede idi. Enyene mme n̄kpọ emi ẹdin̄wamde nnyịn ikpụhọde. Ẹyak ineme ndusụk.

NTE IKEMEDE NDIKPỤHỌDE UTỌ OWO EMI INEN̄EREDE IDI

11. Didie ke akam edin̄wam nnyịn ikpụhọde utọ owo emi inen̄erede idi?

¹¹ Akpa akpan n̄kpọ emi anade inam edi ndibọn̄ akam. Oyom ibọn̄ utọ akam emi andiwet psalm kiet ọkọbọn̄de ete: “Bot edisana esịt nọ mi, O Abasi, nyụn̄ sịn mi obufa spirit, eke ọsọn̄ọde ada, ke idem.” (Ps. 51:10) Ana inyịme ke oyom ikpụhọde utọ owo emi inen̄erede idi inyụn̄ iben̄e Jehovah an̄wam nnyịn. Nso inam inịm ke Jehovah ayan̄wam nnyịn ikpụhọde? Se Jehovah ọkọn̄wọn̄ọde ndinam nnọ nditọ Israel emi ẹkesọn̄de ibuot ke eyo Ezekiel ekeme ndidọn̄ nnyịn esịt. Jehovah ọkọdọhọ ete: “Ami nyọnọ mmọ esịt kiet, nnyụn̄ nsịn mmọ obufa spirit ke idem . . . nnyụn̄ nnọ mmọ mmemmem esịt [oro edi, esịt emi eben̄ede idem ndinam se Abasi ọdọhọde].” (Ezek. 11:19) Jehovah ama eben̄e idem ndin̄wam nditọ Israel oro ẹkpụhọde, enye onyụn̄ eben̄e idem ndin̄wam nnyịn n̄ko.

12-13. (a) Psalm 119:59 owụt ke nso ke ana itie ikere? (b) Nso ke ikpobụp idem nnyịn?

¹² Ọyọhọ akpan n̄kpọ iba emi anade inam edi nditie n̄kere se ikotde. Nte itịn̄de enyịn ikot Ikọ Abasi ke usen ke usen, ana ida ini itie ikere se ikotde, inen̄ede ikere iban̄a utọ ekikere emi anade ikpụhọde. (Kot Psalm 119:59; Heb. 4:12; Jas. 1:25) Ana iyom usụn̄ ikụt se iwụtde m̀mê imekere n̄kpọ nte mbon ererimbot emi. Ana inyịme ke ofụri esịt ke imenyene mfịna inyụn̄ in̄wana ọkpọsọn̄ ndikan mmọ.

¹³ Ke uwụtn̄kpọ, bụp idemfo: ‘Ndi enyene n̄kpọ ekededi emi owụtde ke mmesịn owo enyịn m̀mê mmesifịbe owo?’ (1 Pet. 2:1) ‘Ndi mmesikere ke mmọfọn n̄kan mbon en̄wen ke ntak ebiet emi ntode, adan̄a nte n̄kade n̄wed n̄ketre, m̀mê adan̄a nte nnyenede okụk n̄ketre?’ (N̄ke 16:5) ‘Ndi mmesise mbon emi mînyeneke se nnyenede m̀mê emi mîtoho idụt nnyịn ke usụhọde?’ (Jas. 2:2-4) ‘Ndi se idude ke ererimbot Satan emi esidọn̄ mi?’ (1 John 2:15-17) ‘Ndi mmesima ndida oburobụt n̄kpọ m̀mê n̄kpọ emi aban̄ade afai nnem idem esịt?’ (Ps. 97:10; 101:3; Amos 5:15) Nte ọbọrọde mme mbụme emi ekeme ndinam fi okụt se anade okpụhọde. Esịt eyenem Jehovah ima ikpụhọde se itiede nte mme n̄kpọ emi “ẹsọn̄ọde ẹdọn̄ n̄kam” ke esịt nnyịn.—Ps. 19:14.

14. Ntak emi ọfọnde imek nti ufan?

¹⁴ Ọyọhọ akpan n̄kpọ ita emi anade inam edi ndimek nti ufan. M̀mê imọfiọk m̀mê ifiọkke, imesiwak ndinam se mme ufan nnyịn ẹnamde. (N̄ke 13:20) Ekeme ndidi mbon emi mîdin̄wamke nnyịn inam se Jehovah amade ẹyọyọhọ ufọkn̄wed nnyịn m̀mê itieutom nnyịn. Edi imekeme ndikụt ata nti ufan ke mbono esop. Do ke ẹkeme ndin̄wam nnyịn ima kiet eken inyụn̄ inam nti n̄kpọ.—Heb. 10:24, 25.

“ẸSỌN̄Ọ ẸDA KE MBUỌTIDEM”

15-16. Didie ke Satan esidomo ndinam nnyịn ikpụhọde ekikere?

¹⁵ Ti ke Satan ebiere ndinam nnyịn ikpụhọde nte isikerede n̄kpọ. Enye esida kpukpru orụk ukpepn̄kpọ odomo ndibiat nti usụn̄ emi Ikọ Abasi anamde isikere n̄kpọ, ndinyụn̄ nnam nnyịn iyịk se ikpepde.

¹⁶ Satan ke obobụp ukem mbụme emi enye okobụpde Eve ke In̄wan̄ Eden ete: “Nte enen̄ede edi akpanikọ ke Abasi ọkọdọhọ . . . ?” (Gen. 3:1) Ke ererimbot emi Satan akarade mi, imesiwak ndikop mme owo ẹbụpde mme mbụme emi ẹkemede ndinam ikere m̀mê se inịmde osụk edi akpanikọ, utọ nte: ‘Ndi enen̄ede edi akpanikọ ke Abasi inyịmeke erenowo adan̄ ye erenowo, n̄wan onyụn̄ adan̄ ye n̄wan? Ndi enen̄ede edi akpanikọ ke Abasi iyomke fi adia Christmas ye usọrọ usen emana? Ndi enen̄ede edi akpanikọ ke Abasi iyomke fi esịn iyịp ke idem? Ndi enen̄ede edi akpanikọ ke Abasi iyomke fi odụk ndụk ye mbon ubon fo ye mme ufan fo emi ẹma ẹkesio ẹfep ke esop?’

17. Nso ke ikpanam owo okpobụp nnyịn mbụme emi ekemede ndinam iyịk se inịmde? Colossae 2:6, 7 owụt ke nso ufọn ke oro ekeme ndinam?

¹⁷ Ana inen̄ede inịm ke se ikpepde ke Bible ye mme n̄wed esop Abasi ẹdi akpanikọ. Edieke enyenede ndusụk akpan n̄kpọ emi Bible ekpepde emi mîtịmke in̄wan̄a nnyịn, ndien nnyịn iyomke usụn̄ ikpep n̄kpọ oro yak an̄wan̄a nnyịn, imekeme nditọn̄ọ ndikere m̀mê kpukpru se inịmde osụk edi akpanikọ. Utọ eyịghe oro ekeme ndinam nnyịn ikûkere n̄kpọ ọfọn, inyụn̄ iyakke ibuọt idem ye Jehovah aba. Nso ndien ke ana inam? Ikọ Abasi ọdọhọ yak ikpụhọde nte isikerede n̄kpọ man idomo ifiọk “uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Nnyịn ndisikpep n̄kpọ ke idem nnyịn kpukpru ini ekeme ndinam inen̄ede inịm mme n̄kpọ emi ikpepde ke Bible. Iyonyụn̄ inen̄ede inịm ke nte Jehovah oyomde idu uwem ọfọn. Ndien ukem nte eto emi ọdọn̄de orụn̄ ke isọn̄ yak ọsọn̄, nnyịn n̄ko iyọdọn̄ n̄kam, oro edi, inen̄ede ibuọt idem ye Jehovah.—Kot Colossae 2:6, 7.

18. Nso idin̄wam nnyịn ibiat ndiọi n̄kpọ emi ererimbot Satan akanamde ẹmehe nnyịn?

¹⁸ Afo enyene ndinam mbuọtidem fo ọsọn̄, idịghe owo edinam inọ fi. Ntre ka iso ndikpụhọde utọ owo emi afo enen̄erede edi. Sibọn̄ akam kpukpru ini; kpe Jehovah ubọk ete ada spirit esie an̄wam fi. Nen̄ede tie kere se ekpepde; ka iso ndise nte afo esikerede n̄kpọ ye se isinamde fi anam n̄kpọ. Mek nti ufan; dụk ndụk ye mbon emi ẹdin̄wamde fi esikere n̄kpọ ọfọn. Afo ndinam emi eyekpeme fi onyụn̄ anam fi abiat ndiọi n̄kpọ emi ererimbot Satan akanamde ẹmehe fi. Afo oyonyụn̄ ekeme ndiwụri “ekikere ye kpukpru n̄kpọ eke ẹkon̄de ẹnyụn̄ ẹmenerede idem ke enyọn̄ ẹbiọn̄ọ ifiọk Abasi.”—2 Cor. 10:5.