Ndisuan ufuọn̄ ifiọk abasi
“Ekọm enyene Abasi emi adade nnyịn asan̄a ubọn̄ ubọn̄ ke Christ kpukpru ini, onyụn̄ adade nnyịn anam owo ẹkop ufịk ifiọk esie ke kpukpru ebiet.”—2 CORINTH 2:14.
1. Nso ufuọn̄ ke ẹneme ẹban̄a mi, ndien didie ke ẹkpese ifet edisuan enye?
N̄WỤNE, n̄wụne! M-m-m-m! Ndi afo omokop inem utebe? Nnyịn mi itịn̄ke iban̄a utebe ndiye frawa edi, utu ke oro, itịn̄ iban̄a ndamban̄a ufuọn̄ oro ọwọrọde oto mfọn n̄kan uwetn̄kpọ ke isọn̄. Uwetn̄kpọ ẹmi idịghe mmọemi ẹtode mme ikpîkpu owo edi edi ndamban̄a frawa emi Enyeemi okobotde mme enem utebe frawa oro abanade isọn̄ ọkọnọde odudu ndiwet. Ifet ndisuan ufuọn̄ ifiọk Abasi emi edi akwa n̄kpọuto. Ih, enye edi utom oro enen̄erede ọsọn̄ urua—emi mîdịghe kpukpru owo ẹnam, mîdịghe ubonowo ke ofụri ofụri ẹbuana.
2. Mme mbet Christ ẹketọn̄ọ ndisuan ndamban̄a ufuọn̄ ini ewe. ndien ye nso utịp?
2 Ẹkenọ mme mbet Christ ọsọn̄urua n̄kpọ-uto emi ke ini ẹkedade mmọ ẹwụt ifịk ifịk utom Jehovah Abasi ke usen Pentecost ke isua 33 eke Eyo Nnyịn. Ke ẹyọhọde ye edisana spirit, mmọ ẹma ẹtọn̄ọ ndisuan ndamban̄a ufuọn̄, ẹsiakde “ata n̄kpọsọn̄ utom Abasi.” (Utom 2:1-4, 11) Ẹbede ke mmọ ufuọn̄ ifiọk Abasi eyebe osịm mbon en̄wen, idịghe mme Jew ikpọn̄îkpọn̄ oro ke ndammana ẹkenade mbobi edi n̄ko osịm mme idụt, mme obio, esien, mme owo, ye usem oro mînaha mbobi. (Utom 10:34, 35) Mme ata mbet ẹkese utom emi nte otịmde ọsọn̄ urua akan kpukpru inyene obụkidem oro mme owo ẹkọde ẹbon ẹnọ idemmọ.
3. Ke nso udomo ke ẹnam utom edisuan ufuọn̄ ifiọk Abasi, ndien nso mbụme ke oyom ibụp idem nnyịn?
3 Mfịn, akwa utom usuan ufuọn̄ ifiọk Abasi ke akaiso ke ofụri isọn̄—ke udomo oro okponde akan nte akanam edide ke mbụk ubonowo. Enye esịne edinọ ofụri ubonowo ikọ ntiense oro aban̄ade Obio Ubọn̄ Abasi oro ẹma ẹkewụk kemi ke idak Edidem esie oro ẹmekde, kpa Jesus Christ. (Matthew 6:10; Utom 1:8) Nte afo emese utom editan̄a Edidem ye Obio Ubọn̄ esie nte n̄kpọuto oro mînyeneke ekọmurua? Jesus Christ, emi akadade iso ke edikwọrọ eti mbụk Obio Ubọn̄ oro, ama ada enye ke usụn̄ oro, onịmde uwụtn̄kpọ.—Matthew 4:17; 6:19-21.
Ndisuan Ufuọn̄ Ke Usụn̄ Isan̄ Idara Edikan
4, Nte ekemde ye 2 Corinth 2:14, didie ke Abasi kemi ada ikot esie usụn̄ ke isọn̄, ndien ikọ Paul ẹmi ẹban̄a ewe edinam eset?
4 Ntak emi ẹkpedade edinam n̄kpọ Abasi ke ọsọn̄urua n̄kpọuto? Ntak kiet edi nte ke idem idahaemi mbon oro ẹnamde n̄kpọ Jehovah ẹnyene n̄wọrọnda ifet ẹdidi se Abasi adade usụn̄ ke akwa isan̄ idara edikan. Nte ekemde ye New International Version, 2 Corinth 2:14 ọdọhọ ete: “Ẹkọm enyene Abasi, emi kpukpru ini adade nnyịn usụn̄ ke isan̄ idara edikan ke Christ onyụn̄ adade nnyịn asuan ufuọn̄ ifiọk esie ke kpukpru ebiet [“anam ifiọk oro nnyịn inyenede iban̄a enye asuana ke ofụri ererimbot nte edinem ufuọn̄n̄kpọ!” Phillips].” Etie nte ikọ apostle Paul ẹmi ẹban̄a edinam eset oro aban̄ade isan̄ edikan.a
5, 6. (a) Nso ikesida itie ke ini isan̄ idara edikan eke mbon Rome eset, ndien inem ufịk oro akada aban̄a nso ọnọ nsio nsio owo? (b) Nso ke uwụtn̄kpọ oro ke 2 Corinth 2:14-16 ọwọrọ ke n̄kan̄ eke spirit?
5 Ke eyo ukara Rome, n̄kpon n̄kan ukpono kiet oro Akwa Ufọkmbet ekekemede ndinọ etubom ekọn̄ oro akande ekedi ndiyak enye adia idara edikan esie ye ọsọn̄urua isan̄ edikan. Udịm mbonisan̄ Rome oro ẹyesan̄a sụn̄sụn̄ ẹbe Via Triumphalis ẹnyụn̄ ẹdọk n̄wan̄ade n̄wan̄ade usụn̄ oro akade temple Jupiter ke enyọn̄ Obot Capitoline. Ẹma ẹsisịn ndidem, mbọn̄, ye mme etubom ekọn̄ oro ẹmụmde ke mbuotekọn̄, ye nditọ ye mme andikpeme mmọ n̄kpọkọbi ke ubọk ẹnyụn̄ ẹda ẹsan̄a, ediwak ini ẹnịmde iferi, ndinam mmọ ẹdi bụt ye esuene.
6 Nte mbonisan̄ ẹsan̄ade ẹbe ke obio Rome, mbio obio ẹma ẹsitop frawa ẹbon ke iso ukpatn̄kpọ oro andikan odorode, ẹnyụn̄ ẹfọp enem utebe incense ke ofụri usụn̄isan̄ oro. Inem utebe emi akada aban̄a ukpono ye ifụre ifụre uwem mbonekọn̄ oro ẹkande. Edi enye akada aban̄a n̄kpa ọnọ mbon oro ẹmụmde ke mbuotekọn̄ oro owo mîdifenke ẹmi ẹdiwotde ke utịt isan̄ oro. Emi esịn un̄wana ke se uwụtn̄kpọ Paul ke 2 Corinth 2:14-16 ọwọrọde ke n̄kan̄ eke spirit. Uwụtn̄kpọ oro owụt Paul ye ekemmọ mme Christian nte mbon oro ẹyakde idem ẹnọ Abasi, “ke Christ,” kpukpru mmọ ẹtienede ẹsan̄a ke udịm edikan eke Abasi oro Enye adade mmọ usụn̄ asan̄a ke akwa isan̄ idara edikan ke usụn̄ oro ẹsuande ufuọn̄.
Ufuọn̄ Uwem m̀mê Ufịk N̄kpa
7, 8. (a) Didie ke Mme Ntiense Jehovah ẹsuan ufuọn̄ ifiọk Abasi? (b) Nte Mme Ntiense ẹsuande ndamban̄a ufuọn̄ emi, nso ke mbon oro ẹnyan̄ade ẹnam? (c) Nso ke mbon oro ẹtakde ẹnam?
7 Ke ndisuan akpanikọ Bible aban̄ade Obio Ubọn̄ Abasi ke ubọk Christ ke kpukpru ebiet, Mme Ntiense Jehovah ke kpukpru ebiet ẹmesuan, ẹwụt, ẹnyụn̄ ẹyarade ufuọn̄ ifiọk ubọn̄ ubọn̄ Abasi emi akpanikọ esie anamde mmọ ẹwọrọ ufụn nsunsu ido ukpono. Mmọ ẹsan̄a ke idara edikan ke utom Jehovah. Mmọ ndinam utom nte Mme Ntiense esie ye Edidem esie etie nte incense oro enemde Jehovah esịt. Ntre, nnyịn imekeme ndifiọk se ikọ apostle oro ọkọwọrọde ke ini enye ọkọdọhọde ete: “Nnyịn itie nte inem ufịk, emi Christ osion̄ode ọnọ Abasi, ye mmọemi ẹnyanyan̄a ye ye mmọemi ẹtatak; ye mmọemi nte ufịk eke ọkọrọde n̄kpa ke n̄kpa, ye ye mmọ eken, nte ufịk eke ọkọrọde uwem ke uwem [“ọkpọsọn̄ ufuọn̄ oro ọnọde uwem,” The New English Bible; “ufuọn̄ uwem oro ke idemesie edemerede ukpọn̄,” Phillips].”—2 Corinth 2:15, 16.
8 Mbon esịt akpanikọ oro ẹbietde erọn̄ ẹkop inem ifiọk Jehovah nte Mme Ntiense esie ẹsuande. Ye mme utọ OWO oro utom unọ ikọ ntiense enyene ufịk nsọn̄idem ye uwem, kpa odu-uwem, ye ọnọ-uwem akpanikọ. Mmọ ẹnọ Jehovah ye Edidem esie ekọm, ẹmi mmọ ẹtienede ẹbuana ke isan̄ idara edikan mmọ, ẹnyụn̄ ẹfioride ke ọkpọsọn̄ uyọ ẹte: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.” (Ediyarade 7:10) Mmọ ẹn̄wek ofụm akpanikọ Obio Ubọn̄, emi edide ufuọn̄ uwem oro edemerede ukpọn̄, emi adade osịm uwem. Edi Satan ye mme demon esie ẹma ẹbiat ukeme ukop utebe mbon oro ẹdude ke nsunsu ido ukpono, tutu eyedi se mmọ ke ẹfụkde ibuo mmọ ye ke iseri ẹsịnde akpanikọ oro. Ye “mmọemi ẹtatak,” akpanikọ ye mme anam-akpanikọ oro ẹkamade enye ẹsion̄o ufịk n̄kpa oro adade osịm n̄kpa. Mîdịghe nte New International Version esịnde enye: “Ye mmọ nnyịn idi ufịk n̄kpa.” Edikabade eke Phillips esịn enye ntem ete: “Ye mmọ eken enye etie nte ufịk n̄kpa.”
9. Ewe mbụme ke Paul obụp kemi, afo ọkpọbọrọ didie, ndien ntak-a?
9 Apostle oro ndien obụp ete “Ndien anie ekeme ndinam utọ utom oro?” (2 Corinth 2:17) Oro edi ndidọhọ, “ndien anie odot ndinam utọ utom emi?” (The Jerusalem Bible) “Ndien kaban̄a utọ utom nte emi anie odot ndinam?” (Weymouth) Ibọrọ N̄wed Abasi edi: Mme Ntiense Jehovah! Ntak-a? Koro sụk mbon oro ẹma ẹkeyak idem ẹnọ ẹnyụn̄ ẹnamde akpanikọ, ẹnyenede esịt akpanikọ, mînyụn̄ iyomke ibụk ibụk udori ye mbon oro ẹtịn̄de akpanikọ, ẹtiede in̄wan̄în̄wan̄ mînyụn̄ inyịmeke ye nsunsu ido ukpono, ẹdot ndinam utom edisuan ufuọn̄ ifiọk Abasi emi.—Colossae 1:3-6, 13; 2 Timothy 2:15.
10. Ntak emi mme ọkwọrọ ederi mîdotke ndinam utom edisuan ufuọn̄ ifiọk Abasi?
10 Mme ọkwọrọ ederi Christendom, oro ẹyomde eti idaha ye ererimbot emi, ẹkpu ndidot nnyụn̄ n̄keme ndinam utom unana ibụk emi. Ntak-a? Sia mmọ ẹkpụde ndisịm se ẹyom emi ikọ Paul owụtde ete: “Nnyịn itiehe nte ediwak owo ẹmi ẹnyanyam ikọ Abasi ẹn̄wana udori; edi itịn̄ ikọ ke Christ ke iso Abasi, nte owo emi edide owo akpanikọ ye owo Abasi etịn̄de.” (2 Corinth 2:17) Mîdịghe nte New International Version esịnde enye: “Ke mîbietke ata ediwak owo, nnyịn inyamke-nyam ikọ Abasi idia udori. Ke edide isio, nnyịn itịn̄ ikọ ke Christ ke iso Abasi ke esịt akpanikọ nte mmọ eke Abasi ọdọn̄de.”
11, 12. (a) Ntak emi Mme Ntiense mîdịghe mmọemi “ẹnyanyam ikọ Abasi ẹn̄wana udori” ke ndibọ mme enọ imaesịt? (b) Ke edide isio ye orụk Ido Ukpono Christ oro ẹsiakde mmọn̄ oro ediwak owo ẹdepde, nso ke Mme Ntiense Jehovah ẹnọ?
11 Abasi osio Mme Ntiense Jehovah ọdọn̄, ndien mmọ ke ẹnam utom unọ ikọ ntiense mmọ ke idak ndausụn̄ Abasi. Ke adan̄aemi mmọ ẹnọde mbon oro ẹnyenede udọn̄ nti n̄wed ye mme n̄wed eken oro ẹnamde Ikọ Abasi an̄wan̄a ẹnyụn̄ ẹbọde mme enọ imaesịt kaban̄a utom edikwọrọ Obio Ubọn̄ ke ofụri ererimbot, utọ edinam oro idịghe edinyam m̀mê edisiak mmọn̄ ke Ikọ Abasi. Ke akpanikọ, mme utọ enọ oro ẹdi sụk un̄wam ke ndida nsuan ifiọk Abasi osịm mbon en̄wen.
12 Ata ediwak owo mfịn, edide ẹdiọn̄ọ m̀mê idiọn̄ọke, ẹma ẹdep orụk Ido Ukpono Christ oro ẹsiakde mmọn̄, koro emi odotde ye mme ibụk ibụk udọn̄ mmọ mînyụn̄ ibiọn̄ọke usụn̄uwem mmọ. Mmọ ẹnịm ke akpanikọ ẹte ke Abasi onyịme mmimọ sia mmimọ idọhọde ke imenyene ima inọ enye ke esịt mmimọ. Nte ededi, ke ini ẹwụtde ẹte ke Ikọ Abasi atuaha ye se mmọ ẹnịmde ke akpanikọ ye edu mmọ, mmọ ẹyụrọde N̄wed Abasi man ẹmenede mme ekikere idemmọ ke enyọn̄ ẹkan nnennen ifiọk a-Bible. (Matthew 15:8, 9; 2 Peter 3:16) Edi Mme Ntiense Jehovah ẹwụt nnennen akpanikọ otode Bible ẹmi owo mîsiakke mmọn̄, ke ntre ẹsion̄ode inem ufịk oro Abasi ye mme ata andituak ibuot nnọ enye ẹnyịmede. Oto ke oro mmọ ẹbịn kpukpru edinam ido ukpono ye mme n̄kpọ ẹbiọn̄ọde edinyene ata ifiọk Abasi ẹfep.
13. Mmanie, ke ẹsiode mme Christian oro ẹyetde aran ẹfep, idi ke isan̄ idara edikan eke Abasi, ndien nso ke mmọ ẹnam ke kpukpru ebiet emi mmọ ẹkade?
13 Ke akpanikọ, ndidu ke udịm isan̄ idara edikan eke Abasi ke ebuana ye Christ edi anana-mbiet ifet oro mîdịghe eke mme Christian oro ẹyetde aran ikpọn̄îkpọn̄ edi n̄ko eke “akwa otuowo” eke “mme erọn̄ en̄wen” ke idem idahaemi, koro edikan eke Obio Ubọn̄ ke ekpere. (Ediyarade 7:4, 9; John 10:16) Nte nnyịn itiede ibet idara efen eke Edidem nnyịn oro akande, ke kpukpru ebiet oro nnyịn ikade nnyịn iyesuan ọnọ-uwem ifiọk Abasi nte ufuọn̄n̄kpọ, m̀mê ọsọn̄urua incense, inọ mbon oro esịt mmọ ẹyomde akpanikọ ye edinen ido. Nso ifet ke edi ntem ọnọ mbon oro ẹdotde ndinam n̄wọrọnda utom emi!—John 17:3; Colossae 3:16, 17.
Ẹnọ Odudu Ndidi Mbon Oro Ẹsuande Ufuọn̄n̄kpọ
14. Ntak emi mbon oro ẹsuande ufuọn̄ ifiọk Abasi mîyomke n̄weditoro oro mme owo ẹnọde unyịme?
14 Edi ndi oyom mbon oro ẹsuande ufuọn̄ ifiọk Abasi ye eke Obio Ubọn̄ esie ẹnyene n̄weditoro oro mme owo ẹnọde unyịme? Baba! Ẹma ẹdọdọn̄ m̀mê ẹma ẹmemek nnyịn, nte Mme Ntiense ẹnọ Akakan Owo ke ekondo. Ntre, iyomke nnyịn imen̄e ndiwọrọ n̄ka an̄wautom n̄kasuan ufuọn̄ eti mbụk Obio Ubọn̄ Abasi. Ti ete ke Jehovah ada nnyịn usụn̄. Jesus akanam utom ukwọrọikọ esie kpa ye “idiọk ndutịn̄ oro mme idiọk owo ẹtịn̄de.” (Mme Hebrew 12:3) Edi, mbụkutom an̄wautom Jesus nte ẹkụtde ke Bible, osụk edi akpanikọ, ndien utom an̄wautom esie etịn̄ n̄kpọ otoro enye onyụn̄ ọsọn̄ọ nte ke enye edi ata asan̄autom Jehovah Abasi.
15. Didie ke apostle Paul okowụt ete ke mme ata Christian iyomke “n̄weditoro”?
15 Apostle Paul ama osobo mbiet n̄kpọ eneni ntre ke eyo esie ke ndiwet ikọ mfan̄a emi ete: “Nte imọn̄ inyụn̄ itọn̄ọ ntak imana itoro idem nnyịn? M̀mê ana nte ibọ n̄weditoro ida isọk mbufo, m̀mê ibọ mbufo n̄weditoro ida isọk mmọ en̄wen, nte ndusụk owo ẹnyenede ndinam? Mbufo ẹdi n̄wed nnyịn, ẹmi ẹwetde ke esịt nnyịn, ẹmi kpukpru owo ẹfiọkde ẹnyụn̄ ẹkotde. Ana an̄wan̄wa ete mbufo ẹdi n̄wed Christ ẹmi nnyịn ikamade isan̄a, n̄wed ẹmi mîkewetke ke mmọn̄-n̄wed, edi ẹwetde ke spirit Abasi uwem; ẹmi mîwetke ke n̄kpọ uwetn̄wed eke ẹdade itiat ẹnam, edi ẹwet ke n̄kpọ uwetn̄wed eke edide esịt owo.”—2 Corinth 3:1-3.
16. Nso orụk n̄wed ke Mme Ntiense Jehovah ẹsiwụt nte uyarade n̄weditoro nte ke utom mmimọ oto Abasi?
16 Mme andikara ererimbot idiọn̄ọke utom nnyịn nte Mme Ntiense Jehovah. Edi ẹyak utom edisuan ufuọn̄ ifiọk Jehovah nnyịn etịn̄ ikọ idemesie! Owo ikemeke ndisọhi utom emi mfep, okposụkedi ndusụk owo ẹsịnde ndikot uyarade n̄weditoro utom nnyịn. Mme ọkwọrọ ederi ẹsiwụt n̄weditoro mmọ oro otu mme adaibuot ufọkederi ẹnọde. Utọ n̄kpọ ntre, nte ededi, ẹdi mbai babru, kpa ikọ owo. Mme Ntiense Jehovah, ke ẹsiode edinyene nsọn̄ọ nto Ikọ Abasi ẹfep, ẹdi mme odu-uwem n̄weditoro. Ẹma ẹtan̄ n̄ko akwa otuowo eke mme erọn̄ en̄wen ẹmi eti mbụk Obio Ubọn̄ okosịmde ẹbok ke n̄kan̄ ubọk nnasia Edidem Jehovah. (Matthew 25:33, 34) Kpukpru mmọemi ẹdi n̄weditoro nnyịn, kpa n̄wed oro nnyịn nte Mme Ntiense Jehovah ikamade ke esịt ye ke ekikere nnyịn isan̄a ke kpukpru ebiet inyụn̄ ikemede ndiwụt ye mbuọtidem. Mbọn oro ẹdade ẹnọ itie edikara ofụri ekondo Abasi ẹnyụn̄ ẹtienede Mme Ntiense Jehovah ẹbuana ke ndinam n̄kpọ Abasi ẹdi n̄weditoro ke idemmọ oro kpukpru owo mîkemeke ndikpu ndikọt nnyụn̄ mfiọk.
17. Didie ke ẹwet “n̄wed Christ” nnyịn, ndien ntak emi Paul ọdọhọde ete ke ewet enye ke esịt-e?
17 Nte ededi, emi anam mbon nsunsu ido ukpono ẹyat esịt ẹnyụn̄ ẹfụbe ufụp ẹban̄a ke ini mmọ ẹkotde enye. Edi, akwa otuowo eke mme erọn̄ en̄wen oro osụk ọkọride-kọri edi n̄weditoro otode Jesus Christ, kpa Eti Ekpemerọn̄, emi adade kpukpru Mme Ntiense Jehovah anam n̄kpọ ke utom ubọkerọn̄ esie. Nnyịn idi eto uwetn̄wed, m̀mê n̄kpọutom edide owo, oro enye adade ndiwet n̄wed emi. Owo iwetke n̄wed emi ke mmọn̄n̄wed oro ẹkemede ndisọhi mfep, edi ẹkama anamutom odudu, m̀mê spirit Abasi, emi anamde utom ke esịt nnyịn, ẹwet. Emi itiehe nte eke Moses ke ini nnuenubọk Abasi ekewetde Ibet Duop ke itiatn̄wed iba. Ẹwet n̄wed nnyịn ke itiatn̄wed ikpọkidem ẹmi ẹdide esịt owo, sia utom eke spirit nnyịn anamde ukpụhọde ke ekikere ye ke esịt mbon oro ẹkopde ufuọn̄ eti mbụk.
18. Nso utịp inam mme andinyịme eti mbụk edi n̄weditoro?
18 Utom oro nnyịn ikamade Ikọ Abasi inam omotụk mbon oro ẹwụtde esịtekọm, ẹmi ẹbọde eti mbụk ke idem omonyụn̄ ada mme n̄wọrọnda ukpụhọde edi. Ubiere mmọ ndinam n̄kpọ Abasi idịghe sụk idiyok idiyok edinam oro otode ọkpọsọn̄ ntụk emi edemerede ke esịt idem mmọ ke ntak mfiori mme ọkwọrọ ederi. Utu ke oro, enye ada aban̄a edikpụhọde uwem mmọ taktak, ọkọn̄ọde ke in̄wan̄în̄wan̄ akpanikọ Edisana Bible. Ima ẹnyenede ẹnọ Abasi akpanikọ, Jehovah, edemede mmọ ‘ndisio akani edu mmọ ye abian̄a abian̄a udọn̄ esie nduọk nnyụn̄ men obufa owo nsịne,’ emi owụtde “mbun̄wụm spirit.” (Ephesus 4:20-24; Galatia 5:22, 23) Utịp, ke ntre, anam mmọ ẹdi n̄wed itoro. Enye otịm etịn̄ ikọ an̄wan̄a akan n̄wed ekededi oro nnyịn ikpewetde m̀mê esop ekededi oro ẹkụtde ke enyịn oro ọkpọdọn̄de nnyịn.
19. Didie ke Paul anam an̄wan̄a se inamde “mme asan̄autom obufa ediomi” ẹdot, ndien nso odudu ke utom mmọ enyene ke idem akwa otuowo?
19 Ke 2 Corinth 3:4-6 Paul akaiso ete: “Edi emi edi orụk mbuọtidem eke Christ esịnde nnyịn ke esịt ke utom eke nnyịn inamde inọ Abasi. Emi iwọrọke ite nnyịn imekeme ke idem nnyịn ndibiere n̄kpọ ekededi ke odudu idem nnyịn: ukeme nnyịn oto Abasi; emi okonyụn̄ anamde nnyịn ikem ndidi mme asan̄autom obufa ediomi.” Okposụkedi nsụhọ oro ẹyetde aran ikpọn̄îkpọn̄ ẹdide “mme asan̄autom obufa ediomi,” utom mmọ emenyene odudu ke idem akwa otuowo eke mme erọn̄ en̄wen, ndien enye eyesụk enyene odudu ke idem anana-ibat utọ mme erọn̄ en̄wen ntre oro ẹdisụk ẹtan̄de ẹbok. Emi edi mbuọtidem oro kpukpru Mme Ntiense Jehovah ẹnyenede ke Jehovah Abasi ebe ke Christ Jesus. Nsụhọ ẹmi ke idatesịt ẹsịn udọn̄ ẹnọ akwa otuowo eke mme erọn̄ en̄wen nditiene mbuana ke ofụri esịt ke utom ‘uwet n̄wed’ oro Jesus Christ ekebemde iso etịn̄ ke Matthew 24:14 ye Matthew 28:19, 20.
20. (a) Nso ke mbụkutom Yearbook owụt aban̄a mbon oro ẹsuande ufuọn̄ ifiọk Abasi? (b) Nso ke kpukpru nnyịn ikeme ndidọhọ mban̄a edidot oro nnyịn idotde ndinam utom uwetn̄wed?
20 Oro edi se mmọ ẹkenamde, nte anade in̄wan̄în̄wan̄ ke mbụkutom 1990 Yearbook ẹmi ẹwụtde nte Mme Ntiense Jehovah ẹsuande ufuọn̄ ifiọk Abasi ke idụt 212. Mmọ ẹwak ke ibat ẹbe ifịk ifịk mme asuanetop 3,787,000, ndien ke isua oko ikpọn̄ mmọ ẹma ẹsịn n̄kpọ nte hour 835,000,000 ke ndikwọrọ eti mbụk Obio Ubọn̄ emi. Ke usọrọ Udia Mbubịteyo Ọbọn̄ isua oko, owo 9,479,064 ẹkedụk. Nsụhọ oro ẹyetde aran ye mbon akwa otuowo eke mme erọn̄ en̄wen ẹkeme ndidọhọ ẹte: “Ukeme nnyịn oto Abasi.” M̀mê nte The Jerusalem Bible esịnde enye: “Kpukpru ukeme nnyịn ẹto Abasi.”
21. Nso ke kpukpru nnyịn ikpanam, ndien ntak-a?
21 Ke ntre, ẹsuan ọnọ-uwem ineminem, ufuọn̄ ifiọk Abasi ke kpukpru ebiet! Ẹnam ofụm efakutom esop mbufo ọyọhọ ye inem ufịk ifiọk Jehovah. Ndien, nte ubọn̄ ubọn̄ Etubom ekọn̄ ukara Abasi, enye eyeda mbufo usụn̄ ke isan̄ edikan esie nte ofụri Mme Ntiense esie ẹsịnde ifịk ẹkaiso ke ubọn̄ ubọn̄ utom eyomfịn emi!
[Mme Ikọ Idakisọn̄]
a Ke oyomde ntọt efen efen, se Insight on the Scriptures, Eboho 2, page 1128-1129, emi Watchtower Bible and Tract Society of New York, Inc. emịn̄de.
Didie ke Afo Ọkpọbọrọ?
◻ Nso uwụtn̄kpọ ke Paul ada ke 2 Corinth 2:14-16?
◻ Nso odudu ke ẹdisuan ufuọn̄ ifiọk Abasi enyenede ke idem mbon en̄wen?
◻ Mmanie ikpọn̄îkpọn̄ ẹdot ndinam utom emi, ndien ntak-a?
◻ Ntak emi mbon oro ẹsuande ufuọn̄n̄kpọ mîyomke n̄weditoro oro ẹwetde-wet ke utom mmọ?