Ka Iso ke “Edinam Eti N̄kpọ”
1 Afo akanam eti n̄kpọ ke ini akakabarede edi asan̄autom Jehovah Abasi. Nte ededi, idahaemi, n̄kpọ-ata oro odude ke ndiọkeyo emi edi ndika iso ke “edinam eti n̄kpọ.” (Gal. 6:9) Okposụkedi emi oyomde ata ukeme, afo emekeme ndinam oro. Didie?
2 Kọri Esịt Kiet ye Jesus: Ukem nte Jesus, afo emekeme ndiyọ mme idomo edieke afo akade iso owụk ekikere ke idotenyịn Obio Ubọn̄. (Heb. 12:2, 3) Nịm ke akpanikọ nte ke Jehovah ama fi ye nte ke enye oyom fi okụt unen. (2 Pet. 3:9) Kọn̄ ofụri mbuọtidem fo ke enye, enịmde ke akpanikọ nte ke enye ayan̄wam fi. (1 Cor. 10:13) Kọbọ ke akam, eben̄ede Jehovah an̄wam fi ndiyọ. (Rome 12:12) Dat esịt ke edinịm ke akpanikọ oro nte ke ediyọ fo ayada esịm eti edu ke enyịn Abasi. (Rome 5:3-5) Edinam akpanikọ fo ke ndikọri “esịt kiet . . . nte Christ Jesus etemede” ayanam fi okop ọkpọkpọ uyụhọ onyụn̄ anam esịt Jehovah adat.—Rome 15:5; N̄ke 27:11.
3 Ka Iso ke Edinam Nti N̄kpọ: Bọ ọyọhọ ufọn to mme enọ oro Jehovah ọnọde ikọt esie man an̄wam mmọ ẹka iso ẹnam eti n̄kpọ. Nyene eti ọkpọkpọ ndutịm edikot Ikọ Abasi ofụri ini ye edikpep mme n̄wed ẹkọn̄ọde ke Bible emi otu asan̄autom emi anamde akpanikọ, onyụn̄ enyenede ọniọn̄, ọnọde. Nen̄ede tịm idem nọ, dụk, nyụn̄ tiene buana ke kpukpru mbono esop. Nyene n̄kpet n̄kpet itie ebuana ye nditọete iren ye iban eke spirit fo mbemiso ye ke mme mbono esop Christian ẹsuanade. Nịm mme nnennen utịtmbuba ke utom ukwọrọikọ fo man enyene ebuana oro odotde ke utom an̄wautom onyụn̄ ofori mme usọ fo ke ndinọ mbon en̄wen eti mbụk.
4 Emi edi usụn̄ emi afo ekemede ndika iso ke edinam eti n̄kpọ nnyụn̄ nnyene ekese idatesịt ke ukem ini oro. Ke afan̄ emi, eyenete kiet ke Italy ọkọdọhọ ete: “Ke eyo okụtde ndien ami mfiak nnyọn̄ ufọk ke mma n̄kokụre utom Jehovah ke usen oro, edi akpanikọ, nyokop mmemidem. Edi ami mmokop inemesịt, mmonyụn̄ n̄kọm Jehovah ke ndikọnọ mi idatesịt emi owo ndomokiet mîkemeke ndimen mfep.” Mmọdo, ka iso ke edinam eti n̄kpọ, ndien afo eyenyene akwa idatesịt.