Ndiwụt Ima Nnọ Mbon Oro Ẹdude ke Unana
MME Christian ẹnyene mbiomo ye ifet ndiwụt ima nnọ nditọete mmọ iren ye iban ẹmi ẹdude ke unana. (1 John 3:17, 18) Apostle Paul ekewet ete: “Eyak nnyịn ifọn ido ye kpukpru owo, akpan akpan ye mmọemi ẹtode ke ufọk mme andinịm ke akpanikọ.” (Galatia 6:10) Ke ndondo emi eyenete eren kiet oro anamde n̄kpọ Jehovah ke se ikperede ndisịm isua 40 ama okụt ima itie nditọete Christian ke ini udọn̄ọ ye n̄kpa an̄wan esie. Enye ewet ete:
“Sia n̄kekpemede n̄wan mi ke ufọk ke ini udọn̄ọ esie, n̄kekemeke ndinam utom idịbi udia ke se ikperede ndisịm ọfiọn̄ iba. Ekefịghede mi didie ntem ke idem ke ini mme ufan ke esop ke unyịmesịt ẹkedide ẹdin̄wam nnyịn! Ediwak enọ ke okụk—‘ndin̄wam ke ubiatokụk efen efen,’ nte mme kad oro ẹkesisan̄ade ye mmọ ẹkesidọhọde—ẹma ẹsikpe okụk ufọk, n̄kpọ ufọn obio, ye mme ubiatokụk eken.
“Urua iba mbemiso n̄wan mi akpade, esenyịn circuit ama edise nnyịn ndinọ nsịnudọn̄. Enye ama akam owụt ndise slide oro esop edisede ke utịturua oro. Nnyịn ima ikeme ndikpan̄ utọn̄ nnọ mme mbonoesop ke urụk ukopikọ—esịnede mme mbono an̄wautom oro esenyịn circuit ekenịmde. Ke kiet ke otu ẹmi, enye ama anam kpukpru mbon oro ẹkedude do kaban̄a an̄wautom, nte otu, ẹdọhọ n̄wan mi, ‘imọnọ ekọm-o.’ Ntem, idem okposụkedi enye okodude nsannsan ke n̄kan̄ ikpọkidem, enye ikokopke ndobo.
“Ke ufan̄ hour kiet ke enye ama akakpa, ekpere ndidi kpukpru mbiowo ẹma ẹdu ke ufọk mi. Se ibede nditọete iren ye iban ikie ẹma ẹwaha ẹdi usen oro ikpọn̄. Udia ama edidoro ke okpokoro ‘ke utịbe utịbe usụn̄’ ọnọ kpukpru mbon oro ẹkedude ndidia. N̄kemeke ndibat kpukpru enọ, mme ikọ mbọm, mme ikọ ndọn̄esịt, ye akam oro ẹkebọn̄de ke ibuot mi. Mmọ ẹkenọ nsọn̄idem didie ntem! Ke akpatre n̄kenyene ndidọhọ nditọete ẹtre ndinọ udia ye un̄wam ke edinam ufọk asana!
“M̀mọ̀n̄ efen ke ẹsiode esop Jehovah ẹfep ke nnyịn ikeme ndikụt mme utọ anana-ibụk ikọ uwụt mbọm, edikere mban̄a, ye ima oro? Ata ediwak owo mfịn ẹnyene ibat ibat ata ufan oro mmọ ẹkemede ndibat. Jehovah ọmọdiọn̄ nnyịn ndinyene akamba ntatara ubon nditọete iren ye iban eke spirit!”—Mark 10:29, 30.