Ka Iso San̄a Ke Usụn̄ Jehovah

“Bet Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene.”—PSALM 37:34.

1, 2. Nso ke ndisan̄a ke usụn̄ Jehovah ọkọwọrọ ọnọ Edidem David, ndien nso ke oro oyom oto nnyịn mfịn?

“WỤT mi usụn̄ eke n̄kpasan̄ade; koro mmenerede ukpọn̄ mi nse fi.” (Psalm 143:8) Mme Christian mfịn ẹtiene ẹtịn̄ mme ikọ Edidem David oro ke ofụri esịt. Mmọ ẹnen̄ede ẹyom ndinem Jehovah esịt nnyụn̄ nsan̄a ke usụn̄ esie. Nso ke emi abuana? Ye David, enye ọkọwọrọ ndinịm ibet Abasi. Enye ọkọwọrọ ndibuọt idem ye Jehovah utu ke ndidụk odu ye mme idụt. Ih, enye ọkọwọrọ n̄ko ndinam n̄kpọ Jehovah ke edinam akpanikọ, idịghe eke mme abasi mbon oro ẹkedụn̄de ẹkpere. Ye mme Christian, ndisan̄a ke usụn̄ Jehovah abuana ekese.

² Akpa n̄kpọ edi, ndisan̄a ke usụn̄ Jehovah mfịn ọwọrọ ndinyene mbuọtidem ke uwa ufak Jesus Christ, ndidiọn̄ọ enye nte “usụn̄ ye akpanikọ ye uwem.” (John 3:16; 14:6; Mme Hebrew 5:9) Enye ọwọrọ n̄ko ndinịm “ibet Christ,” emi esịnede ediwụt kiet eken ima, akpan akpan nditọete Jesus oro ẹyetde aran. (Galatia 6:2; Matthew 25:34-40) Mbon oro ẹsan̄ade ke usụn̄ Jehovah ẹma mme edumbet ye mme ewụhọ esie. (Psalm 119:97; Mme N̄ke 4:5, 6) Mmọ ẹma ọsọn̄urua ifet mmọ ndibuana ke utom ukwọrọikọ Christian. (Colossae 4:17; 2 Timothy 4:5) Akam edi ikpehe ofụri ini ke uwem mmọ. (Rome 12:12) Ndien mmọ ‘ẹtịn̄ enyịn ẹkpeme nte ẹsan̄ade: isan̄ake nte ndisịme.’ (Ephesus 5:15) Mmọ ke akpanikọ iyakke mme inyene eke spirit ẹtak kaban̄a mme ufọn n̄kpọ eke obụk ibio ini m̀mê oburobụt inemesịt. (Matthew 6:19, 20; 1 John 2:15-17) Akan oro, edisọn̄ọ nda ye Jehovah ye edibuọt idem ye enye ẹdi akpan n̄kpọ. (2 Corinth 1:9; 10:5; Ephesus 4:24) Ntak-a? Koro mme idaha nnyịn ẹnen̄ede ẹbiet eke mbon Israel eset.

Ufọn Mbuọtidem ye Nsọn̄ọnda

3. Ntak emi nsọn̄ọnda, mbuọtidem, ye ibetedem ẹdin̄wamde nnyịn ndika iso nsan̄a ke usụn̄ Jehovah?

³ Israel ekedi ekpri idụt emi mbọhọidụn̄ oro ẹketiede nsọn̄ido nsọn̄ido ẹmi ẹkesịnde idem ke mme anana-ukpan edinam ke utuakibuot nnọ ndem, ẹkekande ẹkụk. (1 Chronicles 16:26) Israel kpọt akanam n̄kpọ ọnọ ata Abasi kierakiet oro enyịn mîkwe, kpa Jehovah, ndien enye okoyom mmọ ẹnyene n̄kokon̄ idaha ido uwem. (Deuteronomy 6:4) Ukem ntre mfịn, sụk ibat ibat miliọn owo ẹtuak ibuot ẹnọ Jehovah, ndien mmọ ẹdu uwem ke ererimbot emi se ikperede ndisịm biliọn owo itiokiet ẹdude, ẹmi mme idaha ye ekikere ido ukpono mmọ ẹdide isio ye eke mmọ. Edieke nnyịn isịnede ke otu ibat ibat miliọn owo oro, ana nnyịn idu ke ukpeme mbak ẹditụn nnyịn usụn̄. Didie? Edisọn̄ọ nda ye Jehovah Abasi, mbuọtidem ke enye, ye ọkpọsọn̄ mbuọtidem nte ke enye oyosu mme un̄wọn̄ọ esie, ayan̄wam. (Mme Hebrew 11:6) Emi ayakpan nnyịn ndikọn̄ mbuọtidem ke mme n̄kpọ oro ererimbot odoride enyịn.—Mme N̄ke 20:22; 1 Timothy 6:17.

4. Ntak emi “enyịn esịt ekịmde” mme idụt?

⁴ Apostle Paul ama owụt nte mme Christian ẹkpekpụhọrede ẹkpọn̄ ererimbot ke ini enye ekewetde ete: “Mmọdọhọ ndien ntem, nnyụn̄ nsọn̄ọ ntịn̄ ke Ọbọn̄, nte mbufo ẹkûsan̄a aba nte mme Gentile efen ẹsan̄ade, ke ikpîkpu ekikere mmọ; emi enyịn esịt ekịmde mmọ; unana ifiọk mmọ ye nsọn̄esịt mmọ ẹnyụn̄ ẹnamde mmọ ẹda nsan-nsan ye uwem Abasi; sia esịt mmọ odorode ufiọn.” (Ephesus 4:17-19) Jesus edi “ata un̄wana.” (John 1:9) ‘Enyịn esịt ekịm’ owo ekededi emi esịnde enye m̀mê emi ọdọhọde ke imọ imọbuọt idem ye enye edi mînịmke “ibet Christ.” Utu ke ndisan̄a ke usụn̄ Jehovah, mmọ “ẹda nsan-nsan ye uwem Abasi.” Inamke n̄kpọ m̀mê mmọ ẹkere ke mmimọ ifiọk n̄kpọ adan̄a didie ke ido ererimbot, mmọ ‘ẹnana n̄kukụre ifiọk’ emi adade esịm nsinsi uwem, kpa eke Jehovah Abasi ye Jesus Christ.—John 17:3; 1 Corinth 3:19.

5. Okposụkedi un̄wana akpanikọ ayamade ke ererimbot, ntak emi ediwak owo mînamke n̄kpọ iban̄a?

⁵ Edi, un̄wana akpanikọ ke ayama ke ererimbot! (Psalm 43:3; Philippi 2:15, 16) “Eti ibuot ofiori ke esien.” (Mme N̄ke 1:20) Isua oko Mme Ntiense Jehovah ẹma ẹbiat se ibede biliọn hour kiet nditịn̄ nnọ mme mbọhọidụn̄ mmọ mban̄a Jehovah Abasi ye Jesus Christ. Ediwak owo tọsịn ke mme itie ikie ẹma ẹnam n̄kpọ ẹban̄a. Nte ededi, nte akpana akpa nnyịn idem nte ke ediwak mbon eken ẹma ẹkpu ndinam n̄kpọ mban̄a? Baba. Paul ama etịn̄ aban̄a ‘esịt mmọ ndidoro ufiọn.’ Ndusụk owo ẹnyene esịt emi ama okodoro ufiọn ke ntak ibụk m̀mê ima okụk. Nsunsu ido ukpono m̀mê edinam ererimbot oro atarade-tara mfịn akara mbon en̄wen. N̄kpọsọn̄ ifiọk n̄kpọntịbe ke uwem ẹnam ediwak owo ẹkpa edem ẹwụt Abasi. Mbon eken ẹsịn ndisịm mme n̄kokon̄ idaha ido uwem Jehovah. (John 3:20) Ndi esịt owo emi asan̄ade ke usụn̄ Jehovah ekeme ndidoro ufiọn ke afan̄ ẹmi?

6, 7. Okposụkedi mmọ ẹkedide mme andituak ibuot nnọ Jehovah Abasi, ke mme idaha ewe ke nditọ Israel ẹkeduọn̄ọ, ndien ntak-a?

⁶ Emi ama etịbe ọnọ Israel eset, nte Paul okowụtde. Enye ekewet ete: “Mme n̄kpọ ẹmi ẹdi uwụtn̄kpọ ẹnọ nnyịn, ndikpep nnyịn ẹte, ikûdiọk itọn̄ ibịne se idiọkde, nte mmọ ẹkenamde. Mbufo ẹkûnyụn̄ ẹdi mme okpono ndem, nte ndusụk mmọ ẹkedide; nte ẹwetde ẹte, Mbio oro ẹsụhọde ẹtetie ẹdia ẹnyụn̄ ẹn̄wọn̄, ẹnyụn̄ ẹdaha ke enyọn̄ ẹkebre mbre. Nnyịn ikûnyụn̄ inam use, nte ndusụk mmọ ẹkenamde, ẹnyụn̄ ẹkpan̄ade, thousand owo edịp ye ita ke usen kiet.”—1 Corinth 10:6-8.

⁷ Paul ebem iso etịn̄ aban̄a ini emi Israel akatuakde ibuot ọnọ eyen enan̄ ke ukot Obot Sinai. (Exodus 32:5, 6) Emi ekedi ata ata edisọn̄ ibuot ye ewụhọ Abasi oro mmọ ke n̄kpasịp urua ifan̄ ke mbemiso ẹkenyịmede ndinịm. (Exodus 20:4-6; 24:3) Ekem, Paul etịn̄ aban̄a ini emi Israel eketienede nditọiban Moab atuak ibuot ọnọ Baal. (Numbers 25:1-9) Utuakibuot nnọ eyen enan̄ ọkọyọhọ ye akwa ebeubọk ediyụhọ udọn̄ idemowo, ‘edibre mbre.’a Utuakibuot Baal ọkọyọhọ ye in̄wan̄în̄wan̄ oburobụt ido idan̄. (Ediyarade 2:14) Ntak emi nditọ Israel ẹkenamde idiọkn̄kpọ ẹmi? Koro mmọ ẹkeyakde esịt mmọ ‘ọdiọk itọn̄ ebịne se idiọkde’—edide ukpono ndem oro m̀mê mme edinam unana ukpan oro ẹkesan̄ade ye enye.

8. Nso ke nnyịn ikeme ndikpep nto mme ifiọk n̄kpọntịbe Israel?

⁸ Paul okowụt ete ke akpana nnyịn ikpep n̄kpọ ito mme n̄kpọntịbe ẹmi. Ikpep nso? Owo ikemeke ndikere nte ke Christian ayatuak ibuot ọnọ eyen enan̄ m̀mê abasi mbon Moab eset. Edi nso kaban̄a oburobụt ido m̀mê anana-ukpan ediyụhọ udọn̄ idemowo? Mmọ ẹmi ẹdi ọsọ n̄kpọ mfịn, ndien edieke nnyịn iyakde udọn̄ kaban̄a mmọ ẹkọri ke esịt nnyịn, mmọ ẹyedian̄ade nnyịn ẹkpọn̄ Jehovah. Utịp edidi ukem nte emi nnyịn ikpokponode ndem—edidian̄ade n̄kpọn̄ Abasi. (Men Colossae 3:5; Philippi 3:19 domo.) Ke akpanikọ, Paul ekeberi edineme mme n̄kpọntịbe oro ke nditeme mme ekemmọ andinịm ke akpanikọ ete: “Ẹfehe ẹkpọn̄ ido ndem.”—1 Corinth 10:14.

Un̄wam ke Ndisan̄a ke Usụn̄ Abasi

9. (a) Nso un̄wam ke nnyịn ibọ man anam nnyịn ika iso isan̄a ke usụn̄ Jehovah? (b) Nso idi usụn̄ kiet emi nnyịn ikopde ‘uyo ke edem nnyịn’?

⁹ Edieke nnyịn ibierede ndika iso nsan̄a ke usụn̄ Jehovah, owo ikpọn̄ke nnyịn ye unana un̄wam. Isaiah ama etịn̄ prọfesi ete: “Utọn̄ fo oyokop uyo ke edem fo, ete, ‘Emi edi ọkpọ-usụn̄, mbufo ẹsan̄a ke esịt,’ ke mbufo [ẹdiwọn̄ọrede] ẹka nnasia, m̀mê ẹnyụn̄ ẹka ufien.” (Isaiah 30:21) Didie ke ‘utọn̄ nnyịn’ okop ‘uyo oro ke edem nnyịn’? Ọfọn, owo ndomokiet mfịn ikopke ata ata uyo m̀mê ndibọ ọkpọkpọ etop nto Abasi. Kpukpru nnyịn ikop “uyo” oro ke ukem usụn̄. Akpa ye akakan, nnyịn ikop enye ebe ke N̄wed Abasi eke odudu spirit, kpa Bible, emi ọdọn̄ọde mme ekikere Abasi ye mbụk aban̄ade nte enye anamde n̄kpọ ye mme owo. Sia ẹsiode nnyịn kpukpru usen ẹnyan ẹnọ mme nsunsu ekikere ẹtode ebiet ẹmi “[ẹdade] nsan-nsan ye uwem Abasi,” man inyene eti nsọn̄idem eke spirit, ana nnyịn ikot Bible inyụn̄ itie ikere enye kpukpru ini. Emi ayan̄wam nnyịn ndifep “mme ikpîkpu n̄kpọ” inyụn̄ ‘inyene ọyọhọ ifiọk, inyụn̄ iben̄e idem ke kpukpru nde ndinam eti utom ekededi.’ (Utom 14:14, 15; 2 Timothy 3:16, 17) Enye ọyọsọn̄ọ nnyịn idem, esịn udọn̄ ọnọ nnyịn, onyụn̄ an̄wam nnyịn ‘ikụt unen ke usụn̄ nnyịn.’ (Joshua 1:7, 8) Ntem, Ikọ Jehovah eteme ete: “Mbufo nditọwọn̄, ẹkop ndien uyo mi: ndien ọfọfọn ye mmọ eke ẹkpemede usụn̄ mi. Ẹkop item, ẹnyụn̄ ẹnyene ibuot, ndien ẹkûsịn enye.”—Mme N̄ke 8:32, 33.

10. Nso idi udiana usụn̄ oro nnyịn ikopde ‘uyo ke edem nnyịn’?

¹⁰ Ikop ‘uyo ke edem nnyịn’ n̄ko ebe ke “asan̄autom emi anamde akpanikọ, onyụn̄ enyenede ọniọn̄,” emi ọnọde “udia ke edikem ini.” (Matthew 24:45-47) Usụn̄ kiet oro ẹnọde udia emi edi mme n̄wed ẹkọn̄ọde ke Bible oro ẹmịn̄de-mịn̄, ndien ke mme isua ndondo emi udia emi odu barasuene. Ke uwụtn̄kpọ, ebede ke magazine Enyọn̄-Ukpeme, ẹmefori ifiọk aban̄ade ntịn̄nnịm ikọ. Ke magazine emi, ẹmesịn udọn̄ ẹnọ nnyịn ndisịn ifịk ke utom edikwọrọ ikọ ye edinam mbet kpa ye n̄kọri ke unana udọn̄, ẹmen̄wam nnyịn ndifep mme n̄kpọ iduọ, ẹmenyụn̄ ẹsịn udọn̄ ẹnọ nnyịn ndikọri nti edu Christian. Nnyịn ida utọ udia eke edikem ini oro ke akpan n̄kpọ didie ntem!

11. Nam ọyọhọ usụn̄ ita oro nnyịn ikemede ndikop ‘uyo ke edem nnyịn’ an̄wan̄a.

¹¹ Asan̄autom emi anamde akpanikọ, onyụn̄ enyenede ọniọn̄ esinọ udia emi n̄ko ebe ke mme mbono esop ofụri ini. Mmọ ẹmi ẹsịne mme mbono esop n̄kann̄kụk, mbono esop ikaba ke isua ke circuit, ye ikpọ mbono eke isua ke isua. Ewe anam-akpanikọ Christian mîdaha mme utọ mboho oro ke akpan n̄kpọ? Mmọ ẹdi akpan un̄wam ndinọ nnyịn ibetedem ke ndisan̄a ke usụn̄ Jehovah. Sia ediwak owo ẹnyenede ndibiat ekese ini ke utom m̀mê ke ufọkn̄wed ye mbon oro mîbuanake ke ido ukpono mmọ, ebuana Christian ofụri ini anyan̄a uwem ke ata ata usụn̄. Mme mbono esop ẹnọ nnyịn eti ifet ‘ndidemede kiet eken nnọ ima ye nti utom.’ (Mme Hebrew 10:24) Nnyịn imama nditọete nnyịn, imonyụn̄ ima ndibuana ye mmọ.—Psalm 133:1.

12. Nso ubiere ke Mme Ntiense Jehovah ẹnyene, ndien didie ke mmọ ẹkewụt enye ke ndondo emi?

¹² Ke ẹkopde nsọn̄idem ẹto utọ udia eke spirit oro, se ikperede ndisịm miliọn owo itiokiet mfịn ke ẹsan̄a ke usụn̄ Jehovah, ndien ediwak miliọn owo efen efen ke ẹkpep Bible ndifiọk nte ẹkpenamde ntre. Ndi akpanikọ oro nte ke mmọ iwakke ke ibat ke ẹmende ẹdomo ye ibat mme andidu ke isọn̄ ẹdide ediwak biliọn owo anam idem emem mmọ? N̄wan̄ansa-o! Mmọ ẹbiere ndika iso nnam ‘uyo ẹkopde ke edem mmọ,’ ẹnamde uduak Jehovah ke edinam akpanikọ. Nte an̄wan̄wa uyarade utọ ubiere oro, ke Mme Mbono eke Mme Idụt ye District “Usụn̄ Uwem Abasi” eke 1998/1999, mme andidụk ẹma ẹnyịme ubiere emi okowụtde idaha ofụri esịt mmọ. Se itienede emi edi ikọ ubiere oro.

Ubiere

13, 14. Nso ekikere oro aban̄ade ata idaha ererimbot ke Mme Ntiense Jehovah ẹnyene?

¹³ “Nnyịn, nte Mme Ntiense Jehovah oro isopde idem ke Mbono “Usụn̄ Uwem Abasi,’ imenyịme ke ofụri esịt ite ke usụn̄ Abasi edi mfọnn̄kan usụn̄ uwem. Nte ededi, nnyịn imọfiọk ite ke ata ediwak ke otu ubonowo mfịn ẹkere isio isio. N̄kaowo omodomo akpakịp ekikere, ukpepn̄kpọ akwaifiọk, ye mme ekikere ido ukpono ese ke se idide mfọnn̄kan usụn̄. Editịm ndụn̄ọde mbụk owo ye mme idaha ererimbot mfịn ẹwụt nte ntọt Abasi oro ẹwetde ke Jeremiah 10:23 edide akpanikọ: ‘Owo eke asan̄ade inyụn̄ ikemeke ndinen̄ede ikpat esiemmọ.’

¹⁴ “Kpukpru usen nnyịn imokụt mme uyarade efen efen ẹmi ẹsọn̄ọde nte mme ikọ oro ẹdide akpanikọ. Ke ata ediwak idaha, n̄kaowo ẹfụmi usụn̄ uwem Abasi. Mme owo ẹbịne se itiede nte enen ke enyịn mmọ. Mme utịp ẹdi n̄kpọ mmọn̄eyet—n̄wụre ke uwem ubon, edikpọn̄ nditọ ye unana ndausụn̄; akpakịp edibịne uma-inyene, adade ekesịm unana ye edikpu; nditen̄ ubiatibet ye afai, ọnọmọde anana-ibat owo; en̄wan ye ekọn̄ ekpụk, adade uwem owo oro ibat enyenede ndịk; ntatara oburobụt ido, emi esịnde udọn̄ ọnọ ntatara udọn̄ọ ẹmende ẹto idan̄. Mmọ ẹmi ẹdi ibat ibat kpọt ke otu awak-n̄kukọhọ mfịna oro ẹbiọn̄ọde edibịne oro ẹbịnede inemesịt, emem, ye ifụre.

15, 16. Kaban̄a usụn̄ uwem Abasi, nso ke ẹkewụt ke ubiere oro ẹkenamde?

¹⁵ “Ke ikerede iban̄a mfụhọ mfụhọ nnanenyịn ubonowo ye edikpere oro ‘ekọn̄ akwa usen Abasi Andikara kpukpru n̄kpọ,’ ẹkotde Armageddon, (Ediyarade 16:14, 16) ekperede, nnyịn nte Mme Ntiense Jehovah imebiere ite ke:

¹⁶ “Akpa: Nnyịn ida ke Jehovah Abasi enyene nnyịn, sia nnyịn owo kiet kiet ima ikayak idem inọ enye ọyọhọ ọyọhọ, ndien nnyịn iyaka iso inyene mbuọtidem oro mîsehekede ke ndutịm Jehovah eke edinọ ufak ebe ke Eyen esie, kpa Jesus Christ. Nnyịn imebiere ndisan̄a ke usụn̄ uwem Abasi, inamde utom nte Mme Ntiense esie inyụn̄ isụkde ibuot inọ itie edikara esie nte ẹwụtde ebe ke ukara Jesus Christ.

17, 18. Nso idaha ke Mme Ntiense Jehovah ẹdika iso ndida kaban̄a mme idaha ido uwem ye itie nditọete Christian?

¹⁷ “Udiana: Nnyịn iyaka iso ndisọn̄ọ nyịre ke n̄kokon̄ ido uwem ye mme idaha eke spirit eke Bible. Nnyịn imebiere nditre ndisan̄a nte mme idụt ẹsan̄ade ke ikpîkpu ekikere mmọ. (Ephesus 4:17-19) Edi ubiere nnyịn ndika iso nsana ke enyịn Jehovah nnyụn̄ nnana ndo otode ererimbot emi.—James 1:27.

¹⁸ “Ọyọhọ ita: Nnyịn iyọsọn̄ọ iyịre ke idaha N̄wed Abasi nnyịn nte itie nditọete Christian ofụri ererimbot. Nnyịn iyomụm edida san̄asan̄a Christian ikama ke otu mme idụt, isịnke idem ke usua m̀mê ubahade eke orụk, eke idụt, m̀mê eke ekpụk.

19, 20. (a) Nso ke mme ete ye eka ẹdide Christian ẹdinam? (b) Didie ke kpukpru ata Christian ẹdika iso ndiwụt idemmọ nte mme mbet Christ?

¹⁹ “Ọyọhọ inan̄: Nnyịn ẹmi idide mme ete ye eka iyekpep nditọ nnyịn usụn̄ Abasi. Nnyịn iyenịm uwụtn̄kpọ ke udu uwem Christian, emi esịnede edikot Bible kpukpru ini, ukpepn̄kpọ ubon, ye ebuana ofụri ukpọn̄ ke esop Christian ye ke utom an̄wautom.

²⁰ “Ọyọhọ ition: Kpukpru nnyịn iyodomo ndikọri mme edu Abasi oro Andibot nnyịn edide uwụtn̄kpọ, nnyịn iyonyụn̄ idomo ndikpebe edu esie ye mme usụn̄ esie, nte Jesus ekekpebede. (Ephesus 5:1) Nnyịn imebiere ndinam kpukpru n̄kpọ nnyịn ke ima, ke ntre inamde ẹdiọn̄ọ nnyịn nte mme mbet Christ.—John 13:35.

21-23. Nso ke Mme Ntiense Jehovah ẹdika iso ndinam, ndien nso ke mmọ ẹtịm ẹnịm ke akpanikọ?

²¹ “Ọyọhọ itiokiet: Nnyịn iyaka iso ye unana edikpa mba ndikwọrọ eti mbụk Obio Ubọn̄ Abasi, inamde mme mbet, nnyịn iyonyụn̄ iteme mmọ ke usụn̄ uwem Abasi inyụn̄ isịn udọn̄ inọ mmọ ndibọ n̄kaiso ukpep ke mme mbono esop.—Matthew 24:14; 28:19, 20; Mme Hebrew 10:24, 25.

²² “Ọyọhọ itiaba: Nte owo kiet kiet ye nte esop ido ukpono, nnyịn iyaka iso inam uduak Abasi edi akpa ke uwem nnyịn. Ke idade Ikọ esie, kpa Bible, nte ndausụn̄ nnyịn, nnyịn idiwọn̄ọkede ika nnasia m̀mê ufien, ke ntem isọn̄ọde ite ke usụn̄ Abasi edi akakan ọnọ mme usụn̄ ererimbot. Nnyịn imebiere ndibịne usụn̄ uwem Abasi—isọn̄ọde inam ntre ye ke edinam akpanikọ, idahaemi ye ke nsinsi!

²³ “Nnyịn inam ubiere emi koro nnyịn inyenede ọyọhọ mbuọtidem ke ima ima un̄wọn̄ọ Jehovah nte ke owo emi anamde uduak Abasi ododu ke nsinsi. Nnyịn inam ubiere emi koro nnyịn imetịm inịm ite ke ndida mme edumbet, item, ye nsuannọ N̄wed Abasi ndu uwem edi mfọnn̄kan usụn̄ uwem mfịn onyụn̄ esịn eti itiat idakisọn̄ ọnọ ini iso, man nnyịn ikpomụm uwem eke edide ata uwem ikama. (1 Timothy 6:19; 2 Timothy 4:7b, 8) Ke akande kpukpru, nnyịn inam ubiere emi koro nnyịn imade Jehovah Abasi ke ofụri esịt, ukpọn̄, ekikere, ye odudu nnyịn!

24, 25. Ẹkenam n̄kpọ didie ẹban̄a ubiere oro ẹkeyomde ndinam, ndien nso idi ubiere mbon oro ẹsan̄ade ke usụn̄ Jehovah?

²⁴ “Kpukpru owo oro ẹdụkde mbono emi oro ẹnyịmede ubiere emi, mbọk ẹdọhọ IH!”

²⁵ Ediwak an̄wambre ke mme itie ikie ke ofụri ererimbot ẹma ẹyomo nte kpukpru mme andidụk ẹkebọrọde “IH!’ ke ọkpọsọn̄ uyo. Mme Ntiense Jehovah inyeneke eyịghe ndomokiet nte ke mmimọ iyaka iso ndisan̄a ke usụn̄ Jehovah. Mmọ ẹnyene ọyọhọ ibetedem ke Jehovah ye mbuọtidem nte ke enye oyosu mme un̄wọn̄ọ esie. Mmọ ẹka iso ẹnam akpanikọ ẹnọ enye, inamke n̄kpọ m̀mê nso itịbe. Ndien mmọ ẹbiere ndinam uduak esie.

‘Abasi Ada ye Nnyịn’

26. Nso idi inem inem idaha mbon oro ẹsan̄ade ke usụn̄ Jehovah?

²⁶ Mme Ntiense Jehovah ẹti item andiwet psalm emi: “Bet Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene.” (Psalm 37:34) Mmọ ifreke mme ikọ nsịnudọn̄ Paul ẹmi: “Edieke Abasi adade ye nnyịn, anie edikeme ndibiọn̄ọ nnyịn? Enye emi mîkesịnke ndinọ Eyen Esiemmọ, edi ayakde Enye ọnọ ke ibuot nnyịn kpukpru, Enye edikeme didie nditre ndinọ nnyịn kpukpru n̄kpọ ndian ye Enye?” (Rome 8:31, 32) Ih, edieke nnyịn ikade iso ndisan̄a ke usụn̄ Jehovah, enye ọyọnọ nnyịn “kpukpru n̄kpọ uwak-uwak, ete idara ke esịt.” (1 Timothy 6:17) M̀mọ̀n̄ ikeme ndifọn n̄kan ebiet oro nnyịn idude—ndisan̄a ke usụn̄ Jehovah, ye ndima nditọete nnyịn iren ye iban. Sia Jehovah adade ye nnyịn, ẹyak nnyịn ibiere ndidu do nnyụn̄ nyọ tutu esịm akpatre, inyenede ọyọhọ mbuọtidem nte ke edikem ini esie, nnyịn iyokụt nte enye osude ofụri akpatre ke otu un̄wọn̄ọ esie.—Titus 1:2.

[Mme Ikọ idakisọn̄]

Nte Afo Emeti?

◻ Nso ke oyom man Christian asan̄a ke usụn̄ Jehovah?

◻ Ntak emi oyomde nnyịn ikọri mbuọtidem ke Jehovah inyụn̄ inam akpanikọ inọ enye?

◻ Nso un̄wam idu nte nnyịn isan̄ade ke usụn̄ Jehovah?

◻ Tịn̄ ndusụk akpan n̄kpọ ke ubiere oro ẹkenamde ke Mme Mbono “Usụn̄ Uwem Abasi.”

[Mme ndise ke page 18]

Ẹma ẹnam akpan ubiere ke Mme Mbono District ye eke Mme Idụt “Usụn̄ Uwem Abasi”