‘Ẹka Iso Ẹsan̄a Ke Christ’
“Nte mbufo ẹma ẹkebọ Christ Jesus Ọbọn̄ ndien, ẹsasan̄a ke Enye.”—COLOSSAE 2:6.
1, 2. (a) Didie ke Bible etịn̄ aban̄a uwem mbuọtidem Enoch ke utom Jehovah? (b) Didie ke Jehovah an̄wam nnyịn ndisan̄a ye enye, nte Colossae 2:6, 7 owụtde?
NDI akanam omokụt ekpri eyeneren asan̄ade ye ete esie? Ekpri eyen emi esinam kpukpru se ete esie anamde, iso esie ọyọhọ ye idatesịt; ete esie aka iso an̄wam enye, ye iso esie owụtde ima ye unyịme. Nte odotde, Jehovah ada kpa utọ ndise oro nditịn̄ mban̄a uwem eke utom edinam akpanikọ oro ẹnamde ẹnọ enye. Ke uwụtn̄kpọ, Ikọ Abasi ọdọhọ ete ke anam-akpanikọ eren oro Enoch ama aka iso “asan̄a ye Abasi” akpanikọ.—Genesis 5:24; 6:9.
2 Kpa nte ete oro owụtde edikere mban̄a akpan̄wamde ekpri eyen esie eren ndisan̄a ye enye, Jehovah ọnọ nnyịn mfọnn̄kan un̄wam emi odude. Enye ama ọnọ ikpọn̄îkpọn̄ edibon Eyen esie edi isọn̄. Ke kpukpru idaha ke anyan ini uwem esie mi ke isọn̄, Jesus Christ ama owụt mbiet Ete esie eke heaven ke mfọnmma usụn̄. (John 14:9, 10; Mme Hebrew 1:3) Ntre man isan̄a ye Abasi, oyom nnyịn isan̄a ye Jesus. Apostle Paul ekewet ete: “Nte mbufo ẹma ẹkebọ Christ Jesus Ọbọn̄ ndien, ẹsasan̄a ke Enye; yak mbufo ẹmụm n̄kam, ẹnyụn̄ ẹkọri ẹdaha ẹda ke Enye, ẹnyụn̄ ẹdọdiọn̄ ẹsọn̄ọ ẹda ke mbuọtidem, kpa nte ẹkekpepde mbufo, ẹnyụn̄ ẹnọ Abasi ekọm eti-eti.”—Colossae 2:6, 7.
3. Nte ekemde ye Colossae 2:6, 7, ntak emi nnyịn ikemede ndidọhọ ke ndisan̄a ye Christ esịne n̄kpọ akan sụk edina baptism?
3 Ke ntak emi mmọ ẹyomde ndisan̄a ye Christ, ẹdomode nditiene mfọnmma nde ikpat esie, nditọ ukpepn̄kpọ Bible oro ẹdide mbon esịt akpanikọ ẹna baptism. (Luke 3:21; Mme Hebrew 10:7-9) Ke ofụri ererimbot, ke 1997 ikpọn̄, se ibede owo 375,000 ẹma ẹnam akpan usio-ukot emi—se ibede owo 1,000 ke usen kiet kiet ke ẹbaharede ukem ukem. N̄kọri emi edi n̄kpọ nduaidem! Nte ededi, mme ikọ Paul ẹmi ẹwetde ke Colossae 2:6, 7 ẹwụt ẹte ke ekese abuana ke ndisan̄a ye Christ akan sụk edina baptism. Ikọ Greek oro ẹkabarede nte “ẹsasan̄a” etịn̄ aban̄a edinam oro enyenede ndikaka iso, ọkọride-kọri. Akan oro, Paul adian ete ke ndisan̄a ye Christ abuana n̄kpọ inan̄: ndimụm n̄kam ke Christ, ndikọri ndaha nda ke enye, ndidọdiọn̄ nsọn̄ọ nda ke mbuọtidem, ye ndiyọhọ ye ekọm. Ẹyak nnyịn ikere iban̄a ubak udịmikọ emi kiet kiet inyụn̄ ise nte enye an̄wamde nnyịn ndika iso nsan̄a ye Christ.
Nte Afo ‘Omomụm N̄kam ke Christ’?
4. Nso ke ‘ndimụm n̄kam ke Christ’ ọwọrọ?
4 Akpa, nte Paul ewetde, oyom nnyịn ‘imụm n̄kam ke Christ.’ (Men Matthew 13:20, 21 domo.) Didie ke owo ekeme ndinam n̄kpọ mbịne edimụm n̄kam ke Christ? Nte ededi, owo isikwe mme n̄kam eto, edi mmọ ẹdi akpan n̄kpọ ẹnọ eto—mmọ ẹnam enye enyene nsọn̄ọ ẹnyụn̄ ẹnọ enye udia. Ukem ntre, uwụtn̄kpọ ye ukpepn̄kpọ Christ ẹbem iso ẹtụk nnyịn ke usụn̄ oro enyịn mîkwe, ẹsọn̄ọde ẹwụhọ ke ekikere ye esịt nnyịn. Do ke mmọ ẹnam ikọri ẹnyụn̄ ẹsọn̄ọ nnyịn idem. Ke ini nnyịn iyakde mmọ ẹkara ekikere nnyịn, mme edinam nnyịn, ye mme ubiere nnyịn, onụk nnyịn ndiyak uwem nnyịn nnọ Jehovah.—1 Peter 2:21.
5. Didie ke nnyịn ikeme ‘ndikọri udọn̄’ nnọ udia eke spirit?
5 Jesus ama ama ifiọk oro otode Abasi. Enye akakam emen enye odomo ye udia. (Matthew 4:4) Kamse, ke Ukwọrọikọ esie oro ke Obot, enye ama okot utịm ike 21 oto nsio nsio n̄wed itiaita ke N̄wed Abasi Usem Hebrew. Ke nditiene uwụtn̄kpọ esie, ana nnyịn inam nte apostle Peter etemede—‘ikọri ọkpọsọn̄ udọn̄’ (NW) kaban̄a udia eke spirit “nte nsek-nditọ.” (1 Peter 2:2) Ke ini obufa nsekeyen oyomde udia, eyịghe ndomokiet isidụhe ke ọkpọsọn̄ udọn̄ esie. Edieke nnyịn idahaemi mînyeneke utọ udọn̄ oro iban̄a udia eke spirit, mme ikọ Peter ẹsịn udọn̄ ẹnọ nnyịn ‘ndikọri’ udọn̄ oro. Didie? Edumbet oro ẹkụtde ke Psalm 34:8 ekeme ndin̄wam: “Ẹtabi ẹnyụn̄ ẹse nte Jehovah ọfọnde.” Edieke nnyịn ‘itabide’ Ikọ Jehovah, kpa Bible, kpukpru ini, ndusụk ikotde ekpri ikpehe ke enye ke usen kiet kiet, nnyịn iyokụt ite ke enye anam ẹkọri ke n̄kan̄ eke spirit onyụn̄ ọfọn. Nte ini akade, udọn̄ nnyịn kaban̄a enye ọyọkọri.
6. Ntak emi edide akpan n̄kpọ nditie n̄kere se nnyịn ikotde?
6 Nte ededi, edi akpan n̄kpọ ndiyak udia ataha ọfọn ke ini idiade enye ima. Ntre oyom nnyịn itie ikere se nnyịn ikotde. (Psalm 77:11, 12) Ke uwụtn̄kpọ, nte nnyịn ikotde n̄wed oro Akakan Owo Oro Akanam Odude Uwem, ibuot kiet kiet eyenyene akakan ufọn edieke nnyịn ituakde ida inyụn̄ ibụp idem nnyịn ite: ‘Ewe ikpehe eke edu Christ ke ami n̄kụt ke mbụk emi, ndien didie ke n̄keme ndikpebe enye ke uwem mi?’ Nditie n̄kere ke usụn̄ oro ayan̄wam nnyịn ndida se nnyịn ikpepde nsịn ke edinam. Ekem, ke ini inyenede ndinam ubiere, nnyịn imekeme ndibụp idem nnyịn se Jesus akpanamde. Edieke nnyịn inamde ubiere nnyịn nte ekemde, nnyịn inọ uyarade nte ke imenen̄ede imụm n̄kam ke Christ.
7. Nso ikpenyene ndidi ekikere nnyịn kaban̄a n̄kpọsọn̄ ọnọ-nsọn̄idem udia eke spirit?
7 Paul akpak nnyịn n̄ko ete idia “ọkpọsọn̄ udia,” kpa mme ntotụn̄ọ akpanikọ eke Ikọ Abasi. (Mme Hebrew 5:14) Ndikot ofụri Bible ekeme ndidi akpa utịtmbuba nnyịn ke afan̄ emi. Ndien mme akpan ibuotikọ ukpepn̄kpọ efen efen ẹdu, utọ nte uwa ufak Christ, nsio nsio ediomi oro Jehovah akanamde ye ikọt esie, m̀mê ndusụk etop ntịn̄nnịm ikọ ke Bible. Ekese n̄wed ẹdu oro ẹdin̄wamde nnyịn ndikpep nnyụn̄ nnam utọ ọkpọsọn̄ udia eke spirit oro osụhọde odụk nnyịn idem. Nso idi uduak edikọ utọ ifiọk oro? Idịghe man ọnọ nnyịn ntak ndinam inua, edi man anam ima oro nnyịn inyenede inọ Jehovah ọkọri onyụn̄ odụri nnyịn inen̄ede ikpere enye. (1 Corinth 8:1; James 4:8) Edieke nnyịn ikpepde ifiọk emi ye ọkpọsọn̄ udọn̄, idade enye isịn ke edinam ke idem nnyịn, inyụn̄ idade enye in̄wam mmọ efen, nnyịn iyenen̄ede ikpebe Christ. Emi ayan̄wam nnyịn nditịm mmụm n̄kam ke enye.
Ndi Afo ‘Ọmọkọri Adaha Ada ke Christ’?
8. Nso ke ‘ndikọri ndaha nda ke Christ’ ọwọrọ?
8 Kaban̄a ikpehe efen eke edisan̄a ye Christ, Paul ọwọrọ usọp usọp ọkpọn̄ uwụtn̄kpọ kiet aka efen—ọkpọn̄ eke eto aka eke ufọk. Ke ini nnyịn ikerede iban̄a ufọk oro ẹsụk ẹbọpde, nnyịn ikereke iban̄a itiat idakisọn̄ ikpọn̄ edi n̄ko ufọk oro ọwọrọde ada edi se ẹkemede ndikụt, ebe ke ata ọkpọsọn̄ utom. Ukem ntre, oyom nnyịn inam ekese ọkpọsọn̄ utom ndikọri mme edu ye ido oro ẹbietde eke Christ. Owo iditreke ndikụt utọ ọkpọsọn̄ utom oro, idem kpa nte Paul ekewetde ọnọ Timothy ete: ‘Yak kpukpru owo ẹkụt n̄kọri fo.’ (1 Timothy 4:15; Matthew 5:16) Nso idi ndusụk utom Christian oro anamde nnyịn ikọri?
9. (a) Man ikpebe Christ ke utom ukwọrọikọ nnyịn, nso idi ndusụk nti utịtmbuba oro nnyịn ikemede ndinịm? (b) Nnyịn isan̄a didie ifiọk ke Jehovah oyom nnyịn idara utom nnyịn?
9 Jesus ama ọnọ nnyịn utom ete ikwọrọ inyụn̄ ikpep eti mbụk. (Matthew 24:14; 28:19, 20) Enye ama enịm mfọnmma uwụtn̄kpọ, ọnọde ikọ ntiense uko uko ye uforo uforo. Edi akpanikọ, tutu amama nnyịn idinamke ọfọn nte enye akanamde. Nte ededi, apostle Peter ama enịm utịtmbuba emi ọnọ nnyịn: “Ẹten̄e Christ ke esịt mbufo nte Ọbọn̄. Kpukpru ini ẹben̄e idem ndibọrọ kpukpru owo eke ẹdibụpde mbufo ntak idotenyịn emi mbufo ẹnyenede; edi ẹkpeme ndibọrọ ke sụn̄sụn̄ ido ye ke ido uten̄e.” (1 Peter 3:15) Edieke mîtiehe fi ke idem nte ke afo ‘kpukpru ini emeben̄e idem ndinọ ibọrọ,’ kûduọk idotenyịn. Nịm nti utịtmbuba oro ẹdin̄wamde fi ndisan̄a sụn̄sụn̄ n̄kpere idaha oro. Ndibabak ntịm idem ekeme ndin̄wam fi ndinam nneme fo enyene ukpụhọde m̀mê ndisịn itien̄wed kiet m̀mê iba. Afo emekeme ndinịm mme utịtmbuba ndinịm mme n̄wed Bible efen efen, ndinam mme mfiakn̄ka efen efen, m̀mê nditọn̄ọ ukpepn̄kpọ Bible. Ntịn̄enyịn ikpenyeneke ndinen̄ede n̄wụhọ ke ibat—nte ke ibat hour, mme n̄wed ẹnịmde, m̀mê mme ukpepn̄kpọ—edi ke uduot. Ndinịm nti utịtmbuba nnyụn̄ nsịn ukeme ndisịm mmọ ẹkeme ndin̄wam nnyịn ikop inem ndisịn idem nnyịn ke utom ukwọrọikọ. Se Jehovah oyomde edi oro—nnyịn ndinam n̄kpọ esie “ke idatesịt.”—Psalm 100:2; men 2 Corinth 9:7 domo.
10. Nso idi ndusụk utom Christian eken oro oyomde nnyịn inam, ndien didie ke mmọ ẹmi ẹn̄wam nnyịn?
10 Odu n̄ko mme utom oro nnyịn inamde ke esop oro ẹnamde nnyịn ikọri ke Christ. Enye oro edide akpan n̄kpọ akan edi eke ediwụt ima nnọ kiet eken, koro emi edide idiọn̄ọ mme ata Christian. (John 13:34, 35) Ke adan̄aemi nnyịn isụk ikpepde n̄kpọ, ata ediwak nnyịn imesinen̄ede idiana ye andikpep nnyịn, sia emi edide ndammana n̄kpọ. Nte ededi, nte nnyịn idahaemi imekeme nditiene item Paul nte ‘inyene in̄wan̄în̄wan̄ esịt’ ebe ke ndidiọn̄ọ mbon efen ke esop? (2 Corinth 6:13) Mbiowo n̄ko ẹyom ima ye esịtekọm nnyịn. Ke ndidiana ọtọkiet ye mmọ, iyomde inyụn̄ ibọde item mmọ emi otode N̄wed Abasi, nnyịn iyanam ọkpọsọn̄ utom mmọ enen̄ede emem. (Mme Hebrew 13:17) Ke ukem ini oro, emi eyetịp esịn ke nnyịn ndikọri ke Christ.
11. Nso nnennen ekikere ke nnyịn ikpenyene iban̄a baptism?
11 Baptism edi edinam emi esiduaide owo idem! Nte ededi, ke oro ebede nnyịn ikpodorike enyịn kpukpru idaha ke uwem nditie nduaidem nduaidem ntre. Akamba ikpehe eke nnyịn ndikọri ke Christ abuana ‘ndisan̄a ke ndutịm ke ukem usụn̄ emi.’ (Philippi 3:16, NW) Oro iwọrọke ndebe ndebe usụn̄ uwem oro efekde-fek owo. Enye n̄kukụre ọwọrọ ndisan̄a n̄ka iso ke nnennen usụn̄—ke mme ikọ efen, ndikọri nti edu eke spirit nnyụn̄ nsọn̄ọ nyịre ke mmọ ke usen ke usen, ke isua ke isua. Ti ete, “ẹyenyan̄a owo eke edimede ime tutu esịm akpatre.”—Matthew 24:13.
Ndi Afo ‘Ọmọdọdiọn̄ Ọsọn̄ọ Ada ke Mbuọtidem’?
12. Nso ke ‘ndidọdiọn̄ nsọn̄ọ nda ke mbuọtidem’ ọwọrọ?
12 Ke ọyọhọ ubak udịmikọ esie ita etịn̄de aban̄a nnyịn ndisan̄a ye Christ, Paul esịn udọn̄ ọnọ nnyịn ‘ndidọdiọn̄ nsọn̄ọ nda ke mbuọtidem.’ Edikabade kiet okot ntem, “ẹnọ nsọn̄ọ kaban̄a mbuọtidem,” koro ikọ Greek oro Paul akadade ekeme ndiwọrọ “ndinọ nsọn̄ọ, ubiọn̄, nnyụn̄ nnam edi se owo mîkemeke ndikpụhọde nte ekemde ye ibet.” Nte nnyịn ikọride ke ifiọk, ẹnọ nnyịn mme ntak efen efen ndikụt nte ke mbuọtidem nnyịn ke Jehovah Abasi enyene nsọn̄ọ ndien, ke akpanikọ, ekem ye ibet. Utịp edi nnyịn ndidọdiọn̄ nsọn̄ọ nda. Etetịm edi ọkpọsọn̄ n̄kpọ ọnọ ererimbot Satan ndikara nnyịn. Emi eti nnyịn aban̄a item Paul nte ‘ika iso ikọri isịm ọyọhọ idaha.’ (Mme Hebrew 6:1, NW) Edikọri nsịm ọyọhọ idaha ye edinyene nsọn̄ọnda ẹsan̄a ikpat kiet.
13, 14. (a) Nso n̄kpọndịk kaban̄a mmọ ndinyene nsọn̄ọnda ke mme Christian eke akpa isua ikie ke Colossae ẹkesobo? (b) Ekeme ndidi nso ikebehe apostle Paul?
13 Mme Christian eke akpa isua ikie ke Colossae ẹma ẹsobo n̄kpọndịk kaban̄a mmọ ndinyene nsọn̄ọnda. Paul ama odụri owo utọn̄ ete: “Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo; nte asan̄ade ekekem ye mme enyene-odudu eke ẹkarade ererimbot, mînyụn̄ isan̄ake ikekem ye Christ.” (Colossae 2:8) Paul ikoyomke mbon Colossae, ẹmi ẹma ẹkekabade ẹdi nditọ “Obio Ubọn̄ Eyen Ima” Abasi, ẹdi se ẹwọn̄ọrede ẹkpọn̄, ẹtụnde usụn̄ ẹkpọn̄ idaha edidiọn̄ eke spirit mmọ. (Colossae 1:13) Ẹda nso ẹtụn usụn̄? Paul ama anyan ubọk owụt “ifiọk owo,” kpa n̄kukụre ini emi ikọ emi odude ke Bible. Ndi enye eketịn̄ aban̄a mbon akwaifiọk Greece, utọ nte Plato ye Socrates? Okposụkedi mmọ ẹmi ẹkekamade n̄kpọndịk ẹnọ mme ata Christian, ke ini oro, ẹkeda ikọ oro “ifiọk owo” ẹtịn̄ ikọ ke ntatara usụn̄. Enye akawak nditịn̄ mban̄a ediwak otu ye mme ekikere—idem ye eke ido ukpono. Ke uwụtn̄kpọ, mme utọ Jew eke akpa isua ikie nte Josephus ye Philo ẹkekot ido ukpono mmọ ukpepn̄kpọ akwaifiọk—ndusụk man ẹnam enye enen̄ede edemede udọn̄.
14 Ekeme ndidi ndusụk ukpepn̄kpọ akwaifiọk oro ẹkebehede Paul ẹkedi eke ido ukpono. Ke ukperedem ke ukem ibuot leta esie oro ọkọnọde ẹsọk mbon Colossae, enye ama etịn̄ aban̄a mbon oro ẹkekpepde ẹte, “Kûmụm, kûtabi, kûtụk,” ke ntem etịn̄de otụk mme ikpehe Ibet Moses oro n̄kpa Christ akabiatde efep. (Rome 10:4) Ke adianade ye mme ukpepn̄kpọ akwaifiọk mme okpono ndem, mme odudu efen ẹma ẹdu oro ẹkesịnde idaha eke spirit esop ke itiendịk. (Colossae 2:20-22) Paul ama odụri owo utọn̄ aban̄a ukpepn̄kpọ akwaifiọk oro ekedide ubak “mme enyene-odudu eke ẹkarade ererimbot.” Utọ nsunsu ukpepn̄kpọ oro okoto owo.
15. Didie ke nnyịn ikeme ndifep ndidi se ekikere oro mîkemke ye N̄wed Abasi oro isiwakde ndisobo akarade?
15 Ndisịn udọn̄ nnọ mme ekikere owo ẹmi mînyeneke akpan isọn̄ ke Ikọ Abasi ekeme ndisịn nsọn̄ọnda Christian ke itiendịk. Ana nnyịn mfịn idu ke ukpeme iban̄a mme utọ n̄kpọndịk oro. Apostle John ọkọnọ item ete: “Ndima, ẹkûnịm kpukpru spirit ke akpanikọ, edi ẹdomo mme spirit ẹse m̀mê mmọ ẹdi eke Abasi.” (1 John 4:1) Ntre edieke nsan̄a ufọkn̄wed odomode ndinam fi enịm ke akpanikọ nte ke ndida mme edumbet Bible ndu uwem edi ido eset, mîdịghe edieke etiede nte mbọhọidụn̄ ọmọn̄ onụk fi esịn ke edu uma inyene, mîdịghe edieke nsan̄autom ke n̄kari n̄kari usụn̄ enyịkde fi ndibiat ubieresịt fo oro Bible ọnọde ukpep, m̀mê idem edieke ekemmọ andinịm ke akpanikọ enyenede edu ukụt ndudue, etịn̄de ikọ etikwo etikwo aban̄a mbon en̄wen ke esop etiene ekikere idemesie, kûnyịme se enye etịn̄de. Sat se mîkemke ye Ikọ Abasi sion̄o. Nte nnyịn inamde ntre, nnyịn iyomụm nsọn̄ọnda nnyịn ikama nte nnyịn isan̄ade kiet ye Christ.
‘Ẹyọhọ ye Mbuọtidem ke Ndinọ Ekọm’
16. Nso idi ọyọhọ ikpehe inan̄ ke ndisan̄a ye Christ, ndien nso mme mbụme ke nnyịn ikeme ndibụp?
16 Ọyọhọ ikpehe inan̄ eke edisan̄a ye Christ oro Paul asiakde edi nte yak nnyịn ‘iyọhọ ye mbuọtidem ke ndinọ ekọm.’ (Colossae 2:7, NW) Ikọ oro “ẹyọhọ” anam ẹti akpa mmọn̄ oro ọyọhọde ofụk mben esie. Emi ọnọ ekikere nte ke nnyịn nte mme Christian, edinọ ekọm nnyịn enyene ndidi n̄kpọ oro akade-ka iso m̀mê edu ofụri ini. Nnyịn kiet kiet iyanam ọfọn ndibụp, ‘Nte ami mmesiwụt esịtekọm?’
17. (a) Ntak emi ẹkemede ndidọhọ ke kpukpru nnyịn imenyene ekese n̄kpọ ndiwụt esịtekọm mban̄a, idem ke mme ini nsọn̄ọn̄kpọ? (b) Nso idi ndusụk enọ ẹtode Jehovah ẹmi afo enen̄erede owụt esịtekọm aban̄a?
17 Ke akpanikọ, kpukpru nnyịn imenyene ntak oro ekemde ndiyọhọ ye ekọm mban̄a Jehovah kpukpru usen. Idem ke mme ndiọk-n̄kan ini, n̄kpri n̄kpọ ẹkeme ndidu oro ẹnamde inyene ifụre. Ufan emi owụtde mbọm. Owo ima emi otụkde ke usụn̄ oro ọnọde nsọn̄ọ. Ndide idap oro ekemde ke okoneyo esinam ẹfiak ẹkop nsọn̄idem. Inem inem udia esitre biọn̄. Ikwọ inuen, imam eyenọwọn̄, nsem nsem awawa ikpaenyọn̄, mbịtmbịt ofụm—nnyịn imekeme ndikụt kpukpru ẹmi ye mme n̄kpọ efen efen ke usen kiet. Edi ata mmemmem n̄kpọ ndida mme utọ enọ oro didie didie. Ndi idotke ndidọhọ sọsọn̄ọ ke kpukpru ẹmi? Kpukpru mmọ ẹto Jehovah, Ebiet emi “kpukpru nti edinọ ye kpukpru enọ eke ẹfọnde ẹma” ẹtode. (James 1:17) Ndien enye ọnọ nnyịn mme enọ oro ẹkande mmọ ẹmi—ke uwụtn̄kpọ, uwem ke idemesie. (Psalm 36:9) Ke adianade do, enye ọnọ nnyịn ifet ndidu uwem ke nsinsi. Man ọnọ enọ emi, Jehovah ama anam n̄kponn̄kan uwa ebe ke ndinọ ikpọn̄îkpọn̄ edibon Eyen esie, “se idatde enye esịt ofụri usen.”—Mme N̄ke 8:30; John 3:16.
18. Didie ke nnyịn ikeme ndiwụt esịtekọm nnyịn nnọ Jehovah?
18 Mme ikọ andiwet psalm ẹdi akpanikọ, ndien, didie ntem: “Ọfọn ndikọm Jehovah.” (Psalm 92:1) Ke ukem usụn̄ oro, Paul ama eti mme Christian ke Thessalonica ete: “Ẹnọ ekọm ke kpukpru n̄kpọ.” (1 Thessalonica 5:17; Ephesus 5:20; Colossae 3:15) Nnyịn owo kiet kiet imekeme ndibiere ndinen̄ede n̄wụt esịtekọm. Mme akam nnyịn ikpenyeneke ndisịne sụk mme eben̄e oro iben̄ede Abasi kaban̄a se iyomde. Ọfọn ẹsịn mmọ ẹmi ke akam. Edi kere nte ekpenyenede ufan emi enemede nneme ye afo n̄kukụre ke ini enye oyomde n̄kpọ oto fi! Ntre ntak mûbọn̄ke akam unọ Jehovah n̄kukụre ndikọm nnyụn̄ ntoro enye? Mme utọ akam oro ẹkpenem enye esịt didie ntem ke ini enye osụkde enyịn ese ererimbot unana esịtekọm emi! Udiana ufọn edi nte ke mme utọ akam oro ẹkeme ndin̄wam nnyịn ndiwụk ekikere ke nti n̄kpọ eke uwem, ẹtide nnyịn adan̄a nte nnyịn inen̄erede ibọ edidiọn̄.
19. Didie ke usem Paul ke Colossae 2:6, 7 ọnọ ekikere nte ke kpukpru nnyịn imekeme ndika iso ndinam n̄kọri ke ndisan̄a ye Christ?
19 Nte idịghe n̄wọrọnda n̄kpọ ndikụt adan̄a enyene-ọniọn̄ ndausụn̄ ẹmi ẹkemede ndida ntọ ubak udịmikọ kiet ke Ikọ Abasi? Item Paul nte ika iso isan̄a ye Christ edi n̄kpọ oro nnyịn owo kiet kiet ikpoyomde ndinam. Ẹyak nnyịn ke ntre ibiere ‘ndimụm n̄kam ke Christ,’ ‘ikọri ke enye,’ ‘isọn̄ọ ida ke mbuọtidem,’ inyụn̄ ‘inọ ekọm eti-eti.’ Utọ item oro enen̄ede edi akpan n̄kpọ ọnọ mbon oro ẹnade baptism obufa obufa. Edi enye abuana kpukpru nnyịn. Kere nte akpan orụn̄ ọkọride odụk esịt isọn̄ ye nte ufọk oro ẹsụk ẹbọpde ọdiọn̄de-diọn̄ ọwọrọ ada. Ntre tutu amama nnyịn ndisan̄a ye Christ itreke. Ekese ufan̄ odu ndinam n̄kọri. Jehovah ayan̄wam nnyịn onyụn̄ ọdiọn̄ nnyịn, koro enye oyom nnyịn ika iso isan̄a ye enye ye edima Eyen esie ke nsinsi.
Didie ke Afo Ọkpọbọrọ?
◻ Nso ibuana ke ndisan̄a ye Christ?
◻ Nso ke ‘ndimụm n̄kam ke Christ’ ọwọrọ?
◻ Didie ke nnyịn ikeme ‘ndikọri ndaha nda ke Christ’?
◻ Ntak emi edide akpan n̄kpọ ntre ‘ndidọdiọn̄ nsọn̄ọ nda ke mbuọtidem’?
◻ Nso mme ntak ke nnyịn inyene ‘ndiyọhọ ye ekọm’?
[Ndise ke page 10]
Ẹkeme nditre ndikụt mme n̄kam eto, edi mmọ ẹnọ enye udia ẹnyụn̄ ẹsọn̄ọ ẹmụm enye ẹkama