Kwọ Itoro Nọ Jehovah
“Nyekwọ nnọ Jehovah, koro enye okon̄de.”—EXODUS 15:1.
1. Mme ewe edu Jehovah ẹnọ nnyịn ntak nditoro enye?
PSALM 150 ọnọ ewụhọ utịm ike 13 nditoro Jehovah m̀mê Jah. Akpatre ufan̄ikọ ọdọhọ ete: “Yak kpukpru n̄kpọ eke ẹduọkde ibifịk ẹtoro Jehovah. Mbufo ẹtoro Jehovah.” Nte Mme Ntiense Jehovah, nnyịn imọfiọk nte ke Jehovah odot itoro nnyịn. Enye edi Andikara Ekondo, Ata Edikon̄, nsinsi Edidem, Andibot nnyịn, Anam-Ufọn n̄kpọ nnọ nnyịn. Enye inyeneke mbiet, edi n̄wọrọnda, inyeneke udomo, inyeneke n̄ka, ke ediwak usụn̄. Enye edi akakan ke ọniọn̄, akakan ke odudu, ata mfọnmma ke unenikpe, ye uwụtn̄kpọ ima. Enye ke akande kpukpru n̄kpọ eken ọfọn; enye edi anam akpanikọ. (Luke 18:19; Ediyarade 15:3, 4) Nte enye odot itoro nnyịn? Ke akpanikọ enye enen̄ede odot!
2. Nso ntak ke nnyịn inyene ndiwụt esịtekọm nnọ Jehovah?
2 Idịghe utuakibuot ye itoro nnyịn ikpọn̄îkpọn̄ ke Jehovah odot edi n̄ko esịtekọm ye ekọm nnyịn kaban̄a kpukpru se enye anamde ọnọ nnyịn. Enye edi Andinọ “kpukpru nti edinọ ye kpukpru enọ eke ẹfọnde ẹma.” (James 1:17) Enye edi Obube Mmọn̄, kpa Ntọn̄ọ, kpukpru uwem. (Psalm 36:9) Kpukpru n̄kpọ oro nnyịn inyenede nte mme andibuana ke ekpụk ubonowo ẹto enye, koro enye edi Akwa Andibot nnyịn. (Isaiah 42:5) Enye n̄ko edi Andinọ kpukpru mme edidiọn̄ eke spirit ẹmi ẹsịmde nnyịn ebe ke spirit esie, esop esie, ye Ikọ esie. Nnyịn inyene edifen mme idiọkn̄kpọ ke ntak emi enye ọnọde Eyen esie nte ufak nnyịn. (John 3:16) Nnyịn imenyene idotenyịn Obio Ubọn̄ aban̄ade ‘obufa enyọn̄ ye obufa isọn̄ emi edinen ido edidụn̄de.’ (2 Peter 3:13) Nnyịn imenyene eti itie ebuana ye ekemmọ mme Christian. (Rome 1:11, 12) Nnyịn imenyene ukpono ye edidiọn̄ ke ndidi Mme Ntiense esie. (Isaiah 43:10-12) Ndien nnyịn imenyene ọsọn̄urua ifet edibọn̄ akam. (Matthew 6:9-13) Ke akpanikọ, nnyịn imenyene ediwak ntak ndikọm Jehovah!
Mme Usụn̄ Oro Nnyịn Ikemede Nditoro Jehovah
3. Ke ewe nsio nsio usụn̄ ke nnyịn ikeme nditoro Jehovah nnyụn̄ n̄wụt esịtekọm oro nnyịn inyenede inọ enye?
3 Didie ke nnyịn, nte mme asan̄autom Jehovah oro iyakde idem inọ, ikeme nditoro enye nnyụn̄ n̄wụt esịtekọm nnyịn? Nnyịn ikeme ndinam oro ebe ke utom ukwọrọikọ Christian—ndinọ ikọ ntiense ke ufọk ke utọk, ndinam mfiakn̄ka, ndinịm mme ukpepn̄kpọ Bible, nnyụn̄ mbuana ke unọ ikọ ntiense efak. Nnyịn n̄ko imekeme nditoro enye ebe ke ndinọ ikọ ntiense ido nneme ke ini ekededi oro ifet ebederede. Ndien n̄ko, nnyịn imekeme nditoro Jehovah ebe ke eti eduuwem nnyịn, idem ebe ke ndikama idem nnyụn̄ nsịne n̄kpọ ke usụn̄ eyede onyụn̄ owụtde iso o-bụt. Ẹsiwak nditoro Mme Ntiense Jehovah ke ndidi nti uwụtn̄kpọ ke afan̄ ẹmi. Akan oro, nnyịn imekeme nditoro Jehovah nnyụn̄ n̄kọm enye ebe ke akam.—Se 1 Chronicles 29:10-13.
4. Nso idi kiet ke otu mfọnn̄kan usụn̄ oro nnyịn ikemede nditoro ima ima Ete nnyịn eke heaven?
4 Ke adianade do, kiet ke otu ata mfọnn̄kan usụn̄ oro nnyịn ikemede nditoro ima ima Ete nnyịn eke heaven edi ke nditoro enye ye nti edu esie ke mme inem inem ikwọ Obio Ubọn̄. Ediwak mme ebre ikwọ ye mme anditịm ikọ ikwọ ẹnyịme nte ke n̄kpọ mbre ikwọ oro enemde akan edi uyo owo. Mme nta ke ebre ndinem ikwọ ẹma ẹkop nduaidem ndiwet mme ikwọ kọnsat koro ekese uyụhọ odude ndikpan̄ utọn̄ nnọ uyo ikwọ owo.
5. Kaban̄a nso ntak ke nnyịn ikpada edikwọ mme ikwọ Obio Ubọn̄ ke akpan n̄kpọ?
5 Didie ke ana edi Jehovah esidara ntem ndikpan̄ utọn̄ n̄kop nte mme owo ẹkwọde ikwọ, akpan akpan ke ini mmọ ẹkwọde mme ikwọ itoro ye esịtekọm! Ke akpanikọ ndien, nnyịn ikpenyene ndida edikwọ mme ikwọ Obio Ubọn̄ ke nsio nsio mboho nnyịn ke akpan n̄kpọ—ke mme mbonoesop, mme mbono circuit, mme usen akpan mbono, mme mbono district, ye ke mme mbono ofụri ererimbot. N̄wedikwọ nnyịn ọyọhọ ye mme ata inem inem ikwọ, emi mbonan̄wa ẹsiwak nditoro nte enye enemde. Adan̄a nte nnyịn isịnde idem ke edu edikwọ mme ikwọ Obio Ubọn̄, ntre ke nnyịn ida inemesịt isọk mbon en̄wen inyụn̄ ibọ ufọn ke idem nnyịn.
Ndikwọ Itoro Nnọ Jehovah ke Mme Ini Bible
6. Didie ke nditọ Israel ẹkewụt esịtekọm ke edinyan̄a oro ẹkenyan̄ade mmọ ke Ididuot Inyan̄?
6 Ikọ Abasi asian nnyịn ete ke Moses ye nditọ Israel eken ẹma ẹkwọ ikwọ edikan ke ini ẹkenyan̄ade ẹsio ke ubọk udịmekọn̄ Pharaoh ke Ididuot Inyan̄. Ikwọ mmọ ọkọtọn̄ọ ye mme ikọ ẹmi: “Nyekwọ nnọ Jehovah, koro enye okon̄de; enye ekemen horse ye andidoro horse, ọduọk ke inyan̄. Jehovah edi odudu mi ye ikwọ, omonyụn̄ edi edinyan̄a mi: enye edi Abasi mi, ndien nyekpono enye.” (Exodus 15:1, 2) Nnyịn imekeme ndikere mban̄a ifiopesịt ye idara oro nditọ Israel ẹkenyenede nte mmọ ẹkekwọde mme ikọ oro ke ẹma ẹkenyene utịbe utịbe edinyan̄a!
7. Ewe n̄wọrọnda idaha efen ke N̄wed Abasi Usem Hebrew owụt nte nditọ Israel ẹketorode Jehovah ke ikwọ?
7 Ke 1 Chronicles 16:1, 4-36, nnyịn ikot ite ke ẹma ẹtoro Jehovah ke ndikwọ ikwọ ye ke ndibre mme n̄kukwak ikwọ ke ini David ekemende Ekebe Ediomi ọnyọn̄ edi Jerusalem. Oro ekenen̄ede edi ini idara. Ẹma ẹkwọ ikwọ itoro n̄ko ẹnọ Jehovah ọkọrọ ye n̄kukwak ikwọ ke ini Edidem Solomon akayakde temple ke Jerusalem ọnọ. Nnyịn ikot ke 2 Chronicles 5:13, 14 ite: “Edikem adan̄aemi mme andifụri ye mme andikwọ, nte owo kiet, ẹnamde uyom ke uyo kiet, ẹkọm ẹnyụn̄ ẹtoro Jehovah; ke ini mmọ ẹnyụn̄ ẹmenerede uyo ẹdian ye ukorowo, ye cymbal, ye n̄kpọ ikwọ, ẹnyụn̄ ẹtorode Jehovah, koro enye ọfọnde, koro ima esie edide nsinsi: ndien obubịt enyọn̄ ọyọhọ ke ufọk, kpa ufọk Jehovah. Ndien obubịt enyọn̄ oro iyakke mme oku ẹda ẹnam n̄kpọ: koro ubọn̄ Jehovah ọyọhọde ke ufọk Abasi.” Nso ke oro owụt? Nte ke Jehovah ke akakpan̄ utọn̄ ke inem inem ikwọ itoro emi onyụn̄ okop inemesịt aban̄a enye, nte obubịt enyọn̄ oro mîtoho odudu owo okowụtde. Ke ukperedem, udịm mbonikwọ iba ẹma ẹkwọ ikwọ ke ini ẹkeyakde ibibene Jerusalem ẹnọ ke eyo Nehemiah.—Nehemiah 12:27-42.
8. Nso iwụt ke nditọ Israel ẹma ẹda edikwọ ikwọ ke akpan n̄kpọ?
8 Ke akpanikọ, edikwọ ikwọ ekedi akpan ikpehe ke utuakibuot ke temple tutu ẹkesio mme Levite 4,000 ẹnịm san̄asan̄a ẹnọ utom ikwọ. (1 Chronicles 23:4, 5) Mmọemi ẹma ẹsidiana ye mme ọkwọ ikwọ. Ikwọ, akpan akpan mme ọkwọ ikwọ, ẹma ẹnyene akpan itie ke utuakibuot, ikenen̄ekede idi man ẹwụt mme akpan n̄kpọ ke Ibet, edi man ẹnam ẹnyene nnennen edu utuakibuot. Enye ama an̄wam nditọ Israel ndituak ibuot nnọ Jehovah ke spirit. Tịmfiọk ntịmidem ye ntịn̄enyịn oro ẹkenọde ke mme akpan n̄kpọ oro ẹkenyenede ndidu ke ikpehe emi: “Ibat mmọemi, ye nditọete mmọ emi ẹkpepde ikwọ Jehovah, kpukpru mme ọfiọkn̄kpọ owo, ẹdi ikie iba ye anan̄ ye itiaita.” (1 Chronicles 25:7) Tịmfiọk nte mmọ ẹkedade edikwọ itoro nnọ Jehovah ke akpan n̄kpọ. Ẹma ẹnọ mmọ ukpep ke ikwọ ndien mmọ ẹkedi nta!
9. Nso nsọn̄uyo ke ẹdori ke ndikwọ ikwọ ke N̄wed Abasi Christian Usem Greek?
9 Ke edide edisịm akpa isua ikie eke eyo nnyịn, nso ke nnyịn ikụt? Jesus, ke okoneyo oro ẹdade enye ẹnọ, ye ediwak n̄kpọ ẹfịghede enye ke ekikere, ama osụk okụt nte odotde ndiberi usọrọ Passover esie nnyụn̄ ntọn̄ọ Editi n̄kpa esie ke ndikwọ itoro nnọ Jehovah. (Matthew 26:30) N̄ko, nnyịn ikot ite ke n̄kpọ nte “ufọt okoneyo,” Paul ye Silas, ke ẹma ẹkemia ẹnyụn̄ ẹsịn ke ufọk-n̄kpọkọbi, “ẹbọn̄ akam ẹnyụn̄ ẹkwọ ikwọ ẹnọ Abasi, mbon n̄kpọkọbi ẹnyụn̄ ẹkop.”—Utom 16:25.
Ndikwọ Itoro—Akpan Ikpehe Utuakibuot Nnyịn
10. Nso ewụhọ ke ẹnọ ke Ikọ Abasi kaban̄a editoro enye ke ikwọ?
10 Nte afo emesikere ete ke ndikwọ ikwọ Obio Ubọn̄ inen̄ekede idi akpan n̄kpọ inọ fi ndinọ enye ntịn̄enyịn ofụri esịt? Ke edide ntre, nte afo ukpafiakke udụn̄ọde n̄kpọ emi, ke ẹkerede ẹban̄a nte Jehovah Abasi ye Jesus Christ ẹdade edikwọ itoro ke akpan n̄kpọ? Kamse, Ikọ Abasi ọyọhọ ye mme ewụhọ nditoro Jehovah nnyụn̄ n̄kwọ itoro nnọ enye! Ke uwụtn̄kpọ, ke Isaiah 42:10, nnyịn ikot ite: “Mbufo ẹkwọ obufa ikwọ ẹnọ Jehovah, ye itoro esie ke utịt ererimbot, mbufo ẹmi ẹsụhọde ke inyan̄, ye se iyọhọde ke esịt, mbufo mme isuo ye mme andidụn̄ mmọ.”—Se n̄ko Psalm 96:1; 98:1.
11. Nso item ke apostle Paul ọkọnọ kaban̄a edikwọ ikwọ?
11 Apostle Paul ama ọfiọk ete ke edikwọ ikwọ ekeme ndidemede spirit nnyịn, ntre enye ama ọnọ nnyịn item utịm ikaba ke n̄kpọ emi. Nnyịn ikot ke N̄wed Mbon Ephesus 5:18, 19 ite: “Ẹyọhọ ye spirit. Ẹda psalm ye hymn ye ikwọ spirit ẹneme nneme ye kiet eken, ẹkwọ ẹnyụn̄ ẹnam edinem uyom ke esịt mbufo ẹnọ Ọbọn̄.” Ndien ke N̄wed Mbon Colossae 3:16, nnyịn ikot ite: “Ẹyak ikọ Christ odụn̄ ọyọhọ ọyọhọ ke esịt mbufo ke kpukpru eti ibuot; ẹmen psalm ye hymn ye ikwọ uwem spirit ẹkpep ẹnyụn̄ ẹteme kiet eken, ẹkwọ itoro ẹnọ Abasi ye esịtekọm.”
12. Mme uwụtn̄kpọ ewe ke nnyịn inyene ke nte mme ikwọ nnyịn ẹn̄wamde nnyịn ndinọ mbon en̄wen ukpep ye item?
12 Fiọk ete ke idaha kiet kiet Paul etịn̄ aban̄a edikwọ ikwọ ndien ndien, ke ini enye asiakde ‘psalm, ikwọ itoro Abasi, ikwọ spirit, edikwọ nnyụn̄ nnam edinem uyom ke esịt.’ N̄ko, enye ọkọtọn̄ọ mme ikọ oro enye eketịn̄de ọnọ mbon Colossae ke ndidọhọ nte ke ebede ke usụn̄ emi ke nnyịn imekeme ‘ndikpep nnyụn̄ nteme kiet eken.’ Ndien nnyịn ke akpanikọ imanam oro, nte ẹkemede ndikụt ke mme ibuotikọ ikwọ nnyịn—“All Creation, Praise Jehovah!” (Kpukpru Edibotn̄kpọ Ẹtoro Jehovah!) (nọmba 5), “Be Steadfast, Unmovable!” (Ẹsọn̄ọ Ẹda, Ẹkûsehede!) (nọmba 10), “Be Joyful for the Kingdom Hope!” (Ẹdat Esịt ke Idotenyịn Obio Ubọn̄!) (nọmba 16), “Fear Them Not!” (Kûfehe Mmọ!) (nọmba 27), “Laud Jehovah Our God!” (Toro Jehovah Abasi Nnyịn!) (nọmba 100), ke ndinọ ibat ibat uwụtn̄kpọ.
13. Didie ke “asan̄autom emi anamde akpanikọ, onyụn̄ enyenede ọniọn̄” owụt nte edikwọ ikwọ edide akpan ikpehe ke utuakibuot nnyịn?
13 Ke n̄kemuyo ye mme ewụhọ ẹmi, “asan̄autom emi anamde akpanikọ, onyụn̄ enyenede ọniọn̄” omodiomi man mme mboho nnyịn—mme mbonoesop, mme mbono circuit, mme usen akpan mbono, mme mbono district, ye mme mbono ofụri ererimbot—ẹberede ẹnyụn̄ ẹberi ke ndikwọ mme ikwọ Obio Ubọn̄. (Matthew 24:45) Ke adianade do, ẹnam ndutịm man ẹkwọ mme ikwọ ke mme ini eken ke ini mboho ẹmi. Sia mme mbonesop nnyịn nte ido edide ẹsitọn̄ọde ye edikwọ ikwọ Obio Ubọn̄, nte nnyịn ikpanamke edi ido ndisịm ke eti ini, ibakde ika man ikabuana ke ikpehe utuakibuot nnyịn enyeoro? Ndien sia ẹsiberide mme mbonoesop ye edikwọ ikwọ, nte nnyịn ikpebetke tutu akpatre ikwọ ye akam oro esitienede enye ndondo oro?
14. Nso uwụtn̄kpọ ke nnyịn inyene kaban̄a mme ikwọ oro ẹdotde emi ẹmekde ẹnọ mme ndutịm nnyịn?
14 Ẹsimek mme ikwọ ke mme mbono nnyịn ye ntịn̄enyịn man ẹkekem ye ndutịm. Ke uwụtn̄kpọ, ke mme Mbono District “Ukpepn̄kpọ Abasi” ke 1993, ọyọhọ ikwọ 191, “Make the Truth Your Own” (Nam Akpanikọ Edi Okwo), emi esịnde udọn̄ ọnọ mme Christian ndin̄wana ye Satan, ererimbot, ye mbiara ikpọkidem, ye unana ubiatini ama etiene utịn̄ikọ ita oro ẹkenemede n̄kpọ ẹban̄a mme asua ẹmi. Kpasụk ntre, ọyọhọ ikwọ 164, “Children—Precious Gifts From God” (Nditọ—Ọsọn̄urua Enọ Ẹtode Abasi), emi ọyọhọde ye item ẹnọde mme ete ye eka, ama etiene utịn̄ikọ oro ekenemede mme mbiomo oro mme ete ye eka ẹnyenede ndinọ nditọ mmọ ukpep. Ọyọhọ ikwọ 70, “Be Like Jeremiah” (Biet Jeremiah), ama ebem udịm udịm utịn̄ikọ oro ẹkekọn̄ọde ke mme prọfesi Jeremiah iso. Ke ẹma ẹkekụre nneme aban̄ade nsio nsio ikpehe utom ukwọrọikọ Obio Ubọn̄ nnyịn ẹma ẹkwọ ọyọhọ ikwọ 156, “I Want To” (Mmonyịme), kpa ikwọ oro enyenede n̄kpọ ndinam ye utom. Ẹwụt ukem ntịn̄enyịn oro ndimek mme ikwọ nnọ Ukpepn̄kpọ Enyọn̄-Ukpeme, Esoputom, ye Ufọkn̄wed Utom Ukara Abasi. Ntre n̄ko ke ini mbiowo ẹnọde utịn̄ikọ an̄wa ẹnyụn̄ ẹwụtde ikwọ oro ẹdidade ẹberede ndutịm oro, mmọ ẹkpenyene ndimek ikwọ oro odotde ye ibuotikọ utịn̄ikọ mmọ.
15. Didie ke etieibuot okpokoro mbonoesop ekeme ndinam ẹkọri esịtekọm oro ẹnyenede ẹnọ ikwọ oro ẹnyenede ndikwọ?
15 Ke ọtọtde ikwọ oro ẹdikwọde, etieibuot okpokoro ekeme ndidemede esịtekọm oro ẹnyenede ẹnọ ikwọ oro ebe ke nditịn̄ ibuotikọ esie. Idịghe mme nọmba edi edi ibuot nneme N̄wed Abasi ke nnyịn ikwọ. N̄ko emi eyen̄wam esop nditịm n̄wụt esịtekọm nnọ ikwọ oro edieke ẹfiọkde itien̄wed oro odude ke idak ibuotikọ ikwọ oro. Ekem n̄ko, esisịt utịn̄ikọ ekeme ndidi se idotde, utọ nte enyeoro edinamde kpukpru owo ẹnyene edu ikwọ oro.
Wụt Esịtekọm Ban̄a Eti Ido Jehovah ke Ndikwọ Ikwọ
16. Didie ke nnyịn ikeme nditiene mbuana ke edikwọ ikwọ?
16 Sia mme ikọ ikwọ Obio Ubọn̄ nnyịn ẹnyenede se ẹwọrọde, oyom nnyịn iwụk ntịn̄enyịn ke mme ikọ ikwọ nte nnyịn ikwọde mmọ. Oyom nnyịn ibuana ke ndikwọ ikwọ kiet kiet. Ndusụk, utọ nte mmọ oro ẹnyenede n̄kpọ ndinam ye ima, mbun̄wụm spirit, ẹsitụk esịt. (Galatia 5:22) Nnyịn isikwọ mmọemi ye odudu ye ufiop. Mmọ en̄wen ye idara, ndien nnyịn ikpenyene ndidomo ndikwọ mmọ ye inemesịt. Mmọ eken ẹdi n̄kpọsọn̄ ikwọ isan̄, ndien akpana idomo ndikwọ mmọemi ye ifiopesịt ye ọkpọsọn̄ uko. Ke Ufọkn̄wed Utom Ukara Abasi nnyịn, ẹsinọ nnyịn item ndisịn ufiop nte otụkde owo ke idem, ye ifiopesịt ke mme utịn̄ikọ nnyịn. Ndiwụt ufiop, nte otụkde owo ke idem, ye ifiopesịt ke ini ikwọde mme ikwọ nnyịn akam edi akpan n̄kpọ akan.
17. (a) Nso ubiomikpe oro ẹkenọde nditọ Israel oro mîkanamke akpanikọ ke nnyịn mîkpoyomke kaban̄a mme ikwọ oro nnyịn ikwọde? (b) Nso isidi utịp ke ini nnyịn idade mme item oro ẹdude ke mme ikwọ nnyịn ke akpan n̄kpọ?
17 Edieke nnyịn ikpọkwọde mme ikwọ Obio Ubọn̄ nnyịn ye mme n̄kpọ efen ke ekikere, ifiọkke se mme ikọ oro ẹwọrọde ọyọhọ ọyọhọ, nte nnyịn ke ndusụk usụn̄ ikpebietke nditọ Israel oro mîkanamke akpanikọ ẹmi ẹkesuade ẹnọ mmọ koro, ke adan̄aemi mmọ ẹketorode Abasi ke n̄kpọkinua, esịt mmọ ẹkeda nsannsan ẹkpọn̄ enye? (Matthew 15:8) Nnyịn iyomke utọ ubiomikpe oro kaban̄a usụn̄ nte nnyịn ikwọde mme ikwọ Obio Ubọn̄, nte imoyom? Ke ini ikwọde mme ikwọ Obio Ubọn̄ nnyịn ke usụn̄ oro owụtde esịtekọm oro odotde, nnyịn ididemekede idem nnyịn ikpọn̄îkpọn̄ edi n̄ko mbon oro ẹtiede ẹdiana nnyịn, esịnede n̄kpri owo. Ih, edieke kpukpru owo oro ẹkwọde ikwọ ke Ufọkmbono Obio Ubọn̄ nnyịn ẹdade item oro ẹsịnede ke mme ikwọ ẹmi ke akpan n̄kpọ, emi eyedi okopodudu n̄kpọ nsịnudọn̄ ndisịn ifịk ke utom ukwọrọikọ nnyụn̄ mfep mme afia edinam idiọkn̄kpọ.
18. Nso utịp ke edikwọ mme ikwọ Obio Ubọn̄ ekenyene ke idem n̄wan kiet?
18 Ediwak ini, mbon an̄wa ẹsima mme ikwọ Obio Ubọn̄ oro nnyịn isikwọde. Inikiet ko ẹma ẹmịn̄ ke Enyọn̄-Ukpeme ete: “Nte ke [nnyịn] ndikwọ ikwọ ekeme n̄ko ndinam mme owo ẹnyene nnennen ifiọk aban̄ade Jehovah Abasi edi se ẹkemede ndikụt nto ifiọk n̄kpọntịbe n̄wan kiet emi akanade baptism ke Mbono ‘Edisana Edikan’ eke 1973 ke Yankee Stadium, ke obio New York. Enye ke akpa ini akaka Ufọkmbono Obio Ubọn̄ n̄kann̄kụk ke idemesie ikpọn̄ onyụn̄ odu ke ofụri mbonoesop iba oro. Nte esop ẹkekwọde ikwọ . . . ‘Keep Your Eyes on the Prize!’ (Wụk Enyịn Fo ke Utịp!), mme ikọ ikwọ oro ye nte ẹkekwọde ama otụk enye tutu enye ebiere ete ke oro edi ebiet emi imọ inyenede ndidu. Ekem enye ama okosobo ye kiet ke otu Mme Ntiense onyụn̄ obụp aban̄a ukpepn̄kpọ Bible, ndien [enye] ama anam n̄kọri okosịm edikabade ndi Christian ntiense Jehovah.”
19. Nso akpatre nsịnudọn̄ ke ẹnọ ẹban̄a edikwọ mme ikwọ Obio Ubọn̄ nnyịn ke ofụri esịt?
19 Ke ata ediwak mbonoesop nnyịn, esisịt ifet kpọt esidu ọnọ otuowo nditịn̄ nte etiede mmọ ke idem ye esịtekọm mmọ. Edi kpukpru nnyịn imekeme nditịn̄ usụn̄ nte eti ido Jehovah otụkde nnyịn ke idem ebe ke nditiene mbuana ufiop ufiop ke ndikwọ mme ikwọ Obio Ubọn̄. Ke ẹsiode oro ẹfep, ke ini nnyịn isopde idem ọtọkiet nte nnyịn isikopke inemesịt? Ntre ekpenyene nditụk nnyịn ke idem ndikwọ ikwọ! (James 5:13) Ke akpanikọ, ke udomo oro nnyịn iwụtde esịtekọm iban̄a eti ido Jehovah ye ima mfọnido esie oro owo mîdotke, nnyịn iyekwọ itoro ofụri esịt inọ enye.
Didie ke Afo Ọbọrọ?
◻ Nso idi mme akpan ntak iba nditoro Jehovah?
◻ Ke ewe nsio nsio usụn̄ ke nnyịn ikeme nditoro Jehovah?
◻ Nso idi kiet ke otu mfọnn̄kan usụn̄ oro nnyịn ikemede nditoro Jehovah?
◻ Mme uwụtn̄kpọ N̄wed Abasi ewe ke nnyịn inyene kaban̄a editoro Jehovah ke ikwọ?
◻ Didie ke nnyịn ikeme ndikwọ mme ikwọ Obio Ubọn̄ nnyịn ke usụn̄ oro owụtde ukpono?
[Ekebe ke page 11]
Kpep Mme Ikwọ Oro!
Etie nte ndusụk owo ẹnyene ekpri mfịna ke ndikpep ndusụk mbufa ikwọ. Nte ededi, ndusụk esop inyeneke akamba mfịna ndikwọ ata ediwak ikwọ ẹmi. Ndusụk ekeme ndidi esisịt ukeme efen akam edi n̄kukụre se oyomde ẹsịn man ẹkpep n̄kpọ oro ke akpa ẹketiede nte owo ifiọkke. Ndondo oro ẹmehede ye mme utọ ikwọ oro, esop esiwak ndima n̄kan mbon oro mîyomke ẹsesịn ukeme ndikpep. Do kpukpru owo ke esop ẹkeme ndikwọ mmọ ye mbuọtidem. Ih, mmọ ẹkeme ndikpep mme ikwọ oro!
[Ekebe ke page 12]
Kwọ Mme Ikwọ Obio Ubọn̄ ke Mme Mboho Unọ Idem Inemesịt
Inaha nnyịn ndikwọ mme ikwọ Obio Ubọn̄ etre ke Ufọkmbono Obio Ubọn̄ kpọt. Paul ye Silas ẹma ẹkwọ itoro ẹnọ Jehovah ke ini ẹkedude ke ufọk-n̄kpọkọbi (Utom 16:25) Ndien mbet James ọkọdọhọ ete: “Nte owo odu oro okopde inemesịt? Yak enye ọkwọ itoro ọnọ Abasi.” (James 5:13, ikọ idakisọn̄ NW) Ke mme mboho unọ idem inemesịt kpukpru owo ẹsikop inemesịt. Ntre ntak owo mîkwọhọ mme ikwọ Obio Ubọn̄? Emi ekeme ndidi n̄kpọ inemesịt akpan akpan edieke ẹbrede mmọ ke piano m̀mê guitar. Akan oro, mme ọkpọ ikwọ Obio Ubọn̄ oro ẹkwọde ke piano ẹdu; ediwak ubon Ntiense ẹnyene efọk ọkpọ ikwọ ẹmi. Mmọ inamke n̄kpọ n̄kukụre ndidi usụn̄ ndida mfiọk nte ẹkwọde ikwọ edi n̄ko ẹdi ikwọ oro ẹdotde ẹmi ẹbrede ke ini edinam.
[Ndise ke page 8, 9]
Ke ẹma ẹkenyan̄a mmọ ke Ididuot Inyan̄, Israel ẹma ẹwụt idatesịt mmọ ke ikwọ
[Ndise ke page 10]
Ikwọ idatesịt edi ikpehe utuakibuot Christian mfịn