N̄wam Mbon Efen Ẹsan̄a ke Ido nte Odotde Jehovah

‘Nnyịn idopke ndibọn̄ akam mban̄a mbufo, ndinyụn̄ nnam n̄kpe-ubọk ite, mbufo ẹsan̄a ke ido nte odotde Ọbọn̄, ẹnem Enye esịt ke kpukpru usụn̄, ẹnyụn̄ ẹn̄wụm mfri ke edinam kpukpru nti utom.’—COLOSSAE 1:9, 10.

1, 2. Nso ikeme ndinen̄ede ndi ntak idatesịt ye uyụhọ?

“NNYỊN idụn̄ ke anyan ubomisọn̄ ke obio-in̄wan̄. Ebede ke ndinam uwem nnyịn edi mmemmem, nnyịn imenyene ini efen efen ndida eti mbụk nsịm mme owo. Ẹmeda ifet edin̄wam ediwak owo ẹyak idemmọ ẹnọ Jehovah Abasi ẹdiọn̄ nnyịn uwak uwak.”—Ebe ye n̄wan, mme asan̄autom uyọhọ ini ke South Africa.

² Nte afo unyịmeke nte ke ndin̄wam mbon efen esida idatesịt edi? Ndusụk owo ẹsidomo kpukpru ini ndin̄wam mbon udọn̄ọ, mbon unana, m̀mê mbon oro ẹkopde ndobo—ẹkopde uyụhọ ẹto ndinam ntre. Mme ata Christian ẹsọn̄ọ ẹnịm nte ke mmimọ ndibuana ifiọk aban̄ade Jehovah Abasi ye Jesus Christ ye mbon efen edi n̄kponn̄kan un̄wam oro mmimọ ikemede ndinọ. Emi ikpọn̄ ekeme ndinam mbon efen ẹnyịme ufak Jesus, ẹkọri eti itie ebuana ye Abasi, ẹnyụn̄ ẹdu ke idaha ndinyene nsinsi uwem.—Utom 3:19-21; 13:48.

3. Nso orụk un̄wam ke oyom nnyịn inọ ntịn̄enyịn?

³ Nte ededi, nso kaban̄a ndin̄wam mbon emi ẹsụk ẹnamde n̄kpọ Abasi idahaemi, oro ẹsan̄ade ke “Usụn̄ Ọbọn̄”? (Utom 19:9) Nte eyịghe mîdụhe, udọn̄ emi afo enyenede ke idemmọ okpon ukem nte ekedide ke akpa, edi ekeme ndidi afo ukwe nte akpanamde se ikande oro m̀mê ọkpọnọde n̄kaiso un̄wam. Mîdịghe ekeme nditie nte ke idaha fo iyakke fi an̄wam mmọ, ke ntem osụhọrede uyụhọ oro afo okpokopde. (Utom 20:35) Kaban̄a idaha mbiba emi, nnyịn imekeme ndikpep n̄kpọ nto n̄wed mbon Colossae.

4. (a) Ke nso utọ mme idaha ke Paul ekewet n̄wed ọnọ ẹsọk mbon Colossae? (b) Didie ke Epaphras ekenyene ebuana?

⁴ Ke ini apostle Paul ekewetde n̄wed ọnọ ẹsọk mme Christian ke Colossae, enye okodu ke ufọk n̄kọbi-ntem ke Rome, okposụkedi enye ekesikemede ndinyene isenowo. Nte afo ekemede ndidori enyịn, Paul ama ada esisịt ifụre oro enye ekenyenede ọkwọrọ ikọ aban̄a Obio Ubọn̄ Abasi. (Utom 28:16-31) Mme ekemmọ Christian ẹma ẹkeme ndiwaha nse Paul, eyedi ẹma ẹsikam ẹkọbi ndusụk mmọ ẹtem ye enye ke ndusụk idaha. (Colossae 1:7, 8; 4:10) Kiet ekedi ifịk ifịk ọkwọrọ eti mbụk oro Epaphras emi okotode obio Colossae ke Phrygia, ke obot obot idụt edem usiahautịn Ephesus ke Asia Minor (Turkey eyomfịn). Epaphras ekedi enye emi ẹkedade ẹnam n̄kpọ ke nditọn̄ọ esop ke Colossae, ndien enye ama asan̄a utom ọnọ mme esop ke n̄kpet n̄kpet Laodicea ye Hierapolis. (Colossae 4:12, 13) Ntak emi Epaphras akanamde isan̄ aka ndikụt Paul ke Rome, ndien nso ke nnyịn ikeme ndikpep nto usụn̄ emi Paul akanamde n̄kpọ?

Eti Un̄wam ọnọ Mbon Colossae

5. Ntak emi Paul ekewetde n̄wed ọnọ ẹsọk mbon Colossae?

⁵ Epaphras akanam ọkpọsọn̄ isan̄ aka Rome man ọkọkọk ibuot ye Paul aban̄a mme idaha oro ẹkedude ke esop Colossae. Enye ama obụk aban̄a mbuọtidem, ima, ye ifịk utom ukwọrọikọ mme Christian oro. (Colossae 1:4-8) Edi, anaedi enye n̄ko ama obụk editịmede esịt oro enye ekenyenede aban̄a ndiọi odudu oro ẹkesịnde idaha eke spirit mbon Colossae ke itiendịk. Paul ama anam n̄kpọ aban̄a emi ke ndiwet leta eke odudu spirit oro eketịn̄de n̄kpọ ọbiọn̄ọ ndusụk ekikere oro mme nsunsu andikpep ẹkesuande. Enye ama enen̄ede odori nsọn̄uyo ke akpan udeme oro Jesus Christ enyenede.a Nte un̄wam oro enye ọkọnọde eketre ke ndisọn̄ọ ntịn̄ mme akpanikọ Bible? Ewe usụn̄ en̄wen ke enye ekekeme ndin̄wam mbon Colossae, ndien mme ukpepn̄kpọ ewe ke nnyịn ikeme ndikpep kaban̄a edin̄wam mbon efen?

6. Paul okodori nsọn̄uyo aban̄a nso ke leta oro enye ekewetde ọnọ ẹsọk mbon Colossae?

⁶ Ke ntọn̄ọ ntọn̄ọ leta esie, Paul ama ọnọ ikike aban̄a orụk un̄wam oro ekemede ndidi nnyịn imesifụmi. Enye ekedi usụn̄ editie ke anyan ebiet nnọ eti un̄wam, sia Paul ye Epaphras ẹkedude ẹyom usụn̄ ẹkpọn̄ Colossae. Paul ama ọdọhọ ete: “Imọkọm Abasi Ete Ọbọn̄ nnyịn Jesus Christ kpukpru ini ke akam emi nnyịn ibọn̄de [“ibọn̄de akam kpukpru ini,” ikọ idakisọn̄, NW] iban̄a mbufo.” Ih, mmọ emi ẹkedi mme akam ẹkebọn̄de nnennen nnennen ẹban̄a mme Christian ke Colossae. Paul ama adian do ete: “Ke ntak emi, toto ke usen emi ikokopde n̄kpọ emi, nnyịn n̄ko idopke ndibọn̄ akam mban̄a mbufo, ndinyụn̄ nnam n̄kpe-ubọk ite, Abasi akpakam anam mbufo ẹyọhọ ye ifiọk uduak Esie ke kpukpru eti ibuot ye ikike ke n̄kpọ Spirit.”—Colossae 1:3, 9.

7, 8. Ọkpọkpọ akam nnyịn ye enye oro ẹbọn̄de ke esop ẹsiwak ndisịne nso?

⁷ Nnyịn imọfiọk ite ke Jehovah edi ‘Andikop akam,’ ntre nnyịn imekeme nditịm nnịm ke akpanikọ nte ke enye odu ke mben̄eidem ndikop akam oro nnyịn ibọn̄de ke n̄kemuyo ye uduak esie. (Psalm 65:2; 86:6; Mme N̄ke 15:8, 29; 1 John 5:14) Nte ededi, mme akam oro ibọn̄de iban̄a mbon efen ẹkpetie didie?

⁸ Nnyịn imekeme ndikere inyụn̄ ibọn̄ akam kpukpru ini iban̄a ‘nditọete nnyịn emi ẹdude ke ofụri ererimbot.’ (1 Peter 5:9) Mîdịghe nnyịn imekeme ndibọn̄ akam nnọ Jehovah mban̄a mme Christian ye mbon efen oro ẹdude ke ikpehe oro afanikọn̄ m̀mê n̄kpọ mmọn̄eyet ọnọmọde. Ke ini mme mbet eke akpa isua ikie emi ẹkedude ke itie en̄wen ẹkekopde ẹban̄a akan̄ ke Judea, anaedi mmọ ẹma ẹbọn̄ akam etieti ẹban̄a nditọete mmọ idem mbemiso ẹkenọde mme etịbe ẹsọk mmọ. (Utom 11:27-30) Ke eyo nnyịn, ẹsiwak ndibọn̄ akam mban̄a ofụri otu nditọete m̀mê akwa otu nditọete ke mme mbono esop Christian, ebiet emi oyomde akam oro an̄wan̄a ediwak owo onyụn̄ edi se ẹkemede ndibọrọ “Amen.”—1 Corinth 14:16.

Siak N̄kpọ Nnennen Nnennen ke Akam

9, 10. (a) Mme uwụtn̄kpọ ewe ẹwụt ke odot ndibọn̄ akam nsiak owo enyịn̄? (b) Didie ke ẹkebọn̄ akam ẹsiak enyịn̄ Paul nnennen nnennen?

⁹ Edi, Bible ọnọ nnyịn mme uwụtn̄kpọ akam oro ẹkebọn̄de ẹban̄a mbon efen oro ẹkedide ata nnennen, ẹsiakde owo enyịn̄. Kere ban̄a ikọ Jesus oro ẹwetde ke Luke 22:31, 32. Mme anam-akpanikọ apostle esie 11 ẹma ẹkan enye ẹkụk. Kpukpru mmọ ẹyeyom un̄wam Abasi ke n̄kpọsọn̄ ini oro ẹkedude ke iso, ndien Jesus ama ọbọn̄ akam aban̄a mmọ. (John 17:9-14) Kpa ye oro, Jesus ama asiak Peter enyịn̄, anamde san̄asan̄a n̄kpeubọk aban̄a mbet kiet oro. Mme uwụtn̄kpọ en̄wen: Elisha ama ọbọn̄ akam ete Abasi an̄wam akpan owo kiet, asan̄autom esie. (2 Ndidem 6:15-17) Apostle John ama ọbọn̄ akam ete n̄kpọ aka iso ọfọn ye Gaius ke n̄kan̄ eke obụk ye eke spirit. (3 John 1, 2) Ndien mme akam efen oro ẹkebọn̄de ẹkeban̄a mme san̄asan̄a otuowo.—Job 42:7, 8; Luke 6:28; Utom 7:60; 1 Timothy 2:1, 2.

¹⁰ Mme leta Paul ẹdori nsọn̄uyo ke n̄kpọ aban̄ade edibọn̄ akam oro ẹsiakde n̄kpọ nnennen nnennen. Enye ama eben̄e ete ẹbọn̄ akam ẹban̄a imọ m̀mê ẹbọn̄ ẹban̄a imọ ye mme nsan̄a imọ. Colossae 4:2, 3 okot ete: “Ẹyịre ke akam; ẹda ekọm ẹtịn̄ enyịn ndinam ntre. Ẹbọn̄ akam ẹban̄a nnyịn n̄ko, man Abasi eberede usụn̄ ọnọ nnyịn ikwọrọ ikọ Esie, itịn̄ ndịbe-n̄kpọ Christ, emi ẹkọbide mi ẹban̄a.” Kere, n̄ko, ban̄a mme uwụtn̄kpọ efen emi: Rome 15:30; 1 Thessalonica 5:25; 2 Thessalonica 3:1; Mme Hebrew 13:18.

11. Ke ini okodude ke Rome, mmanie ke Epaphras ọkọbọn̄ akam aban̄a?

¹¹ Ukem oro ke ekedi ye nsan̄a Paul ke Rome. “Epaphras, owo mbufo kiet, . . . ete ẹkọm mbufo; enye edi owo emi an̄wanade kpukpru ini ke akam esie oyom ufọn mbufo.” (Colossae 4:12) Ikọ oro ẹkabarede nte “an̄wanade” ekeme ndinọ ekikere mban̄a “ndisịn ukeme,” ukem nte ebre mbre mbuba ke mme mbuba eset. Nte Epaphras n̄kukụre ọkọbọn̄ akam ifịk ifịk aban̄a otu mme andinịm ke akpanikọ eke ofụri ererimbot m̀mê mme ata andituak ibuot ke ofụri Asia Minor? Paul ama owụt nte ke Epaphras ọkọbọn̄ akam nnennen aban̄a mbon oro ẹkedude ke Colossae. Epaphras ama ọfiọk idaha mmọ. Nnyịn ifiọkke kpukpru mmọ ke enyịn̄, m̀mê nnyịn ndifiọk mme mfịna oro mmọ ẹkesobode, edi kere ban̄a se ikemede ndikedi ndusụk mfịna mmọ. Eyedi ekpri Linus ke akan̄wana ye mme odudu ọsọ ukpepn̄kpọ akwaifiọk, ndien ekeme ndidi Rufus ama oyom ukeme ndibiọn̄ọ edidi se n̄kani edinam Ido Ukpono Mme Jew ẹtapde. Sia ekenyenede ebe oro mînịmke ke akpanikọ, nte Persis ama oyom ime ye ọniọn̄ ndibọk nditọ esie ke Ọbọn̄, ndien nte Asyncritus, emi ọkọdọn̄ọde udọn̄ọ n̄kpa, ama oyom ndọn̄esịt efen efen? Ih, Epaphras ama ọdiọn̄ọ mbon oro ẹkedude ke esop obio esie, ndien enye ama ọbọn̄ akam ifịk ifịk aban̄a mmọ koro enye ye Paul ẹma ẹyom mme utọ owo emi ẹyakde idem ẹnọ mi ẹsan̄a ke ido nte odotde Jehovah.

12. Didie ke nnyịn ikeme ndinam mme ọkpọkpọ akam nnyịn ẹdi nnennen?

¹² Nte afo omokụt uwụtn̄kpọ oro ẹnọde nnyịn—usụn̄ nnyịn ndin̄wam mbon efen? Nte ima ikokụt, mme akam oro ẹbọn̄de ke mme mbono esop Christian isiwakke ndidi ata nnennen, ke ikerede iban̄a nsio nsio owo oro ẹdude ke otuowo. Edi imekeme nditịn̄ ikọ ata nnennen nnennen ke ini ibọn̄de ọkpọkpọ akam m̀mê ke ini ibọn̄de akam nte ubon. Ke adan̄aemi nnyịn ikemede ndiben̄e Abasi ndusụk ini ite ekpeme onyụn̄ ọdiọn̄ kpukpru esenyịn oro ẹsan̄ade-san̄a m̀mê mme ọbọkerọn̄ eke spirit, nte nnyịn ikemeke ndisiak mmọ enyịn̄ ndusụk ini? Ke uwụtn̄kpọ, ntak mûbọn̄ke akam usiak enyịn̄ esenyịn circuit oro edide ndise esop mbufo m̀mê ada Ukpepn̄kpọ N̄wed Esop mbufo? Philippi 2:25-28 ye 1 Timothy 5:23 ẹwụt san̄asan̄a udọn̄ oro Paul ekenyenede aban̄a nsọn̄idem Timothy ye Epaphroditus. Nte nnyịn imekeme ndiwụt utọ udọn̄ oro ke idem mbon udọn̄ọ oro nnyịn idiọn̄ọde enyịn̄ mmọ?

13. Mme orụk idaha ewe ẹdot nnyịn ndisiak ke ọkpọkpọ akam?

¹³ Edi akpanikọ, ana nnyịn ifep ndinọhọ ke ọkpọkpọ mbubehe mmọ efen, edi odot ete mme akam nnyịn ẹwụt ata udọn̄ oro inyenede ke idem mbon oro nnyịn idiọn̄ọde inyụn̄ ikerede iban̄a. (1 Timothy 5:13; 1 Peter 4:15) Ekeme ndidi eyenete ama ataba utom esie, ndien nnyịn ikemeke ndinọ enye utom efen. Edi, nnyịn imekeme ndisiak enye enyịn̄ inyụn̄ isọn̄ọ itịn̄ iban̄a mfịna esie ke ọkpọkpọ akam nnyịn. (Psalm 37:25; Mme N̄ke 10:3) Nte nnyịn imọdiọn̄ọ eyenete an̄wan emi ọsọn̄de ke emana edi oro mîdọhọ ebe mînyụn̄ inyeneke nditọ ke ntak oro enye ebierede ndidọ “owo Abasi ikpọn̄-ikpọn̄”? (1 Corinth 7:39) Ke ọkpọkpọ akam fo, ntak mûben̄eke Jehovah ute ọdiọn̄ enye onyụn̄ an̄wam enye ndika iso nnam akpanikọ ke utom esie? Nte uwụtn̄kpọ efen, ekeme ndidi mbiowo iba ẹma ẹnọ eyenete oro akanamde ndudue item. Ntak owo mmọ kiet kiet ke ini ke ini mîsiakke eyenete oro enyịn̄ ke ọkpọkpọ akam mmọ?

14. Didie ke akam oro ẹsiakde n̄kpọ nnennen nnennen enyene ebuana ye edin̄wam mbon efen?

¹⁴ Afo emenyene ifet ndisiak mme owo oro afo ọdiọn̄ọde oro ẹyomde un̄wam Jehovah, ndọn̄esịt, ọniọn̄, ye edisana spirit, m̀mê mbun̄wụm spirit esie ekededi ke ọkpọkpọ akam fo. Ke ntak anyan usụn̄ m̀mê mme idaha eken, ekeme ndidi afo ukemeke ndinọ n̄kpọ m̀mê nnennen un̄wam oro afo ọkpọnọde. Edi kûfre ndibọn̄ akam mban̄a nditọete fo iren ye iban. Afo ọmọfiọk ete ke mmọ ẹyom ndisan̄a ke ido nte odotde Jehovah, edi mmọ ẹkeme ndinen̄ede nyom un̄wam man ẹka iso ẹnam oro. Mme akam fo ẹdi akpan n̄kpọ ke ndin̄wam mmọ.—Psalm 18:2; 20:1, 2; 34:15; 46:1; 121:1-3.

Nam N̄kpọ Ndisọn̄ọ Mbon Efen Idem

15. Ntak emi nnyịn ikpenyenede udọn̄ ke akpatre ikpehe n̄wed mbon Colossae?

¹⁵ Nte ededi, ifịk ifịk akam oro ẹbọn̄de nnennen nnennen idịghe n̄kukụre usụn̄ ndin̄wam mbon efen, akpan akpan mbon oro afo enen̄erede ama. N̄wed mbon Colossae anam oro an̄wan̄a. Ediwak nditọ ukpepn̄kpọ ẹdọhọ ẹte ke Paul akadian sụk mme ikọ ekọm m̀mê ọkpọkpọ ekọm ke ama okokụre ndinọ ndausụn̄ kaban̄a ukpepn̄kpọ ye nti item. (Colossae 4:7-18) Ke edide isio, nnyịn imokụt nte ke akpatre ikpehe n̄wed emi esịne n̄wọrọnda item, ndien n̄kpọ efen efen odu ndikpep nto ikpehe emi.

16, 17. Nso ke nnyịn ikeme nditịn̄ mban̄a nditọete oro ẹsiakde enyịn̄ ke Colossae 4:10, 11?

¹⁶ Paul ekewet ete: “Aristarchus, nsan̄a mi ke ufọk-n̄kpọkọbi, ye Mark eyen eyen-eka Barnabas (emi ẹkenọde mbufo uyo ẹban̄a enye ẹte, edieke enye edide do, ẹdara enye), ye Jesus emi ekerede Justus, ẹte ẹkọm mbufo; mmọ emi ikpọn̄-ikpọn̄ ẹto ke otu mme ana-mbobi ẹwọrọ ẹdi mme nsan̄a mi ke utom Obio Ubọn̄ Abasi; mmọ ẹnam mi n̄kop ndọn̄esịt [“mmọ ẹkabade ẹdi n̄kpọ un̄wam ẹnọ mi,” NW].”—Colossae 4:10, 11.

¹⁷ Paul akasiak ndusụk nditọete ke ebiet oro emi ẹkedotde ẹnọ ntịn̄enyịn. Enye ọkọdọhọ ke mmọ ẹketo ke otu mme ana-mbobi, mme Jew, ẹwọrọ. Ediwak mme Jew oro ẹkenade mbobi ẹma ẹdu ke Rome, ndien ndusụk mmọ ẹkedi mme Christian idahaemi. Kpa ye oro, mbon oro Paul eketịn̄de aban̄a mi ẹma ẹdi ẹdin̄wam enye. Eyedi mmọ ikemen̄eke ndidụk nsan̄a ye mme Christian oro ẹkedide mme Gentile, ndien anaedi mmọ ke idatesịt ẹma ẹdiana ye Paul ndikwọrọ ikọ nnọ mme Gentile.—Rome 11:13; Galatia 1:16; 2:11-14.

18. Didie ke Paul okotoro ndusụk owo oro ẹkedude ye enye?

¹⁸ Tịm fiọk ikọ Paul: “Mmọ ẹkabade ẹdi n̄kpọ un̄wam ẹnọ mi.” Enye akada ikọ Greek oro odude ke itie kiet emi kpọt ke Bible etịn̄ ikọ. Ediwak mme akabade n̄wed ẹkabade enye nte “ndọn̄esịt.” Nte ededi, odu ikọ Greek efen (pa·ra·ka·le’o) oro ẹsiwakde ndikabade nte “ndọn̄esịt.” Paul ama ada utọ ikọ emi etịn̄ ikọ ke itie en̄wen ke leta emi edi ikadaha ke Colossae 4:11.—Matthew 5:4; Utom 4:36; 9:31; 2 Corinth 1:4; Colossae 2:2; 4:8.

19, 20. (a) Ikọ oro Paul akadade nditịn̄ mban̄a nditọete ndinọ enye un̄wam ke Rome ọnọ nso ekikere? (b) Ke mme usụn̄ ewe ke ekeme ndidi nditọete oro ẹma ẹn̄wam Paul?

¹⁹ Anaedi mbon oro Paul akasiakde enyịn̄ ẹma ẹnam se ikande editịn̄ ikọ ndọn̄esịt. Ẹkesida ikọ Greek oro ẹkabarede nte “n̄kpọ un̄wam” ke Colossae 4:11 (NW), ke uwetn̄kpọ ererimbot ke ndusụk idaha nditịn̄ mban̄a ibọk edida nsụhọde mfụhọ. New Life Version ọdọhọ ete: “Nso n̄kpọ un̄wam ke mmọ ẹdi ntem ẹnọ mi!” Today’s English Version ada ubak udịmikọ emi: “Mmọ ẹdi akamba n̄kpọ un̄wam ẹnọ mi.” Ekeme ndidi nditọete Christian oro ẹkedụn̄de ẹkpere Paul ẹkenam nso ndin̄wam enye?

²⁰ Paul ama esikeme ndinyene isenowo, edi ediwak n̄kpọ ẹma ẹdu oro enye mîkekemeke ndinam, utọ nte ndidep mme akpan n̄kpọ oro enye okoyomde—udia ye edisịnen̄kpọ ini etuep. Enye edisan̄a didie edep mme n̄wed ndida n̄kpep n̄kpọ m̀mê mme n̄kpọ uwetn̄kpọ? (2 Timothy 4:13) Nte afo ukemeke ndikụt nte nditọete oro ẹn̄wamde Paul ndinyene mme n̄kpọ oro enye okoyomde, ẹnamde mme akpan n̄kpọ nte ndika n̄kedep n̄kpọ m̀mê ndika utom nnọ enye? Enye ekeme ndiyom ndika n̄kese nnyụn̄ nnam esop ọkọri. Sia ẹkekọbide-kọbi enye ẹtem, enye ikekemeke, ntre ekeme ndidi nditọete oro ẹma ẹsika ẹkese esop ẹnọ Paul, ẹmende mme etop ẹka ẹnyụn̄ ẹmende mme ntọt ẹfiak ẹdi. Emi ọkọsọn̄ọ enye idem didie ntem!

21, 22. (a) Ntak emi mme ikọ Colossae 4:11 ẹkpedide n̄kpọ udọn̄ ẹnọ nnyịn? (b) Nso idi ndusụk usụn̄ oro nnyịn ikemede ndida uwụtn̄kpọ mbon oro ẹkedude ye Paul nsịn ke edinam?

²¹ Se Paul ekewetde aban̄a ndidi “n̄kpọ un̄wam” ọnọ ikike ke nte nnyịn ikemede ndin̄wam mbon efen. Ekeme ndidi mmọ ke ẹsan̄a ke ido nte odotde Jehovah ke se iban̄ade mme idaha ido uwem esie, ẹdụkde mme mbono esop Christian, ẹnyụn̄ ẹbuanade ke utom ukwọrọikọ. Ke ntak oro mmọ ẹdot ndibọ mme ikọ esịtekọm nnyịn. Nte ededi, nte nnyịn imekeme ndinam se ikande oro, idide “n̄kpọ un̄wam” ukem nte mbon oro ẹkedude ye Paul?

²² Edieke afo ọdiọn̄ọde eyenete an̄wan emi ke ọniọn̄ anamde item 1 Corinth 7:37 edi oro ubon esie mîdụhe ikpere, nte afo emekeme ndibuan enye ke ndusụk edinam ubon fo, ndusụk okotde enye edibuana udia m̀mê edidụk ekpri mboho ye mme ufan m̀mê iman? Nso kaban̄a ndinọ enye ikot etiene asan̄a ye ubon fo aka akamba mbono m̀mê nduọkodudu? Mîdịghe kot enye edisan̄a ye afo aka ndidep udia ke ini eferede enye ke idem. Nnyịn imekeme ndinam ukem emi nnọ mme ebeakpa m̀mê mbon oro n̄wan akpade, m̀mê iso-ọfọn mbon oro mîkemeke ndiwat ubomisọn̄ aba idahaemi. Afo emekeme ndikụt nte ọnọde utịp ndikop mme ifiọkutom mmọ m̀mê ndibọ ifiọk nto mmọ ke nte ẹkemede ndisat nti mfri m̀mê ndidep ọfọn̄ nditọwọn̄. (Leviticus 19:32; Mme N̄ke 16:31) Utịp ekeme ndidi n̄kpet n̄kpet itie ebuana. Ntem eyedi mmemmem n̄kpọ ọnọ mmọ ndiyom un̄wam fo edieke mmọ ẹyomde ndidep ibọk ke itie unyam ibọk, m̀mê mme n̄kpọ ntre. Anaedi nditọete oro ẹkedude ye Paul ke Rome ẹma ẹnọ enye ata ata un̄wam, nte okwo ekemede ndidi. Ini oro ye idahaemi, edidiọn̄ efen efen edi nte ke ẹsisọn̄ọ mbọbọ ima, ndien esinam nnyịn inam ọkpọsọn̄ ubiere ndinam n̄kpọ Jehovah ọtọkiet ke edinam akpanikọ.

23. Ọkpọfọn nnyịn owo kiet kiet ndida ini nnam nso?

²³ Nnyịn owo kiet kiet imekeme ndikere mban̄a mme idaha oro ẹtịn̄de ẹban̄a ke ibuotikọ emi. Mmọ n̄kukụre ẹdi mme uwụtn̄kpọ, edi mmọ ẹkeme nditi nnyịn mme ata idaha oro nnyịn ikemede ndinen̄ede ndi “n̄kpọ un̄wam” nnọ nditọete nnyịn iren ye iban. Se ẹtịn̄de emi iwọrọke ite ke nnyịn ikpenyene ndikpebe edu mme anamufọn. Oro ikedịghe utịtmbuba nditọete oro ẹtịn̄de ẹban̄a ke Colossae 4:10, 11. Mmọ ẹkedi ‘mme nsan̄a ke utom Obio Ubọn̄ Abasi.’ Utịp un̄wam emi ama enyene n̄kpọ ndinam nnennen nnennen ye oro. Oro akpakam edi ntre ye nnyịn.

24. Nso idi akpan ntak oro nnyịn isibọn̄de akam iban̄a inyụn̄ iyomde ndisọn̄ọ mbon efen idem?

²⁴ Nnyịn isisiak mbon efen enyịn̄ ke mme ọkpọkpọ akam nnyịn inyụn̄ isịn ukeme ndisọn̄ọ mmọ idem ke ntak emi: Nnyịn imenịm ke akpanikọ ite ke nditọete nnyịn iren ye iban ẹyom ‘ndisan̄a ke ido nte odotde Ọbọn̄ ndinyụn̄ nnem Enye esịt ke kpukpru usụn̄.’ (Colossae 1:10) Ẹda akpanikọ oro ẹkebuan ye n̄kpọ efen oro Paul eketịn̄de ke ini ekewetde aban̄a akam oro Epaphras ọkọbọn̄de aban̄a mbon Colossae, ete mmọ ẹkpekeme ‘ndifọn mma, nnyụn̄ ntịm mfiọk ofụri uduak Abasi.’ (Colossae 4:12) Didie ke nnyịn owo kiet kiet ikeme ndinam oro? Ẹyak nnyịn ise.

[Mme Ikọ idakisọn̄]

Nte Afo Ama Etịm Ọfiọk?

• Didie ke nnyịn ikeme ndinen̄ede nnọ un̄wam ke mme ọkpọkpọ akam nnyịn?

• Ke nso usụn̄ifiọk ke ndusụk Christian ẹkedi “n̄kpọ un̄wam” ẹnọ Paul?

• Ke mme utọ idaha ewe ke nnyịn ikeme ndidi “n̄kpọ un̄wam”?

• Nso idi utịtmbuba nnyịn ke ndibọn̄ akam mban̄a nnyụn̄ nyom ndisọn̄ọ nditọete nnyịn iren ye iban idem?

[Ndise ke page 18]

Nte afo emekeme ndibuan Christian efen ke uwọrọ an̄wa ubon fo?

[Ebiet Ẹdade N̄kpọ Ẹto]

Ẹbọ ẹto Green Chimney’s Farm