Jehovah Ekeme Ndinam Fi Okop Odudu
“Enye ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem.”—ISAIAH 40:29.
1, 2. Nso idi ndusụk uyarade akpakịp odudu Jehovah?
JEHOVAH edi Abasi oro ‘ọsọn̄de odudu.’ Nnyịn imekeme ndikụt uyarade “nsinsi odudu [Abasi] ye idaha Esie nte Abasi” ke ndiye n̄kpọ obot esie. Mbon oro ẹsịnde ndinyịme utọ uyarade itie esie oro nte Andibot inyeneke n̄kpọ nditịn̄ nnyan̄a idem.—Psalm 147:5; Rome 1:19, 20.
2 Odudu Jehovah ototịm ayarade nte ntaifiọk ẹdụn̄ọrede ekondo, ye anana-ibat uyọ ntantaọfiọn̄ oro ẹbịghide ke ata ediwak miliọn isua ke mme itie ikie. Ke okoneyo oro enyọn̄ an̄wan̄ade, wụk enyịn se ikpaenyọn̄ nyụn̄ se m̀mê iditiehe fi ke idem ukem nte eketiede andiwet psalm emi: “Ke adan̄aemi nsede enyọn̄, utom nnuenubọk fo, ọfiọn̄ ye ntantaọfiọn̄ emi afo owụkde; nso n̄kpọ edi owo eke afo etide enye?” (Psalm 8:3, 4) Ndien Jehovah otịm ese owo enyịn, otịm ese nnyịn enyịn, didie ntem! Enye ama ọnọ akpa eren ye n̄wan ediye ebietidụn̄ eke isọn̄. Idem isọn̄ ama enyene odudu—ikọn̄ ndikọri, osion̄ode udia oro ọnọde isek, oro owo mîsabakede, edi. Owo ye unam ẹnyene odudu ẹto ediwụt oro Abasi owụtde odudu esie mi.—Genesis 1:12; 4:12; 1 Samuel 28:22.
3. Ke ẹsiode mme n̄kpọ oro ẹkụtde ke ekondo ẹfep, nso n̄kpọ efen owụt odudu Abasi?
3 Ke adianade ye akpanikọ oro nte ke heaven enyene ndyọ ndien uwem eto ye unam ẹnọ inemesịt, mmọ ẹwụt nnyịn odudu Abasi. Apostle Paul ekewet ete: “Tọn̄ọ ẹkebot ererimbot owo ẹtịm ẹkụt ndịbe ndịbe n̄kpọ ẹmi ẹnyenede Enye, kpa nsinsi odudu Esie ye idaha Esie nte Abasi.” (Rome 1:20) Edi uyarade efen aban̄ade odudu esie odu oro odotde nnyịn inọ ntịn̄enyịn inyụn̄ iwụt esịtekọm. Afo emekeme ndiyịk ete, ‘Nso iwụt odudu Abasi ikan nte ekondo owụtde?’ Ibọrọ edi Jesus Christ. Ke akpanikọ, ke ndausụn̄ odudu spirit apostle Paul ọdọhọ ete ke Christ oro ẹkewotde ke eto ndutụhọ edi “odudu Abasi ye ifiọk Abasi.” (1 Corinth 1:24) Afo emekeme ndibụp ete, ‘Ntak edide ntre? Ndien nso ebuana ke oro ekeme ndinyene ke uwem mi idahaemi?’
Odudu Oro Ebede ke Eyen Esie
4. Didie ke ẹkewụt odudu Abasi ke ebuana ye Eyen esie?
4 Odudu Abasi ke akpa okowụt idem ke ini enye okobotde ikpọn̄îkpọn̄ edibon Eyen esie, anamde ke mbiet esie. Eyen eke spirit emi akanam n̄kpọ Jehovah nte “etubom anamutom” ke ndida akpakịp odudu Abasi mbot kpukpru n̄kpọ eken. (Mme N̄ke 8:22, 30, NW) Paul ekewet ọnọ ẹsọk nditọete Christian esie ke Colossae ete: “Ke Enye ke ẹkebot kpukpru n̄kpọ ke enyọn̄ ye ke isọn̄, se enyịn owo okụtde ye se enyịn owo mîkwe . . . ẹkebot kpukpru n̄kpọ oto ke Enye, ẹnyụn̄ ẹbot kpukpru n̄kpọ ẹnọ Enye.”—Colossae 1:15, 16.
5-7. (a) Ke eset, didie ke mme owo ẹkebuana ke ndiwụt odudu Abasi? (b) Nso ntak idu ndinịm ke akpanikọ nte ke odudu Abasi ekeme ndiwụt idem ke ebuana ye mme Christian mfịn?
5 Nnyịn idi ubak ‘n̄kpọ oro ẹkebotde ke isọn̄.’ Ntre nte odudu Abasi ekpekeme nditara nsịm nnyịn mme owo? Ọfọn, ke ofụri edinam Abasi ye mme anana mfọnmma owo, Jehovah ke ini ke ini esinọ mme asan̄autom esie odudu oro efen efen man mmọ ẹkeme ndinam mme uduak esie. Moses ama ọfiọk ete, ke ofụri ofụri, mme anana mfọnmma owo ẹdu uwem isua 70 m̀mê 80. (Psalm 90:10) Nso kaban̄a Moses ke idemesie? Enye ama odu uwem isua 120, edi “enyịn ikịmke enye, odudu esie inyụn̄ imemke.” (Deuteronomy 34:7) Ke adan̄aemi oro mîwọrọke ite ke Abasi esin̄wam mme asan̄autom esie kiet kiet ẹdu uwem ebịghi ntre m̀mê ndinyene utọ odudu oro, enye ọsọn̄ọ ete ke Jehovah ekeme ndinọ mme owo odudu.
6 Ndikaiso n̄wụt ukeme Abasi ndinọ iren ye iban odudu edi se enye akanamde ye n̄wan Abraham. “Sarah ke idemesie ọbọ ukeme ndiyomo, ke ini enye ama ekebe ini uman, koro adade Enyeemi ọkọn̄wọn̄ọde un̄wọn̄ọ ọnọ enye ke anam-akpanikọ.” Mîdịghe kere nte Abasi ọkọnọde mme ebiereikpe ye mmọ en̄wen ke Israel odudu: “Gideon, ye Barak, ye Samson, ye Jephthah, ye David, ye Samuel, ye mme prọfet; ẹmi . . . ẹwọn̄ọ ẹkpọn̄ mmemidem ẹkabade ẹkop idem.”—Mme Hebrew 11:11, 32-34.
7 Utọ odudu oro ekeme ndinam utom ke idem nnyịn n̄ko. Oh, ekeme ndidi nnyịn kemi idorike enyịn ndinyene eyen ke utịbe utịbe usụn̄, mîdịghe ekeme ndidi nnyịn iwụtke odudu nte eke Samson. Edi nnyịn imekeme ndikop odudu, nte Paul eketịn̄de ọnọ mme ukeuke owo ke Colossae. Ih, Paul ekewet ọnọ irenowo, iban, ye nditọwọn̄, utọ nte emi nnyịn isikụtde ke mme esop mfịn, ndien enye ọkọdọhọ ete ke ‘ẹkeda kpukpru odudu Esie ẹsọn̄ọ mmọ idem.’—Colossae 1:11.
8, 9. Ke akpa isua ikie, didie ke ẹkeyarade odudu Jehovah ẹwụt kaban̄a mme owo nte nnyịn?
8 Ke ini utom ukwọrọikọ Jesus ke isọn̄, Jehovah ama anam an̄wan̄a nte ke odudu imọ akanam utom ebe ke Eyen imọ. Ke uwụtn̄kpọ, ini kiet ke ini akwa otuowo ẹkebụn̄ọde ẹbịne Jesus ke Capernaum, “odudu Jehovah onyụn̄ odu ye Enye ndinam udọn̄ọ okụre.”—Luke 5:17.
9 Ke enye ama ekeset ke n̄kpa, Jesus ama ọsọn̄ọ ọnọ mme anditiene enye ete ke mmọ ‘ẹyebọ odudu, ke Edisana Spirit ama edi edidoro mmọ ke idem.’ (Utom 1:8) Emi ekedi akpanikọ didie ntem! Ewetmbụk kiet ọtọt aban̄a mme n̄kpọ ẹkedade itie usen ifan̄ ke Pentecost eke 33 E.N. ama ekebe ete: “Mme apostle ẹnyụn̄ ẹnọ ikọ ntiense ye akwa odudu ẹban̄a ediset Ọbọn̄ Jesus.” (Utom 4:33) Paul ke idemesie ekedi owo emi ẹkenamde okop odudu kaban̄a utom oro Abasi ọkọnọde enye anam. Ke ama okokpụhọ ido ukpono esie onyụn̄ afiak okụt usụn̄, enye ama “ọdọdiọn̄ okop odudu akan, etịn̄ ikọ tutu ekikere oyo mme Jew ẹmi ẹdụn̄de ke Damascus, enen̄ede owụt ete Jesus edi Christ.”—Utom 9:22.
10. Didie ke odudu otode Abasi akan̄wam Paul?
10 Ke akpanikọ Paul ama oyom odudu efen efen, ke ini nnyịn ikerede iban̄a ukeme eke spirit ye eke ekikere oro okoyomde man anam isan̄ isụn̄utom ita oro akadade ediwak tọsịn kilomita. Enye n̄ko ama ọyọ kpukpru orụk nsọn̄ọn̄kpọ, esịnede ke ufọk-n̄kpọkọbi onyụn̄ osobode n̄kpa usụn̄ Abasi. Didie? Enye ọkọbọrọ ete: “Ọbọn̄ adada mi ke n̄kan̄, [onyụn̄ esịn mi odudu ke idem, NW] nditịn̄ ikọ gospel ọyọhọ ọyọhọ.”—2 Timothy 4:6-8, 17; 2 Corinth 11:23-27.
11. Kaban̄a odudu Abasi, nso idotenyịn ke Paul eketịn̄ ọnọ ekemmọ mme asan̄autom esie ke Colossae?
11 Idịghe n̄kpọ n̄kpaidem, ndien, nte ke Paul, ke ewetde n̄wed ọnọ ẹsọk “nditọete [esie] ke Christ” ke Colossae, ama ọsọn̄ọ ọnọ mmọ ete ke ẹkeme ‘ndida kpukpru odudu nsọn̄ọ mmọ idem, nte asan̄ade ekekem ye ukeme ubọn̄ Jehovah, man mmọ ẹkeme ndibiom kpukpru n̄kpọ nnyụn̄ mme anyanime ye idatesịt.’ (Colossae 1:2, 11) Okposụkedi eketịn̄de mme ikọ oro akpan akpan ọnọ mme Christian oro ẹyetde aran, kpukpru mbon oro ẹsan̄ade ke ndeikpat Christ ẹkeme ndibọ ufọn akamba akamba nto se Paul ekewetde.
Ẹnam Ẹkop Odudu ke Colossae
12, 13. Nso idaha ikada ikosụn̄ọ ke ediwet N̄wed Mbon Colossae, ndien anaedi ẹkenam nso ẹban̄a emi?
12 Eyedi ẹketọn̄ọ esop ke Colossae, emi okodude ke ikpehe obio ukara Rome eke Asia, ebe ke ukwọrọikọ oro anam-akpanikọ Christian oro ekekerede Epaphras ọkọkwọrọde. Etie nte ke enye ama okokop aban̄a n̄kpọkọbi Paul ke Rome ke n̄kpọ nte 58 E.N., Epaphras ama ebiere ndika n̄kese apostle oro nnyụn̄ nda eti etop aban̄ade ima ye nsọn̄ọnda nditọete esie ke Colossae n̄kesịn udọn̄ nnọ enye. Anaedi Epaphras n̄ko ama obụk mbụk akpanikọ aban̄a ndusụk mfịna ke esop Colossae oro okoyomde ẹnen̄ede. Ekem, Paul ama enyene ọkpọsọn̄ udọn̄ ndiwet leta nsịnudọn̄ ye item nnọ esop oro. Afo n̄ko emekeme ndibọ ekese nsịnudọn̄ nto Col ibuot 1 eke leta oro, koro enye esịn un̄wana ke nte Jehovah ekemede ndinam mme asan̄autom esie ẹkop odudu.
13 Afo emekeme ndikụt nte eketiede nditọete iren ye iban ke Colossae ke idem ke ini Paul eketịn̄de aban̄a mmọ nte “nditọete ke Christ ẹmi ẹnamde akpanikọ.” Ẹkenyene nditoro mmọ kaban̄a ‘ima emi mmọ ẹkemade kpukpru ikọt Abasi’ ye kaban̄a ‘edin̄wụm mfri gospel’ ọtọn̄ọde ke ini emi mmọ ẹkekabarede ẹdi mme Christian! Nte ẹkeme nditịn̄ ukem ikọ ẹmi mban̄a esop nnyịn, mban̄a nnyịn owo kiet kiet?—Colossae 1:2-8.
14. Nso ikedi udọn̄ Paul kaban̄a mbon Colossae?
14 Ntọt oro Paul ọkọbọde ama enen̄ede otụk enye tutu enye asian mbon Colossae ete ke imọ iketreke ndibọn̄ akam mban̄a mmọ nnyụn̄ mben̄e nte mmọ “ẹyọhọ ye ifiọk uduak [Abasi] ke kpukpru eti ibuot ye ikike ke n̄kpọ Spirit; man mbufo ẹsan̄a ke ido nte odotde Ọbọn̄.” Enye ama ọbọn̄ akam ete mmọ “ẹn̄wụm mfri ke edinam kpukpru nti utom, ẹnyụn̄ ẹkọri ke ifiọk Abasi: Abasi akpakam onyụn̄ ada kpukpru odudu Esie ọsọn̄ọ mbufo idem, nte asan̄ade ekekem ye ukeme ubọn̄ Esie, man mbufo ẹkeme ndibiom kpukpru n̄kpọ nnyụn̄ mme anyanime ye idatesịt.”—Colossae 1:9-11.
Ẹnam Ẹkop Odudu Mfịn N̄ko
15. Didie ke nnyịn ikeme ndiwụt ukem edu oro okowụtde idem ke se Paul ekewetde ọnọ ẹsọk mbon Colossae?
15 Nso eti uwụtn̄kpọ ke Paul okonịm ọnọ nnyịn ntem! Nditọete nnyịn ke ofụri isọn̄ ẹyom akam nnyịn man mmọ ẹyọ ẹnyụn̄ ẹmụm idatesịt mmọ ẹkama kpa ye ndutụhọ mmọ ẹsobode. Ukem nte Paul, nnyịn ikpenyene ndisiak n̄kpọ nnennen ke mme akam nnyịn ke ini nnyịn ikopde nte ke nditọete ke esop efen, m̀mê idụt efen, ke ẹsobo n̄kpọsọn̄ idaha. Ekeme ndidi esop oro odude ekpere osobo oto-obot afanikọn̄ m̀mê ndusụk mfịna eke spirit. Mîdịghe ekeme ndidi nte ke mme Christian ke ẹyọ ke mme idụt oro ekọn̄ mbio obio m̀mê ediwot oro ẹwotde mme owo ẹtode nsio nsio ekpụk ọnọmọde. Ke akam nnyịn ikpenyene ndiben̄e Abasi ndin̄wam nditọete nnyịn “ẹsan̄a ke ido nte odotde Ọbọn̄,” ẹkaiso ẹn̄wụm mfri Obio Ubọn̄ ke adan̄aemi mmọ ẹyọde, ẹnyụn̄ ẹkọri ke ifiọk. Ke usụn̄ emi mme asan̄autom Abasi ẹsibọ odudu spirit esie, ‘ẹdade kpukpru odudu ẹsọn̄ọ mmọ idem.’ Afo emekeme ndinịm ke akpanikọ nte ke Ete fo eyekop onyụn̄ eyere.—1 John 5:14, 15.
16, 17. (a) Nte Paul ekewetde, nso ke nnyịn ikpowụt esịtekọm iban̄a? (b) Ke nso usụn̄ifiọk ke ikọt Abasi ẹnyene ubọhọ ufụn ye edifen nnọ?
16 Paul ama ewet ete ke mbon Colossae ẹkpenyene ‘ndikọm Ete oro akanamde mmọ ẹdot ndibuana ke udeme nti owo ke un̄wana.’ Ẹyak nnyịn n̄ko ikọm Ete nnyịn eke heaven kaban̄a itie nnyịn ke ndutịm esie, edide ke ikpehe eke heaven m̀mê eke isọn̄ ke Obio Ubọn̄ esie. Didie ke Abasi akanam mme anana mfọnmma owo ẹdot ke enyịn esie? Paul ama ewet ọnọ ẹsọk nditọete esie oro ẹyetde aran ete: “[Enye ama osio] nnyịn ke odudu ekịm, esịn ke Obio Ubọn̄ Eyen Ima Esie: emi nnyịn inyenede ubọhọ-ufụn ke Enye, kpa edifen mme idiọkn̄kpọ nnyịn.”—Colossae 1:12-14.
17 Se ededi oro idotenyịn nnyịn edide, eke heaven m̀mê eke isọn̄, nnyịn imọkọm Abasi ke usen ke usen ke ndinyan̄a nnyịn nsio ke idiọk editịm n̄kpọ ekịm emi, oro mbuọtidem nnyịn ke ọsọn̄urua enọ uwa ufak edima Eyen Jehovah adade edi. (Matthew 20:28) Mme Christian oro ẹyetde aran ke spirit ẹmebọ ufọn ẹto ufak oro abuanade mmọ ke san̄asan̄a usụn̄ man otodo ẹkeme ‘ndisio mmọ nsịn ke Obio Ubọn̄ Eyen Ima Abasi.’ (Luke 22:20, 29, 30) Edi “mme erọn̄ en̄wen” n̄ko ẹmebọ ufọn ẹto ufak oro idem idahaemi. (John 10:16) Mmọ ẹkeme ndibọ edifen nnọ otode Abasi man ẹnyene edinen idaha ke iso esie nte mme ufan esie. Mmọ ẹnyene akwa udeme ke nditan̄a “gospel Ubọn̄ Abasi emi” ke utịt ini emi. (Matthew 24:14) Ke akande oro, mmọ ẹnyene utịbe utịbe idotenyịn ndikabade ndi ndinen owo nnyụn̄ mfọn mma ke ikpọkidem ofụri ofụri, etisịm utịt Ukara Tọsịn Isua Christ. Nte afo okotde mbụk emi ke Ediyarade 7:13-17, se m̀mê afo udunyịmeke nte ke emi edi uyarade edidi se ẹnyan̄ade ye se ẹdiọn̄de.
18. Ewe edifiak ndu ke emem oro ẹtịn̄de ẹban̄a ke N̄wed Mbon Colossae ke Abasi osụk ananam?
18 Leta Paul an̄wam nnyịn ndidiọn̄ọ adan̄a nte nnyịn ikamade akakan owo oro akanam odude uwem isọn. Nso ke Abasi akanam ebe ke Christ? “[Ekedi] ndifiak nnam kpukpru n̄kpọ eken ẹdu ke emem ye enye ebe ke ndinam emem ke iyịp oro enye ọkọduọkde ke eto ndutụhọ, inamke n̄kpọ m̀mê mmọ ẹdi n̄kpọ ẹmi ẹdude ke isọn̄ m̀mê ẹdi n̄kpọ ẹmi ẹdude ke enyọn̄.” Uduak Abasi edi ndifiak nda kpukpru edibotn̄kpọ n̄kesịn ke ọyọhọ n̄kemuyo ye enye, nte ekedide mbemiso nsọn̄ibuot oro ke Eden. Enyeemi ẹkadade ẹbot kpukpru n̄kpọ edi Enyeemi ẹsụk ẹdade kemi ẹnam edifiak ndidu ke emem emi.—Colossae 1:20, NW.
Ẹnam Ẹkop Odudu Ndinam Nso?
19, 20. Nnyịn ndisana nnyụn̄ nnana ndo ọkọn̄ọ ke nso?
19 Nnyịn oro ifiakde ididu ke emem ye Abasi imenyene mme mbiomo. Inikiet ko nnyịn ikedi mme anamidiọk oro ẹkedianarede ẹkpọn̄ Abasi. Edi idahaemi, sia ima ikọkọn̄ mbuọtidem ke uwa Jesus ndien ekikere nnyịn mîwụhọke ke utom oro ẹdide ndiọi, nnyịn ke akpan idi “ndisana owo ẹmi ẹnanade ndo, ẹmi owo mînyụn̄ ikemeke nditịn̄ n̄kpọ ndian [ke iso Abasi].” (Colossae 1:21, 22) Kamse, kpa nte bụt mîkanamke Abasi iban̄a mme anam-akpanikọ ntiense eke eset oro, kpa ntre ke bụt mînamke enye iban̄a nnyịn, ndikere Abasi nnyịn. (Mme Hebrew 11:16) Mfịn, baba owo kiet ikemeke ndidori nnyịn ikọ nte ke ikere akwa enyịn̄ esie ke idiọk usụn̄, m̀mê nnyịn ndikop ndịk nditan̄a enyịn̄ oro tutu osịm utịt isọn̄!
20 Edi tịmfiọk ikọ item oro Paul akadiande ke N̄wed Mbon Colossae 1:23: “Edieke mbufo ẹyịrede ke mbuọtidem ẹnyene iwụk ẹnyụn̄ ẹsọn̄ọ ẹda, mîdinyụn̄ iyakke n̄kpọ anam mbufo ẹdianade ẹkpọn̄ idotenyịn gospel emi mbufo ẹkekopde; kpa gospel emi ẹkekwọrọde ẹnọ kpukpru owo ke idak ikpaenyọn̄.” Ntre ekese ọkọn̄ọ ke nnyịn ndisọn̄ọ nda nnam akpanikọ nnọ Jehovah, isan̄ade ke ndeikpat edima Eyen esie. Jehovah ye Jesus ẹmenam ata ekese n̄kpọ ẹnọ nnyịn! Nnyịn ikpakam iwụt ima oro inyenede inọ mmọ ebe ke nditiene item Paul.
21. Ntak emi nnyịn inyenede akamba ntak ndikop nduaidem mfịn?
21 Anaedi mme Christian ke Colossae ẹma ẹkop nduaidem ndikop nte ke ẹma ‘ẹkọkwọrọ gospel emi mmọ ẹkekopde ẹnọ kpukpru owo ke idak ikpaenyọn̄.’ Mfịn akam ototịm edi n̄kpọ nduaidem ndikop adan̄a nte se iwakde ikan Mme Ntiense miliọn inan̄ ye ubak ke se ibede idụt 230 ẹtan̄ade eti mbụk Obio Ubọn̄. Kamse, isua kiet kiet se ikperede ndisịm owo 300,000 ke kpukpru idụt ke ẹkabade ẹtie ke emem ye Abasi!—Matthew 24:14; 28:19, 20.
22. Idem edieke nnyịn isobode ndutụhọ, nso ke Abasi ekeme ndinam nnọ nnyịn?
22 Okposụkedi anade edi Paul okodu ke ufọk-n̄kpọkọbi ke ini oro enye ekewetde leta oro ọnọ ẹsọk mbon Colossae, enye ikatuaha iseme iban̄a itie esie ke baba usụn̄ kiet. Utu ke oro, enye ọkọdọhọ ete: “Kemi mmadat esịt ke ndutụhọ eke n̄kụtde kaban̄a mbufo.” Paul ama ọfiọk se ọwọrọde “ndibiom kpukpru n̄kpọ nnyụn̄ mme anyanime ye idatesịt.” (Colossae 1:11, 24) Edi enye ama ọfiọk ete ke imọ ikanamke emi ke ukeme idem imọ. Jehovah akanam enye okop odudu! Ukem oro ke edi mfịn. Ediwak tọsịn Mme Ntiense oro ẹkesịnde ke ufọk-n̄kpọkọbi ẹkenyụn̄ ẹkọbọde ikọduọkke idatesịt mmọ ke ndinam n̄kpọ Jehovah. Utu ke oro, mmọ ẹma ẹdi ẹdifiọk akpanikọ eke ikọ Abasi oro ẹkụtde ke Isaiah 40:29-31: “Enye ọnọ mbon mba odudu . . . Mmọ eke ẹberede ye Jehovah ẹyekop obufa nsọn̄idem.”
23, 24. Nso idi ndịben̄kpọ oro ẹtịn̄de ẹban̄a ke N̄wed Mbon Colossae 1:26?
23 Utom eti mbụk oro ọkọn̄ọde ke Christ ekedi ata akpan n̄kpọ ọnọ Paul. Enye ama oyom mbon efen ẹfiọk ufọn oro udeme Christ enyenede ke uduak Abasi, ntre enye eketịn̄ aban̄a enye nte “ndịben̄kpọ eke okodịbede toto ke editọn̄ọ eyo ye emana.” Nte ededi, ikanaha enye edi ndịben̄kpọ kpukpru ini. Paul ama adian ete: “Kemi Abasi ama ayarade enye ọnọ nti ikọt Esie.” (Colossae 1:26) Ke ini nsọn̄ibuot akasiahade ke Eden, Jehovah ama ọn̄wọn̄ọ nti n̄kpọ oro ẹdidide, ebemde iso etịn̄ ete ke ‘mfri n̄wan eyenuak ibuot urụkikọt.’ (Genesis 3:15) Nso ke emi ọkọwọrọ? Ke ediwak emana, ke ediwak isua ikie, enye ekedi ndiben̄kpọ. Ekem Jesus ama edi, ndien enye ama “[ada] gospel Esie osio uwem, kpa uwem eke mîdikụreke, onịm ke un̄wana.”—2 Timothy 1:10.
24 Ih, “ndịben̄kpọ” ọkọkọn̄ọ ke Christ ye Obio Ubọn̄ Messiah. Paul ama asiak “n̄kpọ eke ẹdude ke enyọn̄,” etịn̄de aban̄a mbon oro ẹdibuanade ke itie ukara Obio Ubọn̄ ye Christ. Mmọemi ke ẹdikama ke ndida anana-ibat edidiọn̄ nsọk kpukpru “n̄kpọ eke ẹdude ke isọn̄,” kpa mbon oro ẹdidarade nsinsi paradise mi. Afo, ndien, emekeme ndikụt nte okodotde Paul nditịn̄ mban̄a “uwak ubọn̄ eke odude ke ndịben̄kpọ emi.”—Colossae 1:20, 27.
25. Nte ẹwụtde ke N̄wed Mbon Colossae 1:29, nso ikpedi edu nnyịn idahaemi?
25 Paul ama asak iso ese itie esie ke Obio Ubọn̄ oro. Edi enye ama ọfiọk ete ke emi ikedịghe n̄kpọ oro imọ ikpakam iwan̄de-wan̄ ubọk itie idori enyịn. “Mmonyụn̄ n̄kpa utom mban̄a n̄kpọ emi, nda odudu Abasi, emi ọsọn̄ọde anam utom ke idemmi, n̄wan̄wana ndinam.” (Colossae 1:29) Tịmfiọk ete ke Jehovah, ebe ke Christ, ama anam Paul okop odudu ndikụre utom unyan̄a uwem. Jehovah ekeme ndinam ukem oro nnọ nnyịn mfịn. Edi nnyịn ikpenyene ndibụp idem nnyịn, ‘Nte ami mmenyene edu ukwọrọikọ oro ami n̄kenyenede ke ini ami ke akpa n̄kekpepde akpanikọ?’ Nso idi ibọrọ fo? Nso ikeme ndin̄wam nnyịn owo kiet kiet ndikaiso ‘n̄kpa utom nnyụn̄ nda odudu Jehovah nsọn̄ọ nnam utom’? Ibuotikọ oro etienede eneme n̄kpọ emi.
Nte Afo Ama Otịm Ọfiọk?
◻ Ntak emi nnyịn ikemede ndinịm ke akpanikọ nte ke Jehovah ekeme ndiwụt odudu esie ke ibuot mme owo?
◻ Nso idaha ikada ikosụn̄ọ ke mme ikọ Paul ke N̄wed Mbon Colossae ibuot 1?
◻ Didie ke Abasi anam edifiak ntie ke emem oro ẹtịn̄de ẹban̄a ke N̄wed Mbon Colossae 1:20?
◻ Ebede ke odudu esie, nso ke Jehovah ekeme ndida nnyịn nnam?
[Ndise obio/Ndise ke page 8]
(Ama oyom ndikụt nte enye enen̄erede etie, se n̄wed)
COLOSSAE