3. Didie ke Bible ọfọi nnyịn owụt abiatibet oro?

³ Bible etịn̄ aban̄a owo eke edide ata abiatibet emi ke 2 Thessalonica 2:3. Ke ndausụn̄ spirit Abasi, apostle Paul ama ewet ete: “Ẹkûyak owo abian̄a mbufo ke baba usụn̄ kiet; koro usen oro [Jehovah edisobode idiọk editịm n̄kpọ emi] ididịghe, tutu mfiakedem ebemiso odu, owo eke edide ata abiatibet onyụn̄ ayarade idem.” Mi, Paul eketịn̄ prọfesi ete ke mfiakedem eyedu, ke owo eke edide ata abiatibet eyenyụn̄ owụt idem mbemiso utịt editịm n̄kpọ emi. Ke akpanikọ, Paul ọkọdọhọ ke 2Th 2 ufan̄ikọ 7 ete: “Koro ndịbe odudu edibiat ibet ọtọtọn̄ọ utom kemi.” Ntem ke akpa isua ikie, abiatibet emi ama ọtọtọn̄ọ ndiyarade idemesie.

Ntọn̄ọ Owo eke Edide Ata Abiatibet

4. Anie edi andikọtọn̄ọ ye andinọ owo eke edide ata abiatibet ibetedem?

⁴ Anie ọkọtọn̄ọ onyụn̄ ọnọ owo eke edide ata abiatibet un̄wam? Paul ọbọrọ ete: “Edidi abiatibet oro oto ke ubọkutom Satan, asan̄a ye kpukpru odudu ye mme idiọn̄ọ ye nsunsu mme utịben̄kpọ, ye kpukpru abian̄a eke otode ukwan̄ido ẹtiene mmọemi ẹsosobo; sia mmọ mînyịmeke ndibọ ima akpanikọ, man ẹnyan̄a mmọ.” (2 Thessalonica 2:9, 10) Ntre Satan edi ete ye andinọ owo eke edide ata abiatibet uwem. Ndien kpasụk nte Satan ọbiọn̄ọde Jehovah, mme uduak Esie, ye ikọt Esie, ntre ke owo eke edide ata abiatibet emi anam, edide enye ọdiọn̄ọ aban̄a emi m̀mê idiọn̄ọke.

5. Nso ina ibet abiatibet oro ye mbon oro ẹtienede enye?

⁵ Mbon oro ẹsan̄ade ye owo eke edide ata abiatibet ẹdisobo ukem n̄kpọ oro enye edisobode​—nsobo: “Ẹyeyarade abiatibet oro, emi Ọbọn̄ Jesus [ediwotde] . . . , onyụn̄ ada ediyarade edidi Esie osobo enye.” (2 Thessalonica 2:8) Ini oro ẹdisobode owo eke edide ata abiatibet ye mme andida ye enye (“mmọemi ẹsosobo”) eyedi ibịghike “ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde ye mme angel odudu Esie, edisio usiene ọnọ mmọemi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus; emi edidianarede ke iso Ọbọn̄ ye ke iso ubọn̄ odudu Esie, edibọ ufen nsinsi nsobo.”​—2 Thessalonica 1:6-9.

6. Nso n̄kaiso ntọt ke Paul ọnọ aban̄a abiatibet oro?

⁶ Paul akaiso ke ndinam owo eke edide abiatibet emi an̄wan̄a, ọdọhọde ete: “Kpa enyeemi ọbiọn̄ọde Abasi, onyụn̄ emenerede idem onịm ke ẹnyọn̄ ọbiọn̄ọ kpukpru se ẹkotde abasi ẹnyụn̄ ẹtuakde ibuot ẹnọ; tutu enye etie ke temple Abasi osio idem owụt, ete idi abasi.” (2 Thessalonica 2:4) Ntre Paul odụri owo utọn̄ ete ke Satan eyenam owo eke edide ata abiatibet adaha ada, kpa nsunsu n̄kpọ ukpono, emi edikam emenerede idemesie akan ibet Abasi.

Ndidiọn̄ọ Abiatibet Emi

7. Ntak emi nnyịn ibierede ite ke Paul iketịn̄ke iban̄a owo kiet, ndien nso ke owo eke edide ata abiatibet ada aban̄a?

⁷ Ndi Paul eketịn̄ aban̄a owo kiet kpọt? Baba, koro enye ọdọhọde ete ke “owo” emi ama odu ke usen Paul ke eyenyụn̄ akaiso ndidu tutu Jehovah osobo enye ke utịt editịm n̄kpọ emi. Ntem, enye omodu ke ediwak isua ikie. Nte an̄wan̄ade, idụhe ata owo ndomokiet oro odude uwem ebịghi ntre. Ntre ana ikọ oro “owo eke edide ata abiatibet” ada aban̄a otu, m̀mê n̄ka, mme owo.

8. Anie edi owo eke edide ata abiatibet, ndien nso idi ndusụk n̄kpọ ẹdade ẹdiọn̄ọ enye?

⁸ Mmanie ke mmọ ẹdi? Uyarade owụt ete ke mmọ ẹdi atan̄idem, eseri-iseri otu mme ọkwọrọ ederi Christendom, emi ke ediwak isua ikie ẹkemende idemmọ ẹnịm nte ibet ke idemmọ. Ẹkeme ndikụt emi sia ke ediwak tọsịn nsio nsio ido ukpono ye n̄ka ẹdude ke Christendom, kiet kiet enyene otu mme ọkwọrọ ederi esie, kpa ye oro kiet ke an̄wana ye kiet eken ke ndusụk afan̄ ukpepn̄kpọ m̀mê ido edinam. Ubahade oro odude mi edi in̄wan̄în̄wan̄ uyarade nte ke mmọ itieneke ibet Abasi. Mmọ ikemeke ndito Abasi. (Men Micah 2:12; Mark 3:24; Rome 16:17; 1 Corinth 1:10 domo.) Se inamde kpukpru ido ukpono ẹmi ẹdi ukem edi nte ke mmọ isọn̄ọke iyịre ke mme ukpepn̄kpọ Bible, ẹbiatde ewụhọ oro: “Kûnam n̄kpọ ube se ẹkewetde.”​—1 Corinth 4:6; se n̄ko Matthew 15:3, 9, 14.

9. Mme edinịm ke akpanikọ ewe oro mîkemke ye Bible ke abiatibet oro ada okpụhọ ye mme akpanikọ Bible?

⁹ Ntem, abiatibet emi edi otuowo kiet: kpa mme ọkwọrọ ederi ido ukpono Christendom. Kpukpru mmọ, ẹdide mme pope, mme oku, mme etubom ufọkederi, nyobiowo, m̀mê mme ọkwọrọ ederi Protestant, ẹbuana nduduọhọ ke ntak mme idiọkn̄kpọ oro ido ukpono Christendom ẹnamde. Mmọ ẹma ẹduọk akpanikọ Abasi ẹkabade ẹda ukpono ndem edide nsu, ẹkpepde mme utọ ukpepn̄kpọ oro mîdụhe ke n̄wed Abasi nte ukpọn̄ owo ikpaha ke nsinsi, hell ikan̄, purgatory, ye Abasi-Ita-ke-Kiet. Mmọ ẹbiet mme adaiso ido ukpono oro Jesus ọkọdọhọde ete: “Mbufo ẹdi nditọete mbufo, kpa Satan, ẹnyụn̄ ẹyom ndinam obukpo udọn̄ ete mbufo. . . . Enye edi osu nsu, ye ete nsu.” (John 8:44) Edinam mmọ n̄ko ẹyarade mmọ nte mme abiatibet, ke ntak mmọ ẹbuanade ke edinam ẹmi ẹbiatde mme ibet Abasi. Ye mme utọ owo oro Jesus ọdọhọ ete: “Ẹdianade Mi, mbufo mme anam ukwan̄n̄kpọ.”​—Matthew 7:21-23.

Ẹmenede Idemmọ

10. Nso ebuana ke abiatibet oro enyene ye mme akara ukaraidem?

¹⁰ Mbụk owụt ete ke mbon oro ẹdude ke otuowo eke ẹdide ata abiatibet mi ẹmewụt ntan̄idem ye n̄kohodeidem tutu eyedi se mmọ ẹnen̄erede ẹdomo n̄kpọ ẹnọ mme andikara ererimbot. Ye nsunsu ukpepn̄kpọ nte ke ‘Abasi ọnọ ndidem unen,’ mme ọkwọrọ ederi ẹma ẹdọhọ ẹte ke mmimọ idi akpan owo ke ufọt mme andikara ye Abasi. Mmọ ẹma ẹdori ẹnyụn̄ ẹdorode ndidem ye mbọn̄ ke ebekpo ẹnyụn̄ ẹkeme ndida mbio obio nsọk m̀mê ndida n̄kan̄wana ye mme andikara. Nte utịp, mmọ ẹma ẹtịn̄ ukem ikọ oro ikpọ oku mme Jew oro ẹkesịnde Jesus ẹketịn̄de ẹte: “Nnyịn inyeneke edidem efen ibe Caesar.” (John 19:15) Edi, Jesus nte an̄wan̄ade ekekpep ete: “Obio Ubọn̄ Mi idịghe eke ererimbot emi.”​—John 18:36.

11. Didie ke mme ọkwọrọ ederi ẹkemenerede idemmọ ke enyọn̄?

¹¹ Man ẹmenede idemmọ ototịm okon̄ akan mme usụhọde owo, otu mme abiatibet ẹmi ẹmek isio isio edisịnen̄kpọ, emi awakde ndidi obubịt. N̄ko-n̄ko, mmọ ẹma ẹda kpukpru orụk ikpọ n̄kpọ mbanaidem, ẹbana idemmọ, adianade ye anyanya, cross, ye itam oku ederi. (Men Matthew 23:5, 6 domo.) Edi Jesus ye mme anditiene enye ikenyeneke mme utọ edisịnen̄kpọ oro; mmọ ẹkesịne n̄kpọ nte mme usụhọde owo. Mme ọkwọrọ ederi n̄ko ẹma ẹnọ idemmọ mme uto udorienyịn̄ nte “Ete,” “Edisana Ete,” “Odot-ukpono,”‘ “Ata Odot-ukpono,” “Ata Eti,” ye “Ata Edikon̄,” emi ọdiọn̄de-diọn̄ anam mmọ ‘ẹmenede idemmọ ke enyọn̄ ẹkan kpukpru owo.’ Edi, Jesus ekekpep aban̄a mme udorienyịn̄ ido ukpono ete: “Ẹkûnyụn̄ ẹkot ndomo owo kiet ke isọn̄, ẹte, Ete.” (Matthew 23:9) Ukem ntre, Elihu, ke owụtde ke mme andidọn̄ Job esịt ẹdide mbon mbubịk ẹdue, ọkọdọhọ ete: “Yak n̄kûkam nten̄e owo enyịn, n̄kûnyụn̄ nnem inua nnọ owo.”​—Job 32:21.

12. Paul ọkọdọhọ ke mme ọkwọrọ ederi ẹnen̄ede ẹnam n̄kpọ anie?

¹² Ke ini Paul ko ke eyo esie ọkọdọhọde ke owo eke edide ata abiatibet ama ọtọtọn̄ọ utom esie, enye n̄ko ama etịn̄ aban̄a mbon oro ẹwụtde edu abiatibet oro ete: “Koro orụk owo ẹmi ẹdi mme apostle abian̄a, mme anamutom n̄kari, ẹmi ẹforode mme apostle Christ. Inyụn̄ idịghe utịben̄kpọ; koro kpa Satan ke idemesie ke oforo angel un̄wana. Ntre ke idịghe utịben̄kpọ edieke mme asan̄autom esie ẹforode mme asan̄autom edinen ido: edi utịt mmọ eyekem ye ubọkutom mmọ.”​—2 Corinth 11:13-15.

Edisọn̄ Ibuot ye Utuakibuot Akpanikọ

13. Nso idi mfiakedem oro Paul ekebemde iso etịn̄ aban̄a?

¹³ Paul ama etịn̄ ete ke owo eke edide ata abiatibet mi edisan̄a ye mfiakedem. Ke akpanikọ, akpa n̄kpọ oro Paul ọkọnọde man ẹda ẹdiọn̄ọ otu abiatibet ẹmi edi nte ke “usen Ọbọn̄ [kpa ini emi Jehovah edisobode akani editịm n̄kpọ emi] . . . ididịghe, tutu mfiakedem ebemiso odu.” (2 Thessalonica 2:2, 3) Edi nso ke “mfiakedem” ọwọrọ? Ke udọn̄ikọ emi, enye iwọrọke sụk ndudue m̀mê ediduọ n̄kpọn̄ ke ntak mmemidem eke spirit. Mi, iko Greek oro adade ọnọ “mfiakedem,” ke adianade ye mme n̄kpọ eken, ọwọrọ, “ediduọ n̄kpọn̄ akpanikọ” m̀mê “edin̄wana.” Ndusụk Bible ẹkabade enye nte “nsọn̄ibuot.” Bible eke William Barclay ọdọhọ ete: “Usen oro ikemeke ndidi ibọhọke Akwa Nsọn̄ibuot ada itie.” The Jerusalem Bible okot enye “Akwa En̄wan.” Ke ntre, ke udọn̄ikọ oro Paul enemede aban̄a, “mfiakedem” ọwọrọ edin̄wana ye utuakibuot akpanikọ.

14. Ini ewe ke mfiakedem ọkọtọn̄ọ ndidaha nda ọyọhọ ọyọhọ?

¹⁴ Didie ke mfiakedem emi, nsọn̄ibuot emi, ọkọtọn̄ọ? Ke 2 Thessalonica 2:6, Paul ama ewet, ke usen esie, aban̄a ‘se iketiede nte n̄kpọ ukpan inọ’ owo eke edide abiatibet oro. Nso ikedi oro? Edi odudu oro mme apostle ẹkenyenede ekedi ukpan emi. Edidu mmọ, ye mme okopodudu enọ oro edisana spirit ọkọnọde mmọ, ikayakke mfiakedem asuana inioro. (Utom 2:1-4; 1 Corinth 12:28) Edi ke ini mme apostle ẹma ẹkekpan̄a, ke n̄kpọ nte utịt utịt akpa isua ikie, odudu oro ekesịnde ukpan ikodụhe aba.

Otu Mme Ọkwọrọ Ederi Oro Mîkemke ye N̄wed Abasi Adaha Ada

15. Nso ndutịm ke Jesus ọkọtọn̄ọ ke esop Christian?

¹⁵ Esop oro Jesus ọkọtọn̄ọde ama ọkọri ke akpa isua ikie ke idak ndausụn̄ mbiowo (mme esenyịn) ye mme asan̄autom unamutom. (Matthew 20:25-27; 1 Timothy 3:1-13; Titus 1:5-9) Ekemek mmọemi ẹto esop oro. Mmọ ẹkedi irenowo oro ẹkesọn̄de idem ke n̄kan̄ eke spirit oro mîkọbọhọ san̄asan̄a ukpepn̄kpọ ido ukpono, kpa nte Jesus mîkọbọhọ utọ ukpepn̄kpọ oro. Ke akpanikọ, mme andibiọn̄ọ enye ẹma ẹyịk ẹte: “Owo emi asan̄a didie ọfiọk n̄wed, ke ini akanam Enye mîkpepke-kpep?” (John 7:15) Ndien kaban̄a mme apostle, mme andikara ido ukpono ẹma ẹkụt ukem n̄kpọ oro: “Ke adan̄aemi mmọ ẹkụtde uko Peter ye John, ẹnyụn̄ ẹfiọkde ẹte mmọ ẹdi mbon ẹmi mîkekpepke n̄wed, ẹnyụn̄ ẹdide ndisịme ke ifiọkn̄wed, idem akpa mmọ; mmọ ẹnyụn̄ ẹkabade ẹfiọk ẹte mmọ oro ẹkedu ye Jesus.” -Utom 4:13.

16. Didie ke mfiakedem akanam ẹwọn̄ọde ẹkpọn̄ uwụtn̄kpọ oro esop Christian ke akpa isua ikie okonịmde?

¹⁶ Nte ededi, mfiakedem emi ama ada ekikere oro ẹkebọde ẹto mme ọkwọrọ ederi Jew odụk edi ndien ke akpatre ama ọbọ oto ndutịm ukpono ndem mbon Rome. Nte ini akade, ediwọn̄ọde n̄kpọn̄ ata mbuọtidem ama ada itie, ndien otu mme ọkwọrọ ederi oro mîkemke ye n̄wed Abasi ama adaha ada. Pope oro ẹkeyaride anyanya ama ọtọn̄ọ ndikara otu cardinal, ẹmi n̄ko ẹkemekde ẹto otu bishop ye otu archbishop ke ediwak ikie, ẹmi ẹkenyụn̄ ẹmenerede mmọ itie ke idaha oku ke ẹma ẹkekụre ufọkn̄wed ukpep utom oku. Ntem, ikebịghike ke akpa isua ikie ama ekebe, otu mme ọkwọrọ ederi ndịben̄kpọ ẹma ẹbọ odudu ẹnyene ke Christendom. Otu emi iketieneke uwụtn̄kpọ mbiowo ye mme asan̄autom unamutom ẹdide Christian ke akpa isua ikie, edi ẹketiene uwụtn̄kpọ ndutịm ido ukpono ndem.

17. Ini ewe, akpan akpan, ke ẹkesọn̄ọ ẹbọp odudu oro abiatibet oro enyenede?

¹⁷ Ke edem edem ko ke ọyọhọ isua ikie ita C.E., ẹma ẹsụhọde mbon oro ẹkedide sụk mme andinịm ke akpanikọ ẹsịn ke otu ọsọ mbon ido ukpono. Ọsọn̄ibuot owo eke edide ata abiatibet mi sụn̄sụn̄ ama ọdọk ada ukara. Ẹma ẹbọp ukara emi ọsọn̄ ke ini ukara Constantine, andikara Rome, akpan akpan ke Esop eke Nicaea ke 325 CE. ama ekebe. Adan̄aoro Ufọkederi ye Ukara ẹma ẹdiana kiet. Ntem, owo eke edide ata abiatibet​—kpa mme ọkwọrọ ederi Christendom​—amakabade edi udịm udịm mbon mfiakedem oro ẹbịghide ke ediwak isua ikie, ẹn̄wanade ye Abasi akpanikọ, Jehovah. Mme ibet ye ndutịm oro mmọ ẹtienede ẹdi eke idemmọ idịghe eke Abasi.

Mme Ukpepn̄kpọ Ukpono Ndem

18. Mme isụn̄i-isụn̄i ukpepn̄kpọ ukpono ndem ewe ke abiatibet oro akada enyene?

¹⁸ Owo emi adahade ada nte ata abiatibet mi n̄ko ama ọbuọt mme ukpepn̄kpọ ukpono ndem. Ke uwụtn̄kpọ, ẹma ẹmen abasi Abasi-Ita-ke-Kiet emi edide ndịben̄kpọ, emi ayan̄ade owo ndifiọk ẹnịm ke itie Enyeemi ọdọhọde ete: “Ami ndi Jehovah; enyịn̄ mi edi oro: ndinyụn̄ nnọhọ owo efen ubọn̄ mi.” “Ami ndi Jehovah, ndien efen idụhe-du, Abasi idụhe ke mîbọhọke ami.” (Isaiah 42:8; 45:5) Edimen oro ẹmende mme ekikere owo, idem eke ukpono ndem, ẹnịm ke itie akpanikọ Abasi ama atara esịne isụn̄i efen efen: kpa edikpono oro ẹkponode ekpri Mary eke Bible nte “Eka Abasi” Christendom. Ntem, mme andimenede mme utọ ukpepn̄kpọ ẹmi ke enyọn̄, kpa n̄ka mme ọkwọrọ ederi, ẹma ẹkabade ẹdi mme ebeiso ke otu “idiọk n̄kpasịp” oro Satan akasuande man odomo ndibaba eti n̄kpasịp oro Christ akasuande n̄wot.​—Matthew 13:36-39.

19. Didie ke Christendom akabahade ke ofụri isua ikie ẹmi ẹkebede, edi nso ikaiso ndidu?

¹⁹ Nte ubahade ye usiak isio n̄ka akadade itie, Christendom ama abahade ke nsio nsio ido ukpono ye n̄ka ke ediwak ikie. Edi ido ukpono m̀mê n̄ka kiet kiet, ke ẹsiode ata ibat ibat mmọ ẹfep, ẹsụk ẹtọtọ ubahade ke ufọt mme ọkwọrọ ederi ye mme ọsọ owo. Ntem, otuowo eke edide ata abiatibet amakaiso ndidu tutu osịm mfịn emi. Ndien enye osụk akakaiso ndimenede idemesie nnịm ke enyọn̄ n̄kan mme usụhọde owo ye isio isio usịnen̄kpọ ye ikpọ ndodobi udorienyịn̄ esie. Nte an̄wan̄ade, Paul iketịn̄ke ikọ n̄kponinua ke ini enye ọkọdọhọde ete ke otuowo eke edide ata abiatibet eyenọ idemesie ubọn̄ onyụn̄ emenerede idemesie onịm ke itie Abasi.

Ukara Pope

20. Didie ke uwetn̄kpọ mbon Catholic etịn̄ aban̄a pope?

²⁰ Uwụtn̄kpọ utọ ubọn̄ oro edi eke ukara pope ke Rome. N̄wed ukabade ikọ ido ukpono kiet oro Lucio Ferraris ewetde, oro ẹkemịn̄de ke Italy, etịn̄ aban̄a pope nte “enyenede utọ uku ye ubọn̄ oro anamde enye idịghe ikpîkpu owo, edi, nte akpanade edi, Abasi, onyụn̄ edi Andida ke itie Abasi.” Anyanya esie edi adiana-ita anyanya “nte edidem eke heaven, eke isọn̄ ye eke hell.” Kpa n̄wed ukabade ikọ oro akaiso ọdọhọ ete: “Pope, nte akpanade edi, edi Abasi ke isọn̄, n̄kukụre owo emi edide ọbọn̄ ke otu mbon mbuọtidem Christ, kpa akakan edidem ofụri ndidem.” Enye adian do ete: “Pope ekeme ke ndusụk ini ndibiat ibet Abasi mfep.” N̄ko, The New Catholic Dictionary etịn̄ aban̄a pope ete: “Mme isụn̄utom esie ẹnyene ukpono ẹkan mbon eken ke otu n̄kpisọn̄.”

21. Wụt ukpụhọde oro odude ke mme edinam pope ye eke Peter ye angel.

²¹ Ke mîbietke mme mbet Jesus, pope kpukpru ini esisịne ikpọ nduọ nduọ ọfọn̄ onyụn̄ onyịme itoro nneminua owo. Pope esinyịme mme owo ẹnụk ibuot ẹnọ imọ, ẹtịm n̄kpannuen imọ inua, ẹnyụn̄ ẹmen imọ ke san̄asan̄a akpakaha ẹdori ke afara mmọ. Nso ikpîkpu ntan̄idem ke pope owụt ntem ke ofụri isua ikie ẹmi! Kpa ata isio isio n̄kpọ ye sụn̄sụn̄ edu nsụhọdeidem Peter, emi ọkọdọhọde Cornelius, akwa owoekọn̄ Rome emi ọkọduọde Peter ke ukot ete ituak ibuot inọ enye ete: “Daha da, . . . Ami nde ndi sụk owo”! (Utom 10:25, 26, Jerusalem Bible mbon Catholic) Ndien nso ukpụhọde idu ntem ye angel oro ọkọnọde apostle John Ediyarade! John ama odomo ndinụk ibuot ke ido utuakibuot nnọ angel oro, edi angel oro ọkọdọhọ ete: “Kûnam: ndi asan̄autom ye afo ye nditọete fo mme prọfet, ye mmọemi ẹnịmde ikọ n̄wed emi. Tuak ibuot nnọ Abasi.”​—Ediyarade 22:8, 9.

22. Ẹkeme ndida ewe ewụhọ N̄wed Abasi ndiọn̄ọ abiatibet oro?

²² Ndi ndụn̄ọde oro ẹnamde ẹban̄a n̄ka mme ọkwọrọ ederi mi ọsọn̄ akaha? Nnyịn imekeme ndibiere emi ke ndida ewụhọ oro Jesus ọkọnọde man ẹda ẹdiọn̄ọ mme prọfet abian̄a ndisịn: “Mbufo ẹyeda mfri mmọ ẹfiọk mmọ.” (Matthew 7:15, 16) Nso, ndien, isidi mfri mme ọkwọrọ ederi ke ofụri isua ikie ẹmi ẹkebede ye ke ọyọhọ isua ikie-20 nnyịn emi? Nso ke owo eke edide ata abiatibet mi edisobo, ndien mmanie edisobo ukem n̄kpọ oro? Nso mbiomo ke mbon oro ẹnen̄erede ẹten̄e Abasi ẹnyene kaban̄a abiatibet emi? Mme ibuotikọ ẹtienede mi ẹyeneme akpan, n̄kpọ ẹmi.

Ubiereikpe Abasi ke Idem “Owo eke Edide Ata Abiatibet”

“Ẹkpi kpukpru eto eke mîn̄wụmke eti mfri ẹduọk, ẹmen, ẹtop, ẹsịn ke ikan̄.”​—MATTHEW 7:19.

1, 2. Nso idi owo eke edide ata abiatibet, ndien didie ke enye ọkọtọn̄ọ?

KE INI Abasi ke ndausụn̄ odudu spirit akanamde apostle Paul ebemiso etịn̄ aban̄a “owo eke edide ata abiatibet,” Paul ọkọdọhọ ete ke enye ama ọtọtọn̄ọ ndiwụt idem ke eyo imọ. Nte mbemiso ibuotikọ akanamde an̄wan̄a, Paul eketịn̄ aban̄a otuowo ẹmi ẹdidade iso ke ndifiak edem n̄kpọn̄ ata Ido Ukpono Christ. Ediwọn̄ọde n̄kpọn̄ akpanikọ oro ọkọtọn̄ọ ke utịt utịt akpa isua ikie, akpan akpan ke mme akpatre apostle ẹma ẹkekpan̄a. Otu abiatibet oro ama ada mme ukpepn̄kpọ ye edinam ẹmi ẹdude ke ntuaha ye Ikọ Abasi ẹdi.​—2 Thessalonica 2:3, 7; Utom 20:29, 30; 2 Timothy 3:16, 17; 4:3, 4.