Mme Uyen—Ẹsịn Eti Itiat Idakisọn̄ Ẹnọ Ini Iso
1. Ntak oyomde mme uyen Christian ẹkọri ọkpọsọn̄ mbuọtidem?
1 Nso idi ata akpan n̄kpọ ke ekikere fo? Nso ke afo esikere aban̄a? Ndi mme n̄kpọ oro ẹnen̄erede ẹbehe fi ẹkọn̄ọ ke mme n̄kpọ oro ẹdude ke emi, mîdịghe ndi mmọ ẹkọn̄ọ ke ini iso ẹnyụn̄ ẹwụhọ ke se Abasi ọn̄wọn̄ọde? (Matt. 6:24, 31-33; Luke 8:14) Oyom ọkpọsọn̄ mbuọtidem man inam n̄kpọ iban̄a mme un̄wọn̄ọ Abasi, nte ikemede ndikụt nto mme uwụtn̄kpọ Abraham ye Moses. (Heb. 11:8-10, 24-26) Didie ke afo ekeme ndikọri utọ mbuọtidem oro nnyụn̄ nsịn ‘eti itiat idakisọn̄ nnọ ini iso’?—1 Tim. 6:19, NW.
2. Nso ke nnyịn ikpep ito uwụtn̄kpọ Edidem Josiah?
2 Yom Jehovah: Edieke edide afo emenyene ndutịm eke spirit ofụri ini ye ubon fo, oro odot itoro. Edi kûkere ete ke utọ ndutịm oro ayanam fi enyene ọkpọsọn̄ mbuọtidem ke mbuari. Man afo “esịme ifiọk Abasi,” ana afo ke idemfo oyom Jehovah. (N̄ke 2:3-5; 1 Chron. 28:9) Ekpri Edidem Josiah ama anam oro. Okposụkedi ọkọkọride okpon ke n̄kann̄kụk oro owo mîkamaha n̄kpọ eke spirit, ke ini enye ekedide isua 15, “enye ama ọtọn̄ọ ndiyom Abasi David ete ete esie.”—2 Chron. 34:3, NW.
3. Didie ke mme uyen Christian mfịn ẹkeme ndiyom Jehovah?
3 Didie ke afo ekeme ndiyom Jehovah? Ebe ke nditịm ndụn̄ọde se afo enịmde ke akpanikọ nnyụn̄ ‘ndomo mfiọk’ nte ke emi enen̄ede edi akpanikọ. (Rome 12:2) Ke uwụtn̄kpọ, nte afo emekeme ndinam se Bible etịn̄de aban̄a iyịp an̄wan̄a m̀mê ndiwụt nte ke Obio Ubọn̄ Abasi ọkọtọn̄ọ ndikara ke heaven ke 1914? Ndinyene nnennen “ifiọk akpanikọ” edi akpan ikpehe kiet ke ndisịn eti itiat idakisọn̄ nnọ ini iso.—1 Tim. 2:3, 4.
4. Didie ke mme asuanetop oro mînaha kan̄a baptism ẹkeme ndinam ẹkụt n̄kọri mmọ?
4 Josiah ama ọbọ nti utịp ke ndikoyom Abasi. Mbemiso enye ekesịmde isua 20, enye ama anam n̄kpọ uko uko ndisio nsunsu utuakibuot ke isọn̄ Judah mfep. (2 Chron. 34:3-7) Kpasụk ntre, mme owo ẹyekụt n̄kọri eke spirit fo ebe ke mme edinam fo. (1 Tim. 4:15) Edieke edide afo edi asuanetop oro mînaha kan̄a baptism, domo ndifori uduot utom ukwọrọikọ fo. Kûkop uyụhọ ke ndinọ n̄wed kpọt. Nam edi utịtmbuba fo ndida Bible nnam n̄kpọ, ndikọk ibuot ye mme owo, ndinyụn̄ n̄kọri udọn̄ oro okokụtde. (Rome 12:7) Emi ayan̄wam fi ndikọri ke n̄kan̄ eke spirit.
5. Mme ifet ewe ke mme Christian oro ẹnade baptism ẹnyene ndida ntat utom ukwọrọikọ mmọ?
5 Nọ Jehovah Ofụri Ukeme Fo: Ke ini afo ayarade uyakidem fo ọnọ Jehovah ebe ke ndina baptism, afo amakabade edi asan̄autom Abasi oro ẹdoride ubọk. (2 Cor. 3:5, 6) Emi eberede mme ifet ọnọ fi ndinam n̄kpọ Jehovah ke uyọhọ ini. Emi esịne utom usiakusụn̄ ọkọrọ ye utom Bethel ye edidụk Ufọkn̄wed Unọ Mme Asan̄autom Ukpep. Mme usụn̄ en̄wen oro afo ekemede nditat utom ukwọrọikọ fo ẹdi ndikpep usem efen m̀mê ndiwọrọ n̄kanam utom ke ebiet oro udọn̄ okponde akan.
6. Didie ke kpukpru nnyịn ikeme ndisịn eti itiat idakisọn̄ nnọ ini iso?
6 Nte ededi, idịghe kpukpru owo ẹkeme ndibuana ke mme ifetutom emi, edi nnyịn owo kiet kiet imekeme ndinọ Jehovah ofụri ukeme nnyịn. (Matt. 22:37) Se ededi oro mme idaha fo ẹdide, yak edinam n̄kpo Jehovah edi akpan n̄kpọ ke uwem fo. (Ps. 16:5) Ke ndinam ntre, afo eyesịn eti itiat idakisọn̄ ọnọ ini iso.