Ẹdiana Kiet ke Mfọnmma Mbọbọ Ima

‘Ẹkpaha ẹdiana ọtọkiet ke ima.’​—⁠COLOSSAE 2:2, NW.

1, 2. Nso odudu ubahade ke ẹsobo mfịn akpan akpan?

KPAN̄ utọn̄! Ọkpọsọn̄ uyo oro ẹfioride ke ofụri heaven ọdọhọ ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:12) Nte isua kiet kiet ebede, etop oro amakabade ọdọdiọn̄ ọdiọk ye mme andidụn̄ isọn̄.

² Ẹdiọn̄ọ akwa asua Jehovah ke anyanini nte andibiọn̄ọ (Satan) ye ọdọk-edidọk (Devil). Edi andibian̄a emi anam n̄kpọ idahaemi ke ubi ubi usụn̄ efen​—⁠enye amakabade edi abasi iyatesịt! Ntak-⁠a? Koro ke ekọn̄ oro ọkọtọn̄ọde ke heaven ke 1914 Michael ye mme angel esie ẹma ẹsio enye ke heaven ẹduọk. (Ediyarade 12:​7-⁠9) Devil ọdiọn̄ọ ete ke ini imọ edi ibio ndisọn̄ọ ata imọ nte ke imọ imekeme ndiwọn̄ọde kpukpru owo n̄kpọn̄ edituak ibuot nnọ Abasi. (Job 1:11; 2:4, 5) Sia enye mînyeneke ebiet ubọhọ ndomokiet, enye ye mme demon esie ẹbiet otu ọkwọk oro ẹkopde iyatesịt ẹmi ẹn̄wan̄ade iyatesịt mmọ ẹfụk otu ntịme ntịme ubonowo.​—⁠Isaiah 57:20.

3. Nso idi utịp idiọk Satan ke eyo nnyịn?

³ Mme n̄kpọntịbe ẹmi, oro enyịn owo mîkwe, anam ntak mbiara ido uwem oro odude ke otu ubonowo ke ofụri ofụri an̄wan̄a. Mmọ n̄ko ẹnam idat idat ukeme oro mme owo ẹsịnde ndidian mme idụt ẹmi ẹbaharede oro mîkam ikemeke ndidu uwem ke n̄kemuyo, an̄wan̄a. Mme ekpụk ye mme orụk ẹsin̄wana ye kiet eken idiọk idiọk, ẹnamde ediwak miliọn owo ẹkûnyene ufọkidụn̄ ẹnyụn̄ ẹfehe ẹkpọn̄ ebietidụn̄ mmọ. Eyịghe idụhe ubiatibet ọkọride ke anana-mbiet udomo! Nte Jesus ekebemde iso etịn̄, ‘ima ediwak owo osụhọde.’ Kpukpru ebiet emi afo esede, unana edidianakiet ye unana ima onịm ntịme ntịme ubonowo eke mfịn idiọn̄ọ.​—⁠Matthew 24:12.

4. Ntak emi ikọt Abasi ẹdude ke san̄asan̄a itiendịk?

⁴ Ye idaha ererimbot ke ekikere, akam oro Jesus ọkọbọn̄de aban̄a mme anditiene enye enen̄ede enyene se ọwọrọde: “Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke [ntak andidiọk, NW]. Mmọ idịghe eke ererimbot, kpa nte Ami mmendịg̣he eke ererimbot.” (John 17:​15, 16) Mfịn, “andidiọk” enen̄ede ayat esịt ye mbon oro “ẹnịmde mme item Abasi, ẹnyụn̄ ẹyịrede ẹmụm ikọ ntiense Jesus ẹkama.” (Ediyarade 12:17) Ke mîkpedịghe ukpeme ye ima ima ntịn̄enyịn Jehovah, ẹkpesobo mme anam-akpanikọ Ntiense esie ẹfep. Uwem nnyịn ọkọn̄ọ ke nnyịn ndibọ ufọn nto mme ndutịm oro Abasi anamde kaban̄a ukpeme ye mfọnọn̄kpọ eke spirit nnyịn. Oro abuana nnyịn ndisịn̄ede idem nnyịn nte ekemde ye edinam odudu Esie ebe ke Christ, nte apostle oro akakpakde ke N̄wed Mbon Colossae 1:29.

5, 6. Apostle Paul ekekere didie aban̄a mme Christian ke Colossae, ndien ntak emi itien̄wed ibuotikọ isua 1995 odotde?

⁵ Okposụkedi etiede nte Paul akananam ikekwe mmọ iso ye iso, enye ama ama nditọete esie oro ẹkedude ke Colossae. Enye ama asian mmọ ete: “Ọdọn̄ mi nte mbufo ẹkpekam ẹfiọk adan̄a nte ọkpọsọn̄ ekikere mi kaban̄a mbufo otụn̄ọde.” (Colossae 2:1, The New Testament in Modern English, eke J. B. Phillips) Sia mme anditiene Jesus mîdịghe eke ererimbot, “andidiọk” eyekaiso ndidomo ndibiat edidianakiet nditọete ebe ke nditọ edu ererimbot ke otu mmọ. Mbụk oro Epaphras akadade oto Colossae edi ama owụt ete ke emi ama ada itie ke ndusụk udomo.

⁶ Ẹkeme nditịn̄ ibio ibio mban̄a kiet ke otu akpan udọn̄ Paul kaban̄a nditọete Christian esie ke mme ikọ ẹmi: ‘Ẹkpaha ẹdiana ọtọkiet ke ima.’ Mme ikọ esie ẹnen̄ede ẹnyene se ẹwọrọde mfịn, ke ererimbot emi unana edidianakiet ye unana ima ọyọhọde. Edieke nnyịn inamde item Paul, nnyịn iyenyene ukpeme Jehovah. Odudu otode spirit esie eyenam utom n̄ko ke uwem nnyịn, an̄wamde nnyịn ndibiọn̄ọ mme mfịghe ererimbot. Item emi owụt eti ibuot didie ntem! Ntem, N̄wed Mbon Colossae 2:2 edidi itien̄wed ibuotikọ 1995.

7. Nso edidianakiet ke ẹkpenyene ndikụt ke otu mme ata Christian?

⁷ Ke n̄wed oro ekebemde iso ewet ọnọ ẹsọk mbon Corinth, apostle oro ama ada idem owo nte uwụtn̄kpọ. Enye ekewet ete “edibahade okûdu” ke esop mme Christian oro ẹyetde aran edi “kpukpru ndido ẹkpekere kiet eken.” (1 Corinth 12:​12, 24, 25) Nso utịbe utịbe uwụtn̄kpọ! Ukot ye ubọk nnyịn ẹyịre ke ndido efen, kiet kiet ẹyịrede ye ofụri idem eken. Ukem oro ke edi ye ebuana nditọete nnyịn eke ofụri ererimbot, emi mbon oro ẹyetde aran ye ediwak miliọn owo ẹmi ẹdoride enyịn ndidu uwem ke paradise isọn̄ ẹnamde. Inaha nnyịn ibahade idem nnyịn ikpọn̄ otu ekemmọ mme Christian idu uwem nda-ke-idem! Spirit Abasi oto Christ Jesus ebe osịm nnyịn ke akamba udomo ebe ke ebuana nnyịn ye nditọete nnyịn.

Edidianakiet ke Ebuana ye Ifiọk

8, 9. (a) Nso idi akpan n̄kpọ ke nnyịn nditịp n̄kpọ nsịn ke edidianakiet ke esop? (b) Didie ke afo enyene ifiọk aban̄a Christ?

⁸ Akpan n̄kpọ kiet oro Paul eketịn̄de ekedi nte ke edidianakiet Christian enyene ebuana ye ifiọk, akpan akpan enyeoro aban̄ade Christ. Paul ekewet ete ke mme Christian ẹkpenyene “ndikpaha ndiana ọtọkiet ke ima kaban̄a ofụri uwak ọyọhọ nsọn̄ọ ifiọk mmọ, kaban̄a nnennen ifiọk edisana ndịben̄kpọ Abasi, oro edi, Christ.” (Colossae 2:2, NW) Nnyịn imenyene ifiọk​—⁠mme akpanikọ⁠—​toto ke ini nnyịn ikọtọn̄ọde ndikpep Ikọ Abasi. Nte ubak ifiọk ke nte ediwak ke otu akpanikọ ẹmi ẹkemde ye uduak Abasi, nnyịn imedi idifiọk akpan udeme Jesus. ‘Ofụri inyene ọniọn̄ ye ifiọk ẹdịbe Enye ke idem.’​—⁠Colossae 2:3.

⁹ Ndi ntre ke afo ekere aban̄a Jesus ye udeme esie ke uduak Abasi? Ediwak owo ke Christendom ẹsisọp ndikot Jesus, ẹdọhọde ke imenyịme enye inyụn̄ ibọ edinyan̄a. Edi nte mmọ ẹnen̄ede ẹdiọn̄ọ enye? Baba, koro ediwak mmọ ẹnịm ukpepn̄kpọ Abasi-Ita-ke-Kiet oro mîdụhe ke N̄wed Abasi. Afo udiọn̄ọke akpanikọ ke afan̄ emi kpọt edi eyedi afo emenyene ntatara ifiọk ke se Jesus eketịn̄de onyụn̄ anamde. Ẹmeda ukpepn̄kpọ oro esịnede item ke n̄wed Akakan Owo Oro Akanam Odude Uwem ẹn̄wam ediwak miliọn owo ke afan̄ emi. Edi oyom nnyịn ikaiso inam ifiọk nnyịn kaban̄a Jesus ye mme usụn̄ esie otụn̄ọ.

10. Ke nso usụn̄ ke ifiọk oro odịbede odu ọnọ nnyịn?

¹⁰ Ikọ oro nte ke ‘ofụri inyene ọniọn̄ ye ifiọk ẹdịbe’ ke Jesus iwọrọke ite ke nnyịn ikemeke ndinyene utọ ifiọk oro. Utu ke oro, enye ke ndusụk usụn̄ etie nte in̄wan̄în̄wan̄ itie udọk n̄kpọuto. Iyomke nnyịn idụn̄ọde akwa ikpehe iyom ebiet emi iditọn̄ọde idọk. Nnyịn imọfọfiọk​—⁠ata ifiọk ọtọn̄ọ ye se Bible ayarade aban̄a Jesus Christ. Nte nnyịn itịmde idiọn̄ọ ọyọhọ ọyọhọ udeme Jesus ke edinam uduak Jehovah, nnyịn imenyene mme n̄kpọuto ata ọniọn̄ ye nnennen ifiọk. Ntre se nnyịn iyomde edi ndikakaiso ndọk otụn̄ọ, ision̄ode mme n̄kpọuto m̀mê mme ọsọn̄urua n̄kpọ efen efen ẹmi ẹdude ke ebiet emi nnyịn ima ikọdọdọk.​—⁠Mme N̄ke 2:​1-⁠5.

11. Didie ke nnyịn ikeme ndikọri ifiọk ye ọniọn̄ nnyịn ebe ke nditie n̄kere mban̄a Jesus? (Da ediyet oro Jesus ekeyetde mme mbet ukot, mîdịghe da mme uwụtn̄kpọ efen, nam an̄wan̄a.)

¹¹ Ke uwụtn̄kpọ, nnyịn imekeme ndifiọk nte ke Jesus ama eyet mme apostle esie ukot. (John 13:​1-⁠20) Nte ededi, nte nnyịn imekere iban̄a ukpepn̄kpọ oro enye ekekpepde ye edu oro enye okowụtde? Ke ndinam ntre, nnyịn imekeme ndibụhọde ọniọn̄ ọniọn̄ n̄kpọuto oro ekemede ndin̄wam nnyịn​—⁠ih, onụkde nnyịn⁠—​ndikpụhọde nte nnyịn isinamde n̄kpọ ye eyenete eren m̀mê an̄wan oro nnyịn mîkamaha edu esie ke anyanini. Mîdịghe ke ini ẹnọde nnyịn utom ndinam oro nnyịn mîtịmke ima, nnyịn imekeme ndinam n̄kpọ isio isio ke ima ikọfiọk ọyọhọ ọyọhọ se John 13:​14, 15 ọwọrọde. Ntre ke ifiọk ye ọniọn̄ ẹtụk nnyịn. Nso odudu ke ekeme ndinyene ke idem mbon efen nte nnyịn itịmde ikpebe ifiọk Christ oro ọkọride-kọri ketket? Iso-ọfọn otuerọn̄ ‘ẹyedọdiọn̄ ẹkpaha ẹdiana ọtọkiet ke ima.’a

Ndutịme Ekeme Ndibiat Edidianakiet

12. Kaban̄a ewe ifiọk ke oyom nnyịn idu ke ukpeme?

¹² Edieke nnennen ifiọk anamde edi mmemmem n̄kpọ nnyịn “ndikpaha ndiana ọtọkiet ke ima,” nso idisụn̄ọ ito se “ẹkotde ke nsu, ẹte, ifiọk”? Ata isio n̄kpọ​—⁠utọk, unana edidianakiet, ye ediyo n̄kpọn̄ mbuọtidem. Ntre ana nnyịn ikpeme ibiọn̄ọ utọ nsunsu ifiọk oro, nte Paul okodụride Timothy utọn̄. (1 Timothy 6:​20, 21) Paul ama ewet n̄ko ete: “Mmọdọhọ emi mbak owo baba kiet edida nneminua abian̄a mbufo. Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo; nte asan̄ade ekekem ye mme enyene-odudu eke ẹkarade ererimbot, mînyụn̄ isan̄ake ikekem ye Christ.”​—⁠Colossae 2:​4, 8.

13, 14. (a) Ntak emi nditọete Colossae ẹkedude ke itiendịk kaban̄a ifiọk? (b) Ntak emi ndusụk owo mfịn ẹkemede ndikere ke mmimọ idụhe ke ukem itiendịk oro?

¹³ Abian̄a abian̄a odudu oro ekedide se ẹkekotde ke nsu ẹte ifiọk ama akan mme Christian ke Colossae okụk. Ediwak owo ke Colossae ye ke n̄kann̄kụk esie ẹma ẹnen̄ede ẹkpono ukpepn̄kpọ akwaifiọk mbon Greek. Mbon ido ukpono mme Jew ẹma ẹdu n̄ko oro ẹkeyomde mme Christian ẹnịm Ibet Moses, utọ nte mme usen usọrọ ye mme udia oro oyomde ẹdia. (Colossae 2:​11, 16, 17) Paul ikọbiọn̄ọke nditọete esie ndinyene ata ifiọk, edi ama oyom mmọ ẹkpeme mbak owo ekededi edibụme mmọ, adade nneminua okpụhọde ekikere mmọ ndinịm ikpîkpu ekikere owo kaban̄a uwem ye mme edinam. Afo emekeme ndikụt nte ke edieke ndusụk owo ke esop ẹyakde mme utọ ekikere ye edu oro kaban̄a uwem oro mîdụhe ke N̄wed Abasi akara ekikere ye mme ubiere mmọ, enye eyebiat edidianakiet ye ima ke ufọt mme andibuana ke esop.

¹⁴ Afo emekeme ndikere, ‘Ih, mmokụt n̄kpọndịk oro mbon Colossae ẹkesobode, edi ami ndụhe ke itiendịk edidi se mme ekikere mbon Greek ẹkarade, utọ nte eke ukpọn̄ ikpaha ke nsinsi m̀mê eke abasi-ita-ke-kiet; m̀mê ami ndikụt n̄kpọndịk ndomokiet ke edidi se mme ini nduọkodudu ukpono ndem eke nsunsu ido ukpono oro ami n̄kọwọrọde n̄kpọn̄ atapde.’ Ọfọn. Edi eti n̄kpọ ndibiere ndida nnọ akakan mmemmem akpanikọ oro ẹyarade ebe ke Jesus onyụn̄ odude ke N̄wed Abasi. Nte ededi, nte ekeme ndidi nte ke nnyịn idu ke itiendịk ito ukpepn̄kpọ akwaifiọk en̄wen m̀mê mme ekikere owo oro ẹdide ọsọ n̄kpọ mfịn?

15, 16. Nso ekikere kaban̄a uwem ekeme nditụk ekikere Christian?

¹⁵ Utọ edu oro kiet ama ododu ke anyanini: “Kemi edidi oro enye ọkọn̄wọn̄ọde ete iyedi enye? Mme ete nnyịn ẹmede idap, edi kpa ye oro kpukpru n̄kpọ ẹkaiso ukem ukem nte ẹsidide kpukpru ini.” (2 Peter 3:4, The New English Bible) Ẹkeme ndisịn ekikere oro ke mme ikọ efen, edi akpan n̄kpọ edi ukem. Ke uwụtn̄kpọ, owo ekeme ndikere ete, ‘Ke ini ami ke akpa n̄kekpepde akpanikọ ke ediwak isua ẹmi ẹkebede, utịt ama “enen̄ede ekpere.” Edi enye isụk idịghe kan̄a, ndien anie ọfiọk ini emi enye edidide?’ Edi akpanikọ, baba owo kiet ifiọkke ini emi utịt edidide. Edi, tịmfiọk ekikere oro Jesus ekesịnde udọn̄ ọnọ: “Ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini.”​—⁠Mark 13:​32, 33.

¹⁶ Ekpedi n̄kpọndịk didie ntem ndinyene ekikere oro nte ke, sia owo mîdiọn̄ọke ini emi utịt edidide, nnyịn ikpenyene ndidiomi ọyọhọ ye “ndammana” uwem! Usụn̄ unam n̄kpọ emi ekeme ndiwụt idem ke ekikere emi, ‘Ọkpọfọn ndinam mme usio-ukot oro ẹdiyakde mi nnyene (m̀mê nditọ mi ẹnyene) eti ubọkọkọ oro ẹkpede eti okụk onyụn̄ an̄wamde mi ndidu inem uwem. Nte ededi, nyesidụk mme mbonoesop Christian nnyụn̄ mbuana ke utom ukwọrọikọ ke ndusụk udomo, edi ntak ndomokiet idụhe ami ndisịn̄ede idemmi m̀mê ndinam ikpọ n̄waidem.’​—⁠Matthew 24:​38-⁠42.

17, 18. Nso ekikere ke Jesus ye mme apostle esie ẹkekpak nnyịn ndinyene?

¹⁷ Nte ededi, owo ikemeke ndifan̄a nte ke Jesus ye mme apostle esie ẹma ẹtoro nnyịn ndidu uwem ye usọp ini ke ekikere kaban̄a edikwọrọ eti mbụk, edisịn̄ede idem nnyịn nnyụn̄ nnyịme ndiwa idem. Paul ekewet ete: “Ndọhọ mbufo, nditọete, nte, ẹsịbe ini omụhọ; ntre ọtọn̄ọde ke ini emi, yak mmọemi ẹnyenede n̄wan ẹdu uwem nte mmọemi mînyeneke; . . . mmọemi ẹdepde n̄kpọ ẹnyụn̄ ẹdu uwem nte mmọemi mînyeneke; mmọemi ẹdade ererimbot ẹnam n̄kpọ ẹnyụn̄ ẹdu uwem nte mmọemi mînọhọke ke esịt. Koro ido ererimbot emi ke ebebe efep.”​—⁠1 Corinth 7:​29-⁠32a; Luke 13:​23, 24; Philippi 3:​13-⁠15; Colossae 1:29; 1 Timothy 4:10; 2 Timothy 2:4; Ediyarade 22:20.

¹⁸ Ke mîdehede inọ ekikere ite nnyịn inam inem uwem edi utịtmbuba nnyịn, Paul ekewet ke idak ndausụn̄ odudu spirit ete: “Nnyịn ikadaha baba n̄kpọ kiet idụk ke ererimbot, idinyụn̄ ikemeke ndida baba n̄kpọ kiet n̄wọrọ. Mmọdo edieke nnyịn inyenede se idiade ye se idade ifụk iferi, nnyịn iyekụt ite oro ekem. . . . N̄wana eti en̄wan mbuọtidem; sọn̄ọ mụm nsinsi uwem kama, emi ẹkekotde fi edida enyene, afo okonyụn̄ etịn̄ eti ikọ mbuọtidem ke iso ediwak ntiense.”​—⁠1 Timothy 6:​7-⁠12.

19. Esop esitie didie ke ini mbon oro ẹdude ke enye ẹnyịmede ekikere uwem oro Jesus ekesịnde udọn̄ ọnọ?

¹⁹ Ke ini ifịk ifịk mme Christian oro ẹsịnde ọkpọsọn̄ ukeme ‘nditịn̄ eti ikọ mbuọtidem’ ẹnamde esop, edidianakiet edi ndammana n̄kpọ. Mmọ iyakke idem inọ edu emi, ‘Ediwak nti n̄kpọ ẹdu ndida ndu uwem ke ediwak isua; duọk odudu, dia n̄kpọ, n̄wọn̄ n̄kpọ, dat esịt.’ (Luke 12:19) Utu ke oro, mmọ ẹdiana kiet ke ukem ukeme, ẹnyịmede ndinam n̄waidem man ẹnyene ọyọhọ ebuana nte ẹkekeme ke utom emi owo mîdifiakke inam aba mi.​—⁠Men N̄wed Mbon Philippi 1:​27, 28 domo.

Ẹkpeme Ẹbiọn̄ọ Mme Ikọ Nneminua

20. Nso idi ikpehe efen emi ẹkemede nditụn mme Christian usụn̄?

²⁰ Nte ededi, mme usụn̄ en̄wen ẹdu emi ẹkemede ‘ndida nneminua’ m̀mê ikpîkpu ikọ oro ọbiọn̄ọde-biọn̄ọ ‘edikpaha ndiana ọtọkiet ke ima’ mbian̄a mme Christian. Ọfis Watch Tower Society ke Germany ekewet ete: “N̄kpọntịbe kiet ama ada okosụn̄ọ ke eneni, mme asuanetop ye idem mbiowo ẹnyenede n̄kan̄ emi ẹdade ẹnọ kaban̄a mme utọ ibọkusọbọ oro eyenete kiet adade.” Mmọ ẹma ẹdian do ẹte: “Ke ntak ntatara nsio nsio usụn̄ ẹmi ẹdade ye ediwak ibat mbon udọn̄ọ, emi edi ikpehe kiet oro eneni edemerede ndien, edieke ẹbuande mme edinam ubụpekpo ke mme usụn̄ ibọkusọbọ, ekeme ndidi n̄kpọndịk.”​—⁠Ephesus 6:12.

21. Didie ke Christian ekeme nditaba nnennen usụn̄ usen̄kpọ mfịn?

²¹ Mme Christian ẹyom ndidu uwem nnyụn̄ n̄kop nsọn̄idem man mmọ ẹkeme ndituak ibuot nnọ Abasi. Edi, ke editịm n̄kpọ emi nnyịn imesisobo usọn̄ ye udọn̄ọ oro otode unana mfọnmma. Utu ke ndidori nsọn̄uyo ke mme n̄kpọ ẹban̄ade nsọn̄idem, nnyịn ikpenyene ndiwụk ntịn̄enyịn ke ata usọbọ, odude ọnọ nnyịn ye mbon efen. (1 Timothy 4:16) Christ edi ebiet emi usọbọ oro otode, kpa nte enye ekedide iwụk ebiet item oro Paul ọkọnọde mbon Colossae. Edi ti, Paul ama owụt ete ke ndusụk owo ẹkeme ndida “nneminua” man ẹwọn̄ọde ntịn̄enyịn nnyịn ẹkpọn̄ Christ, ndusụk man ẹwụt mme usụn̄ udiọn̄ọ uduot udọn̄ọ oro afịnade owo, usọbọidem, m̀mê udia.​—⁠Colossae 2:​2-⁠4.

22. Ewe edu emi adade ukem ukem ke nnyịn ikpenyene kaban̄a nsio nsio n̄kpọ oro ẹtịn̄de ẹban̄a mme usụn̄ udiọn̄ọ uduot udọn̄ọ oro afịnade owo ye usọbọidem?

²² Ẹmen̄wan̄a usuanetop n̄kpọurua ye mme ikọ ntiense ẹban̄ade kpukpru orụk ibọkusọbọ ye mme usụn̄ udiọn̄ọ uduot udọn̄ọ oro afịnade owo ẹfụk mme owo ke ofụri ererimbot. Ẹdiọn̄ọ ẹnyụn̄ ẹda ndusụk ke otu mmọ ntatara ntatara; ẹmebiom mmọ eken ikpe ntatara ntatara mîdịghe ẹnyene eyịghe ẹban̄a.b Owo kiet kiet enyene mbiomo ndibiere se enye edinamde kaban̄a nsọn̄idem esie. Edi mbon oro ẹnyịmede item Paul oro ẹkụtde ke N̄wed Mbon Colossae 2:​4, 8 ẹyenyene ukpeme ẹbiọn̄ọ edidi se abian̄a abian̄a “nneminua” m̀mê “ikpîkpu abian̄a” oro otụnde ediwak owo oro ẹnanade idotenyịn Obio Ubọn̄ usụn̄ abian̄ade, ẹmi ke n̄kịmenyịn ẹyomde ubọhọ. Idem edieke Christian onịmde ete ke etie nte akpan ibọkusọbọ kiet ọfọn ye imọ, enye ikpenyeneke ndimenede emi itie ke otu nditọete Christian, koro enye ekeme ndikabade ndi ntatara nneme ye eneni. Enye ke ntem ekeme ndiwụt nte ke imọ imenen̄ede ida edidianakiet ke esop ke akpan n̄kpọ.

23. Ntak emi nnyịn akpan akpan inyenede ntak ndikop idatesịt?

²³ Paul ama ọsọn̄ọ etịn̄ ete ke edidianakiet Christian edi isọn̄ ata idatesịt. Ke eyo esie ibat esop ama enen̄ede ekpri akan eke mfịn. Edi enye ama ewet ọnọ ẹsọk mbon Colossae ete: “Okposụkedi nte mmendụhe ye mbufo ke obụkidem, ami do ye mbufo ke spirit, nnyụn̄ ndadara ndikụt nte mbufo ẹtịmde ẹdu uwem, mbuọtidem mbufo onyụn̄ ọsọn̄ọde ada ke Christ.” (Colossae 2:5; se n̄ko N̄wed Mbon Colossae 3:14.) Ntak idara nnyịn otịm okpon didie ntem! Nnyịn imekeme ndikụt ata uyarade edidianakiet, eti ndutịm, ye nsọn̄ọnda ke mbuọtidem ke esop nnyịn, emi owụtde ofụri idaha ikọt Abasi ke ofụri isọn̄. Ntre ke ibio ini oro osụhọde ke editịm n̄kpọ emi, ẹyak nnyịn owo kiet kiet ibiere “ndikpaha ndiana ọtọkiet ke ima.”

[Mme Ikọ idakisọn̄]

Nte Afo Ama Otịm Ọfiọk?

◻ Nso idi ibuotikọ isua eke Mme Ntiense Jehovah ke 1995?

◻ Ntak okoyomde mme Christian ke Colossae ẹkpaha ẹdiana ọtọkiet ke ima, ndien ntak oyomde nnyịn inam ntre mfịn?

◻ Nso idiọk ekikere kaban̄a uwem ke oyom mme Christian akpan akpan ẹkpeme ẹbiọn̄ọ mfịn?

◻ Ntak emi mme Christian ẹkpedude ke ukpeme mbak owo edida nneminua kaban̄a nsọn̄idem ye mme usụn̄ udiọn̄ọ uduot udọn̄ọ oro afịnade owo otụn mmọ usụn̄?

[Mme ndise ke page 17]

Nte mme uduak fo kaban̄a ini iso ẹwụhọ ke edidu Jesus?