“Ẹnam Kpukpru N̄kpọ Ẹnọ Abasi Ubọn̄”

SIA ima ikayak idem inọ Jehovah, akpana nte isitịn̄de ikọ ye nte isinamde n̄kpọ ọnọ Abasi ubọn̄. Apostle Paul ama etịn̄ nte ikemede ndidu utọ uwem emi ke ini enye ọkọdọhọde ete: “Edide mbufo ẹdia n̄kpọ m̀mê ẹn̄wọn̄ n̄kpọ m̀mê ẹnam n̄kpọ ekededi, ẹnam kpukpru n̄kpọ ẹnọ Abasi ubọn̄.” (1 Cor. 10:31) Emi ọwọrọ ke ana idu uwem nte Jehovah etemede man mme owo ẹkụt nte Abasi nnyịn etiede. (Col. 3:10) Ana ikpebe Jehovah inyụn̄ idu uwem nte ndisana ikọt esie.—Eph. 5:1, 2.

² Apostle Peter ama ọdọhọ mme Christian n̄ko ete ẹkpebe Jehovah. Enye ọkọdọhọ ete: “Nte nditọ n̄kopitem, ẹtre ndinam n̄kpọ ekekem ye mme udọn̄ oro mbufo ẹkenyenede ke unana ifiọk ke eyo oko, edi, kpa nte Enye emi okokotde mbufo edide Edisana, mbufo n̄ko ẹkabade ẹsana ke ofụri edu uwem mbufo, koro ẹwet ẹte: ‘Mbufo ẹnyene ndidi edisana koro ami ndide edisana.’” (1 Pet. 1:14-16) Kpa nte Abasi okoyomde nditọ Israel ẹsana ke eset, ntre n̄ko ke enye oyom mme Christian ẹsana. Abasi iyomke mmọ ẹdehe ke usụn̄ ndomokiet, iyomke mmọ ẹsịn ubọk ke idiọkn̄kpọ, inyụn̄ iyomke mmọ ẹbiet mbon ererimbot. Enye oyom mmọ ẹda san̄asan̄a ẹnam n̄kpọ imọ.—Ex. 20:5.

³ Nnyịn iyasana edieke inịmde mme ibet Jehovah emi ẹdude ke Bible. (2 Tim. 3:16) Ke ini ikekpepde Bible, ima ikpep iban̄a Jehovah, se enye amade ye se enye mîmaha, inyụn̄ itọn̄ọ ndima enye. Se ikekpepde ama anam ikụt ke ọfọn ibem iso iyom Obio Ubọn̄ Abasi inyụn̄ ida ndinam uduak Jehovah nte akpa n̄kpọ ke uwem nnyịn. (Matt. 6:33; Rome 12:2) Ana imen obufa owo isịne man ikeme ndinam emi.—Eph. 4:22-24.

DU UWEM NTE JEHOVAH ETEMEDE

⁴ Imemke utom ndidu uwem kpukpru ini nte Jehovah etemede. Satan emi edide asua nnyịn oyom nnyịn ikpọn̄ Jehovah. Idiọk ererimbot emi ye idiọkn̄kpọ emi ikadade-da imana ẹsinam ọsọn̄ nnyịn ndinam se ifọnde. Edi ana inen̄ede ikpeme mbak mme n̄kpọ emi idinam itre ndinam se ikọn̄wọn̄ọde inọ Abasi ke ini ikayakde idem inọ enye. N̄wed Abasi ọdọhọ ikûyak idem akpa nnyịn edieke ẹkọbọde nnyịn sia ana ibọ ufen ke ntak edinen ido. (2 Tim. 3:12) Esịt akpakam enenem nnyịn ke ini ẹkọbọde nnyịn koro emi owụt ke nnyịn inam uduak Abasi.—1 Pet. 3:14-16; 4:12, 14-16.

⁵ Kpa ye emi Jesus ọkọfọnde ama, enye ama ekpep n̄kopitem oto ndutụhọ oro enye okokụtde. Enye ikanamke n̄kpọ ndomokiet emi Satan okoyomde enye anam ikonyụn̄ iyomke n̄kpọ ererimbot emi. (Matt. 4:1-11; John 6:15) Jesus ikekereke m̀mê akpana idomo se Satan etịn̄de ise. Kpa ye oro mme owo ẹkesuade enye ke ntak emi enye akanamde n̄kpọ Abasi, enye ama aka iso odu uwem nte Jehovah etemede. Mbemiso ẹkewotde Jesus, enye ama ọdọhọ mbet esie ke mme owo ẹyesua mmọ n̄ko. Toto ke ini oro ke ẹketọn̄ọ ndikọbọ mbet Jesus, edi idem isinyekke mmọ koro Eyen Abasi ama akan ererimbot.—John 15:19; 16:33; 17:16.

⁶ Edieke nnyịn mîyomke nditie nte mbon ererimbot emi, ana idu uwem nte Jehovah etemede kpa nte Eteufọk nnyịn okodude. Ikpanaha isịn idem ke mbre ukara ikponyụn̄ inaha isitiene isịn uyo ke ini mme owo ẹnemede nte ẹkpenamde ererimbot emi ọfọn. N̄kpọ en̄wen edi ke nnyịn ikpedehedei itiene mbon ererimbot emi idu oburobụt uwem. Ana inam se ẹtịn̄de ke James 1:21, emi ọdọhọde ete: “Ẹduọn̄ọ kpukpru ndek ndek ido ye n̄kpọ oro mînyeneke ufọn do, kpa idiọkn̄kpọ, ẹnyụn̄ ẹbọ ikọ oro ẹtọde ke esịt mbufo ke ifụre ifụre ido emi ekemede ndinyan̄a . . . mbufo.” Ikọ Abasi esidụk nnyịn esịt ke ini ikpepde Bible ye ke ini idụkde mbono esop; enye isiyakke n̄kpọ ererimbot ọdọn̄ nnyịn itọn̄. James mbet Jesus ekewet ete: “Nte mbufo ifiọkke ite edidi ufan ye ererimbot edi edidi asua ye Abasi? Ke ntre, owo ekededi eke oyomde ndidi ufan ye ererimbot anam idem asua ye Abasi.” (Jas. 4:4) Oro anam Bible ọdọhọ nnyịn idu uwem nte Jehovah etemede, ikûdu nte mbon ererimbot emi.

⁷ Ikọ Abasi ọdọhọ ikûtiene mbon ererimbot idu oburobụt uwem. Ephesus 5:3 ọdọhọ ete: “Ẹkûdedei ẹtịn̄ ẹban̄a use ye orụk mbubiam ido ekededi m̀mê idiọkitọn̄ ke otu mbufo, kpa nte odotde ndisana owo.” Ntem, nnyịn iditiehe ikere oburobụt m̀mê ndek ndek n̄kpọ, idinyụn̄ iyakke inua ọbọhọ nnyịn itịn̄ utọ n̄kpọ emi. Edieke nnyịn mînamke utọ n̄kpọ emi, oro owụt ke imoyom ndidu edisana uwem emi Jehovah ọdọhọde idu.

USANAIDEM

⁸ Mme Christian ẹkpenyene ndisana idem. Ke eset, edisana Abasi nnyịn okoyom nditọ Israel ẹnam ebiet emi mmọ ẹdude asana. Ana nnyịn n̄ko isana mbak Jehovah ‘idikụt n̄kpọ ndek’ ke idem nnyịn.—Deut. 23:14.

⁹ Bible owụt ke owo emi mîsanake idem idụhe edisana uwem. Ke uwụtn̄kpọ, Paul ekewet ete: “Ndima, ẹyak nnyịn iyet kpukpru se isabarede obụkidem ye spirit ifep ke idem nnyịn, inam edisana idaha nnyịn ọfọn ama ke edibak Abasi.” (2 Cor. 7:1) Ntem, mme Christian ẹkpenyene ndiyere mmọn̄ nnyụn̄ nyet ọfọn̄ mmọ kpukpru ini. Kpa ye emi n̄kpọ mîdịghe ukem ukem ke kpukpru ebiet, ọdiọk se ọdọdiọk, iyosụk inyene suọp ye mmọn̄ oro ekemde se iyerede inyụn̄ iyet nditọ nnyịn.

¹⁰ Utom ukwọrọikọ nnyịn anam ediwak owo ẹdiọn̄ọ nnyịn ke ebiet emi idụn̄de. Ndinam esịtufọk ye n̄kann̄kụk nnyịn asana kpukpru ini edi usụn̄ kiet emi ikemede ndinam mme mbọhọidụn̄ nnyịn ẹdiọn̄ọ edisana Abasi nnyịn. Edi ana kpukpru owo ke ufọk ẹdian ubọk ẹnam emi. Irenowo ẹkpenyene ndikụt ẹte ke esịtufọk mmọ ye n̄kann̄kụk mmọ asana, sia emi esinam mme owo ẹtịn̄ nti ikọ ẹban̄a nnyịn. Edieke erenowo anamde emi, afiak ada usụn̄ ke n̄kpọ Abasi ke ufọk esie, ọwọrọ enye akama ufọk esie ọfọn. (1 Tim. 3:4, 12) Iban n̄ko ẹnyene ndinen̄ede nse mban̄a esịtufọk mmọ. (Titus 2:4, 5) Nditọ emi ete ye eka ẹkekpepde nte ẹkpenamde ufọk asana ẹsitiene ẹkama ufọk n̄ko. Edieke kpukpru owo ke ufọk ẹsanade idem ẹnyụn̄ ẹdiande ubọk ẹnam ufọk asana, ọwọrọ mmọ ẹtọtọn̄ọ ndidu uwem nte ẹdidude ke obufa ererimbot.

¹¹ Ediwak nditọete nnyịn ẹsisan̄a ke moto mmọ ẹka mbono esop. Ukwọrọikọ ọkpọsọn̄ etieti ke ndusụk itie edieke moto mîkpodụhe. Edi ana ikama enye asana inyụn̄ isidiọn̄ enye kpukpru ini. Ufọk ye moto nnyịn ẹkpenyene ndinam mme owo ẹdiọn̄ọ ke nnyịn isịne ke otu ndisana ikọt Jehovah. Akpana ikama ekpat ukwọrọikọ ye Bible nnyịn asana n̄ko.

¹² Ọfọn isisịne ọfọn̄ inyụn̄ ikama idem nte Ikọ Abasi etemede. Idụhe owo nnyịn ndomokiet emi akpasan̄ade nsuahade nsuahade aka ndikụt akwaowo emi ẹkponode-kpono. Ntre, akpana inen̄ede ikpeme se isịnede ke ini ikade ukwọrọikọ m̀mê ke ini inyenede n̄kpọ ndinam ke Ufọkmbono Obio Ubọn̄. Nte isịnede n̄kpọ inyụn̄ ikamade idem ekeme ndinam mme owo ẹma m̀mê ẹsua esop Abasi. Eyenyene nte etiede edieke nnyịn mîsatke-sat se isịnede mînyụn̄ ikereke iban̄a mbon en̄wen. (Mic. 6:8; 1 Cor. 10:31-33; 1 Tim. 2:9, 10) Mmọdo, ọfọn isiti se N̄wed Abasi etịn̄de aban̄a usanaidem ye ukamaidem ke ini itịmde idem ndika ukwọrọikọ ye mbono esop, m̀mê n̄kpri ye ikpọ mbono. Edieke inamde emi, nnyịn iyokpono Jehovah iyonyụn̄ inọ enye ubọn̄.

¹³ Ana isịne n̄kpọ inyụn̄ ikama idem ọfọn n̄ko ke ini ikade ndise ibuot itieutom nnyịn m̀mê n̄kọk itieutom nnyịn ekededi. N̄kọ emeti ke Bethel ọwọrọ “Ufọk Abasi.” Ntre, ana isịne eti ọfọn̄ inyụn̄ inam n̄kpọ nte isinamde ke ini ikade Ufọkmbono Obio Ubọn̄.

¹⁴ Ana ikpeme se isịnede ye nte ikamade idem, idem ke ini isan̄ade ibọ ofụm m̀mê ke ini ikade udia uwem. Imekeme ndibụp idem nnyịn ite, ‘Ndi se nsịnede ayanam bụt anam mi ndikwọrọ ikọ?’

SE ISIDADE INEM IDEM ESỊT

¹⁵ Ndisisio ini nduọk odudu nnyụn̄ n̄kop idem inem esifọn owo ke idem. Jesus ama ọdọhọ mbet esie isan̄ kiet ete ẹtiene imọ ẹka ndobo ndobo ebiet ‘ẹkeduọk odudu esisịt.’ (Mark 6:31) Ndiduọk odudu nnyụn̄ mbre mbre esinam isio esịt ikpọn̄ mfịna nnyịn. Emi ekeme ndinam idem ọsọn̄ nnyịn, anam ifiak inyene odudu inam utom nnyịn.

¹⁶ Mme owo ẹsinem idem esịt ke nsio nsio usụn̄ mfịn, edi ana Christian ada ifiọk N̄wed Abasi emi enye enyenede asasat se enye anamde. Ọfọn ndinem idem esịt, edi idịghe oro ke owo akpada nte akpan n̄kpọ ke uwem. Bible ọdọhọ ke mme owo “[ẹyema] unọ idem inemesịt utu ke ndima Abasi” “ke mme akpatre usen” emi. (2 Tim. 3:1, 4) Ediwak n̄kpọ emi mbon ererimbot ẹdade ẹnem idem esịt edi n̄kpọ emi mîkpanaha ikọt Jehovah ẹnam.

¹⁷ Ke eyo mme apostle, mme owo ẹma ẹsida nsio nsio ndiọi n̄kpọ ẹnem idem esịt. Ntre, akana mme Christian ẹkpeme mbak ẹditiene ẹsịn idem ke utọ n̄kpọ oro. Mbon Rome ẹma ẹnyene an̄wambre emi mme owo ẹkesikade ẹkese nte ẹtụhọrede mme owo. Ẹma ẹsinam mme owo ẹn̄wana ye ndiọi unam, ẹwot mme owo, ẹnam oburobụt ido ke an̄wambre oro man mme owo ẹse ẹkop inem. Edi mme Christian ikesikpereke-kpere utọ itie oro. Ediwak n̄kpọ emi mbon ererimbot ẹdade ẹnem idem esịt mfịn onyụn̄ ọdiọk nte eke mbon Rome oro. Ana ‘itịm ikpeme nte isan̄ade,’ ikûdedei uda oburobụt n̄kpọ inem idem esịt. (Eph. 5:15, 16; Ps. 11:5) Ndien ndusụk ini, ekeme ndidi se ẹnamde idiọkke, edi mbon emi ẹdude ke itie oro idịghe utọ mbon emi mme Christian ẹkpedụkde ndụk.—1 Pet. 4:1-4.

¹⁸ Nsio nsio n̄kpọ emi ọfọnde mmọdo emi Christian ekemede ndida nnem idem esịt. Ediwak nditọete nnyịn emi ẹnamde se Ikọ Abasi etemede ye se ẹwetde ke n̄wed esop Abasi ẹkụt nti usụn̄ emi mmọ ẹkemede ndinem idemmọ esịt.

¹⁹ Ndusụk ini, eyenete ekeme ndikot ubon ifan̄ ufọk, ẹtie kiet ẹnem idem esịt. Mîdịghe, ẹkeme ndikot nditọete usọrọ ndọ m̀mê n̄kpọ en̄wen emi owo ekemede ndinam n̄kop inemesịt. (John 2:2) Owo enyenede usọrọ enyene ndibiere kpukpru se ẹnamde ke itie usọrọ. Edi ana inen̄ede ikpeme idem ke ini idụkde usọrọ emi mme owo ẹnen̄erede ẹwak. Ndusụk owo ẹsinam ido emi mîkpanaha Christian anam ke itie usọrọ, utọ nte ndidia udia n̄kaha, ndin̄wọn̄ mmịn n̄kaha, m̀mê ndikam nnam akamba idiọkn̄kpọ. Emi anam ndusụk mme Christian mîsimaha ndikot mme owo ẹwak ẹkaha m̀mê ndinam mme owo ẹbịghi ẹkaha ke itie usọrọ mmọ. Edieke ẹnọde ọkpọsọn̄ mmịn ke itie usọrọ, ọkpọfọn owo ọn̄wọn̄ idaha idaha. (Phil. 4:5) Edieke inamde ofụri se ikekeme man usọrọ nnyịn edi owo ama ọnyọn̄ esịt ifịnake enye, nnyịn idifịnake idem ikaha iban̄a udia ye mmịn.

²⁰ Ọfọn ndikama owo esen. (1 Pet. 4:9) Edi ọkpọfọn isiti nditọete nnyịn emi mînyeneke n̄kpọ ke ini iyomde ndikot mme owo ufọk m̀mê edinam. (Luke 14:12-14) Ndien ke ini ẹkotde nnyịn usọrọ, nte inamde n̄kpọ ekpenyene ndiwụt ke imama mbon en̄wen nte Mark 12:31 ọdọhọde. Ikpanaha ifre ndikọm owo emi okotde nnyịn ufọk m̀mê edinam.

²¹ Mme Christian ẹnem esịt ẹban̄a akpakịp n̄kpọ emi Abasi ọnọde nnyịn. Mmọ “[ẹsidia] ẹnyụn̄ ẹn̄wọn̄ ẹnyụn̄ ẹkụt se ifọnde ke kpukpru ọkpọsọn̄ utom mmọ.” (Eccl. 3:12, 13) Edieke enyene-usọrọ ye mbon emi ẹkotde usọrọ ‘ẹnamde kpukpru n̄kpọ ẹnọ Abasi ubọn̄,’ esịt eyenem mmọ ini ekededi oro mmọ ẹtide nte usọrọ oro eketiede.

SE ẸSINAMDE KE UFỌKN̄WED

²² Nditọ Mme Ntiense Jehovah ẹsitiene ẹka ufọkn̄wed praimari ye sekọndri. Mmọ ẹsika n̄wed man ẹkeme ndiwet n̄kpọ nnyụn̄ n̄kot n̄wed ọfọn. Mme n̄kpọ eken emi ẹsikpepde ke ufọkn̄wed ẹsin̄wam nditọ nnyịn ẹkeme ndinam n̄kpọ Abasi. Edi ke adan̄aemi mmọ ẹdude ke ufọkn̄wed, ọfọn mmọ ẹnam ofụri se ẹkekeme man ẹnịm n̄kpọ Abasi akpa ke uwem mmọ. Emi oyowụt ke mmọ ‘ẹti Akwa Andibot mmọ.’—Eccl. 12:1.

²³ Edieke osụk akade ufọkn̄wed, kûdian idem ukaha ye nditọ ererimbot. (2 Tim. 3:1, 2) Jehovah ekpep nnyịn se ikpanamde mbak mbon ererimbot idibiat nnyịn. Ntre nam kpukpru se Jehovah ekpepde nnyịn emi. (Ps. 23:4; 91:1, 2) Da mme n̄kpọ emi Jehovah ekpepde nnyịn kpeme idemfo.—Ps. 23:5.

²⁴ Ediwak uyen emi ẹdide Mme Ntiense Jehovah ẹsibiere ke mmimọ iditieneke inam mme n̄kpọ emi nditọ ufọkn̄wed ẹsinamde ke ẹsiode ukpepn̄wed ẹfep. Ekeme ndidi nditọ ufọkn̄wed mbufo ye mme andikpep idinemke esịt ye afo. Edi akpan n̄kpọ akam edi ndinem Abasi esịt. Emi ọwọrọ ke edinam n̄kpọ emi esịt mîdifinake fi. Biere ke udûtieneke mbon ererimbot emi umia mbuba m̀mê nditiene ndọhọ ke idụt mbufo ọfọn akan. (Gal. 5:19, 26) Edieke anamde nti item oro ete ye eka fo ẹdade N̄wed Abasi ẹnọ fi, onyụn̄ odụkde nsan̄a ye nditọete ke esop, ọwọrọ odu uwem nte Jehovah etemede.

UTOM YE MME UFAN

²⁵ N̄wed Abasi ọdọhọ ke ete enyene ndise mban̄a ufọk esie. (1 Tim. 5:8) Mme ete emi ẹdide mme asan̄autom Abasi ẹsinam utom man ẹnyene okụk, edi mmọ ẹdiọn̄ọ ke ikpanaha iyak utom akpan mmimọ ndibem iso nyom Obio Ubọn̄ Abasi. (Matt. 6:33; Rome 11:13) Mme ete emi ẹsịnde idem ẹnam n̄kpọ Abasi ẹnyụn̄ ẹyụhọde ye se mmọ ẹnyenede iditịmekede esịt, idinyụn̄ imaha inyene.—1 Tim. 6:6-10.

²⁶ Kpukpru mme Christian emi ẹma ẹkeyak idem ẹnọ Abasi, emi ẹnamde utom, ẹkpenyene nditi se N̄wed Abasi ekpepde. Ikpanaha inam utom oro abiatde ibet Abasi m̀mê ibet ukara man inyene okụk ise iban̄a idem nnyịn. (Rome 13:1, 2; 1 Cor. 6:9, 10) Ana ikpeme n̄ko ndiọi nsan̄a ke itieutom mbak idibiat nnyịn. Sia idide mbonekọn̄ Christ, ikpanaha inam mbubehe ekededi oro abiatde ibet Abasi, mînyụn̄ iyakke ida san̄asan̄a, m̀mê mbubehe emi ekemede ndidian̄ade nnyịn n̄kpọn̄ Abasi. (Isa. 2:4; 2 Tim. 2:4) N̄kpọ en̄wen edi ke ikpanaha inam utom m̀mê mbubehe oro ekemede ndinam nnyịn idian idem ye “Akwa Babylon” emi edide asua Abasi.—Edi. 18:2, 4; 2 Cor. 6:14-17.

²⁷ Edieke inamde se Jehovah etemede, nnyịn ididaha mbubehe nnyịn idineme ke Ufọkmbono Obio Ubọn̄. Isidụk mbono esop, n̄kpri ye ikpọ mbono man ituak ibuot inọ Jehovah. Ini emi ke Jehovah esikpep nnyịn Ikọ esie; ini emi n̄ko ke isida isọn̄ọ kiet eken idem. (Rome 1:11, 12; Heb. 10:24, 25) Akpana isineme n̄kpọ Abasi kpọt ke utọ ini emi.

ẸDIANA KIET NTE NDITỌEKA

²⁸ Jehovah oyom ikọt esie ẹdiana kiet ẹnyụn̄ ẹdu ke emem. (Eph. 4:1-3) Nnyịn isikereke iban̄a idem nnyịn kpọt, edi imesikere iban̄a kpukpru owo. (1 Thess. 5:15) Anaedi omokokụt ke esop mbufo etie ntre. Inamke n̄kpọ m̀mê n̄kpọ etie didie ye nnyịn, m̀mê ito m̀mọ̀n̄, m̀mê imenyene okụk, m̀mê imaka n̄wed, ana kpukpru nnyịn idu uwem nte Jehovah etemede. Idem mbon emi mîdịghe Mme Ntiense ẹsikụt ke ikọt Jehovah ẹdi ata isio.—1 Pet. 2:12.

²⁹ Apostle Paul ama etịn̄ se inamde nnyịn idiana kiet ke ini enye ọkọdọhọde ete: “Idem kiet odu, spirit kiet onyụn̄ odu, kpa nte ẹkekam ẹkotde mbufo ke idotenyịn kiet oro ẹkekotde mbufo ẹnọ; Ọbọn̄ kiet, mbuọtidem kiet, baptism kiet; Abasi kiet ye Ete kpukpru owo, emi akarade kpukpru owo onyụn̄ anamde utom ke idem kpukpru owo onyụn̄ odude ke esịt kpukpru owo.” (Eph. 4:4-6) Ana kpukpru nnyịn inyịme ofụri se Bible ekpepde inyụn̄ inyịme ke Jehovah enyene unen ndikara kpukpru n̄kpọ. Jehovah ke ekpep nnyịn edisana usem, oro edi, akpanikọ emi odude ke Bible. Ndien emi an̄wam nnyịn inam n̄kpọ esie ke esịt kiet.—Zeph. 3:9.

³⁰ Emem emi odude ke esop ye nte nditọete ẹdianade kiet esinam esịt enem kpukpru ikọt Jehovah. Imokụt ke se Jehovah ọkọn̄wọn̄ọde emi osu: “Nyobon mmọ ọtọkiet, nte otuerọn̄ ke itienna.” (Mic. 2:12) Ana kpukpru nnyịn idu uwem nte Jehovah etemede man ika iso idiana kiet.

³¹ Mbon emi Jehovah enyịmede ẹdu ke edisana esop esie ẹkop inemesịt. Nnyịn idituaha n̄kpọfiọk ke se ededi oro iyakde atak man idot ndikere enyịn̄ ndian Jehovah. Nnyịn iyomke n̄kpọ ndomokiet adian̄ade nnyịn ye Jehovah. Ntre ẹyak inam ofụri se ikekeme man ika iso idu uwem nte Jehovah etemede, inyụn̄ in̄wam mbon en̄wen ẹnam kpasụk ntre.—2 Cor. 3:18.