Ido Ukpono

Ntak emi ufọkabasi awakde ntem?

“Mbufo ẹmekpọn̄ ewụhọ Abasi, ẹsọn̄ọ ẹmụm ido eset mme owo ẹkama.”—Mark 7:8.

SE BIBLE ỌDỌHỌDE

Edi ndammana n̄kpọ mme owo ndiyom ndikpono Abasi. (Matthew 5:3) Oro anam mme owo ẹsiak nsio nsio ufọkabasi ye ido ukpono emi ẹkpepde ekikere owo utu ke eke Abasi.

Ke uwụtn̄kpọ, kop se Bible etịn̄de mi aban̄a mbon ido ukpono kiet ke eyo mme apostle: “Mmọ ẹnyene ifịk ẹban̄a Abasi; edi emi isan̄ake ye nnennen ifiọk; koro, sia mmọ mîfiọkke edinen ido Abasi edi ẹyomde ndinam edinen ido idemmọ ọsọn̄ọ ada, mmọ isụkke idem inọ edinen ido Abasi.” (Rome 10:2, 3) Ntre ke onyụn̄ edi mfịn. Ediwak ido ukpono ‘ẹkpep mme ewụhọ owo ke ukpepn̄kpọ mmọ.’—Mark 7:7.

Ndi ufọn odu owo ndinyene ufọkabasi emi enye esikade?

“Ẹyak nnyịn inyụn̄ ikere nte ikpedemerede kiet eken inọ ima ye nti utom, ikûsịn ndisop idem ọtọkiet.”—Mme Hebrew 10:24, 25.

SE BIBLE ỌDỌHỌDE

Mme Hebrew 10:25 ọdọhọ “ikûsịn ndisop idem ọtọkiet.” Emi owụt ke Abasi oyom mme owo ẹsisop idem ọtọkiet ẹkpono imọ. Edi ndi akpana owo kiet kiet ke ufọkabasi okpono Abasi nte enye amade? Ihih, sia Bible ọdọhọ ke Abasi oyom kpukpru ikọt esie “ẹnyene ikọ inua kiet” ẹnyụn̄ “ẹdiana kiet ke ekikere ye ke nte ẹkerede n̄kpọ.” (1 Corinth 1:10) Ẹkenyene ndibahade ikọt Abasi ndọn̄ ke mme esop, ndien akana mmọ “ẹnyene ima ẹnọ ofụri otu nditọete” ke ofụri ererimbot. (1 Peter 2:17; 1 Corinth 11:16) Abasi oyom ẹdiana kiet ntem ẹtuak ibuot ẹnọ imọ.

Ndi ẹkeme ndidiọn̄ọ ido ukpono akpanikọ?

“Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:35.

SE BIBLE ỌDỌHỌDE

Bible ọnọ uwụtn̄kpọ emi an̄wamde nnyịn idiọn̄ọ mbon emi ẹdude ke ido ukpono akpanikọ. Bible ọdọhọ ete: “Mbufo ẹyeda mfri mmọ ẹfiọk mmọ. Ndi akanam mme owo ẹtet grape ke n̄kukịm m̀mê ẹtet fig ke mbaraekpe?” (Matthew 7:16) Inaha aka ufọkn̄wed ntaifiọk ekekpep n̄kpọ aban̄a eto mbemiso ọdiọn̄ọde eto fig m̀mê mbaraekpe. Kpasụk ntre, inaha edi ataifiọk mbemiso ọdiọn̄ọde ido ukpono akpanikọ m̀mê nsunsu ido ukpono. Nso idi ndusụk n̄kpọ oro ẹdade ẹdiọn̄ọ ido ukpono akpanikọ?

• Ido ukpono akpanikọ ekpep ata Ikọ Abasi emi odude ke Bible, ikpepke ukpepn̄kpọ owo.—John 4:24; 17:17.

• Ido ukpono akpanikọ anam mme owo ẹfiọk Abasi ẹnyụn̄ ẹfiọk ke enye ekere Jehovah.—John 17:3, 6.

• Ido ukpono akpanikọ ekpep ke Obio Ubọn̄ Abasi edi n̄kukụre ukara emi edisiode kpukpru afanikọn̄ ifep, idịghe ukara owo.—Matthew 10:7; 24:14.

• Ido ukpono akpanikọ ekpep ikọt mmọ ndima kiet eken ke ofụri esịt. (John 13:35) Ẹkpep mmọ n̄ko ndikpono kpukpru owo, inamke n̄kpọ m̀mê mmọ ẹto m̀mọ̀n̄. Ẹkpep mmọ nte mmọ ẹkpedade ini ye inyene mmọ ẹn̄wam mbon en̄wen. Ẹkpep mmọ n̄ko ẹte ẹkûn̄wana ekọn̄.—Micah 4:1-4.

• Ido ukpono akpanikọ itiehe nte ndisika ufọkabasi nnyụn̄ ntiene nnam se ẹnamde ke ufọkabasi. Ido ukpono akpanikọ ekpep ikọt mmọ ndidu uwem nte Bible etemede nnyụn̄ nnam se mmọ ẹkwọrọde.—Rome 2:21; 1 John 3:18.

Mme Ntiense Jehovah emi ẹwetde magazine emi ẹsinọ Abasi ubọn̄ ke nte mmọ ẹtịn̄de ikọ ẹnyụn̄ ẹdude uwem. Mbọk yom usụn̄ dụk Ikọ Abasi mmọ ke Ufọkmbono Obio Ubọn̄ man okụt se itịn̄de emi.