Nam N̄kpọ Ban̄a Mme Un̄wọn̄ọ Abasi Ebe ke Ndiwụt Mbuọtidem

“Enye [Jehovah Abasi] okonyụn̄ adade ọnọ nnyịn mme un̄wọn̄ọ eke ẹsọn̄de urua ẹnyụn̄ ẹkponde etieti.”—2 PETER 1:4.

1. Nso in̄wam nnyịn ndinyene ata mbuọtidem?

JEHOVAH oyom nnyịn iwụt mbuọtidem ke mme un̄wọn̄ọ esie. Edi, “idịghe kpukpru owo ẹnyene mbuọtidem.” (2 Thessalonica 3:2) Edu emi edi mbun̄wụm edisana spirit, m̀mê anamutom odudu Abasi. (Galatia 5:22, 23) Ntre, mbon oro spirit Jehovah adade usụn̄ kpọt ẹkeme ndiwụt mbuọtidem.

2. Didie ke apostle Paul etịn̄ se “mbuọtidem” edide?

² Edi nso idi mbuọtidem? Apostle Paul okot enye “in̄wan̄în̄wan̄ edinam ata idem n̄kpọ n̄wụt okposụk mîkwe.” Uyarade ata idem n̄kpọ ẹmi owo mîkwe mi ọsọn̄ etieti tutu ẹwụt enye nte edide ukem ye mbuọtidem. Ẹdọhọ n̄ko ete ke mbuọtidem edi “ọyọhọ edibet mme n̄kpọ oro ẹdoride enyịn ẹban̄a” koro mmọ oro ẹnyenede edu emi ẹnyene nsọn̄ọ nte ke kpukpru se Jehovah Abasi ọn̄wọn̄ọde ẹnyene iwụk tutu eyetie nte enye osu.—Mme Hebrew 11:1, NW.

Mbuọtidem ye Mme Un̄wọn̄ọ Jehovah

3. Nso ke mme Christian ẹmi ẹyetde aran ẹdikụt edieke mmọ ẹwụtde mbuọtidem?

³ Man inem Jehovah esịt, ana nnyịn inyene mbuọtidem ke mme un̄wọn̄ọ esie. Apostle Peter ama owụt emi ke ọyọhọ leta esie iba oro ekewetde ke odudu spirit, ekewetde ke n̄kpọ nte 64 E.N. Enye ama osio owụt nte ke edieke ekemmọ Christian oro ẹyetde aran ẹnyenede mbuọtidem, mmọ ẹyekụt nte “mme un̄wọn̄ọ [Abasi] eke ẹsọn̄de urua ẹnyụn̄ ẹkponde etieti” ẹsude. Nte utịp, mmọ ‘ẹyekabade ẹbuana ke uduot Abasi’ nte mme enyene-udeme ye Jesus Christ ke Obio Ubọn̄ eke heaven. Ye mbuọtidem n̄ko ye un̄wam Jehovah Abasi, mmọ ẹma ẹbọhọ edidụk ufụn nnọ mme mbiara ido uwem ye mme edinam eke ererimbot emi. (2 Peter 1:2-4) Ndien kam kere ban̄a oro! Mmọ oro ẹnyenede mbuọtidem akpanikọ ẹdara ukem ọsọn̄urua ubọhọ-ufụn oro mfịn.

4. Mme edu ewe ke nnyịn ikpenyene ndidian ke mbuọtidem nnyịn?

⁴ Mbuọtidem ke mme un̄wọn̄ọ Jehovah ye esịtekọm kaban̄a ubọhọ-ufụn oro Abasi ọnọde nnyịn ẹkpenyene ndinụk nnyịn ndinam ukeme nnyịn ndikabade ndi mme Christian oro ẹnịmde nti uwụtn̄kpọ. Peter ọkọdọhọ ete: “Mbufo ke n̄kan̄ mbufo ẹsịn ifịk ke ofụri ukeme ẹdian eti ido ke mbuọtidem mbufo, ẹnyụn̄ ẹdian ifiọk ke eti ido, ẹnyụn̄ ẹdian edifara ke idem ke ifiọk, ye ime ke edifara ke idem, ye uten̄e Abasi ke ime, ye [ima nditọete, NW] ke uten̄e Abasi, ye ima ke [ima nditọete, NW].” (2 Peter 1:5-7) Peter ke ntem ọnọ nnyịn udịm udịm n̄kpọ oro ẹdifọnde nnyịn ndimụm nsịn ke ibuot. Ẹyak nnyịn itịm idụn̄ọde mme edu ẹmi.

Mme Akpan N̄kpọ ke Mbuọtidem

5, 6. Nso idi eti ido, ndien didie ke nnyịn ikeme ndidian enye ke mbuọtidem nnyịn?

⁵ Peter ọkọdọhọ ke ẹnyene ndidian eti ido, ifiọk, edifara ke idem, ime, uten̄e Abasi, ima nditọete, ye ima kiet ye eken ye ke mbuọtidem nnyịn. Ana nnyịn inam utom ọkpọsọn̄ man inam mme edu ẹmi ẹdi mme akpan n̄kpọ ke mbuọtidem nnyịn. Ke uwụtn̄kpọ, eti ido idịghe edu oro nnyịn ikpowụtde isio isio ikpọn̄ mbuọtidem. Ewet n̄wed ukabadeikọ oro W. E. Vine osio owụt nte ke 2 Peter 1:5, “ẹdian eti ido nte akpan edu ke ndiwụt mbuọtidem.” Kiet kiet ke otu edu eken oro Peter akasiakde enyene n̄ko ndidi akpan ubak mbuọtidem nnyịn.

⁶ Akpa, ana nnyịn idian eti ido ke mbuọtidem nnyịn. Edinyene eti ido ọwọrọ edinam se idide eti ke enyịn Abasi. Kaban̄a ikọ Greek oro ẹkabarede mi “eti ido,” ndusụk edikabade ẹda “mfọnido.” (New International Version; The Jerusalem Bible; Today’s English Version) Eti ido esinụk nnyịn ifep ndinam se idiọkde m̀mê ndinam ekemmọ owo idiọk. (Psalm 97:10) Enye n̄ko esịn udọn̄ ọnọ uko uko edinam ke ndinam eti n̄kpọ ke ufọn eke spirit, eke obụk, ye eke ntụk mmọ en̄wen.

7. Ntak emi nnyịn ikpenyenede ndidian ifiọk ke mbuọtidem ye eti ido nnyịn-e?

⁷ Ntak emi Peter akpakde nnyịn ete idian ifiọk ke mbuọtidem ye eti ido nnyịn? Ọfọn, nte nnyịn isobode mbufa n̄kpọ-ata kaban̄a mbuọtidem nnyịn, nnyịn imoyom ifiọk edieke anade nnyịn idiọn̄ọ se ifọnde ye se idiọkde. (Mme Hebrew 5:14) Ebede ke ukpepn̄kpọ Bible ye ifiọk eyouwem ke ndida Ikọ Abasi nsịn ke edinam ye ke edinyene ọniọn̄ oro owụtde ifiọk ke uwem eke usen ke usen, nnyịn ke inam ifiọk nnyịn ọkọri. Ke n̄kan̄ eken, emi an̄wam nnyịn ndisọn̄ọ mmụm mbuọtidem nnyịn n̄kama nnyụn̄ n̄kaiso ndinam se idide eti ke ini nnyịn isobode idomo.—Mme N̄ke 2:6-8; James 1:5-8.

8. Nso idi edifara ke idem, ndien didie ke ẹbuan enye ye ime?

⁸ Man an̄wam nnyịn ikan mme idomo ye mbuọtidem, oyom nnyịn idian edifara ke idem ke ifiọk. Ikọ Greek oro adade ọnọ “edifara ke idem” owụt ukeme ndimụm idem nnyịn n̄kama. Mbun̄wụm spirit Abasi enyeemi an̄wam nnyịn ndiwụt mfara ke idem ke ekikere, ikọ, ye eduuwem. Ebede ke ndikaiso nnyene mfara ke idem, nnyịn iyedian ime inọ enye. Ikọ Greek oro adade ọnọ “ime” owụt edisọn̄ọ nda ye uko, idịghe iso mfụhọ edision̄o idem mfep ke ọkpọsọn̄ idaha oro owo mîkemeke ndinyan̄a. Ekedi ke ntak idatesịt eke anade enye ke iso akanam Jesus ọyọ eto ndutụhọ. (Mme Hebrew 12:2) Odudu oro Abasi ọnọde emi asan̄ade ye ime ọsọn̄ọ mbuọtidem nnyịn idem onyụn̄ an̄wam nnyịn ndidat esịt ke ukọbọ, ndibiọn̄ọ idomo, nnyụn̄ mfep ndikan̄ mbuọtidem ke ini ẹkọbọde nnyịn.—Philippi 4:13.

9. (a) Nso idi uten̄e Abasi? (b) Ntak ikpadiande ima nditọete ke uten̄e Abasi nnyịn-e? (c) Didie ke nnyịn ikeme ndidian ima ke ima nditọete nnyịn?

⁹ Ana nnyịn idian uten̄e Abasi—ukpono, utuakibuot, ye edinam utom Jehovah ke ime nnyịn. Mbuọtidem nnyịn ọkọri nte nnyịn inamde uten̄e Abasi inyụn̄ ikụtde nte Jehovah anamde n̄kpọ ye ikọt esie. Edi, man iwụt uten̄e Abasi, nnyịn imoyom ima nditọete. Koro, “owo emi mîmaha eyenete esie emi enye okokụtde ke enyịn ikemeke ndima Abasi emi enye mîkekwe.” (1 John 4:20) Esịt nnyịn ekpenyene ndinụk nnyịn ndiwụt ata ima nnọ mme asan̄autom Jehovah eken nnyụn̄ nyom mfọnọn̄kpọ mmọ kpukpru ini. (James 2:14-17) Edi ntak emi ẹdọhọde nnyịn idian ima ke ima nditọete nnyịn? Ikọ Peter ọwọrọ in̄wan̄în̄wan̄ nte ke ana nnyịn iwụt ima inọ kpukpru owo, idịghe nditọete nnyịn ikpọn̄. Ẹwụt ima emi akpan akpan ebe ke edikwọrọ eti mbụk ye edin̄wam mme owo ke n̄kan̄ eke spirit.—Matthew 24:14; 28:19, 20.

Nsio Nsio Utịp

10. (a) Didie ke nnyịn idinam n̄kpọ edieke idiande eti ido, ifiọk, edifara ke idem, ime, uten̄e Abasi, ima nditọete, ye ima ke mbuọtidem nnyịn? (b) Nso isitịbe edieke owo oro ọdọhọde ke idi Christian ananade mme edu ẹmi?

¹⁰ Edieke nnyịn idiande eti ido, ifiọk, edifara ke idem, ime, uten̄e Abasi, ima nditọete, ye ima ke mbuọtidem nnyịn, nnyịn iyekere n̄kpọ, itịn̄ ikọ, inyụn̄ inam n̄kpọ ke mme usụn̄ oro Abasi onyịmede. Ke okpụhọrede ye oro, edieke owo emi ọdọhọde ke idi Christian okpude ndinyene mme edu ẹmi, enye akabade edi nnan ke n̄kan̄ eke spirit. Enye ‘itịmke ikụt un̄wana’ otode Abasi onyụn̄ efre ete ke ẹma ẹyet imọ n̄kani idiọkn̄kpọ ẹfep. (2 Peter 1:8-10; 2:20-22) Ẹyak nnyịn ikudede ikpu ke afan̄ emi ndien ke ntre iduọkde mbuọtidem ke mme un̄wọn̄ọ Abasi.

11. Nso ke nnyịn nte enende ikeme ndidori enyịn nto mme anam akpanikọ mbon oro ẹyetde aran?

¹¹ Mme anam-akpanikọ Christian oro ẹyetde aran ẹnyene mbuọtidem ke mme un̄wọn̄ọ Jehovah ẹnyụn̄ ẹsịn̄ede idem ndinam edikot ye edimek mmọ ọsọn̄ọ ada. Kpa ye n̄kpọ ubiọn̄ọ ekededi oro ẹkemede ndidu ke usụn̄ mmọ, nnyịn imekeme ndidori enyịn mmọ ndiwụt mbiet edu Abasi. Ye mme anam-akpanikọ oro ẹyetde aran ‘ẹnọ ọyọhọ odudu edibe ndụk nsinsi Obio Ubọn̄ Jesus Christ’ ebe ke mmọ ndiset ke n̄kpa ndụk uwem eke spirit ke heaven.—2 Peter 1:11.

12. Didie ke mme ikọ eke 2 Peter 1:12-15 ẹkpen̄wan̄a nnyịn?

¹² Peter ama ọfiọk ete ke ibịghike imọ iyekpa, ndien enye ama odori enyịn ke akpatre ndiset ke n̄kpa ndụk uwem eke heaven. Edi adan̄a ini nte enye okosụk odude uwem ke “ataya emi”—ikpọkidem esie eke owo—enye ama odomo ndinam ekemmọ mme andinịm ke akpanikọ ẹnyene mbuọtidem onyụn̄ anam mmọ ẹsịn ifịk ebe ke nditi mmọ mme n̄kpọ oro ẹyomde man ẹnyene mfọn Abasi. Ke enye ama ekebe efep ke n̄kpa, nditọete Peter iren ye iban eke spirit ẹma ẹkeme ndisọn̄ọ mbuọtidem mmọ ebe ke nditi mme ikọ esie.—2 Peter 1:12-15.

Mbuọtidem ke Mme Ikọ Prọfet

13. Didie ke Abasi ọkọnọ uyarade oro ọsọn̄ọde owo idem aban̄a edidi Christ?

¹³ Abasi ke idemesie ama ọnọ ikọ ntiense oro ọsọn̄ọde owo mbuọtidem aban̄a edidi Jesus ke “odudu ye akwa ubọn̄” nte enyenede iwụk. (Matthew 24:30; 2 Peter 1:16-18) Sia mînyeneke uyarade, mme oku ndem ẹkesitịn̄ nsunsu mbụk ẹban̄a mme abasi mmọ, Peter, James, ye John ẹkedi mme andikokụt ubọn̄ ubọn̄ edikpụhọde mbiet Christ. (Matthew 17:1-5) Mmọ ẹma ẹkụt nte ẹnọde enye ubọn̄ ẹnyụn̄ ẹkop uyo Abasi ke idemesie onyịmede Jesus nte edima Eyen Esie. Edinyịme ye uyama idaha oro ẹkenọde Christ adan̄aoro ẹkedi edinọ enye ukpono ye ubọn̄. Ke ntak ediyarade emi otode Abasi mi, Peter okokot ebiet oro, emi ndusụk ekedide ke ibuot obot Hermon, “edisana obot.”—Men Exodus 3:4, 5 domo.

14. Didie ke edikpụhọde mbiet Jesus okpotụk mbuọtidem nnyịn?

¹⁴ Didie ke edikpụhọde mbiet Jesus okpotụk mbuọtidem nnyịn? Peter ọkọdọhọ ete: “Ndien ẹma ẹdọdiọn̄ ẹsọn̄ọ ikọ mme prọfet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro, nte owo esese utuenikan̄ eke ayamade ke n̄kịmn̄kịm ebiet, tutu eyo esiere, utịn onyụn̄ asiaha ke esịt mbufo.” (2 Peter 1:19) Nte an̄wan̄ade “ikọ mme prọfet” ikesịneke mme prọfesi N̄wed Abasi Usem Hebrew ẹmi ẹban̄ade Messiah kpọt edi n̄ko ikọ Jesus oro nte ke imọ iyedi ke “odudu ye akwa ubọn̄.” Didie ke ‘ẹkedọdiọn̄ ẹsọn̄ọ’ ikọ emi ebe ke edikpụhọde mbiet oro? N̄kpọntịbe oro ama owụt ikọ mme prọfet ẹban̄ade ubọn̄ ubọn̄ edidi Christ ke odudu Obio Ubọn̄ nte edide akpanikọ.

15. Nso ibuana ke edikpan̄ utọn̄ nnọ ikọ mme prọfet?

¹⁵ Man isọn̄ọ mbuọtidem nnyịn, ana nnyịn ikpan̄ utọn̄ ke ikọ mme prọfet oro. Emi abuana edikpep ikọ oro, edineme enye ke mme mbonoesop Christian, ye edinanam mme item esie. (James 1:22-27) Ana nnyịn iyak enye edi “utuenikan̄ eke ayamade ke n̄kịmn̄kịm ebiet,” an̄wan̄ade esịt nnyịn. (Ephesus 1:18) Adan̄aoro ndien ke enye edida nnyịn usụn̄ tutu “utịn,” m̀mê, “ediyama ntantaọfiọn̄ usenubọk,” kpa Jesus Christ, ayarade idemesie ke ubọn̄. (Ediyarade 22:16) Ediyarade oro ediwọrọ nsobo ọnọ mme anana-mbuọtidem ye edidiọn̄ ọnọ mmọ oro ẹnyenede mbuọtidem.—2 Thessalonica 1:6-10.

16. Ntak emi nnyịn ikemede ndinyene mbuọtidem nte ke kpukpru ntịn̄nnịm un̄wọn̄ọ oro ẹdude ke Ikọ Abasi ẹyesu?

¹⁶ Mme prọfet Abasi ikedịghe sụk mme ọfiọkn̄kpọ owo ẹmi ẹketịn̄de ọniọn̄ ọniọn̄ ẹban̄a se iditịbede, koro Peter ọkọdọhọ ete: “Baba ikọ prọfet kiet ke N̄wed Abasi idịghe se owo ekemede ndisiak ke usụn̄ esiemmọ. Koro akanam baba ikọ prọfet itoho ke uduak owo: edi mme owo ẹtịn̄ ikọ eke otode Abasi, nte edisana spirit esịnde mmọ ẹtịn̄.” (2 Peter 1:20, 21) Ke uwụtn̄kpọ, David ọkọdọhọ ete: “Spirit Jehovah ada mi etịn̄ ikọ.” (2 Samuel 23:1, 2) Ndien Paul ekewet ete: “Kpukpru N̄wed Abasi edi se ẹkedade odudu spirit Abasi ẹwet.” (2 Timothy 3:16, NW) Sia edide spirit esie ọkọnọ mme prọfet Abasi odudu, nnyịn imekeme ndinyene mbuọtidem nte ke kpukpru un̄wọn̄ọ ke Ikọ esie ẹyesu.

Mmọ Ẹma Ẹnyene Mbuọtidem ke Mme Un̄wọn̄ọ Abasi

17. Ewe un̄wọn̄ọ ekedi isọn̄ kaban̄a mbuọtidem Abel?

¹⁷ Mme un̄wọn̄ọ Jehovah ẹkedi ntak oro akanamde ‘akwa otu’ ntiense esie oro ẹkedude mbemiso eyo mme Christian ẹnyene mbuọtidem. (Mme Hebrew 11:1–12:1) Ke uwụtn̄kpọ, Abel ama enyene mbuọtidem ke un̄wọn̄ọ Abasi oro akaban̄ade “mfri” (NW) emi edinuakde “urụkikọt” ibuot. Uyarade ama odu kaban̄a edisu ubiomikpe oro Abasi okobiomde ete ye eka Abel. Ke ọwọrọde ọkpọn̄ Eden, Adam ye ubon esie ẹkedia udia ke ibibiak ọkpọiso mmọ koro isọn̄ oro ẹkesụn̄ide okotịbede akpap ye mbara n̄kukwọ inọ. Anaedi Abel ama okụt Eve osụkde idem ọnọ ebe esie onyụn̄ okụt nte Adam akakarade enye. Ke akpanikọ enye ama etịn̄ aban̄a ubiak uman esie. Ndien mme cherub ye emịnen̄minen̄ ofụt ikan̄ ẹma ẹkpeme usụn̄ oro akadade osịm in̄wan̄ Eden. (Genesis 3:14-19, 24) Kpukpru emi ekedi ‘in̄wan̄în̄wan̄ uyarade’ oro ọkọsọn̄ọde ọnọ Abel nte ke edinyan̄a eyedi ebe ke Mfri oro ẹken̄wọn̄ọde. Ke anamde n̄kpọ ye mbuọtidem, Abel ama awa uwa oro okokponde akan eke Cain ọnọ Abasi.—Mme Hebrew 11:1, 4, NW.

18, 19. Ke ewe usụn̄ ke Abraham ye Sarah ẹkewụt mbuọtidem?

¹⁸ Mme ete-ekpụk oro Abraham, Isaac, ye Jacob n̄ko ẹma ẹnyene mbuọtidem ke mme un̄wọn̄ọ Jehovah. Abraham ama owụt mbuọtidem ke un̄wọn̄ọ Abasi nte ke kpukpru orụk ke ererimbot ẹyekụt mfọn eke otode enye ye nte ke ẹyenọ ubon esie isọn̄. (Genesis 12:1-9; 15:18-21) Eyen esie Isaac ye eyeyen esie Jacob ẹkedi ‘mmọemi ẹketienede enye ẹdi mme andinyene un̄wọn̄ọ oro.’ Oto mbuọtidem Abraham ‘akabade edi odudụn̄ ke isọn̄ un̄wọn̄ọ’ onyụn̄ etie ebet “obio eke enyenede nsọn̄ọnda,” kpa Obio Ubọn̄ Abasi eke heaven emi ẹdinamde enye eset ke n̄kpa edidu uwem ke isọn̄. (Mme Hebrew 11:8-10) Nte afo emenyene ukem mbuọtidem oro?

¹⁹ Sarah, n̄wan Abraham, ekedi n̄kpọ nte isua 90 ke emana onyụn̄ ọsọn̄ ebe isua uman eyen ke ini enye okowụtde mbuọtidem ke un̄wọn̄ọ Abasi ndien ẹma ẹnọ enye ukeme “ndiyomo” nnyụn̄ mman Isaac. Ntem, ke akpatre, ebede ke Abraham emi ekedide isua 100 ke emana, ‘emi etiede ukem ukem nte akpan̄kpa’ kaban̄a ubon eyen, “ediwak nditọ ẹwọn̄ọ ẹmana, ẹwak udịm nte ntantaọfiọn̄ ke ikpaenyọn̄.”—Mme Hebrew 11:11, 12; Genesis 17:15-17; 18:11; 21:1-7.

20. Okposụkedi mme ete-ekpụk oro mîkekwe ọyọhọ edisu mme un̄wọn̄ọ oro Abasi ọkọn̄wọn̄ọde ọnọ mmọ, nso ke mmọ ẹkenam?

²⁰ Mme anam-akpanikọ ete-ekpụk ẹma ẹkpan̄a ye unana edikụt ọyọhọ edisu un̄wọn̄ọ oro Abasi ọkọn̄wọn̄ọde ọnọ mmọ. Edi, “[mmọ ẹma] ẹda nsannsan ẹkụt [mme n̄kpọ ẹmi ẹken̄wọn̄ọde], ẹnyụn̄ ẹdara mme un̄wọn̄ọ oro, ẹnyụn̄ ẹnyịme ẹte mmimọ idi isenowo ye odudụn̄ ke isọn̄.” Ediwak emana ẹma ẹbe mbemiso Isọn̄ Un̄wọn̄ọ akakabarede edi inyene nditọ Abraham. Ke ofụri eyouwem mmọ, nte ededi, mme abak-Abasi ete-ekpụk oro ẹma ẹwụt mbuọtidem ke mme un̄wọn̄ọ Jehovah. Sia akananam mmọ mîkananake mbuọtidem, idibịghike ẹyenam mmọ ẹset ẹdidu uwem ke isọn̄ eke “obio” emi Abasi otịmde ọnọ mmọ, kpa Obio Ubọn̄ Messiah. (Mme Hebrew 11:13-16) Ke ukem usụn̄ emi, mbuọtidem ekeme ndinam nnyịn inam akpanikọ inọ Jehovah idem edieke nnyịn mîkwe kpukpru mme utịbe utịbe un̄wọn̄ọ esie nte ẹsude usọp usọp. Mbuọtidem nnyịn n̄ko eyenụk nnyịn ndikop uyo Abasi, kpa nte Abraham okokopde. Ndien nte enye ọkọkpọn̄de inyene eke spirit ọnọ nditọ esie, ntre nnyịn imekeme ndin̄wam nditọ nnyịn ẹwụt mbuọtidem ke mme ọsọn̄urua un̄wọn̄ọ Jehovah.—Mme Hebrew 11:17-21.

Mbuọtidem Edi Akpan N̄kpọ Ọnọ Mme Christian

21. Man idi se Abasi onyịmede mfịn, nso inyene ndibuana ke nnyịn ndinyene mbuọtidem?

²¹ Nte ededi, mbuọtidem abuana ekese akan edinyene mbuọtidem ke mme edisu un̄wọn̄ọ Jehovah. Ke ofụri mbụk ubonowo, esiyom ete inyene mbuọtidem ke Abasi ke nsio nsio usụn̄ edieke anade nnyịn inyene unyịme esie. Paul ama owụt ete “ke mbuọtidem mîdụhe, owo ikemeke ndinem [Jehovah Abasi] esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọemi ẹyomde Enye utịp.” (Mme Hebrew 11:6) Man edi se Jehovah onyịmede mfịn, ana owo owụt mbuọtidem ke Jesus Christ ye ke uwa ufak oro Abasi ọkọnọde ebe ke enye. (Rome 5:8; Galatia 2:15, 16) Edi nte Jesus ke idemesie ọkọdọhọde ete: “Abasi akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem. Owo eke ọbuọtde idem ye Eyen enyene nsinsi uwem; edi owo eke mîbuọtke idem ye Eyen idikwe uwem, edi iyatesịt Abasi osụk ọkọbọ enye.”—John 3:16, 36.

22. Obio Ubọn̄ Messiah edida edisu nso un̄wọn̄ọ edi?

²² Jesus enyene akpan udeme ke edisu mme un̄wọn̄ọ Abasi ẹban̄ade Obio Ubọn̄ emi mme Christian ẹsibọn̄de akam ẹyom. (Isaiah 9:6, 7; Daniel 7:13, 14; Matthew 6:9, 10) Nte Peter okowụtde, edikpụhọde mbiet oro ama ọsọn̄ọ ikọ mme prọfet aban̄ade edidi Jesus ke odudu ye ubọn̄ ke Obio Ubọn̄. Obio Ubọn̄ Messiah eyeda edisu un̄wọn̄ọ Abasi efen edi, koro Peter ekewet ete: “Edi nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” (2 Peter 3:13) Ukem prọfesi emi ama osu ke ini ẹkenamde mme Jew ẹmi ẹkedude ke ntan̄mfep ke Babylon ẹfiak ẹnyọn̄ obio emana mmọ ke 537 M.E.N. ke idak ukara Zerubbabel nte andikara ye Joshua nte akwa oku. (Isaiah 65:17) Edi Peter ama anyan ubọk owụt ini iso emi “obufa enyọn̄”—Obio Ubọn̄ Messiah eke heaven—edikarade “obufa isọn̄,” kpa edinen n̄kaowo oro ẹdidụn̄de ke isọn̄ emi.—Men Psalm 96:1 domo.

23. Nso mbụme ẹban̄ade eti ido ke nnyịn idineme iban̄a ini efen?

²³ Nte mme anam akpanikọ asan̄autom Jehovah ye mme anditiene edima Eyen esie, Jesus Christ, nnyịn imoyom obufa ererimbot oro Abasi ọkọn̄wọn̄ọde. Nnyịn imọfiọk ite ke enye ekpere, ndien nnyịn imenyene mbuọtidem nte ke kpukpru mme ọsọn̄urua un̄wọn̄ọ Jehovah ẹyesu. Man isan̄a ke usụn̄ oro Abasi onyịmede, ana nnyịn isọn̄ọ mbuọtidem nnyịn ebe ke ndidian eti ido, ifiọk, edifara ke idem, ime, uten̄e Abasi, ima nditọete, ye ima ke mbuọtidem.a Ke ọtọ emi, ẹkeme ndibụp ẹte, Didie ke nnyịn ikeme ndiwụt eti ido? Ndien didie ke nnyịn ndinyene eti ido edinọ nnyịn ye mmọ efen ufọn, akpan akpan mme nsan̄a Christian nnyịn, ẹmi ẹnamde n̄kpọ ẹban̄a mme un̄wọn̄ọ Abasi ebe ke ndiwụt mbuọtidem?

[Mme Ikọ idakisọn̄]

Nso Ẹdi Mme Ibọrọ Fo?

◻ Didie ke ẹkeme nditịn̄ se “mbuọtidem” edide?

◻ Nte ekemde ye 2 Peter 1:5-7, mme edu ewe ke ana idian ke mbuọtidem nnyịn?

◻ Nso utịp ke  edikpụhọde mbiet Jesus ekpenyene ke mbuọtidem nnyịn?

◻ Nso uwụtn̄kpọ mbuọtidem ke Abel, Abraham, Sarah, ye mmọ eken ke eset ẹkenịm?

[Ndise ke page 15]

Nte afo ọmọfiọk nte edikpụhọde mbiet Jesus ekemede nditụk mbuọtidem owo?