10. (a) Ke Nisan 1513 M.E.N., nso ke Jehovah ọkọdọhọ nditọ Israel ẹnam? (b) Ntak emi Moses akanamde se Abasi eketemede?

¹⁰ Ke ọfiọn̄ Nisan 1513 M.E.N., Jehovah ama ọdọhọ Moses ye Aaron ete ẹkedọhọ nditọ Israel ete: Ẹmek okpo ebot m̀mê okukịm erọn̄, ẹwot, ẹnyụn̄ ẹsịme iyịp esie ke obubọk ye ke ndori enyịnusụn̄ ufọk mbufo. (Ex. 12:3-7) Nso ke Moses akanam? Apostle Paul ama ewet aban̄a enye ete: “Oto mbuọtidem enye enịm passover onyụn̄ esịme iyịp, mbak andisobo editụk akpa nditọ mmọ.” (Heb. 11:28) Moses ama ọfiọk ke imekeme ndiberi edem ke Jehovah, onyụn̄ enịm ete ke Jehovah oyowot akpan nditọ Egypt nte enye ọkọn̄wọn̄ọde.

11. Ntak emi Moses eketemede mbon eken se ẹkpenamde?

¹¹ Etie nte nditọ Moses ẹkesụk ẹdu ke Midian, emi okoyomde usụn̄ ọkpọn̄ “andisobo” oro.a (Ex. 18:1-6) Edi enye ama anam kpa nte ẹketemede enye onyụn̄ ọdọhọ mme ubon Israel eken emi edide ẹkpekewot mme akpan mmọ, se ẹkpenamde. Ẹkpekekpan̄a ẹwak, ndien Moses ama ama ikọt mmọ. Bible ọdọhọ ete: “Moses ọsọsọp okot kpukpru mbiowo Israel onyụn̄ ọdọhọ mmọ ete: . . . ‘ẹwot unam passover.’”—Ex. 12:21.

12. Nso akpan etop ke Jehovah ọdọhọ nnyịn ikwọrọ?

¹² Ikọt Jehovah ke ẹtiene mme angel ẹkwọrọ akpan etop emi ẹnọ mme owo: “Mbufo ẹbak Abasi ẹnyụn̄ ẹnọ enye ubọn̄, koro ekem ini ikpe esie, mmọdo ẹtuak ibuot ẹnọ Enye emi akanamde enyọn̄ ye isọn̄ ye inyan̄ ye idịm mmọn̄.” (Edi. 14:7) Ini edi emi ndikwọrọ etop emi. Ana idọhọ mme mbọhọidụn̄ nnyịn ite ẹwọrọ ke Akwa Babylon man mmọ ‘ẹditiene ẹbọ mme ufen esie.’ (Edi. 18:4) “Mme erọn̄ en̄wen” ke ẹtiene mme Christian oro ẹyetde aran ẹkpe mme owo oro ẹdian̄arede ẹkpọn̄ Abasi ẹte “ẹfiak ẹtie ke emem ye Abasi.”—John 10:16; 2 Cor. 5:20.

13. Nso idinam enen̄ede ọdọn̄ nnyịn ndikwọrọ eti mbụk?

¹³ Nnyịn imenịm ke ekem “ini ikpe.” Nnyịn n̄ko imenyene mbuọtidem ke se Jehovah etịn̄de nte ke utom edikwọrọ ikọ ye edinam mbet edi ata akpan utom. Apostle John ama okụt “angel inan̄ nte ẹdade ke inụk isọn̄ mbinan̄, ẹsọn̄ọ ẹmụm ofụm isọn̄ mbinan̄ ẹkama.” (Edi. 7:1) Ndi afo amada enyịn mbuọtidem okụt mme angel oro ẹben̄ede idem ndisana ofụm nsobo akwa ukụt nyak man ẹsobo ererimbot emi? Edieke edide omokụt mmọ, eyekeme ndisịn idem n̄kwọrọ eti mbụk uko uko.