Nso Ke Ukụtiso Ayarade?

SE UKỤTISO. Nso ke afo okụt? Ndusụk ini, editop enyịn nse ukụtiso esiyarade ndo oro odude ke iso fo oro akpanamde fi okop bụt emi afo okopde inemesịt ndinen̄ede mbemiso mbon efen ẹkụtde.

Bible otịm etie nte ukụtiso. Enye ekeme ndin̄wam nnyịn inyene nnennen ekikere iban̄a idem nnyịn, emi edinamde nnyịn ikûkere n̄kpọ ikaha—m̀mê ata esisịt iban̄a idem nnyịn—ikan nte idide ke enyịn Abasi. (Matthew 10:29-31; Rome 12:3) Adianade do, Bible ekeme ndiyarade ndudue ke ikọ, edinam, m̀mê eduuwem nnyịn oro oyomde nnyịn inen̄ede. Ke ini emi otịbede, nte afo eyefụmi se ukụtiso oro ayararede?

James andiwet Bible ọdọhọ ete: “Owo ekededi eke okopde ikọ, edi mînamke-nam, ebiet owo eke esede obot iso esie ke ukụtiso: koro enye esede idemesie, adaha, onyụn̄ efre orụk owo eke enye edide kpa idahaoro.”—James 1:23, 24.

Ke edide isio, James etịn̄ aban̄a owo efen, enyeemi “owụkde enyịn ese ata edifọn ibet Abasi emi anamde owo ọwọrọ ufụn, onyụn̄ ọsọn̄ọ ada ke esịt.” (James 1:25) Ikọ Greek oro ẹkabarede “owụkde enyịn ese” ọwọrọ ndinyụn̄ọ ke n̄kan̄ m̀mê ndinụhọ n̄ka iso iso man ẹse. Theological Dictionary of the New Testament ọdọhọ ete: “Se ẹnemede mi akan editop enyịn usọp usọp nse n̄kpọ nnyụn̄ mbe n̄kpọn̄.” Ikọ oro ọwọrọ editịn̄ enyịn ndụn̄ọde n̄kpọ oro odịbede. Etịn̄ikọ mban̄a Bible oro, R. V. G. Tasker, ewet ete: “Odu akpan n̄kpọ emi andise oyomde ndikụt, idem okposụkedi ekemede ndidi ọkpọsọn̄ n̄kpọ ọnọ enye ndikụt nnyụn̄ mfiọk kpukpru se enye ọwọrọde ini kiet.”

Nte afo ke ntre eyedụn̄ọde idemfo ke ukụtiso Ikọ Abasi ndien odu uwem ekekem ye se enye oyomde? James akaiso ete: “Owo emi . . . idịghe andikokop emi efrede, edi edi andinanam; owo emi eyekụt edidiọn̄ ke edinam esie.”—James 1:25.