N̄kpọ Editie Didie ye Afo ke Iso Itie Ikpe?
“Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie.”—MATTHEW 25:31.
1-3. Nso ntak ke nnyịn inyene ndidot enyịn kaban̄a unenikpe?
‘UBIOMIKPE M̀MÊ UTEBEIKPE?’ Idem esikpa ediwak owo nte mmọ ẹkopde mme etop ẹban̄ade ndusụk ikpe ke esopikpe. Mme ebiereikpe ye mbon ikpe ẹkeme ndidomo ndinam akpanikọ, edi nte unenikpe esidu kpukpru ini? Nte akanam ukopke uban̄a ukwan̄ikpe ye editụhọ ikpe ke edinam ukpeikpe? Nte nnyịn ikụtde ke n̄ke Jesus oro odude ke Luke 18:1-8, utọ ukwan̄ikpe oro idịghe obufa n̄kpọ.
2 Se ededi ifiọk oro afo enyenede aban̄a ukwan̄ikpe eke owo, tịmfiọk akpatre ikọ Jesus emi: “Nte Abasi idinyụn̄ isioho usiene inọ ndimek ikọt Esie, ẹmi ẹsemede ẹnọ Enye uwemeyo ye okoneyo . . . ? Ndọhọ mbufo nte, Enye eyewara osio usiene ọnọ mmọ. Edi ke adan̄aemi Eyen Owo edidide, nte Enye eyekụt mbuọtidem ke isọn̄?”
3 Ih, Jehovah eyekụt ete ke mme asan̄autom esie ẹnyene unenikpe ke akpatre. N̄ko, Jesus etiene enyene ebuana akpan akpan idahaemi sia nnyịn idude uwem ke “ukperedem ini” eke idiọk editịm n̄kpọ emi odude kemi. Ibịghike Jehovah eyeda okopodudu Eyen esie ndisio idiọkido ke isọn̄ mfep. (2 Timothy 3:1; 2 Thessalonica 1:7, 8; Ediyarade 19:11-16) Nnyịn imekeme ndida n̄kụt udeme oro Jesus enyenede ito kiet ke otu mme akpatre n̄ke esie, emi ẹsiwakde ndikot n̄ke erọn̄ ye ebot.
4. Didie ke ini edisu eke n̄ke erọn̄ ye ebot akan̄wan̄a nnyịn, edi ntak emi idinọde n̄ke oro ntịn̄enyịn idahaemi? (Mme N̄ke 4:18)
4 Akan̄wan̄a nnyịn ke anyanini nte ke n̄ke oro etịn̄ aban̄a Jesus nditie nte Edidem ke 1914 nnyụn̄ n̄kpe ikpe toto ke ini oro—ọnọde mbon oro ẹbietde erọn̄ nsinsi uwem, ọnọde mme ebot nsinsi n̄kpa. Edi edifiak n̄kere mban̄a n̄ke oro anyan ubọk owụt ifiọk oro enen̄erede mi kaban̄a ini edisu esie ye se enye etịn̄de aban̄a. Edinen̄ede emi afiak ọsọn̄ọ nte utom ukwọrọikọ nnyịn edide akpan n̄kpọ ye ufọn emi odude ke mme owo ndinam n̄kpọ mban̄a. Man okụt isọn̄ odude kaban̄a ntotụn̄ọ ifiọk emi ẹnyenede ẹban̄a n̄ke emi, ẹyak nnyịn ikere iban̄a se Bible owụtde aban̄a Jehovah ye Jesus, nte Ndidem ye mme Ebiereikpe.
Jehovah nte Akakan Ebiereikpe
5, 6. Ntak emi odotde ndise Jehovah nte Edidem ye Ebiereikpe?
5 Jehovah akara ekondo onyụn̄ enyene odudu ke idem kpukpru edibotn̄kpọ. Ke mînyeneke ntọn̄ọ inyụn̄ inyeneke utịt, enye edi “Edidem emi akarade ke kpukpru eyo.” (1 Timothy 1:17; Psalm 90:2, 4; Ediyarade 15:3) Enye enyene odudu ndiwụk mme ewụhọ, m̀mê ibet, nnyụn̄ n̄kụt ete ke ẹnam mmọemi. Edi odudu esie esịne edidi Ebiereikpe. Isaiah 33:22 ọdọhọ ete: “Jehovah [edi] ebiereikpe nnyịn, Jehovah edi owụk-ewụhọ nnyịn, Jehovah edi edidem nnyịn, enye eyenyan̄a nnyịn.”
6 Mme asan̄autom Abasi ke anyanini ẹdiọn̄ọ Jehovah nte Ebiereikpe emi esibierede mme ikpe. Ke uwụtn̄kpọ, ke “Ebiereikpe ofụri ererimbot” ama okodụn̄ọde uyarade odude aban̄a idiọkido Sodom ye Gomorrah, enye ama ebiere ete ke mme andidụn̄ do ẹdot nsobo onyụn̄ okụt ete ke ẹnam edinen ubiereikpe oro. (Genesis 18:20-33; Job 34:10-12) Emi ekpedi n̄kpọ nsọn̄ọ didie ntem ọnọ nnyịn ndifiọk nte ke Jehovah edi edinen Ebiereikpe emi ekemede ndinam ubiereikpe esie kpukpru ini!
7. Didie ke Jehovah akanam n̄kpọ nte Ebiereikpe ke anamde n̄kpọ ye Israel?
7 Ke Israel eset, ndusụk ini Jehovah ama esinọ ubiereikpe nnennen nnennen. Nte afo ukpukopke ndọn̄esịt adan̄aoro ndifiọk nte ke mfọnmma Ebiereikpe ekebiere mme n̄kpọ? (Leviticus 24:10-16; Numbers 15:32-36; 27:1-11) Abasi n̄ko ama ọnọ “mbet” oro ẹkefọnde ke kpukpru usụn̄ nte mme idaha ndida mbiere ikpe. (Leviticus 25:18, 19; Nehemiah 9:13; Psalm 19:9, 10; 119:7, 75, 164; 147:19, 20) Enye edi “Ebiereikpe ofụri ekondo,” ntre otụk kpukpru nnyịn.—Mme Hebrew 12:23.
8. Nso n̄kukụt emi enyenede ebuana ke Daniel okokụt?
8 Nnyịn imenyene ikọ ntiense otode “andikokụt” n̄kpọ emi. Ẹma ẹwụt prọfet Daniel n̄kukụt aban̄ade ndiọi unam ẹmi ẹkedade ẹban̄a mme ukara ye mme obio ndidem. (Daniel 7:1-8, 17) Enye ama adian do ete: “Ebekpo ẹdiọhọ, Andisọn̄ọ usen onyụn̄ etie, edisịnen̄kpọ esie edi afia nte snow.” (Daniel 7:9) Tịmfiọk ete ke Daniel okokụt mme ebekpo “Andisọn̄ọ usen [Jehovah] onyụn̄ etie.” Bụp idemfo ete, ‘Nte Daniel mi okokụt Abasi nte akabade edi Edidem?’
9. ‘Editie ke ebekpo’ ọwọrọ nso ke usụn̄ kiet? Nọ mme uwụtn̄kpọ.
9 Ọfọn, ke ini nnyịn ikotde ite ke owo “etie” ke ebekpo, nnyịn imekeme ndikere mban̄a enye ndikabade ndi edidem, koro Bible ndusụk ini esida mme utọ ikọ ntre. Ke uwụtn̄kpọ: “Adan̄aemi [Zimri] akadade ubọn̄, onyụn̄ etiede ke ebekpo esie, enye . . .” (1 Ndidem 16:11; 2 Ndidem 10:30; 15:12; Jeremiah 33:17) Prọfesi aban̄ade Messiah ọkọdọhọ ete: “Enye eyetie ke ebekpo esie, onyụn̄ akara.” Ntem, ‘nditie ke ebekpo’ ekeme ndiwọrọ ndikabade ndi Edidem. (Zechariah 6:12, 13) Ẹtịn̄ ẹban̄a Jehovah nte Edidem emi etiede ke ebekpo. (1 Ndidem 22:19; Isaiah 6:1; Ediyarade 4:1-3) Enye edi “Edidem emi akarade ke kpukpru eyo.” Edi, nte enye ọkọsọn̄ọde etịn̄ aban̄a obufa ikpehe itie edikara, ẹkeme ndidọhọ ke enye akabade edi Edidem, nte n̄kpọ eke enye etiede ke ebekpo obufa.—1 Chronicles 16:1, 31; Isaiah 52:7; Ediyarade 11:15-17; 15:3; 19:1, 2, 6.
10. Nso ikedi akpan utom ndidem Israel? Nam an̄wan̄a.
10 Edi akpan n̄kpọ edi emi: Akpan utom eke ndidem eset ekedi edikop mme ikpe nnyụn̄ nnọ mme ubiereikpe. (Mme N̄ke 20:8; 29:14) Ti ọniọn̄ ọniọn̄ ubiereikpe Solomon ke ini iban iba ẹkenyan̄ade eyen kiet. (1 Ndidem 3:16-28; 2 Chronicles 9:8) Kiet ke otu ufọk ukara esie ekedi “etehe ebekpo eke edikpede ikpe do,” emi n̄ko ẹkekotde “etehe ikpe.” (1 Ndidem 7:7) Ẹketịn̄ ẹban̄a Jerusalem nte ebiet emi “itie ikpe ẹdiọhọde.” (Psalm 122:5) Nte an̄wan̄ade, ‘nditie ke ebekpo’ ekeme n̄ko ndiwọrọ ndinyene odudu ubiereikpe.—Exodus 18:13; Mme N̄ke 20:8.
11, 12. (a) Nso ke ọwọrọ Jehovah nditie, emi ẹtịn̄de ẹban̄a ke Daniel ibuot 7? (b) Didie ke mme itien̄wed eken ẹsọn̄ọ nte Jehovah etiede ndikpe ikpe?
11 Idahaemi ẹyak nnyịn ifiak ibịne n̄kpọntịbe emi Daniel okokụtde ‘Andisọn̄ọ usen etiede.’ Daniel 7:10 adian do ete: “Ẹnịm ikpe, ẹnyụn̄ ẹkụbọde n̄wed.” Ih, Andisọn̄ọ usen eketie ndibiere ikpe kaban̄a ukara ererimbot nnyụn̄ mbiere ikpe nte ke Eyen owo odot ndikara. (Daniel 7:13, 14) Ekem nnyịn ikot ite ke “Andisọn̄ọ usen edi, ndien ẹda ikpe ẹnọ edisana ikọt Ata Edikon̄,” kpa mbon ẹmi ẹbierede ikpe ke ẹdot ndikara ye Eyen owo. (Daniel 7:22) Ke akpatre “ẹyenịm ikpe” ẹnyụn̄ ẹbiom akpatre odudu ukara ererimbot ikpe.—Daniel 7:26.a
12 Mmọdo, Daniel ndikụt Abasi ‘etiede ke ebekpo’ ọkọwọrọ Enye ndidi ndibiere ikpe. Ke mbemiso David ama ọkwọ ete: “Afo [Jehovah ama ekpe] ikpe mi ye ikọ mi; afo etie ke ebekpo ekpe nte enende.” (Psalm 9:4, 7) Ndien Joel ekewet ete: “Yak mme idụt ẹdemede ẹnyụn̄ ẹdọk ẹdi ke ebeden̄ Jehoshaphat: koro [ami Jehovah] nyetie do n̄kpe ikpe kpukpru mme idụt.” (Joel 3:12; men Isaiah 16:5 domo.) Jesus ye Paul ẹkedu ke mme itie ukpe ikpe emi owo eketiede okop ikpe onyụn̄ ọnọde ubiereikpe.b—John 19:12-16; Utom 23:3; 25:6.
Itie Jesus
13, 14. (a) Nso nsọn̄ọ ke ikọt Abasi ẹkenyene nte ke Jesus eyekabade edi Edidem? (b) Ini ewe ke Jesus eketie ke ebekpo esie, ndien ke nso usụn̄ifiọk ke enye akakara ọtọn̄ọde ke 33 E.N. akaiso?
13 Jehovah edi Edidem ye Ebiereikpe. Nso kaban̄a Jesus? Angel emi ọkọtọtde emana esie ọkọdọhọ ete: “Jehovah Abasi eyenyụn̄ ọnọ Enye ebekpo ete Esie David . . . Ubọn̄ Esie idinyụn̄ ikụreke.” (Luke 1:32, 33) Jesus eyedi nsinsi adiakpa itie edidem David. (2 Samuel 7:12-16) Enye eyetie ke heaven akara, koro David ọkọdọhọ ete: “Jehovah ọdọhọ ye Ọbọn̄ mi, ete, ‘Tie mi ke ubọk nnasia, tutu nda mme asua fo nnịm fi ke udorukot.’ Jehovah eyetie ke Zion ọnọ esan̄ odudu fo ẹsọk fi: da ubọn̄ ke otu mme asua fo.”—Psalm 110:1-4.
14 Emi ekpedi ini ewe? Jesus ikakarake nte Edidem ke ini ekedide owo. (John 18:33-37) Ke 33 E.N., enye ama akpa, eset ke n̄kpa, onyụn̄ ọdọk ke enyọn̄. Mme Hebrew 10:12 ọdọhọ ete: “Oku emi, ke ini Enye ama akawa uwa kiet aban̄a mme idiọkn̄kpọ, osụhọde etetie ke ubọk nnasia Abasi ke nsinsi.” Nso odudu ke Jesus ekenyene? “[Abasi akanam] Enye etie ke ubọk nnasia Esie ke mme itie heaven, okon̄ akan kpukpru mme andikara ye mme enyene-nsọn̄-uyo ye mme enyene-odudu ye mme enyene-ubọn̄, . . . onyụn̄ ọnọ Enye ete edi Ibuot kpukpru n̄kpọ, ọnọ ufọn ufọk Abasi.” (Ephesus 1:20-22) Sia Jesus ekenyenede odudu ubọn̄ ke idem mme Christian ini oro, Paul ama ekeme ndiwet nte ke Jehovah “[ama osio] nnyịn ke odudu ekịm, esịn ke Obio Ubọn̄ Eyen Ima Esie.”—Colossae 1:13; 3:1.
15, 16. (a) Ntak emi nnyịn idọhọde ite ke Jesus ikakabakede idi Edidem Obio Ubọn̄ Abasi ke 33 E.N.? (b) Ini ewe ke Jesus ọkọtọn̄ọ ndikara ke Obio Ubọn̄ Abasi?
15 Nte ededi, ke ini oro, Jesus ikanamke n̄kpọ nte Edidem ye Ebiereikpe inọ mme idụt. Enye eketie adiana Abasi, ebetde ini ndinam n̄kpọ nte Edidem Obio Ubọn̄ Abasi. Paul ama ewet aban̄a enye ete: “Akananam Enye ọdọhọ angel ewe ete, Tie ke ubọk nnasia Mi, tutu nnam mme asua Fo ẹkabade ẹdi udorukot Fo?”—Mme Hebrew 1:13.
16 Mme Ntiense Jehovah ẹmịn̄ ekese uyarade nte ke ikpehe ini oro Jesus ekebetde okokụre ke 1914, ke ini enye akakabarede edi andikara Obio Ubọn̄ Abasi ke mme heaven oro enyịn mîkwe. Ediyarade 11:15, 18 ọdọhọ ete: “Obio Ubọn̄ ererimbot emi amakabade edi Obio Ubọn̄ Ọbọn̄ nnyịn ye Christ Esie. Enye eyenyụn̄ ada ubọn̄ ke nsinsi nsinsi.” “Mme idụt ẹkeyat esịt ndien iyatesịt Fo ama edi.” Ih, mme idụt ẹma ẹyat esịt ye kiet eken ke ini Ekọn̄ Ererimbot I. (Luke 21:24) Mme ekọn̄, unyekisọn̄, udọn̄ọ, unana udia, ye mme mbiet n̄kpọ ntre, ẹmi nnyịn ikụtde toto ke 1914 ẹsọn̄ọ nte ke Jesus ke akara idahaemi ke Obio Ubọn̄ Abasi, ndien nte ke ata utịt ererimbot emekpere.—Matthew 24:3-14.
17. Mme ewe akpan n̄kpọ ke nnyịn inam an̄wan̄a kan̄a?
17 Ke ndifiak ndụn̄ọde ibio ibio: Ẹkeme ndidọhọ ke Abasi etie ke ebekpo nte Edidem, edi ke usụn̄ifiọk en̄wen enye ekeme nditie ke ebekpo esie ndikpe ikpe. Ke 33 E.N., Jesus ama etie ke ubọk nnasia Abasi, ndien enye edi Edidem Obio Ubọn̄ idahaemi. Edi nte Jesus, emi akarade idahaemi nte Edidem, anam n̄kpọ n̄ko nte Ebiereikpe? Ndien ntak emi ekpebehede nnyịn, akpan akpan ke ini emi?
18. Nso uyarade odu nte ke Jesus eyedi Ebiereikpe n̄ko?
18 Jehovah, emi enyenede unen ndimek mme ebiereikpe, ekemek Jesus nte Ebiereikpe oro osịmde mme n̄kpọ oro Enye oyomde. Jesus ama owụt emi ke ini eketịn̄de aban̄a mme owo ndikabade ndu uwem ke n̄kan̄ eke spirit: “Ete inyụn̄ ikpehe ikpe baba owo kiet, edi akayak kpukpru edibiere ikpe esịn Eyen ke ubọk.” (John 5:22) Edi, utom ubiereikpe Jesus aka anyan akan utọ edibiere ikpe oro, koro enye edi ebiereikpe ọnọ mme oduuwem ye mme akpan̄kpa. (Utom 10:42; 2 Timothy 4:1) Paul ama ọdọhọ ini kiet ete: “[Abasi] omonịm usen eke Enye edikpede ikpe ọnọ ererimbot ke edinen ido, ke ubọk Owo [Jesus] emi Enye ekemekde; Enye onyụn̄ ada edinam emi Enye anamde Owo oro eset ke n̄kpa ayarade owụt kpukpru owo ete edidi ntem.”—Utom 17:31; Psalm 72:2-7.
19. Ntak enende nditịn̄ mban̄a Jesus nte etiede nte Ebiereikpe?
19 Ntem nte enen nnyịn ndibiere nte ke Jesus etie ke ebekpo ubọn̄ ndinam utom san̄asan̄a nte Ebiereikpe? Ih. Jesus ama asian mme apostle ẹte: “Ke ini ẹdinamde n̄kpọ ẹkabade ẹdi mbufa, ke adan̄aemi Eyen Owo editiede ke ebekpo ubọn̄ Esie, mbufo, ẹmi ẹketienede Mi, ẹyenyụn̄ ẹtie ke ebekpo duopeba, ẹkpe ikpe ẹnọ esien Israel duopeba.” (Matthew 19:28, sịghisịghi ubọkn̄wed edi eke nnyịn.) Okposụkedi Jesus edide Edidem Obio Ubọn̄ idahaemi, n̄kaiso edinam esie oro ẹsiakde ke Matthew 19:28 eyesịne editie ke ebekpo mbiere ikpe ke Tọsịn Isua. Ke ini oro enye eyekpe ikpe ọnọ ofụri ubonowo, nti owo ye mme idiọkowo. (Utom 24:15) Ọfọn ndinyene emi ke ekikere nte nnyịn iwọn̄ọrede ntịn̄enyịn nnyịn ika kiet ke otu n̄ke Jesus oro enyenede ebuana ke ini nnyịn ye ke uwem nnyịn.
Nso ke N̄ke Oro Ọdọhọ?
20, 21. Nso ke mme apostle Jesus ẹkebụp oro enyenede ebuana ye eyo nnyịn, adade okosụn̄ọ ke ewe mbụme?
20 Esisịt ini mbemiso Jesus akpade, mme apostle esie ẹma ẹbụp enye ete: “Ini [ewe ke] mme n̄kpọ ẹmi [ẹdidi]; nso idinyụn̄ idi idiọn̄ọ edidi Fo, ye eke akpatre ini eyo emi?” (Matthew 24:3) Jesus ama ebemiso etịn̄ aban̄a mme akpan n̄kpọntịbe ke isọn̄ mbemiso ‘utịt edide.’ Esisịt ini mbemiso utịt oro, mme idụt “[ẹyekụt] Eyen Owo odorode ke obubịt enyọn̄ edi ye odudu ye akwa ubọn̄.”—Matthew 24:14, 29, 30.
21 Didie, ndien, ke n̄kpọ editie ye mme owo ke mme idụt oro ke ini Eyen Owo edide ke ubọn̄ esie? Ẹyak nnyịn idụn̄ọde emi ke n̄ke erọn̄ ye ebot, emi ọtọn̄ọde ye mme ikọ ẹmi: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie.”—Matthew 25:31, 32.
22, 23. Ewe akpan n̄kpọ ẹwụt nte ke n̄ke erọn̄ ye ebot ikọtọn̄ọke edisu esie ke 1914?
22 Nte n̄ke emi enyene n̄kpọ ndinam ke ini Jesus eketiede ke odudu ubọn̄ ke 1914, nte akan̄wan̄ade nnyịn ke anyanini? Ọfọn, Matthew 25:34 etịn̄ aban̄a enye nte Edidem, ntre n̄ke oro nte owụtde ifiọk enyene n̄kpọ ndinam toto Jesus akakabade edi Edidem ke 1914. Edi nso ikpe ke enye ekekpe esisịt ini ke oro ebede? Ikedịghe edikpe ikpe nnọ “kpukpru mme idụt.” Utu ke oro, enye ọkọwọn̄ọde ntịn̄enyịn ọnọ mbon ẹmi ẹdọhọde ke idi “ufọk Abasi.” (1 Peter 4:17) Nte ekemde ye Malachi 3:1-3, Jesus, nte angel ediomi Jehovah, ama asan̄a ye ubiereikpe ese mme Christian oro ẹyetde aran ẹmi ẹsụhọde ke isọn̄. Ekedi ini n̄ko ndibiere ikpe nnọ Christendom, emi ke abian̄a ọkọdọhọde ke idi “ufọk Abasi.”c (Ediyarade 17:1, 2; 18:4-8) Edi n̄kpọ ndomokiet idụhe ndiwụt nte ke ini oro, m̀mê toto ke ini oro, Jesus ama etie ndinọ mme owo eke kpukpru mme idụt akpatre ubiereikpe nte ẹdide erọn̄ m̀mê ebot.
23 Edieke nnyịn idụn̄ọrede edinam Jesus ke n̄ke oro, nnyịn ikụt enye ke akpatre ekpede ikpe ọnọ kpukpru mme idụt. N̄ke oro iwụtke ite ke ikpe oro eyekaiso ke ufan̄ ini emi esịnede ediwak isua, nte n̄kpọ eke ẹdọhọde ke ẹbiere ikpe kpukpru owo ẹmi ẹkpan̄ade ke ufan̄ ediwak isua ẹmi ẹbede nte ẹdotde nsinsi n̄kpa m̀mê nsinsi uwem. Etie nte n̄wakn̄kan mbon ẹmi ẹkpan̄ade ke mme iduọk isua eke ndondo ẹmi ẹka ikpîkpu udi ubonowo. (Ediyarade 6:8; 20:13) N̄ke oro, nte ededi, owụt ini oro Jesus ekpede ikpe ọnọ mme owo eke “kpukpru mme idụt” ẹmi ẹdude uwem ini oro ẹnyụn̄ ẹsakde iso ẹse ubiereikpe esie.
24. Ini ewe ke n̄ke erọn̄ ye ebot edisu?
24 Ke nditịn̄ ke usụn̄ en̄wen, n̄ke oro anyan ubọk owụt ini iso emi Eyen owo edidide ke ubọn̄ esie. Enye eyetie ndikpe ikpe nnọ mme owo ẹdude uwem ini oro. Ubiereikpe esie edikọn̄ọ ke se mmọ ke idemmọ ẹwụtde nte idide. Ke ini oro ‘ukpụhọde oro odude ke ufọt eti owo ye idiọk owo’ eyena in̄wan̄în̄wan̄. (Malachi 3:18) Ataata edinọ ubiereikpe ye edikụt nte ẹnamde ubiereikpe edida itie ke esisịt ini. Jesus eyenọ ndinen ubiere ọkọn̄ọde ke se ẹkụtde ẹban̄a owo kiet kiet.—Se n̄ko 2 Corinth 5:10.
25. Nso ke Matthew 25:31 owụt ke nditịn̄ mban̄a Eyen owo nte etiede ke ebekpo ubọn̄?
25 Emi, ndien, ọwọrọ nte ke Jesus ‘nditie ke ebekpo ubọn̄’ ndibiere ikpe, emi ẹtịn̄de ke Matthew 25:31, enyene n̄kpọ ndinam ye ini iso ke ini okopodudu Edidem emi edisụhọrede etie ndinọ mme idụt ubiereikpe nnyụn̄ n̄kụt nte ke ẹnam ubiereikpe oro. Ih, n̄kpọntịbe ubiereikpe oro abuanade Jesus ke Matthew 25:31-33, 46 edi ukem ye n̄kpọntịbe oro ke Daniel ibuot 7, emi Edidem oro akarade, kpa Andisọn̄ọ Usen, eketiede ndinam utom esie nte Ebiereikpe.
26. Nso obufa edinam an̄wan̄a kaban̄a n̄ke oro ana in̄wan̄în̄wan̄?
26 Ndifiọk n̄ke erọn̄ ye ebot ke usụn̄ emi owụt nte ke edibiere ikpe nnọ erọn̄ ye ebot edi ke ini iso. Enye edida itie ke “ukụt” oro ẹsiakde ke Matthew 24:29, 30 ama akada itie ndien Eyen owo ‘edi ke ubọn̄ esie.’ (Men Mark 13:24-26 domo.) Ekem, ye ofụri idiọk editịm n̄kpọ emi osịmde utịt esie, Jesus eyenịm ikpe onyụn̄ ebiere ikpe onyụn̄ okụt ete ẹnam ubiereikpe.—John 5:30; 2 Thessalonica 1:7-10.
27. Nnyịn ikpenyene udọn̄ ndifiọk nso kaban̄a akpatre n̄ke Jesus?
27 Emi anam ifiọk oro nnyịn inyenede iban̄a ini edisu eke n̄ke Jesus emi an̄wan̄a, emi owụtde ini emi ẹdibierede ikpe ẹnọ erọn̄ ye ebot. Edi didie ke emi otụk nnyịn ẹmi ikwọrọde eti mbụk Obio Ubọn̄ ifịk ifịk? (Matthew 24:14) Ndi enye anam utom nnyịn edi se mîtịmke idi akpan n̄kpọ, mîdịghe ndi enye anam mbiomo nnyịn odobi akan? Ẹyak nnyịn ise nte emi otụkde nnyịn ke ibuotikọ oro etienede.
[Mme Ikọ idakisọn̄]
a Ẹkụt ikọ emi ẹkabarede ‘ikpe’ ke Daniel 7:10, 26 n̄ko ke Ezra 7:26 ye Daniel 4:37; 7:22.
b Kaban̄a Christian ndida kiet eken n̄ka esop, Paul okobụp ete: “Nte mbufo ẹda ẹwọrọ ke iso mmọemi mînyeneke ukpono ke ufọk Abasi [ke nditịn̄ ke ataata usụn̄ “ke mbufo ẹmen ẹtem ke itie”]?”—1 Corinth 6:4.
c Se Ediyarade—Ubọn̄ Ubọn̄ Ata-Utịt Esie Emekpere!, page 56, 73, 235-245, 260, emi Watchtower Bible and Tract Society of New York, Inc., emịn̄de.
Nte Afo Emeti?
◻ Didie ke Jehovah anam n̄kpọ nte Edidem ye Ebiereikpe?
◻ Nso idi usụn̄ iba emi ẹkemede ndidiọn̄ọ ‘editie ke ebekpo’?
◻ Nso ke nnyịn ikọdọhọ ke akpa iban̄a ini edisu eke Matthew 25:31, edi nso ntak idu ke ndinyene ukpụhọde ekikere?
◻ Ini ewe ke Eyen owo eketie ke ebekpo, nte ẹwụtde ke Matthew 25:31?