Bet ke Ime

EKPEMERỌN̄ oro okofioride “Ekpe!” ndien ndien ke ini ekpe mîkedịghe ama okụt ete ke owo ikanamke n̄kpọ iban̄a mfiori efen oro enye okofioride oyom un̄wam. Kpasụk ntre mfịn, ediwak owo ẹfụmi edikpere emi usen Jehovah ekperede ke ntak emi mmọ ẹkopde ediwak ntọt oro ẹdide abian̄a abian̄a mfiori. Akpanikọ oro nte ke ata ediwak owo ẹkpu ndifiọk m̀mê ewe ntọt edi akpanikọ ndien ekem ẹnam n̄kpọ ẹban̄a anam mmọ ẹduọ ẹdụk ubọk akwa asua Abasi, Satan, kpa abian̄a abian̄a “angel un̄wana.”—2 Corinth 11:14.

Edu unana edidu ke edidemede edi n̄kpọndịk ọnọ idem mbon oro ẹnamde n̄kpọ Jehovah ke anyan ini. Ntak-a? Kere ban̄a ntọt apostle Peter emi ke akpa isua ikie.

Kere N̄kpọ In̄wan̄în̄wan̄

Udiana leta Peter eke odudu spirit ekedi n̄kpọ editi ọnọ mme akpa Christian, ndien edi ukem oro ọnọ nnyịn. Enye ewet ete: “Ndima, emi edi udiana-akpa n̄wed emi n̄wetde nnọ ẹsọk mbufo; ndien ke mmọ mbiba ndemede ediden̄i esịt mbufo ke editi ikọ.” (2 Peter 3:1) Nso isọn̄ ke Peter ekenyene kaban̄a udọn̄ emi? Peter owụt edidu eke mbon nsahi emi nsahi mmọ abiatde ekikere aban̄ade nte ini edide usọp usọp oro oyomde ẹnyene kaban̄a ini emi mme asan̄autom Abasi ẹdude uwem. Ini edi emi ndikpeme idem mbiọn̄ọ edidi se mbon nsahi ẹbian̄ade. Peter ke ntem esịn udọn̄ ọnọ mme andikot n̄wed esie ete “ẹti ikọ ẹmi ndisana prophet ẹkebemde iso ẹtịn̄.” (2 Peter 3:2; Utom 3:22, 23) Nso ke mme prọfet ẹketịn̄?

Ke ediwak idaha mme anam-akpanikọ asan̄autom Abasi ẹma ẹsidụri ntịn̄enyịn ẹwụt nte mme ubiereikpe Abasi ẹkedade utịt ẹsọk idiọkido. Peter eti mme andikot n̄wed esie aban̄a Ukwọ eyo Noah oro Abasi akadade nte usụn̄ ndisịbe ndụk ke ini isọn̄ ọkọyọhọde ye idiọkn̄kpọ. Ukwọ oro ekedepde ama ada ererimbot ini oro esịm utịt ofụri ofụri. Edi Abasi ama ekpeme Noah ye ubon esie ke ubom ọkọrọ ye “kpukpru obụkidem” ẹmi ẹkedide mme andida ke ibuot mme odu uwem edibotn̄kpọ. Mme mbụk ke ofụri ekondo ẹsọn̄ọ nte mbụk Bible emi edide akpanikọ.a—Genesis 6:19; 2 Peter 3:5, 6.

Peter okot edisịbe oro Abasi ekesịbede odụk do ‘akpanikọ’ emi ndusụk owo ‘ẹkekoide-koi ẹfre.’ Ndien mbon nsahi eyo oro ẹma ẹbian̄a mbon eken ẹsịn ke unana udọn̄. Nnyịn, nte ededi, inaha idede ifre se Jehovah ama akananam. Peter asian nnyịn ete: “Edi ama edi ikpa-enyọn̄ ye isọn̄ ẹmi ẹdude ke emi, ikọ Abasi okomụm mmọ enịm ọnọ ikan̄; ekpeme mmọ enịm ọnọ usen eke Abasi edikpede ikpe ye mmọ ẹmi mîbakke Enye, edinyụn̄ osobo mmọ.” (2 Peter 3:7) Ih, Abasi ayafiak esịbe odụk.

Abasi Iduọnke

Ediwak tọsịn isua ẹbebe. Ntak emi Abasi ebetde ebịghi ntre ndikọk mme mfịna ubonowo? Peter afiak odụri ntịn̄enyịn aka akpanikọ efen. Enye ọdọhọ ete: “Ẹkûfre n̄kpọ kiet emi, ndima, ẹte, ke enyịn Ọbọn̄ usen kiet etie nte thousand isua, thousand isua ẹnyụn̄ ẹtie nte usen kiet.” (2 Peter 3:8) Nte Jehovah esede ini okpụhọde ye nte nnyịn isede. Ye nsinsi Abasi, ọtọn̄ọde ke ini ẹkebotde Adam tutu esịm idahaemi ikam iyọhọke urua kiet. Edi se ededi ekikere oro nnyịn inyenede kaban̄a ini, tọsịn isua kiet kiet ye usen kiet kiet oro ebede ẹda nnyịn ẹsịk ẹkpere edisu mme uduak Jehovah.

“Eso emi ẹtiede-tie ẹkpeme isisọpke ifụt” edi n̄ke oro ọwọrọde nte ke nditetie mbet n̄kpọntịbe esinam etie nte enye ebebịghi nditịbe. Nte ededi, Peter esịn udọn̄ ete ‘ẹtie ẹbet ẹnyụn̄ ẹsọn̄ọ ẹyom edidi usen Jehovah.’ (2 Peter 3:12) Didie ke nnyịn ikeme ndikọri edu oro anamde nnyịn idu ke edidemede iban̄a nte ini emi Abasi edisịbede idụk ekperede?

Mme Edinam Ẹtịn̄ Ikọ Ẹsọn̄ Uyo Ẹkan Mme Ikọ

Peter owụk ntịn̄enyịn ke mme ido ye mme edinam. Enye etịn̄ aban̄a “ndisana edinam ido uwem” ọkọrọ ye “mme edinam uten̄e Abasi.” (2 Peter 3:11, NW) Nso ke mmọ ẹmi ẹbuana?

Ata asan̄autom Abasi esinam n̄kpọ ke usụn̄ oro enemde Enye esịt. Mbuọtidem utọ ata andituak ibuot oro owụt idem ke edu esie. Enye anam enye okpụhọde ye mbon oro n̄kukụre ẹtịn̄de-tịn̄ ẹte ke imenịm Abasi ye mme un̄wọn̄ọ esie ke akpanikọ. Eyedi afo omokụt ete ke an̄wan̄wa utom ukwọrọikọ eke Mme Ntiense Jehovah anam mmọ ẹdi isio. Mmọ ẹsiwaha ufọk fo ndidụri ntịn̄enyịn fo n̄wụt mme un̄wọn̄ọ Abasi oro ẹwụtde ke Bible. Edi mmọ ẹtie ntiense n̄ko ẹban̄a idotenyịn mmọ ye se mmọ ẹnịmde ke akpanikọ ke ebiet ekededi oro mmọ ẹsobode mme owo.

Ntiense oro esịnde idem ke nditan̄a mbuọtidem esie nnọ mbon en̄wen anam se enye enịmde ke akpanikọ ọsọn̄ idem. Ikọ oro ẹtịn̄de etetịm enyene odudu ke ntụk ndien ke ukem ini oro ada ata idatesịt ye uyụhọ edi. Ke ini nnyịn itan̄ade eti mbụk Obio Ubọn̄ Abasi, nnyịn imanam Jehovah n̄ko enem esịt. Nnyịn imọfiọk ite ke enye ‘ikwan̄ake nte efrede utom nnyịn ye ima enyịn̄ esie eke nnyịn iwụtde,’ nte apostle Paul nsan̄a Peter ọdọhọde.—Mme Hebrew 6:10; Rome 10:9, 10.

Nso idi utịp edinyene udọn̄ emi ke ndisuan eti mbụk Obio Ubọn̄ ke mme akpatre usen eke idiọk editịm n̄kpọ emi odude ke emi? Ediwak tọsịn mbon esịt akpanikọ ke mme itie ikie ke ẹkpep nte ẹkemede ndinyene n̄kpet n̄kpet itie ebuana ye Jehovah, man ẹbọ ufọn ẹto mfọnido esie oro owo mîdotke ẹnyụn̄ ẹnyene ata inemesịt ke idotenyịn nsinsi uwem ke paradise isọn̄.

Mbemiso Ifiọk

Okposụkedi nnyịn ifiọkde ito Bible nte ke Jehovah Abasi eyesịbe odụk ke edikem ini esie, oyom nnyịn inam n̄kaiso ntọt oro Peter ọnọde. “Sia mbufo ẹma ẹkebem iso ẹfiọk emi, ẹkpeme mbak nduyo mme anam-idiọk edimen mbufo ẹfep, onyụn̄ anam mbufo ẹkpọn̄ nsọn̄ọnda mbufo.”—2 Peter 3:17.

Ke akpanikọ Jehovah ama ọdiọn̄ọ ke mbemiso nte ke ndusụk owo oro mînyeneke ọkpọsọn̄ mbuọtidem ẹkeme ndikabade n̄kop mmemidem ebe ke se itiede nte ubịghi ke Abasi ndisịbe ndụk. Enye n̄ko ama ọfiọk ete ke odudu mbon unana uten̄e Abasi ekeme ndibiat mme ata asan̄autom esie mîdịghe, ke nsụhọde n̄kaha, etịmede se mmọ ẹnịmde ke akpanikọ nte ke edinam enyịn̄ Abasi asana ke asan̄a ekpere. Ekpedi n̄kpọ mmọn̄eyet didie ntem nditre ndisọn̄ọ nda ke utịt eyo emi!

Idahaemi idịghe ini ndinyene eyịghe mban̄a se Jehovah edinamde. (Mme Hebrew 12:1) Utu ke oro, idahaemi edi ini ndikọri esịtekọm kaban̄a se ime Jehovah adade edi—idotenyịn edinyan̄a enyenede ediwak miliọn owo oro ẹkabarede ẹdi ubak akwa otuowo ofụri ererimbot ẹnyụn̄ ẹsakde iso ẹse edibọhọ akwa ukụt oro edide ke iso. (Ediyarade 7:9, 14) Peter ọnọ item ete: “Ẹtie ke mfọn ye ifiọk Ọbọn̄ ye Andinyan̄a nnyịn Jesus Christ ẹkọri n̄kọri. Yak ubọn̄ enyene Enye ke emi ye ke nsinsi. Amen.”—2 Peter 3:18.

‘Ẹmụm Idem Ẹnịm ke Ima Abasi’

Ndisịn idem ke edikwọrọ Obio Ubọn̄ ye edidụk mme mbono esop Christian kpukpru ini kaban̄a utuakibuot ye edikpep Ikọ Abasi ọnọ nnyịn ukpeme. Ntem, nnyịn idinyeneke ini ndikere n̄kaha mban̄a ndiọi idaha idiọk editịm n̄kpọ mfịn. Inaha ndịk ye mme editịmede esịt ẹkara uwem mme ata Christian. (1 Corinth 15:58) Nte nnyịn isịnde ifịk inam n̄kpọ Jehovah, ntre ke ini ebe usọp usọp akan.

Jude, emi ekedide owo iduọk ini Peter onyụn̄ edide eyeneka Jesus, eteme nnyịn ete: “Ndima, mbufo ẹbọp idem ke enyọn̄ edisana mbuọtidem mbufo ẹkọri, ẹbọn̄ akam ke Edisana Spirit; ntem ke ẹdimụm idem mbufo ẹnịm ke ima Abasi, ẹnyụn̄ ẹtie ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.” (Jude 20, 21) Tịm fiọk ufọn oro odude ke ndinyene in̄wan̄în̄wan̄ edu ebe ke ndikọbọ ke akam. (1 Thessalonica 5:17) Ekem Jude adian ete: “Ẹtua ndusụk mmọ ẹmi ẹdude ke [eyịghe] mbọm; ẹnyụn̄ ẹnyan̄a ndusụk mmọ, ẹdabade mmọ ẹsio ke ikan̄; ẹnyụn̄ ẹda ndịk ẹtua ndusụk mmọ mbọm, ẹsua kpa ọfọn̄idem eke obụkidem asabarede.” (Jude 22, 23) Edi akpan n̄kpọ didie ntem ndisọn̄ọ kiet eken idem ke n̄kpọsọn̄ ini ẹmi! Ndien edi akpan n̄kpọ didie ntem nditre ndiduọ ndụk idomo, ndida anyan “usen edinyan̄a” emi nte ntak ndisịn idem ke “obukpo ido,” emi ọyọhọde mfịn ke ererimbot emi abiarade mi ke n̄kan̄ ido uwem.—Jude 4; 2 Corinth 6:1, 2.

Ebede ke ndinam ima ima item Peter, Paul, ye Jude onyụn̄ ebede ke ndisịn idem nnyụn̄ nsịn ifịk ke utom Abasi, afo emekeme ndibet ke ime Jehovah ndisịbe ndụk. Edi nte afo eyebet?

Kûmen̄e ndisobo ye Mme Ntiense ke n̄kann̄kụk fo kaban̄a un̄wam ndisọn̄ọ mbuọtidem fo ke un̄wọn̄ọ Andibot aban̄ade nsinsi uwem. Kpep se oyomde man odot nditiene mbuana ke utom unọ ikọ ntiense ofụri ererimbot emi owo mîditọn̄ọke aba ntak inam emi edisịmde utịt ke akwa ukụt oro asan̄ade ekpere. (Mark 13:10) Adan̄aoro afo eyenyene idotenyịn edidu uwem ke obufa ererimbot edinen ido oro Jehovah ọn̄wọn̄ọde. (2 Peter 3:13) Nam mme n̄kpọ editi esie! Bet ke ime! Yọhọ ke utom!

[Mme Ikọ idakisọn̄]

[Ndise ke page 7]

Kpep idahaemi ban̄a un̄wọn̄ọ Abasi aban̄ade Paradise

[Ebiet Ẹdade Ndise Ẹto ke page 5]

Wolf: Mme unam/Jim Harter/Dover Publications, Inc.; ekpri ekpemerọn̄: Nditọwọn̄: A Pictorial Archive otode Nineteenth-Century Sources/Grafton/Dover Publications, Inc.