Ẹsọn̄ọ Ẹnyene Usen Jehovah ke Ekikere
‘Ke ukperedem ini mbon nsahi ẹyedu.’—2 PETER 3:3.
1. Nso ekikere aban̄ade nte ini edide usọp usọp ke Christian kiet ke eyomfịn ekenyene?
ASAN̄AUTOM uyọhọ ini kiet emi odude ke utom emi ke se ibede isua 66 ekewet ete: “Kpukpru ini mmenen̄ede nnyene nte ini edide usọp usọp ke ekikere. Kpukpru ini mmenyene ke ekikere nte ke Armageddon eyedi okụt. (Ediyarade 16:14, 16) Ukem nte ete mi, ye eteete mi, ami ndu uwem mi nte apostle [Peter] akakpakde, ‘nsọn̄ọde nyom edidi Usen Abasi.’ Kpukpru ini nda obufa ererimbot oro ẹn̄wọn̄ọde nte ‘ata idem n̄kpọ okposụkedi owo mîkwe.’”—2 Peter 3:11, 12; Mme Hebrew 11:1, NW; Isaiah 11:6-9; Ediyarade 21:3, 4.
2. Ndisọn̄ọ nnyene usen Jehovah ke ekikere ọwọrọ nso?
2 Ikọ Peter oro ‘nsọn̄ọde nyom’ ke ebuana ye usen Jehovah ọwọrọ ete nnyịn ikûsio enye ifep ke ekikere nnyịn. Nnyịn ikpefreke ite ke usen emi Jehovah edisobode editịm n̄kpọ emi nte ntọn̄ọ edinam ndiwụk obufa ererimbot esie emi ẹken̄wọn̄ọde etịm ekpere. Enye ekpenyene ndidi ata idem n̄kpọ nnọ nnyịn tutu nnyịn ikụt enye n̄n̄wan̄a n̄n̄wan̄a, nte n̄kpọ eke odude nnyịn ke iso. Oro edi nte enye ekedide ata idem n̄kpọ ọnọ mme prọfet Abasi eke eset, ndien mmọ ẹma ẹsiwak nditịn̄ mban̄a enye nte ekperede.—Isaiah 13:6; Joel 1:15; 2:1; Obadiah 15; Zephaniah 1:7, 14.
3. Nso nte an̄wan̄ade ikedi ntak item Peter aban̄ade usen Jehovah?
3 Ntak emi Peter akakpakde nnyịn ete ida usen Jehovah nte n̄kpọ eke enye ekemede ndidi, yak idọhọ, “okụt”? Koro ndusụk owo nte an̄wan̄ade ẹma ẹtọn̄ọ ndisak nsahi mban̄a ekikere edidu Christ oro ẹken̄wọn̄ọde emi ẹdinọde mme anamidiọk ufen. (2 Peter 3:3, 4) Ntre ke udiana leta esie ibuot 3, emi nnyịn idinemede idahaemi, Peter ọbọrọ edori ikọ mbon nsahi ẹmi.
Ima Ima Eben̄e Nditi
4. Nso ke Peter oyom nnyịn iti?
4 Ẹkụt ima oro Peter ekenyenede ọnọ nditọete esie ke enye ndikot mmọ “ndima” ndien ndien ke ibuot n̄wed emi. Ke ekpede mmọ ubọk ima ima ete ẹkûfre se ẹkekpepde mmọ, Peter ọtọn̄ọ ntem: “Ndima, . . . ndemede ediden̄i esịt mbufo ke editi ikọ; nte, mbufo ẹti ikọ emi ndisana prọfet ẹkebemde iso ẹtịn̄, ye item Ọbọn̄ ye Andinyan̄a nnyịn emi otode mme apostle mbufo ẹsịm mbufo.”—2 Peter 3:1, 2, 8, 14, 17; Jude 17.
5. Ndusụk prọfet ẹketịn̄ nso ẹban̄a usen Jehovah?
5 Nso “ikọ emi ndisana prọfet ẹkebemde iso ẹtịn̄” ke Peter akakpak mme andikot leta esie nditi? Kamse, mmọ oro ẹban̄ade edidu Christ ke odudu Obio Ubọn̄ ye ubiereikpe mbon oro mîten̄eke Abasi. Peter ama ebebem iso odụri ntịn̄enyịn ọnọ mme ikọ ẹmi. (2 Peter 1:16-19; 2:3-10) Jude etịn̄ aban̄a Enoch, emi ekedide akpa prọfet emi ẹwetde nte ọkọnọde ntọt aban̄a ubiomikpe emi Abasi edinọde mme idiọkowo. (Jude 14, 15) Mme prọfet efen ẹma ẹtiene Enoch, ndien Peter iyomke nnyịn ifre se mmọ ẹkewetde.—Isaiah 66:15, 16; Zephaniah 1:15-18; Zechariah 14:6-9.
6. Ewe ikọ Christ ye mme apostle esie ẹnam nnyịn inyene ifiọk iban̄a usen Jehovah?
6 Ke adianade do, Peter asian mme andikot n̄wed esie ete ẹti “item Ọbọn̄ ye Andinyan̄a.” Item Jesus esịne nsịnudọn̄ emi: “Ẹkpeme idem mbufo, mbak . . . esịt mbufo [edidobi], ndien usen oro edibuat mbufo nte ekpọ.” “Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini.” (Luke 21:34-36; Mark 13:33) Peter akpak nnyịn n̄ko ete inam se mme apostle ẹketịn̄de. Apostle Paul, ke uwụtn̄kpọ, ekewet ete: “Usen [Jehovah] mọn̄ edi nte inọ ke okoneyo. Mmọdo ndien, ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama.”—1 Thessalonica 5:2, 6.
Mme Udọn̄ Mbon Nsahi
7, 8. (a) Ewe mme utọ owo ẹdi mbon oro ẹdade mme etop ntọt Abasi ẹnam nsahi? (b) Nso ke mbon nsahi ẹtịn̄?
7 Nte ẹkebemde iso ẹtịn̄, ntak emi Peter ọkọnọde item emi edi koro ndusụk owo ẹma ẹtọn̄ọ ndida ntọt oro nnam nsahi, kpa nte nditọ Israel eke eset ẹkesakde mme prọfet Jehovah. (2 Chronicles 36:16) Peter anam an̄wan̄a ete: “Ke akpa itie, ẹfiọk emi ẹte, ke ukperedem ini mbon nsahi ẹyeda nsahi ẹdi; mmọ ẹyesan̄a ke [mme udọn̄ idemmọ, NW].” (2 Peter 3:3) Jude ọdọhọ ete ke mme udọn̄ mbon nsahi ẹmi ẹdi “ke mme n̄kpọ oro ẹnanade uten̄e Abasi.” Enye okot mmọ “mbon eke ẹbietde unam, eke mînyeneke udọn̄ n̄kpọ eke spirit.”—Jude 17-19, NW.
8 Eyedi abian̄a abian̄a mme anditeme ẹmi Peter ọkọdọhọde ke ‘ẹsan̄a ke ndek ndek idiọkitọn̄ obụkidem’ ẹma ẹdu ke otu mbon nsahi ẹmi mînyeneke udọn̄ n̄kpọ eke spirit mi. (2 Peter 2:1, 10, 14) Mmọ ke nsahi ẹbụp mme anam-akpanikọ Christian ẹte: “Edidi eke enye ọkọn̄wọn̄ọde ete iyedi enye? Koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.”—2 Peter 3:4.
9. (a) Ntak emi mbon nsahi ẹdomode ndida ekikere aban̄ade nte ini edide usọp usọp emi odude ọyọhọ Ikọ Abasi ke usụhọde n̄kpọ? (b) Didie ke edisọn̄ọ nnyene usen Jehovah ke ekikere ekpeme nnyịn?
9 Ntak nsahi emi-e? Ntak ẹnọde ekikere nte ke ekeme ndidi edidu Christ ididaha itie tutu amama, nte ke Abasi akananam isịbeke idụk ke mme mbubehe owo ndien ke idinyụn̄ isịbeke idụk tutu amama? Ọfọn, ebede ke ndida ekikere aban̄ade nte ini edide usọp usọp emi ọyọhọde Ikọ Abasi ke usụhọde, mbon nsahi eke ẹbietde unam mi ẹyom ndikpek mbon en̄wen nsịn ke idaha unana udọn̄ eke spirit ndien ke ntem ẹnam mmọ ẹdi se mme ibụk ibụk n̄kpọ etabi ẹkemede ndimụm mmemmem mmemmem. Nso okopodudu nsịnudọn̄ ke emi edi ntem ọnọ nnyịn mfịn ndika iso ndu ke edidemede ke n̄kan̄ eke spirit! Nnyịn ikpakam isọn̄ọ inyene usen Jehovah ke ekikere inyụn̄ iti kpukpru ini ite ke enyịn esie ke esese nnyịn! Ntem emi oyonụk nnyịn ndinam n̄kpọ Jehovah ye ifịk nnyụn̄ mmụm edisana ido uwem nnyịn n̄kama.—Psalm 11:4; Isaiah 29:15; Ezekiel 8:12; 12:27; Zephaniah 1:12.
N̄koinnam ye Ndisịme
10. Didie ke Peter owụt nte ke mbon nsahi inenke?
10 Mme utọ mbon nsahi oro ẹfụmi akpan n̄kpọ kiet. Mmọ ẹkokoi ẹfụmi enye ẹnyụn̄ ẹdomo ndinam mbon en̄wen ẹfre enye. Ntak-a? Man ẹtap mme owo mmemmem mmemmem. Peter ewet ete: “Koro, nte ekemde ye udọn̄ mmọ, mmọ ẹfre akpan n̄kpọ emi.” (NW) Ewe akpan n̄kpọ? Nte ke “tutuko ikpaenyọn̄ ama odu, ye isọn̄ emi ikọ Abasi okosiode ke mmọn̄ owụk, onyụn̄ adade mmọn̄ obot; ndien edi mmọ ke ẹkeda ẹfụk ẹnyụn̄ ẹsobo ererimbot emi okodude adan̄aoro.” (2 Peter 3:5, 6) Ih, Jehovah ama osio idiọkido efep ke isọn̄ ke ini Ukwọ ke eyo Noah, akpanikọ oro Jesus ọkọsọn̄ọde etịn̄ n̄ko. (Matthew 24:37-39; Luke 17:26, 27; 2 Peter 2:5) Ntre, ke edide isio ye se mbon nsahi ẹtịn̄de, kpukpru n̄kpọ ikaha iso itie “kpasụk nte ẹketiede toto ke editọn̄ọ ererimbot.”
11. Nso n̄kpọ emi mme akpa Christian ẹkedoride enyịn oro ini mîkekemke kan̄a akanam ndusụk owo ẹsak mmọ nsahi?
11 Ekeme ndidi mbon nsahi ẹma ẹsak mme anam-akpanikọ Christian koro se mmọemi ẹkedoride enyịn ikosụho kan̄a. Esisịt ini mbemiso Jesus akpade, mme mbet esie “ẹma ẹkere ke obio ubọn̄ Abasi ọmọn̄ owụt idem kpa idahaoro.” (NW) Ekem, ke enye ama ekeset ke n̄kpa mmọ ẹma ẹbụp m̀mê ẹmọn̄ ẹwụk Obio Ubọn̄ kpa idahaoro. N̄ko, n̄kpọ nte isua duop mbemiso Peter ekewetde udiana leta esie, “ikọ” m̀mê “n̄wed” ẹmi ẹdọhọde nte okotode apostle Paul m̀mê mme nsan̄a esie ‘nte ke usen Jehovah ama ededi’ ama “afịna” ndusụk owo. (Luke 19:11; 2 Thessalonica 2:2; Utom 1:6) Mme utọ n̄kpọ oro mme mbet Jesus ẹkedoride enyịn ẹban̄a do, nte ededi, ikedịghe abian̄a, n̄kukụre n̄kpọ edi nte ke ini ikekemke kan̄a. Usen Jehovah eyedi!
Ikọ Abasi Edi Se Ẹberide Edem
12. Didie ke Ikọ Abasi owụt nte idide se ẹkemede ndiberi edem ke mme prọfesi esie ẹban̄ade “usen Jehovah”?
12 Nte ẹkebemde iso ẹtịn̄, mme prọfet oro ẹkedude mbemiso eyo mme Christian ẹma ẹsiwak nditọt nte ke usen usiene Jehovah emekpere. “Usen Jehovah” ama edi ke esisịt udomo ke 607 M.E.N. ke ini Jehovah ekebierede ikpe ọnọ otụtutọn̄ ikọt esie. (Zephaniah 1:14-18) Ekem, utọ “usen Jehovah” oro ama esịm mme idụt efen, esịnede Babylon ye Egypt. (Isaiah 13:6-9; Jeremiah 46:1-10; Obadiah 15) N̄ko ẹma ẹbem iso ẹtịn̄ ẹban̄a utịt editịm n̄kpọ mme Jew, ndien enye akada itie ke ini mbonekọn̄ Rome ẹkesobode Judea ke 70 E.N. (Luke 19:41-44; 1 Peter 4:7) Edi Peter anyan ubọk owụt “usen Jehovah” ke ini iso, kiet oro edikam okponde akan Ukwọ ofụri ererimbot ke udomo!
13. Ewe uwụtn̄kpọ ke mbụk owụt ke utịt editịm n̄kpọ emi iditreke ndidi?
13 Peter ọtọn̄ọ se enye etịn̄de aban̄a nsobo oro edide, ọdọhọde ete: “Edi ebe ke ukem ikọ oro.” (NW) Enye ndisụk ntịn̄ nte ke “ikọ Abasi” okosio isọn̄ oro okodude mbemiso Ukwọ “ke mmọn̄ owụk” edi oro. Idaha emi, emi ẹtịn̄de ke mbụk edibotn̄kpọ ke Bible, akanam Ukwọ ekeme nditịbe ke ini edịm ekedepde oto ke ndausụn̄, m̀mê ikọ, Abasi. Peter aka iso ete: “Edi amaedi ikpaenyọn̄ ye isọn̄ ẹmi ẹdude kemi, ikọ Abasi okomụm mmọ enịm ọnọ ikan̄; ekpeme mmọ ẹnịm ẹnọ usen eke Abasi edikpede ikpe ye mmọemi mîbakke Enye, edinyụn̄ osobo mmọ.” (2 Peter 3:5-7; Genesis 1:6-8) Nnyịn imenyene ikọ Jehovah oro ẹkemede ndiberi edem kaban̄a enye! Enye ayada utịt ọsọk “ikpaenyọn̄ ye isọn̄”—editịm n̄kpọ emi—ke ikan̄ ikan̄ iyatesịt akwa usen esie! (Zephaniah 3:8) Edi ini ewe?
Ọkpọsọn̄ Udọn̄ Kaban̄a Utịt Ndidi
14. Ntak emi ikemede ndinyene mbuọtidem nte ke nnyịn idu uwem idahaemi ke “ukperedem ini”?
14 Mme mbet Jesus ẹma ẹyom ndifiọk ini emi utịt edidide, ntre mmọ ẹma ẹbụp enye ẹte: “Nso idinyụn̄ idi idiọn̄ọ edidi Fo, ye eke akpatre ini eyo emi?” Mmọ nte an̄wan̄ade ẹkebụp ẹban̄a ini emi editịm n̄kpọ mme Jew edisịmde utịt, edi ibọrọ Jesus ọkọkọn̄ọ akpan akpan ke ini emi “ikpaenyọn̄ ye isọn̄” ẹmi ẹdude kemi ẹdikụtde nsobo. Jesus ama ebemiso etịn̄ mme utọ n̄kpọ nte ikpọ ekọn̄, akan̄, unyekisọn̄, ndiọi udọn̄ọ, ye ubiatibet. (Matthew 24:3-14; Luke 21:5-36) Ọtọn̄ọde ke isua 1914, nnyịn imokụt idiọn̄ọ emi Jesus ọkọnọde aban̄a “akpatre ini eyo emi” osude ọkọrọ ye mme n̄kpọ oro apostle Paul akasiakde nte ẹdidade ẹdiọn̄ọ “ukperedem ini.” (2 Timothy 3:1-5) Ke akpanikọ, akpakịp uyarade ẹdu nte ke nnyịn idu uwem ke utịt ini eke editịm n̄kpọ emi!
15. Nso ke mme Christian ẹkedomo ndinam kpa ye item Jesus?
15 Mme Ntiense Jehovah ẹmenyene ọkpọsọn̄ udọn̄ ndifiọk ini emi usen Jehovah edidide. Ke ntak ọkpọsọn̄ udọn̄ mmọ, mmọ ke ndusụk ini ẹma ẹdomo ndibat ini emi enye ekpedide. Edi ke ndinam ntre, mmọ ẹma ẹkpu, nte mme akpa mbet Jesus ẹkekpude, ndinam item Eteufọk mmọ nte ke nnyịn ‘ifiọkke edikem ini.’ (Mark 13:32, 33) Mbon nsahi ẹma ẹsak mme anam-akpanikọ Christian ke ntak se mmọ ẹkedoride enyịn mîkekemke ini kan̄a. (2 Peter 3:3, 4) Edi, usen Jehovah eyedi, Peter ọsọn̄ọ, ke ini Esie.
Oyom Ẹnyene Ekikere Jehovah
16. Ewe item ke nnyịn inam nte owụtde ọniọn̄?
16 Oyom nnyịn inyene ekikere Jehovah kaban̄a ini, nte Peter etide nnyịn idahaemi ete: “Edi ẹkûfre n̄kpọ kiet emi, ndima, ẹte, ke enyịn Ọbọn̄ usen kiet etie nte tọsịn isua, tọsịn isua ẹnyụn̄ ẹtie nte usen kiet.” Ini uwem nnyịn emi edide isua 70 m̀mê 80 omụhọ didie ntem ke ẹmende ẹdomo! (2 Peter 3:8; Psalm 90:4, 10) Ntre edieke etiede nte mme un̄wọn̄ọ Abasi ebịghi ndisu, oyom nnyịn inam item prọfet Abasi emi: “Enye [edimek ini] ama ẹbịghi, bet enye; koro enye mîditreke ndidi, mîdinyụn̄ ibehe ini.” (Sịghisịghi ubọkn̄wed edi eke nnyịn.)—Habakkuk 2:3.
17. Okposụkedi ukperedem ini akade iso ndibịghi n̄kan nte ediwak owo ẹkedoride enyịn, nnyịn ikeme ndinyene mbuọtidem ke nso?
17 Ntak emi ukperedem ini eke editịm n̄kpọ emi akade iso ndibịghi n̄kan nte ediwak owo ẹkedoride enyịn? Kaban̄a eti ntak kiet, nte Peter anamde an̄wan̄a ete: “[Jehovah] iduọnke ke edinam un̄wọn̄ọ Esie, ke ido nte ndusụk owo ẹkerede ẹte, Enye ọduọn; Enye akam enyene anyanime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Jehovah enyene se ifọnde ikan inọ ofụri ubonowo ke ekikere. Se enye ekerede aban̄a edi uwem mme owo, nte enye ọdọhọde ete: “N̄kpa idiọkowo inemke mi esịt, edi idiọkowo akam akabade ọkpọn̄ usụn̄ esie, ndien odu uwem.” (Ezekiel 33:11) Ntre nnyịn imekeme ndinyene mbuọtidem nte ke utịt eyedi ke ata nnennen ini man osu uduak ima ima Andibot nnyịn emi enyenede akakan ọniọn̄!
Nso Idibe Ifep?
18, 19. (a) Ntak emi Jehovah ebierede ndisobo editịm n̄kpọ emi? (b) Didie ke Peter etịn̄ aban̄a utịt editịm n̄kpọ emi, ndien nso ke ẹdinen̄ede ẹsobo?
18 Koro Jehovah enen̄ede ama mbon oro ẹnamde n̄kpọ esie, enye ọyọsọhi kpukpru mbon oro ẹnamde mmọ ẹkụt ndutụhọ. (Psalm 37:9-11, 29) Ke ọfiọkde, kpa nte Paul ọkọfiọkde ke ntọn̄ọ ntọn̄ọ, ete ke nsobo emi edidi ke ini owo mîdorike enyịn, Peter ewet ete: “Usen [Jehovah] edibuat nte inọ; ke usen oro ikpaenyọn̄ eyebe efep ye akamba uyom, se ẹdade ẹbot ererimbot ẹyenyụn̄ ẹtara ke ọkpọsọn̄ ufiop, ndien isọn̄ ye kpukpru utom eke ẹnamde ke esịt ẹyeta ikan̄ ẹbiara.” (2 Peter 3:10; 1 Thessalonica 5:2) Ata ikpaenyọn̄ ye isọn̄ ikabiarake ke ini Ukwọ, mmọ idinyụn̄ ibiarake ke usen Jehovah. Nso, ndien, ‘edibe ifep,’ m̀mê ke ẹdisobo?
19 Mme ukara owo oro ẹkarade ubonowo nte “ikpaenyọn̄” ẹyesịm utịt kpa ntre ye “isọn̄,” m̀mê n̄ka ubonowo oro mîbakke Abasi. Eyedi “akamba uyom” owụt ikpaenyọn̄ ndibe mfep usọp usọp. “Se ẹdade ẹbot” oro anamde oburobụt n̄kaowo mfịn ‘ẹyetara,’ m̀mê ẹbiara. Ndien “isọn̄,” esịnede “utom eke ẹnamde ke esịt,” ‘ayabiara.’ Jehovah ayayarade ndiọi edinam mme owo ofụri ofụri nte enye adade ofụri editịm n̄kpọ ererimbot emi esịm utịt oro enye etịmde odot.
Wụk Ekikere ke Idotenyịn Fo
20. Didie ke ifiọk oro inyenede iban̄a mme n̄kpọntịbe oro ẹnade ke iso okpotụk uwem nnyịn?
20 Sia mme n̄wọrọnda n̄kpọntịbe ẹmi ẹkperede, Peter ọdọhọ ete ke akpana nnyịn isịn idem ‘ke edisana ido ye ke uten̄e Abasi, itie ibet inyụn̄ isọn̄ọ iyom edidi usen Jehovah.’ Eyịghe ndomokiet ikemeke ndidu mban̄a oro! ‘Ikpaenyọn̄ ayatara ke ikan̄ ndien se ẹdade ẹbot ererimbot ayatara ke ọkpọsọn̄ ufiop.’ (2 Peter 3:11, 12) Akpanikọ oro nte ke n̄wọrọnda n̄kpọntịbe ẹmi ẹkeme nditọn̄ọ ndida itie n̄kpọn̄ ekpenyene nditụk kpukpru n̄kpọ oro nnyịn inamde m̀mê iduakde ndinam.
21. Nso idida itie enyọn̄ ye isọn̄ oro ẹdude kemi?
21 Peter kemi asian nnyịn se ididade itie akani editịm n̄kpọ emi, ọdọhọde ete: “Edi nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” (2 Peter 3:13; Isaiah 65:17) Ah, nso akwa ubọhọ ke emi edi ntem! Christ ye ekemmọ mme andikara 144,000 ẹdinam “obufa” ukara “enyọn̄,” ndien mme owo oro ẹbọhọde utịt ererimbot emi ẹdinam “obufa isọn̄.”—1 John 2:17; Ediyarade 5:9, 10; 14:1, 3.
Nyene Nte Ini Edide Usọp Usọp ke Ekikere Nyụn̄ Nyene Edisana Ido Uwem
22. (a) Nso idin̄wam nnyịn ifep ntọi ye ndo eke spirit ekededi? (b) Nso n̄kpọndịk ke Peter ọkọtọt aban̄a?
22 “Mmọdo ndima,” Peter aka iso, “sia mbufo ẹtiede ẹbet mme n̄kpọ ẹmi, ẹnyene ifịk ndien, man Enye ekpesịm mbufo nte ẹtiede ke emem, ẹnana ntọi, ẹnyụn̄ ẹnana ndo ke enyịn Esie. Ẹnyụn̄ ẹda ẹte, anyanime Ọbọn̄ nnyịn ọwọrọ edinyan̄a.” Nditie mbet ye ọkpọsọn̄ udọn̄ nnyụn̄ nda n̄kpọ ekededi oro akpanamde etie nte usen Jehovah ebịghi nte idiọn̄ọ ime oro Abasi enyenede ayan̄wam nnyịn ndifep ntọi ye ndo eke spirit ekededi. Edi, n̄kpọndịk odu! Peter ọtọt ete ke mme uwetn̄kpọ “edima eyenete nnyịn Paul . . . ndusụk n̄kpọ ẹdu . . . eke ọsọn̄de owo nditịm mfiọk, ndien mbon ndisịme ye mbon unana iwụk ẹyụrọde mme ikọ oro ẹnịm ẹda ẹsobo idemmọ, kpa nte mmọ ẹnamde ye ikọ Abasi en̄wen.”—2 Peter 3:14-16.
23. Nso idi akpatre item Peter?
23 Abian̄a abian̄a mme anditeme nte an̄wan̄ade ẹma ẹyụrọde mme uwetn̄kpọ Paul ẹban̄ade mfọnido Abasi oro owo mîdotke, ẹdade mmọ nte ntak ndinam obukpo ido. Eyedi Peter enyene emi ke ekikere ke ini enye ewetde item unyọn̄ esie: “Edi ndima, sia mbufo ẹma ẹkebem iso ẹfiọk emi, ẹkpeme mbak nduyo mme anamidiọk edimen mbufo efep, onyụn̄ anam mbufo ẹkpọn̄ nsọn̄ọnda mbufo.” Ekem enye eberi n̄wed esie, akpakde ete: “Edi ẹtie ke mfọn ye ifiọk Ọbọn̄ ye Andinyan̄a nnyịn Jesus Christ ẹkọri n̄kọri.”—2 Peter 3:17, 18.
24. Kpukpru mme asan̄autom Jehovah ẹkpenyene nso edu?
24 Nte an̄wan̄ade, Peter oyom ndisọn̄ọ nditọete esie idem. Enye oyom kpukpru owo ẹnyene edu oro anam-akpanikọ Ntiense edide isua 82 ekenyenede, emi ẹkekotde ẹto ke ntọn̄ọ ntọn̄ọ ete: “Ami ndu uwem mi nte apostle oro akakpakde, ‘nsọn̄ọde nyom edidi Usen Abasi.’ Kpukpru ini nda obufa ererimbot oro ẹn̄wọn̄ọde nte ‘ata idem n̄kpọ okposụkedi owo mîkwe.’” Kpukpru nnyịn ikpakam idu uwem nnyịn ke ukem usụn̄ oro.
Didie ke Afo Ọkpọbọrọ?
◻ Nso ke ‘ndisọn̄ọ nnyene’ usen Jehovah ‘ke ekikere’ ọwọrọ?
◻ Nso ke mbon nsahi ẹkokoi ẹfụmi, ndien ntak-a?
◻ Ke nso ntak ke mbon nsahi ẹsak mme anam-akpanikọ Christian nsahi?
◻ Nso ekikere ke oyom nnyịn inyene?
[Ndise ke page 23]
Sọn̄ọ nyene usen Jehovah . . .
[Ndise ke page 24]
. . . ye obufa ererimbot oro editienede ke ekikere