“Nso Orụk Owo ke Mbufo Ẹkpedi!”

“Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido uwem ye ke mme edinam uten̄e Abasi!” —2 PET. 3:11.

1. Ntak emi ẹkemede ndidọhọ ke Peter ekewet udiana leta esie ke ata eti ini ọnọ mme Christian eyo esie?

MME Christian ẹma ẹyọyọ ekese ukọbọ mbemiso edisana spirit akanamde apostle Peter ewet udiana leta esie; edi ukọbọ emi ikanamke mmọ ẹtek ke ifịk, m̀mê ndikpan mbufa owo ndidụk esop. Ntre, Devil ama odomo mmọ idomo en̄wen; kpa idomo emi enye esiwakde ndida nnam mme owo ẹduọn̄ọ. Nte Peter okowụtde, Satan ama odomo ndida nsunsu mme andikpep emi ẹnyenede “enyịn eke ẹyọhọde ye efịbe” ye ‘esịt emi ọbọde ukpep ke isịnenyịn’ mbiat ikọt Abasi. (2 Pet. 2:1-3, 14; Jude 4) Ntre, Peter ada udiana leta esie emi esịn udọn̄ ọnọ mme Christian ete ẹkûkpọn̄ Abasi.

2. Nso ke 2 Peter ibuot 3 enen̄ede eneme aban̄a, ndien nso ke ikpobụp idem nnyịn?

² Peter ọkọdọhọ ete: “Mbat ke enen, adan̄a nte ndude ke ataya emi, ndidemede mbufo ebe ke nditi mbufo, sia mfiọkde nte ke ibịghike ẹmọn̄ ẹsio ataya mi emi ẹfep . . . Ntre nyesịn ofụri ukeme mi kpukpru ini, man ke mma nnyọn̄, mbufo ẹkpekeme nditịn̄ mme n̄kpọ emi ke idem mbufo.” (2 Pet. 1:13-15) Ih, Peter ama ọfiọk ke ini n̄kpa imọ ekpere, edi enye ikoyomke ẹfre item imọ. Ndien ke akpanikọ, owo ifreke item esie emi, sia nnyịn n̄ko imetiene ikụt enye ke Bible. Ọyọhọ ibuot 3 ke udiana n̄wed Peter enen̄ede ebehe nnyịn sia enye etịn̄ n̄kpọ aban̄a “mme ukperedem usen” editịm n̄kpọ emi ye nte ẹdisobode mme ndamban̄a enyọn̄ ye ndamban̄a isọn̄. (2 Pet. 3:3, 7, 10) Nso item ke Peter ọnọ nnyịn? Didie ke ndinam item esie edinam Jehovah ama nnyịn?

3, 4. (a) Nso ke Peter eketịn̄ man anam mme owo ẹkere n̄kpọ, ndien nso item ke enye ọkọnọ? (b) Siak n̄kpọ ita oro idinemede idahaemi.

³ Ke Peter ama eketịn̄ nte ererimbot Satan emi editarade, enye ama ọdọhọ n̄ko ete: “Nso orụk owo ke mbufo ẹkpedi ke edisana ido uwem ye ke mme edinam uten̄e Abasi!” (2 Pet. 3:11, 12) Edieke etịmde ese, oyokụt ke idịghe mbụme ke Peter okobụp emi, edi ke enye okoyom mme owo ẹkere n̄kpọ. Peter ama ọfiọk ke sụk mbon emi ẹnamde uduak Jehovah, emi ẹnyụn̄ ẹdude uwem nte Enye oyomde ẹdibọhọ “usen usiene” emi edide mi. (Isa. 61:2) Ntre, apostle oro ama adian do ete: “Ke ntre, ndima, ke ẹma ẹkebem iso ẹfiọk emi, ẹdu ke ukpeme mbak ndudue mme abiatibet [nsunsu mme andikpep] edida mbufo awaha ọkpọn̄ usụn̄ onyụn̄ anam mbufo ẹduọ ẹkpọn̄ nsọn̄ọnda mbufo.”—2 Pet. 3:17.

⁴ Sia Peter esịnede ke otu mbon emi ‘ẹkebemde iso ẹnyene ifiọk’ emi, enye ama ọfiọk ke oyoyom mme Christian ẹnen̄ede ẹkpeme ke ukperedem ini man mmọ ẹkpekeme ndika iso nsọn̄ọ nda. Nte ini akakade, apostle John ama anam an̄wan̄a ntak emi mme Christian ẹkpenamde item emi. Enye ama okụt ke n̄kukụt nte ẹsiode Satan ke heaven ẹduọk, onyụn̄ okụt “akwa iyatesịt” emi enye ayatde ye mbon “emi ẹnịmde ibet Abasi [emi] ẹnyụn̄ ẹnyenede utom editie ntiense nnọ Jesus.” (Edi. 12:9, 12, 17) Mme anam-akpanikọ ikọt Abasi oro ẹyetde aran ye mme anam-akpanikọ nsan̄a mmọ, oro edi, “mme erọn̄ en̄wen,” ẹyekan enye. (John 10:16) Edi nso kaban̄a nnyịn owo kiet kiet? Ndi iyọsọn̄ọ ida inam n̄kpọ Abasi? Ẹyen̄wam nnyịn inam emi edieke idomode (1) ndinyene mme edu Abasi, (2) inanade ndo ye ntọi ke ido uwem ye ke n̄kan̄ eke spirit, inyụn̄ (3) isede idomo nte Abasi esede. Ẹyak ineme n̄kpọ ita emi.

Kpep Ndinyene Mme Edu Abasi

5, 6. Nso edu ke ikpekpep ndinyene, ndien ntak emi oyomde isịn “ọkpọsọn̄ ukeme”?

⁵ Peter ekewet ke ntọn̄ọ ntọn̄ọ udiana leta esie ete: “Ebe ke mbufo ndisịn ofụri ọkpọsọn̄ ukeme, ẹdian eti ido ke mbuọtidem mbufo, ẹdian ifiọk ke eti ido mbufo, ẹdian mfara ke idem ke ifiọk mbufo, ẹdian ime ke mfara ke idem mbufo, ẹdian uten̄e Abasi ke ime mbufo, ẹdian ima nditọete ke uten̄e Abasi mbufo, ẹdian ima ke ima nditọete mbufo. Koro edieke mme n̄kpọ emi ẹdude mbufo ke idem ẹnyụn̄ ẹyọhọde ẹduọhọ, mmọ ẹyekpan mbufo nditie ifu m̀mê nditre ndin̄wụm mfri kaban̄a nnennen ifiọk Ọbọn̄ nnyịn Jesus Christ.”—2 Pet. 1:5-8.

⁶ Imọfiọk ke esiyom isịn “ọkpọsọn̄ ukeme” man ikeme ndibuana ke mme edinam oro ẹdinamde inyene mme edu Abasi. Ke uwụtn̄kpọ, oyom ata ọkpọsọn̄ ukeme mbemiso owo ekeme ndidụk kpukpru mbono esop, n̄kot Bible ke usen ke usen, nnyụn̄ nsinam ukpepn̄kpọ idemesie kpukpru ini. Esinen̄ede oyom utom ye eti ndutịm man ubon ẹkeme ndinịm Utuakibuot Ubon mbubreyo kpukpru ini ke usụn̄ oro enemde kpukpru owo onyụn̄ enyenede ufọn. Mme n̄kpọ emi ẹma ẹmemehe nnyịn, idisọn̄ke aba ndinam mmọ kpukpru ini akpan akpan ke ini ikụtde ufọn mmọ.

7, 8. (a) Nso ke ndusụk owo ẹtịn̄ ẹban̄a mbubreyo Utuakibuot Ubon? (b) Nso ufọn ke adia oto ndutịm emi?

⁷ Kop se eyenete an̄wan kiet etịn̄de aban̄a ndutịm utuakibuot ubon emi: “Enye esinam ikpep ata ediwak n̄kpọ.” Eyenete an̄wan en̄wen ọdọhọ ete: “Ntịn̄ akpanikọ, ikenemke mi nte ẹkesiode Ukpepn̄kpọ N̄wed Esop ẹfep. Enye ke n̄kama n̄kan ke otu kpukpru mbono esop. Edi idahaemi inyenede mbubreyo Utuakibuot Ubon mi, mmedi ndifiọk ke Jehovah enen̄ede ọfiọk se nnyịn iyomde ye ini emi ẹkpenọde nnyịn se iyomde.” Ibuot ufọk kiet ọdọhọ ete: “Utuakibuot ubon an̄wam nnyịn etieti. Ndisitie ye n̄wan mi n̄kpep n̄kpọ oro ekemde ye idaha nnyịn enen̄ede an̄wam nnyịn. Nnyịn mbiba imokụt ke imenen̄ede inam n̄kọri ke ndin̄wụm mbun̄wụm spirit, imonyụn̄ inen̄ede ikop inem ukwọrọikọ idahaemi.” Ibuot ubon en̄wen ọdọhọ ete: “Nditọ mi ẹnen̄ede ẹma ndinam ndụn̄ọde nnyụn̄ n̄kpep ekese. Ndutịm utuakibuot ubon anam idiọn̄ọ ke Jehovah ọdiọn̄ọ mfịna nnyịn, ke enye esinyụn̄ ọbọrọ akam nnyịn.” Ndi utịbe utịbe ndutịm eke spirit emi onyụn̄ etie fi ntre n̄ko?

⁸ Kûyak n̄kpọ emi mîdịghe akpan n̄kpọ anam okûnịm utuakibuot ubon. N̄wan ye ebe kiet ẹdọhọ ẹte: “Ke n̄kpọ nte ọfiọn̄ kiet idahaemi, idụhe mbubreyo Thursday oro n̄kpọ emi ekemede ndinam itre utuakibuot ubon mîsitịbeke ke ubon nnyịn, edi nnyịn isiyakke enye ọbiọn̄ọ nnyịn.” Imọfiọk ke enyene mme ini emi oyomde okpụhọde ndutịm fo. Edi biere ke imọ idiyakke n̄kpọ ndomokiet ada itie mbubreyo Utuakibuot Ubon mbufo, idem ekpededi urua kiet kpọt.

9. Didie ke Jehovah akan̄wam Jeremiah, ndien nso ke ikeme ndikpep nto uwụtn̄kpọ esie?

⁹ Prọfet Jeremiah enịm ata eti uwụtn̄kpọ ọnọ nnyịn. Enye ama ama un̄wam eke spirit emi Jehovah ọkọnọde enye, sia se enye okonyụn̄ oyomde edi oro. Emi ama an̄wam enye aka iso ọkwọrọ ikọ ọnọ mbon isọn̄esịt. Enye ọkọdọhọ ete: “Uyo Jehovah akabarede edi . . . ikan̄ eke asakde, esịne mi ke ọkpọ.” (Jer. 20:8, 9) Emi ama an̄wam enye ọyọ nsọn̄ọn̄kpọ Jerusalem tutu ekem ini emi ẹkesobode obio oro. Nnyịn imenyene ofụri Bible mfịn. Ke ini itịn̄de enyịn ikpep enye inyụn̄ ise n̄kpọ nte Abasi esede, iyaka iso ikop inem ukwọrọikọ nnyịn ukem nte Jeremiah, iyonyụn̄ ikeme ndiyọ idomo, ndien iyasana ke ido uwem ye ke n̄kan̄ eke spirit.—Jas. 5:10.

Ẹka Iso ‘Ẹnana Ntọi Ẹnyụn̄ Ẹnana Ndo’

10, 11. Ntak emi ikpesịnde ofụri ukeme ‘inana ntọi inyụn̄ inana ndo,’ ndien nso ke emi abuana?

¹⁰ Nnyịn mme Christian imenen̄ede ifiọk ke idu uwem ke mme akpatre usen. Ntre, isikpaha nnyịn idem ndikụt ererimbot ẹmade mme n̄kpọ emi Jehovah asuade, utọ nte idiọkitọn̄, oburobụt ido idan̄, ye afai. Nte Satan esinamde n̄kpọ edi emi: Edieke enye mîkemeke ndisịn mme asan̄autom Abasi ndịk ke idem, enye ekeme ndiyom usụn̄ mbiat mmọ. (Edi. 2:13, 14) Ke ntre, ikpanaha idedei ifre item emi Peter ọkọnọde mi ke ntak ima ete: “Ẹsịn ofụri ukeme man ke akpatre [Abasi] okpokụt mbufo nte ẹnanade ntọi ẹnyụn̄ ẹnanade ndo ẹnyụn̄ ẹdude ke emem.”—2 Pet. 3:14.

¹¹ Mi, Peter afiak ọnọ ukem item emi enye ọkọnọde akpa ete ‘isịn ofụri ukeme nnyịn.’ Emi owụt ke Jehovah emi ọkọnọde Peter odudu ndiwet n̄kpọ emi ọfiọk ke oyom inen̄ede isịn ukeme man ikeme ndinana ‘ntọi nnyụn̄ nnana ndo,’ ikûnyụn̄ uyak ndek oro ẹyọhọde ererimbot Satan emi ẹbiat nnyịn. Ndisịn ukeme abuana n̄ko ndikpeme esịt nnyịn mbak idiọk n̄kpọ ererimbot emi edidọn̄ nnyịn itọn̄. (Kot Mme N̄ke 4:23; James 1:14, 15.) Emi n̄ko abuana ndisọn̄ọ nda ke ini ererimbot ‘ẹkade iso ẹsụn̄i nnyịn’ sia uwem Christian emi idude mi mîn̄wan̄ake mmọ, edi akpade-kpa mmọ idem.—1 Pet. 4:4.

12. Nso ikọ nsịnudọn̄ idu ke Luke 11:13?

¹² Unana mfọnmma esinam ọsọn̄ ndinam se inende. (Rome 7:21-25) N̄kukụre se ikemede ndin̄wam nnyịn inam se inende edi ndiwọn̄ọde mbịne Jehovah emi esiyakde edisana spirit esie ọnọ mbon emi ẹben̄ede enye ke ofụri esịt. (Luke 11:13) Ndien spirit emi ayanam inyene nti edu emi edinamde Abasi ama nnyịn onyụn̄ anam iyọ idomo oro isobode idahaemi ye enye oro edide eyetetịm ọsọn̄ ubọk akan emi nte usen Jehovah asan̄ade ekpere.

Yak Idomo Ọsọn̄ọ Fi Idem

13. Nso idin̄wam nnyịn iyọ idomo?

¹³ Nnyịn iditreke ndisobo nsio nsio idomo ke akani editịm n̄kpọ emi. Utu ke ndiyak idomo ọnọ fi iduọesịt, ntak emi mûdaha idomo nte ifet ndiwụt Abasi adan̄a nte amade enye, nnyụn̄ nda enye nsọn̄ọ mbuọtidem fo ke Abasi ye ke Ikọ esie. James ọkọdọhọ ete: “Ẹbat ẹte edi n̄kpọ ọyọhọ idatesịt, nditọete, ke ini nsio nsio idomo ẹsịmde mbufo, sia ẹfiọkde ẹte orụk mbuọtidem mbufo emi ẹma ẹkedomo ẹse anam ime ọwọrọ edi.” (Jas. 1:2-4) Ti n̄ko ete ke “Jehovah ọfiọk nte anyan̄ade mbon uten̄e Abasi osio ke idomo.”—2 Pet. 2:9.

14. Didie ke se iketịbede inọ Joseph ọsọn̄ọ fi idem?

¹⁴ Da Joseph eyen Jacob emi nditọete esie ẹkenyamde ẹsịn ke ufụn ke uwụtn̄kpọ. (Gen. 37:23-28; 42:21) Ndi ibak mmọ ama anam Joseph etre ndibuọt idem ye Abasi? Ndi enye ama ọtọhọ ye Abasi ke ndikayak utọ n̄kpọ oro etịbe ọnọ imọ? Bible ọdọhọ ke idịghe se enye akanamde edi oro. Edi idomo esie ikokụreke ke oro. Usen kiet, ekaufọk esie ama osu nsu odori enye ete ke enye okoyom ndidan̄ imọ ke n̄kanubọk, ndien Joseph ama aka n̄kpọkọbi ke ntak emi. Idomo enye emi n̄ko ikanamke enye etre ndinam n̄kpọ Abasi. (Gen. 39:9-21) Eyen mbon akakam ayak mme idomo oro ẹnam mbuọtidem esie etetịm ọsọn̄, ndien Abasi ama onyụn̄ enen̄ede ọdiọn̄ enye.

15. Nso ke ikeme ndikpep nto Naomi?

¹⁵ Imọfiọk ke idomo ekeme ndinam nnyịn ifụhọ. Onyụn̄ ekeme ndidi Joseph ama esifụhọ ndusụk ini. Mme anam-akpanikọ asan̄autom Abasi eken ẹma ẹsifụhọ. Owo kiet ke otu emi ekedi Naomi emi ebe ye nditọ iba ẹkekpan̄ade ẹkpọn̄. Enye ọkọdọhọ ‘ẹkûkot imọ aba Naomi (emi ọwọrọde edinem), edi ẹkot imọ Marah (oro edi, ndot-ndot), ke Ata Ọkpọsọn̄ amanam uwem enen̄ede odoro imọ.’ (Ruth 1:20, 21) Naomi okonyụn̄ anam se nnyịn ikpanamde, ndien an̄wan̄a owo ntak emi enye eketịn̄de ikọ ntem. Edi kpa nte Joseph, Naomi ikayakke kpukpru oro akpan enye ndinam n̄kpọ Abasi nnyụn̄ mbuọt idem ye Enye. Jehovah ama onyụn̄ ọdiọn̄ enye. (Ruth 4:13-17, 22) Ke Paradise, Abasi ayabiat kpukpru utom Satan ye eke idiọk ererimbot esie emi. “Owo iditịghi aba [afanikọn̄ akani ererimbot emi], idinyụn̄ idụkke owo ke esịt.”—Isa. 65:17.

16. Didie ke ikpada akam, ndien ntak-a?

¹⁶ Inamke n̄kpọ mme nso idomo isịm nnyịn, ndifiọk ke Abasi amama nnyịn kpukpru ini ayaka iso ọsọn̄ọ nnyịn idem. (Kot Rome 8:35-39.) Okposụkedi emi Satan mîditreke ndiyom usụn̄ nnam idem emem nnyịn, enye idikwe unen edieke ikade iso inam n̄kpọ ye ‘eti ibuot inyụn̄ idu ke ukpeme ye uduak ndibọn̄ akam.’ (1 Pet. 4:7) Jesus ọkọdọhọ ete: “Ẹdu ke edidemede, ndien, kpukpru ini ẹnam n̄kpeubọk man mbufo ẹkpekeme ndibọhọ kpukpru n̄kpọ emi ẹditịbede, nnyụn̄ nda ke iso Eyen owo.” (Luke 21:36) Ndi omokụt se Jesus etịn̄de aban̄a “n̄kpeubọk,” emi edide akam oro asan̄ade ye ọkpọsọn̄ eben̄e. Jesus ndidọhọ ikpe Abasi ubọk owụt ke ikpanaha ida ifet oro enye ye Ete esie ẹnọde nnyịn inam mbubru akpan akpan ke utọ ini emi idude mi. Koro sụk mbon emi ẹnyenede eti idaha ke iso Abasi ẹdibọhọ usen Jehovah.

Sịn Ifịk Nam N̄kpọ Jehovah

17. Edieke ọsọn̄de ndikwọrọ ikọ ke efakutom mbufo, didie ke eti uwụtn̄kpọ mme prọfet ke eset ekeme ndin̄wam fi?

¹⁷ Nditiene mbuana ke mme edinam eke spirit esisọn̄ọ nnyịn idem. Emi anam iti ikọ Peter emi: “Nso orụk owo ke mbufo ẹkpedi ke edisana ido uwem ye ke mme edinam uten̄e Abasi!” (2 Pet. 3:11) Ndikwọrọ eti mbụk edi akakan edinam uten̄e Abasi. (Matt. 24:14) Imọfiọk ke imemke utom ndikwọrọ ikọ ke ndusụk itie ke ntak unana udọn̄ m̀mê ukọbọ m̀mê ke ntak emi mme owo ẹnamde mbubehe mmọ tutu inyeneke ini inọ n̄kpọ Abasi. Se mme asan̄autom Jehovah ke eset ẹkesinyụn̄ ẹyọde edi oro. Edi mmọ ikesiyakke idem emem mmọ, edi ẹma ẹsibabak ẹka ẹfiak ẹka kpukpru usen ẹkekwọrọ etop Abasi. (2 Chron. 36:15, 16; kot Jeremiah 7:24-26.) Nso ikan̄wam mmọ ẹyọ kpukpru emi? Akpa, mmọ ikesehe utom Jehovah nte ererimbot ẹsede, edi ẹkese nte Jehovah esede. Udiana, mmọ ẹkeda nte ke edi ata akwa ukpono ndikere enyịn̄ ndian Abasi.—Jer. 15:16.

18. Didie ke utom ukwọrọikọ edinam ẹnen̄ede ẹnọ enyịn̄ Jehovah ubọn̄ ke ini iso?

¹⁸ Nnyịn n̄ko imenyene ata akwa ifet ndinam mme owo ẹfiọk enyịn̄ Jehovah ye uduak esie. Ọmọfiọk se idude: Utom ukwọrọikọ nnyịn idiyakke mme asua Abasi ẹnyene se ẹtịn̄de ẹnyan̄a idem ke akwa usen Jehovah. Ke akpanikọ, kpa nte ekedide ye Pharaoh, mmọ ẹyefiọk ke Jehovah an̄wana ekọn̄ ye mmimọ. (Ex. 8:1, 20; 14:25) Edi Jehovah oyokpono mme anam-akpanikọ asan̄autom esie ke ndinam ẹnen̄ede ẹkụt ke mmọ ẹkedi ata ata asan̄autom imọ.—Kot Ezekiel 2:5; 33:33.

19. Didie ke ikeme ndiwụt ke imama ndida ifet oro ime Jehovah ọnọde nnyịn nnam akpan n̄kpọ?

¹⁹ Peter ekewet nditọete esie ke utịt utịt udiana leta esie ete: “Ẹbat ime Ọbọn̄ nnyịn nte edinyan̄a.” (2 Pet. 3:15) Mbọk, ẹyak ida ifet oro ime Jehovah ọnọde nnyịn mi inam akpan n̄kpọ. Didie? Ke ndikpep ndinyene mme edu emi Abasi amade, n̄ka iso ‘nnana ntọi nnyụn̄ nnana ndo,’ nse idomo nte Abasi esede, nnyụn̄ n̄ka iso nsịn ifịk ke utom Obio Ubọn̄. Edieke inamde emi, iyetiene ibọ nsinsi edidiọn̄ oro “mbufa enyọn̄ ye obufa isọn̄” ẹdidade idi.—2 Pet. 3:13.

Nte Afo Emeti?

• Didie ke ikeme ndikpep ndinyene mme edu Abasi?

• Didie ke ikeme ndinana ‘ntọi ye ndo’?

• Nso ke ikeme ndikpep nto Joseph ye Naomi?

• Ntak emi nditiene n̄kwọrọ ikọ edide ata n̄kpọ ukpono?

[Ndise ke page 9]

Nso idin̄wam mbufo mme ebe ẹkpep ndinyene mme edu Abasi ẹnyụn̄ ẹn̄wam ubon mbufo ẹnam ntre?

[Mme ndise ke page 10]

Nso ke ikeme ndikpep nto nte Joseph ọkọyọde idomo?