Mme Mbụme Ẹtode Mme Andikot

◼ Ntak emi nte ẹsịnde 2 Peter 1:19 ke New World Translation of the Holy Scriptures okpụhọrede ye eke mme Bible eken-e?

Ke ọsọn̄ọde etịn̄ ufọn ikọ Abasi eke odudu spirit, apostle Peter ekewet ete: “Mmọdo ẹma ẹdọdiọn̄ ẹsọn̄ọ ikọ prọfesi ẹnọ nnyịn; ndien mbufo ẹmenam ọfọn ke ndiwụk ntịn̄enyịn ke enye nte ẹse utuenikan̄ emi ayamade ke n̄kịmn̄kịm ebiet, tutu eyo esiere ndien utịn asiaha, ke esịt mbufo.”—2 Peter 1:19.

Fiọk ete ke kọma odu ke ubak udịmikọ oro “tutu eyo esiere ndien utịn asiaha.” Ediwak edikabade Bible inamke emi.

Ke uwụtn̄kpọ, Dr. James Moffatt esịn utịt utịt ikpehe ufan̄ikọ 2Pe 1:19 oro ntem: “. . . enye ayama nte utuenikan̄ ke n̄kịmn̄kịm itie; tutu Eyo esiere ndien utịn asiaha ke esịt mbufo.” Utọ edikabade enyeemi anam owo ekere ke utịn asiaha ke esịt mme andinịm ke akpanikọ, utọ nte ke ini mmọ ẹkụtde ndusụk orụk un̄wana eke spirit.

Nte ededi, idem ko ke eyo Moses, ẹma ẹwụt nte ke ‘ntantaọfiọn̄ otode Jacob’ eyesiaha. (Numbers 24:17; men Psalm 89:34-37 domo.) Jesus ama owụt idemesie in̄wan̄în̄wan̄ nte “eyen David, ediyama ntantaọfiọn̄ usenubọk.”—Ediyarade 22:16.

Ndidiọn̄ọ “utịn,” m̀mê “ntantaọfiọn̄ usenubọk” emi, odot ye udọn̄ikọ ke se apostle Peter ekenemede aban̄a. Ndondo oro ke enye eketịn̄ otụk n̄kukụt edikpụhọde mbiet oro enye okokụtde ke isua 30 ke edem. (Matthew 16:28–17:9) Uyama uyama n̄kukụt oro akanyan ubọk owụt ini emi Jesus ‘edidide ke obio ubọn̄,’ mîdịghe ẹnọde ubọn̄ ke odudu Obio Ubọn̄. Se Peter okowụtde ọkọsọn̄ọ owụt ufọn ikọ Abasi; ukem ntre, oyom mme Christian mfịn ẹwụk ntịn̄enyịn ke ikọ prọfesi oro.

Ke adan̄aemi esịt ubonowo ke ofụri ofụri okodude—onyụn̄ osụk odude—ke ekịm, oro ikpenyeneke ndidi ntre ye mme ata Christian. Etie nte n̄kpọ eke mmọ ẹnyenede utuenikan̄ emi ayamade ke n̄kpọ emi ekpedide ekịm, kpa esịt mmọ. Peter ama ọdiọn̄ọ ete ke ndiwụk ntịn̄enyịn ke nyayama ikọ prọfesi Abasi, mme Christian ẹyedu ke edidemede ẹyenyụn̄ ẹbọ un̄wana tutu ke usiere obufa eyo. Oro edi ini emi “utịn” m̀mê “edinyama ntantaọfiọn̄ usenubọk,” edinen̄erede akara ke odudu Obio Ubọn̄.

Edi n̄kpọ udọn̄ nte ke E. W. Bullinger ekewet aban̄a 2 Peter 1:19 ete: “Mi, ana in̄wan̄în̄wan̄ nte ke akpana idiọn̄ọ emi, () , odu, koro edi prọfesi edi un̄wana oro ayamade, ndien Christ ye edidi Esie ẹdi Utịn ye Usiere. Ke akpanikọ, se ọwọrọde ikemeke ndidi nte ke ẹteme nnyịn ndikop ikọ prọfesi tutu ẹyarade Christ ke esịt nnyịn! Baba; edi ana nnyịn ida ikọ prọfesi emi isịn ke esịt nnyịn, tutu edisu edi ke edibiọn̄ọde Christ—kpa edisiaha oro enyeemi ẹkotde ‘Ntantaọfiọn̄ Usenubọk,’ asiahade.”—Figures of Speech Used in the Bible, 1898.

Nte ekemde, ediwak edikabade Bible ẹda idiọn̄ọ emi, (), ke 2 Peter 1:19.a New World Translation of the Holy Scriptures ọsọn̄ọ omụm akpan ndutịm ubonikọ oro ẹkụtde ke akpa usem Greek akama. Edi enye ada kọma ndibahade ubak udịmikọ oro “tutu eyo esiere ndien utịn asiaha” ye item oro ndiwụk ntịn̄enyịn ke ikọ oro ‘nte ẹse utuenikan̄ emi ayamade ke n̄kịmn̄kịm ebiet, ke esịt mbufo.’

[Mme Ikọ idakisọn̄]