Ẹnyan̄a ye Uwem Ẹbe Akwa Ukụt
“Mmọ oro ẹdi mmọemi ẹketode ke akwa ukụt ẹwọn̄ọ, ẹkenyụn̄ ẹyetde ọfọn̄idem mmọ ẹnam afia ke iyịp Eyenerọn̄.” —EDIYARADE 7:14.
1. Mmanie ẹdidara mbon oro ẹnamde ẹset ke ediset ke n̄kpa eke isọn̄?
KE INI ẹdinamde anana-ibat miliọn owo ẹset ke ‘ediset ke n̄kpa nti ye mme idiọkowo,’ owo idinamke mmọ ẹfiak ẹdidu uwem ke ukpọk isọn̄. (Utom 24:15) Mmọ ẹdiset ẹdidu ke ediye n̄kann̄kụk oro ẹnamde ọfọn akan ẹnyụn̄ ẹkụt ẹte ke ẹma ẹtịm itieidụn̄, ọfọn̄, ye akpakịp udia ẹben̄e mmimọ. Mmanie ẹdinam kpukpru ndutịm ẹmi? Nte an̄wan̄ade, mme owo ẹyedu oro ẹdidụn̄de ke obufa ererimbot oro mbemiso ediset ke n̄kpa ọtọn̄ọde ke isọn̄. Mmanie? Bible owụt ete ke mmọ ẹdidi mme andibọhọ akwa ukụt emi edide. Ke otu kpukpru mme ukpepn̄kpọ Bible, nte eyịghe mîdụhe enyeemi edi kiet oro edemerede owo udọn̄ akan—nte ke ẹyenyan̄a ndusụk mbon oro ẹnamde akpanikọ ye uwem ẹbe akwa ukụt ndien mmọ idikpaha tutu amama. Ẹnen̄ede ẹsọn̄ọ idotenyịn emi ke Edisana N̄wed Abasi.
Nte Mme Usen Noah
2, 3. (a) Mme mbiet n̄kpọ ewe ẹdu ke ufọt eyo Noah ye eyo nnyịn? (b) Noah ye ubon esie ndibọhọ Ukwọ anyan ubọk owụt nso?
2 Ke Matthew 24:37-39, Jesus Christ ama emen mme usen Noah odomo ye mme ukperedem usen, ẹmi nnyịn idude idahaemi. Enye ọkọdọhọ ete: “Nte mme usen Noah ẹkedide, kpasụk ntre ke edidi Eyen Owo eyenyụn̄ edi. Koro nte mmọ ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ke ndọ ke mme usen eke ẹkebemde ukwọ iso, tutu osịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep; kpasụk ntre ke edidi Eyen Owo eyedi.”
3 Ukwọ ofụri ererimbot oro ama emen kpukpru mbon oro mîkọnọhọ ntịn̄enyịn ke etop ntọt Abasi efep. Nte ededi, enye ikemenke Noah ye ubon esie ifep. Mmọ ẹma ‘ẹdụk ke ubom,’ nte Jesus ọkọdọhọde. Ke ntak uten̄e Abasi mmọ, Jehovah ama asiak usụn̄ ubọhọ ọnọ mmọ. Udiana N̄wed Peter 2:5, 9 etịn̄ aban̄a ubọhọ Noah ye ubon esie ke ini enye ọdọhọde ete: “Enye [Abasi] . . . [ekpeme] Noah, ọkwọrọ edinen ido, ye owo en̄wen itiaba, ke ini Enye anamde ukwọ ọtọ ofụk ekondo eke mîbakke Abasi. Ọbọn̄ ọmọfiọk ndinyan̄a mmọemi ẹten̄ede Enye nsio ke idomo.” Jesus ekemen eyo Noah odomo ye mme ukperedem usen ẹmi ndiwụt nte ke mme owo ke ofụri ofụri idinamke etop ntọt Abasi. Edi, ke ndinam ntre enye n̄ko ama ọsọn̄ọ nte ke Noah ye ubon esie ẹma ẹkop uyo Jehovah Abasi, ẹdụk ubom, ẹnyụn̄ ẹbọhọ akwa Ukwọ oro. Noah ye ubon esie ndibọhọ anyan ubọk owụt edibọhọ oro mme anam-akpanikọ asan̄autom Abasi ẹdibọhọde ke utịt ererimbot emi.
Uwụtn̄kpọ eke Akpa Isua Ikie
4. Ke edisu eke mme ikọ Jesus, mme n̄kpọntịbe ewe ẹkeda ẹkesịm nsobo Jerusalem ke 70 E.N.?
4 Jesus ama etịn̄ n̄ko aban̄a mme n̄kpọntịbe oro ẹdidade itie ke utịt ererimbot emi. Ke Matthew 24:21, 22, nnyịn ikot ite: “Ke ini oro akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba. Ndien ke mîkpesịbeke mme usen oro ẹmụhọ, baba owo kiet ikpọbọhọke; edi kaban̄a ndimek ikọt Abasi ẹyesịbe mme usen oro ẹmụhọ.” Mme ikọ ẹmi ẹma ẹnyene akpa edisu ke akpa isua ikie eke Eyo Nnyịn. Ke 66 E.N., udịmekọn̄ Rome ke idak Cestius Gallus ẹma ẹnam nna ẹkanade obio Jerusalem. Udịmekọn̄ Rome ẹma ẹsịm idaha ediwụri ibibene temple oro, ndien ediwak mme Jew ẹma ẹben̄e idem ndikọn̄ọ mfan̄. Nte ededi, ke unana idotenyịn ye ke ntak oro owo mîfiọkke, Cestius Gallus ama afiak ada udịmekọn̄ esie ọnyọn̄. Ke ini ẹkụtde nte mbon Rome ẹfiakde ẹnyọn̄ọ, mme Christian ẹma ẹnam n̄kpọ ke n̄kemuyo ye mme ikọ Jesus, emi enye eketịn̄de ediwak isua ke mbemiso ete: “Ke adan̄aemi mbufo ẹdikụtde nte mbonekọn̄ ẹkande Jerusalem ẹkụk, ẹfiọk ndien ẹte, n̄wụre esie ke ekpere. Ke ini oro yak mmọ eke ẹdude ke Judea ẹfen̄e ẹka ikpọ obot; yak mmọ eke ẹdude ke esịt obio ẹwọn̄ọ ẹnyọn̄; yak mmọ eke ẹdude ke in̄wan̄ ẹkûnyụn̄ ẹdụk obio.” (Luke 21:20, 21) Inikiet inikiet, mme Jew oro ẹkekabarede ẹdi Christian, kpa ndimek ikọt, ẹma ẹkpọn̄ obio Jerusalem oro okodotde nsobo do ndien ke ntem ẹma ẹnyan̄a mmọ ẹsio ke enyene-ndịk nsobo oro okosịmde enye mîbịghike ke oro ama ekebe. Ke 70 E.N., udịmekọn̄ Rome ke idak ndausụn̄ Etubom Titus ẹma ẹfiak ẹdi. Mmọ ẹma ẹkan Jerusalem ẹkụk, ẹnam nna ẹkanade obio oro, ẹnyụn̄ ẹsobo enye.
5. Ke nso usụn̄ ke ẹkesịbe ukụt Jerusalem omụhọ ke 70 E.N.?
5 Ewetmbụk owo Jew oro Josephus obụk ete ke mme Jew 1,100,000 ẹkekpan̄a, ke adan̄aemi 97,000 ẹkebọhọde ẹkenyụn̄ ẹtan̄de ẹka ntan̄mfep. Mme Jew oro mîkedịghe mme Christian oro ẹkebọhọde do ke akpanikọ ikedịghe “ndimek ikọt Abasi” eke prọfesi Jesus. Ke etịn̄de ikọ ọnọ ọsọn̄ibuot idụt mme Jew oro, Jesus ama ọdọhọ ete: “Sese, ẹyak ufọk mbufo ẹkpọn̄ ẹnọ mbufo nte ndon. Koro ndọhọ mbufo nte, Mbufo idikwe Mi aba, tutu mbufo ẹdọhọ ẹte, Itoro enyene Enyeemi edide ke enyịn̄ Jehovah.” (Matthew 23:38, 39) N̄wetnnịm n̄kpọ ndomokiet idụhe nte ke mme Jew oro ẹkekụkde ẹdọn̄ ke Jerusalem ẹma ẹnyịme Jesus nte Messiah ke akpatre, ẹkabade ẹdi mme Christian, ẹnyụn̄ ẹnyene mfọn Jehovah. Kpa ye oro, ẹma ẹsịbe ukụt oro ekedide etiene Jerusalem ke 70 E.N. omụhọ. Akpatre nna oro udịmekọn̄ Rome ẹkenamde ikebịghike. Emi ama anam ndusụk mme Jew ẹkeme ndibọhọ, ekpededi n̄kukụre ke ndinọ ẹka nsio nsio ikpehe Obio Ukara Rome nte ifịn.
Akwa Otu Mme Andibọhọ
6, 7. (a) Ewe akwa obio ido ukpono edi se inade ibet nsobo, nte ubak ewe anana-mbiet ukụt? (b) Nso ke John ekebem iso etịn̄ aban̄a akwa ukụt oro edidide etiene ererimbot emi?
6 Ke adan̄aemi nsobo Jerusalem ke 70 E.N. ke ekenen̄erede ada “akwa ukụt” etiene obio ido ukpono oro, owo ikwe kan̄a edisu eke mme ikọ Jesus ẹmi ke akamba udomo. Obio ido ukpono oro okponde akan, Akwa Babylon, kpa ukara ererimbot eke nsunsu ido ukpono, enyene ndikụt akama-n̄kpa akwa ukụt oro anana-mbiet ukụt emi editụkde mme ikpehe editịm n̄kpọ Satan eken editienede usọp usọp. (Matthew 24:29, 30; Ediyarade 18:21) N̄kpọ nte isua 26 ke ẹma ẹkesobo Jerusalem, apostle John ama ewet ke Ediyarade 7:9-14 aban̄a akwa ukụt ofụri ererimbot emi. Enye ama owụt ete ke akwa otu mme owo ẹyebọhọ enye.
7 Ẹda mme akpan edinam oro mmọ ẹnamde ẹdiọn̄ọ mme andibọhọ ẹmi, ẹkotde “akwa otuowo.” Nte ekemde ye Ediyarade 7:14, owo kiet ke otu mbiowo 24 ke heaven ama asian John ete: “Mmọ oro ẹdi mmọemi ẹketode ke akwa ukụt ẹwọn̄ọ, ẹkenyụn̄ ẹyetde ọfọn̄idem mmọ ẹnam afia ke iyịp Eyenerọn̄.” Ih, akwa otuowo ẹtoro Jehovah nte enyeemi edinyan̄a mmọ otode. Mmọ ẹnyene mbuọtidem ke iyịp Jesus oro ẹkeduọkde ẹnyụn̄ ẹnyene edisana idaha ke iso Andibot mmọ ye Edidem oro enye ekemekde, kpa Jesus Christ.
8. Nso eti itie ebuana odu ke ufọt “akwa otuowo” ye nsụhọ ke otu nditọete Jesus oro ẹyetde aran?
8 Mfịn, se ikperede ndisịm miliọn owo ition oro ẹbuanade ke akwa otuowo ẹdu ke idak ifịk ifịk ndausụn̄ Edidem eke heaven emi, kpa Jesus Christ. Mmọ ẹsụk ibuot ẹnọ Christ ẹnyụn̄ ẹdu ke n̄kpet n̄kpet itie ebuana ye nditọete esie oro ẹyetde aran ẹmi ẹsụk ẹdude ke isọn̄. Kaban̄a nte akwa otuowo ẹnamde n̄kpọ ye mmọemi ẹyetde aran mi, Jesus ọdọhọ ete: “Ke akpanikọ ke ndọhọ mbufo, Adan̄a nte mbufo ẹkenamde n̄kpọ ẹmi ẹnọ kiet ke otu nditọete Mi, kpa ata ekpri emi, mbufo ẹkenam ẹnọ Mi.” (Matthew 25:40) Sia mmọ ẹnọde nditọete Christ oro ẹyetde aran un̄wam ye unana ibụk, ẹbiere ikpe ẹnọ mbon oro ẹbuanade ke akwa otuowo nte ẹnamde nti n̄kpọ ẹnọ Jesus ke idemesie. Emi an̄wam mmọ ndinyene ifụre ifụre itie ebuana ye Jesus Christ ye Jehovah Abasi. Mmọ ẹmenyene ifet ndidiana ye nsụhọ oro ẹyetde aran ke ndikabade ndi Mme Ntiense Abasi ye mme ẹkere enyịn̄ esie.—Isaiah 43:10, 11; Joel 2:31, 32.
Nditaba Idap
9, 10. (a) Nso ke ana nnyịn inam man imụm edinen idaha nnyịn ke iso Eyen owo ikama? (b) Didie ke ana nnyịn inam n̄kpọ man ‘idu ke edidemede’?
9 Ana akwa otuowo ẹsọn̄ọ ẹmụm edinen idaha mmọ ke iso Eyen owo ẹkama ye unana edikpa mba, emi oyomde edidu ke ukpeme tutu osịm utịt. Jesus ama etịn̄ emi in̄wan̄în̄wan̄ ke ini enye ọkọdọhọde ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọemi ẹdụn̄de ke iso isọn̄. Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo.”—Luke 21:34-36.
10 Man ikụt unen ke ndida ke iso Eyen owo, ana nnyịn inyene unyịme esie, emi nnyịn mîdinyeneke edieke nnyịn iyakde ekikere ererimbot emi akara nnyịn. Ekikere ererimbot akama etabi onyụn̄ ekeme ndinam owo esịn idem akaha ke edinọ ikpọkidem inemesịt m̀mê ndikabade ndi se mme mfịna uwem efịkde tutu enye inịmke aba mme ufọn n̄kpọ Obio Ubọn̄ akpa. (Matthew 6:33) Utọ usụn̄uwem oro ananam idem emem owo ke n̄kan̄ eke spirit onyụn̄ ekeme ndinam enye anana udọn̄ ke mme mbiomo esie ke iso Abasi ye mmọ en̄wen. Enye ekeme nditre ndinam utom mîdịghe esịn idaha esie ke esop ke itiendịk ebe ke ndinam akwa idiọkn̄kpọ, ndusụk akam owụtde edu unana edikabade esịt. Ana owo kiet kiet ke otu akwa otuowo ekpeme idemesie. Ana enye adianade idem ọkpọn̄ ererimbot unana uten̄e Abasi emi ye mme edinam esie.—John 17:16.
11. Edida ewe mme edumbet N̄wed Abasi nsịn ke edinam edin̄wam nnyịn ndibọhọ Armageddon?
11 Kaban̄a oro, Jehovah ọmọnọ se nnyịn iyomde ebe ke Ikọ esie, edisana spirit esie, ye esop esie oro ẹkụtde ke enyịn. Ana nnyịn ibọ ọyọhọ ufọn ito ẹmi. N̄ko-n̄ko, ana nnyịn isibọn̄ akam inyụn̄ ikop uyo Abasi edieke nnyịn idoride enyịn ndinyene mfọn esie. N̄kpọ kiet edi-o, ana nnyịn ikọri ọkpọsọn̄ usua inọ se idiọkde. Andiwet psalm ọkọdọhọ ete: “Ami ntiehe ye mbon nsu; nnyụn̄ nsan̄ake ye mbon mbubịk. Mmasua esop mme anamidiọk, ndinyụn̄ ntiehe ye mme oburobụt owo. Kûmen ukpọn̄ mi ufep udian ye mme idiọkowo, kûnyụn̄ udian uwem mi ye mbon afai.” (Psalm 26:4, 5, 9) Ke esop Christian, oyom n̄kpri ye ikpọ owo ukem ukem ẹsụhọde ubọk ke ebuana oro ẹnyenede ye mbon oro mîyakke idem inọ Jehovah. Man inyene mfọn Abasi, nnyịn in̄wana ndikpeme idem ke idiọkn̄kpọ nnyụn̄ nnana ndo ke ererimbot. (Psalm 26:1-5; James 1:27; 4:4) Ntem, nnyịn iyenyene nsọn̄ọ nte ke Armageddon, Jehovah idimenke nnyịn ifep ke n̄kpa ọtọkiet ye mbon unana uten̄e Abasi.
Ndusụk Owo “Idikpaha ke Nsinsi”
12, 13. (a) Mbemiso anamde Lazarus eset ke n̄kpa, nso ikọ ke Jesus eketịn̄ oro mîkan̄wan̄ake Martha ọyọhọ ọyọhọ? (b) Nso ke ikọ Jesus mîkọwọrọke kaban̄a ndusụk owo ‘nditre ndikpa ke nsinsi’?
12 Edi n̄kpọ nduaidem ndikere mban̄a edibọhọ utịt editịm n̄kpọ emi ye ifet unana edikpa tutu amama. Emi edi idotenyịn oro Jesus ọnọde nnyịn. Esisịt ini mbemiso akanamde Lazarus ufan esie oro akakpade eset, Jesus ama asian Martha eyeneka Lazarus an̄wan ete: “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem: ndien owo ekededi eke odude uwem onyụn̄ ọbuọtde idem ye Ami idikpaha ke nsinsi. Nte omonịm emi ke akpanikọ?” Martha ama onịm ediset ke n̄kpa ke akpanikọ, edi idịghe kpukpru se Jesus eketịn̄de akan̄wan̄a enye.—John 11:25, 26.
13 Ikọ Jesus ikọwọrọke ke mme anam-akpanikọ apostle imọ ẹyekaiso ẹdu uwem ke ikpọkidem idinyụn̄ ikpaha tutu amama. Ke edide isio ye oro, enye ke ukperedem ama owụt ete ke mme mbet imọ ẹyekpa. (John 21:16-23) Ke akpanikọ, ndiyet mmọ aran ye edisana spirit ke Pentecost eke 33 E.N. ọkọwọrọ ete ke mmọ ẹnyene ndikpa man ẹbọ n̄kpọ akpa mmọ eke heaven nte ndidem ye mme oku. (Ediyarade 20:4, 6) Ntem, nte ini ekebede, kpukpru Christian akpa isua ikie ẹma ẹkpan̄a. Nte ededi, ama odu ntak emi Jesus eketịn̄de se enye eketịn̄de. Mme ikọ esie ẹban̄ade edidu uwem ye unana edikpa tutu amama ẹyesu.
14, 15. (a) Didie ke mme ikọ Jesus ẹban̄ade ndusụk owo oro ‘mîdikpaha ke nsinsi’ edisu? (b) Nso idi idaha ererimbot emi, edi nso idotenyịn ke nti owo ẹnyene?
14 N̄kpọ kiet edi, mme anam-akpanikọ Christian oro ẹyetde aran idisoboke nsinsi n̄kpa tutu amama. (Ediyarade 20:6) N̄ko, mme ikọ Jesus ẹnyan ubọk ẹwụt akpan ini kiet emi Abasi edisịbede odụk mme mbubehe owo edinyụn̄ ọsọhide ukwan̄ido efep ke isọn̄, kpa nte enye akanamde ke eyo Noah. Mme anam-akpanikọ oro ẹdikụtde nte ẹnamde uduak Abasi ini oro idikpaha ke edinam ubiereikpe Abasi. Utu ke oro, ukem nte Noah ye ubon esie, mmọ ẹyenyene ifet ndibọhọ nsobo ererimbot. Utọ idotenyịn oro enyene nsọn̄ọ, sia ọkọn̄ọde ke mme ukpepn̄kpọ Bible ẹnyụn̄ ẹdade mme uwụtn̄kpọ ẹnam an̄wan̄a. (Men Mme Hebrew 6:19; 2 Peter 2:4-9 domo.) Edisu oro prọfesi Bible osude owụt ete ke idibịghike ererimbot emi odude kemi emi idiọk n̄kaowo anamde ọmọn̄ osịm utịt ke nsobo. Owo ikemeke ndikpụhọde idaha oro odude kemi, koro ererimbot ọdiọk ke usụn̄ oro owo mîkemeke ndinen̄ede. Se Abasi eketịn̄de aban̄a ererimbot eyo Noah edi akpanikọ n̄ko aban̄a ererimbot mfịn. Idiọkido ọyọhọ esịt ata ediwak owo, ndien ekikere mmọ ẹsụk ẹdi idiọk kpukpru ini.—Genesis 6:5.
15 Jehovah amayak mme owo ẹkara isọn̄ ke ediwak isua ikie ye unana Abasi ndisịbe ndụk, edi ini mmọ ekpere ndikụre. Idibịghike Jehovah ọmọn̄ osobo kpukpru ndiọi owo efep ke isọn̄, kpa nte Bible ọdọhọde. (Psalm 145:20; Mme N̄ke 2:21, 22) Nte ededi, enye idisoboke nti owo ọtọkiet ye mme idiọkowo. Akananam Abasi inamke utọ n̄kpọ oro! (Men Genesis 18:22, 23, 26 domo.) Ntak emi enye okposobode mbon oro ẹdomode ndinam n̄kpọ esie ke edinam akpanikọ, ye mbak Abasi? Akam owụt eti ibuot nte ke mme anam-akpanikọ andituak ibuot nnọ Jehovah ẹmi ẹdude uwem ke ini akwa ukụt ọtọn̄ọde ẹyekụt mfọn ke iso esie ndien owo idisoboke mmọ, kpa nte owo mîkosoboke Noah ye ubon esie ke ini idiọk ererimbot eke eyo esie okosịmde mbabuat utịt. (Genesis 7:23) Mmọ ẹyenyene ukpeme Abasi ẹyenyụn̄ ẹbọhọ utịt ererimbot emi.
16. Nso mme utịbe utịbe n̄kpọ ẹditịbe ke obufa ererimbot, ọwọrọde nso ọnọ mme andibọhọ?
16 Ekem nso? Ke obufa ererimbot, mme edidiọn̄ ukọkudọn̄ọ ẹyefiọrọ ẹsịm ubonowo nte ẹdade mme utịp uwa ufak Jesus ẹnam n̄kpọ ọyọhọ ọyọhọ. Bible etịn̄ aban̄a ndamban̄a “akpa mmọn̄ uwem, emi asakde nte crystal, emi otode ke ebekpo Abasi ye eke Eyeneron̄, asan̄a ebe ke ufọt efak obio. Eto uwem ada ke n̄kan̄ akpa emi ye ke n̄kan̄ oko, on̄wụm orụk mfri duopeba, on̄wụm mfri esie ke ọfiọn̄ ke ofiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.” (Ediyarade 22:1, 2) Edi utịben̄kpọ nditịn̄, ‘ukọkudọn̄ọ’ oro esịne edikan idem n̄kpa oro otode Adam! “Enye eyemen n̄kpa ke nsinsi; Ọbọn̄ Jehovah eyenyụn̄ ọkwọhọde kpukpru iso mmọn̄eyet efep.” (Isaiah 25:8) Ntem, mbon oro ẹbọhọde akwa ukụt ẹdụk obufa ererimbot idikwe n̄kpa tutu amama!
Idotenyịn Akpanikọ
17. Idotenyịn oro nte ke ndusụk owo ẹyebọhọ Armageddon ndien “idikpaha ke nsinsi” edi akpanikọ adan̄a didie?
17 Nte nnyịn imekeme ndinyene ọyọhọ mbuọtidem ke ndyọ ndyọ idotenyịn emi? Ata ọyọhọ ọyọhọ! Jesus ama owụt Martha ete ke ini eyedu emi mme owo ẹdidude uwem ye unana edikpa ke nsinsi. (John 11:26) Akan oro, ke ibuot 7 eke Ediyarade oro Jesus ọkọnọde John, ẹma ẹyarade ẹte ke akwa otuowo ẹto ke akwa ukụt ẹwọn̄ọ, ẹbọhọ enye. Nte nnyịn imekeme ndinịm Jesus Christ ye mbụk aban̄ade Ukwọ eyo Noah ke akpanikọ? Mfan̄a idụhe iban̄a oro! N̄ko-n̄ko, Bible enyene mme mbụk eken ẹban̄ade mme idaha oro Abasi okonịmde mme asan̄autom esie uwem ebe mme ini ubiereikpe ye iduọ mme idụt. Nte ẹkpedori enyịn ndikụt se ikpride ikan oro nto enye ke utịt ini emi? Nte odu n̄kpọ ekededi oro ọsọn̄de akan Andibot ndinam?—Men Matthew 19:26 domo.
18. Didie ke nnyịn ikeme ndinyene idotenyịn uwem ke edinen obufa ererimbot Jehovah?
18 Ebede ke ndinam n̄kpọ Jehovah ke edinam akpanikọ idahaemi, nnyịn imenyene idotenyịn uwem nsinsi ke obufa ererimbot esie. Ye anana-ibat miliọn owo, uwem ke obufa ererimbot oro edidi ebe ke ediset ke n̄kpa. Edi, ke eyo nnyịn, ediwak miliọn ke otu ikọt Jehovah—ih, akwa otuowo eke baba owo kiet mîkemeke ndibat m̀mê ndinịm adan̄a—ẹyenyene anana-mbiet ifet ẹdidi se ẹnyan̄ade ye uwem ẹbe akwa ukụt. Ndien mmọ idikpaha tutu amama.
Mbọk Nam An̄wan̄a
◻ Didie ke ẹkewụt ke eyo Noah nte ẹdibọhọde Armageddon?
◻ Nso ke ana nnyịn inam man ikaiso idu ke edidemede ke ini Jesus edide ndinọ ubiereikpe otode Jehovah?
◻ Ntak emi nnyịn ikemede ndidọhọ ke mme andibọhọ Armageddon “idikpaha ke nsinsi”?
[Ndise ke page 15]
Mme Christian ẹma ẹbọhọ ukụt Jerusalem