3. Nte ikpowụtde ke imama se ẹkenamde ẹnọ nnyịn

Da nte mmọn̄ oyom ndimen fi, ndien owo efehe edinyan̄a fi. Ndi ọkpọsọp efre utọ owo oro ye se enye akanamde ọnọ fi oro? Nso ye nso ke akpanam man owụt ke amama se enye akanamde oro?

Jehovah ama eberede usụn̄ uwem enịm ọnọ nnyịn ke ntak mfọnido esie. Kot 1 John 4:8-10, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso inam uwa Jesus edi san̄asan̄a enọ?

• Esitie fi didie ama eti se Jehovah ye Jesus ẹkenamde ẹnọ fi?

Nso ke ikpanam man iwụt ke imama se Jehovah ye Jesus ẹkenamde ẹnọ nnyịn? Kot 2 Corinth 5:15 ye 1 John 4:11; 5:3. Ama okot itie Bible kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:

• Itie Bible emi owụt ke nso ke ikpanamde man iwụt ke imama se Abasi ye Eyen esie ẹkenamde ẹnọ nnyịn?

1. Nso isinam owo ayak idem ọnọ Abasi?

Ima emi imade Jehovah esinam iyak idem inọ enye. (1 John 4:10, 19) Bible ọdọhọ nnyịn owo kiet kiet ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Mark 12:30) Edieke imade Abasi, nnyịn iditịn̄ke-tịn̄ ke inua kpọt, iyananam iwụt. Ima esinamde eren ye n̄wan emi ẹmade idemmọ ẹnam ndọ. Ukem ntre, edieke imade Jehovah, ima oro ayanam iyak idem inọ enye inyụn̄ ina baptism.