Mme Mbụme Ẹtode Mme Andikot
Ke ini apostle John ekewetde ete ke “ima eke ọfọnde ama ebịn ndịk efep,” nso ke ikọ esie oro “ima eke ọfọnde ama” ọwọrọ, ndien ewe “ndịk” ke ima ebịn efep?
Apostle John ekewet ete: “Ndịk isịneke ke ima; edi ima eke ọfọnde ama ebịn ndịk efep; koro ndịk asan̄a ye ufen; ndien owo eke efehede ndịk, ke ikanamke enye ọfọn ama ke ima.”—1 John 4:18.
Udọn̄ikọ oro owụt ke John eketịn̄ aban̄a ifụre utịn̄ikọ—akpan akpan ke ebuana ye ima oro imade Abasi ye ifụre oro inyenede nditịn̄ ikọ ye Enye. 1Jo 4 Ufan̄ikọ 17 owụt emi koro nnyịn ikot ite: “Ima ọwọrọ ọfọn ama ke esịt nnyịn ntem, ete nnyịn inyene uko [m̀mê, ifụre utịn̄ikọ] ke usen ikpe.” Udomo oro Christian amade Abasi onyụn̄ ọfiọkde ke Abasi ama imọ enyene nnennen ebuana ke ifụre utịn̄ikọ oro enye enyenede—m̀mê oro enye mînyeneke—ke ini enye ọbọn̄de akam ọnọ Abasi.
Ikọ oro “ima eke ọfọnde ama” enen̄ede enyene se ọwọrọde. Nte ẹdade ikọ oro ‘mfọnmma’ ẹtịn̄ ikọ ke Bible isiwakke ndiwọrọ edifọn mma ofụri ofụri, oro edi, ndinana ntọi, edi esiwak ndidi ke ukeuke udomo. Ke uwụtn̄kpọ, ke Ukwọrọikọ esie Oro ke Obot, Jesus ọkọdọhọ ete: “Mbufo ẹfọn ẹma ndien, kpa nte Ete mbufo ke heaven ọfọnde ama.” Jesus akasian mme mbet ete ke edieke mmọ ẹmade mbon oro ẹmade mmọ kpọt, ke ima mmọ idịghe ọyọhọ ọyọhọ ima. Mmọ ẹkpenyene ndinam ima mmọ ọfọn ama, m̀mê ọyọhọ, ebe ke ndima idem mme asua mmọ. Kpasụk ntre n̄ko, ke ini John ekewetde aban̄a “ima eke ọfọnde ama,” enye eketịn̄ aban̄a ima Abasi emi edide eke ofụri esịt, ọkọride esịm ọyọhọ idaha, onyụn̄ otụkde ofụri ikpehe uwem owo.—Matthew 5:46-48; 19:20, 21.
Ke ini Christian ọbọn̄de akam ọnọ Abasi, enye ọfiọk ke imọ idi anamidiọk ye anana-mfọnmma owo. Nte ededi, edieke enye enen̄erede ama Abasi onyụn̄ enen̄erede ọfiọk ke Abasi ama imọ, enye idikopke ndịk ke Abasi oyobiom imọ ikpe m̀mê esịn imọ. Utu ke oro, enye enyene ifụre nditịn̄ se idude enye ke esịt nnyụn̄ mben̄e Abasi efen ọnọ imọ ke isọn̄ uwa ufak oro Enye ọnọde ke ima ebe ke Jesus Christ. Enye enyene mbuọtidem nte ke Abasi okop akam imọ.
Didie ke owo ekeme ndinyene “ima eke ọfọnde ama” ndien ke ntem “ebịn ndịk” oro anamde enye ekere ke ẹbiom imọ ikpe m̀mê ke ẹsịn imọ, efep? Apostle John ọkọdọhọ ete: “Owo ekededi eke enịmde ikọ [Abasi], ke akpanikọ ke ẹmenam ima Abasi ọfọn ama ke esịt esie.” (1 John 2:5) Kam kere ise: Edieke Abasi akamade nnyịn ke ini nnyịn ikedide mme idiọkowo, ndi enye idikam imaha nnyịn ikan edieke nnyịn inen̄erede ikabade esịt inyụn̄ isịnde ifịk ‘inịm ikọ Esie’? (Rome 5:8; 1 John 4:10) Ke akpanikọ, adan̄a nte nnyịn isọn̄ọde ida inam akpanikọ, nnyịn imekeme ndinyene ukem mbuọtidem oro apostle Paul ekenyenede ke ini enye eketịn̄de aban̄a Abasi ete: “Enye emi mîkesịnke ndinọ Eyen Esiemmọ, edi ayakde Enye ọnọ ke ibuot nnyịn kpukpru, Enye edikeme didie nditre ndinọ nnyịn kpukpru n̄kpọ ndian ye Enye?”—Rome 8:32.