Mme Mbụme Ẹtode Mme Andikot
Akpa John 4:18 asian nnyịn ete: “Ndịk isịneke ke ima; edi ima eke ọfọnde ama ebịn ndịk efep.” Edi Peter ekewet ete: “Ẹma nditọete. Ẹten̄e [ẹnyene ndịk] Abasi.” (1 Peter 2:17) Didie ke nnyịn ikeme ndinam ufan̄ikọ iba ẹmi ẹdu ke n̄kemuyo?
Peter ye John ẹkedi mme apostle oro ẹkekpepde n̄kpọ nnennen nnennen ẹto Jesus Christ ke idemesie. Ntem nnyịn imekeme ndinyene mbuọtidem nte ke se mmọ ẹkewetde ẹdu ke n̄kemuyo. Kaban̄a mme ufan̄ikọ oro ẹkotde ẹto ke enyọn̄ emi, ibọrọ edi nte ke apostle iba ẹmi ẹketịn̄ ẹban̄a nsio nsio orụk ndịk.
Ẹyak nnyịn ibemiso ikere iban̄a item Peter. Nte udọn̄ikọ owụtde, Peter ọkọnọ ekemmọ mme Christian item eke odudu spirit aban̄a edu mmọ ye mmọ oro ẹkarade. Ke ndisịn ke usụn̄ efen, enye eketịn̄ aban̄a nnennen ekikere ẹkpenyenede ẹban̄a nsụkibuot ke ndusụk idaha. Ntem, enye ama ọnọ mme Christian item ete ẹsụk ibuot ẹnọ mme owo oro ẹnyenede mme itie odudu ke mme ukara owo, utọ nte ndidem m̀mê mme andikara. (1 Peter 2:13, 14) Ke akade iso, Peter ama ewet ete: “Ẹkpono kpukpru owo. Ẹma nditọete. Ẹten̄e Abasi. Ẹkpono edidem.”—1 Peter 2:17.
Ke ikerede iban̄a udọn̄ikọ oro, ana in̄wan̄în̄wan̄ nte ke ini Peter eketịn̄de ete ke mme Christian ẹkpenyene ‘nditen̄e Abasi,’ ikọ esie ọkọwọrọ ete ke nnyịn ikpenyene ndinyene ntotụn̄ọ, uten̄e oro asan̄ade ye ukpono nnọ Abasi, kpa ndịk ediyat odudu ukara oro okon̄de akan esịt.—Men Mme Hebrew 11:7 domo.
Nso kaban̄a ikọ apostle John? Ke ntọn̄ọ ntọn̄ọ ke 1 John ibuot 4, apostle oro ama etịn̄ aban̄a ufọn edidomo “mme spirit” nse utọ nte mmọ oro ẹtode mme nsunsu prọfet. Mme ikọ oro ke akpanikọ itoho Jehovah Abasi; mmọ ẹto m̀mê ẹnọ ekikere idiọk ererimbot.
Ke edide isio ye oro, mme Christian oro ẹyetde aran “ẹnyene Abasi.” (1 John 4:1-6) Sia oro edide ntre, John ama akpak ete: “Ndima, ẹyak nnyịn ima kiet eken; koro ima oto Abasi.” Abasi ama anam usio-ukot ke ndiwụt ima—enye “[ama osio] Eyen Esie ọdọn̄, ete, edidi usio-isop mme idiọkn̄kpọ nnyịn.” (1 Peter 4:7-10) Didie ke nnyịn ikpanam n̄kpọ?
Nte an̄wan̄ade, nnyịn ikpenyene ndisọn̄ọ ndiana kiet ye ima ima Abasi nnyịn. Nnyịn ikpenyeneke ndikop ndịk mban̄a enye m̀mê ndinyek idem ke idotenyịn edisan̄a n̄kpere enye ke akam. Ke mbemiso John ama ọnọ item ete: “Edieke esịt nnyịn mîbiomke nnyịn nnyịn inyene uko ye Abasi; iyenyụn̄ ibọ se ededi eke iben̄ede ke ubọk Esie, sia nnyịn inịmde mbet Esie.” (1 John 3:21, 22) Ih, eti ubieresịt ọnọ nnyịn ifụre edisan̄a n̄kpere Abasi ye unana ndịk oro abiatde-biat odudu m̀mê oro esịnde ukpan. Ke ntak ima, nnyịn imenyene ifụre edika mbịne, m̀mê edisan̄a n̄kpere, Jehovah ke akam. Ke afan̄ emi, “ndịk isịneke ke ima.”
Ẹyak nnyịn imen ekikere iba ẹmi idian kiet ndien. Ana Christian kpukpru ini enyene ukpono oro asan̄ade ye mbak Jehovah, enyene ntotụn̄ọ ukpono ọnọ itie, odudu, ye unenikpe esie. Edi nnyịn n̄ko ima Abasi nte Ete nnyịn inyụn̄ inyene n̄kpet n̄kpet itie ebuana ye enye ye ifụre edisan̄a n̄kpere enye. Utu ke ndidi se oyomonsia ekededi kaban̄a enye akpande, nnyịn imọbuọt idem ite ke nnyịn imekeme ndisan̄a n̄kpere enye, nte eyen enyenede ifụre ndisan̄a n̄kpere ima ima ete m̀mê eka.—James 4:8.