Ndin̄wam Mbon En̄wen Ẹkpep Mme N̄kpọ Oro Abasi Oyomde

“Utom oro obiomo mi ke idem nte n̄kpọ eke nnyenede ndinam; koro idifọnke fọn inọ mi edieke mmen̄kwọrọke gospel.”—1 CORINTH 9:16.

1, 2. (a) Ke ewe adiana-iba utom ke Jehovah oyom nnyịn ibuana? (b) Nso ke ana mbon esịt akpanikọ ẹkpep man ẹkabade ẹdi mme andidu ke idak Obio Ubọn̄ Abasi?

JEHOVAH enyene eti mbụk ọnọ ubonowo. Enye enyene Obio Ubọn̄, ndien enye oyom mme owo ke kpukpru ebiet ẹkop ẹban̄a enye! Ndondo oro nnyịn ifiọkde eti mbụk emi, Abasi oyom nnyịn ibuana enye ye mbon en̄wen. Emi edi adiana-iba utom. Akpa, ana nnyịn itan̄a eti mbụk Obio Ubọn̄ Abasi. Ke prọfesi esie aban̄ade “akpatre ini eyo emi,” Jesus ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:3, 14.

² Udiana ikpehe utom emi esịne ndikpep mbon oro ẹnamde n̄kpọ nte ọfọnde ẹban̄a editan̄a Obio Ubọn̄ emi. Ke enye ama ekeset ke n̄kpa, Jesus ama asian akwa otu mme mbet esie ete: “Mbufo ẹka ẹkanam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu osịm utịt ererimbot.” (Matthew 28:19, 20) Mme ‘n̄kpọ oro Christ eketemede’ ikotoho enye; enye ekekpep mbon en̄wen ndinịm mme ibet Abasi, m̀mê mme n̄kpọ oro Abasi oyomde. (John 14:23, 24; 15:10) Ntem ndikpep mbon en̄wen ‘ẹnam mme n̄kpọ oro Christ eketemede’ esịne ndin̄wam mmọ ẹkpep mme n̄kpọ oro Abasi oyomde. Ana mbon esịt akpanikọ ẹsịm mme n̄kpọ oro Abasi oyomde man otodo ẹkabade ẹdi mme andidu ke idak Obio Ubọn̄ esie.

3. Nso idi Obio Ubọn̄ Abasi, ndien nso ke enye edinam oro anamde etop Obio Ubọn̄ edi eti mbụk ntre?

³ Nso idi Obio Ubọn̄ Abasi? Ndien nso ke enye edinam emi anamde etop Obio Ubọn̄ edi eti mbụk ntre? Obio Ubọn̄ Abasi edi ukara eke heaven. Enye edi ata ọsọn̄urua n̄kpọ ọnọ Jehovah, koro edibe ke emi enye anam enyịn̄ esie asana, odororede kpukpru esuene oro ẹdoride enye efep. Obio Ubọn̄ edi n̄kpọutom oro Jehovah edidade anam ẹnam uduak esie ke isọn̄ kpa nte ẹnamde ke heaven. Ntak edi oro Jesus ekekpepde nnyịn ndibọn̄ akam mban̄a Obio Ubọn̄ Abasi ndidi onyụn̄ akpakde nnyịn ndinịm enye akpa ke uwem nnyịn. (Matthew 6:9, 10, 33) Nte afo omokụt ntak edide akpan n̄kpọ ntre ọnọ Jehovah nte nnyịn ikpep mbon en̄wen iban̄a Obio Ubọn̄ esie?

N̄kpọ-Ata edi Idịghe Ndodobi Mbiomo

4. Didie ke ẹkeme ndinam an̄wan̄a nte ke mbiomo nnyịn ndikwọrọ eti mbụk idịghe ndodobi mbiomo?

⁴ Nte edi ndodobi mbiomo ndikwọrọ eti mbụk emi? Ke akpanikọ idịghe! Ke ndinam an̄wan̄a: Ete enyene mbiomo ndinọ ubon esie n̄kpọ obụkidem. Nditre ndinam ntre edi ukem nte edikan̄ mbuọtidem Christian. Apostle Paul ekewet ete: “Owo eke mîtịmke n̄kpọ inọ orụk esie, akpan-akpan mbon ufọk esie, esịn̄e nsa ye mbuọtidem, onyụn̄ ọdiọk akan owo eke mînịmke ke akpanikọ.” (1 Timothy 5:8) Edi nte mbiomo oro edi ndodobi mbiomo ọnọ eren Christian? Idịghe edieke enye amade ubon esie, koro ke utọ idaha oro ọdọn̄ enye ndinọ mmọ n̄kpọ.

5. Okposụkedi utom ukwọrọikọ ye edinam mbet edide mbiomo, ntak emi nnyịn ikpadatde esịt nditiene mbuana ke enye?

⁵ Ukem ntre, utom edikwọrọ ikọ ye edinam mbet edi mbiomo, n̄kpọ oro ẹyomde, emi uwem nnyịn ọkọn̄ọde. Paul ekesịn enye ke usụn̄ emi: “Utom oro obiomo mi ke idem nte n̄kpọ eke nnyenede ndinam; koro idifọnke fọn inọ mi edieke mmen̄kwọrọke gospel.” (1 Corinth 9:16; men Ezekiel 33:7-9 domo.) Nte ededi, se inụkde nnyịn ndikwọrọ ikọ edi ima, idịghe n̄kukụre sia anade ẹnam. Nte ata akpan n̄kpọ, nnyịn imama Abasi, edi nnyịn imama mme mbọhọidụn̄ nnyịn n̄ko, ndien nnyịn imọfiọk nte edide akpan n̄kpọ mmọ ndikop eti mbụk. (Matthew 22:37-39) Enye ọnọ mmọ idotenyịn kaban̄a ini iso. Obio Ubọn̄ Abasi ọyọsọp enen̄ede ukwan̄ikpe, osion̄o kpukpru ufịk efep, onyụn̄ anam emem ye edidianakiet odu—kpukpru ẹmi ẹdidi kaban̄a nsinsi edidiọn̄ ẹnọ mbon oro ẹsụkde ibuot ẹnọ edinen ukara esie. Nte nnyịn ikopke idatesịt, ih ikopke nduaidem, ndibuana utọ eti mbụk oro ye mbon en̄wen?—Psalm 110:3.

6. Ntak emi utom ukwọrọikọ ye edinam mbet enen̄erede odori n̄kpọ-ata?

⁶ Ke ukem ini oro, utom edikwọrọ ikọ ye edinam mme mbet emi odori ata n̄kpọ-ata. Mme owo ẹdi nsio nsio. Kpukpru owo inyeneke ukem udọn̄ m̀mê ukeme. Ndusụk owo ẹka n̄wed ẹka anyan, ke adan̄aemi ndusụk owo ẹnyenede esisịt ifiọkn̄wed. Ukotn̄wed—emi ke akpa ẹkesidade nte edinam ini nduọkodudu oro ẹmade—idahaemi ẹwak ndida enye nte ọkpọsọn̄ utom. Ifu ukotn̄wed, emi ẹkabarede nte “edu m̀mê ukeme edikeme ndikot n̄wed edi ẹnanade udọn̄ ndinam ntre,” edi mfịna emi ọkọride-kọri, idem ke mme idụt oro ẹnamde inua ẹban̄a n̄kokon̄ idaha ifiọkn̄wed. Didie, ndien, ke nnyịn ikeme ndin̄wam mme owo oro ẹnyenede mme utọ nsio nsio idaha ye udọn̄ ẹmi ndikpep se Abasi oyomde?—Men 1 Corinth 9:20-23 domo.

Ẹtịm Idem Mfọn Mfọn Man Ẹn̄wam Mbon En̄wen

7. Didie ke “asan̄autom emi anamde akpanikọ, onyụn̄ enyenede ọniọn̄” etịm nnyịn idem man in̄wam mbon en̄wen ẹkpep mme n̄kpọ oro Abasi oyomde?

⁷ Edi mmemmem n̄kpọ ndinam ọkpọsọn̄ utom edieke afo enyenede nnennen n̄kpọutom m̀mê ukwakutom. N̄kpọn̄ ẹkeme ndifiak ndiọn̄ m̀mê idem ndikpụhọ n̄kpọutom oro ọfọnde ndida nnam akpan utom kiet mfịn ke ntak oro mme udọn̄ ẹkpụhọrede. Ukem oro ke edi ye utom ẹnọde nnyịn nditan̄a etop aban̄ade Obio Ubọn̄ Abasi. Ke ediwak isua ẹmi ẹbede, “asan̄autom emi anamde akpanikọ, onyụn̄ enyenede ọniọn̄” ọmọnọ nnyịn nnennen n̄kpọutom, kpa mme n̄wed oro ẹtịmde san̄asan̄a ndida nnịm mme ukpepn̄kpọ Bible. (Matthew 24:45) Ẹtịm nnyịn idem ke ntem ndin̄wam mme owo ẹtode “kpukpru obio ye . . . idụt ye usem” ndikpep mme n̄kpọ oro Abasi oyomde. (Ediyarade 7:9) Ke ini ke ini, ẹsinọ mbufa n̄kpọutom man ẹda ẹkekem ye mme udọn̄ oro ẹkpụhọrede ke an̄wautom ererimbot. Ẹyak nnyịn ikere iban̄a ibat ibat uwụtn̄kpọ.

8. (a) Nso udeme ke n̄wed oro “Yak Abasi Edi Akpanikö” ekenyene ke nditat utom unọ ukpep ke Bible? (b) Ewe n̄kpọutom kaban̄a utom ukpep Bible ke ẹkenọ ke 1968, ndien didie ke ẹketịm enye ke san̄asan̄a usụn̄? (c) Didie ke n̄wed Akpanikö akan̄wam ke utom edinam mbet?

⁸ Ọtọn̄ọde ke 1946 esịm 1968, ẹkekama n̄wed oro “Yak Abasi Edi Akpanikö” nte okopodudu n̄kpọutom ndinọ ukpep ke Bible, ndien ẹkemịn̄ n̄kpọ nte idem 19,250,000 ke usem 54. Ke ẹma ẹkesio ke 1968, ẹma ẹkama n̄wed Akpanikö oro Adade Osim Nsinsi Uwem ke ediwak isua ndikpep Bible uforo uforo ye mbon oro ẹnyenede udọn̄. Ke akpa, ekesidi ọsọ n̄kpọ mme owo ndikpep n̄kpọ ye Mme Ntiense Jehovah ke ediwak isua ye unana edina baptism. Edi ẹketịm n̄kpọutom emi man ẹbuan eyen ukpepn̄kpọ, ẹsịnde udọn̄ ẹnọ enye ndida se enye ekpepde nsịn ke edinam. Nso ikedi utịp? N̄wed oro Jehovah’s Witnesses—Proclaimers of God’s Kingdom ọdọhọ ete: “Ke isua utom ita oro ọtọn̄ọde ke September 1, 1968, onyụn̄ etrede ke August 31, 1971, ofụri owo 434,906 ẹkena baptism—ẹwakde utịm ikaba ẹkan ibat oro ẹkenade baptism ke isua utom ita oro ẹkebede!” Tọn̄ọde nte ẹkesio enye, ẹsuan n̄wed Akpanikö ke usụn̄ oro akpade owo idem—se iwakde ikan 107,000,000 ke usem 117.

9. Ewe san̄asan̄a ikpehe ke n̄wed Ndidu Uwem ke Nsinsi enyene, ndien nso odudu ke enye ekenyene ke idem udịm mme anditan̄a Obio Ubọn̄?

⁹ Ke 1982 n̄wed oro Afo Emekeme Ndidu Uwem ke Nsinsi ke Paradise ke Isọn̄ ama akabade edi akpan n̄wed oro ẹdade ẹnịm mme ukpepn̄kpọ Bible. N̄kpọutom emi enyene se ibede ndise 150 oro ẹkụtde ke enyịn, kiet kiet enyenede uwetn̄kpọ oro enyenede se ọwọrọde emi owụtde akpan n̄kpọ oro mme ndise oro ẹkpepde ke ibio ibio usụn̄. Nsiondi Utom Obio Ubọn̄ Nnyịn eke February 1983 ọkọdọhọ ete: “Ke n̄kpọ nte isua 20 emi n̄wed ‘Yak Abasi Edi Akpanikö’ ekedide akpan n̄wed ukpepn̄kpọ nnyịn (ọtọn̄ọde ke 1946 osịm ufọt ufọt mme isua ẹtọn̄ọde ke 1960), se ibede mbufa mme asuanetop Obio Ubọn̄ 1,000,000 ẹma ẹdụk ke udịm nnyịn. Ndien ẹma ẹdian mme asuanetop 1,000,000 efen ke ini n̄wed Akpanikọ Oro Adade Osim Nsinsi Uwem akakabarede edi akpan n̄wed ukpepn̄kpọ nnyịn ke ẹma ẹkesio enye ke 1968. Ye edikama obufa n̄wed ukpepn̄kpọ nnyịn emi, [Afo Emekeme Ndidu Uwem ke Nsinsi ke Paradise ke Isọn̄], nte nnyịn iyekụt ukem n̄kọri oro ke udịm mme asuanetop Obio Ubọn̄? Ke akpanikọ iyekụt, edieke emi edide uduak Jehovah!” Ana in̄wan̄în̄wan̄ nte ke ekedi uduak Jehovah, koro ọtọn̄ọde ke 1982 esịm 1995, ẹma ẹdian se ibede owo 2,700,000 ke udịm mme anditan̄a Obio Ubọn̄!

10. Ewe obufa n̄kpọutom ke ẹkesio ke 1995, ndien ntak emi enye ekpenyenede ndin̄wam nditọ ukpepn̄kpọ Bible ẹnam ata usọp usọp n̄kọri eke spirit?

¹⁰ “Idọk okpon, edi mme anam-utom iwakke,” ntre ke Jesus eketịn̄. (Matthew 9:37) Ke akpanikọ, idọk okpon. Ekese ke osụk odu ndinam. Ke ndusụk idụt ẹsisesịn mme owo enyịn̄ ke udịm ẹtie ẹbet ukpepn̄kpọ Bible. Ntre ye uduak edisuan ifiọk Abasi usọp usọp n̄kan, ke 1995 “asan̄autom emi anamde akpanikọ, onyụn̄ enyenede ọniọn̄” ama osio obufa n̄kpọutom, kpa n̄wed oro enyenede page 192 ẹkotde Ifiọk Oro Adade Osịm Nsinsi Uwem. Ọsọn̄urua n̄kpọutom emi iwụkke ntịn̄enyịn ke nsunsu ukpepn̄kpọ. Enye ekpep akpanikọ Bible ke in̄wan̄în̄wan̄ usụn̄. Ẹdori enyịn nte ke enye ayan̄wam nditọ ukpepn̄kpọ Bible ẹnam ata usọp usọp n̄kọri eke spirit. N̄wed Ifiọk enyenyene odudu ke an̄wautom ererimbot ye idem 45,500,000 ẹmi ẹmịn̄de ke usem 125 ẹnyụn̄ ẹkade iso ndikabade nsịn ke usem 21 efen efen.

11. Ewe enyene-uforo n̄kpọutom ke ẹkesio man an̄wam ke ndikpep mbon oro mîfiọkke n̄wed m̀mê oro mîkemeke ndikot n̄wed ọfọn, ndien didie ke enye enyene n̄wọrọnda uforo ke ndutịm unọ ukpep nnyịn eke ofụri ererimbot?

¹¹ Ke ini ke ini, ‘ofụn anam-akpanikọ’ esinọ n̄kpọutom oro ẹtịmde ẹnọ akpan otuowo, m̀mê esisịt ibat owo. Ke uwụtn̄kpọ, nso kaban̄a mme owo oro ẹkemede ndiyom san̄asan̄a un̄wam ke ntak ido obio m̀mê idaha ido ukpono mmọ? Didie ke nnyịn ikeme ndin̄wam mmọ ẹkpep mme n̄kpọ oro Abasi oyomde? Ke 1982 nnyịn ima ibọ nnennen n̄kpọ oro nnyịn ikoyomde—kpa ediye uduot ekpri n̄wed oro enyenede page 32 Dara Uwem ke Isọn̄ ke Nsinsi! N̄wed emi enyenede ediwak ndise mi edi n̄kpọutom oro enyenede uforo ke ndikpep mbon oro mîfiọkke n̄wed m̀mê oro mîkemeke ndikot n̄wed ọfọn. Enye esịne mme akpan ukpepn̄kpọ N̄wed Abasi ẹwụtde ke mmemmem usụn̄ oro ẹkemede ndisọp n̄n̄wan̄a owo. Tọn̄ọ nte ẹkesio enye, ediye uduot ekpri n̄wed Uwem ke Isọn̄ etịp n̄kpọ akamba akamba esịn ke ndutịm unọ ukpep ofụri ererimbot nnyịn. Ẹmịn̄ se ibede idem 105,100,000 ke usem 239, anamde enye edi n̄wed oro Watch Tower Society emịn̄de mfịn ẹmi ẹkabarede ntatara ntatara ẹkan!

12, 13. (a) Ọtọn̄ọde ke 1990, ‘ofụn anam-akpanikọ’ osio ewe obufa usụn̄ edida nsịm ntatara otuowo edi? (b) Didie ke nnyịn ikeme ndikama mme vidio N̄ka ke utom ukwọrọikọ nnyịn? (c) Ewe obufa n̄kpọutom ke ẹkesio ke ndondo emi man an̄wam nnyịn ke utom nnyịn eke edinam mbet?

¹² Ke adianade ye mme n̄wed oro ẹmịn̄de-mịn̄, ọtọn̄ọde ke 1990, ‘ofụn anam-akpanikọ’ ọnọ nnyịn n̄kpọ unọ ukpep oro owụtde obufa usụn̄ ndisịm otuowo oro atarade akan—mme kaset vidio. Ke October isua oro, ẹma ẹsio vidio a-minit 55 oro Jehovah’s Witnesses—The Organization Behind the Name—kpa akpa vidio oro akanam Watch Tower Society osiode. Ediye, ọnọ-ukpep ndise, emi odude ke usem 35, owụt esop ofụri ererimbot eke ikọt Jehovah oro ẹyakde idem ẹnọ nte ẹnamde ewụhọ Jesus oro nte ẹtan̄a eti mbụk ke ofụri isọn̄. Ẹtịm vidio emi akpan akpan man an̄wam ke utom unam mbet nnyịn. Mme asuanetop Obio Ubọn̄ ikabiatke ndomo esisịt ini ke ndida obufa n̄kpọutom emi nnam utom ukwọrọikọ. Ndusụk owo ẹma ẹsịn enye ke ekpat n̄wed mmọ, ẹben̄ede idem kpukpru ini ndiwụt m̀mê ndinọ mbon oro ẹnyenede udọn̄ ke ebuọt. Esisịt ini ke ẹma ẹkesio enye, esenyịn oro asan̄ade-san̄a ama ewet ete: “Mme vidio ẹkabade ẹdi usụn̄ edida nsịm esịt ye ekikere ediwak miliọn owo ke ọyọhọ isua ikie 21, ntre idotenyịn nnyịn edi nte ke vidio emi edi sụk akpa ke otu ediwak vidio oro N̄ka edidade anam utom Obio Ubọn̄ eke ofụri ererimbot aka iso.” Ke akpanikọ, ẹsion̄o ediwak vidio ẹdi, esịnede udịm oro enyenede ikpehe ita The Bible—A Book of Fact and Prophecy ye Jehovah’s Witnesses Stand Firm Against Nazi Assault. Edieke mme vidio N̄ka ẹdude ke usem fo, nte afo amada mmọ anam n̄kpọ ke utom ukwọrọikọ fo?a

¹³ Ke ndondo emi ẹma ẹsio obufa n̄kpọutom, ediye uduot ekpri n̄wed oro Nso ke Abasi Oyom Oto Nnyịn?, man an̄wam nnyịn ke utom nnyịn ndinam mme mbet. Ntak ẹkemịn̄de enye? Didie ke ẹkeme ndikama enye?

Ndidụn̄ọde Obufa N̄kpọutom

14, 15. Ẹtịm ediye uduot ekpri n̄wed Oyom ẹnọ mmanie, ndien nso isịne ke enye?

¹⁴ Ẹtịm obufa n̄wed oro Nso ke Abasi Oyom Oto Nnyịn? ẹnọ mme owo oro ẹma ẹkenenịm Abasi ke akpanikọ ẹnyụn̄ ẹnyenede ukpono ẹnọ Bible. Mme esenyịn oro ẹsan̄ade-san̄a ọkọrọ ye mme isụn̄utom oro ẹnọde ukpep ke Gilead ẹmi ẹnyenede ediwak isua ifiọkutom ke mme idụt oro ẹtọn̄ọde-tọn̄ọ uforo ẹken̄wam ke nditịm ediye uduot ekpri n̄wed emi. Enye esịne ọyọhọ ọyọhọ ndutịm ukpepn̄kpọ, otụkde mme akpan ukpepn̄kpọ Bible. Mme ikọ esie ẹdi inem inem, mmemmem, ye in̄wan̄în̄wan̄. Ke ukem ini oro, owo inamke uwetn̄kpọ esie emem akaha. Enye isịneke “mmọn̄eba” kpọt edi n̄ko “ọkpọsọn̄ udia” eke Ikọ Abasi ke usụn̄ oro edin̄wan̄ade ata ediwak owo.—Mme Hebrew 5:12-14.

¹⁵ Ke mme isua ndondo emi mme asuanetop Obio Ubọn̄ ke nsio nsio idụt ẹma ẹbụp ẹban̄a utọ n̄wed oro. Ke uwụtn̄kpọ, n̄kọk itieutom Watch Tower Society ke Papua New Guinea ekewet ete: “Mme ukpepn̄kpọ ido ukpono oro ẹnyenede ntuaha ẹtetịmede mme owo. Mmọ ẹyom ibio ibio ikọ akpanikọ, ẹmi ẹdade ediwak itien̄wed Bible ẹsọn̄ọ oro mmọ ẹkemede ndise ke Bible mmọ. Mmọ ẹyom ẹtịn̄ in̄wan̄în̄wan̄ ye ke nnennen usụn̄ se Abasi oyomde oto mme ata Christian ndien m̀mê ewe mme ido obio ye mme edinam ke enye mînyịmeke.” Ediye uduot ekpri n̄wed Oyom edi nnennen se nnyịn iyomde man in̄wam utọ mbon oro ẹkpep mme n̄kpọ oro Abasi oyomde.

16. (a) Mmanie akpan akpan ẹkeme ndibọ ufọn nto mmemmem usụn̄ oro ẹnamde mme n̄kpọ ẹn̄wan̄a ke obufa ediye uduot ekpri n̄wed emi? (b) Didie ke mbon oro ẹdude ke efakutom fo ẹkeme ndibọ ufọn nto ediye uduot ekpri n̄wed Oyom?

¹⁶ Didie ke afo ekeme ndikama obufa n̄kpọutom emi? Akpa, ẹkeme ndikama enye n̄kpep n̄kpọ ye mme owo oro ẹnyenede mfịna ukot n̄wed m̀mê oro mînyeneke udọn̄ ndikot n̄wed.b Mme utọ owo oro ẹkeme ndibọ ufọn nto mme mmemmem utịn̄ikọ ẹdude ke ediye uduot ekpri n̄wed emi. Ke ẹma ẹkedụn̄ọde n̄wed emi ẹkebemde iso ẹtịm, mme n̄kọk itieutom Watch Tower ẹma ẹwet se itienede emi: “Ediye uduot ekpri n̄wed emi eyenen̄ede enyene ufọn ke ediwak ikpehe ke mme idụt oro mme owo mînyeneke udọn̄ ndikot n̄wed ntatara ntatara.” (Brazil) “Ata ediwak mme ọwọrọ idụn̄ ẹdu ẹmi mîkemeke ndikot usem emana mmọ ndien emi osụk edide ọkpọsọn̄ n̄kpọ ọnọ mmọ ndikot French. Ẹkeme ndikama ediye uduot ekpri n̄wed emi nte n̄kpọ un̄wam ke ndikpep n̄kpọ ye utọ mbon oro.” (France) Nte afo emekeme ndikere mban̄a mme owo ke efakutom fo ẹmi ẹkemede ndibọ ufọn nto ediye uduot ekpri n̄wed Oyom?

17. Ke nso usụn̄ ke obufa ediye uduot ekpri n̄wed emi ekeme ndinyene ufọn ke ediwak idụt, ndien ntak-a?

¹⁷ Udiana, ke ediwak idụt ediye uduot ekpri n̄wed emi ekeme ndinyene ufọn ke nditọn̄ọ ukpepn̄kpọ Bible ye mme owo oro ẹbakde Abasi inamke n̄kpọ m̀mê mmọ ẹfiọk n̄wed adan̄a didie. Nte ededi, ẹkpenyene ndisịn ukeme nditọn̄ọ ukpepn̄kpọ ke n̄wed Ifiọk Oro Adade Osịm Nsinsi Uwem. Edi ke ndusụk idaha ekeme ndinen̄ede ndi mmemmem n̄kpọ nditọn̄ọ ukpepn̄kpọ ke ediye uduot ekpri n̄wed. Ekem ke ini oro odotde, ẹkpenyene ndiwọn̄ọde ukpepn̄kpọ oro nsịn ke n̄wed Ifiọk, akpan un̄wam ukpepn̄kpọ nnyịn oro ẹmekde. Kaban̄a edikama ediye uduot ekpri n̄wed Oyom, mme n̄kọk itieutom Watch Tower ẹkewet ẹte: “Nditọn̄ọ mme ukpepn̄kpọ Bible edi ọkpọsọn̄ n̄kpọ, ndien etie nte mme ifet editọn̄ọ ukpepn̄kpọ ẹsifọn ẹkan ke ini mme asuanetop ẹtọn̄ọde ye ediye uduot ekpri n̄wed.” (Germany) “Utọ ediye uduot ekpri n̄wed enyeemi eyenen̄ede enyene uforo ke nditọn̄ọ mbufa ukpepn̄kpọ Bible, ẹmi ndien ẹdikemede ndika iso ke n̄wed Ifiọk.” (Italy) “Okposụkedi mbon Japan ẹnyenede n̄kokon̄ idaha ifiọkn̄wed, ata ediwak ẹnyene ata esisịt ifiọk ẹban̄a Bible ye mme akpan ukpepn̄kpọ esie. Ediye uduot ekpri n̄wed emi ekpenyene ndidi eti utọ-ukot nnọ n̄wed Ifiọk.”—Japan.

18. Nso ke nnyịn ikpenyene nditi mban̄a edisịm mme n̄kpọ oro Abasi oyomde?

¹⁸ Mme n̄kọk itieutom N̄ka ke ofụri ererimbot ẹma ẹsịn eben̄e ẹyom n̄wed emi, ndien ẹma ẹnọ unyịme ndikabade enye nsịn ke usem 221. Akpakam obufa n̄wed emi enyene ufọn ke ndin̄wam nnyịn in̄wam mbon en̄wen ẹkpep se Jehovah Abasi oyomde oto mmọ. Ke n̄kan̄ nnyịn, ẹyak nnyịn iti ite ke ndisịm mme n̄kpọ oro Abasi oyomde, esịnede ewụhọ nte ẹkwọrọ ikọ ẹnyụn̄ ẹnam mme mbet, ọnọ nnyịn ọsọn̄urua ifet ndiwụt Jehovah adan̄a nte nnyịn imade enye. Ih, se Abasi oyomde oto nnyịn idịghe ndodobi mbiomo. Enye edi mfọnn̄kan usụn̄ ndidu uwem!—Psalm 19:7-11.

[Mme Ikọ idakisọn̄]

Nte Afo Emekeme Ndinam An̄wan̄a?

◻ Ke ewe adiana-iba utom ke Jehovah oyom mme asan̄autom esie ẹbuana?

◻ Ntak emi mbiomo nnyịn ndikwọrọ ikọ nnyụn̄ nnam mme mbet mîdịghe ndodobi mbiomo inọ nnyịn?

◻ “Asan̄autom emi anamde akpanikọ, onyụn̄ enyenede ọniọn̄” osion̄o mme n̄kpọutom ewe edi man ẹkama ke utom nnyịn eke edikwọrọ ikọ ye edinam mbet?

◻ Ẹtịm ediye uduot ekpri n̄wed Oyom ẹnọ mmanie, ndien didie ke nnyịn ikeme ndikama enye ke utom ukwọrọikọ nnyịn?

[Ndise ke page 24]

Utom ukwọrọikọ nnyịn ye edinam mbet idịghe ndodobi mbiomo

[Ndise ke page 26]

“Yak Abasi Edi Akpanikö” (1946, edifiak mmịn̄ 1952): 19,250,000 ke usem 54 (ẹwụt eke Ikọmbakara)

“Akpanikö oro Adade osim Nsinsi Uwem” (1968): 107,000,000 ke usem 117 (ẹwụt eke French)

“Afo Emekeme Ndidu Uwem ke Nsinsi ke Paradise ke Isọn̄” (1982): 80,900,000 ke usem 130 (ẹwụt eke Russian)

“Ifiọk Oro Adade Osịm Nsinsi Uwem” (1995): 45,500,000 ke usem 125 (ẹwụt eke German)