Edu Christian Ndikama Isenowo Ke Ererimbot Emi Abaharede
“Ntre ke ana nte nnyịn idara mmọ ẹmi ẹtiede ntem, man nnyịn itiene akpanikọ inam n̄kpọ inọ Abasi.”—3 JOHN 8.
1. Ewe mme enọ oro ẹnen̄erede ẹyom ke Andibot ọnọ ubonowo?
“OWO [inyeneke] eti n̄kpọ ke idak utịn, ke mîbọhọke ndidia n̄kpọ, nnyụn̄ n̄n̄wọn̄, nnyụn̄ ndara: ndien edi emi edidiana ye enye ke utom esie, ke ofụri uwem esie emi Abasi ọnọde enye ke idak utịn.” (Ecclesiastes 8:15) Ye mme ikọ ẹmi ọkwọrọikọ Hebrew eke eset emi asian nnyịn ete ke Jehovah Abasi iyomke mme edibotn̄kpọ esie ẹdide owo ẹdara ẹnyụn̄ ẹkop inemesịt kpọt edi n̄ko ọnọ mme n̄kpọ ndida nnam ntre. Ke ofụri mbụk owo etie nte ọsọ udọn̄ oro mme owo ke kpukpru ebiet ẹnyenede edi ndidara uwem mmọ nnyụn̄ mbọ nduọkodudu.
2. (a) Didie ke ubonowo ẹbiat se Jehovah akaduakde ọnọ mmọ? (b) Nso idi utịp?
2 Mfịn nnyịn idu uwem ke n̄kaowo unọ idem inemesịt emi ediyom unọ idem inemesịt ye nduọkodudu akarade ekikere mme owo. Ata ediwak owo ẹkabade ẹdi “mme ama idem, . . . ẹma mbre ẹkan Abasi,” nte Bible ekebemde iso etịn̄. (2 Timothy 3:1-4) Nte ededi, emi edi akwa editịmede se Jehovah Abasi akaduakde. Ke ini ediyom nduọkodudu akabarede edi utịtmbuba ke idemesie, m̀mê ke ini ediyụhọ udọn̄ idemowo akabarede edi akpan uduak ke uwem, ata uyụhọ isidụhe, ndien ‘kpukpru n̄kpọ ẹkabade ẹdi ikpîkpu ye idomo eke mîwọrọke usụn̄.’ (Ecclesiastes 1:14; 2:11) Ke ntak emi ererimbot ọyọhọ ye mme owo oro ẹkopde ndobo ẹnyụn̄ ẹkụtde edikpu, emi, n̄ko, adade okosụn̄ọ ke ediwak mfịna ke n̄kaowo. (Mme N̄ke 18:1) Mme owo ẹkabade ẹnyene eyịghe ẹban̄a kiet eken ẹnyụn̄ ẹbahade ke ntak orụk, ekpụk, idaha n̄kaowo, ye idaha ndutịm uforo.
3. Didie ke nnyịn ikeme ndinyene ata idatesịt ye uyụhọ?
3 N̄kpọ ẹkpekpụhọrede didie ntem edieke mme owo ẹkpekpebede usụn̄ emi Jehovah anamde n̄kpọ ye mbon en̄wen—edifọn ido, editat ubọk, edikama isenowo! Enye anam an̄wan̄a ete ke ukpọhọde ata inemesịt idịghe nnyịn ndidomo ndiyụhọ mme udọn̄ idem nnyịn. Utu ke oro, ukpọhọde edi emi: “Ekese inemesịt odu ke ndinọnọ akan nte odude ke ndibọbọ.” (Utom 20:35, NW) Man inyene ata idatesịt ye uyụhọ, ana nnyịn ikan mme ubiọn̄ọ ye mme ubahade oro ẹkemede ndibiọn̄ọ nnyịn. Ndien ana nnyịn inam enye atara osịm mbon oro ẹnamde n̄kpọ Jehovah ọtọkiet ye nnyịn. Edi akpan n̄kpọ ete nnyịn inam item emi: “Ntre ke ana nte nnyịn idara mmọ ẹmi ẹtiede ntem, man nnyịn itiene akpanikọ inam n̄kpọ inọ Abasi.” (3 John 8) Ndiwụt mbon oro ẹdotde edu edikama isenowo, ke udomo oro mme idaha nnyịn ẹyakde, enyene ufọn ke usụn̄ iba—enye ada ufọn ọsọk mme andinọ ye mme andibọ. Mmanie, ndien, ẹsịne ke otu mbon oro ẹdotde ẹmi nnyịn ikpenyenede ‘ndidara’?
“Ndisan̄a Nse Mme Ebeakpa ye Nditọakpa”
4. Nso ukpụhọde ke mme itie ebuana ubon ke ẹkụt idem ke otu ndusụk ikọt Jehovah?
4 Mme ubon oro ẹnyenede nsọn̄ọnda ye mme ndọ oro ẹdude ke inemesịt iwakke mfịn. Ibat usiondọ oro ọdọkde-dọk ye n̄kọri ke ibat mme eka oro mîdọhọ ndọ ke ofụri ererimbot okpụhọde idaha ubon akamba akamba. Nte utịp, ediwak owo oro ẹkabarede ẹdi Mme Ntiense Jehovah ke mme isua ndondo emi ẹto mme ubon oro ẹwụrede. Mmọ ẹdi mbon oro ẹsiode ndọ m̀mê ẹdianarede ẹkpọn̄ nsan̄andọ mmọ, mîdịghe mmọ ẹdụn̄ ke mme ubon oro edide ete m̀mê eka kpọt ese aban̄a. Ke adianade do, nte Jesus ekebemde iso etịn̄, akpanikọ oro enye ekekpepde okosụn̄ọ ke ediwak ubon ndibahade.—Matthew 10:34-37; Luke 12:51-53.
5. Nso ke Jesus eketịn̄ emi ekemede ndidi n̄kpọ nsịnudọn̄ nnọ mbon oro ẹtode mme ubon ẹmi ẹbaharede?
5 Enem nnyịn esịt ndikụt nte mbufa owo ẹsọn̄ọde ẹda ẹnọ akpanikọ, ndien nnyịn imesiwak ndidọn̄ mmọ esịt ye ọnọ-nsịnudọn̄ un̄wọn̄ọ Jesus emi: “Ke akpanikọ ke ndọhọ mbufo, baba owo kiet idụhe, eke ọkọkpọn̄de ufọk, m̀mê nditọ-eka iren, m̀mê nditọ-eka iban, m̀mê eka, m̀mê ete, m̀mê nditọ, m̀mê isọn̄, ke ntak Mi ye ntak gospel, emi mîdibọhọ n̄kpọ utịm ikikie ke emi ke ini emi, mme ufọk, ye nditọ-eka iren, ye nditọ-eka iban, ye mme eka, ye nditọ, ye isọn̄, ikọrọ ye ukụt: ye nsinsi uwem ke eyo emi edidide.”—Mark 10:29, 30.
6. Didie ke nnyịn ikeme ndidi ‘nditọete iren, nditọete iban, mme eka, ye nditọ’ nnọ “nditọ-akpa ye mme ebe-akpa” ẹmi ẹdude ke otu nnyịn?
6 Nte ededi, mmanie ẹdi ‘nditọeka iren ye nditọeka iban ye mme eka ye nditọ ẹmi’? Ndikam n̄kụt otu ediwak owo ke Ufọkmbono Obio Ubọn̄, ediwak ini ẹwakde ẹsịm ikie m̀mê ẹkande oro, ẹmi ẹkotde idemmọ nditọete iren ye nditọete iban inamke owo ekere ke mbuari nte ke mmọ ẹdi nditọete esie iren, nditọete esie iban, mme eka, ye nditọ. Kere ban̄a emi: Mbet oro James eti nnyịn ete ke man Jehovah onyịme utuakibuot nnyịn, ana nnyịn ‘isan̄a ise nditọakpa ye mme ebeakpa ke ukụt mmọ, inyụn̄ ikpeme idem ke idiọkn̄kpọ emi odude ke ererimbot.’ (James 1:27) Oro ọwọrọ ete ke inaha nnyịn iyak mme edu n̄kohodeidem uforo ererimbot emi m̀mê idaha ke n̄kaowo anam iberi usụn̄ mbọm nnyịn ibaha mme utọ “nditọ-akpa ye mme ebe-akpa” oro. Utu ke oro, ana inam usio-ukot ndinam itie ebuana ye edu edikama isenowo nnyịn ẹtara ẹsịm mmọ.
7. (a) Nso inen̄ede idi akpan uduak edifọn ido ye “nditọ-akpa ye mme ebe-akpa”? (b) Mmanie n̄ko ẹkeme ndibuana ke ediwụt edu edikama isenowo Christian?
7 Ndiwụt “nditọ-akpa ye mme ebe-akpa” edu edikama isenowo iwọrọke ndinọ se inanade mmọ ke n̄kan̄ eke obụkidem kpukpru ini. Mme ubon oro ẹdide ete m̀mê eka kpọt ese aban̄a m̀mê mme ubon oro ẹbaharede ke ntak ido ukpono inen̄ekede inyene mfịna okụk. Nte ededi, eti ebuana ọtọkiet, idaha ubon oro odude, edibuana ye mme owo oro ẹdude ke nsio nsio isua emana, ye edibuana nti n̄kpọ eke spirit—mmọemi ẹdi mme ikpehe uwem oro ẹsọn̄de urua. Ntem, ke itide ite ke akpan n̄kpọ idịghe nte idaha oro okponde, edi edi edu ima ye edidianakiet oro odude, ọfọn didie ntem nte, ke ndusụk ini, idem “nditọ-akpa ye mme ebe-akpa” ẹkeme ndibuana ke ndiwụt ekemmọ mme Christian edu edikama isenowo!—Men 1 Ndidem 17:8-16 domo.
Nte Isenowo Ẹdu ke Otu Nnyịn?
8. Nso ukpụhọde ke ẹkụt ke ediwak esop Mme Ntiense Jehovah?
8 Nnyịn idu uwem ke ini emi ata ediwak owo ẹwọrọde idụn̄. World Press Review ọdọhọ ete: “Se iwakde ikan owo miliọn 100 ke ofụri ererimbot ẹdụn̄ ke mme idụt oro mîdịghe obio emana mmọ, ndien ẹnyịk owo miliọn 23 ndikpụhọde itieidụn̄ ke mme idụt mmọ.” Utịp kiet osụn̄ọde oto emi edi nte ke ediwak ikpehe, akpan akpan ke ikpọ obio, mme esop ikọt Jehovah oro mbon orụk m̀mê idụt kiet ẹkedide n̄wakn̄kan inikiet ko idahaemi ẹdisịne mme owo ẹtode nsio nsio ikpehe ererimbot. Ekeme ndidi emi edi ntre ke ebiet emi afo odude. Nte ededi, didie ke nnyịn ikpese “mme ododụn̄” ye “isenowo” ẹmi, nte ererimbot ekemede ndikot mmọ, ẹmi usem, ido edinam, ye usụn̄uwem mmọ ẹkemede ndidi isio ye eke nnyịn?
9. Ewe akpan mmeme ekeme ndikọk afia nnọ nnyịn kaban̄a nte nnyịn isede “mme ododụn̄” ye “isenowo” ẹmi ẹdụkde ẹdi esop Christian?
9 Ke nditịn̄ ke mmemmem usụn̄, inaha nnyịn iyak ntụhọ edikop ndịk mban̄a isenowo anam nnyịn ikere ke nnyịn nte ededi imodot ndinyene ifet edifiọk akpanikọ ikan mbon oro ẹtode esen idụt m̀mê inua-okot idụt ukpono ndem; m̀mê nnyịn ndikere ke mbufa owo ẹmi ẹbiat ibet ke ndida Ufọkmbono Obio Ubọn̄ m̀mê mme inyene eken nnam n̄kpọ. Apostle Paul ekenyene nditi mme Christian Jew eke akpa isua ikie, ẹmi ẹkenyenede utọ ekikere oro, nte ke nditịm ntịn̄ baba owo kiet idotke; edi mfọnido Abasi oro owo mîdotke akanam owo ekededi enyene edinyan̄a. (Rome 3:12, 23, 24) Nnyịn ikpenyene ndidat esịt nte ke mfọnido Abasi oro owo mîdotke ke osịm ata ediwak owo idahaemi ẹmi, ke usụn̄ kiet m̀mê eken, ẹkebọde mmọ ifet edikop eti mbụk. (1 Timothy 2:4) Didie ke nnyịn ikeme ndiwụt nte ke ima oro inyenede inọ mmọ edi ata ima?
10. Didie ke nnyịn ikeme ndiwụt nte ke nnyịn imenen̄ede ifọn ido ye “isenowo” ẹmi ẹdude ke otu nnyịn?
10 Nnyịn imekeme nditiene item Paul emi: “Ẹdara kiet eken kpa nte Christ akadarade mbufo, man Abasi enyene ubọn̄.” (Rome 15:7) Ke ifiọkde ite ke mme owo ẹtode mme idụt m̀mê mme idaha efen ke uwem ẹsiwak ndinana mme akpan n̄kpọ eke uwem, nnyịn ikpenyene ndiwụt mmọ mfọnido ye edikere mban̄a ke ini inyenede ukeme ndinam ntre. Nnyịn ikpenyene ndidara mmọ ke ufọt nnyịn, inam n̄kpọ ye mmọ kiet kiet “nte amana ke otu mbufo,” inyụn̄ ‘ima enye nte idem nnyịn.’ (Leviticus 19:34) Ekeme ndidi emi ididịghe mmemmem n̄kpọ ndinam, edi nnyịn iyekụt unen edieke nnyịn itide item emi: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.”—Rome 12:2.
Ẹnọ Ikọt Abasi Se Inanade Mmọ
11, 12. San̄asan̄a edikere mban̄a ewe ke ẹkenọ ndusụk mme asan̄autom Jehovah ke (a) Israel eset (b) akpa isua ikie?
11 Mme Christian oro ẹkọride ẹsịm ọyọhọ idaha ẹmi ẹnamde utom ọkpọsọn̄ kaban̄a mfọnọn̄kpọ eke spirit nnyịn ẹdu ke otu mbon oro ẹnen̄erede ẹdot nnyịn iwụt edikere mban̄a ye edu edikama isenowo. Jehovah ama anam san̄asan̄a ndutịm ọnọ mme oku ye mme Levi ke Israel eset. (Numbers 18:25-29) Ke akpa isua ikie, ẹma ẹkpak mme Christian n̄ko ẹte ẹse ẹban̄a mbon oro ẹkenamde utom ẹnọ mmọ ke san̄asan̄a ifetutom. Mbụk oro ke 3 John 5-8 owụt nnyịn ke ibio ibio usụn̄ n̄kpet n̄kpet itie ebuana oro okodude ke otu mme akpa Christian.
12 Akanieren apostle John ama abat mfọnido ye ntatubọk oro Gaius okowụtde ndusụk nditọete oro ẹsan̄ade-san̄a ẹmi ẹkenọde ẹkese esop ke ata ọsọn̄urua n̄kpọ. Nditọete ẹmi—esịnede Demetrius, etiede nte enye ekemen leta ọsọk—kpukpru ẹkedi isenowo mîdịghe Gaius ikọdiọn̄ọke mmọ akanam. Edi ẹma ẹdara mmọ koro ‘mmọ ẹkewọn̄ọ ke ntak enyịn̄ Abasi.’ John esịn enye ke usụn̄ emi: “Ntre ke ana nte nnyịn idara mmọ ẹmi ẹtiede ntem, man nnyịn itiene akpanikọ inam n̄kpọ inọ Abasi.”—3 John 1, 7, 8.
13. Mmanie ke otu nnyịn mfịn akpan akpan ẹdot ndidi se ‘ẹdarade’?
13 Mfịn, ke esịt esop Jehovah, odu mbon oro ẹsịnde idem ọkpọsọn̄ ke ufọn ebuana ofụri otu nditọete. Mmọemi ẹsịne mme esenyịn oro ẹsan̄ade-san̄a, ẹmi ẹsịnde ini ye odudu mmọ ke urua ke urua ndisịn udọn̄ nnọ mme esop; mme isụn̄utom, ẹmi ẹkpọn̄de mme ubon ye mme ufan man ẹkekwọrọ ikọ ke isen idụt; mbon oro ẹnamde utom ke mme ufọkidụn̄ Bethel m̀mê mme ọfis n̄kọk itieutom, ẹmi ẹnamde utom mmọ ke unyịmesịt man ẹnọ utom ukwọrọikọ ofụri ererimbot ibetedem; ye mbon oro ẹdude ke utom usiakusụn̄, ẹmi ẹsịnde n̄kponn̄kan ini ye odudu mmọ ke utom ukwọrọikọ. Ke edide akpan n̄kpọ, mmọemi ẹnam utom ọkpọsọn̄, idịghe kaban̄a ubọn̄ m̀mê udori idemowo ekededi, edi ke ntak ima oro ẹnyenede ẹnọ itie nditọete Christian ye Jehovah. Mmọ ẹdot se nnyịn ikpebede ke ntak utuakibuot ofụri ukpọn̄ mmọ ẹnyụn̄ ẹdot se ‘ẹdarade.’
14. (a) Didie ke nnyịn ikabarede idi nti Christian ke ini nnyịn iwụtde mbon oro ẹnamde akpanikọ edu edikama isenowo? (b) Ntak emi Jesus ọkọdọhọde ete ke Mary ama emek “eti udeme”?
14 Ke ini nnyịn ‘idarade mmọ eke ẹtiede ntem,’ apostle John okowụt ete ke nnyịn “itiene akpanikọ inam n̄kpọ inọ Abasi.” Ke nditịm ntịn̄ nnyịn ikabade idi nti Christian nte utịp. Emi edi sia mme utom Christian ẹbuanade edinam eti n̄kpọ nnọ ekemmọ mme andinịm ke akpanikọ. (Mme N̄ke 3:27, 28; 1 John 3:18, NW) Mme utịp ẹdu ke usụn̄ en̄wen n̄ko. Ke ini Mary ye Martha ẹkedarade Jesus ke ufọk mmọ, Martha okoyom ndidi eti akama esen ebe ke nditịm “ediwak n̄kpọ” nnọ Jesus. Mary okowụt edu edikama esenowo ke isio isio usụn̄. Enye ‘eketie ke isọn̄ ke ukot Ọbọn̄, okop ikọ esie,’ ndien Jesus ama otoro enye ke ndikemek “eti udeme.” (Luke 10:38-41) Ndinyene nneme ye mbon oro ẹnyenede ediwak isua ifiọkutom esiwak ndidi akpan n̄kpọ udọn̄ ke mbubịteyo oro ẹdude ọtọkiet ye mmọ.—Rome 1:11, 12.
Ke Mme San̄asan̄a Ini
15. Mme akpan edinam ewe ẹkeme ndidi mme ini inemesịt nnọ ikọt Jehovah?
15 Okposụkedi mme ata Christian mîsitieneke ọsọ ido edinam m̀mê ndinịm mme usen nduọkodudu ye mme usọrọ ererimbot, mme ini ẹsidu oro mmọ ẹsisopde idem ọtọkiet ndidara itie ebuana ye kiet eken. Ke uwụtn̄kpọ, Jesus ama odụk usọrọ ndọ ke Cana onyụn̄ etịp n̄kpọ esịn ke idara usọrọ oro ebe ke ndinam akpa utịben̄kpọ esie do. (John 2:1-11) Kpasụk ntre mfịn, ikọt Jehovah ẹsinyene mme ini inemesịt oro ẹsibuanade ọtọkiet ke mme ukem akpan edinam oro, ndien usọrọ oro odotde ye udia ẹsidian inemesịt ke mme utọ edinam oro. Nte ededi, nso idi se idotde?
16. Nso ndausụn̄ ke nnyịn inyene kaban̄a nnennen eduuwem idem ke mme akpan edinam?
16 Ebede ke nnyịn ndikpep Bible, nnyịn imọfiọk se idide eduuwem oro odotde ọnọ mme Christian, ndien emi edi se nnyịn isitienede kpukpru ini. (Rome 13:12-14; Galatia 5:19-21; Ephesus 5:3-5) Mme mboho otu, edide kaban̄a udianndọ m̀mê kaban̄a ntak efen ekededi, inọhọ nnyịn isọn̄ ndikpọnọde mme edumbet Christian nnyịn nnịm n̄kan̄ kiet m̀mê ndinam n̄kpọ oro nnyịn mîkpanamke ke mme ini efen; m̀mê ndidi mbiomo nnọ nnyịn nditiene kpukpru ido edinam ke idụt emi nnyịn idụn̄de. Ediwak ke otu mme utọ edinam ẹmi ẹkọn̄ọ ke mme edinam nsunsu ido ukpono m̀mê ke nsunsu ekikere, ndien mbon eken ẹbuana mme ido oro mme Christian ẹsọnde in̄wan̄în̄wan̄.—1 Peter 4:3, 4.
17. (a) Nso mme n̄kpọ ẹwụt ẹte ke ẹma ẹtịm ẹdiomi ẹnyụn̄ ẹse enyịn nte odotde ke usọrọ ndọ oro ẹkenamde ke Cana? (b) Nso iwụt nte ke Jesus ama onyịme edinam oro?
17 Ke ikotde John 2:1-11, idịghe ọkpọsọn̄ n̄kpọ nnyịn ndikụt nte ke usọrọ oro ama okpon ye nte ke ata ediwak isenowo ẹma ẹdu do. Nte ededi, ẹma “ẹkot” Jesus ye mme mbet esie nte isenowo; mmọ ikakaha do ke iyoho, idem okposụkedi ekemede ndidi ndusụk mmọ ke nsụhọde n̄kaha ẹma ẹbuana n̄kpọ ye enyene usọrọ oro. Nnyịn imokụt n̄ko ite ke mme “asan̄autom” ẹma ẹdu ọkọrọ ye “etubom,” oro ọkọnọde ndausụn̄ kaban̄a se ẹnọde m̀mê se ẹnamde. Kpukpru emi owụt ete ke ẹma ẹnen̄ede ẹtịm ẹnyụn̄ ẹse ẹban̄a usọrọ oro nte ọfọnde. Mbụk oro etre ke nditịn̄ nte ke ebede ke se enye akanamde ke itie usọrọ oro, Jesus ama “ayarade ubọn̄ Esie.” Nte enye ekpekemek ndinam oro ke idaha oro edieke ekpekedide idat idat usọrọ oro eketiede uyom uyom? Nte eyịghe mîdụhe ikpakanamke.
18. Nso ke ana ẹnen̄ede ẹkere ẹban̄a ke edinam mboho otuowo ekededi?
18 Nso, ndien, kaban̄a akpan edinam ekededi oro nnyịn ikemede ndinịm? Oyom nnyịn iti ite ke uduak edidara mbon en̄wen edi man kpukpru nnyịn “itiene akpanikọ inam n̄kpọ inọ Abasi.” Ntem, ikemke ndidọhọ ke edinam edi mboho “Ntiense.” Owo ekeme ndibụp ete, Nte enye ke akpanikọ ayarade owụt mme owo ẹmi nnyịn idide ye se nnyịn inịmde ke akpanikọ? Nnyịn ikpenyeneke ndida mme utọ idaha oro nte mme ifet ndise adan̄a nte nnyịn ikemede ndimia mbuba ye ererimbot ke mme usụn̄ edinam esie, ke ndisịn idem ke “mbumek obụkidem, ye mbumek enyịn, ye ikpîkpu ubọn̄ uwem emi.” (1 John 2:15, 16) Utu ke oro, ana mme idaha ẹmi nte ẹdotde ẹwụt idaha nnyịn nte Mme Ntiense Jehovah, ndien nnyịn ikpenyene ndikụt nte ke se nnyịn inamde ada ubọn̄ ye ukpono ọsọk Jehovah.—Matthew 5:16; 1 Corinth 10:31-33.
‘Ẹfọn Ido ye Unana Edikụni’
19. Ntak oyomde nnyịn ‘ifọn ido ye kiet eken ye unana n̄kụni’?
19 Nte mme idaha ererimbot ẹkade-ka iso ndidiọk ndien mme owo ẹtịmde-tịm ẹbahade ẹkan, oyom nnyịn inam kpukpru se nnyịn ikekeme ndisọn̄ọ mbọbọ edidianakiet oro odude ke otu mme ata Christian. (Colossae 3:14) Ke ntak emi ana nnyịn inyene “ufiop ufiop ima ke otu idem [nnyịn],” nte Peter akpakde nnyịn ndinam. Ndien, ke mme ata in̄wan̄în̄wan̄ ikọ, enye ama adian ete: “Ẹfọn ido ye kiet eken, ye unana edikụni.” (1 Peter 4:7-9, NW) Nte nnyịn imeben̄e idem ndinam usio-ukot ndiwụt nditọete nnyịn mfọnido, ndinọ idem nnyịn ndinam mfọn nnyụn̄ nnọ un̄wam? Mîdịghe ndi nnyịn imesikụni ke ini utọ ifet oro edemerede? Edieke nnyịn inamde, nnyịn ibiat idatesịt oro nnyịn ikpenyenede inyụn̄ itaba n̄ko utịp inemesịt eke edinam eti n̄kpọ.—Mme N̄ke 3:27; Utom 20:35.
20. Mme edidiọn̄ ewe ẹna ẹbet nnyịn edieke nnyịn inamde edi ido nnyịn ndifọn ido ke ererimbot emi abaharede mi mfịn?
20 Ndinam utom ọtọkiet ye ekemmọ mme Christian, ndiwụt kiet eken eti ido ye mfọnido, eyeda akpakịp edidiọn̄ edi. (Matthew 10:40-42) Ye mme utọ owo oro Jehovah ọn̄wọn̄ọ ete ke imọ “[iyatat] ataya [imọ ifụk] mmọ. Mmọ idikopke aba biọn̄, idinyụn̄ ikopke aba nsatitọn̄.” Ndidu ke ataya Jehovah edi ndidara ukpeme ye mfọnido esie. (Ediyarade 7:15, 16; Isaiah 25:6) Ih, idotenyịn edidara mfọnido Jehovah ke nsinsi enen̄ede ekpere.—Psalm 27:4; 61:3, 4.
Nte Afo Emekeme Ndinam An̄wan̄a?
◻ Nso ke mînaha nnyịn ifụmi edieke nnyịn iyomde ndinyene ata idatesịt ye uyụhọ?
◻ Mmanie ẹdi “nditọ-akpa ye mme ebe-akpa,” ndien didie ke nnyịn ‘ikpasan̄a ise’ mmọ?
◻ Didie ke nnyịn ikpese “mme ododụn̄” ye “isenowo” ke otu nnyịn?
◻ Mmanie ẹdot san̄asan̄a edikere mban̄a mfịn?
◻ Didie ke mme akpan edinam ẹkpewụt ata edu edikama isenowo?
[Mme ndise ke page 16, 17]
Ke mme ini usọrọ nnyịn imekeme ndifọn ido ye isenowo, nditọakpa, mbon oro ẹdude ke utom uyọhọ ini, ye isenowo eken