Ẹsan̄a Nte Ekemmọ Mbonutom ke Akpanikọ

Mme Akpan N̄kpọ Ẹtode Udiana ye Ọyọhọ N̄wed John Ita

IFIỌK akpanikọ edi se ẹdade ẹdiọn̄ọ mme andituak ibuot nnọ Jehovah. (John 8:31, 32; 17:17) Ndisan̄a ke akpanikọ Abasi edi akpan n̄kpọ kaban̄a edinyan̄a. Ndien ana mme asan̄autom Abasi ẹdi ekemmọ mbonutom ke akpanikọ.

Udiana ye ọyọhọ n̄wed apostle John ita eke odudu spirit ẹtịn̄ ẹban̄a ‘edisan̄a ke akpanikọ.’ (2 John 4; 3 John 3, 4) Ọyọhọ n̄wed John ita n̄ko esịn udọn̄ ọnọ edidianakiet nte “ekemmọ mbonutom ke akpanikọ.” (3 John 5-8, NW) Iso-ọfọn, ekewet n̄wed mbiba ẹmi ke m̀mê ke ekperede Ephesus ke n̄kpọ nte 98 C.E. Edi se mmọ ẹtịn̄de ekeme ndinọ ikot Jehovah ufọn mfịn.

Udiana N̄wed John Ọsọn̄ọ Etịn̄ Aban̄a Akpanikọ

Udiana n̄wed John ebemiso ọsọn̄ọ etịn̄ aban̄a akpanikọ ye ima onyụn̄ odụri owo utọn̄ aban̄a “andibiọn̄ọ Christ.” (Ufan̄ikọ 1-7) Ẹkewet n̄wed emi ẹnọ ẹsọk “eti n̄wan emi Abasi ekemekde,” iso-ọfọn owo kiet. Edi edieke ẹkenọde esọk esop, “nditọ” esie ẹkedi mme Christian oro ẹbonde ke spirit ẹmi Abasi “ekemekde” ọnọ uwem eke heaven. (Rome 8:16, 17; Philippi 3:12-14) John ama adat esịt nte ke ndusụk owo ke ‘ẹkesan̄a ke akpanikọ’ ke ntre ẹbiọn̄ọde nsọn̄ibuot. Edi, ama oyom mmọ ẹkpeme idem ye “andibiọn̄ọ Christ,” emi mînyịmeke ite Jesus ama edi ke obụkidem. Mme Ntiense Jehovah mfịn ẹnam mme utọ item oro ẹbiọn̄ọ nsọn̄ibuot.

Ekem John ama ọnọ item ke nte ẹkpenamde n̄kpọ ye mbon nsọn̄ibuot ndien ekem eberi ye ọkpọ ọkpọ eti uduak ye ekọm. (Ufan̄ikọ  8-13) Ebede ke mme utọ utom nte ukwọrọikọ, enye ye mbon en̄wen ẹma ẹsiọn̄ọ mfri emi osụn̄ọde ke mbon oro enye ọkọnọde n̄wed ẹsọk ndikabade esịt. Edidi n̄kukụre ke mmọ ‘ndikpeme’ idemmọ ke n̄kan̄ eke spirit ke mmọ “ẹkpebọ utịp ọyọhọ ọyọhọ,” nte an̄wan̄ade esịnede “anyanya” [uwem] eke heaven emi ẹnịmde ẹnọ mme anam-akpanikọ mbon oro ẹyetde aran. (2 Timothy 4:7, 8) Edieke owo ekededi oro “mînyụn̄ isụkke idem itie ke ukpepn̄kpọ Christ” ekedide ke ọtọ mmọ, mmọ ikenyeneke ‘ndida enye nsịn ke ufọk, m̀mê ndikọm enye’ man ẹfep editiene mbuana ke “idiọk utom” esie. Ke ama eketịn̄ nte ke imọ imodori enyịn ndidi nnyụn̄ ntịn̄ ikọ ye ekemmọ mme andinịm ke akpanikọ oro iso-ye-iso, John ama etre ye ekọm.

Ọyọhọ N̄wed John Ita Ọsọn̄ọ Etịn̄ Aban̄a Edidianakiet

Ẹkenọ ọyọhọ n̄wed John ita ẹsọk Gaius ẹnyụn̄ ẹbemiso ẹtịn̄ ẹban̄a se enye akanamde ọnọ ekemmọ mme andinịm ke akpanikọ. (3Jo Ufan̄ikọ 1-8) Gaius ke ‘akasan̄a ke akpanikọ’ ke ndisọn̄ọ nyịre ke ofụri ukpepn̄kpọ Christian. Enye n̄ko ke ‘akanam utom akpanikọ’ ke ndin̄wam nditọete ẹdide isenowo. John ekewet ete: “Nnyịn . . . imenyene mbiomo ndidara mmọ eke ẹtiede ntem ke mfọnido, man nnyịn ikpakabade idi ekemmọ mbonutom ke akpanikọ.” (NW) Mme Ntiense Jehovah ẹsitat ukem mfọnido oro ẹsịm mme esenyịn oro ẹsan̄ade-san̄a mfịn.

Ke ama okowụt ukpụhọde oro odude ke ufọt edu Diotrephes ye Demetrius, John ama etre n̄wed esie. (Ufan̄ikọ 9-14) Diotrephes emi oyomde ubọn̄ ikowụtke ukpono inọ John idem onyụn̄ odomode ndibịn mmọ oro ẹdarade nditọete ye mfọnido nsion̄o ke esop. Edi, nte ededi, ẹma ẹsiak Demetrius nte eti uwụtn̄kpọ. John ama odori enyịn ndikụt Gaius ke mîbịghike onyụn̄ etre ye ekọm ye eti uduak nte Gaius enyene emem.

[Ekebe/Ndise ke page 30]

Ye N̄wed, Pen, ye Mmọn̄n̄wed: Ama ọdọn̄ John ndikese “eti n̄wan oro Abasi ekemekde” ye “nditọ” esie utu ke ndiwet ediwak n̄kpọ nnọ mmọ ke “n̄wed ye mmọn̄n̄wed.” Utu ke ndikaiso n̄wed Gaius ke “mmọn̄n̄wed ye pen,” apostle oro n̄ko ama odori enyịn ndikụt enye ke mîbịghike. (2 John 1, 12; 3 John 1, 13, 14) Ikọ Greek oro ẹkabarede “pen” (kaʹla·mos) etịn̄ aban̄a ọbọn̄ m̀mê ọkpọ nnyanyan̄a ndien ẹkeme ndikabade enye nte “nnyanyan̄a uwetn̄kpọ.” Ke otu mbon Greek ye mbon Rome, pen oro ẹdade ọkpọ nnyanyan̄a ẹnam ama esisọp inua onyụn̄ ewet n̄kpọ nte pen ntan̄inuen eke ukperedem ini. Ikọ Greek oro meʹlan, ẹmi ẹkabarede “mmọn̄n̄wed” edi ndebe ndebe usụn̄ ndikot ọkpọsọn̄ ikọnsan̄a enyịn̄ oro, meʹlas, emi ọwọrọde “obubịt.” Ke mmọn̄n̄wed eset, n̄kpọ oro ẹkebuakde ekedi obubịt ukan̄ ẹdade ẹto ntọn̄ aran m̀mê ifia oro ẹfọpde, mîdịghe nsem nsem n̄kan̄ otode ikọn̄ m̀mê unam. Nte ido edide, ẹkesitịm mmọn̄n̄wed ẹmi ẹnịm nte nsasat nnyan esan̄ m̀mê eboho, emi ewetn̄wed anamde etie mmọn̄ mmọn̄ ndien edebi n̄kpọ uwetn̄kpọ m̀mê ọkpọ nnyanyan̄a esie. Babru ini oro ekesidi mfefere n̄kpọ ẹnamde akabade edi n̄wed, otode ikpọk ẹnyenede ẹto eto n̄kukịp. Mme akpa Christian ẹkesida utọ babru oro ẹwet leta, n̄wedikpa, ye ikpan̄wed.