Ẹkpeme Idem ye Abian̄a Abian̄a Mme Anditeme!
“Abian̄a abian̄a mme anditeme [ẹyedu] ke otu mbufo.”—2 PETER 2:1.
1. Nso ke Jude okoyom ndiwet mban̄a, ndien ntak emi enye okokpụhọde nneme esie?
EDI n̄kpọ n̄kpaidem didie ntem! Abian̄a abian̄a mme anditeme ke esop Christian akpa isua ikie! (Matthew 7:15; Utom 20:29, 30) Jude, oro ekedide eka kiet ye Jesus, ama enyene ifiọk aban̄a idaha emi. Enye ọkọdọhọ ke ikoyom ndiwet nnọ mme ekemmọ andinịm ke akpanikọ “mban̄a edinyan̄a eke enyenede nnyịn kpukpru,” edi enye ama anam an̄wan̄a ete: “Esịt enyịk mi n̄ko ndiwet n̄kekpe ye mbufo nte, ẹsọn̄ọ ẹn̄wana kaban̄a ikọ mbuọtidem.” Ntak emi Jude okokpụhọde ibuotikọ nneme esie? Koro, enye ọdọhọ, “ndusụk owo ẹma ẹdọn̄ ikpat ndịbe ndịbe ẹdụk [mme esop] . . . ẹwọn̄ọrede mfọn Abasi nnyịn ẹsịn ke obukpo uwem.”—Jude 3, 4.
2. Ntak emi 2 Peter ibuot 2 ye Jude ẹbietde kiet eken ntre?
2 Nte an̄wan̄ade, Jude ekewet emi esisịt ini ke Peter ama ekewet udiana leta esie. Nte eyịghe mîdụhe Jude ama emehe ye leta emi. Ke akpanikọ, enye ama etịn̄ ediwak n̄kpọ oro ẹkedide ukem ye okopodudu leta item esie oro. Ke ntre, nte nnyịn idụn̄ọrede 2 Peter ibuot 2, nnyịn iyọfiọk nte enye edide ukem ye leta Jude.
Mme Utịp Nsunsu Ukpepn̄kpọ
3. Nso iketịbe ke eset emi Peter ọdọhọde ke ayafiak etịbe?
3 Ke Peter ama akakpak nditọete esie ndibiọn̄ utọn̄ ke ikọ mme prọfet, enye ọdọhọ ete: “Edi mme prọfet abian̄a ẹma ẹnyụn̄ ẹbiọn̄ọde ke [Israel eset], kpa nte abian̄a abian̄a mme anditeme ẹdinyụn̄ ẹdude ke otu mbufo.” (2 Peter 1:14–2:1) Ikọt Abasi ke eset ẹkebọ prọfesi akpanikọ, edi mmọ n̄ko ẹkenyene ndin̄wana ye ndiọi ukpepn̄kpọ eke mme nsunsu prọfet. (Jeremiah 6:13, 14; 28:1-3, 15) Jeremiah ekewet ete: “N̄kụt ata n̄kpọ ndidien ke mme prọfet Jerusalem; ke ẹsịn efịbe, ke ẹsan̄a ke nsu.”—Jeremiah 23:14.
4. Ntak emi abian̄a abian̄a mme anditeme ẹdotde nsobo?
4 Ke etịn̄de aban̄a se abian̄a abian̄a mme anditeme ẹdinamde ke esop Christian, Peter ọdọhọ ete: “Mmọ ẹdisan̄a ndịbe ndịbe, ẹda esen ukpepn̄kpọ eke osobode ukpọn̄ owo, ẹdụk ẹtiene mbufo, ẹdinyụn̄ ẹkan̄ kpa [Jesus Christ] emi akafakde mmọ, ẹdinyụn̄ ẹsịn nsobo abuat idemmọ.” (2 Peter 2:1; Jude 4) Akpatre utịp utọ ubahade oro ke akpa isua ikie edi Christendom nte nnyịn idiọn̄ọde enye mfịn. Peter owụt ntak emi abian̄a abian̄a mme anditeme ẹnen̄erede ẹdot nsobo ete: “Ediwak owo ẹyenyụn̄ ẹtiene mmọ ke mbukpo ido mmọ; oto mmọ ke owo ẹyenyụn̄ ẹtịn̄ idiọk ẹdian usụn̄ akpanikọ.”—2 Peter 2:2.
5. Abian̄a abian̄a mme anditeme ẹkedi ntak nso?
5 Kere ban̄a emi! Ke ntak odudu eke abian̄a abian̄a mme anditeme, ediwak owo ke mme esop ẹma ẹsịn idem ke mbukpo ido. Ikọ Greek oro ẹkabarede “mbukpo ido” owụt unana ukpan, unana mfaraidem, ndek ndek ido, oburobụt ido, mbubiam ido. Peter ama ebemiso etịn̄ ete ke mme Christian ẹma ‘ẹbọhọ mbiara emi idiọkitọn̄ esịnde ke ererimbot.’ (2 Peter 1:4) Edi ndusụk owo ẹma ẹyom ndifiak mbịne mbiara oro, ndien abian̄a abian̄a mme anditeme ke mme esop ẹkenen̄ede ẹdi ntak! Ntem ẹma ẹtịn̄ idiọk ẹdian usụn̄ akpanikọ. Ekedi n̄kpọ mfụhọ didie ntem! Ke akpanikọ, emi edi n̄kpọ oro kpukpru Mme Ntiense Jehovah mfịn ẹkpenyenede nditịm nnọ ntịn̄enyịn. Nnyịn ikpedehede ifre ite ke, ọkọn̄ọde ke eduuwem nnyịn, nnyịn imekeme ndida itoro nsọk Jehovah Abasi ye ikọt esie mîdịghe ida esuene isọk mmọ.—Mme N̄ke 27:11; Rome 2:24.
Ndida Nsunsu Ukpepn̄kpọ Ndụk Ndi
6. Nso inụk abian̄a abian̄a mme anditeme, ndien didie ke mmọ ẹyom se idọn̄de mmọ?
6 Owụt eti ibuot nnyịn ndifiọk nte abian̄a abian̄a mme anditeme ẹdade ndiọi ekikere mmọ ẹdụk ẹdi. Peter ama ebem iso etịn̄ ete ke mmọ ẹnam emi ndịbe ndịbe, m̀mê ke n̄kari n̄kari usụn̄ oro owo mîfiọkke. Enye adian ete: “Ke mbumek mmọ ke ẹyeda ikọ abian̄a ẹkama mbufo ẹnam mbubịne.” Udọn̄ ibụk onụk abian̄a abian̄a mme anditeme, nte ẹsọn̄ọde ẹtịn̄ emi ke nte ẹkabarede ke The Jerusalem Bible: “Mmọ ẹyesịn ifịk ẹyom ndida mme etabi etabi ikọ ndep mbufo nnọ idemmọ.” Ukem ntre, edikabade eke James Moffatt ọdọhọ mi ete: “Ke idiọkitọn̄ mmọ mmọ ẹyeda mme n̄kari n̄kari eneni ẹda ẹnam mbufo mbubịne.” (2 Peter 2:1, 3) Nneminua abian̄a abian̄a mme anditeme ekeme nditie owo oro mîdụhe ke ukpeme ke n̄kan̄ eke spirit nte akpanikọ, edi mmọ ẹtịm ẹbon mme ikọ mmọ ‘man ẹdep’ mme owo, ẹkpekde mmọ ẹsịn ke ndinam mme ibụk ibụk uduak mbon abian̄a oro.
7. Ewe ukpepn̄kpọ akwaifiọk ikọwọrọ etop ke akpa isua ikie?
7 Nte eyịghe mîdụhe, ekikere ererimbot ini oro akakara abian̄a abian̄a mme anditeme eke akpa isua ikie oro. Etisịm ini emi Peter ekewetde leta esie, ukpepn̄kpọ akwaifiọk ẹkekotde ukpepn̄kpọ ndịben̄kpọ ido ukpono ye akwaifiọk owo ama atara asuana. Mbon ukpepn̄kpọ ido ukpono ye eke akwaifiọk owo ẹkenịm ke akpanikọ ẹte ke kpukpru n̄kpọ ẹdi idiọk ye nte ke n̄kukụre eti n̄kpọ edi eke spirit. Ntem, ndusụk mmọ ẹkedọhọ ẹte ke se owo anamde ye ikpọkidem esie inamke n̄kpọ. Mmọ ẹma ẹneni ẹte ke nte ini akade owo idinyeneke ikpọkidem emi. Mmọ ẹma ẹberi ẹte, ke ntre, idiọkn̄kpọ ikpọkidem—esịnede idan̄—idịghe akpan n̄kpọ. Nte an̄wan̄ade, mme utọ ekikere oro ẹma ẹtọn̄ọ ndikara ndusụk mbon oro ẹkedọhọde ke idi eke Ido Ukpono Christ.
8, 9. (a) Ewe nyoyụrọde ekikere ikotụk ndusụk mme akpa Christian? (b) Nte Jude etịn̄de, ndusụk owo ke esop ẹkenam nso?
8 Eyen ukpepn̄kpọ Bible kiet ama etịn̄ ete ke “ama odu mme owo ke Ufọkabasi ẹmi ẹkekwan̄ade ukpepn̄kpọ mfọn,” m̀mê “mfọnido oro owo mîdotke.” (Ephesus 1:5-7, NW) Nte enye ọdọhọde, eneni ndusụk owo akaka ntem: “Nte mbufo ẹdọhọ ke [mfọnido] Abasi [oro owo mîdotke] awak ekem ndifụk kpukpru idiọkn̄kpọ? . . . Do ẹyak nnyịn ika iso inam idiọkn̄kpọ, koro [mfọnido] Abasi [oro owo mîdotke] ekeme ndisọhi kpukpru idiọkn̄kpọ. Ke akpanikọ adan̄a nte nnyịn inamde idiọkn̄kpọ ntre ke ifet odu ọnọ [mfọnido] Abasi [oro owo mîdotke] ndinam n̄kpọ.” Nte akanam omokop ekikere oro etiede nyụrọde nyụrọde akan emi?
9 Apostle Paul ama abiat ukwan̄ ekikere aban̄ade mbọm Abasi efep ke ini enye okobụpde ete: “Nte nnyịn ikpamana iyịre [ke] idiọkn̄kpọ, man [mfọnido oro owo mîdotke, NW] ọdọdiọn̄ awak?” Enye ama obụp n̄ko ete: “Nte idinam idiọkn̄kpọ, sia nnyịn mîdụhe ke idak ibet, edi idude ke idak [mfọnido oro owo mîdotke]?” Paul ama ọbọrọ mbụme kiet kiet ye nsọn̄uyo ete: “Nsa nnyịn O!” (Rome 6:1, 2, 15) In̄wan̄în̄wan̄, nte Jude etịn̄de, ndusụk owo ẹma ‘ẹwọn̄ọde mfọnido Abasi nnyịn oro owo mîdotke ẹsịn ke mbukpo uwem.’ Nte ededi, Peter ọdọhọ ete ke amaedi utọ mbon oro ‘nsobo iyetke idap.’—Jude 4; 2 Peter 2:3.
Mme Ntọt Uwụtn̄kpọ
10, 11. Ewe uwụtn̄kpọ ita ke Peter ọnọ?
10 Man ọsọn̄ọ nte ke Abasi ayanam n̄kpọ aban̄a mme andikokoi nnam idiọkn̄kpọ, Peter ọnọ mme ntọt uwụtn̄kpọ ita oto N̄wed Abasi. Akpa, enye ewet ete: ‘Abasi ikayakke mme angel ẹmi ẹkeduede ẹbọhọ.’ Jude ọdọhọ ke mmọemi “[ikomụmke] itie odudu eke mmọ ikama, ẹdi ẹkpọn̄de ebietidụn̄ idemmọ” ke heaven. Mmọ ẹma ẹdi isọn̄ mbemiso Ukwọ ẹnyụn̄ ẹmen idem eke obụk ẹsịne man ẹnyene ebuana idan̄ ye nditọiban. Nte ufen ẹnọde kaban̄a ukwan̄, oburobụt ido mmọ oro mîkemke ye obot, ẹma ẹtop mmọ ẹsịn ke “Tartarus,” m̀mê nte mbụk Jude ọdọhọde, ẹma “ẹkọbi [mmọ] ke nsinsi ebuka ẹnịm ke ekịm, ẹte, ẹtie ẹbet ikpe Akwa Usen oro.”—2 Peter 2:4, NW; Jude 6; Genesis 6:1-3.
11 Ekem, Peter etịn̄ aban̄a mbon eyo Noah. (Genesis 7:17-24) Enye ọdọhọ ke eyo Noah Abasi ‘ikayakke akani ererimbot ọbọhọ ke ini Enye anamde ukwọ ọtọ ofụk ekondo eke mîbakke Abasi.’ Ke akpatre, Peter ewet ete ke Abasi ekenịm “uwụtn̄kpọ ọnọ mmọ eke mîdibakke Abasi” ke ‘ndifọp mme obio Sodom ye Gomorrah ẹkabade ntọn̄.’ Jude adian ntọt efen efen do ete ke mbon oro ‘ẹkesịn idem ke use ye ido eke mîkemke.’ (2 Peter 2:5, 6; Jude 7) Irenowo ikenyeneke oburobụt ebuana idan̄ ye iban kpọt edi ẹma ẹkabade ẹfiop ke idiọk udọn̄ ẹyom irenowo efen, idem ẹkam ẹfiopde ẹyom ndiọi unam.—Genesis 19:4, 5; Leviticus 18:22-25.
12. Nte Peter etịn̄de, didie ke ẹnọ edinen eduuwem utịp?
12 Edi, kpa ke ukem ini oro, Peter ọdọhọ ete ke Jehovah edi andinọ mbon oro ẹnamde n̄kpọ esie ke edinam akpanikọ utịp. Ke uwụtn̄kpọ, enye obụk nte Abasi ‘ekekpemede Noah, ọkwọrọ edinen ido, ye owo itiaba en̄wen’ ke ini Enye adade Ukwọ edi. Enye etịn̄ n̄ko aban̄a nte Jehovah akanyan̄ade “Lot, edinen owo oro” ke ini Sodom, eberide ete: “[Jehovah, NW] ọmọfiọk ndinyan̄a mmọemi ẹten̄ede Enye nsio ke idomo, ndinyụn̄ mmụm mme idiọkowo nnịm ke itie ufen, tutu esịm usen ikpe.”—2 Peter 2:5, 7-9.
Mme Edinam Ẹdotde Ufen
13. Mmanie akpan akpan ke ẹnịm ẹnọ nsobo, ndien mmọ nte an̄wan̄ade ẹsịn idem ke ewe ikpîkpu ekikere?
13 Peter anyan ubọk owụt mbon oro ẹnen̄erede ẹdot ubiomikpe Abasi, oro edi, “mmọ eke ẹsan̄ade ke ndek ndek idiọkitọn̄ obụkidem ẹdu uwem ẹnyụn̄ ẹsịnde mme andikara.” Iyatesịt Peter ekeme ndin̄wan̄a nnyịn nte enye ọdọhọde ete: “Mbon emiom ye mbon nsọn̄ibuot, inamke mmọ ndịk ndisụn̄i mme akama itie ubọn̄.” Jude ewet ete ke “mme mmọ oro n̄ko ẹsabade obụkidem mmọ ke ikpîkpu ekikere mmọ . . . ẹnyụn̄ ẹsụn̄i mme akama ikpọ itie.” (2 Peter 2:10; Jude 8) Ikpîkpu ekikere mmọ ekeme ndibuana ndek ndek mfụmmfụm ekikere oro esịnde udọn̄ ọnọ edibịne oburobụt ediyụhọ udọn̄ idan̄. Ke nso usụn̄ifiọk, nte ededi, ke mmọ ‘ẹsịn mme andikara’ ẹnyụn̄ “ẹsụn̄i mme akama ikpọ itie”?
14. Ke ewe usụn̄ifiọk ke abian̄a abian̄a mme anditeme ‘ẹsịn mme andikara’ ẹnyụn̄ ‘ẹsụn̄i mme akama itie ubọn̄’?
14 Mmọ ẹnam ntre ke emi mmọ ẹsịnde odudu oro Abasi enịmde ke ndek. Mbiowo Christian ẹda ke ibuot ubọn̄ ubọn̄ Jehovah Abasi ye Eyen esie ndien, nte utịp, ẹnọ mmọ ndusụk ubọn̄. Edi akpanikọ, mmọ ẹsinam ndudue, nte Peter ke idemesie akanamde, edi N̄wed Abasi esịn udọn̄ ọnọ mme andibuana ke esop ete ẹsụk ibuot ẹnọ utọ mbon oro ẹnyenede ubọn̄ mi. (Mme Hebrew 13:17) Ndudue mmọ inọhọ owo ntak ndomokiet ndisụn̄i mmọ. Peter ọdọhọ ete ke mme angel ‘ikosụn̄ike abian̄a abian̄a mme anditeme ke ikpe,’ okposụkedi oro ekenen̄erede odot. Peter aka iso ete: “Edi mme mmọemi, nte n̄kpọ uwem eke mînyeneke ibuot, eke ẹmanade ke uduot unam, man ẹkpemụm mmọ ẹwot, ẹsụn̄i ẹban̄a se mmọ mîfiọkke; ẹyeda nsobo unam ẹsobo mmọ; mmọ ẹyenyụn̄ ẹbọ idiọk ke utịp idiọk edinam mmọ.”—2 Peter 2:10-13.
“Ke Ini . . . Ẹdiade Udia ye Mbufo”
15. Nso usụn̄ ke abian̄a abian̄a mme anditeme ẹkama, ndien m̀mọ̀n̄ ke mmọ ẹda etabi mmọ ẹka?
15 Okposụkedi ndiọi owo ẹmi ‘ẹbatde ẹte edi n̄kpọ inemesịt ndidu etịme uwem ke uwemeyo’ ẹnyụn̄ ẹdide “ọkọp ye ndo,” mmọ ẹdi mbon n̄kari n̄ko. Mmọ ẹnam n̄kpọ “ndịbe ndịbe,” ẹkama “ikọ abian̄a,” nte Peter ekebemde iso etịn̄. (2 Peter 2:1, 3, 13) Ntem ekeme ndidi mmọ ke in̄wan̄în̄wan̄ usụn̄ idibiọn̄ọke mme ukeme oro mbiowo ẹsịnde ndisọn̄ọ mmụm mme idaha ido uwem Abasi n̄kama m̀mê ndibịne ndiyụhọ udọn̄ idan̄ idemmọ an̄wan̄wa. Utu ke oro, Peter ọdọhọ ete ke mmọ ẹnam “ido etịme etịme ke usọrọ ima . . . ye mbufo.” Ndien Jude ewet ete: “Mmọ ẹdi ndịbe ndịbe itiat ke itie usọrọ ima mbufo.” (Jude 12) Ih, kpa nte ikpọ edet itiat ke isọn̄ mmọn̄ ekemede ndikịm idak ubom nsịrede, anamde awat nsụn̄ikan̄ oro mîdụhe ke edidemede akpa ke mmọn̄, abian̄a abian̄a mme anditeme ẹma ẹbiat mbon oro mîkodụhe ke ukpeme emi mmọ ẹkenyenede mbubịk ima ẹnọ ke ini “usọrọ ima.”
16. (a) Nso ikedi “usọrọ ima,” ndien mme idaha ewe ẹbietde oro ke mme oburobụt owo ẹnam n̄kpọ mfịn? (b) Abian̄a abian̄a mme anditeme ẹwụk ntịn̄enyịn mmọ ke mmanie, ntre nso ke ana utọ mbon oro ẹnam?
16 Mme “usọrọ ima” ẹmi nte an̄wan̄ade ẹkedi mme edinam ebuana otuowo ẹmi mme Christian akpa isua ikie ẹkesisopde idem ọtọkiet man ẹdara udia ye ebuana. Mme Ntiense Jehovah mfịn ẹsisop idem ọtọkiet n̄ko kaban̄a edinam ebuana otuowo, ndusụk ke mme edinam usọrọ ndọ, uwọrọ an̄wa, m̀mê mboho ọtọkiet ke mbubịteyo. Didie ke mme oburobụt owo ẹkeme ndida mme utọ edinam oro ntap mbon oro ẹduọde ẹdụk mmọ ubọk? Peter ewet ete: “Enyịn mmọ ẹyọhọ ye efịbe . . . mmọ ẹtap owo ẹmi ẹnanade iwụk.” Mmọ ẹwụk esịt mmọ oro ‘emehede ye mbumek’ ke mbon oro ẹnanade iwụk ke n̄kan̄ eke spirit emi ẹkpude ndinam akpanikọ enen̄ede odụk mmọ esịt. Ntre kpep n̄kpọ to se iketịbede ke eyo Peter, nyụn̄ du ke ukpeme! Biọn̄ọ ndek ndek usio-ukot ekededi, kûnyụn̄ uyak uyai ikpọkidem owo emi anamde mme oburobụt usio-ukot abian̄a fi!—2 Peter 2:14.
“Afan̄ Balaam”
17. Nso ikedi “afan̄ Balaam,” ndien didie ke enye okotụk nditọ Israel 24,000?
17 Mbon “isụn̄i” ẹmi ẹma ẹdiọn̄ọ akpanikọ ini kiet ko. Mmọ ẹkeme ndisụk ntie nte ke ẹsọn̄ idem ke esop. Edi Peter ọdọhọ ete: “Mmọ ẹkpọn̄ edinen usụn̄ ẹdiyo ẹbịne afan̄ Balaam eyen Beor, emi akamade utịp ukwan̄ido.” (2 Peter 2:14, 15) Afan̄ prọfet Balaam ekedi ndinọ item mban̄a oburobụt usụn̄ etabi kaban̄a ọkpọkpọ udori esie. Enye ama eteme Edidem Balak eke Moab ete ke Abasi oyosụn̄i Israel edieke ẹkemede nditap mme owo ẹmi ẹnam use. Nte utịp, nditọiban Moab ẹma ẹtap ediwak ke otu ikọt Abasi, ndien ẹma ẹsobo owo 24,000 ke ntak oburobụt ido mmọ.—Numbers 25:1-9; 31:15, 16; Ediyarade 2:14.
18. Balaam ekesịn ifịk adan̄a didie, ndien nso ke utịp owụt ọnọ abian̄a abian̄a mme anditeme?
18 Peter ọdọhọ ete ke ẹma ẹbiọn̄ọ Balaam ke ini ass esie eketịn̄de ikọ ọnọ enye, edi Balaam ama ‘ama utịp ukwan̄ido’ tutu idem ke ini emi etịbede, enye iketreke “ndisịme ido esie.” (2 Peter 2:15, 16) Emi ọkọdiọk didie ntem! Ọdọdiọk ọnọ owo eke etiede nte Balaam emi odomode ndibiat ikọt Abasi ebe ke nditap mmọ nsịn ke edinam use! Balaam ama akpa ke idiọkn̄kpọ esie, uwụtn̄kpọ ke se iditịbede inọ kpukpru mbon oro ẹtienede afan̄ esie.—Numbers 31:8.
Ndiọi Etabi Mmọ
19, 20. (a) Ẹmen mbon oro ẹbietde Balaam ẹdomo ye nso, ndien ntak-a? (b) Mmanie ke mmọ ẹtap, ndien didie? (c) Ntak emi nnyịn ikemede ndidọhọ ke mme etabi mmọ ẹdi mbuka, ndien didie ke nnyịn ikeme ndikpeme idem nnyịn ye mbon en̄wen mbiọn̄ọ mmọ?
19 Ke etịn̄de aban̄a mbon oro ẹbietde Balaam, Peter ewet ete: “Mmọ ẹdi idịm [mme, obube mmọn̄] eke mîsiahake mmọn̄, ye akarika [m̀mê, idiọkenyọn̄] eke oyobio emende efịme ebe.” Ye akaisan̄ emi itọn̄ asatde ke desat, obube mmọn̄ oro mmọn̄ mîdụhe ekeme ndiwọrọ n̄kpa. Eyịghe idụhe ‘ẹnịmde ata obubịt ekịm’ ẹnọ mbon oro ẹbietde mme utọ n̄kpọ oro! Peter aka iso ete: “Koro mmọ ẹtịn̄ ikpîkpu ikọ n̄kponinua, ẹnyụn̄ ẹda obukpo ido ẹsan̄a ke idiọkitọn̄ obụkidem, ẹtap mmọemi ke ẹbọbọhọ mbon nduyo.” Mmọ ẹtap mme ọkọi ebe ke ‘ndin̄wọn̄ọ ndinọ mmọ ubọhọ ufụn,’ ntem ke Peter ọdọhọ, ke adan̄aemi “mmọ ke idemmọ ẹdụkde ufụn ẹnọ nsobo.”—2 Peter 2:17-19; Galatia 5:13.
20 Etabi eke mme utọ idiọk anditeme oro edi mbuka. Mmọ ẹkeme ndidọhọ, ke uwụtn̄kpọ, ete: ‘Abasi ọdiọn̄ọ ke nnyịn imenyene mmeme imonyụn̄ inyene udọn̄ idan̄. Ntre edieke nnyịn isịnde idem inyụn̄ iyụhọde udọn̄ idan̄ nnyịn, Abasi ayatua nnyịn mbọm. Edieke nnyịn iyararede idiọkn̄kpọ nnyịn, enye eyefen kpa nte enye ekefende ke ini nnyịn ke akpa ikodụkde akpanikọ.’ Ti ete ke Devil akada mbiet usụn̄ ntem anam n̄kpọ ye Eve, ọn̄wọn̄ọde ọnọ enye nte ke enye ekeme ndinam idiọkn̄kpọ ye unana edibọ ufen. Ke eke Eve, enye ọkọdọhọ ke edinam idiọkn̄kpọ ndian Abasi ọyọnọ enye ifiọk ye ubọhọ-ufụn. (Genesis 3:4, 5) Edieke nnyịn ikụtde utọ obukpo owo oro abuanade ye esop, nnyịn imenyene mbiomo ndikpeme idem nnyịn ọkọrọ ye mmọ en̄wen ebe ke ndisian mbon oro ẹnyenede mbiomo ke esop Christian mban̄a utọ owo oro.—Leviticus 5:1.
Nnennen Ifiọk Ọnọ Ukpeme
21-23. (a) Nso idi mme utịp edikpu ndida nnennen ifiọk nnam n̄kpọ? (b) Nso mfịna efen ke Peter eneme oro idikerede iban̄a?
21 Peter eberi ikpehe leta esie emi ebe ke nditịn̄ mban̄a mme utịp edikpu ndida ifiọk nnam n̄kpọ emi enye ke ntọn̄ọ ntọn̄ọ ọkọdọhọde ke edi akpan n̄kpọ ọnọ “uwem ye uten̄e Abasi.” (2 Peter 1:2, 3, 8) Enye ewet ete: “Koro edieke mmọ ẹma ẹkesan̄a ke [nnennen ifiọk, NW] Ọbọn̄ ye Andinyan̄a nnyịn Jesus Christ ẹbọhọ se isabarede owo uwem ke ererimbot, ndien mmọ ẹtọn̄ọ ntak ẹkọmọ ke esịt, ẹnyụn̄ ẹyak n̄kpọ oro akan mmọ ubọk, akpatre itie mmọ akabade ọdiọk akan akpa.” (2 Peter 2:20) Edi n̄kpọ mfụhọ didie ntem! Utọ mbon oro ke eyo Peter ẹma ẹtop ọsọn̄urua idotenyịn uwem eke heaven oro mîkemeke ndikpa ẹduọk ebe ke ndiyụhọ udọn̄ idan̄ ke esisịt ini.
22 Ntre Peter ọdọhọ ete: “Ọkpọfọn ye mmọ ndikpetre ndifiọk usụn̄ edinen ido akan ndifiọk mma, ndien ndiwọn̄ọde n̄kpọn̄ edisana ibet eke ẹnọde mmọ. Ọwọrọ ye mmọ ada ekekem ye n̄ke akpanikọ emi, Ebua akabade adia se ọkpọhide; edi eke ẹkeyetde mmọn̄ afiak aka ndiwere ke mbat.”—2 Peter 2:21, 22; Mme N̄ke 26:11.
23 Mfịna efen oro nte an̄wan̄ade ọkọtọn̄ọde nditụk mme akpa Christian, ekedi ukem ye enyeoro otụkde ndusụk owo mfịn. Ke ini oro, ndusụk owo nte an̄wan̄ade ẹma ẹseme ẹban̄a un̄wọn̄ọ edidu Christ oro etiede nte ididịghe. Ẹyak nnyịn idụn̄ọde nte Peter esede aban̄a n̄kpọ emi.
Nte Afo Emeti?
◻ Ewe ntọt uwụtn̄kpọ ita ke Peter ọnọ?
◻ Didie ke abian̄a abian̄a mme anditeme ‘ẹsịn mme andikara’?
◻ Nso idi afan̄ Balaam, ndien didie ke mbon oro ẹtienede enye ẹdomo nditap mbon en̄wen?
◻ Nso idi mme utịp edikpu ndida nnennen ifiọk nnam n̄kpọ?
[Ndise ke page 16, 17]
Balaam edi ntọt uwụtn̄kpọ