Anie Edi Michael Emi Edide Etubom Mme Angel?

Se Bible ọdọhọde

Michael, emi ndusụk ufọkabasi ẹsikotde “Saint Michael,” edi enyịn̄ emi ẹkenọde Jesus mbemiso enye edide isọn̄ ye ke enye ama ọkọnyọn̄ heaven.a Ke Moses ama akakpa, Michael ama an̄wana ye Satan, ekem enye ama an̄wam angel kiet ebe aka ọkọdọhọ prọfet Daniel se Abasi ọkọdọn̄de enye. (Daniel 10:13, 21; Jude 9) Michael ekesinam n̄kpọ etiene se enyịn̄ esie ọwọrọde. Enyịn̄ esie ọwọrọ, “Anie Etie Nte Abasi?” Enye ama anam ẹdiọn̄ọ ke Jehovah ikpọn̄ odot ndikara onyụn̄ esin̄wana ye mme asua Abasi.—Daniel 12:1; Ediyarade 12:7.

Se mme n̄kpọ emi anamde idiọn̄ọ ke Jesus edi Michael emi edide etubom mme angel.

• Michael edi “etubom mme angel.” (Jude 9) Enyịn̄ oro “etubom mme angel” odu itie iba kpọt ke Bible. Itie iba oro ẹsiakde enye do owụt ke ẹtịn̄ ẹban̄a angel kiet kpọt. Itie kiet ke otu oro ọdọhọ ke Ọbọn̄ nnyịn Jesus emi ẹkenamde ẹset “oyoto heaven osụhọde ye ọkpọsọn̄ uyo, ye uyo etubom mme angel.” (1 Thessalonica 4:16) Ẹdọhọ ke Jesus enyene uyo etubom mme angel sia enye edi Michael, etubom mme angel.

• Michael esida udịmekọn̄ Abasi usụn̄. “Michael ye mme angel esie ẹn̄wana ekọn̄ ye dragon” emi ẹkọtde Satan. (Ediyarade 12:7) Michael edi angel emi enyenede odudu akan ke heaven sia ẹkot enye “kiet ke otu mme ebeiso mbọn̄,” ye “akwa ọbọn̄.” (Daniel 10:13, 21; 12:1) David E. Aune, ataifiọk emi esinamde n̄kpọ aban̄a Obufa Testament ọdọhọ ke mme udorienyịn̄ emi anam ẹdiọn̄ọ Michael nte “etubom ekọn̄ emi esidade mme angel eken usụn̄.”

  Bible asiak owo en̄wen emi enyenede odudu akan udịm mme angel eken. Enye etịn̄ aban̄a “ediyarade Ọbọn̄ Jesus emi editode heaven edi ye mme okopodudu angel esie ke ikan̄ eke asakde, nte enye adade usiene ọsọk mmọ.” (2 Thessalonica 1:7, 8; Matthew 16:27) Jesus ama “ọnyọn̄ aka heaven, . . . ẹma ẹnyụn̄ ẹnam mme angel ye mme andikara ye mme enyene-odudu ẹsụk ibuot ẹnọ enye.” (1 Peter 3:21, 22) Abasi ikemeke ndimek Jesus ye Michael ẹdi etubom ndisana angel. Kpukpru se inemede emi anam inịm ke kpasụk Jesus oro edi Michael.

• Michael “ayadaha ada” ke “ini nnanenyịn.” (Daniel 12:1) Ke n̄wed Daniel, ẹsiwak ndida ikọ oro “ayadaha ada” ẹtịn̄ ẹban̄a edidem ndidaha nda nnam akpan n̄kpọ. (Daniel 11:2-4, 21) Jesus Christ emi ẹsinyụn̄ ẹkotde “Ikọ Abasi,” ayanam akpan n̄kpọ nte “Edidem ndidem.” Enye oyosobo kpukpru mme asua Abasi onyụn̄ ekpeme ikọt Abasi. (Ediyarade 19:11-16) Enye edinam oro ke ini “akwa ukụt, . . . orụk eke akanam mîdụhe toto ke editọn̄ọ ererimbot.”—Matthew 24:21, 42.